భజేఽహం కుమారం భవానీకుమారం
గలోల్లాసిహారం నమత్సద్విహారమ్ ।
రిపుస్తోమపారం నృసింహావతారం
సదానిర్వికారం గుహం నిర్విచారమ్ ॥ 1 ॥
నమామీశపుత్రం జపాశోణగాత్రం
సురారాతిశత్రుం రవీన్ద్వగ్నినేత్రమ్ ।
మహాబర్హిపత్రం శివాస్యాబ్జమిత్రం
ప్రభాస్వత్కళత్రం పురాణం పవిత్రమ్ ॥ 2 ॥
అనేకార్కకోటి-ప్రభావజ్జ్వలం తం
మనోహారి మాణిక్య భూషోజ్జ్వలం తమ్ ।
శ్రితానామభీష్టం నిశాన్తం నితాన్తం
భజే షణ్ముఖం తం శరచ్చన్ద్రకాన్తమ్ ॥ 3 ॥
కృపావారి కల్లోలభాస్వత్కటాక్షం
విరాజన్మనోహారి శోణామ్బుజాక్షమ్ ।
ప్రయోగప్రదానప్రవాహైకదక్షం
భజే కాన్తికాన్తం పరస్తోమరక్షమ్ ॥ 4 ॥
సుకస్తూరిసిన్దూరభాస్వల్లలాటం
దయాపూర్ణచిత్తం మహాదేవపుత్రమ్ ।
రవీన్దూల్లసద్రత్నరాజత్కిరీటం
భజే క్రీడితాకాశ గఙ్గాద్రికూటమ్ ॥ 5 ॥
సుకున్దప్రసూనావళీశోభితాఙ్గం
శరత్పూర్ణచన్ద్రప్రభాకాన్తికాన్తమ్ ।
శిరీషప్రసూనాభిరామం భవన్తం
భజే దేవసేనాపతిం వల్లభం తమ్ ॥ 6 ॥
సులావణ్యసత్సూర్యకోటిప్రతీకం
ప్రభుం తారకారిం ద్విషడ్బాహుమీశమ్ ।
నిజాఙ్కప్రభాదివ్యమానాపదీశం
భజే పార్వతీప్రాణపుత్రం సుకేశమ్ ॥ 7 ॥
అజం సర్వలోకప్రియం లోకనాథం
గుహం శూరపద్మాదిదమ్భోళిధారమ్ ।
సుచారుం సునాసాపుటం సచ్చరిత్రం
భజే కార్తికేయం సదా బాహులేయమ్ ॥ 8 ॥
శరారణ్యసమ్భూతమిన్ద్రాదివన్ద్యం
ద్విషడ్బాహుసఙ్ఖ్యాయుధశ్రేణిరమ్యమ్ ।
మరుత్సారథిం కుక్కుటేశం సుకేతుం
భజే యోగిహృత్పద్మమధ్యాధివాసమ్ ॥ 9 ॥
విరిఞ్చీన్ద్రవల్లీశ దేవేశముఖ్యం
ప్రశస్తామరస్తోమసంస్తూయమానమ్ ।
దిశ త్వం దయాళో శ్రియం నిశ్చలాం మే
వినా త్వాం గతిః కా ప్రభో మే ప్రసీద ॥ 10 ॥
పదామ్భోజసేవా సమాయాతబృన్దా-
రకశ్రేణికోటీరభాస్వల్లలాటమ్ ।
కళత్రోల్లసత్పార్శ్వయుగ్మం వరేణ్యం
భజే దేవమాద్యన్తహీనప్రభావమ్ ॥ 11 ॥
భవామ్భోధిమధ్యే తరఙ్గే పతన్తం
ప్రభో మాం సదా పూర్ణదృష్ట్యా సమీక్ష్య ।
భవద్భక్తినావోద్ధర త్వం దయాళో
సుగత్యన్తరం నాస్తి దేవ ప్రసీద ॥ 12 ॥
గళే రత్నభూషం తనౌ మఞ్జువేషం
