ଶ୍ରୀପୂର୍ଣବୋଧଗୁରୁତୀର୍ଥପୟୋବ୍ଧିପାରା
କାମାରିମାକ୍ଷଵିଷମାକ୍ଷଶିରଃ ସ୍ପୃଶଂତୀ ।
ପୂର୍ଵୋତ୍ତରାମିତତରଂଗଚରତ୍ସୁହଂସା
ଦେଵାଳିସେଵିତପରାଂଘ୍ରିପୟୋଜଲଗ୍ନା ॥ 1 ॥

ଜୀଵେଶଭେଦଗୁଣପୂର୍ତିଜଗତ୍ସୁସତ୍ତ୍ଵ-
-ନୀଚୋଚ୍ଚଭାଵମୁଖନକ୍ରଗଣୈଃ ସମେତା ।
ଦୁର୍ଵାଦ୍ୟଜାପତିଗିଳୈର୍ଗୁରୁରାଘଵେଂଦ୍ର-
-ଵାଗ୍ଦେଵତାସରିଦମୁଂ ଵିମଲୀ କରୋତୁ ॥ 2 ॥

ଶ୍ରୀରାଘଵେଂଦ୍ରଃ ସକଲପ୍ରଦାତା
ସ୍ଵପାଦକଂଜଦ୍ଵୟଭକ୍ତିମଦ୍ଭ୍ୟଃ ।
ଅଘାଦ୍ରିସଂଭେଦନଦୃଷ୍ଟିଵଜ୍ରଃ
କ୍ଷମାସୁରେଂଦ୍ରୋଽଵତୁ ମାଂ ସଦାଽୟମ୍ ॥ 3 ॥

ଶ୍ରୀରାଘଵେଂଦ୍ରୋ ହରିପାଦକଂଜ-
-ନିଷେଵଣାଲ୍ଲବ୍ଧସମସ୍ତସଂପତ୍ ।
ଦେଵସ୍ଵଭାଵୋ ଦିଵିଜଦ୍ରୁମୋଽୟ-
-ମିଷ୍ଟପ୍ରଦୋ ମେ ସତତଂ ସ ଭୂୟାତ୍ ॥ 4 ॥

ଭଵ୍ୟସ୍ଵରୂପୋ ଭଵଦୁଃଖତୂଲ-
-ସଂଘାଗ୍ନିଚର୍ୟଃ ସୁଖଧୈର୍ୟଶାଲୀ ।
ସମସ୍ତଦୁଷ୍ଟଗ୍ରହନିଗ୍ରହେଶୋ
ଦୁରତ୍ୟୟୋପପ୍ଲଵସିଂଧୁସେତୁଃ ॥ 5 ॥

ନିରସ୍ତଦୋଷୋ ନିରଵଦ୍ୟଵେଷଃ
ପ୍ରତ୍ୟର୍ଥିମୂକତ୍ତ୍ଵନିଦାନଭାଷଃ ।
ଵିଦ୍ଵତ୍ପରିଜ୍ଞେୟମହାଵିଶେଷୋ
ଵାଗ୍ଵୈଖରୀନିର୍ଜିତଭଵ୍ୟଶେଷଃ ॥ 6 ॥

ସଂତାନସଂପତ୍ପରିଶୁଦ୍ଧଭକ୍ତି-
-ଵିଜ୍ଞାନଵାଗ୍ଦେହସୁପାଟଵାଦୀନ୍ ।
ଦତ୍ଵା ଶରୀରୋତ୍ଥସମସ୍ତଦୋଷାନ୍
ହତ୍ତ୍ଵା ସ ନୋଽଵ୍ୟାଦ୍ଗୁରୁରାଘଵେଂଦ୍ରଃ ॥ 7 ॥

ୟତ୍ପାଦୋଦକସଂଚୟଃ ସୁରନଦୀମୁଖ୍ୟାପଗାସାଦିତା-
-ସଂଖ୍ୟାନୁତ୍ତମପୁଣ୍ୟସଂଘଵିଲସତ୍ପ୍ରଖ୍ୟାତପୁଣ୍ୟାଵହଃ ।
ଦୁସ୍ତାପତ୍ରୟନାଶନୋ ଭୁଵି ମହାଵଂଧ୍ୟାସୁପୁତ୍ରପ୍ରଦୋ
ଵ୍ୟଂଗସ୍ଵଂଗସମୃଦ୍ଧିଦୋ ଗ୍ରହମହାପାପାପହସ୍ତଂ ଶ୍ରୟେ ॥ 8 ॥

