ಕಂಠೇ ಯಸ್ಯ ಲಸತ್ಕರಾಲಗರಲಂ ಗಂಗಾಜಲಂ ಮಸ್ತಕೇ
ವಾಮಾಂಗೇ ಗಿರಿರಾಜರಾಜತನಯಾ ಜಾಯಾ ಭವಾನೀ ಸತೀ ।
ನಂದಿಸ್ಕಂದಗಣಾಧಿರಾಜಸಹಿತಾ ಶ್ರೀವಿಶ್ವನಾಥಪ್ರಭುಃ
ಕಾಶೀಮಂದಿರಸಂಸ್ಥಿತೋಽಖಿಲಗುರುರ್ದೇಯಾತ್ಸದಾ ಮಂಗಲಮ್ ॥ 1॥

ಯೋ ದೇವೈರಸುರೈರ್ಮುನೀಂದ್ರತನಯೈರ್ಗಂಧರ್ವಯಕ್ಷೋರಗೈ-
ರ್ನಾಗೈರ್ಭೂತಲವಾಸಿಭಿರ್ದ್ವಿಜವರೈಃ ಸಂಸೇವಿತಃ ಸಿದ್ಧಯೇ ।
ಯಾ ಗಂಗೋತ್ತರವಾಹಿನೀ ಪರಿಸರೇ ತೀರ್ಥೇರಸಂಖ್ಯೈರ್ವೃತಾ
ಸಾ ಕಾಶೀ ತ್ರಿಪುರಾರಿರಾಜನಗರೀ ದೇಯಾತ್ಸದಾ ಮಂಗಲಮ್ ॥ 2॥

ತೀರ್ಥಾನಾಂ ಪ್ರವರಾ ಮನೋರಥಕರೀ ಸಂಸಾರಪಾರಾಪರಾ-
ನಂದಾ ನಂದಿಗಣೇಶ್ವರೈರುಪಹಿತಾ ದೇವೈರಶೇಷೈಃ ಸ್ತುತಾ ।
ಯಾ ಶಂಭೋರ್ಮಣಿಕುಂಡಲೈಕಕಣಿಕಾ ವಿಷ್ಣೋಸ್ತಪೋದೀರ್ಘಿಕಾ
ಸೇಯಂ ಶ್ರೀಮಣಿಕರ್ಣಿಕಾ ಭಗವತೀ ದೇಯಾತ್ಸದಾ ಮಂಗಲಮ್ ॥ 3॥

ಏಷಾ ಧರ್ಮಪತಾಕಿನೀ ತಟರುಹಾಸೇವಾವಸನ್ನಾಕಿನೀ
ಪಶ್ಯನ್ಪಾತಕಿನೀ ಭಗೀರಥತಪಃಸಾಫಲ್ಯದೇವಾಕಿನೀ ।
ಪ್ರೇಮಾರೂಢಪತಾಕಿನೀ ಗಿರಿಸುತಾ ಸಾ ಕೇಕರಾಸ್ವಾಕಿನೀ
ಕಾಶ್ಯಾಮುತ್ತರವಾಹಿನೀ ಸುರನದೀ ದೇಯಾತ್ಸದಾ ಮಂಗಲಮ್ ॥ 4॥

