॥ 𑌇𑌤𑌿 𑌶𑍍𑌰𑍀𑌮𑌹𑌾𑌭𑌾𑌰𑌤𑍇 𑌉𑌦𑍍𑌯𑍋𑌗𑌪𑌰𑍍𑌵𑌣𑌿 𑌪𑍍𑌰𑌜𑌾𑌗𑌰𑌪𑌰𑍍𑌵𑌣𑌿
𑌵𑌿𑌦𑍁𑌰𑌵𑌾𑌕𑍍𑌯𑍇 𑌸𑌪𑍍𑌤𑌤𑍍𑌰𑌿𑌂𑌶𑍋𑌽𑌧𑍍𑌯𑌾𑌯𑌃 ॥

𑌵𑌿𑌦𑍁𑌰 𑌉𑌵𑌾𑌚 ।

𑌸𑌪𑍍𑌤𑌦𑌶𑍇𑌮𑌾𑌨𑍍𑌰𑌾𑌜𑍇𑌂𑌦𑍍𑌰 𑌮𑌨𑍁𑌃 𑌸𑍍𑌵𑌾𑌯𑌂𑌭𑍁𑌵𑍋𑌽𑌬𑍍𑌰𑌵𑍀𑌤𑍍 ।
𑌵𑍈𑌚𑌿𑌤𑍍𑌰𑌵𑍀𑌰𑍍𑌯 𑌪𑍁𑌰𑍁𑌷𑌾𑌨𑌾𑌕𑌾𑌶𑌂 𑌮𑍁𑌷𑍍𑌟𑌿𑌭𑌿𑌰𑍍𑌘𑍍𑌨𑌤𑌃 ॥ 1॥

𑌤𑌾𑌨𑍇𑌵𑌿𑌂𑌦𑍍𑌰𑌸𑍍𑌯 𑌹𑌿 𑌧𑌨𑍁𑌰𑌨𑌾𑌮𑍍𑌯𑌂 𑌨𑌮𑌤𑍋𑌽𑌬𑍍𑌰𑌵𑍀𑌤𑍍 ।
𑌅𑌥𑍋 𑌮𑌰𑍀𑌚𑌿𑌨𑌃 𑌪𑌾𑌦𑌾𑌨𑌨𑌾𑌮𑍍𑌯𑌾𑌨𑍍𑌨𑌮𑌤𑌸𑍍𑌤𑌥𑌾 ॥ 2॥

𑌯𑌶𑍍𑌚𑌾𑌶𑌿𑌷𑍍𑌯𑌂 𑌶𑌾𑌸𑌤𑌿 𑌯𑌶𑍍 𑌚 𑌕𑍁𑌪𑍍𑌯𑌤𑍇
𑌯𑌶𑍍𑌚𑌾𑌤𑌿𑌵𑍇𑌲𑌂 𑌭𑌜𑌤𑍇 𑌦𑍍𑌵𑌿𑌷𑌂𑌤𑌮𑍍 ।
𑌸𑍍𑌤𑍍𑌰𑌿𑌯𑌶𑍍𑌚 𑌯𑍋𑌽𑌰𑌕𑍍𑌷𑌤𑌿 𑌭𑌦𑍍𑌰𑌮𑌸𑍍𑌤𑍁 𑌤𑍇
𑌯𑌶𑍍𑌚𑌾𑌯𑌾𑌚𑍍𑌯𑌂 𑌯𑌾𑌚𑌤𑌿 𑌯𑌶𑍍 𑌚 𑌕𑌤𑍍𑌥𑌤𑍇 ॥ 3॥

𑌯𑌶𑍍𑌚𑌾𑌭𑌿𑌜𑌾𑌤𑌃 𑌪𑍍𑌰𑌕𑌰𑍋𑌤𑍍𑌯𑌕𑌾𑌰𑍍𑌯𑌂
𑌯𑌶𑍍𑌚𑌾𑌬𑌲𑍋 𑌬𑌲𑌿𑌨𑌾 𑌨𑌿𑌤𑍍𑌯𑌵𑍈𑌰𑍀 ।
𑌅𑌶𑍍𑌰𑌦𑍍𑌦𑌧𑌾𑌨𑌾𑌯 𑌚 𑌯𑍋 𑌬𑍍𑌰𑌵𑍀𑌤𑌿
𑌯𑌶𑍍𑌚𑌾𑌕𑌾𑌮𑍍𑌯𑌂 𑌕𑌾𑌮𑌯𑌤𑍇 𑌨𑌰𑍇𑌂𑌦𑍍𑌰 ॥ 4॥

𑌵𑌧𑍍𑌵𑌾 𑌹𑌾𑌸𑌂 𑌶𑍍𑌵𑌶𑍁𑌰𑍋 𑌯𑌶𑍍 𑌚 𑌮𑌨𑍍𑌯𑌤𑍇
𑌵𑌧𑍍𑌵𑌾 𑌵𑌸𑌨𑍍𑌨𑍁𑌤 𑌯𑍋 𑌮𑌾𑌨𑌕𑌾𑌮𑌃 ।
𑌪𑌰𑌕𑍍𑌷𑍇𑌤𑍍𑌰𑍇 𑌨𑌿𑌰𑍍𑌵𑌪𑌤𑌿 𑌯𑌶𑍍𑌚 𑌬𑍀𑌜𑌂
𑌸𑍍𑌤𑍍𑌰𑌿𑌯𑌂 𑌚 𑌯𑌃 𑌪𑌰𑌿𑌵𑌦𑌤𑍇𑌽𑌤𑌿𑌵𑍇𑌲𑌮𑍍 ॥ 5॥

