ശ്രീപൂര്ണബോധഗുരുതീര്ഥപയോബ്ധിപാരാ
കാമാരിമാക്ഷവിഷമാക്ഷശിരഃ സ്പൃശംതീ ।
പൂർവോത്തരാമിതതരംഗചരത്സുഹംസാ
ദേവാളിസേവിതപരാംഘ്രിപയോജലഗ്നാ ॥ 1 ॥

ജീവേശഭേദഗുണപൂര്തിജഗത്സുസത്ത്വ-
-നീചോച്ചഭാവമുഖനക്രഗണൈഃ സമേതാ ।
ദുർവാദ്യജാപതിഗിളൈര്ഗുരുരാഘവേംദ്ര-
-വാഗ്ദേവതാസരിദമും വിമലീ കരോതു ॥ 2 ॥

ശ്രീരാഘവേംദ്രഃ സകലപ്രദാതാ
സ്വപാദകംജദ്വയഭക്തിമദ്ഭ്യഃ ।
അഘാദ്രിസംഭേദനദൃഷ്ടിവജ്രഃ
ക്ഷമാസുരേംദ്രോഽവതു മാം സദാഽയമ് ॥ 3 ॥

ശ്രീരാഘവേംദ്രോ ഹരിപാദകംജ-
-നിഷേവണാല്ലബ്ധസമസ്തസംപത് ।
ദേവസ്വഭാവോ ദിവിജദ്രുമോഽയ-
-മിഷ്ടപ്രദോ മേ സതതം സ ഭൂയാത് ॥ 4 ॥

ഭവ്യസ്വരൂപോ ഭവദുഃഖതൂല-
-സംഘാഗ്നിചര്യഃ സുഖധൈര്യശാലീ ।
സമസ്തദുഷ്ടഗ്രഹനിഗ്രഹേശോ
ദുരത്യയോപപ്ലവസിംധുസേതുഃ ॥ 5 ॥

നിരസ്തദോഷോ നിരവദ്യവേഷഃ
പ്രത്യര്ഥിമൂകത്ത്വനിദാനഭാഷഃ ।
വിദ്വത്പരിജ്ഞേയമഹാവിശേഷോ
വാഗ്വൈഖരീനിര്ജിതഭവ്യശേഷഃ ॥ 6 ॥

സംതാനസംപത്പരിശുദ്ധഭക്തി-
-വിജ്ഞാനവാഗ്ദേഹസുപാടവാദീന് ।
ദത്വാ ശരീരോത്ഥസമസ്തദോഷാന്
ഹത്ത്വാ സ നോഽവ്യാദ്ഗുരുരാഘവേംദ്രഃ ॥ 7 ॥

യത്പാദോദകസംചയഃ സുരനദീമുഖ്യാപഗാസാദിതാ-
-സംഖ്യാനുത്തമപുണ്യസംഘവിലസത്പ്രഖ്യാതപുണ്യാവഹഃ ।
ദുസ്താപത്രയനാശനോ ഭുവി മഹാവംധ്യാസുപുത്രപ്രദോ
വ്യംഗസ്വംഗസമൃദ്ധിദോ ഗ്രഹമഹാപാപാപഹസ്തം ശ്രയേ ॥ 8 ॥

യത്പാദകംജരജസാ പരിഭൂഷിതാംഗാ
യത്പാദപദ്മമധുപായിതമാനസാ യേ ।
യത്പാദപദ്മപരികീര്തനജീര്ണവാച
-സ്തദ്ദര്ശനം ദുരിതകാനനദാവഭൂതമ് ॥ 9 ॥

സർവതംത്രസ്വതംത്രോഽസൌ ശ്രീമധ്വമതവര്ധനഃ
വിജയീംദ്രകരാബ്ജോത്ഥസുധീംദ്രവരപുത്രകഃ ॥ 10 ॥

ശ്രീരാഘവേംദ്രോ യതിരാട് ഗുരുര്മേ സ്യാദ്ഭയാപഹഃ
ജ്ഞാനഭക്തിസുപുത്രായുര്യശഃ ശ്രീപുണ്യവര്ധനഃ ॥ 11 ॥