కరే జ్ఞానశక్తిం దరస్మేరమాస్యే ।
కటిన్యస్తపాణిం శిఖిస్థం కుమారం
భజేఽహం గుహాదన్యదేవం న మన్యే ॥ 13 ॥
దయాహీనచిత్తం పరద్రోహపాత్రం
సదా పాపశీలం గురోర్భక్తిహీనమ్ ।
అనన్యావలమ్బం భవన్నేత్రపాత్రం
కృపాశీల మాం భో పవిత్రం కురు త్వమ్ ॥ 14 ॥
మహాసేన గాఙ్గేయ వల్లీసహాయ
ప్రభో తారకారే షడాస్యామరేశ ।
సదా పాయసాన్నప్రదాతర్గుహేతి
స్మరిష్యామి భక్త్యా సదాహం విభో త్వామ్ ॥ 15 ॥
ప్రతాపస్య బాహో నమద్వీరబాహో
ప్రభో కార్తికేయేష్టకామప్రదేతి ।
యదా యే పఠన్తే భవన్తం తదేవం
ప్రసన్నస్తు తేషాం బహుశ్రీం దదాసి ॥ 16 ॥
అపారాతిదారిద్ర్యవారాశిమధ్యే
భ్రమన్తం జనగ్రాహపూర్ణే నితాన్తమ్ ।
మహాసేన మాముద్ధర త్వం కటాక్షా-
వలోకేన కిఞ్చిత్ప్రసీద ప్రసీద ॥ 17 ॥
స్థిరాం దేహి భక్తిం భవత్పాదపద్మే
శ్రియం నిశ్చలాం దేహి మహ్యం కుమార ।
గుహం చన్ద్రతారం సువంశాభివృద్ధిం
కురు త్వం ప్రభో మే మనః కల్పసాలః ॥ 18 ॥
నమస్తే నమస్తే మహాశక్తిపాణే
నమస్తే నమస్తే లసద్వజ్రపాణే ।
నమస్తే నమస్తే కటిన్యస్తపాణే
నమస్తే నమస్తే సదాభీష్టపాణే ॥ 19 ॥
నమస్తే నమస్తే మహాశక్తిధారిన్
నమస్తే సురాణాం మహాసౌఖ్యదాయిన్ ।
నమస్తే సదా కుక్కుటేశాఖ్యక త్వం
సమస్తాపరాధం విభో మే క్షమస్వ ॥ 20 ॥
కుమారాత్పరం కర్మయోగం న జానే
కుమారాత్పరం కర్మశీలం న జానే ।
య ఏకో మునీనాం హృదబ్జాధివాసః
శివాఙ్కం సమారుహ్య సత్పీఠకల్పమ్ ॥ 21 ॥
విరిఞ్చాయ మన్త్రోపదేశం చకార
ప్రమోదేన సోఽయం తనోతు శ్రియం మే ।
యమాహుః పరం వేద శూరేషు ముఖ్యం
సదా యస్య శక్త్యా జగత్భీతభీతా ॥ 22 ॥
యమాశ్రిత్య దేవాః స్థిరం స్వర్గపాలాః
సదోఙ్కారరూపం చిదానన్దమీడే ।
గుహస్తోత్రమేతత్ కృతం తారకారే
భుజఙ్గప్రయాతేన హృద్యేన కాన్తమ్ ॥ 23 ॥
జనా యే పఠన్తే మహాభక్తియుక్తాః
ప్రమోదేన సాయం ప్రభాతే విశేషః ।
న జన్మర్క్షయోగే యదా తే రుదాన్తా
మనోవాఞ్ఛితాన్ సర్వకామాన్ లభన్తే ॥ 23 ॥
ఇతి శ్రీ సుబ్రహ్మణ్య భుజఙ్గ ప్రయాత స్తోత్రమ్ ।