𑌯𑌶𑍍𑌚𑍈𑌵 𑌲𑌬𑍍𑌧𑍍𑌵𑌾 𑌨 𑌸𑍍𑌮𑌰𑌾𑌮𑍀𑌤𑍍𑌯𑍁𑌵𑌾𑌚
𑌦𑌤𑍍𑌤𑍍𑌵𑌾 𑌚 𑌯𑌃 𑌕𑌤𑍍𑌥𑌤𑌿 𑌯𑌾𑌚𑍍𑌯𑌮𑌾𑌨𑌃 ।
𑌯𑌶𑍍𑌚𑌾𑌸𑌤𑌃 𑌸𑌾𑌂𑌤𑍍𑌵𑌮𑍁𑌪𑌾𑌸𑌤𑍀𑌹
𑌏𑌤𑍇𑌽𑌨𑍁𑌯𑌾𑌂𑌤𑍍𑌯𑌨𑌿𑌲𑌂 𑌪𑌾𑌶𑌹𑌸𑍍𑌤𑌾𑌃 ॥ 6॥

𑌯𑌸𑍍𑌮𑌿𑌨𑍍𑌯𑌥𑌾 𑌵𑌰𑍍𑌤𑌤𑍇 𑌯𑍋 𑌮𑌨𑍁𑌷𑍍𑌯𑌸𑍍
𑌤𑌸𑍍𑌮𑌿𑌂𑌸𑍍𑌤𑌥𑌾 𑌵𑌰𑍍𑌤𑌿𑌤𑌵𑍍𑌯𑌂 𑌸 𑌧𑌰𑍍𑌮𑌃 ।
𑌮𑌾𑌯𑌾𑌚𑌾𑌰𑍋 𑌮𑌾𑌯𑌯𑌾 𑌵𑌰𑍍𑌤𑌿𑌤𑌵𑍍𑌯𑌃
𑌸𑌾𑌧𑍍𑌵𑌾𑌚𑌾𑌰𑌃 𑌸𑌾𑌧𑍁𑌨𑌾 𑌪𑍍𑌰𑌤𑍍𑌯𑍁𑌦𑍇𑌯𑌃 ॥ 𑍭॥

𑌧𑍃𑌤𑌰𑌾𑌷𑍍𑌟𑍍𑌰 𑌉𑌵𑌾𑌚 ।

𑌶𑌤𑌾𑌯𑍁𑌰𑍁𑌕𑍍𑌤𑌃 𑌪𑍁𑌰𑍁𑌷𑌃 𑌸𑌰𑍍𑌵𑌵𑍇𑌦𑍇𑌷𑍁 𑌵𑍈 𑌯𑌦𑌾 ।
𑌨𑌾𑌪𑍍𑌨𑍋𑌤𑍍𑌯𑌥 𑌚 𑌤𑌤𑍍𑌸𑌰𑍍𑌵𑌮𑌾𑌯𑍁𑌃 𑌕𑍇𑌨𑍇𑌹 𑌹𑍇𑌤𑍁𑌨𑌾 ॥ 𑍮॥

𑌵𑌿𑌦𑍁𑌰 𑌉𑌵𑌾𑌚 ।

𑌅𑌤𑌿𑌵𑌾𑌦𑍋𑌽𑌤𑌿𑌮𑌾𑌨𑌶𑍍𑌚 𑌤𑌥𑌾𑌤𑍍𑌯𑌾𑌗𑍋 𑌨𑌰𑌾𑌧𑌿𑌪𑌃 ।
𑌕𑍍𑌰𑍋𑌧𑌶𑍍𑌚𑌾𑌤𑌿𑌵𑌿𑌵𑌿𑌤𑍍𑌸𑌾 𑌚 𑌮𑌿𑌤𑍍𑌰𑌦𑍍𑌰𑍋𑌹𑌶𑍍𑌚 𑌤𑌾𑌨𑌿 𑌷𑌟𑍍 ॥ 𑍯॥

𑌏𑌤 𑌏𑌵𑌾𑌸𑌯𑌸𑍍𑌤𑍀𑌕𑍍𑌷𑍍𑌣𑌾𑌃 𑌕𑍃𑌂𑌤𑌂𑌤𑍍𑌯𑌾𑌯𑍂𑌂𑌷𑌿 𑌦𑍇𑌹𑌿𑌨𑌾𑌮𑍍 ।
𑌏𑌤𑌾𑌨𑌿 𑌮𑌾𑌨𑌵𑌾𑌨𑍍𑌘𑍍𑌨𑌂𑌤𑌿 𑌨 𑌮𑍃𑌤𑍍𑌯𑍁𑌰𑍍𑌭𑌦𑍍𑌰𑌮𑌸𑍍𑌤𑍁 𑌤𑍇 ॥ 10॥

𑌵𑌿𑌶𑍍𑌵𑌸𑍍𑌤𑌸𑍍𑌯𑍈𑌤𑌿 𑌯𑍋 𑌦𑌾𑌰𑌾𑌨𑍍𑌯𑌶𑍍𑌚𑌾𑌪𑌿 𑌗𑍁𑌰𑍁 𑌤𑌕𑍍𑌪𑌗𑌃 ।
𑌵𑍃𑌷𑌲𑍀 𑌪𑌤𑌿𑌰𑍍𑌦𑍍𑌵𑌿𑌜𑍋 𑌯𑌶𑍍𑌚 𑌪𑌾𑌨𑌪𑌶𑍍𑌚𑍈𑌵 𑌭𑌾𑌰𑌤 ॥ 11॥

