ଲୋକଵୀରଂ ମହାପୂଜ୍ୟଂ ସର୍ଵରକ୍ଷାକରଂ ଵିଭୁମ୍ ।
ପାର୍ଵତୀ ହୃଦୟାନଂଦଂ ଶାସ୍ତାରଂ ପ୍ରଣମାମ୍ୟହମ୍ ॥ 1 ॥

ଵିପ୍ରପୂଜ୍ୟଂ ଵିଶ୍ଵଵଂଦ୍ୟଂ ଵିଷ୍ଣୁଶଂଭୋଃ ପ୍ରିୟଂ ସୁତମ୍ ।
କ୍ଷିପ୍ରପ୍ରସାଦନିରତଂ ଶାସ୍ତାରଂ ପ୍ରଣମାମ୍ୟହମ୍ ॥ 2 ॥

ମତ୍ତମାତଂଗଗମନଂ କାରୁଣ୍ୟାମୃତପୂରିତମ୍ ।
ସର୍ଵଵିଘ୍ନହରଂ ଦେଵଂ ଶାସ୍ତାରଂ ପ୍ରଣମାମ୍ୟହମ୍ ॥ 3 ॥

ଅସ୍ମତ୍କୁଲେଶ୍ଵରଂ ଦେଵମ୍-ଅସ୍ମଚ୍ଛତ୍ରୁ ଵିନାଶନମ୍ ।
ଅସ୍ମଦିଷ୍ଟପ୍ରଦାତାରଂ ଶାସ୍ତାରଂ ପ୍ରଣମାମ୍ୟହମ୍ ॥ 4 ॥

ପାଂଡ୍ୟେଶଵଂଶତିଲକଂ କେରଲେ କେଲିଵିଗ୍ରହମ୍ ।
ଆର୍ତତ୍ରାଣପରଂ ଦେଵଂ ଶାସ୍ତାରଂ ପ୍ରଣମାମ୍ୟହମ୍ ॥ 5 ॥

ପଂଚରତ୍ନାଖ୍ୟମେତଦ୍ୟୋ ନିତ୍ୟଂ ଶୁଦ୍ଧଃ ପଠେନ୍ନରଃ ।
ତସ୍ୟ ପ୍ରସନ୍ନୋ ଭଗଵାନ୍ ଶାସ୍ତା ଵସତି ମାନସେ ॥

ଇତି ଶ୍ରୀ ଶାସ୍ତା ପଂଚରତ୍ନମ୍ ।

——

ଅଥ ଶାସ୍ତା ନମସ୍କାର ଶ୍ଲୋକାଃ ।

ତ୍ରୟଂବକପୁରାଧୀଶଂ ଗଣାଧିପସମନ୍ଵିତମ୍ ।
ଗଜାରୂଢମହଂ ଵଂଦେ ଶାସ୍ତାରଂ ପ୍ରଣମାମ୍ୟହମ୍ ॥ 1 ॥

ଶିଵଵୀର୍ୟସମୁଦ୍ଭୂତଂ ଶ୍ରୀନିଵାସତନୂଦ୍ଭଵମ୍ ।
ଶିଖିଵାହାନୁଜଂ ଵଂଦେ ଶାସ୍ତାରଂ ପ୍ରଣମାମ୍ୟହମ୍ ॥ 2 ॥

ୟସ୍ୟ ଧନ୍ଵଂତରିର୍ମାତା ପିତା ଦେଵୋ ମହେଶ୍ଵରଃ ।
ତଂ ଶାସ୍ତାରମହଂ ଵଂଦେ ମହାରୋଗନିଵାରଣମ୍ ॥ 3 ॥

ଭୂତନାଥ ସଦାନଂଦ ସର୍ଵଭୂତଦୟାପର ।
ରକ୍ଷ ରକ୍ଷ ମହାବାହୋ ଶାସ୍ତ୍ରେ ତୁଭ୍ୟଂ ନମୋ ନମଃ ॥ 4 ॥