ୟତ୍ପାଦକଂଜରଜସା ପରିଭୂଷିତାଂଗା
ୟତ୍ପାଦପଦ୍ମମଧୁପାୟିତମାନସା ୟେ ।
ୟତ୍ପାଦପଦ୍ମପରିକୀର୍ତନଜୀର୍ଣଵାଚ
-ସ୍ତଦ୍ଦର୍ଶନଂ ଦୁରିତକାନନଦାଵଭୂତମ୍ ॥ 9 ॥

ସର୍ଵତଂତ୍ରସ୍ଵତଂତ୍ରୋଽସୌ ଶ୍ରୀମଧ୍ଵମତଵର୍ଧନଃ
ଵିଜୟୀଂଦ୍ରକରାବ୍ଜୋତ୍ଥସୁଧୀଂଦ୍ରଵରପୁତ୍ରକଃ ॥ 10 ॥

ଶ୍ରୀରାଘଵେଂଦ୍ରୋ ୟତିରାଟ୍ ଗୁରୁର୍ମେ ସ୍ୟାଦ୍ଭୟାପହଃ
ଜ୍ଞାନଭକ୍ତିସୁପୁତ୍ରାୟୁର୍ୟଶଃ ଶ୍ରୀପୁଣ୍ୟଵର୍ଧନଃ ॥ 11 ॥

ପ୍ରତିଵାଦିଜୟସ୍ଵାଂତଭେଦଚିହ୍ନାଦରୋ ଗୁରୁଃ ।
ସର୍ଵଵିଦ୍ୟାପ୍ରଵୀଣୋଽନ୍ୟୋ ରାଘଵେଂଦ୍ରାନ୍ନ ଵିଦ୍ୟତେ ॥ 12 ॥

ଅପରୋକ୍ଷୀକୃତଶ୍ରୀଶଃ ସମୁପେକ୍ଷିତଭାଵଜଃ ।
ଅପେକ୍ଷିତପ୍ରଦାତାଽନ୍ୟୋ ରାଘଵେଂଦ୍ରାନ୍ନ ଵିଦ୍ୟତେ ॥ 13 ॥

ଦୟାଦାକ୍ଷିଣ୍ୟଵୈରାଗ୍ୟଵାକ୍ପାଟଵମୁଖାଂକିତଃ ।
ଶାପାନୁଗ୍ରହଶକ୍ତୋଽନ୍ୟୋ ରାଘଵେଂଦ୍ରାନ୍ନ ଵିଦ୍ୟତେ ॥ 14 ॥

ଅଜ୍ଞାନଵିସ୍ମୃତିଭ୍ରାଂତିସଂଶୟାଽପସ୍ମୃତିକ୍ଷୟାଃ ।
ତଂଦ୍ରାକଂପଵଚଃକୌଂଠ୍ୟମୁଖା ୟେ ଚେଂଦ୍ରିୟୋଦ୍ଭଵାଃ ।
ଦୋଷାସ୍ତେ ନାଶମାୟାଂତି ରାଘଵେଂଦ୍ରପ୍ରସାଦତଃ ॥ 15 ॥

ଓଂ ଶ୍ରୀରାଘଵେଂଦ୍ରାୟ ନମଃ ଇତ୍ୟଽଷ୍ଟାକ୍ଷରମଂତ୍ରତଃ ।
ଜପିତାଦ୍ଭାଵିତାନ୍ନିତ୍ୟଂ ଇଷ୍ଟାର୍ଥାଃ ସ୍ୟୁର୍ନ ସଂଶୟଃ ॥ 16 ॥

ହଂତୁ ନଃ କାୟଜାନ୍ ଦୋଷାନ୍ ଆତ୍ମାତ୍ମୀୟସମୁଦ୍ଭଵାନ୍ ।
ସର୍ଵାନପି ପୁମର୍ଥାଂଶ୍ଚ ଦଦାତୁ ଗୁରୁରାତ୍ମଵିତ୍ ॥ 17 ॥

ଇତି କାଲତ୍ରୟେ ନିତ୍ୟଂ ପ୍ରାର୍ଥନାଂ ୟଃ କରୋତି ସଃ ।
ଇହାମୁତ୍ରାପ୍ତସର୍ଵେଷ୍ଟୋ ମୋଦତେ ନାତ୍ର ସଂଶୟଃ ॥ 18 ॥