𑌶𑌰𑌣𑌾𑌗𑌤𑌹𑌾 𑌚𑍈𑌵 𑌸𑌰𑍍𑌵𑍇 𑌬𑍍𑌰𑌹𑍍𑌮𑌹𑌣𑍈𑌃 𑌸𑌮𑌾𑌃 ।
𑌏𑌤𑍈𑌃 𑌸𑌮𑍇𑌤𑍍𑌯 𑌕𑌰𑍍𑌤𑌵𑍍𑌯𑌂 𑌪𑍍𑌰𑌾𑌯𑌶𑍍𑌚𑌿𑌤𑍍𑌤𑌮𑌿𑌤𑌿 𑌶𑍍𑌰𑍁𑌤𑌿𑌃 ॥ 12॥

𑌗𑍃𑌹𑍀 𑌵𑌦𑌾𑌨𑍍𑌯𑍋𑌽𑌨𑌪𑌵𑌿𑌦𑍍𑌧 𑌵𑌾𑌕𑍍𑌯𑌃
𑌶𑍇𑌷𑌾𑌨𑍍𑌨 𑌭𑍋𑌕𑌾𑌪𑍍𑌯𑌵𑌿𑌹𑌿𑌂𑌸𑌕𑌶𑍍 𑌚 ।
𑌨𑌾𑌨𑌰𑍍𑌥𑌕𑍃𑌤𑍍𑌤𑍍𑌯𑌕𑍍𑌤𑌕𑌲𑌿𑌃 𑌕𑍃𑌤𑌜𑍍𑌞𑌃
𑌸𑌤𑍍𑌯𑍋 𑌮𑍃𑌦𑍁𑌃 𑌸𑍍𑌵𑌰𑍍𑌗𑌮𑍁𑌪𑍈𑌤𑌿 𑌵𑌿𑌦𑍍𑌵𑌾𑌨𑍍 ॥ 13॥

𑌸𑍁𑌲𑌭𑌾𑌃 𑌪𑍁𑌰𑍁𑌷𑌾 𑌰𑌾𑌜𑌨𑍍𑌸𑌤𑌤𑌂 𑌪𑍍𑌰𑌿𑌯𑌵𑌾𑌦𑌿𑌨𑌃 ।
𑌅𑌪𑍍𑌰𑌿𑌯𑌸𑍍𑌯 𑌤𑍁 𑌪𑌥𑍍𑌯𑌸𑍍𑌯 𑌵𑌕𑍍𑌤𑌾 𑌶𑍍𑌰𑍋𑌤𑌾 𑌚 𑌦𑍁𑌰𑍍𑌲𑌭𑌃 ॥ 14॥

𑌯𑍋 𑌹𑌿 𑌧𑌰𑍍𑌮𑌂 𑌵𑍍𑌯𑌪𑌾𑌶𑍍𑌰𑌿𑌤𑍍𑌯 𑌹𑌿𑌤𑍍𑌵𑌾 𑌭𑌰𑍍𑌤𑍁𑌃 𑌪𑍍𑌰𑌿𑌯𑌾𑌪𑍍𑌰𑌿𑌯𑍇 ।
𑌅𑌪𑍍𑌰𑌿𑌯𑌾𑌣𑍍𑌯𑌾𑌹 𑌪𑌥𑍍𑌯𑌾𑌨𑌿 𑌤𑍇𑌨 𑌰𑌾𑌜𑌾 𑌸𑌹𑌾𑌯𑌵𑌾𑌨𑍍 ॥ 15॥

𑌤𑍍𑌯𑌜𑍇𑌤𑍍𑌕𑍁𑌲𑌾𑌰𑍍𑌥𑍇 𑌪𑍁𑌰𑍁𑌷𑌂 𑌗𑍍𑌰𑌾𑌮𑌸𑍍𑌯𑌾𑌰𑍍𑌥𑍇 𑌕𑍁𑌲𑌂 𑌤𑍍𑌯𑌜𑍇𑌤𑍍 ।
𑌗𑍍𑌰𑌾𑌮𑌂 𑌜𑌨𑌪𑌦𑌸𑍍𑌯𑌾𑌰𑍍𑌥𑍇 𑌆𑌤𑍍𑌮𑌾𑌰𑍍𑌥𑍇 𑌪𑍃𑌥𑌿𑌵𑍀𑌂 𑌤𑍍𑌯𑌜𑍇𑌤𑍍 ॥ 16॥

𑌆𑌪𑌦𑌰𑍍𑌥𑌂 𑌧𑌨𑌂 𑌰𑌕𑍍𑌷𑍇𑌦𑍍𑌦𑌾𑌰𑌾𑌨𑍍𑌰𑌕𑍍𑌷𑍇𑌦𑍍𑌧𑌨𑍈𑌰𑌪𑌿 ।
𑌆𑌤𑍍𑌮𑌾𑌨𑌂 𑌸𑌤𑌤𑌂 𑌰𑌕𑍍𑌷𑍇𑌦𑍍𑌦𑌾𑌰𑍈𑌰𑌪𑌿 𑌧𑌨𑍈𑌰𑌪𑌿 ॥ 1𑍭॥

𑌉𑌕𑍍𑌤𑌂 𑌮𑌯𑌾 𑌦𑍍𑌯𑍂𑌤𑌕𑌾𑌲𑍇𑌽𑌪𑌿 𑌰𑌾𑌜𑌨𑍍
𑌨𑍈𑌵𑌂 𑌯𑍁𑌕𑍍𑌤𑌂 𑌵𑌚𑌨𑌂 𑌪𑍍𑌰𑌾𑌤𑌿𑌪𑍀𑌯 ।
𑌤𑌦𑍌𑌷𑌧𑌂 𑌪𑌥𑍍𑌯𑌮𑌿𑌵𑌾𑌤𑍁𑌰𑌸𑍍𑌯
𑌨 𑌰𑍋𑌚𑌤𑍇 𑌤𑌵 𑌵𑍈𑌚𑌿𑌤𑍍𑌰 𑌵𑍀𑌰𑍍𑌯 ॥ 1𑍮॥

