రాగం: యదుకుల కాంభోజి
28 హరికాంభోజి జన్య
ఆ: స రి2 మ1 ప ద2 స
అవ: స ని2 ద2 ప మ1 గ3 రి2 స
తాళం: ఆది

పల్లవి
కొలని దోపరికి గొబ్బిళ్ళో యదు ।
కుల స్వామికిని గొబ్బిళ్ళో ॥ (2)

చరణం 1
కొండ గొడుగుగా గోవుల గాచిన ।
కొండొక శిశువునకు గొబ్బిళ్ళో । (2)
దండగంపు దైత్యుల కెల్లను తల ।
గుండు గండనికి గొబ్బిళ్ళో ॥
కొలని దోపరికి గొబ్బిళ్ళో యదు ..(ప..) (2)

చరణం 2
పాప విధుల శిశుపాలుని తిట్టుల ।
కోపగానికిని గొబ్బిళ్ళో । (2)
యేపున కంసుని యిడుమల బెట్టిన ।
గోప బాలునికి గొబ్బిళ్ళో ॥
కొలని దోపరికి గొబ్బిళ్ళో యదు ..(ప..) (2)

చరణం 3
దండివైరులను తరిమిన దనుజుల ।
గుండె దిగులునకు గొబ్బిళ్ళో । (2)
వెండిపైడి యగు వేంకట గిరిపై ।
కొండలయ్యకును గొబ్బిళ్ళో ॥
కొలని దోపరికి గొబ్బిళ్ళో యదు ..(ప..) (2)