PDF, Large PDF, Multimedia, Meaning
View this in:
| English | Devanagari | Telugu | Tamil | Kannada | Malayalam | Gujarati | Oriya | Bengali |

મૂક પંચ શતિ 1 - આર્ય શતકમ્


કારણપરચિદ્રૂપા કાંચીપુરસીમ્નિ કામપીઠગતા |
કાચન વિહરતિ કરુણા કાશ્મીરસ્તબકકોમલાંગલતા ‖1‖

કંચન કાંચીનિલયં કરધૃતકોદંડબાણસૃણિપાશમ્ |
કઠિનસ્તનભરનમ્રં કૈવલ્યાનંદકંદમવલંબે ‖2‖

ચિંતિતફલપરિપોષણચિંતામણિરેવ કાંચિનિલયા મે |
ચિરતરસુચરિતસુલભા ચિત્તં શિશિરયતુ ચિત્સુખાધારા ‖3‖

કુટિલકચં કઠિનકુચં કુંદસ્મિતકાંતિ કુંકુમચ્છાયમ્ |
કુરુતે વિહૃતિં કાંચ્યાં કુલપર્વતસાર્વભૌમસર્વસ્વમ્ ‖4‖

પંચશરશાસ્ત્રબોધનપરમાચાર્યેણ દૃષ્ટિપાતેન |
કાંચીસીમ્નિ કુમારી કાચન મોહયતિ કામજેતારમ્ ‖5‖

પરયા કાંચીપુરયા પર્વતપર્યાયપીનકુચભરયા |
પરતંત્રા વયમનયા પંકજસબ્રહ્મચારિલોચનયા ‖6‖

ઐશ્વર્યમિંદુમૌલેરૈકત્મ્યપ્રકૃતિ કાંચિમધ્યગતમ્ |
ઐંદવકિશોરશેખરમૈદંપર્યં ચકાસ્તિ નિગમાનામ્ ‖7‖

શ્રિતકંપસીમાનં શિથિલિતપરમશિવધૈર્યમહિમાનમ્ |
કલયે પટલિમાનં કંચન કંચુકિતભુવનભૂમાનમ્ ‖8‖

આદૃતકાંચીનિલયમાદ્યામારૂઢયૌવનાટોપામ્ |
આગમવતંસકલિકામાનંદાદ્વૈતકંદલીં વંદે ‖9‖

તુંગાભિરામકુચભરશૃંગારિતમાશ્રયામિ કાંચિગતમ્ |
ગંગાધરપરતંત્રં શૃંગારાદ્વૈતતંત્રસિદ્ધાંતમ્ ‖10‖

કાંચીરત્નવિભૂષાં કામપિ કંદર્પસૂતિકાપાંગીમ્ |
પરમાં કલામુપાસે પરશિવવામાંકપીઠિકાસીનામ્ ‖11‖

કંપાતીચરાણાં કરુણાકોરકિતદૃષ્ટિપાતાનામ્ |
કેલીવનં મનો મે કેષાંચિદ્ભવતુ ચિદ્વિલાસાનામ્ ‖12‖

આમ્રતરુમૂલવસતેરાદિમપુરુષસ્ય નયનપીયૂષમ્ |
આરબ્ધયૌવનોત્સવમામ્નાયરહસ્યમંતરવલંબે ‖13‖

અધિકાંચિ પરમયોગિભિરાદિમપરપીઠસીમ્નિ દૃશ્યેન |
અનુબદ્ધં મમ માનસમરુણિમસર્વસ્વસંપ્રદાયેન ‖14‖

અંકિતશંકરદેહામંકુરિતોરોજકંકણાશ્લેષૈઃ |
અધિકાંચિ નિત્યતરુણીમદ્રાક્ષં કાંચિદદ્ભુતાં બાલામ્ ‖15‖

મધુરધનુષા મહીધરજનુષા નંદામિ સુરભિબાણજુષા |
ચિદ્વપુષા કાંચિપુરે કેલિજુષા બંધુજીવકાંતિમુષા ‖16‖

મધુરસ્મિતેન રમતે માંસલકુચભારમંદગમનેન |
મધ્યેકાંચિ મનો મે મનસિજસામ્રાજ્યગર્વબીજેન ‖17‖