𑌕𑌾𑌕𑍈𑌰𑌿𑌮𑌾𑌂𑌶𑍍𑌚𑌿𑌤𑍍𑌰𑌬𑌰𑍍𑌹𑌾𑌨𑍍𑌮𑌯𑍂𑌰𑌾𑌨𑍍
𑌪𑌰𑌾𑌜𑍈𑌷𑍍𑌠𑌾𑌃 𑌪𑌾𑌂𑌡𑌵𑌾𑌂𑌧𑌾𑌰𑍍𑌤𑌰𑌾𑌷𑍍𑌟𑍍𑌰𑍈𑌃 ।
𑌹𑌿𑌤𑍍𑌵𑌾 𑌸𑌿𑌂𑌹𑌾𑌨𑍍𑌕𑍍𑌰𑍋𑌷𑍍𑌟𑍁 𑌕𑌾𑌨𑍍𑌗𑍂𑌹𑌮𑌾𑌨𑌃
𑌪𑍍𑌰𑌾𑌪𑍍𑌤𑍇 𑌕𑌾𑌲𑍇 𑌶𑍋𑌚𑌿𑌤𑌾 𑌤𑍍𑌵𑌂 𑌨𑌰𑍇𑌂𑌦𑍍𑌰 ॥ 1𑍯॥

𑌯𑌸𑍍𑌤𑌾𑌤 𑌨 𑌕𑍍𑌰𑍁𑌧𑍍𑌯𑌤𑌿 𑌸𑌰𑍍𑌵𑌕𑌾𑌲𑌂
𑌭𑍃𑌤𑍍𑌯𑌸𑍍𑌯 𑌭𑌕𑍍𑌤𑌸𑍍𑌯 𑌹𑌿𑌤𑍇 𑌰𑌤𑌸𑍍𑌯 ।
𑌤𑌸𑍍𑌮𑌿𑌨𑍍𑌭𑍃𑌤𑍍𑌯𑌾 𑌭𑌰𑍍𑌤𑌰𑌿 𑌵𑌿𑌶𑍍𑌵𑌸𑌂𑌤𑌿
𑌨 𑌚𑍈𑌨𑌮𑌾𑌪𑌤𑍍𑌸𑍁 𑌪𑌰𑌿𑌤𑍍𑌯𑌜𑌂𑌤𑌿 ॥ 20॥

𑌨 𑌭𑍃𑌤𑍍𑌯𑌾𑌨𑌾𑌂 𑌵𑍃𑌤𑍍𑌤𑌿 𑌸𑌂𑌰𑍋𑌧𑌨𑍇𑌨
𑌬𑌾𑌹𑍍𑌯𑌂 𑌜𑌨𑌂 𑌸𑌂𑌜𑌿𑌘𑍃𑌕𑍍𑌷𑍇𑌦𑌪𑍂𑌰𑍍𑌵𑌮𑍍 ।
𑌤𑍍𑌯𑌜𑌂𑌤𑌿 𑌹𑍍𑌯𑍇𑌨𑌮𑍁𑌚𑌿𑌤𑌾𑌵𑌰𑍁𑌦𑍍𑌧𑌾𑌃
𑌸𑍍𑌨𑌿𑌗𑍍𑌧𑌾 𑌹𑍍𑌯𑌮𑌾𑌤𑍍𑌯𑌾𑌃 𑌪𑌰𑌿𑌹𑍀𑌨𑌭𑍋𑌗𑌾𑌃 ॥ 21॥

𑌕𑍃𑌤𑍍𑌯𑌾𑌨𑌿 𑌪𑍂𑌰𑍍𑌵𑌂 𑌪𑌰𑌿𑌸𑌂𑌖𑍍𑌯𑌾𑌯 𑌸𑌰𑍍𑌵𑌾𑌣𑍍𑌯𑍍
𑌆𑌯𑌵𑍍𑌯𑌯𑌾𑌵𑌨𑍁𑌰𑍂𑌪𑌾𑌂 𑌚 𑌵𑍃𑌤𑍍𑌤𑌿𑌮𑍍 ।
𑌸𑌂𑌗𑍃𑌹𑍍𑌣𑍀𑌯𑌾𑌦𑌨𑍁𑌰𑍂𑌪𑌾𑌨𑍍𑌸𑌹𑌾𑌯𑌾𑌨𑍍
𑌸𑌹𑌾𑌯𑌸𑌾𑌧𑍍𑌯𑌾𑌨𑌿 𑌹𑌿 𑌦𑍁𑌷𑍍𑌕𑌰𑌾𑌣𑌿 ॥ 22॥

𑌅𑌭𑌿𑌪𑍍𑌰𑌾𑌯𑌂 𑌯𑍋 𑌵𑌿𑌦𑌿𑌤𑍍𑌵𑌾 𑌤𑍁 𑌭𑌰𑍍𑌤𑍁𑌃
𑌸𑌰𑍍𑌵𑌾𑌣𑌿 𑌕𑌾𑌰𑍍𑌯𑌾𑌣𑌿 𑌕𑌰𑍋𑌤𑍍𑌯𑌤𑌂𑌦𑍍𑌰𑍀𑌃 ।
𑌵𑌕𑍍𑌤𑌾 𑌹𑌿𑌤𑌾𑌨𑌾𑌮𑌨𑍁𑌰𑌕𑍍𑌤 𑌆𑌰𑍍𑌯𑌃
𑌶𑌕𑍍𑌤𑌿𑌜𑍍𑌞 𑌆𑌤𑍍𑌮𑍇𑌵 𑌹𑌿 𑌸𑍋𑌽𑌨𑍁𑌕𑌂𑌪𑍍𑌯𑌃 ॥ 23॥

