śrīṃ sauṃ śaravaṇabhavaḥ śarachchandrāyutaprabhaḥ ।
śaśāṅkaśēkharasutaḥ śachīmāṅgaḻyarakṣakaḥ ॥ 1 ॥

śatāyuṣyapradātā cha śatakōṭiraviprabhaḥ ।
śachīvallabhasuprītaḥ śachīnāyakapūjitaḥ ॥ 2 ॥

śachīnāthachaturvaktradēvadaityābhivanditaḥ ।
śachīśārtiharaśchaiva śambhuḥ śambhūpadēśakaḥ ॥ 3 ॥

śaṅkaraḥ śaṅkaraprītaḥ śamyākakusumapriyaḥ ।
śaṅkukarṇamahākarṇapramukhādyabhivanditaḥ ॥ 4 ॥

śachīnāthasutāprāṇanāyakaḥ śaktipāṇimān ।
śaṅkhapāṇipriyaḥ śaṅkhōpamaṣaḍgalasuprabhaḥ ॥ 5 ॥

śaṅkhaghōṣapriyaḥ śaṅkhachakraśūlādikāyudhaḥ ।
śaṅkhadhārābhiṣēkādipriyaḥ śaṅkaravallabhaḥ ॥ 6 ॥

śabdabrahmamayaśchaiva śabdamūlāntarātmakaḥ ।
śabdapriyaḥ śabdarūpaḥ śabdānandaḥ śachīstutaḥ ॥ 7 ॥

śatakōṭipravistārayōjanāyatamandiraḥ ।
śatakōṭiraviprakhyaratnasiṃhāsanānvitaḥ ॥ 8 ॥

śatakōṭimaharṣīndrasēvitōbhayapārśvabhūḥ ।
śatakōṭisurastrīṇāṃ nṛttasaṅgītakautukaḥ ॥ 9 ॥

śatakōṭīndradikpālahastachāmarasēvitaḥ ।
śatakōṭyakhilāṇḍādimahābrahmāṇḍanāyakaḥ ॥ 10 ॥

śaṅkhapāṇividhibhyāṃ cha pārśvayōrupasēvitaḥ ।
śaṅkhapadmanidhīnāṃ cha kōṭibhiḥ parisēvitaḥ ॥ 11 ॥

śaśāṅkādityakōṭībhiḥ savyadakṣiṇasēvitaḥ ।
śaṅkhapālādyaṣṭanāgakōṭībhiḥ parisēvitaḥ ॥ 12 ॥

śaśāṅkārapataṅgādigrahanakṣatrasēvitaḥ ।
śaśibhāskarabhaumādigrahadōṣārtibhañjanaḥ ॥ 13 ॥

śatapatradvayakaraḥ śatapatrārchanapriyaḥ ।
śatapatrasamāsīnaḥ śatapatrāsanastutaḥ ॥ 14 ॥

śārīrabrahmamūlādiṣaḍādhāranivāsakaḥ ।
śatapatrasamutpannabrahmagarvavibhēdanaḥ ॥ 15 ॥

śaśāṅkārdhajaṭājūṭaḥ śaraṇāgatavatsalaḥ ।
rakārarūpō ramaṇō rājīvākṣō rahōgataḥ ॥ 16 ॥

ratīśakōṭisaundaryō ravikōṭyudayaprabhaḥ ।
rāgasvarūpō rāgaghnō raktābjapriya ēva cha ॥ 17 ॥

rājarājēśvarīputrō rājēndravibhavapradaḥ ।
ratnaprabhākirīṭāgrō ravichandrāgnilōchanaḥ ॥ 18 ॥

ratnāṅgadamahābāhū ratnatāṭaṅkabhūṣaṇaḥ ।
ratnakēyūrabhūṣāḍhyō ratnahāravirājitaḥ ॥ 19 ॥

ratnakiṅkiṇikāñchyādibaddhasatkaṭiśōbhitaḥ ।
ravasaṃyuktaratnābhanūpurāṅghrisarōruhaḥ ॥ 20 ॥

ratnakaṅkaṇachūlyādisarvābharaṇabhūṣitaḥ ।
ratnasiṃhāsanāsīnō ratnaśōbhitamandiraḥ ॥ 21 ॥

rākēndumukhaṣaṭkaścha ramāvāṇyādipūjitaḥ ।
rākṣasāmaragandharvakōṭikōṭyabhivanditaḥ ॥ 22 ॥

raṇaraṅgē mahādaityasaṅgrāmajayakautukaḥ ।
rākṣasānīkasaṃhārakōpāviṣṭāyudhānvitaḥ ॥ 23 ॥

rākṣasāṅgasamutpannaraktapānapriyāyudhaḥ ।
ravayuktadhanurhastō ratnakukkuṭadhāraṇaḥ ॥ 24 ॥

