රුචිරුවාච ।
නමස්යේऽහං පිතॄන් භක්ත්යා යේ වසංත්යධිදේවතාඃ ।
දේවෛරපි හි තර්ප්යංතේ යේ ශ්රාද්ධේෂු ස්වධෝත්තරෛඃ ॥ 1 ॥

නමස්යේऽහං පිතॄන් ස්වර්ගේ යේ තර්ප්යංතේ මහර්ෂිභිඃ ।
ශ්රාද්ධෛර්මනෝමයෛර්භක්ත්යා භුක්තිමුක්තිමභීප්සුභිඃ ॥ 2 ॥

නමස්යේऽහං පිතॄන් ස්වර්ගේ සිද්ධාඃ සංතර්පයංති යාන් ।
ශ්රාද්ධේෂු දිව්යෛඃ සකලෛරුපහාරෛරනුත්තමෛඃ ॥ 3 ॥

නමස්යේऽහං පිතॄන් භක්ත්යා යේऽර්ච්යංතේ ගුහ්යකෛර්දිවි ।
තන්මයත්වේන වාංඡද්භිරෘද්ධිර්යාත්යංතිකීං පරාම් ॥ 4 ॥

නමස්යේऽහං පිතॄන් මර්ත්යෛරර්ච්යංතේ භුවි යේ සදා ।
ශ්රාද්ධේෂු ශ්රද්ධයාභීෂ්ටලෝකපුෂ්ටිප්රදායිනඃ ॥ 5 ॥

නමස්යේऽහං පිතॄන් විප්රෛරර්ච්යංතේ භුවි යේ සදා ।
වාංඡිතාභීෂ්ටලාභාය ප්රාජාපත්යප්රදායිනඃ ॥ 6 ॥

නමස්යේऽහං පිතॄන් යේ වෛ තර්ප්යංතේऽරණ්යවාසිභිඃ ।
වන්යෛඃ ශ්රාද්ධෛර්යතාහාරෛස්තපෝනිර්ධූතකල්මෂෛඃ ॥ 7 ॥

නමස්යේऽහං පිතॄන් විප්රෛර්නෛෂ්ඨිකෛර්ධර්මචාරිභිඃ ।
යේ සංයතාත්මභිර්නිත්යං සංතර්ප්යංතේ සමාධිභිඃ ॥ 8 ॥

නමස්යේऽහං පිතॄන් ශ්රාද්ධෛ රාජන්යාස්තර්පයංති යාන් ।
කව්යෛරශේෂෛර්විධිවල්ලෝකද්වයඵලප්රදාන් ॥ 9 ॥

නමස්යේऽහං පිතॄන් වෛශ්යෛරර්ච්යංතේ භුවි යේ සදා ।
ස්වකර්මාභිරතෛර්නිත්යං පුෂ්පධූපාන්නවාරිභිඃ ॥ 10 ॥

නමස්යේऽහං පිතॄන් ශ්රාද්ධේ ශූද්රෛරපි ච භක්තිතඃ ।
සංතර්ප්යංතේ ජගත්කෘත්ස්නං නාම්නා ඛ්යාතාඃ සුකාලිනඃ ॥ 11 ॥

නමස්යේऽහං පිතॄන් ශ්රාද්ධේ පාතාලේ යේ මහාසුරෛඃ ।
සංතර්ප්යංතේ සුධාහාරාස්ත්යක්තදංභමදෛඃ සදා ॥ 12 ॥

නමස්යේऽහං පිතॄන් ශ්රාද්ධෛරර්ච්යංතේ යේ රසාතලේ ।
භෝගෛරශේෂෛර්විධිවන්නාගෛඃ කාමානභීප්සුභිඃ ॥ 13 ॥

නමස්යේऽහං පිතॄන් ශ්රාද්ධෛඃ සර්පෛඃ සංතර්පිතාන්සදා ।
තත්රෛව විධිවන්මංත්රභෝගසංපත්සමන්විතෛඃ ॥ 14 ॥

පිතॄන්නමස්යේ නිවසංති සාක්ෂා-
-ද්යේ දේවලෝකේऽථ මහීතලේ වා ।
තථාऽංතරික්ෂේ ච සුරාරිපූජ්යා-
-ස්තේ මේ ප්රතීච්ඡංතු මනෝපනීතම් ॥ 15 ॥

පිතॄන්නමස්යේ පරමාර්ථභූතා
යේ වෛ විමානේ නිවසංත්යමූර්තාඃ ।
යජංති යානස්තමලෛර්මනෝභි-
-ර්යෝගීශ්වරාඃ ක්ලේශවිමුක්තිහේතූන් ॥ 16 ॥

පිතॄන්නමස්යේ දිවි යේ ච මූර්තාඃ
ස්වධාභුජඃ කාම්යඵලාභිසංධෞ ।
ප්රදානශක්තාඃ සකලේප්සිතානාං
විමුක්තිදා යේऽනභිසංහිතේෂු ॥ 17 ॥

තෘප්යංතු තේऽස්මින්පිතරඃ සමස්තා
ඉච්ඡාවතාං යේ ප්රදිශංති කාමාන් ।
සුරත්වමිංද්රත්වමිතෝऽධිකං වා
ගජාශ්වරත්නානි මහාගෘහාණි ॥ 18 ॥

සෝමස්ය යේ රශ්මිෂු යේऽර්කබිංබේ
ශුක්ලේ විමානේ ච සදා වසංති ।
තෘප්යංතු තේऽස්මින්පිතරෝऽන්නතෝයෛ-
-ර්ගංධාදිනා පුෂ්ටිමිතෝ ව්රජංතු ॥ 19 ॥