ವಿಘ್ನಾವಾಸನಿವಾಸಕಾರಣಮಹಾಗಂಡಸ್ಥಲಾಲಂಬಿತಃ
ಸಿಂದೂರಾರುಣಪುಂಜಚಂದ್ರಕಿರಣಪ್ರಚ್ಛಾದಿನಾಗಚ್ಛವಿಃ ।
ಶ್ರೀವಿಶ್ವೇಶ್ವರವಲ್ಲಭೋ ಗಿರಿಜಯಾ ಸಾನಂದಕಾನಂದಿತಃ
ಸ್ಮೇರಾಸ್ಯಸ್ತವ ಢುಂಢಿರಾಜಮುದಿತೋ ದೇಯಾತ್ಸದಾ ಮಂಗಲಮ್ ॥। 5॥ ।
ಕೇದಾರಃ ಕಲಶೇಶ್ವರಃ ಪಶುಪತಿರ್ಧರ್ಮೇಶ್ವರೋ ಮಧ್ಯಮೋ
ಜ್ಯೇಷ್ಠೇಶೋ ಪಶುಪಶ್ಚ ಕಂದುಕಶಿವೋ ವಿಘ್ನೇಶ್ವರೋ ಜಂಬುಕಃ ।
ಚಂದ್ರೇಶೋ ಹ್ಯಮೃತೇಶ್ವರೋ ಭೃಗುಶಿವಃ ಶ್ರೀವೃದ್ಧಕಾಲೇಶ್ವರೋ
ಮಧ್ಯೇಶೋ ಮಣಿಕರ್ಣಿಕೇಶ್ವರಶಿವೋ ದೇಯಾತ್ಸದಾ ಮಂಗಲಮ್ ॥ 6॥

ಗೋಕರ್ಣಸ್ತ್ವಥ ಭಾರಭೂತನುದನುಃ ಶ್ರೀಚಿತ್ರಗುಪ್ತೇಶ್ವರೋ
ಯಕ್ಷೇಶಸ್ತಿಲಪರ್ಣಸಂಗಮಶಿವೋ ಶೈಲೇಶ್ವರಃ ಕಶ್ಯಪಃ ।
ನಾಗೇಶೋಽಗ್ನಿಶಿವೋ ನಿಧೀಶ್ವರಶಿವೋಽಗಸ್ತೀಶ್ವರಸ್ತಾರಕ-
ಜ್ಞಾನೇಶೋಽಪಿ ಪಿತಾಮಹೇಶ್ವರಶಿವೋ ದೇಯಾತ್ಸದಾ ಮಂಗಲಮ್ ॥ 7॥

ಬ್ರಹ್ಮಾಂಡಂ ಸಕಲಂ ಮನೋಷಿತರಸೈ ರತ್ನೈಃ ಪಯೋಭಿರ್ಹರಂ
ಖೇಲೈಃ ಪೂರಯತೇ ಕುಟುಂಬನಿಲಯಾನ್ ಶಂಭೋರ್ವಿಲಾಸಪ್ರದಾ ।
ನಾನಾದಿವ್ಯಲತಾವಿಭೂಷಿತವಪುಃ ಕಾಶೀಪುರಾಧೀಶ್ವರೀ
ಶ್ರೀವಿಶ್ವೇಶ್ವರಸುಂದರೀ ಭಗವತೀ ದೇಯಾತ್ಸದಾ ಮಂಗಲಮ್ ॥ 8॥

ಯಾ ದೇವೀ ಮಹಿಷಾಸುರಪ್ರಮಥನೀ ಯಾ ಚಂಡಮುಂಡಾಪಹಾ
ಯಾ ಶುಂಭಾಸುರರಕ್ತಬೀಜದಮನೀ ಶಕ್ರಾದಿಭಿಃ ಸಂಸ್ತುತಾ ।
ಯಾ ಶೂಲಾಸಿಧನುಃಶರಾಭಯಕರಾ ದುರ್ಗಾದಿಸಂದಕ್ಷಿಣಾ-
ಮಾಶ್ರಿತ್ಯಾಶ್ರಿತವಿಘ್ನಶಂಸಮಯತು ದೇಯಾತ್ಸದಾ ಮಂಗಲಮ್ ॥ 9॥