raṇaraṅgajayō rāmāstōtraśravaṇakautukaḥ ।
rambhāghṛtāchīviśvāchīmēnakādyabhivanditaḥ ॥ 25 ॥

raktapītāmbaradharō raktagandhānulēpanaḥ ।
raktadvādaśapadmākṣō raktamālyavibhūṣitaḥ ॥ 26 ॥

ravipriyō rāvaṇēśastōtrasāmamanōharaḥ ।
rājyapradō randhraguhyō rativallabhasupriyaḥ ॥ 27 ॥

raṇānubandhanirmuktō rākṣasānīkanāśakaḥ ।
rājīvasambhavadvēṣī rājīvāsanapūjitaḥ ॥ 28 ॥

ramaṇīyamahāchitramayūrārūḍhasundaraḥ ।
ramānāthastutō rāmō rakārākarṣaṇakriyaḥ ॥ 29 ॥

vakārarūpō varadō vajraśaktyabhayānvitaḥ ।
vāmadēvādisampūjyō vajrapāṇimanōharaḥ ॥ 30 ॥

vāṇīstutō vāsavēśō vallīkalyāṇasundaraḥ ।
vallīvadanapadmārkō vallīnētrōtpalōḍupaḥ ॥ 31 ॥

vallīdvinayanānandō vallīchittataṭāmṛtam ।
vallīkalpalatāvṛkṣō vallīpriyamanōharaḥ ॥ 32 ॥

vallīkumudahāsyēnduḥ vallībhāṣitasupriyaḥ ।
vallīmanōhṛtsaundaryō vallīvidyullatāghanaḥ ॥ 33 ॥

vallīmaṅgaḻavēṣāḍhyō vallīmukhavaśaṅkaraḥ ।
vallīkuchagiridvandvakuṅkumāṅkitavakṣakaḥ ॥ 34 ॥

vallīśō vallabhō vāyusārathirvaruṇastutaḥ ।
vakratuṇḍānujō vatsō vatsalō vatsarakṣakaḥ ॥ 35 ॥

vatsapriyō vatsanāthō vatsavīragaṇāvṛtaḥ ।
vāraṇānanadaityaghnō vātāpighnōpadēśakaḥ ॥ 36 ॥

varṇagātramayūrasthō varṇarūpō varaprabhuḥ ।
varṇasthō vāraṇārūḍhō vajraśaktyāyudhapriyaḥ ॥ 37 ॥

vāmāṅgō vāmanayanō vachadbhūrvāmanapriyaḥ ।
varavēṣadharō vāmō vāchaspatisamarchitaḥ ॥ 38 ॥

vasiṣṭhādimuniśrēṣṭhavanditō vandanapriyaḥ ।
vakāranṛpadēvastrīchōrabhūtārimōhanaḥ ॥ 39 ॥

ṇakārarūpō nādāntō nāradādimunistutaḥ ।
ṇakārapīṭhamadhyasthō nagabhēdī nagēśvaraḥ ॥ 40 ॥

ṇakāranādasantuṣṭō nāgāśanarathasthitaḥ ।
ṇakārajapasuprītō nānāvēṣō nagapriyaḥ ॥ 41 ॥

ṇakārabindunilayō navagrahasurūpakaḥ ।
ṇakārapaṭhanānandō nandikēśvaravanditaḥ ॥ 42 ॥

ṇakāraghaṇṭāninadō nārāyaṇamanōharaḥ ।
ṇakāranādaśravaṇō nalinōdbhavaśikṣakaḥ ॥ 43 ॥

ṇakārapaṅkajādityō navavīrādhināyakaḥ ।
ṇakārapuṣpabhramarō navaratnavibhūṣaṇaḥ ॥ 44 ॥

ṇakārānarghaśayanō navaśaktisamāvṛtaḥ ।
ṇakāravṛkṣakusumō nāṭyasaṅgītasupriyaḥ ॥ 45 ॥

ṇakārabindunādajñō nayajñō nayanōdbhavaḥ ।
ṇakāraparvatēndrāgrasamutpannasudhāraṇiḥ ॥ 46 ॥

ṇakārapēṭakamaṇirnāgaparvatamandiraḥ ।
ṇakārakaruṇānandō nādātmā nāgabhūṣaṇaḥ ॥ 47 ॥

ṇakārakiṅkiṇībhūṣō nayanādṛśyadarśanaḥ ।
ṇakāravṛṣabhāvāsō nāmapārāyaṇapriyaḥ ॥ 48 ॥

ṇakārakamalārūḍhō nāmānantasamanvitaḥ ।
ṇakāraturagārūḍhō navaratnādidāyakaḥ ॥ 49 ॥

ṇakāramakuṭajvālāmaṇirnavanidhipradaḥ ।
ṇakāramūlamantrārthō navasiddhādipūjitaḥ ॥ 50 ॥