𑌵𑌾𑌕𑍍𑌯𑌂 𑌤𑍁 𑌯𑍋 𑌨𑌾𑌦𑍍𑌰𑌿𑌯𑌤𑍇𑌽𑌨𑍁𑌶𑌿𑌷𑍍𑌟𑌃
𑌪𑍍𑌰𑌤𑍍𑌯𑌾𑌹 𑌯𑌶𑍍𑌚𑌾𑌪𑌿 𑌨𑌿𑌯𑍁𑌜𑍍𑌯𑌮𑌾𑌨𑌃 ।
𑌪𑍍𑌰𑌜𑍍𑌞𑌾𑌭𑌿𑌮𑌾𑌨𑍀 𑌪𑍍𑌰𑌤𑌿𑌕𑍂𑌲𑌵𑌾𑌦𑍀
𑌤𑍍𑌯𑌾𑌜𑍍𑌯𑌃 𑌸 𑌤𑌾𑌦𑍃𑌕𑍍𑌤𑍍𑌵𑌰𑌯𑍈𑌵 𑌭𑍃𑌤𑍍𑌯𑌃 ॥ 24॥

𑌅𑌸𑍍𑌤𑌬𑍍𑌧𑌮𑌕𑍍𑌲𑍀𑌬𑌮𑌦𑍀𑌰𑍍𑌘𑌸𑍂𑌤𑍍𑌰𑌂
𑌸𑌾𑌨𑍁𑌕𑍍𑌰𑍋𑌶𑌂 𑌶𑍍𑌲𑌕𑍍𑌷𑍍𑌣𑌮𑌹𑌾𑌰𑍍𑌯𑌮𑌨𑍍𑌯𑍈𑌃 ।
𑌅𑌰𑍋𑌗 𑌜𑌾𑌤𑍀𑌯𑌮𑍁𑌦𑌾𑌰𑌵𑌾𑌕𑍍𑌯𑌂
𑌦𑍂𑌤𑌂 𑌵𑌦𑌂𑌤𑍍𑌯𑌷𑍍𑌟 𑌗𑍁𑌣𑍋𑌪𑌪𑌨𑍍𑌨𑌮𑍍 ॥ 25॥

𑌨 𑌵𑌿𑌶𑍍𑌵𑌾𑌸𑌾𑌜𑍍𑌜𑌾𑌤𑍁 𑌪𑌰𑌸𑍍𑌯 𑌗𑍇𑌹𑌂
𑌗𑌚𑍍𑌛𑍇𑌨𑍍𑌨𑌰𑌶𑍍𑌚𑍇𑌤𑌯𑌾𑌨𑍋 𑌵𑌿𑌕𑌾𑌲𑍇 ।
𑌨 𑌚𑌤𑍍𑌵𑌰𑍇 𑌨𑌿𑌶𑌿 𑌤𑌿𑌷𑍍𑌠𑍇𑌨𑍍𑌨𑌿𑌗𑍂𑌢𑍋
𑌨 𑌰𑌾𑌜𑌨𑍍𑌯𑌾𑌂 𑌯𑍋𑌷𑌿𑌤𑌂 𑌪𑍍𑌰𑌾𑌰𑍍𑌥𑌯𑍀𑌤 ॥ 26॥

𑌨 𑌨𑌿𑌹𑍍𑌨𑌵𑌂 𑌸𑌤𑍍𑌰 𑌗𑌤𑌸𑍍𑌯 𑌗𑌚𑍍𑌛𑍇𑌤𑍍
𑌸𑌂𑌸𑍃𑌷𑍍𑌟 𑌮𑌂𑌤𑍍𑌰𑌸𑍍𑌯 𑌕𑍁𑌸𑌂𑌗𑌤𑌸𑍍𑌯 ।
𑌨 𑌚 𑌬𑍍𑌰𑍂𑌯𑌾𑌨𑍍𑌨𑌾𑌶𑍍𑌵𑌸𑌾𑌮𑌿 𑌤𑍍𑌵𑌯𑍀𑌤𑌿
𑌸 𑌕𑌾𑌰𑌣𑌂 𑌵𑍍𑌯𑌪𑌦𑍇𑌶𑌂 𑌤𑍁 𑌕𑍁𑌰𑍍𑌯𑌾𑌤𑍍 ॥ 2𑍭॥

𑌘𑍃𑌣𑍀 𑌰𑌾𑌜𑌾 𑌪𑍁𑌂𑌶𑍍𑌚𑌲𑍀 𑌰𑌾𑌜𑌭𑍃𑌤𑍍𑌯𑌃
𑌪𑍁𑌤𑍍𑌰𑍋 𑌭𑍍𑌰𑌾𑌤𑌾 𑌵𑌿𑌧𑌵𑌾 𑌬𑌾𑌲 𑌪𑍁𑌤𑍍𑌰𑌾 ।
𑌸𑍇𑌨𑌾 𑌜𑍀𑌵𑍀 𑌚𑍋𑌦𑍍𑌧𑍃𑌤 𑌭𑌕𑍍𑌤 𑌏𑌵
𑌵𑍍𑌯𑌵𑌹𑌾𑌰𑍇 𑌵𑍈 𑌵𑌰𑍍𑌜𑌨𑍀𑌯𑌾𑌃 𑌸𑍍𑌯𑍁𑌰𑍇𑌤𑍇 ॥ 2𑍮॥

