ക്ഷമസ്വ ഭഗവത്യംബ ക്ഷമാ ശീലേ പരാത്പരേ।
ശുദ്ധ സത്വ സ്വരൂപേച കോപാദി പരി വര്ജിതേ॥

ഉപമേ സർവ സാധ്വീനാം ദേവീനാം ദേവ പൂജിതേ।
ത്വയാ വിനാ ജഗത്സർവം മൃത തുല്യംച നിഷ്ഫലമ്।

സർവ സംപത്സ്വരൂപാത്വം സർവേഷാം സർവ രൂപിണീ।
രാസേശ്വര്യധി ദേവീത്വം ത്വത്കലാഃ സർവയോഷിതഃ॥

കൈലാസേ പാർവതീ ത്വംച ക്ഷീരോധേ സിംധു കന്യകാ।
സ്വര്ഗേച സ്വര്ഗ ലക്ഷ്മീ സ്ത്വം മര്ത്യ ലക്ഷ്മീശ്ച ഭൂതലേ॥

വൈകുംഠേച മഹാലക്ഷ്മീഃ ദേവദേവീ സരസ്വതീ।
ഗംഗാച തുലസീത്വംച സാവിത്രീ ബ്രഹ്മ ലോകതഃ॥

കൃഷ്ണ പ്രാണാധി ദേവീത്വം ഗോലോകേ രാധികാ സ്വയമ്।
രാസേ രാസേശ്വരീ ത്വംച ബൃംദാ ബൃംദാവനേ വനേ॥

കൃഷ്ണ പ്രിയാ ത്വം ഭാംഡീരേ ചംദ്രാ ചംദന കാനനേ।
വിരജാ ചംപക വനേ ശത ശൃംഗേച സുംദരീ।

പദ്മാവതീ പദ്മ വനേ മാലതീ മാലതീ വനേ।
കുംദ ദംതീ കുംദവനേ സുശീലാ കേതകീ വനേ॥

കദംബ മാലാ ത്വം ദേവീ കദംബ കാനനേ2പിച।
രാജലക്ഷ്മീഃ രാജ ഗേഹേ ഗൃഹലക്ഷ്മീ ര്ഗൃഹേ ഗൃഹേ॥

ഇത്യുക്ത്വാ ദേവതാസ്സർവാഃ മുനയോ മനവസ്തഥാ।
രൂരൂദുര്ന മ്രവദനാഃ ശുഷ്ക കംഠോഷ്ഠ താലുകാഃ॥

ഇതി ലക്ഷ്മീ സ്തവം പുണ്യം സർവദേവൈഃ കൃതം ശുഭമ്।
യഃ പഠേത്പ്രാതരുത്ഥായ സവൈസർവം ലഭേദ്ധ്രുവമ്॥

അഭാര്യോ ലഭതേ ഭാര്യാം വിനീതാം സുസുതാം സതീമ്।
സുശീലാം സുംദരീം രമ്യാമതി സുപ്രിയവാദിനീമ്॥

പുത്ര പൌത്ര വതീം ശുദ്ധാം കുലജാം കോമലാം വരാമ്।
അപുത്രോ ലഭതേ പുത്രം വൈഷ്ണവം ചിരജീവിനമ്॥

പരമൈശ്വര്യ യുക്തംച വിദ്യാവംതം യശസ്വിനമ്।
ഭ്രഷ്ടരാജ്യോ ലഭേദ്രാജ്യം ഭ്രഷ്ട ശ്രീര്ലഭേതേ ശ്രിയമ്॥

ഹത ബംധുര്ലഭേദ്ബംധും ധന ഭ്രഷ്ടോ ധനം ലഭേത്॥
കീര്തി ഹീനോ ലഭേത്കീര്തിം പ്രതിഷ്ഠാംച ലഭേദ്ധ്രുവമ്॥

സർവ മംഗളദം സ്തോത്രം ശോക സംതാപ നാശനമ്।
ഹര്ഷാനംദകരം ശാശ്വദ്ധര്മ മോക്ഷ സുഹൃത്പദമ്॥

॥ ഇതി സർവ ദേവ കൃത ലക്ഷ്മീ സ്തോത്രം സംപൂര്ണമ് ॥