ధ్యానం
వ్యాఖ్యారుద్రాక్షమాలే కలశసురభితే బాహుభిర్వామపాదం
బిభ్రాణో జానుమూర్ధ్నా వటతరునివృతావస్యధో విద్యమానః ।
సౌవర్ణే యోగపీఠే లిపిమయకమలే సూపవిష్టస్త్రిణేత్రః
క్షీరాభశ్చన్ద్రమౌళిర్వితరతు నితరాం శుద్ధబుద్ధిం శివో నః ॥
స్తోత్రం
విద్యారూపీ మహాయోగీ శుద్ధజ్ఞానీ పినాకధృత్ ।
రత్నాలఙ్కృతసర్వాఙ్గో రత్నమాలీ జటాధరః ॥ 1 ॥
గఙ్గాధార్యచలావాసీ సర్వజ్ఞానీ సమాధిధృత్ ।
అప్రమేయో యోగనిధిస్తారకో భక్తవత్సలః ॥ 2 ॥
బ్రహ్మరూపీ జగద్వ్యాపీ విష్ణుమూర్తిః పురాన్తకః ।
ఉక్షవాహశ్చర్మవాసాః పీతామ్బరవిభూషణః ॥ 3 ॥
మోక్షసిద్ధిర్మోక్షదాయీ దానవారిర్జగత్పతిః ।
విద్యాధారీ శుక్లతనుః విద్యాదాయీ గణాధిపః ॥ 4 ॥
పాపాపస్మృతిసంహర్తా శశిమౌళిర్మహాస్వనః ।
సామప్రియః స్వయం సాధుః సర్వదేవైర్నమస్కృతః ॥ 5 ॥
హస్తవహ్నిధరః శ్రీమాన్ మృగధారీ చ శఙ్కరః ।
యజ్ఞనాథః క్రతుధ్వంసీ యజ్ఞభోక్తా యమాన్తకః ॥ 6 ॥
భక్తానుగ్రహమూర్తిశ్చ భక్తసేవ్యో వృషధ్వజః ।
భస్మోద్ధూళితసర్వాఙ్గోఽప్యక్షమాలాధరో మహాన్ ॥ 7 ॥
త్రయీమూర్తిః పరం బ్రహ్మ నాగరాజైరలఙ్కృతః ।
శాన్తరూపో మహాజ్ఞానీ సర్వలోకవిభూషణః ॥ 8 ॥
అర్ధనారీశ్వరో దేవో మునిసేవ్యః సురోత్తమః ।
వ్యాఖ్యానదేవో భగవాన్ అగ్నిచన్ద్రార్కలోచనః ॥ 9 ॥
జగత్స్రష్టా జగద్గోప్తా జగద్ధ్వంసీ త్రిలోచనః ।
జగద్గురుర్మహాదేవో మహానన్దపరాయణః ॥ 10 ॥
జటాధారీ మహావీరో జ్ఞానదేవైరలఙ్కృతః ।
వ్యోమగఙ్గాజలస్నాతా సిద్ధసఙ్ఘసమర్చితః ॥ 11 ॥
తత్త్వమూర్తిర్మహాయోగీ మహాసారస్వతప్రదః ।
వ్యోమమూర్తిశ్చ భక్తానామిష్టకామఫలప్రదః ॥ 12 ॥
వీరమూర్తిర్విరూపీ చ తేజోమూర్తిరనామయః ।
వేదవేదాఙ్గతత్త్వజ్ఞశ్చతుష్షష్టికళానిధిః ॥ 13 ॥
భవరోగభయధ్వంసీ భక్తానామభయప్రదః ।
నీలగ్రీవో లలాటాక్షో గజచర్మా చ జ్ఞానదః ॥ 14 ॥
అరోగీ కామదహనస్తపస్వీ విష్ణువల్లభః ।
బ్రహ్మచారీ చ సన్న్యాసీ గృహస్థాశ్రమకారణః ॥ 15 ॥
దాన్తశమవతాం శ్రేష్ఠః సత్త్వరూపదయానిధిః ।
యోగపట్టాభిరామశ్చ వీణాధారీ విచేతనః ॥ 16 ॥
మన్త్రప్రజ్ఞానుగాచారో ముద్రాపుస్తకధారకః ।
రాగహిక్కాదిరోగాణాం వినిహన్తా సురేశ్వరః ॥ 17 ॥
ఇతి శ్రీ దక్షిణామూర్త్యష్టోత్తరశతనామ స్తోత్రమ్ ॥