𑌗𑍁𑌣𑌾 𑌦𑌶 𑌸𑍍𑌨𑌾𑌨𑌶𑍀𑌲𑌂 𑌭𑌜𑌂𑌤𑍇
𑌬𑌲𑌂 𑌰𑍂𑌪𑌂 𑌸𑍍𑌵𑌰𑌵𑌰𑍍𑌣𑌪𑍍𑌰𑌶𑍁𑌦𑍍𑌧𑌿𑌃 ।
𑌸𑍍𑌪𑌰𑍍𑌶𑌶𑍍𑌚 𑌗𑌂𑌧𑌶𑍍𑌚 𑌵𑌿𑌶𑍁𑌦𑍍𑌧𑌤𑌾 𑌚
𑌶𑍍𑌰𑍀𑌃 𑌸𑍌𑌕𑍁𑌮𑌾𑌰𑍍𑌯𑌂 𑌪𑍍𑌰𑌵𑌰𑌾𑌶𑍍𑌚 𑌨𑌾𑌰𑍍𑌯𑌃 ॥ 2𑍯॥

𑌗𑍁𑌣𑌾𑌶𑍍𑌚 𑌷𑌣𑍍𑌮𑌿𑌤𑌭𑍁𑌕𑍍𑌤𑌂 𑌭𑌜𑌂𑌤𑍇
𑌆𑌰𑍋𑌗𑍍𑌯𑌮𑌾𑌯𑍁𑌶𑍍𑌚 𑌸𑍁𑌖𑌂 𑌬𑌲𑌂 𑌚 ।
𑌅𑌨𑌾𑌵𑌿𑌲𑌂 𑌚𑌾𑌸𑍍𑌯 𑌭𑌵𑍇𑌦𑌪𑌤𑍍𑌯𑌂
𑌨 𑌚𑍈𑌨𑌮𑌾𑌦𑍍𑌯𑍂𑌨 𑌇𑌤𑌿 𑌕𑍍𑌷𑌿𑌪𑌂𑌤𑌿 ॥ 30॥

𑌅𑌕𑌰𑍍𑌮 𑌶𑍀𑌲𑌂 𑌚 𑌮𑌹𑌾𑌶𑌨𑌂 𑌚
𑌲𑍋𑌕𑌦𑍍𑌵𑌿𑌷𑍍𑌟𑌂 𑌬𑌹𑍁 𑌮𑌾𑌯𑌂 𑌨𑍃𑌶𑌂𑌸𑌮𑍍 ।
𑌅𑌦𑍇𑌶𑌕𑌾𑌲𑌜𑍍𑌞𑌮𑌨𑌿𑌷𑍍𑌟 𑌵𑍇𑌷𑌮𑍍
𑌏𑌤𑌾𑌨𑍍𑌗𑍃𑌹𑍇 𑌨 𑌪𑍍𑌰𑌤𑌿𑌵𑌾𑌸𑌯𑍀𑌤 ॥ 31॥

𑌕𑌦𑌰𑍍𑌯𑌮𑌾𑌕𑍍𑌰𑍋𑌶𑌕𑌮𑌶𑍍𑌰𑍁𑌤𑌂 𑌚
𑌵𑌰𑌾𑌕 𑌸𑌂𑌭𑍂𑌤𑌮𑌮𑌾𑌨𑍍𑌯 𑌮𑌾𑌨𑌿𑌨𑌮𑍍 ।
𑌨𑌿𑌷𑍍𑌠𑍂𑌰𑌿𑌣𑌂 𑌕𑍃𑌤𑌵𑍈𑌰𑌂 𑌕𑍃𑌤𑌘𑍍𑌨𑌮𑍍
𑌏𑌤𑌾𑌨𑍍𑌭𑍃𑌤𑌾𑌰𑍍𑌤𑍋𑌽𑌪𑌿 𑌨 𑌜𑌾𑌤𑍁 𑌯𑌾𑌚𑍇𑌤𑍍 ॥ 32॥

𑌸𑌂𑌕𑍍𑌲𑌿𑌷𑍍𑌟𑌕𑌰𑍍𑌮𑌾𑌣𑌮𑌤𑌿𑌪𑍍𑌰𑌵𑌾𑌦𑌂
𑌨𑌿𑌤𑍍𑌯𑌾𑌨𑍃𑌤𑌂 𑌚𑌾𑌦𑍃𑌢 𑌭𑌕𑍍𑌤𑌿𑌕𑌂 𑌚 ।
𑌵𑌿𑌕𑍃𑌷𑍍𑌟𑌰𑌾𑌗𑌂 𑌬𑌹𑍁𑌮𑌾𑌨𑌿𑌨𑌂 𑌚𑌾𑌪𑍍𑌯𑍍
𑌏𑌤𑌾𑌨𑍍𑌨 𑌸𑍇𑌵𑍇𑌤 𑌨𑌰𑌾𑌧𑌮𑌾𑌨𑍍𑌷𑌟𑍍 ॥ 33॥

𑌸𑌹𑌾𑌯𑌬𑌂𑌧𑌨𑌾 𑌹𑍍𑌯𑌰𑍍𑌥𑌾𑌃 𑌸𑌹𑌾𑌯𑌾𑌶𑍍𑌚𑌾𑌰𑍍𑌥𑌬𑌂𑌧𑌨𑌾𑌃 ।
𑌅𑌨𑍍𑌯𑍋𑌨𑍍𑌯𑌬𑌂𑌧𑌨𑌾𑌵𑍇𑌤𑍌 𑌵𑌿𑌨𑌾𑌨𑍍𑌯𑍋𑌨𑍍𑌯𑌂 𑌨 𑌸𑌿𑌧𑍍𑌯𑌤𑌃 ॥ 34॥

