ಲೋಕವೀರಂ ಮಹಾಪೂಜ್ಯಂ ಸರ್ವರಕ್ಷಾಕರಂ ವಿಭುಮ್ ।
ಪಾರ್ವತೀ ಹೃದಯಾನಂದಂ ಶಾಸ್ತಾರಂ ಪ್ರಣಮಾಮ್ಯಹಮ್ ॥ 1 ॥

ವಿಪ್ರಪೂಜ್ಯಂ ವಿಶ್ವವಂದ್ಯಂ ವಿಷ್ಣುಶಂಭೋಃ ಪ್ರಿಯಂ ಸುತಮ್ ।
ಕ್ಷಿಪ್ರಪ್ರಸಾದನಿರತಂ ಶಾಸ್ತಾರಂ ಪ್ರಣಮಾಮ್ಯಹಮ್ ॥ 2 ॥

ಮತ್ತಮಾತಂಗಗಮನಂ ಕಾರುಣ್ಯಾಮೃತಪೂರಿತಮ್ ।
ಸರ್ವವಿಘ್ನಹರಂ ದೇವಂ ಶಾಸ್ತಾರಂ ಪ್ರಣಮಾಮ್ಯಹಮ್ ॥ 3 ॥

ಅಸ್ಮತ್ಕುಲೇಶ್ವರಂ ದೇವಂ-ಅಸ್ಮಚ್ಛತ್ರು ವಿನಾಶನಮ್ ।
ಅಸ್ಮದಿಷ್ಟಪ್ರದಾತಾರಂ ಶಾಸ್ತಾರಂ ಪ್ರಣಮಾಮ್ಯಹಮ್ ॥ 4 ॥

ಪಾಂಡ್ಯೇಶವಂಶತಿಲಕಂ ಕೇರಲೇ ಕೇಲಿವಿಗ್ರಹಮ್ ।
ಆರ್ತತ್ರಾಣಪರಂ ದೇವಂ ಶಾಸ್ತಾರಂ ಪ್ರಣಮಾಮ್ಯಹಮ್ ॥ 5 ॥

ಪಂಚರತ್ನಾಖ್ಯಮೇತದ್ಯೋ ನಿತ್ಯಂ ಶುದ್ಧಃ ಪಠೇನ್ನರಃ ।
ತಸ್ಯ ಪ್ರಸನ್ನೋ ಭಗವಾನ್ ಶಾಸ್ತಾ ವಸತಿ ಮಾನಸೇ ॥

ಇತಿ ಶ್ರೀ ಶಾಸ್ತಾ ಪಂಚರತ್ನಮ್ ।

——

ಅಥ ಶಾಸ್ತಾ ನಮಸ್ಕಾರ ಶ್ಲೋಕಾಃ ।

ತ್ರಯಂಬಕಪುರಾಧೀಶಂ ಗಣಾಧಿಪಸಮನ್ವಿತಮ್ ।
ಗಜಾರೂಢಮಹಂ ವಂದೇ ಶಾಸ್ತಾರಂ ಪ್ರಣಮಾಮ್ಯಹಮ್ ॥ 1 ॥

ಶಿವವೀರ್ಯಸಮುದ್ಭೂತಂ ಶ್ರೀನಿವಾಸತನೂದ್ಭವಮ್ ।
ಶಿಖಿವಾಹಾನುಜಂ ವಂದೇ ಶಾಸ್ತಾರಂ ಪ್ರಣಮಾಮ್ಯಹಮ್ ॥ 2 ॥

ಯಸ್ಯ ಧನ್ವಂತರಿರ್ಮಾತಾ ಪಿತಾ ದೇವೋ ಮಹೇಶ್ವರಃ ।
ತಂ ಶಾಸ್ತಾರಮಹಂ ವಂದೇ ಮಹಾರೋಗನಿವಾರಣಮ್ ॥ 3 ॥

ಭೂತನಾಥ ಸದಾನಂದ ಸರ್ವಭೂತದಯಾಪರ ।
ರಕ್ಷ ರಕ್ಷ ಮಹಾಬಾಹೋ ಶಾಸ್ತ್ರೇ ತುಭ್ಯಂ ನಮೋ ನಮಃ ॥ 4 ॥