ṇakāramūlanādāntō ṇakārastambhanakriyaḥ ।
bhakārarūpō bhaktārthō bhavō bhargō bhayāpahaḥ ॥ 51 ॥

bhaktapriyō bhaktavandyō bhagavānbhaktavatsalaḥ ।
bhaktārtibhañjanō bhadrō bhaktasaubhāgyadāyakaḥ ॥ 52 ॥

bhaktamaṅgaḻadātā cha bhaktakaḻyāṇadarśanaḥ ।
bhaktadarśanasantuṣṭō bhaktasaṅghasupūjitaḥ ॥ 53 ॥

bhaktastōtrapriyānandō bhaktābhīṣṭapradāyakaḥ ।
bhaktasampūrṇaphaladō bhaktasāmrājyabhōgadaḥ ॥ 54 ॥

bhaktasālōkyasāmīpyarūpamōkṣavarapradaḥ ।
bhavauṣadhirbhavaghnaścha bhavāraṇyadavānalaḥ ॥ 55 ॥

bhavāndhakāramārtāṇḍō bhavavaidyō bhavāyudham ।
bhavaśailamahāvajrō bhavasāgaranāvikaḥ ॥ 56 ॥

bhavamṛtyubhayadhvaṃsī bhāvanātītavigrahaḥ ।
bhavabhūtapiśāchaghnō bhāsvarō bhāratīpriyaḥ ॥ 57 ॥ [bhaya]

bhāṣitadhvanimūlāntō bhāvābhāvavivarjitaḥ ।
bhānukōpapitṛdhvaṃsī bhāratīśōpadēśakaḥ ॥ 58 ॥

bhārgavīnāyakaśrīmadbhāginēyō bhavōdbhavaḥ ।
bhārakrauñchāsuradvēṣō bhārgavīnāthavallabhaḥ ॥ 59 ॥

bhaṭavīranamaskṛtyō bhaṭavīrasamāvṛtaḥ ।
bhaṭatārāgaṇōḍvīśō bhaṭavīragaṇastutaḥ ॥ 60 ॥

bhāgīrathēyō bhāṣārthō bhāvanāśabarīpriyaḥ ।
bhakārē kalichōrāribhūtādyuchchāṭanōdyataḥ ॥ 61 ॥

vakārasukalāsaṃsthō variṣṭhō vasudāyakaḥ ।
vakārakumudēnduścha vakārābdhisudhāmayaḥ ॥ 62 ॥

vakārāmṛtamādhuryō vakārāmṛtadāyakaḥ ।
dakṣē vajrābhītiyutō vāmē śaktivarānvitaḥ ॥ 63 ॥

vakārōdadhipūrṇēnduḥ vakārōdadhimauktikam ।
vakāramēghasalilō vāsavātmajarakṣakaḥ ॥ 64 ॥

vakāraphalasārajñō vakārakalaśāmṛtam ।
vakārapaṅkajarasō vasurvaṃśavivardhanaḥ ॥ 65 ॥

vakāradivyakamalabhramarō vāyuvanditaḥ ।
vakāraśaśisaṅkāśō vajrapāṇisutāpriyaḥ ॥ 66 ॥

vakārapuṣpasadgandhō vakārataṭapaṅkajam ।
vakārabhramaradhvānō vayastējōbalapradaḥ ॥ 67 ॥

vakāravanitānāthō vaśyādyaṣṭapriyāpradaḥ ।
vakāraphalasatkārō vakārājyahutāśanaḥ ॥ 68 ॥

varchasvī vāṅmanō'tītō vātāpyarikṛtapriyaḥ ।
vakāravaṭamūlasthō vakārajaladhēstaṭaḥ ॥ 69 ॥

vakāragaṅgāvēgābdhiḥ vajramāṇikyabhūṣaṇaḥ ।
vātarōgaharō vāṇīgītaśravaṇakautukaḥ ॥ 70 ॥

vakāramakarārūḍhō vakārajaladhēḥ patiḥ ।
vakārāmalamantrārthō vakāragṛhamaṅgaḻam ॥ 71 ॥

vakārasvargamāhēndrō vakārāraṇyavāraṇaḥ ।
vakārapañjaraśukō valāritanayāstutaḥ ॥ 72 ॥

vakāramantramalayasānumanmandamārutaḥ ।
vādyantabhānta ṣaṭkramya japāntē śatrubhañjanaḥ ॥ 73 ॥

vajrahastasutāvallīvāmadakṣiṇasēvitaḥ ।
vakulōtpalakādambapuṣpadāmasvalaṅkṛtaḥ ॥ 74 ॥

vajraśaktyādisampannadviṣaṭpāṇisarōruhaḥ ।
vāsanāgandhaliptāṅgō vaṣaṭkārō vaśīkaraḥ ॥ 75 ॥

vāsanāyuktatāmbūlapūritānanasundaraḥ ।
vallabhānāthasuprītō varapūrṇāmṛtōdadhiḥ ॥ 76 ॥

iti śrī subrahmaṇya triśatī stōtram ।