പ്രതിവാദിജയസ്വാംതഭേദചിഹ്നാദരോ ഗുരുഃ ।
സർവവിദ്യാപ്രവീണോഽന്യോ രാഘവേംദ്രാന്ന വിദ്യതേ ॥ 12 ॥

അപരോക്ഷീകൃതശ്രീശഃ സമുപേക്ഷിതഭാവജഃ ।
അപേക്ഷിതപ്രദാതാഽന്യോ രാഘവേംദ്രാന്ന വിദ്യതേ ॥ 13 ॥

ദയാദാക്ഷിണ്യവൈരാഗ്യവാക്പാടവമുഖാംകിതഃ ।
ശാപാനുഗ്രഹശക്തോഽന്യോ രാഘവേംദ്രാന്ന വിദ്യതേ ॥ 14 ॥

അജ്ഞാനവിസ്മൃതിഭ്രാംതിസംശയാഽപസ്മൃതിക്ഷയാഃ ।
തംദ്രാകംപവചഃകൌംഠ്യമുഖാ യേ ചേംദ്രിയോദ്ഭവാഃ ।
ദോഷാസ്തേ നാശമായാംതി രാഘവേംദ്രപ്രസാദതഃ ॥ 15 ॥

ഓം ശ്രീരാഘവേംദ്രായ നമഃ ഇത്യഽഷ്ടാക്ഷരമംത്രതഃ ।
ജപിതാദ്ഭാവിതാന്നിത്യം ഇഷ്ടാര്ഥാഃ സ്യുര്ന സംശയഃ ॥ 16 ॥

ഹംതു നഃ കായജാന് ദോഷാന് ആത്മാത്മീയസമുദ്ഭവാന് ।
സർവാനപി പുമര്ഥാംശ്ച ദദാതു ഗുരുരാത്മവിത് ॥ 17 ॥

ഇതി കാലത്രയേ നിത്യം പ്രാര്ഥനാം യഃ കരോതി സഃ ।
ഇഹാമുത്രാപ്തസർവേഷ്ടോ മോദതേ നാത്ര സംശയഃ ॥ 18 ॥

അഗമ്യമഹിമാ ലോകേ രാഘവേംദ്രോ മഹായശാഃ ।
ശ്രീമധ്വമതദുഗ്ധാബ്ധിചംദ്രോഽവതു സദാഽനഘഃ ॥ 19 ॥

സർവയാത്രാഫലാവാപ്ത്യൈ യഥാശക്തിപ്രദക്ഷിണമ് ।
കരോമി തവ സിദ്ധസ്യ ബൃംദാവനഗതം ജലമ് ॥ 20 ॥

ശിരസാ ധാരയാമ്യദ്യ സർവതീര്ഥഫലാപ്തയേ ।
സർവാഭീഷ്ടാര്ഥസിദ്ധ്യര്ഥം നമസ്കാരം കരോമ്യഹമ് ।
തവ സംകീര്തനം വേദശാസ്ത്രാര്ഥജ്ഞാനസിദ്ധയേ ॥ 21 ॥

സംസാരേഽക്ഷയസാഗരേ പ്രകൃതിതോഽഗാധേ സദാ ദുസ്തരേ
സർവാവദ്യജലഗ്രഹൈരനുപമൈഃ കാമാദിഭംഗാകുലേ ।
നാനാവിഭ്രമദുര്ഭ്രമേഽമിതഭയസ്തോമാദിഫേനോത്കടേ
ദുഃഖോത്കൃഷ്ടവിഷേ സമുദ്ധര ഗുരോ മാ മഗ്നരൂപം സദാ ॥ 22 ॥

രാഘവേംദ്രഗുരുസ്തോത്രം യഃ പഠേദ്ഭക്തിപൂർവകമ് ।
തസ്യ കുഷ്ഠാദിരോഗാണാം നിവൃത്തിസ്ത്വരയാ ഭവേത് ॥ 23 ॥