𑌉𑌤𑍍𑌪𑌾𑌦𑍍𑌯 𑌪𑍁𑌤𑍍𑌰𑌾𑌨𑌨𑍃𑌣𑌾𑌂𑌶𑍍𑌚 𑌕𑍃𑌤𑍍𑌵𑌾
𑌵𑍃𑌤𑍍𑌤𑌿𑌂 𑌚 𑌤𑍇𑌭𑍍𑌯𑍋𑌽𑌨𑍁𑌵𑌿𑌧𑌾𑌯 𑌕𑌾𑌂 𑌚𑌿𑌤𑍍 ।
𑌸𑍍𑌥𑌾𑌨𑍇 𑌕𑍁𑌮𑌾𑌰𑍀𑌃 𑌪𑍍𑌰𑌤𑌿𑌪𑌾𑌦𑍍𑌯 𑌸𑌰𑍍𑌵𑌾
𑌅𑌰𑌣𑍍𑌯𑌸𑌂𑌸𑍍𑌥𑍋 𑌮𑍁𑌨𑌿𑌵𑌦𑍍𑌬𑍁𑌭𑍂𑌷𑍇𑌤𑍍 ॥ 35॥

𑌹𑌿𑌤𑌂 𑌯𑌤𑍍𑌸𑌰𑍍𑌵𑌭𑍂𑌤𑌾𑌨𑌾𑌮𑌾𑌤𑍍𑌮𑌨𑌶𑍍𑌚 𑌸𑍁𑌖𑌾𑌵𑌹𑌮𑍍 ।
𑌤𑌤𑍍𑌕𑍁𑌰𑍍𑌯𑌾𑌦𑍀𑌶𑍍𑌵𑌰𑍋 𑌹𑍍𑌯𑍇𑌤𑌨𑍍𑌮𑍂𑌲𑌂 𑌧𑌰𑍍𑌮𑌾𑌰𑍍𑌥𑌸𑌿𑌦𑍍𑌧𑌯𑍇 ॥ 36॥

𑌬𑍁𑌦𑍍𑌧𑌿𑌃 𑌪𑍍𑌰𑌭𑌾𑌵𑌸𑍍𑌤𑍇𑌜𑌶𑍍𑌚 𑌸𑌤𑍍𑌤𑍍𑌵𑌮𑍁𑌤𑍍𑌥𑌾𑌨𑌮𑍇𑌵 𑌚 ।
𑌵𑍍𑌯𑌵𑌸𑌾𑌯𑌶𑍍𑌚 𑌯𑌸𑍍𑌯 𑌸𑍍𑌯𑌾𑌤𑍍𑌤𑌸𑍍𑌯𑌾𑌵𑍃𑌤𑍍𑌤𑌿 𑌭𑌯𑌂 𑌕𑍁𑌤𑌃 ॥ 3𑍭॥

𑌪𑌶𑍍𑌯 𑌦𑍋𑌷𑌾𑌨𑍍𑌪𑌾𑌂𑌡𑌵𑍈𑌰𑍍𑌵𑌿𑌗𑍍𑌰𑌹𑍇 𑌤𑍍𑌵𑌂
𑌯𑌤𑍍𑌰 𑌵𑍍𑌯𑌥𑍇𑌰𑌨𑍍𑌨𑌪𑌿 𑌦𑍇𑌵𑌾𑌃 𑌸 𑌶𑌕𑍍𑌰𑌾𑌃 ।
𑌪𑍁𑌤𑍍𑌰𑍈𑌰𑍍𑌵𑍈𑌰𑌂 𑌨𑌿𑌤𑍍𑌯𑌮𑍁𑌦𑍍𑌵𑌿𑌗𑍍𑌨𑌵𑌾𑌸𑍋
𑌯𑌶𑌃 𑌪𑍍𑌰𑌣𑌾𑌶𑍋 𑌦𑍍𑌵𑌿𑌷𑌤𑌾𑌂 𑌚 𑌹𑌰𑍍𑌷𑌃 ॥ 3𑍮॥

𑌭𑍀𑌷𑍍𑌮𑌸𑍍𑌯 𑌕𑍋𑌪𑌸𑍍𑌤𑌵 𑌚𑍇𑌂𑌦𑍍𑌰 𑌕𑌲𑍍𑌪
𑌦𑍍𑌰𑍋𑌣𑌸𑍍𑌯 𑌰𑌾𑌜𑍍𑌞𑌶𑍍𑌚 𑌯𑍁𑌧𑌿𑌷𑍍𑌠𑌿𑌰𑌸𑍍𑌯 ।
𑌉𑌤𑍍𑌸𑌾𑌦𑌯𑍇𑌲𑍍𑌲𑍋𑌕𑌮𑌿𑌮𑌂 𑌪𑍍𑌰𑌵𑍃𑌦𑍍𑌧𑌃
𑌶𑍍𑌵𑍇𑌤𑍋 𑌗𑍍𑌰𑌹𑌸𑍍𑌤𑌿𑌰𑍍𑌯𑌗𑌿𑌵𑌾𑌪𑌤𑌨𑍍𑌖𑍇 ॥ 3𑍯॥

𑌤𑌵 𑌪𑍁𑌤𑍍𑌰𑌶𑌤𑌂 𑌚𑍈𑌵 𑌕𑌰𑍍𑌣𑌃 𑌪𑌂𑌚 𑌚 𑌪𑌾𑌂𑌡𑌵𑌾𑌃 ।
𑌪𑍃𑌥𑌿𑌵𑍀𑌮𑌨𑍁𑌶𑌾𑌸𑍇𑌯𑍁𑌰𑌖𑌿𑌲𑌾𑌂 𑌸𑌾𑌗𑌰𑌾𑌂𑌬𑌰𑌾𑌮𑍍 ॥ 40॥

𑌧𑌾𑌰𑍍𑌤𑌰𑌾𑌷𑍍𑌟𑍍𑌰𑌾 𑌵𑌨𑌂 𑌰𑌾𑌜𑌨𑍍𑌵𑍍𑌯𑌾𑌘𑍍𑌰𑌾𑌃 𑌪𑌾𑌂𑌡𑍁𑌸𑍁𑌤𑌾 𑌮𑌤𑌾𑌃 ।
𑌮𑌾 𑌵𑌨𑌂 𑌛𑌿𑌂𑌧𑌿 𑌸 𑌵𑍍𑌯𑌾𑌘𑍍𑌰𑌂 𑌮𑌾 𑌵𑍍𑌯𑌾𑌘𑍍𑌰𑌾𑌨𑍍𑌨𑍀𑌨𑌶𑍋 𑌵𑌨𑌾𑌤𑍍 ॥ 41॥

