ଶ୍ରୀଗୋପାଲକୃଷ୍ଣାଯ ନମଃ ॥
ଶ୍ରୀଶେଷ ଉଵାଚ ॥
ଓଂ ଅସ୍ଯ ଶ୍ରୀକୃଷ୍ଣାଷ୍ଟୋତ୍ତରଶତନାମସ୍ତୋତ୍ରସ୍ଯ।
ଶ୍ରୀଶେଷ ଋଷିଃ ॥ ଅନୁଷ୍ଟୁପ୍ ଛଂଦଃ ॥ ଶ୍ରୀକୃଷ୍ଣୋଦେଵତା ॥
ଶ୍ରୀକୃଷ୍ଣାଷ୍ଟୋତ୍ତରଶତନାମଜପେ ଵିନିଯୋଗଃ ॥
ଓଂ ଶ୍ରୀକୃଷ୍ଣଃ କମଲାନାଥୋ ଵାସୁଦେଵଃ ସନାତନଃ ।
ଵସୁଦେଵାତ୍ମଜଃ ପୁଣ୍ଯୋ ଲୀଲାମାନୁଷଵିଗ୍ରହଃ ॥ 1 ॥
ଶ୍ରୀଵତ୍ସକୌସ୍ତୁଭଧରୋ ଯଶୋଦାଵତ୍ସଲୋ ହରିଃ ।
ଚତୁର୍ଭୁଜାତ୍ତଚକ୍ରାସିଗଦା ଶଂଖାଦ୍ଯୁଦାଯୁଧଃ ॥ 2 ॥
ଦେଵକୀନଂଦନଃ ଶ୍ରୀଶୋ ନଂଦଗୋପପ୍ରିଯାତ୍ମଜଃ ।
ଯମୁନାଵେଗସଂହାରୀ ବଲଭଦ୍ରପ୍ରିଯାନୁଜଃ ॥ 3 ॥
ପୂତନାଜୀଵିତହରଃ ଶକଟାସୁରଭଂଜନଃ ।
ନଂଦଵ୍ରଜଜନାନଂଦୀ ସଚ୍ଚିଦାନଂଦଵିଗ୍ରହଃ ॥ 4 ॥
ନଵନୀତଵିଲିପ୍ତାଂଗୋ ନଵନୀତନଟୋଽନଘଃ ।
ନଵନୀତନଵାହାରୋ ମୁଚୁକୁଂଦପ୍ରସାଦକଃ ॥ 5 ॥
ଷୋଡଶସ୍ତ୍ରୀ ସହସ୍ରେଶ ସ୍ରିଭଂଗି ମଧୁରାକୃତିଃ ।
ଶୁକଵାଗମୃତାବ୍ଧୀଂଦୁର୍ଗୋଵିଂଦୋ ଗୋଵିଦାଂପତିଃ ॥ 6 ॥
ଵତ୍ସଵାଟଚରୋଽନଂତୋ ଧେନୁକାସୁରଭଂଜନଃ ।
ତୃଣୀକୃତତୃଣାଵର୍ତୋ ଯମଳାର୍ଜୁନଭଂଜନଃ ॥ 7 ॥
ଉତ୍ତାନତାଲଭେତ୍ତା ଚ ତମାଲଶ୍ଯାମଲାକୃତିଃ ।
ଗୋପଗୋପୀଶ୍ଵରୋ ଯୋଗୀ ସୂର୍ଯକୋଟିସମପ୍ରଭଃ ॥ 8 ॥
ଇଲାପତିଃ ପରଂଜ୍ଯୋତିର୍ଯାଦଵେଂଦ୍ରୋ ଯଦୂଦ୍ଵହଃ ।
ଵନମାଲୀ ପୀତଵାସାଃ ପାରିଜାତାପହାରକଃ ॥ 9 ॥
ଗୋଵର୍ଧନାଚଲୋଦ୍ଧର୍ତା ଗୋପାଲଃ ସର୍ଵପାଲକଃ ।
ଅଜୋ ନିରଂଜନଃ କାମଜନକଃ କଂଜଲୋଚନଃ ॥ 10 ॥
ମଧୁହା ମଥୁରାନାଥୋ ଦ୍ଵାରକାନାଯକୋ ବଲୀ ।
ଵୃଂଦାଵନାଂତସଂଚାରୀ ତୁଲସୀଦାମଭୂଷଣଃ ॥ 11 ॥