അംധോഽപി ദിവ്യദൃഷ്ടിഃ സ്യാദേഡമൂകോഽപി വാക്പതിഃ ।
പൂര്ണായുഃ പൂര്ണസംപത്തിഃ സ്തോത്രസ്യാഽസ്യ ജപാദ്ഭവേത് ॥ 24 ॥

യഃ പിബേജ്ജലമേതേന സ്തോത്രേണൈവാഭിമംത്രിതമ് ।
തസ്യ കുക്ഷിഗതാ ദോഷാഃ സർവേ നശ്യംതി തത് ക്ഷണാത് ॥ 25 ॥

യദ്വൃംദാവനമാസാദ്യ പംഗുഃ ഖംജോഽപി വാ ജനഃ ।
സ്തോത്രേണാനേന യഃ കുര്യാത് പ്രദക്ഷിണനമസ്കൃതീ ॥ 26 ॥

സ ജംഘാലോ ഭവേദേവ ഗുരുരാജപ്രസാദതഃ ।
സോമസൂര്യോപരാഗേ ച പുഷ്യാര്കാദിസമാഗമേ ॥ 27 ॥

യോഽനുത്തമമിദം സ്തോത്രമഷ്ടോത്തരശതം ജപേത് ।
ഭൂതപ്രേതപിശാചാദി പീഡാ തസ്യ ന ജായതേ ॥ 28 ॥

ഏതത് സ്തോത്രം സമുച്ചാര്യ ഗുരോർവൃംദാവനാംതികേ ।
ദീപസംയോജനാജ്ജ്ഞാനം പുത്രലാഭോ ഭവേദ്ധ്രുവമ് ॥ 29 ॥

പരവാദിജയോ ദിവ്യജ്ഞാനഭക്ത്യാദിവര്ധനമ് ।
സർവാഭീഷ്ടപ്രവൃദ്ധിഃ സ്യാന്നാത്ര കാര്യാ വിചാരണാ ॥ 30 ॥

രാജചോരമഹാവ്യാഘ്രസര്പനക്രാദിപീഡനമ് ।
ന ജായതേഽസ്യ സ്തോത്രസ്യ പ്രഭാവാന്നാത്ര സംശയഃ ॥ 31 ॥

യോ ഭക്ത്യാ ഗുരുരാഘവേംദ്രചരണദ്വംദ്വം സ്മരന് യഃ പഠേത്
സ്തോത്രം ദിവ്യമിദം സദാ ന ഹി ഭവേത്തസ്യാസുഖം കിംചന ।
കിം ത്വിഷ്ടാര്ഥസമൃദ്ധിരേവ കമലാനാഥപ്രസാദോദയാത്
കീര്തിര്ദിഗ്വിദിതാ വിഭൂതിരതുലാ സാക്ഷീ ഹയാസ്യോഽത്ര ഹി ॥ 32 ॥

ഫലശൃതിഃ
ഇതി ശ്രീ രാഘവേംദ്രാര്യ ഗുരുരാജപ്രസാദതഃ ।
കൃതം സ്തോത്രമിദം പുണ്യം ശ്രീമദ്ഭിര്ഹ്യപ്പണാഭിദൈഃ ॥

പൂജ്യായ രാഘവേംദ്രായ സത്യധര്മരതായ ച ।
ഭജതാം കല്പവൃക്ഷായ നമതാം കാമധേനവേ ॥

ആപാദമൌളിപര്യംതം ഗുരൂണാമാകൃതിം സ്മരേത് ।
തേന വിഘ്നഃ പ്രണശ്യംതി സിദ്ധ്യംതി ച മനോരഥാഃ ॥

ദുർവാദിധ്വാംതരവയേ വൈഷ്ണവേംദീവരേംദവേ ।
ശ്രീരാഘവേംദ്ര ഗുരവേ നമോഽത്യംതദയാളവേ ॥

മൂകോഽപി യത്പ്രസാദേന മുകുംദശയനായ തേ ।
രാജരാജായതേ രിക്തോ രാഘവേംദ്രം തമാശ്രയേ ।

ഇതി ശ്രീ അപ്പണ്ണാചാര്യവിരചിതം ശ്രീരാഘവേംദ്ര സ്തോത്രം സംപൂര്ണമ് ॥