ધરણિમયીં તરણિમયીં પવનમયીં ગગનદહનહોતૃમયીમ્ |
અંબુમયીમિંદુમયીમંબામનુકંપમાદિમામીક્ષે ‖18‖

લીનસ્થિતિ મુનિહૃદયે ધ્યાનસ્તિમિતં તપસ્યદુપકંપમ્ |
પીનસ્તનભરમીડે મીનધ્વજતંત્રપરમતાત્પર્યમ્ ‖19‖

શ્વેતા મંથરહસિતે શાતા મધ્યે ચ વાડ્ભનોઽતીતા |
શીતા લોચનપાતે સ્ફીતા કુચસીમ્નિ શાશ્વતી માતા ‖20‖

પુરતઃ કદા ન કરવૈ પુરવૈરિવિમર્દપુલકિતાંગલતામ્ |
પુનતીં કાંચીદેશં પુષ્પાયુધવીર્યસરસપરિપાટીમ્ ‖21‖

પુણ્યા કાઽપિ પુરંધ્રી પુંખિતકંદર્પસંપદા વપુષા |
પુલિનચરી કંપાયાઃ પુરમથનં પુલકનિચુલિતં કુરુતે ‖22‖

તનિમાદ્વૈતવલગ્નં તરુણારુણસંપ્રદાયતનુલેખમ્ |
તટસીમનિ કંપાયાસ્તરુણિમસર્વસ્વમાદ્યમદ્રાક્ષમ્ ‖23‖

પૌષ્ટિકકર્મવિપાકં પૌષ્પશરં સવિધસીમ્નિ કંપાયાઃ |
અદ્રાક્ષમાત્તયૌવનમભ્યુદયં કંચિદર્ધશશિમૌલૈઃ ‖24‖

સંશ્રિતકાંચીદેશે સરસિજદૌર્ભાગ્યજાગ્રદુત્તંસે |
સંવિન્મયે વિલીયે સારસ્વતપુરુષકારસામ્રાજ્યે ‖25‖

મોદિતમધુકરવિશિખં સ્વાદિમસમુદાયસારકોદંડમ્ |
આદૃતકાંચીખેલનમાદિમમારુણ્યભેદમાકલયે ‖26‖

ઉરરીકૃતકાંચિપુરીમુપનિષદરવિંદકુહરમધુધારામ્ |
ઉન્નમ્રસ્તનકલશીમુત્સવલહરીમુપાસ્મહે શંભોઃ ‖27‖

એણશિશુદીર્ઘલોચનમેનઃપરિપંથિ સંતતં ભજતામ્ |
એકામ્રનાથજીવિતમેવંપદદૂરમેકમવલંબે ‖28‖

સ્મયમાનમુખં કાંચીભયમાનં કમપિ દેવતાભેદમ્ |
દયમાનં વીક્ષ્ય મુહુર્વયમાનંદામૃતાંબુધૌ મગ્નાઃ ‖29‖

કુતુકજુષિ કાંચિદેશે કુમુદતપોરાશિપાકશેખરિતે |
કુરુતે મનોવિહારં કુલગિરિપરિબૃઢકુલૈકમણિદીપે ‖30‖

વીક્ષેમહિ કાંચિપુરે વિપુલસ્તનકલશગરિમપરવશિતમ્ |
વિદ્રુમસહચરદેહં વિભ્રમસમવાયસારસન્નાહમ્ ‖31‖

કુરુવિંદગોત્રગાત્રં કૂલચરં કમપિ નૌમિ કંપાયાઃ |
કૂલંકષકુચકુંભં કુસુમાયુધવીર્યસારસંરંભમ્ ‖32‖

કુડૂમલિતકુચકિશોરૈઃ કુર્વાણૈઃ કાંચિદેશસૌહાર્દમ્ |
કુંકુમશોણૈર્નિચિતં કુશલપથં શંભુસુકૃતસંભારૈઃ ‖33‖

અંકિતકચેન કેનચિદંધંકરણૌષધેન કમલાનામ્ |
અંતઃપુરેણ શંભોરલંક્રિયા કાઽપિ કલ્પ્યતે કાંચ્યામ્ ‖34‖