ಆದ್ಯಾ ಶ್ರೀರ್ವಿಕಟಾ ತತಸ್ತು ವಿರಜಾ ಶ್ರೀಮಂಗಲಾ ಪಾರ್ವತೀ
ವಿಖ್ಯಾತಾ ಕಮಲಾ ವಿಶಾಲನಯನಾ ಜ್ಯೇಷ್ಠಾ ವಿಶಿಷ್ಟಾನನಾ ।
ಕಾಮಾಕ್ಷೀ ಚ ಹರಿಪ್ರಿಯಾ ಭಗವತೀ ಶ್ರೀಘಂಟಘಂಟಾದಿಕಾ
ಮೌರ್ಯಾ ಷಷ್ಟಿಸಹಸ್ರಮಾತೃಸಹಿತಾ ದೇಯಾತ್ಸದಾ ಮಂಗಲಮ್ ॥ 10॥

ಆದೌ ಪಂಚನದಂ ಪ್ರಯಾಗಮಪರಂ ಕೇದಾರಕುಂಡಂ ಕುರು-
ಕ್ಷೇತ್ರಂ ಮಾನಸಕಂ ಸರೋಽಮೃತಜಲಂ ಶಾವಸ್ಯ ತೀರ್ಥಂ ಪರಮ್ ।
ಮತ್ಸ್ಯೋದರ್ಯಥ ದಂಡಖಾಂಡಸಲಿಲಂ ಮಂದಾಕಿನೀ ಜಂಬುಕಂ
ಘಂಟಾಕರ್ಣಸಮುದ್ರಕೂಪಸಹಿತೋ ದೇಯಾತ್ಸದಾ ಮಂಗಲಮ್ ॥ 11॥

ರೇವಾಕುಂಡಜಲಂ ಸರಸ್ವತಿಜಲಂ ದುರ್ವಾಸಕುಂಡಂ ತತೋ
ಲಕ್ಷ್ಮೀತೀರ್ಥಲವಾಂಕುಶಸ್ಯ ಸಲಿಲಂ ಕಂದರ್ಪಕುಂಡಂ ತಥಾ ।
ದುರ್ಗಾಕುಂಡಮಸೀಜಲಂ ಹನುಮತಃ ಕುಂಡಪ್ರತಾಪೋರ್ಜಿತಃ
ಪ್ರಜ್ಞಾನಪ್ರಮುಖಾನಿ ವಃ ಪ್ರತಿದಿನಂ ದೇಯಾತ್ಸದಾ ಮಂಗಲಮ್ ॥ 12॥

ಆದ್ಯಃ ಕೂಪವರಸ್ತು ಕಾಲದಮನಃ ಶ್ರೀವೃದ್ಧಕೂಪೋಽಪರೋ
ವಿಖ್ಯಾತಸ್ತು ಪರಾಶರಸ್ತು ವಿದಿತಃ ಕೂಪಃ ಸರೋ ಮಾನಸಃ ।
ಜೈಗೀಷವ್ಯಮುನೇಃ ಶಶಾಂಕನೃಪತೇಃ ಕೂಪಸ್ತು ಧರ್ಮೋದ್ಭವಃ
ಖ್ಯಾತಃ ಸಪ್ತಸಮುದ್ರಕೂಪಸಹಿತೋ ದೇಯಾತ್ಸದಾ ಮಂಗಲಮ್ ॥ 13॥

ಲಕ್ಷ್ಯೀನಾಯಕಬಿಂದುಮಾಧವಹರಿರ್ಲಕ್ಷ್ಮೀನೃಸಿಂಹಸ್ತತೋ
ಗೋವಿಂದಸ್ತ್ವಥ ಗೋಪಿಕಾಪ್ರಿಯತಮಃ ಶ್ರೀನಾರದಃ ಕೇಶವಃ ।
ಗಂಗಾಕೇಶವವಾಮನಾಖ್ಯತದನು ಶ್ವೇತೋ ಹರಿಃ ಕೇಶವಃ
ಪ್ರಹ್ಲಾದಾದಿಸಮಸ್ತಕೇಶವಗಣೋ ದೇಯಾತ್ಸದಾ ಮಂಗಲಮ್ ॥ 14॥