ଅଗମ୍ୟମହିମା ଲୋକେ ରାଘଵେଂଦ୍ରୋ ମହାୟଶାଃ ।
ଶ୍ରୀମଧ୍ଵମତଦୁଗ୍ଧାବ୍ଧିଚଂଦ୍ରୋଽଵତୁ ସଦାଽନଘଃ ॥ 19 ॥

ସର୍ଵୟାତ୍ରାଫଲାଵାପ୍ତ୍ୟୈ ୟଥାଶକ୍ତିପ୍ରଦକ୍ଷିଣମ୍ ।
କରୋମି ତଵ ସିଦ୍ଧସ୍ୟ ବୃଂଦାଵନଗତଂ ଜଲମ୍ ॥ 20 ॥

ଶିରସା ଧାରୟାମ୍ୟଦ୍ୟ ସର୍ଵତୀର୍ଥଫଲାପ୍ତୟେ ।
ସର୍ଵାଭୀଷ୍ଟାର୍ଥସିଦ୍ଧ୍ୟର୍ଥଂ ନମସ୍କାରଂ କରୋମ୍ୟହମ୍ ।
ତଵ ସଂକୀର୍ତନଂ ଵେଦଶାସ୍ତ୍ରାର୍ଥଜ୍ଞାନସିଦ୍ଧୟେ ॥ 21 ॥

ସଂସାରେଽକ୍ଷୟସାଗରେ ପ୍ରକୃତିତୋଽଗାଧେ ସଦା ଦୁସ୍ତରେ
ସର୍ଵାଵଦ୍ୟଜଲଗ୍ରହୈରନୁପମୈଃ କାମାଦିଭଂଗାକୁଲେ ।
ନାନାଵିଭ୍ରମଦୁର୍ଭ୍ରମେଽମିତଭୟସ୍ତୋମାଦିଫେନୋତ୍କଟେ
ଦୁଃଖୋତ୍କୃଷ୍ଟଵିଷେ ସମୁଦ୍ଧର ଗୁରୋ ମା ମଗ୍ନରୂପଂ ସଦା ॥ 22 ॥

ରାଘଵେଂଦ୍ରଗୁରୁସ୍ତୋତ୍ରଂ ୟଃ ପଠେଦ୍ଭକ୍ତିପୂର୍ଵକମ୍ ।
ତସ୍ୟ କୁଷ୍ଠାଦିରୋଗାଣାଂ ନିଵୃତ୍ତିସ୍ତ୍ଵରୟା ଭଵେତ୍ ॥ 23 ॥

ଅଂଧୋଽପି ଦିଵ୍ୟଦୃଷ୍ଟିଃ ସ୍ୟାଦେଡମୂକୋଽପି ଵାକ୍ପତିଃ ।
ପୂର୍ଣାୟୁଃ ପୂର୍ଣସଂପତ୍ତିଃ ସ୍ତୋତ୍ରସ୍ୟାଽସ୍ୟ ଜପାଦ୍ଭଵେତ୍ ॥ 24 ॥

ୟଃ ପିବେଜ୍ଜଲମେତେନ ସ୍ତୋତ୍ରେଣୈଵାଭିମଂତ୍ରିତମ୍ ।
ତସ୍ୟ କୁକ୍ଷିଗତା ଦୋଷାଃ ସର୍ଵେ ନଶ୍ୟଂତି ତତ୍ କ୍ଷଣାତ୍ ॥ 25 ॥

ୟଦ୍ଵୃଂଦାଵନମାସାଦ୍ୟ ପଂଗୁଃ ଖଂଜୋଽପି ଵା ଜନଃ ।
ସ୍ତୋତ୍ରେଣାନେନ ୟଃ କୁର୍ୟାତ୍ ପ୍ରଦକ୍ଷିଣନମସ୍କୃତୀ ॥ 26 ॥

ସ ଜଂଘାଲୋ ଭଵେଦେଵ ଗୁରୁରାଜପ୍ରସାଦତଃ ।
ସୋମସୂର୍ୟୋପରାଗେ ଚ ପୁଷ୍ୟାର୍କାଦିସମାଗମେ ॥ 27 ॥

ୟୋଽନୁତ୍ତମମିଦଂ ସ୍ତୋତ୍ରମଷ୍ଟୋତ୍ତରଶତଂ ଜପେତ୍ ।
ଭୂତପ୍ରେତପିଶାଚାଦି ପୀଡା ତସ୍ୟ ନ ଜାୟତେ ॥ 28 ॥