යේෂාං හුතේऽග්නෞ හවිෂා ච තෘප්ති-
-ර්යේ භුංජතේ විප්රශරීරසංස්ථාඃ ।
යේ පිංඩදානේන මුදං ප්රයාංති
තෘප්යංතු තේऽස්මින්පිතරෝऽන්නතෝයෛඃ ॥ 20 ॥

යේ ඛඩ්ගමාංසේන සුරෛරභීෂ්ටෛඃ
කෘෂ්ණෛස්තිලෛර්දිව්ය මනෝහරෛශ්ච ।
කාලේන ශාකේන මහර්ෂිවර්යෛඃ
සංප්රීණිතාස්තේ මුදමත්ර යාංතු ॥ 21 ॥

කව්යාන්යශේෂාණි ච යාන්යභීෂ්ටා-
-න්යතීව තේෂාං මම පූජිතානාම් ।
තේෂාංච සාන්නිධ්යමිහාස්තු පුෂ්ප-
-ගංධාංබුභෝජ්යේෂු මයා කෘතේෂු ॥ 22 ॥

දිනේ දිනේ යේ ප්රතිගෘහ්ණතේऽර්චාං
මාසාංතපූජ්යා භුවි යේऽෂ්ටකාසු ।
යේ වත්සරාංතේऽභ්යුදයේ ච පූජ්යාඃ
ප්රයාංතු තේ මේ පිතරෝऽත්ර තුෂ්ටිම් ॥ 23 ॥

පූජ්යා ද්විජානාං කුමුදේංදුභාසෝ
යේ ක්ෂත්රියාණාං ජ්වලනාර්කවර්ණාඃ ।
තථා විශාං යේ කනකාවදාතා
නීලීප්රභාඃ ශූද්රජනස්ය යේ ච ॥ 24 ॥

තේऽස්මින්සමස්තා මම පුෂ්පගංධ-
-ධූපාංබුභෝජ්යාදිනිවේදනේන ।
තථාऽග්නිහෝමේන ච යාංති තෘප්තිං
සදා පිතෘභ්යඃ ප්රණතෝऽස්මි තේභ්යඃ ॥ 25 ॥

යේ දේවපූර්වාණ්යභිතෘප්තිහේතෝ-
-රශ්නංති කව්යානි ශුභාහෘතානි ।
තෘප්තාශ්ච යේ භූතිසෘජෝ භවංති
තෘප්යංතු තේऽස්මින්ප්රණතෝऽස්මි තේභ්යඃ ॥ 26 ॥

රක්ෂාංසි භූතාන්යසුරාංස්තථෝග්රා-
-න්නිර්නාශයංතු ත්වශිවං ප්රජානාම් ।
ආද්යාඃ සුරාණාමමරේශපූජ්යා-
-ස්තෘප්යංතු තේऽස්මින්ප්රණතෝऽස්මිතේභ්යඃ ॥ 27 ॥

අග්නිස්වාත්තා බර්හිෂද ආජ්යපාඃ සෝමපාස්තථා ।
ව්රජංතු තෘප්තිං ශ්රාද්ධේऽස්මින්පිතරස්තර්පිතා මයා ॥ 28 ॥

අග්නිස්වාත්තාඃ පිතෘගණාඃ ප්රාචීං රක්ෂංතු මේ දිශම් ।
තථා බර්හිෂදඃ පාංතු යාම්යාං මේ පිතරඃ සදා ।
ප්රතීචීමාජ්යපාස්තද්වදුදීචීමපි සෝමපාඃ ॥ 29 ॥

රක්ෂෝභූතපිශාචේභ්යස්තථෛවාසුරදෝෂතඃ ।
සර්වතඃ පිතරෝ රක්ෂාං කුර්වංතු මම නිත්යශඃ ॥ 30 ॥

විශ්වෝ විශ්වභුගාරාධ්යෝ ධර්මෝ ධන්යඃ ශුභානනඃ ।
භූතිදෝ භූතිකෘද්භූතිඃ පිතॄණාං යේ ගණා නව ॥ 31 ॥

කල්යාණඃ කල්යදඃ කර්තා කල්යඃ කල්යතරාශ්රයඃ ।
කල්යතාහේතුරනඝඃ ෂඩිමේ තේ ගණාඃ ස්මෘතාඃ ॥ 32 ॥

වරෝ වරේණ්යෝ වරදස්තුෂ්ටිදඃ පුෂ්ටිදස්තථා ।
විශ්වපාතා තථා ධාතා සප්තෛතේ ච ගණාඃ ස්මෘතාඃ ॥ 33 ॥

මහාන්මහාත්මා මහිතෝ මහිමාවාන්මහාබලඃ ।
ගණාඃ පංච තථෛවෛතේ පිතॄණාං පාපනාශනාඃ ॥ 34 ॥

සුඛදෝ ධනදශ්චාන්යෝ ධර්මදෝऽන්යශ්ච භූතිදඃ ।
පිතॄණාං කථ්යතේ චෛව තථා ගණචතුෂ්ටයම් ॥ 35 ॥

ඒකත්රිංශත්පිතෘගණා යෛර්ව්යාප්තමඛිලං ජගත් ।
ත ඒවාත්ර පිතෘගණාස්තුෂ්යංතු ච මදාහිතම් ॥ 36 ॥

ඉති ශ්රී ගරුඩපුරාණේ ඌනනවතිතමෝऽධ්යායේ රුචිකෘත පිතෘ ස්තෝත්රම් ।