śrīpūrṇabōdhagurutīrthapayōbdhipārā
kāmārimākṣaviṣamākṣaśiraḥ spṛśantī ।
pūrvōttarāmitataraṅgacharatsuhaṃsā
dēvāḻisēvitaparāṅghripayōjalagnā ॥ 1 ॥
jīvēśabhēdaguṇapūrtijagatsusattva-
-nīchōchchabhāvamukhanakragaṇaiḥ samētā ।
durvādyajāpatigiḻairgururāghavēndra-
-vāgdēvatāsaridamuṃ vimalī karōtu ॥ 2 ॥
śrīrāghavēndraḥ sakalapradātā
svapādakañjadvayabhaktimadbhyaḥ ।
aghādrisambhēdanadṛṣṭivajraḥ
kṣamāsurēndrō'vatu māṃ sadā'yam ॥ 3 ॥
śrīrāghavēndrō haripādakañja-
-niṣēvaṇāllabdhasamastasampat ।
dēvasvabhāvō divijadrumō'ya-
-miṣṭapradō mē satataṃ sa bhūyāt ॥ 4 ॥
bhavyasvarūpō bhavaduḥkhatūla-
-saṅghāgnicharyaḥ sukhadhairyaśālī ।
samastaduṣṭagrahanigrahēśō
duratyayōpaplavasindhusētuḥ ॥ 5 ॥
nirastadōṣō niravadyavēṣaḥ
pratyarthimūkattvanidānabhāṣaḥ ।
vidvatparijñēyamahāviśēṣō
vāgvaikharīnirjitabhavyaśēṣaḥ ॥ 6 ॥
santānasampatpariśuddhabhakti-
-vijñānavāgdēhasupāṭavādīn ।
datvā śarīrōtthasamastadōṣān
hattvā sa nō'vyādgururāghavēndraḥ ॥ 7 ॥
yatpādōdakasañchayaḥ suranadīmukhyāpagāsāditā-
-saṅkhyānuttamapuṇyasaṅghavilasatprakhyātapuṇyāvahaḥ ।
dustāpatrayanāśanō bhuvi mahāvandhyāsuputrapradō
vyaṅgasvaṅgasamṛddhidō grahamahāpāpāpahastaṃ śrayē ॥ 8 ॥
yatpādakañjarajasā paribhūṣitāṅgā
yatpādapadmamadhupāyitamānasā yē ।
yatpādapadmaparikīrtanajīrṇavācha
-staddarśanaṃ duritakānanadāvabhūtam ॥ 9 ॥
sarvatantrasvatantrō'sau śrīmadhvamatavardhanaḥ
vijayīndrakarābjōtthasudhīndravaraputrakaḥ ॥ 10 ॥
śrīrāghavēndrō yatirāṭ gururmē syādbhayāpahaḥ
jñānabhaktisuputrāyuryaśaḥ śrīpuṇyavardhanaḥ ॥ 11 ॥
prativādijayasvāntabhēdachihnādarō guruḥ ।
sarvavidyāpravīṇō'nyō rāghavēndrānna vidyatē ॥ 12 ॥
aparōkṣīkṛtaśrīśaḥ samupēkṣitabhāvajaḥ ।
apēkṣitapradātā'nyō rāghavēndrānna vidyatē ॥ 13 ॥
dayādākṣiṇyavairāgyavākpāṭavamukhāṅkitaḥ ।
śāpānugrahaśaktō'nyō rāghavēndrānna vidyatē ॥ 14 ॥
ajñānavismṛtibhrāntisaṃśayā'pasmṛtikṣayāḥ ।
tandrākampavachaḥkauṇṭhyamukhā yē chēndriyōdbhavāḥ ।
dōṣāstē nāśamāyānti rāghavēndraprasādataḥ ॥ 15 ॥
ōṃ śrīrāghavēndrāya namaḥ itya'ṣṭākṣaramantrataḥ ।
japitādbhāvitānnityaṃ iṣṭārthāḥ syurna saṃśayaḥ ॥ 16 ॥
hantu naḥ kāyajān dōṣān ātmātmīyasamudbhavān ।
sarvānapi pumarthāṃścha dadātu gururātmavit ॥ 17 ॥
iti kālatrayē nityaṃ prārthanāṃ yaḥ karōti saḥ ।
ihāmutrāptasarvēṣṭō mōdatē nātra saṃśayaḥ ॥ 18 ॥
