గజాననాయ గాఙ్గేయసహజాయ సదాత్మనే ।
గౌరీప్రియతనూజాయ గణేశాయాస్తు మఙ్గళమ్ ॥ 1 ॥
నాగయజ్ఞోపవీతాయ నతవిఘ్నవినాశినే ।
నన్ద్యాదిగణనాథాయ నాయకాయాస్తు మఙ్గళమ్ ॥ 2 ॥
ఇభవక్త్రాయ చేన్ద్రాదివన్దితాయ చిదాత్మనే ।
ఈశానప్రేమపాత్రాయ చేష్టదాయాస్తు మఙ్గళమ్ ॥ 3 ॥
సుముఖాయ సుశుణ్డాగ్రోక్షిప్తామృతఘటాయ చ ।
సురబృన్దనిషేవ్యాయ సుఖదాయాస్తు మఙ్గళమ్ ॥ 4 ॥
చతుర్భుజాయ చన్ద్రార్ధవిలసన్మస్తకాయ చ ।
చరణావనతానర్థ తారణాయాస్తు మఙ్గళమ్ ॥ 5 ॥
వక్రతుణ్డాయ వటవే వన్ద్యాయ వరదాయ చ ।
విరూపాక్షసుతాయాస్తు విఘ్ననాశాయ మఙ్గళమ్ ॥ 6 ॥
ప్రమోదామోదరూపాయ సిద్ధివిజ్ఞానరూపిణే ।
ప్రకృష్టపాపనాశాయ ఫలదాయాస్తు మఙ్గళమ్ ॥ 7 ॥
మఙ్గళం గణనాథాయ మఙ్గళం హరసూనవే ।
మఙ్గళం విఘ్నరాజాయ విఘ్నహర్త్రేస్తు మఙ్గళమ్ ॥ 8 ॥
శ్లోకాష్టకమిదం పుణ్యం మఙ్గళప్రదమాదరాత్ ।
పఠితవ్యం ప్రయత్నేన సర్వవిఘ్ననివృత్తయే ॥ 9 ॥
ఇతి శ్రీ గణపతి మఙ్గళాష్టకమ్ ।