ઊરીકરોમિ સંતતમૂષ્મલફાલેન લલિતં પુંસા |
ઉપકંપમુચિતખેલનમુર્વીધરવંશસંપદુન્મેષમ્ ‖35‖

અંકુરિતસ્તનકોરકમંકાલંકારમેકચૂતપતેઃ |
આલોકેમહિ કોમલમાગમસંલાપસારયાથાર્થ્યમ્ ‖36‖

પુંજિતકરુણમુદંચિતશિંજિતમણિકાંચિ કિમપિ કાંચિપુરે |
મંજરિતમૃદુલહાસં પિંજરતનુરુચિ પિનાકિમૂલધનમ્ ‖37‖

લોલહૃદયોઽસ્તિ શંભોર્લોચનયુગલેન લેહ્યમાનાયામ્ |
લલિતપરમશિવાયાં લાવણ્યામૃતતરંગમાલાયામ્ ‖38‖

મધુકરસહચરચિકુરૈર્મદનાગમસમયદીક્ષિતકટાક્ષૈઃ |
મંડિતકંપાતીરૈર્મંગલકંદૈર્મમાસ્તુ સારૂપ્યમ્ ‖39‖

વદનારવિંદવક્ષોવામાંકતટીવશંવદીભૂતા |
પૂરુષત્રિતયે ત્રેધા પુરંધ્રિરૂપા ત્વમેવ કામાક્ષિ ‖40‖

બાધાકરીં ભવાબ્ધેરાધારાદ્યંબુજેષુ વિચરંતીમ્ |
આધારીકૃતકાંચી બોધામૃતવીચિમેવ વિમૃશામઃ ‖41‖

કલયામ્યંતઃ શશધરકલયાઽંકિતમૌલિમમલચિદ્વલયામ્ |
અલયામાગમપીઠીનિલયાં વલયાંકસુંદરીમંબામ્ ‖42‖

શર્વાદિપરમસાધકગુર્વાનીતાય કામપીઠજુષે |
સર્વાકૃતયે શોણિમગર્વાયાસ્મૈ સમર્પ્યતે હૃદયમ્ ‖43‖

સમયા સાંધ્યમયૂખૈઃ સમયા બુદ્ધયા સદૈવ શીલિતયા |
ઉમયા કાંચીરતયા ન મયા લભ્યતે કિં નુ તાદાત્મ્યમ્ ‖44‖

જંતોસ્તવ પદપૂજનસંતોષતરંગિતસ્ય કામાક્ષિ |
વંધો યદિ ભવતિ પુનઃ સિંધોરંભસ્સુ બંભ્રમીતિ શિલા ‖45‖

કુંડલિ કુમારિ કુટિલે ચંડિ ચરાચરસવિત્રિ ચામુંડે |
ગુણિનિ ગુહારિણિ ગુહ્યે ગુરુમૂર્તે ત્વાં નમામિ કામાક્ષિ ‖46‖

અભિદાકૃતિર્ભિદાકૃતિરચિદાકૃતિરપિ ચિદાકૃતિર્માતઃ |
અનહંતા ત્વમહંતા ભ્રમયસિ કામાક્ષિ શાશ્વતી વિશ્વમ્ ‖47‖

શિવ શિવ પશ્યંતિ સમં શ્રીકામાક્ષીકટાક્ષિતાઃ પુરુષાઃ |
વિપિનં ભવનમમિત્રં મિત્રં લોષ્ટં ચ યુવતિબિંબોષ્ઠમ્ ‖48‖

કામપરિપંથિકામિનિ કામેશ્વરિ કામપીઠમધ્યગતે |
કામદુઘા ભવ કમલે કામકલે કામકોટિ કામાક્ષિ ‖49‖

મધ્યેહૃદયં મધ્યેનિટિલં મધ્યેશિરોઽપિ વાસ્તવ્યામ્ |
ચંડકરશક્રકાર્મુકચંદ્રસમાભાં નમામિ કામાક્ષીમ્ ‖50‖

અધિકાંચિ કેલિલોલૈરખિલાગમયંત્રતંત્રમયૈઃ |
અતિશીતં મમ માનસમસમશરદ્રોહિજીવનોપાયૈઃ ‖51‖

નંદતિ મમ હૃદિ કાચન મંદિરયંતા નિરંતરં કાંચીમ્ |
ઇંદુરવિમંડલકુચા બિંદુવિયન્નાદપરિણતા તરુણી ‖52‖

શંપાલતાસવર્ણં સંપાદયિતું ભવજ્વરચિકિત્સામ્ |
લિંપામિ મનસિ કિંચન કંપાતટરોહિ સિદ્ધભૈષજ્યમ્ ‖53‖

અનુમિતકુચકાઠિન્યામધિવક્ષઃપીઠમંગજન્મરિપોઃ |
આનંદદાં ભજે તામાનંગબ્રહ્મતત્વબોધસિરામ્ ‖54‖

ઐક્ષિષિ પાશાંકુશધરહસ્તાંતં વિસ્મયાર્હવૃત્તાંતમ્ |
અધિકાંચિ નિગમવાચાં સિદ્ધાંતં શૂલપાણિશુદ્ધાંતમ્ ‖55‖

આહિતવિલાસભંગીમાબ્રહ્મસ્તંબશિલ્પકલ્પનયા |
આશ્રિતકાંચીમતુલામાદ્યાં વિસ્ફૂર્તિમાદ્રિયે વિદ્યામ્ ‖56‖

મૂકોઽપિ જટિલદુર્ગતિશોકોઽપિ સ્મરતિ યઃ ક્ષણં ભવતીમ્ |
એકો ભવતિ સ જંતુર્લોકોત્તરકીર્તિરેવ કામાક્ષિ ‖57‖

પંચદશવર્ણરૂપં કંચન કાંચીવિહારધૌરેયમ્ |
પંચશરીયં શંભોર્વંચનવૈદગ્ધ્યમૂલમવલંબે ‖58‖

પરિણતિમતીં ચતુર્ધા પદવીં સુધિયાં સમેત્ય સૌષુમ્નીમ્ |
પંચાશદર્ણકલ્પિતમદશિલ્પાં ત્વાં નમામિ કામાક્ષિ ‖59‖

આદિક્ષન્મમ ગુરુરાડાદિક્ષાંતાક્ષરાત્મિકાં વિદ્યામ્ |
સ્વાદિષ્ઠચાપદંડાં નેદિષ્ઠામેવ કામપીઠગતામ્ ‖60‖

તુષ્યામિ હર્ષિતસ્મરશાસનયા કાંચિપુરકૃતાસનયા |
સ્વાસનયા સકલજગદ્ભાસનયા કલિતશંબરાસનયા ‖61‖

પ્રેમવતી કંપાયાં સ્થેમવતી યતિમનસ્સુ ભૂમવતી |
સામવતી નિત્યગિરા સોમવતી શિરસિ ભાતિ હૈમવતી ‖62‖

કૌતુકિના કંપાયાં કૌસુમચાપેન કીલિતેનાંતઃ |
કુલદૈવતેન મહતા કુડ્મલમુદ્રાં ધુનોતુ નઃપ્રતિભા ‖63‖

યૂના કેનાપિ મિલદ્દેહા સ્વાહાસહાયતિલકેન |
સહકારમૂલદેશે સંવિદ્રૂપા કુટુંબિની રમતે ‖64‖

કુસુમશરગર્વસંપત્કોશગૃહં ભાતિ કાંચિદેશગતમ્ |
સ્થાપિતમસ્મિન્કથમપિ ગોપિતમંતર્મયા મનોરત્નમ્ ‖65‖

દગ્ધષડધ્વારણ્યં દરદલિતકુસુંભસંભૃતારુણ્યમ્ |
કલયે નવતારુણ્યં કંપાતટસીમ્નિ કિમપિ કારુણ્યમ્ ‖66‖

અધિકાંચિ વર્ધમાનામતુલાં કરવાણિ પારણામક્ષ્ણોઃ |
આનંદપાકભેદામરુણિમપરિણામગર્વપલ્લવિતામ્ ‖67‖

બાણસૃણિપાશકાર્મુકપાણિમમું કમપિ કામપીઠગતમ્ |
એણધરકોણચૂડં શોણિમપરિપાકભેદમાકલયે ‖68‖

કિં વા ફલતિ મમાન્યૌર્બિંબાધરચુંબિમંદહાસમુખી |
સંબાધકરી તમસામંબા જાગર્તિ મનસિ કામાક્ષી ‖69‖

મંચે સદાશિવમયે પરિશિવમયલલિતપૌષ્પપર્યંકે |
અધિચક્રમધ્યમાસ્તે કામાક્ષી નામ કિમપિ મમ ભાગ્યમ્ ‖70‖

રક્ષ્યોઽસ્મિ કામપીઠીલાસિકયા ઘનકૃપાંબુરાશિકયા |
શ્રુતિયુવતિકુંતલીમણિમાલિકયા તુહિનશૈલબાલિકયા ‖71‖

લીયે પુરહરજાયે માયે તવ તરુણપલ્લવચ્છાયે |
ચરણે ચંદ્રાભરણે કાંચીશરણે નતાર્તિસંહરણે ‖72‖

મૂર્તિમતિ મુક્તિબીજે મૂર્ધ્નિ સ્તબકિતચકોરસામ્રાજ્યે |
મોદિતકંપાકૂલે મુહુર્મુહુર્મનસિ મુમુદિષાઽસ્માકમ્ ‖73‖

વેદમયીં નાદમયીં બિંદુમયીં પરપદોદ્યદિંદુમયીમ્ |
મંત્રમયીં તંત્રમયીં પ્રકૃતિમયીં નૌમિ વિશ્વવિકૃતિમયીમ્ ‖74‖

પુરમથનપુણ્યકોટી પુંજિતકવિલોકસૂક્તિરસધાટી |
મનસિ મમ કામકોટી વિહરતુ કરુણાવિપાકપરિપાટી ‖75‖

કુટિલં ચટુલં પૃથુલં મૃદુલં કચનયનજઘનચરણેષુ |
અવલોકિતમવલંબિતમધિકંપાતટમમેયમસ્માભિઃ ‖76‖

પ્રત્યઙ્મુખ્યા દૃષ્ટયા પ્રસાદદીપાંકુરેણ કામાક્ષ્યાઃ |
પશ્યામિ નિસ્તુલમહો પચેલિમં કમપિ પરશિવોલ્લાસમ્ ‖77‖

વિદ્યે વિધાતૃવિષયે કાત્યાયનિ કાલિ કામકોટિકલે |
ભારતિ ભૈરવિ ભદ્રે શાકિનિ શાંભવિ શિવે સ્તુવે ભવતીમ્ ‖78‖

માલિનિ મહેશચાલિનિ કાંચીખેલિનિ વિપક્ષકાલિનિ તે |
શૂલિનિ વિદ્રુમશાલિનિ સુરજનપાલિનિ કપાલિનિ નમોઽસ્તુ ‖79‖

દેશિક ઇતિ કિં શંકે તત્તાદૃક્તવ નુ તરુણિમોન્મેષઃ |
કામાક્ષિ શૂલપાણેઃ કામાગમસમયદીક્ષાયામ્ ‖80‖

વેતંડકુંભડંબરવૈતંડિકકુચભરાર્તમધ્યાય |
કુંકુમરુચે નમસ્યાં શંકરનયનામૃતાય રચયામઃ ‖81‖

અધિકાંચિતમણિકાંચનકાંચીમધિકાંચિ કાંચિદદ્રાક્ષમ્ |
અવનતજનાનુકંપામનુકંપાકૂલમસ્મદનુકૂલામ્ ‖82‖

પરિચિતકંપાતીરં પર્વતરાજન્યસુકૃતસન્નાહમ્ |
પરગુરુકૃપયા વીક્ષે પરમશિવોત્સંગમંગલાભરણમ્ ‖83‖

દગ્ધમદનસ્ય શંભોઃ પ્રથીયસીં બ્રહ્મચર્યવૈદગ્ધીમ્ |
તવ દેવિ તરુણિમશ્રીચતુરિમપાકો ન ચક્ષમે માતઃ ‖84‖

મદજલતમાલપત્રા વસનિતપત્રા કરાદૃતખાનિત્રા |
વિહરતિ પુલિંદયોષા ગુંજાભૂષા ફણીંદ્રકૃતવેષા ‖85‖

અંકે શુકિની ગીતે કૌતુકિની પરિસરે ચ ગાયકિની |
જયસિ સવિધેઽંબ ભૈરવમંડલિની શ્રવસિ શંખકુન્ડલિની ‖86‖

પ્રણતજનતાપવર્ગા કૃતબહુસર્ગા સસિંહસંસર્ગા |
કામાક્ષિ મુદિતભર્ગા હતરિપુવર્ગા ત્વમેવ સા દુર્ગા ‖87‖

શ્રવણચલદ્વેતંડા સમરોદ્દંડા ધુતાસુરશિખંડા |
દેવિ કલિતાંત્રષંડા ધૃતનરમુંડા ત્વમેવ ચામુંડા ‖88‖

ઉર્વીધરેંદ્રકન્યે દર્વીભરિતેન ભક્તપૂરેણ |
ગુર્વીમકિંચનાર્તિ ખર્વીકુરુષે ત્વમેવ કામાક્ષિ ‖89‖

તાડિતરિપુપરિપીડનભયહરણ નિપુણહલમુસલા |
ક્રોડપતિભીષણમુખી ક્રીડસિ જગતિ ત્વમેવ કામાક્ષિ ‖90‖

સ્મરમથનવરણલોલા મન્મથહેલાવિલાસમણિશાલા |
કનકરુચિચૌર્યશીલા ત્વમંબ બાલા કરાબ્જધૃતમાલા ‖91‖

વિમલપટી કમલકુટી પુસ્તકરુદ્રાક્ષશસ્તહસ્તપુટી |
કામાક્ષિ પક્ષ્મલાક્ષી કલિતવિપંચી વિભાસિ વૈરિંચી ‖92‖

કુંકુમરુચિપિંગમસૃક્પંકિલમુંડાલિમંડિતં માતઃ |
શ્રીકામાક્ષિ તદીયસંગમકલામંદીભવત્કૌતુકઃ
જયતિ તવ રૂપધેયં જપપટપુસ્તકવરાભયકરાબ્જમ્ ‖93‖

કનકમણિકલિતભૂષાં કાલાયસકલહશીલકાંતિકલામ્ |
કામાક્ષિ શીલયે ત્વાં કપાલશૂલાભિરામકરકમલામ્ ‖94‖

લોહિતિમપુંજમધ્યે મોહિતભુવને મુદા નિરીક્ષંતે |
વદનં તવ કુવયુગલં કાંચીસીમાં ચ કેઽપિ કામાક્ષિ ‖95‖

જલધિદ્વિગુણિતહુતબહદિશાદિનેશ્વરકલાશ્વિનેયદલૈઃ |
નલિનૈર્મહેશિ ગચ્છસિ સર્વોત્તરકરકમલદલમમલમ્ ‖96‖

સત્કૃતદેશિકચરણાઃ સબીજનિર્બીજયોગનિશ્રેણ્યા |
અપવર્ગસૌધવલભીમારોહંત્યંબ કેઽપિ તવ કૃપયા ‖97‖

અંતરપિ બહિરપિ ત્વં જંતુતતેરંતકાંતકૃદહંતે |
ચિંતિતસંતાનવતાં સંતતમપિ તંતનીષિ મહિમાનમ્ ‖98‖

કલમંજુલવાગનુમિતગલપંજરગતશુકગ્રહૌત્કંઠ્યાત્ |
અંબ રદનાંબરં તે બિંબફલં શંબરારિણા ન્યસ્તમ્ ‖99‖

જય જય જગદંબ શિવે જય જય કામાક્ષિ જય જયાદ્રિસુતે |
જય જય મહેશદયિતે જય જય ચિદ્ગગનકૌમુદીધારે ‖100‖

આર્યાશતકં ભક્ત્યા પઠતામાર્યાકટાક્ષેણ |
નિસ્સરતિ વદનકમલાદ્વાણી પીયૂષધોરણી દિવ્યા ‖101‖

‖ ઇતિ આર્યાશતકં સંપૂર્ણમ્ ‖