agamyamahimā lōkē rāghavēndrō mahāyaśāḥ ।
śrīmadhvamatadugdhābdhichandrō'vatu sadā'naghaḥ ॥ 19 ॥
sarvayātrāphalāvāptyai yathāśaktipradakṣiṇam ।
karōmi tava siddhasya bṛndāvanagataṃ jalam ॥ 20 ॥
śirasā dhārayāmyadya sarvatīrthaphalāptayē ।
sarvābhīṣṭārthasiddhyarthaṃ namaskāraṃ karōmyaham ।
tava saṅkīrtanaṃ vēdaśāstrārthajñānasiddhayē ॥ 21 ॥
saṃsārē'kṣayasāgarē prakṛtitō'gādhē sadā dustarē
sarvāvadyajalagrahairanupamaiḥ kāmādibhaṅgākulē ।
nānāvibhramadurbhramē'mitabhayastōmādiphēnōtkaṭē
duḥkhōtkṛṣṭaviṣē samuddhara gurō mā magnarūpaṃ sadā ॥ 22 ॥
rāghavēndragurustōtraṃ yaḥ paṭhēdbhaktipūrvakam ।
tasya kuṣṭhādirōgāṇāṃ nivṛttistvarayā bhavēt ॥ 23 ॥
andhō'pi divyadṛṣṭiḥ syādēḍamūkō'pi vākpatiḥ ।
pūrṇāyuḥ pūrṇasampattiḥ stōtrasyā'sya japādbhavēt ॥ 24 ॥
yaḥ pibējjalamētēna stōtrēṇaivābhimantritam ।
tasya kukṣigatā dōṣāḥ sarvē naśyanti tat kṣaṇāt ॥ 25 ॥
yadvṛndāvanamāsādya paṅguḥ khañjō'pi vā janaḥ ।
stōtrēṇānēna yaḥ kuryāt pradakṣiṇanamaskṛtī ॥ 26 ॥
sa jaṅghālō bhavēdēva gururājaprasādataḥ ।
sōmasūryōparāgē cha puṣyārkādisamāgamē ॥ 27 ॥
yō'nuttamamidaṃ stōtramaṣṭōttaraśataṃ japēt ।
bhūtaprētapiśāchādi pīḍā tasya na jāyatē ॥ 28 ॥
ētat stōtraṃ samuchchārya gurōrvṛndāvanāntikē ।
dīpasaṃyōjanājjñānaṃ putralābhō bhavēddhruvam ॥ 29 ॥
paravādijayō divyajñānabhaktyādivardhanam ।
sarvābhīṣṭapravṛddhiḥ syānnātra kāryā vichāraṇā ॥ 30 ॥
rājachōramahāvyāghrasarpanakrādipīḍanam ।
na jāyatē'sya stōtrasya prabhāvānnātra saṃśayaḥ ॥ 31 ॥
yō bhaktyā gururāghavēndracharaṇadvandvaṃ smaran yaḥ paṭhēt
stōtraṃ divyamidaṃ sadā na hi bhavēttasyāsukhaṃ kiñchana ।
kiṃ tviṣṭārthasamṛddhirēva kamalānāthaprasādōdayāt
kīrtirdigviditā vibhūtiratulā sākṣī hayāsyō'tra hi ॥ 32 ॥
phalaśṛtiḥ
iti śrī rāghavēndrārya gururājaprasādataḥ ।
kṛtaṃ stōtramidaṃ puṇyaṃ śrīmadbhirhyappaṇābhidaiḥ ॥
pūjyāya rāghavēndrāya satyadharmaratāya cha ।
bhajatāṃ kalpavṛkṣāya namatāṃ kāmadhēnavē ॥
āpādamauḻiparyantaṃ gurūṇāmākṛtiṃ smarēt ।
tēna vighnaḥ praṇaśyanti siddhyanti cha manōrathāḥ ॥
durvādidhvāntaravayē vaiṣṇavēndīvarēndavē ।
śrīrāghavēndra guravē namō'tyantadayāḻavē ॥
mūkō'pi yatprasādēna mukundaśayanāya tē ।
rājarājāyatē riktō rāghavēndraṃ tamāśrayē ।
iti śrī appaṇṇāchāryavirachitaṃ śrīrāghavēndra stōtraṃ sampūrṇam ॥