ಲೋಲಾರ್ಕೋ ವಿಮಲಾರ್ಕಮಾಯುಖರವಿಃ ಸಂವರ್ತಸಂಜ್ಞೋ ರವಿ-
ರ್ವಿಖ್ಯಾತೋ ದ್ರುಪದುಃಖಖೋಲ್ಕಮರುಣಃ ಪ್ರೋಕ್ತೋತ್ತರಾರ್ಕೋ ರವಿಃ ।
ಗಂಗಾರ್ಕಸ್ತ್ವಥ ವೃದ್ಧವೃದ್ಧಿವಿಬುಧಾ ಕಾಶೀಪುರೀಸಂಸ್ಥಿತಾಃ
ಸೂರ್ಯಾ ದ್ವಾದಶಸಂಜ್ಞಕಾಃ ಪ್ರತಿದಿನಂ ದೇಯಾತ್ಸದಾ ಮಂಗಲಮ್ ॥ 15॥

ಆದ್ಯೋ ಢುಂಢಿವಿನಾಯಕೋ ಗಣಪತಿಶ್ಚಿಂತಾಮಣಿಃ ಸಿದ್ಧಿದಃ
ಸೇನಾವಿಘ್ನಪತಿಸ್ತು ವಕ್ತ್ರವದನಃ ಶ್ರೀಪಾಶಪಾಣಿಃ ಪ್ರಭುಃ ।
ಆಶಾಪಕ್ಷವಿನಾಯಕಾಪ್ರಷಕರೋ ಮೋದಾದಿಕಃ ಷಡ್ಗುಣೋ
ಲೋಲಾರ್ಕಾದಿವಿನಾಯಕಾಃ ಪ್ರತಿದಿನಂ ದೇಯಾತ್ಸದಾ ಮಂಗಲಮ್ ॥ 16॥।

ಹೇರಂಬೋ ನಲಕೂಬರೋ ಗಣಪತಿಃ ಶ್ರೀಭೀಮಚಂಡೀಗಣೋ
ವಿಖ್ಯಾತೋ ಮಣಿಕರ್ಣಿಕಾಗಣಪತಿಃ ಶ್ರೀಸಿದ್ಧಿದೋ ವಿಘ್ನಪಃ ।
ಮುಂಡಶ್ಚಂಡಮುಖಶ್ಚ ಕಷ್ಟಹರಣಃ ಶ್ರೀದಂಡಹಸ್ತೋ ಗಣಃ
ಶ್ರೀದುರ್ಗಾಖ್ಯಗಣಾಧಿಪಃ ಪ್ರತಿದಿನಂ ದೇಯಾತ್ಸದಾ ಮಂಗಲಮ್ ॥ 17॥

ಆದ್ಯೋ ಭೈರವಭೀಷಣಸ್ತದಪರಃ ಶ್ರೀಕಾಲರಾಜಃ ಕ್ರಮಾ-
ಚ್ಛ್ರೀಸಂಹಾರಕಭೈರವಸ್ತ್ವಥ ರುರುಶ್ಚೋನ್ಮತ್ತಕೋ ಭೈರವಃ ।
ಕ್ರೋಧಶ್ಚಂಡಕಪಾಲಭೈರವವರಃ ಶ್ರೀಭೂತನಾಥಾದಯೋ
ಹ್ಯಷ್ಟೌ ಭೈರವಮೂರ್ತಯಃ ಪ್ರತಿದಿನಂ ದೇಯಾತ್ಸದಾ ಮಂಗಲಮ್ ॥ 18॥