ଶ୍ଯମଂତକମଣେର୍ହର୍ତା ନରନାରାଯଣାତ୍ମକଃ ।
କୁବ୍ଜାକୃଷ୍ଣାଂବରଧରୋ ମାଯୀ ପରମପୂରୁଷଃ ॥ 12 ॥
ମୁଷ୍ଟିକାସୁରଚାଣୂରମହାଯୁଦ୍ଧଵିଶାରଦଃ ।
ସଂସାରଵୈରୀ କଂସାରିର୍ମୁରାରିର୍ନରକାଂତକଃ ॥ 13 ॥
ଅନାଦିବ୍ରହ୍ମଚାରୀ ଚ କୃଷ୍ଣାଵ୍ଯସନକର୍ଷକଃ ।
ଶିଶୁପାଲଶିରଶ୍ଛେତ୍ତା ଦୁର୍ଯୋଧନକୁଲାଂତକଃ ॥ 14 ॥
ଵିଦୁରାକ୍ରୂରଵରଦୋ ଵିଶ୍ଵରୂପପ୍ରଦର୍ଶକଃ ।
ସତ୍ଯଵାକ୍ ସତ୍ଯସଂକଲ୍ପଃ ସତ୍ଯଭାମାରତୋ ଜଯୀ ॥ 15 ॥
ସୁଭଦ୍ରାପୂର୍ଵଜୋ ଵିଷ୍ଣୁର୍ଭୀଷ୍ମମୁକ୍ତିପ୍ରଦାଯକଃ ।
ଜଗଦ୍ଗୁରୁର୍ଜଗନ୍ନାଥୋ ଵେଣୁନାଦଵିଶାରଦଃ ॥ 16 ॥
ଵୃଷଭାସୁରଵିଧ୍ଵଂସୀ ବାଣାସୁରବଲାଂତକଃ ।
ଯୁଧିଷ୍ଠିରପ୍ରତିଷ୍ଠାତା ବର୍ହିବର୍ହାଵତଂସକଃ ॥ 17 ॥
ପାର୍ଥସାରଥିରଵ୍ଯକ୍ତୋ ଗୀତାମୃତମହୋଦଧିଃ ।
କାଲୀଯଫଣିମାଣିକ୍ଯରଂଜିତଶ୍ରୀପଦାଂବୁଜଃ ॥ 18 ॥
ଦାମୋଦରୋ ଯଜ୍ଞଭୋକ୍ତା ଦାନଵେଂଦ୍ରଵିନାଶକଃ ।
ନାରାଯଣଃ ପରଂବ୍ରହ୍ମ ପନ୍ନଗାଶନଵାହନଃ ॥ 19 ॥
ଜଲକ୍ରୀଡାସମାସକ୍ତ ଗୋପୀଵସ୍ତ୍ରାପହାରକଃ ।
ପୁଣ୍ଯଶ୍ଲୋକସ୍ତୀର୍ଥପାଦୋ ଵେଦଵେଦ୍ଯୋ ଦଯାନିଧିଃ ॥ 20 ॥
ସର୍ଵତୀର୍ଥାତ୍ମକଃ ସର୍ଵଗ୍ରହରୁପୀ ପରାତ୍ପରଃ ।
ଏଵଂ ଶ୍ରୀକୃଷ୍ଣଦେଵସ୍ଯ ନାମ୍ନାମଷ୍ଟୋତ୍ତରଂ ଶତମ୍ ॥ 21 ॥
କୃଷ୍ଣନାମାମୃତଂ ନାମ ପରମାନଂଦକାରକମ୍ ।
ଅତ୍ଯୁପଦ୍ରଵଦୋଷଘ୍ନଂ ପରମାଯୁଷ୍ଯଵର୍ଧନମ୍ ॥ 22 ॥
॥ ଇତି ଶ୍ରୀନାରଦପଂଚରାତ୍ରେ ଜ୍ଞାନାମୃତସାରେ ଚତୁର୍ଥରାତ୍ରେ ଉମାମହେଶ୍ଵରସଂଵାଦେ
ଧରଣୀଶେଷସଂଵାଦେ ଶ୍ରୀକୃଷ୍ଣାଷ୍ଟୋତ୍ତରଶତନାମସ୍ତୋତ୍ରଂ ସଂପୂର୍ଣମ୍ ॥
Browse Related Categories:
