PDF, Large PDF, Multimedia, Meaning
View this in:
| English | Devanagari | Telugu | Tamil | Kannada | Malayalam | Gujarati | Oriya | Bengali |

ମୂକ ପଂଚ ଶତି 1 - ଆର୍ଯ ଶତକମ୍


କାରଣପରଚିଦ୍ରୂପା କାଂଚୀପୁରସୀମ୍ନି କାମପୀଠଗତା |
କାଚନ ଵିହରତି କରୁଣା କାଶ୍ମୀରସ୍ତବକକୋମଲାଂଗଲତା ‖1‖

କଂଚନ କାଂଚୀନିଲଯଂ କରଧୃତକୋଦଂଡବାଣସୃଣିପାଶମ୍ |
କଠିନସ୍ତନଭରନମ୍ରଂ କୈଵଲ୍ଯାନଂଦକଂଦମଵଲଂବେ ‖2‖

ଚିଂତିତଫଲପରିପୋଷଣଚିଂତାମଣିରେଵ କାଂଚିନିଲଯା ମେ |
ଚିରତରସୁଚରିତସୁଲଭା ଚିତ୍ତଂ ଶିଶିରଯତୁ ଚିତ୍ସୁଖାଧାରା ‖3‖

କୁଟିଲକଚଂ କଠିନକୁଚଂ କୁଂଦସ୍ମିତକାଂତି କୁଂକୁମଚ୍ଛାଯମ୍ |
କୁରୁତେ ଵିହୃତିଂ କାଂଚ୍ଯାଂ କୁଲପର୍ଵତସାର୍ଵଭୌମସର୍ଵସ୍ଵମ୍ ‖4‖

ପଂଚଶରଶାସ୍ତ୍ରବୋଧନପରମାଚାର୍ଯେଣ ଦୃଷ୍ଟିପାତେନ |
କାଂଚୀସୀମ୍ନି କୁମାରୀ କାଚନ ମୋହଯତି କାମଜେତାରମ୍ ‖5‖

ପରଯା କାଂଚୀପୁରଯା ପର୍ଵତପର୍ଯାଯପୀନକୁଚଭରଯା |
ପରତଂତ୍ରା ଵଯମନଯା ପଂକଜସବ୍ରହ୍ମଚାରିଲୋଚନଯା ‖6‖

ଐଶ୍ଵର୍ଯମିଂଦୁମୌଲେରୈକତ୍ମ୍ଯପ୍ରକୃତି କାଂଚିମଧ୍ଯଗତମ୍ |
ଐଂଦଵକିଶୋରଶେଖରମୈଦଂପର୍ଯଂ ଚକାସ୍ତି ନିଗମାନାମ୍ ‖7‖

ଶ୍ରିତକଂପସୀମାନଂ ଶିଥିଲିତପରମଶିଵଧୈର୍ଯମହିମାନମ୍ |
କଲଯେ ପଟଲିମାନଂ କଂଚନ କଂଚୁକିତଭୁଵନଭୂମାନମ୍ ‖8‖

ଆଦୃତକାଂଚୀନିଲଯମାଦ୍ଯାମାରୂଢଯୌଵନାଟୋପାମ୍ |
ଆଗମଵତଂସକଲିକାମାନଂଦାଦ୍ଵୈତକଂଦଲୀଂ ଵଂଦେ ‖9‖

ତୁଂଗାଭିରାମକୁଚଭରଶୃଂଗାରିତମାଶ୍ରଯାମି କାଂଚିଗତମ୍ |
ଗଂଗାଧରପରତଂତ୍ରଂ ଶୃଂଗାରାଦ୍ଵୈତତଂତ୍ରସିଦ୍ଧାଂତମ୍ ‖10‖

କାଂଚୀରତ୍ନଵିଭୂଷାଂ କାମପି କଂଦର୍ପସୂତିକାପାଂଗୀମ୍ |
ପରମାଂ କଲାମୁପାସେ ପରଶିଵଵାମାଂକପୀଠିକାସୀନାମ୍ ‖11‖

କଂପାତୀଚରାଣାଂ କରୁଣାକୋରକିତଦୃଷ୍ଟିପାତାନାମ୍ |
କେଲୀଵନଂ ମନୋ ମେ କେଷାଂଚିଦ୍ଭଵତୁ ଚିଦ୍ଵିଲାସାନାମ୍ ‖12‖

ଆମ୍ରତରୁମୂଲଵସତେରାଦିମପୁରୁଷସ୍ଯ ନଯନପୀଯୂଷମ୍ |
ଆରବ୍ଧଯୌଵନୋତ୍ସଵମାମ୍ନାଯରହସ୍ଯମଂତରଵଲଂବେ ‖13‖

ଅଧିକାଂଚି ପରମଯୋଗିଭିରାଦିମପରପୀଠସୀମ୍ନି ଦୃଶ୍ଯେନ |
ଅନୁବଦ୍ଧଂ ମମ ମାନସମରୁଣିମସର୍ଵସ୍ଵସଂପ୍ରଦାଯେନ ‖14‖

ଅଂକିତଶଂକରଦେହାମଂକୁରିତୋରୋଜକଂକଣାଶ୍ଲେଷୈଃ |
ଅଧିକାଂଚି ନିତ୍ଯତରୁଣୀମଦ୍ରାକ୍ଷଂ କାଂଚିଦଦ୍ଭୁତାଂ ବାଲାମ୍ ‖15‖

ମଧୁରଧନୁଷା ମହୀଧରଜନୁଷା ନଂଦାମି ସୁରଭିବାଣଜୁଷା |
ଚିଦ୍ଵପୁଷା କାଂଚିପୁରେ କେଲିଜୁଷା ବଂଧୁଜୀଵକାଂତିମୁଷା ‖16‖

ମଧୁରସ୍ମିତେନ ରମତେ ମାଂସଲକୁଚଭାରମଂଦଗମନେନ |
ମଧ୍ଯେକାଂଚି ମନୋ ମେ ମନସିଜସାମ୍ରାଜ୍ଯଗର୍ଵବୀଜେନ ‖17‖

ଧରଣିମଯୀଂ ତରଣିମଯୀଂ ପଵନମଯୀଂ ଗଗନଦହନହୋତୃମଯୀମ୍ |
ଅଂବୁମଯୀମିଂଦୁମଯୀମଂବାମନୁକଂପମାଦିମାମୀକ୍ଷେ ‖18‖

ଲୀନସ୍ଥିତି ମୁନିହୃଦଯେ ଧ୍ଯାନସ୍ତିମିତଂ ତପସ୍ଯଦୁପକଂପମ୍ |
ପୀନସ୍ତନଭରମୀଡେ ମୀନଧ୍ଵଜତଂତ୍ରପରମତାତ୍ପର୍ଯମ୍ ‖19‖

ଶ୍ଵେତା ମଂଥରହସିତେ ଶାତା ମଧ୍ଯେ ଚ ଵାଡ୍ଭନୋଽତୀତା |
ଶୀତା ଲୋଚନପାତେ ସ୍ଫୀତା କୁଚସୀମ୍ନି ଶାଶ୍ଵତୀ ମାତା ‖20‖

ପୁରତଃ କଦା ନ କରଵୈ ପୁରଵୈରିଵିମର୍ଦପୁଲକିତାଂଗଲତାମ୍ |
ପୁନତୀଂ କାଂଚୀଦେଶଂ ପୁଷ୍ପାଯୁଧଵୀର୍ଯସରସପରିପାଟୀମ୍ ‖21‖

ପୁଣ୍ଯା କାଽପି ପୁରଂଧ୍ରୀ ପୁଂଖିତକଂଦର୍ପସଂପଦା ଵପୁଷା |
ପୁଲିନଚରୀ କଂପାଯାଃ ପୁରମଥନଂ ପୁଲକନିଚୁଲିତଂ କୁରୁତେ ‖22‖

ତନିମାଦ୍ଵୈତଵଲଗ୍ନଂ ତରୁଣାରୁଣସଂପ୍ରଦାଯତନୁଲେଖମ୍ |
ତଟସୀମନି କଂପାଯାସ୍ତରୁଣିମସର୍ଵସ୍ଵମାଦ୍ଯମଦ୍ରାକ୍ଷମ୍ ‖23‖

ପୌଷ୍ଟିକକର୍ମଵିପାକଂ ପୌଷ୍ପଶରଂ ସଵିଧସୀମ୍ନି କଂପାଯାଃ |
ଅଦ୍ରାକ୍ଷମାତ୍ତଯୌଵନମଭ୍ଯୁଦଯଂ କଂଚିଦର୍ଧଶଶିମୌଲୈଃ ‖24‖

ସଂଶ୍ରିତକାଂଚୀଦେଶେ ସରସିଜଦୌର୍ଭାଗ୍ଯଜାଗ୍ରଦୁତ୍ତଂସେ |
ସଂଵିନ୍ମଯେ ଵିଲୀଯେ ସାରସ୍ଵତପୁରୁଷକାରସାମ୍ରାଜ୍ଯେ ‖25‖

ମୋଦିତମଧୁକରଵିଶିଖଂ ସ୍ଵାଦିମସମୁଦାଯସାରକୋଦଂଡମ୍ |
ଆଦୃତକାଂଚୀଖେଲନମାଦିମମାରୁଣ୍ଯଭେଦମାକଲଯେ ‖26‖

ଉରରୀକୃତକାଂଚିପୁରୀମୁପନିଷଦରଵିଂଦକୁହରମଧୁଧାରାମ୍ |
ଉନ୍ନମ୍ରସ୍ତନକଲଶୀମୁତ୍ସଵଲହରୀମୁପାସ୍ମହେ ଶଂଭୋଃ ‖27‖

ଏଣଶିଶୁଦୀର୍ଘଲୋଚନମେନଃପରିପଂଥି ସଂତତଂ ଭଜତାମ୍ |
ଏକାମ୍ରନାଥଜୀଵିତମେଵଂପଦଦୂରମେକମଵଲଂବେ ‖28‖

ସ୍ମଯମାନମୁଖଂ କାଂଚୀଭଯମାନଂ କମପି ଦେଵତାଭେଦମ୍ |
ଦଯମାନଂ ଵୀକ୍ଷ୍ଯ ମୁହୁର୍ଵଯମାନଂଦାମୃତାଂବୁଧୌ ମଗ୍ନାଃ ‖29‖

କୁତୁକଜୁଷି କାଂଚିଦେଶେ କୁମୁଦତପୋରାଶିପାକଶେଖରିତେ |
କୁରୁତେ ମନୋଵିହାରଂ କୁଲଗିରିପରିବୃଢକୁଲୈକମଣିଦୀପେ ‖30‖

ଵୀକ୍ଷେମହି କାଂଚିପୁରେ ଵିପୁଲସ୍ତନକଲଶଗରିମପରଵଶିତମ୍ |
ଵିଦ୍ରୁମସହଚରଦେହଂ ଵିଭ୍ରମସମଵାଯସାରସନ୍ନାହମ୍ ‖31‖

କୁରୁଵିଂଦଗୋତ୍ରଗାତ୍ରଂ କୂଲଚରଂ କମପି ନୌମି କଂପାଯାଃ |
କୂଲଂକଷକୁଚକୁଂଭଂ କୁସୁମାଯୁଧଵୀର୍ଯସାରସଂରଂଭମ୍ ‖32‖

କୁଡୂମଲିତକୁଚକିଶୋରୈଃ କୁର୍ଵାଣୈଃ କାଂଚିଦେଶସୌହାର୍ଦମ୍ |
କୁଂକୁମଶୋଣୈର୍ନିଚିତଂ କୁଶଲପଥଂ ଶଂଭୁସୁକୃତସଂଭାରୈଃ ‖33‖

ଅଂକିତକଚେନ କେନଚିଦଂଧଂକରଣୌଷଧେନ କମଲାନାମ୍ |
ଅଂତଃପୁରେଣ ଶଂଭୋରଲଂକ୍ରିଯା କାଽପି କଲ୍ପ୍ଯତେ କାଂଚ୍ଯାମ୍ ‖34‖

ଊରୀକରୋମି ସଂତତମୂଷ୍ମଲଫାଲେନ ଲଲିତଂ ପୁଂସା |
ଉପକଂପମୁଚିତଖେଲନମୁର୍ଵୀଧରଵଂଶସଂପଦୁନ୍ମେଷମ୍ ‖35‖

ଅଂକୁରିତସ୍ତନକୋରକମଂକାଲଂକାରମେକଚୂତପତେଃ |
ଆଲୋକେମହି କୋମଲମାଗମସଂଲାପସାରଯାଥାର୍ଥ୍ଯମ୍ ‖36‖

ପୁଂଜିତକରୁଣମୁଦଂଚିତଶିଂଜିତମଣିକାଂଚି କିମପି କାଂଚିପୁରେ |
ମଂଜରିତମୃଦୁଲହାସଂ ପିଂଜରତନୁରୁଚି ପିନାକିମୂଲଧନମ୍ ‖37‖

ଲୋଲହୃଦଯୋଽସ୍ତି ଶଂଭୋର୍ଲୋଚନଯୁଗଲେନ ଲେହ୍ଯମାନାଯାମ୍ |
ଲଲିତପରମଶିଵାଯାଂ ଲାଵଣ୍ଯାମୃତତରଂଗମାଲାଯାମ୍ ‖38‖

ମଧୁକରସହଚରଚିକୁରୈର୍ମଦନାଗମସମଯଦୀକ୍ଷିତକଟାକ୍ଷୈଃ |
ମଂଡିତକଂପାତୀରୈର୍ମଂଗଲକଂଦୈର୍ମମାସ୍ତୁ ସାରୂପ୍ଯମ୍ ‖39‖

ଵଦନାରଵିଂଦଵକ୍ଷୋଵାମାଂକତଟୀଵଶଂଵଦୀଭୂତା |
ପୂରୁଷତ୍ରିତଯେ ତ୍ରେଧା ପୁରଂଧ୍ରିରୂପା ତ୍ଵମେଵ କାମାକ୍ଷି ‖40‖

ବାଧାକରୀଂ ଭଵାବ୍ଧେରାଧାରାଦ୍ଯଂବୁଜେଷୁ ଵିଚରଂତୀମ୍ |
ଆଧାରୀକୃତକାଂଚୀ ବୋଧାମୃତଵୀଚିମେଵ ଵିମୃଶାମଃ ‖41‖

କଲଯାମ୍ଯଂତଃ ଶଶଧରକଲଯାଽଂକିତମୌଲିମମଲଚିଦ୍ଵଲଯାମ୍ |
ଅଲଯାମାଗମପୀଠୀନିଲଯାଂ ଵଲଯାଂକସୁଂଦରୀମଂବାମ୍ ‖42‖

ଶର୍ଵାଦିପରମସାଧକଗୁର୍ଵାନୀତାଯ କାମପୀଠଜୁଷେ |
ସର୍ଵାକୃତଯେ ଶୋଣିମଗର୍ଵାଯାସ୍ମୈ ସମର୍ପ୍ଯତେ ହୃଦଯମ୍ ‖43‖

ସମଯା ସାଂଧ୍ଯମଯୂଖୈଃ ସମଯା ବୁଦ୍ଧଯା ସଦୈଵ ଶୀଲିତଯା |
ଉମଯା କାଂଚୀରତଯା ନ ମଯା ଲଭ୍ଯତେ କିଂ ନୁ ତାଦାତ୍ମ୍ଯମ୍ ‖44‖

ଜଂତୋସ୍ତଵ ପଦପୂଜନସଂତୋଷତରଂଗିତସ୍ଯ କାମାକ୍ଷି |
ଵଂଧୋ ଯଦି ଭଵତି ପୁନଃ ସିଂଧୋରଂଭସ୍ସୁ ବଂଭ୍ରମୀତି ଶିଲା ‖45‖

କୁଂଡଲି କୁମାରି କୁଟିଲେ ଚଂଡି ଚରାଚରସଵିତ୍ରି ଚାମୁଂଡେ |
ଗୁଣିନି ଗୁହାରିଣି ଗୁହ୍ଯେ ଗୁରୁମୂର୍ତେ ତ୍ଵାଂ ନମାମି କାମାକ୍ଷି ‖46‖

ଅଭିଦାକୃତିର୍ଭିଦାକୃତିରଚିଦାକୃତିରପି ଚିଦାକୃତିର୍ମାତଃ |
ଅନହଂତା ତ୍ଵମହଂତା ଭ୍ରମଯସି କାମାକ୍ଷି ଶାଶ୍ଵତୀ ଵିଶ୍ଵମ୍ ‖47‖

ଶିଵ ଶିଵ ପଶ୍ଯଂତି ସମଂ ଶ୍ରୀକାମାକ୍ଷୀକଟାକ୍ଷିତାଃ ପୁରୁଷାଃ |
ଵିପିନଂ ଭଵନମମିତ୍ରଂ ମିତ୍ରଂ ଲୋଷ୍ଟଂ ଚ ଯୁଵତିବିଂବୋଷ୍ଠମ୍ ‖48‖

କାମପରିପଂଥିକାମିନି କାମେଶ୍ଵରି କାମପୀଠମଧ୍ଯଗତେ |
କାମଦୁଘା ଭଵ କମଲେ କାମକଲେ କାମକୋଟି କାମାକ୍ଷି ‖49‖

ମଧ୍ଯେହୃଦଯଂ ମଧ୍ଯେନିଟିଲଂ ମଧ୍ଯେଶିରୋଽପି ଵାସ୍ତଵ୍ଯାମ୍ |
ଚଂଡକରଶକ୍ରକାର୍ମୁକଚଂଦ୍ରସମାଭାଂ ନମାମି କାମାକ୍ଷୀମ୍ ‖50‖

ଅଧିକାଂଚି କେଲିଲୋଲୈରଖିଲାଗମଯଂତ୍ରତଂତ୍ରମଯୈଃ |
ଅତିଶୀତଂ ମମ ମାନସମସମଶରଦ୍ରୋହିଜୀଵନୋପାଯୈଃ ‖51‖

ନଂଦତି ମମ ହୃଦି କାଚନ ମଂଦିରଯଂତା ନିରଂତରଂ କାଂଚୀମ୍ |
ଇଂଦୁରଵିମଂଡଲକୁଚା ବିଂଦୁଵିଯନ୍ନାଦପରିଣତା ତରୁଣୀ ‖52‖

ଶଂପାଲତାସଵର୍ଣଂ ସଂପାଦଯିତୁଂ ଭଵଜ୍ଵରଚିକିତ୍ସାମ୍ |
ଲିଂପାମି ମନସି କିଂଚନ କଂପାତଟରୋହି ସିଦ୍ଧଭୈଷଜ୍ଯମ୍ ‖53‖

ଅନୁମିତକୁଚକାଠିନ୍ଯାମଧିଵକ୍ଷଃପୀଠମଂଗଜନ୍ମରିପୋଃ |
ଆନଂଦଦାଂ ଭଜେ ତାମାନଂଗବ୍ରହ୍ମତତ୍ଵବୋଧସିରାମ୍ ‖54‖

ଐକ୍ଷିଷି ପାଶାଂକୁଶଧରହସ୍ତାଂତଂ ଵିସ୍ମଯାର୍ହଵୃତ୍ତାଂତମ୍ |
ଅଧିକାଂଚି ନିଗମଵାଚାଂ ସିଦ୍ଧାଂତଂ ଶୂଲପାଣିଶୁଦ୍ଧାଂତମ୍ ‖55‖

ଆହିତଵିଲାସଭଂଗୀମାବ୍ରହ୍ମସ୍ତଂବଶିଲ୍ପକଲ୍ପନଯା |
ଆଶ୍ରିତକାଂଚୀମତୁଲାମାଦ୍ଯାଂ ଵିସ୍ଫୂର୍ତିମାଦ୍ରିଯେ ଵିଦ୍ଯାମ୍ ‖56‖

ମୂକୋଽପି ଜଟିଲଦୁର୍ଗତିଶୋକୋଽପି ସ୍ମରତି ଯଃ କ୍ଷଣଂ ଭଵତୀମ୍ |
ଏକୋ ଭଵତି ସ ଜଂତୁର୍ଲୋକୋତ୍ତରକୀର୍ତିରେଵ କାମାକ୍ଷି ‖57‖

ପଂଚଦଶଵର୍ଣରୂପଂ କଂଚନ କାଂଚୀଵିହାରଧୌରେଯମ୍ |
ପଂଚଶରୀଯଂ ଶଂଭୋର୍ଵଂଚନଵୈଦଗ୍ଧ୍ଯମୂଲମଵଲଂବେ ‖58‖

ପରିଣତିମତୀଂ ଚତୁର୍ଧା ପଦଵୀଂ ସୁଧିଯାଂ ସମେତ୍ଯ ସୌଷୁମ୍ନୀମ୍ |
ପଂଚାଶଦର୍ଣକଲ୍ପିତମଦଶିଲ୍ପାଂ ତ୍ଵାଂ ନମାମି କାମାକ୍ଷି ‖59‖

ଆଦିକ୍ଷନ୍ମମ ଗୁରୁରାଡାଦିକ୍ଷାଂତାକ୍ଷରାତ୍ମିକାଂ ଵିଦ୍ଯାମ୍ |
ସ୍ଵାଦିଷ୍ଠଚାପଦଂଡାଂ ନେଦିଷ୍ଠାମେଵ କାମପୀଠଗତାମ୍ ‖60‖

ତୁଷ୍ଯାମି ହର୍ଷିତସ୍ମରଶାସନଯା କାଂଚିପୁରକୃତାସନଯା |
ସ୍ଵାସନଯା ସକଲଜଗଦ୍ଭାସନଯା କଲିତଶଂବରାସନଯା ‖61‖

ପ୍ରେମଵତୀ କଂପାଯାଂ ସ୍ଥେମଵତୀ ଯତିମନସ୍ସୁ ଭୂମଵତୀ |
ସାମଵତୀ ନିତ୍ଯଗିରା ସୋମଵତୀ ଶିରସି ଭାତି ହୈମଵତୀ ‖62‖

କୌତୁକିନା କଂପାଯାଂ କୌସୁମଚାପେନ କୀଲିତେନାଂତଃ |
କୁଲଦୈଵତେନ ମହତା କୁଡ୍ମଲମୁଦ୍ରାଂ ଧୁନୋତୁ ନଃପ୍ରତିଭା ‖63‖

ଯୂନା କେନାପି ମିଲଦ୍ଦେହା ସ୍ଵାହାସହାଯତିଲକେନ |
ସହକାରମୂଲଦେଶେ ସଂଵିଦ୍ରୂପା କୁଟୁଂବିନୀ ରମତେ ‖64‖

କୁସୁମଶରଗର୍ଵସଂପତ୍କୋଶଗୃହଂ ଭାତି କାଂଚିଦେଶଗତମ୍ |
ସ୍ଥାପିତମସ୍ମିନ୍କଥମପି ଗୋପିତମଂତର୍ମଯା ମନୋରତ୍ନମ୍ ‖65‖

ଦଗ୍ଧଷଡଧ୍ଵାରଣ୍ଯଂ ଦରଦଲିତକୁସୁଂଭସଂଭୃତାରୁଣ୍ଯମ୍ |
କଲଯେ ନଵତାରୁଣ୍ଯଂ କଂପାତଟସୀମ୍ନି କିମପି କାରୁଣ୍ଯମ୍ ‖66‖

ଅଧିକାଂଚି ଵର୍ଧମାନାମତୁଲାଂ କରଵାଣି ପାରଣାମକ୍ଷ୍ଣୋଃ |
ଆନଂଦପାକଭେଦାମରୁଣିମପରିଣାମଗର୍ଵପଲ୍ଲଵିତାମ୍ ‖67‖

ବାଣସୃଣିପାଶକାର୍ମୁକପାଣିମମୁଂ କମପି କାମପୀଠଗତମ୍ |
ଏଣଧରକୋଣଚୂଡଂ ଶୋଣିମପରିପାକଭେଦମାକଲଯେ ‖68‖

କିଂ ଵା ଫଲତି ମମାନ୍ଯୌର୍ବିଂବାଧରଚୁଂବିମଂଦହାସମୁଖୀ |
ସଂବାଧକରୀ ତମସାମଂବା ଜାଗର୍ତି ମନସି କାମାକ୍ଷୀ ‖69‖

ମଂଚେ ସଦାଶିଵମଯେ ପରିଶିଵମଯଲଲିତପୌଷ୍ପପର୍ଯଂକେ |
ଅଧିଚକ୍ରମଧ୍ଯମାସ୍ତେ କାମାକ୍ଷୀ ନାମ କିମପି ମମ ଭାଗ୍ଯମ୍ ‖70‖

ରକ୍ଷ୍ଯୋଽସ୍ମି କାମପୀଠୀଲାସିକଯା ଘନକୃପାଂବୁରାଶିକଯା |
ଶ୍ରୁତିଯୁଵତିକୁଂତଲୀମଣିମାଲିକଯା ତୁହିନଶୈଲବାଲିକଯା ‖71‖

ଲୀଯେ ପୁରହରଜାଯେ ମାଯେ ତଵ ତରୁଣପଲ୍ଲଵଚ୍ଛାଯେ |
ଚରଣେ ଚଂଦ୍ରାଭରଣେ କାଂଚୀଶରଣେ ନତାର୍ତିସଂହରଣେ ‖72‖

ମୂର୍ତିମତି ମୁକ୍ତିବୀଜେ ମୂର୍ଧ୍ନି ସ୍ତବକିତଚକୋରସାମ୍ରାଜ୍ଯେ |
ମୋଦିତକଂପାକୂଲେ ମୁହୁର୍ମୁହୁର୍ମନସି ମୁମୁଦିଷାଽସ୍ମାକମ୍ ‖73‖

ଵେଦମଯୀଂ ନାଦମଯୀଂ ବିଂଦୁମଯୀଂ ପରପଦୋଦ୍ଯଦିଂଦୁମଯୀମ୍ |
ମଂତ୍ରମଯୀଂ ତଂତ୍ରମଯୀଂ ପ୍ରକୃତିମଯୀଂ ନୌମି ଵିଶ୍ଵଵିକୃତିମଯୀମ୍ ‖74‖

ପୁରମଥନପୁଣ୍ଯକୋଟୀ ପୁଂଜିତକଵିଲୋକସୂକ୍ତିରସଧାଟୀ |
ମନସି ମମ କାମକୋଟୀ ଵିହରତୁ କରୁଣାଵିପାକପରିପାଟୀ ‖75‖

କୁଟିଲଂ ଚଟୁଲଂ ପୃଥୁଲଂ ମୃଦୁଲଂ କଚନଯନଜଘନଚରଣେଷୁ |
ଅଵଲୋକିତମଵଲଂବିତମଧିକଂପାତଟମମେଯମସ୍ମାଭିଃ ‖76‖

ପ୍ରତ୍ଯଙ୍ମୁଖ୍ଯା ଦୃଷ୍ଟଯା ପ୍ରସାଦଦୀପାଂକୁରେଣ କାମାକ୍ଷ୍ଯାଃ |
ପଶ୍ଯାମି ନିସ୍ତୁଲମହୋ ପଚେଲିମଂ କମପି ପରଶିଵୋଲ୍ଲାସମ୍ ‖77‖

ଵିଦ୍ଯେ ଵିଧାତୃଵିଷଯେ କାତ୍ଯାଯନି କାଲି କାମକୋଟିକଲେ |
ଭାରତି ଭୈରଵି ଭଦ୍ରେ ଶାକିନି ଶାଂଭଵି ଶିଵେ ସ୍ତୁଵେ ଭଵତୀମ୍ ‖78‖

ମାଲିନି ମହେଶଚାଲିନି କାଂଚୀଖେଲିନି ଵିପକ୍ଷକାଲିନି ତେ |
ଶୂଲିନି ଵିଦ୍ରୁମଶାଲିନି ସୁରଜନପାଲିନି କପାଲିନି ନମୋଽସ୍ତୁ ‖79‖

ଦେଶିକ ଇତି କିଂ ଶଂକେ ତତ୍ତାଦୃକ୍ତଵ ନୁ ତରୁଣିମୋନ୍ମେଷଃ |
କାମାକ୍ଷି ଶୂଲପାଣେଃ କାମାଗମସମଯଦୀକ୍ଷାଯାମ୍ ‖80‖

ଵେତଂଡକୁଂଭଡଂବରଵୈତଂଡିକକୁଚଭରାର୍ତମଧ୍ଯାଯ |
କୁଂକୁମରୁଚେ ନମସ୍ଯାଂ ଶଂକରନଯନାମୃତାଯ ରଚଯାମଃ ‖81‖

ଅଧିକାଂଚିତମଣିକାଂଚନକାଂଚୀମଧିକାଂଚି କାଂଚିଦଦ୍ରାକ୍ଷମ୍ |
ଅଵନତଜନାନୁକଂପାମନୁକଂପାକୂଲମସ୍ମଦନୁକୂଲାମ୍ ‖82‖

ପରିଚିତକଂପାତୀରଂ ପର୍ଵତରାଜନ୍ଯସୁକୃତସନ୍ନାହମ୍ |
ପରଗୁରୁକୃପଯା ଵୀକ୍ଷେ ପରମଶିଵୋତ୍ସଂଗମଂଗଲାଭରଣମ୍ ‖83‖

ଦଗ୍ଧମଦନସ୍ଯ ଶଂଭୋଃ ପ୍ରଥୀଯସୀଂ ବ୍ରହ୍ମଚର୍ଯଵୈଦଗ୍ଧୀମ୍ |
ତଵ ଦେଵି ତରୁଣିମଶ୍ରୀଚତୁରିମପାକୋ ନ ଚକ୍ଷମେ ମାତଃ ‖84‖

ମଦଜଲତମାଲପତ୍ରା ଵସନିତପତ୍ରା କରାଦୃତଖାନିତ୍ରା |
ଵିହରତି ପୁଲିଂଦଯୋଷା ଗୁଂଜାଭୂଷା ଫଣୀଂଦ୍ରକୃତଵେଷା ‖85‖

ଅଂକେ ଶୁକିନୀ ଗୀତେ କୌତୁକିନୀ ପରିସରେ ଚ ଗାଯକିନୀ |
ଜଯସି ସଵିଧେଽଂବ ଭୈରଵମଂଡଲିନୀ ଶ୍ରଵସି ଶଂଖକୁନ୍ଡଲିନୀ ‖86‖

ପ୍ରଣତଜନତାପଵର୍ଗା କୃତବହୁସର୍ଗା ସସିଂହସଂସର୍ଗା |
କାମାକ୍ଷି ମୁଦିତଭର୍ଗା ହତରିପୁଵର୍ଗା ତ୍ଵମେଵ ସା ଦୁର୍ଗା ‖87‖

ଶ୍ରଵଣଚଲଦ୍ଵେତଂଡା ସମରୋଦ୍ଦଂଡା ଧୁତାସୁରଶିଖଂଡା |
ଦେଵି କଲିତାଂତ୍ରଷଂଡା ଧୃତନରମୁଂଡା ତ୍ଵମେଵ ଚାମୁଂଡା ‖88‖

ଉର୍ଵୀଧରେଂଦ୍ରକନ୍ଯେ ଦର୍ଵୀଭରିତେନ ଭକ୍ତପୂରେଣ |
ଗୁର୍ଵୀମକିଂଚନାର୍ତି ଖର୍ଵୀକୁରୁଷେ ତ୍ଵମେଵ କାମାକ୍ଷି ‖89‖