ಆಧಾತೋಽಂಬಿಕಯಾ ಸಹ ತ್ರಿನಯನಃ ಸಾರ್ಧಂ ಗಣೈರ್ನಂದಿತಾಂ
ಕಾಶೀಮಾಶು ವಿಶನ್ ಹರಃ ಪ್ರಥಮತೋ ವಾರ್ಷಧ್ವಜೇಽವಸ್ಥಿತಃ ।
ಆಯಾತಾ ದಶ ಧೇನವಃ ಸುಕಪಿಲಾ ದಿವ್ಯೈಃ ಪಯೋಭಿರ್ಹರಂ
ಖ್ಯಾತಂ ತದ್ವೃಷಭಧ್ವಜೇನ ಕಪಿಲಂ ದೇಯಾತ್ಸದಾ ಮಂಗಲಮ್ ॥ 19॥

ಆನಂದಾಖ್ಯವನಂ ಹಿ ಚಂಪಕವನಂ ಶ್ರೀನೈಮಿಷಂ ಖಾಂಡವಂ
ಪುಣ್ಯಂ ಚೈತ್ರರಥಂ ತ್ವಶಾಕವಿಪಿನಂ ರಂಭಾವನಂ ಪಾವನಮ್ ।
ದುರ್ಗಾರಣ್ಯಮಥೋಽಪಿ ಕೈರವವನಂ ವೃಂದಾವನಂ ಪಾವನಂ
ವಿಖ್ಯಾತಾನಿ ವನಾನಿ ವಃ ಪ್ರತಿದಿನಂ ದೇಯಾತ್ಸದಾ ಮಂಗಲಮ್ ॥ 20॥

ಅಲಿಕುಲದಲನೀಲಃ ಕಾಲದಂಷ್ಟ್ರಾಕರಾಲಃ
ಸಜಲಜಲದನೀಲೋ ವ್ಯಾಲಯಜ್ಞೋಪವೀತಃ ।
ಅಭಯವರದಹಸ್ತೋ ಡಾಮರೋದ್ದಾಮನಾದಃ
ಸಕಲದುರಿತಭಕ್ಷೋ ಮಂಗಲಂ ವೋ ದದಾತು ॥ 21॥

ಅರ್ಧಾಂಗೇ ವಿಕಟಾ ಗಿರೀಂದ್ರತನಯಾ ಗೌರೀ ಸತೀ ಸುಂದರೀ
ಸರ್ವಾಂಗೇ ವಿಲಸದ್ವಿಭೂತಿಧವಲೋ ಕಾಲೋ ವಿಶಾಲೇಕ್ಷಣಃ ।
ವೀರೇಶಃ ಸಹನಂದಿಭೃಂಗಿಸಹಿತಃ ಶ್ರೀವಿಶ್ವನಾಥಃ ಪ್ರಭುಃ
ಕಾಶೀಮಂದಿರಸಂಸ್ಥಿತೋಽಖಿಲಗುರುರ್ದೇಯಾತ್ಸದಾ ಮಂಗಲಮ್ ॥ 22॥

ಯಃ ಪ್ರಾತಃ ಪ್ರಯತಃ ಪ್ರಸನ್ನಮನಸಾ ಪ್ರೇಮಪ್ರಮೋದಾಕುಲಃ
ಖ್ಯಾತಂ ತತ್ರ ವಿಶಿಷ್ಟಪಾದಭುವನೇಶೇಂದ್ರಾದಿಭಿರ್ಯತ್ಸ್ತುತಮ್ ।
ಪ್ರಾತಃ ಪ್ರಾಙ್ಮುಖಮಾಸನೋತ್ತಮಗತೋ ಬ್ರೂಯಾಚ್ಛೃಣೋತ್ಯಾದರಾತ್
ಕಾಶೀವಾಸಮುಖಾನ್ಯವಾಪ್ಯ ಸತತಂ ಪ್ರೀತೇ ಶಿವೇ ಧೂರ್ಜಟಿ ॥ 23॥

ಇತಿ ಶ್ರೀಮಚ್ಛಂಕರಾಚಾರ್ಯವಿರಚಿತಂ ಕಾಶೀವಿಶ್ವನಾಥಸ್ತೋತ್ರಮ್ ॥