ଏତତ୍ ସ୍ତୋତ୍ରଂ ସମୁଚ୍ଚାର୍ୟ ଗୁରୋର୍ଵୃଂଦାଵନାଂତିକେ ।
ଦୀପସଂୟୋଜନାଜ୍ଜ୍ଞାନଂ ପୁତ୍ରଲାଭୋ ଭଵେଦ୍ଧ୍ରୁଵମ୍ ॥ 29 ॥

ପରଵାଦିଜୟୋ ଦିଵ୍ୟଜ୍ଞାନଭକ୍ତ୍ୟାଦିଵର୍ଧନମ୍ ।
ସର୍ଵାଭୀଷ୍ଟପ୍ରଵୃଦ୍ଧିଃ ସ୍ୟାନ୍ନାତ୍ର କାର୍ୟା ଵିଚାରଣା ॥ 30 ॥

ରାଜଚୋରମହାଵ୍ୟାଘ୍ରସର୍ପନକ୍ରାଦିପୀଡନମ୍ ।
ନ ଜାୟତେଽସ୍ୟ ସ୍ତୋତ୍ରସ୍ୟ ପ୍ରଭାଵାନ୍ନାତ୍ର ସଂଶୟଃ ॥ 31 ॥

ୟୋ ଭକ୍ତ୍ୟା ଗୁରୁରାଘଵେଂଦ୍ରଚରଣଦ୍ଵଂଦ୍ଵଂ ସ୍ମରନ୍ ୟଃ ପଠେତ୍
ସ୍ତୋତ୍ରଂ ଦିଵ୍ୟମିଦଂ ସଦା ନ ହି ଭଵେତ୍ତସ୍ୟାସୁଖଂ କିଂଚନ ।
କିଂ ତ୍ଵିଷ୍ଟାର୍ଥସମୃଦ୍ଧିରେଵ କମଲାନାଥପ୍ରସାଦୋଦୟାତ୍
କୀର୍ତିର୍ଦିଗ୍ଵିଦିତା ଵିଭୂତିରତୁଲା ସାକ୍ଷୀ ହୟାସ୍ୟୋଽତ୍ର ହି ॥ 32 ॥

ଫଲଶୃତିଃ
ଇତି ଶ୍ରୀ ରାଘଵେଂଦ୍ରାର୍ୟ ଗୁରୁରାଜପ୍ରସାଦତଃ ।
କୃତଂ ସ୍ତୋତ୍ରମିଦଂ ପୁଣ୍ୟଂ ଶ୍ରୀମଦ୍ଭିର୍ହ୍ୟପ୍ପଣାଭିଦୈଃ ॥

ପୂଜ୍ୟାୟ ରାଘଵେଂଦ୍ରାୟ ସତ୍ୟଧର୍ମରତାୟ ଚ ।
ଭଜତାଂ କଲ୍ପଵୃକ୍ଷାୟ ନମତାଂ କାମଧେନଵେ ॥

ଆପାଦମୌଳିପର୍ୟଂତଂ ଗୁରୂଣାମାକୃତିଂ ସ୍ମରେତ୍ ।
ତେନ ଵିଘ୍ନଃ ପ୍ରଣଶ୍ୟଂତି ସିଦ୍ଧ୍ୟଂତି ଚ ମନୋରଥାଃ ॥

ଦୁର୍ଵାଦିଧ୍ଵାଂତରଵୟେ ଵୈଷ୍ଣଵେଂଦୀଵରେଂଦଵେ ।
ଶ୍ରୀରାଘଵେଂଦ୍ର ଗୁରଵେ ନମୋଽତ୍ୟଂତଦୟାଳଵେ ॥

ମୂକୋଽପି ୟତ୍ପ୍ରସାଦେନ ମୁକୁଂଦଶୟନାୟ ତେ ।
ରାଜରାଜାୟତେ ରିକ୍ତୋ ରାଘଵେଂଦ୍ରଂ ତମାଶ୍ରୟେ ।

ଇତି ଶ୍ରୀ ଅପ୍ପଣ୍ଣାଚାର୍ୟଵିରଚିତଂ ଶ୍ରୀରାଘଵେଂଦ୍ର ସ୍ତୋତ୍ରଂ ସଂପୂର୍ଣମ୍ ॥