ତାଡିତରିପୁପରିପୀଡନଭଯହରଣ ନିପୁଣହଲମୁସଲା |
କ୍ରୋଡପତିଭୀଷଣମୁଖୀ କ୍ରୀଡସି ଜଗତି ତ୍ଵମେଵ କାମାକ୍ଷି ‖90‖

ସ୍ମରମଥନଵରଣଲୋଲା ମନ୍ମଥହେଲାଵିଲାସମଣିଶାଲା |
କନକରୁଚିଚୌର୍ଯଶୀଲା ତ୍ଵମଂବ ବାଲା କରାବ୍ଜଧୃତମାଲା ‖91‖

ଵିମଲପଟୀ କମଲକୁଟୀ ପୁସ୍ତକରୁଦ୍ରାକ୍ଷଶସ୍ତହସ୍ତପୁଟୀ |
କାମାକ୍ଷି ପକ୍ଷ୍ମଲାକ୍ଷୀ କଲିତଵିପଂଚୀ ଵିଭାସି ଵୈରିଂଚୀ ‖92‖

କୁଂକୁମରୁଚିପିଂଗମସୃକ୍ପଂକିଲମୁଂଡାଲିମଂଡିତଂ ମାତଃ |
ଶ୍ରୀକାମାକ୍ଷି ତଦୀଯସଂଗମକଲାମଂଦୀଭଵତ୍କୌତୁକଃ
ଜଯତି ତଵ ରୂପଧେଯଂ ଜପପଟପୁସ୍ତକଵରାଭଯକରାବ୍ଜମ୍ ‖93‖

କନକମଣିକଲିତଭୂଷାଂ କାଲାଯସକଲହଶୀଲକାଂତିକଲାମ୍ |
କାମାକ୍ଷି ଶୀଲଯେ ତ୍ଵାଂ କପାଲଶୂଲାଭିରାମକରକମଲାମ୍ ‖94‖

ଲୋହିତିମପୁଂଜମଧ୍ଯେ ମୋହିତଭୁଵନେ ମୁଦା ନିରୀକ୍ଷଂତେ |
ଵଦନଂ ତଵ କୁଵଯୁଗଲଂ କାଂଚୀସୀମାଂ ଚ କେଽପି କାମାକ୍ଷି ‖95‖

ଜଲଧିଦ୍ଵିଗୁଣିତହୁତବହଦିଶାଦିନେଶ୍ଵରକଲାଶ୍ଵିନେଯଦଲୈଃ |
ନଲିନୈର୍ମହେଶି ଗଚ୍ଛସି ସର୍ଵୋତ୍ତରକରକମଲଦଲମମଲମ୍ ‖96‖

ସତ୍କୃତଦେଶିକଚରଣାଃ ସବୀଜନିର୍ବୀଜଯୋଗନିଶ୍ରେଣ୍ଯା |
ଅପଵର୍ଗସୌଧଵଲଭୀମାରୋହଂତ୍ଯଂବ କେଽପି ତଵ କୃପଯା ‖97‖

ଅଂତରପି ବହିରପି ତ୍ଵଂ ଜଂତୁତତେରଂତକାଂତକୃଦହଂତେ |
ଚିଂତିତସଂତାନଵତାଂ ସଂତତମପି ତଂତନୀଷି ମହିମାନମ୍ ‖98‖

କଲମଂଜୁଲଵାଗନୁମିତଗଲପଂଜରଗତଶୁକଗ୍ରହୌତ୍କଂଠ୍ଯାତ୍ |
ଅଂବ ରଦନାଂବରଂ ତେ ବିଂବଫଲଂ ଶଂବରାରିଣା ନ୍ଯସ୍ତମ୍ ‖99‖

ଜଯ ଜଯ ଜଗଦଂବ ଶିଵେ ଜଯ ଜଯ କାମାକ୍ଷି ଜଯ ଜଯାଦ୍ରିସୁତେ |
ଜଯ ଜଯ ମହେଶଦଯିତେ ଜଯ ଜଯ ଚିଦ୍ଗଗନକୌମୁଦୀଧାରେ ‖100‖

ଆର୍ଯାଶତକଂ ଭକ୍ତ୍ଯା ପଠତାମାର୍ଯାକଟାକ୍ଷେଣ |
ନିସ୍ସରତି ଵଦନକମଲାଦ୍ଵାଣୀ ପୀଯୂଷଧୋରଣୀ ଦିଵ୍ଯା ‖101‖

‖ ଇତି ଆର୍ଯାଶତକଂ ସଂପୂର୍ଣମ୍ ‖