𑌨 𑌸𑍍𑌯𑌾𑌦𑍍𑌵𑌨𑌮𑍃𑌤𑍇 𑌵𑍍𑌯𑌾𑌘𑍍𑌰𑌾𑌨𑍍𑌵𑍍𑌯𑌾𑌘𑍍𑌰𑌾 𑌨 𑌸𑍍𑌯𑍁𑌰𑍃𑌤𑍇 𑌵𑌨𑌮𑍍 ।
𑌵𑌨𑌂 𑌹𑌿 𑌰𑌕𑍍𑌷𑍍𑌯𑌤𑍇 𑌵𑍍𑌯𑌾𑌘𑍍𑌰𑍈𑌰𑍍𑌵𑍍𑌯𑌾𑌘𑍍𑌰𑌾𑌨𑍍𑌰𑌕𑍍𑌷𑌤𑌿 𑌕𑌾𑌨𑌨𑌮𑍍 ॥ 42॥

𑌨 𑌤𑌥𑍇𑌚𑍍𑌛𑌂𑌤𑍍𑌯𑌕𑌲𑍍𑌯𑌾𑌣𑌾𑌃 𑌪𑌰𑍇𑌷𑌾𑌂 𑌵𑍇𑌦𑌿𑌤𑍁𑌂 𑌗𑍁𑌣𑌾𑌨𑍍 ।
𑌯𑌥𑍈𑌷𑌾𑌂 𑌜𑍍𑌞𑌾𑌤𑍁𑌮𑌿𑌚𑍍𑌛𑌂𑌤𑌿 𑌨𑍈𑌰𑍍𑌗𑍁𑌣𑍍𑌯𑌂 𑌪𑌾𑌪𑌚𑍇𑌤𑌸𑌃 ॥ 43॥

𑌅𑌰𑍍𑌥𑌸𑌿𑌦𑍍𑌧𑌿𑌂 𑌪𑌰𑌾𑌮𑌿𑌚𑍍𑌛𑌂𑌧𑌰𑍍𑌮𑌮𑍇𑌵𑌾𑌦𑌿𑌤𑌶𑍍 𑌚𑌰𑍇𑌤𑍍 ।
𑌨 𑌹𑌿 𑌧𑌰𑍍𑌮𑌾𑌦𑌪𑍈𑌤𑍍𑌯𑌰𑍍𑌥𑌃 𑌸𑍍𑌵𑌰𑍍𑌗𑌲𑍋𑌕𑌾𑌦𑌿𑌵𑌾𑌮𑍃𑌤𑌮𑍍 ॥ 44॥

𑌯𑌸𑍍𑌯𑌾𑌤𑍍𑌮𑌾 𑌵𑌿𑌰𑌤𑌃 𑌪𑌾𑌪𑌾𑌤𑍍𑌕𑌲𑍍𑌯𑌾𑌣𑍇 𑌚 𑌨𑌿𑌵𑍇𑌶𑌿𑌤𑌃 ।
𑌤𑍇𑌨 𑌸𑌰𑍍𑌵𑌮𑌿𑌦𑌂 𑌬𑍁𑌦𑍍𑌧𑌂 𑌪𑍍𑌰𑌕𑍃𑌤𑌿𑌰𑍍𑌵𑌿𑌕𑍃𑌤𑌿𑌰𑍍𑌶𑍍𑌚 𑌯𑌾 ॥ 45॥

𑌯𑍋 𑌧𑌰𑍍𑌮𑌮𑌰𑍍𑌥𑌂 𑌕𑌾𑌮𑌂 𑌚 𑌯𑌥𑌾𑌕𑌾𑌲𑌂 𑌨𑌿𑌷𑍇𑌵𑌤𑍇 ।
𑌧𑌰𑍍𑌮𑌾𑌰𑍍𑌥𑌕𑌾𑌮𑌸𑌂𑌯𑍋𑌗𑌂 𑌯𑍋𑌽𑌮𑍁𑌤𑍍𑌰𑍇𑌹 𑌚 𑌵𑌿𑌂𑌦𑌤𑌿 ॥ 46॥

𑌸𑌨𑍍𑌨𑌿𑌯𑌚𑍍𑌛𑌤𑌿 𑌯𑍋 𑌵𑍇𑌗𑌮𑍁𑌤𑍍𑌥𑌿𑌤𑌂 𑌕𑍍𑌰𑍋𑌧𑌹𑌰𑍍𑌷𑌯𑍋𑌃 ।
𑌸 𑌶𑍍𑌰𑌿𑌯𑍋 𑌭𑌾𑌜𑌨𑌂 𑌰𑌾𑌜𑌨𑍍𑌯𑌶𑍍𑌚𑌾𑌪𑌤𑍍𑌸𑍁 𑌨 𑌮𑍁𑌹𑍍𑌯𑌤𑌿 ॥ 4𑍭॥

𑌬𑌲𑌂 𑌪𑌂𑌚 𑌵𑌿𑌧𑌂 𑌨𑌿𑌤𑍍𑌯𑌂 𑌪𑍁𑌰𑍁𑌷𑌾𑌣𑌾𑌂 𑌨𑌿𑌬𑍋𑌧 𑌮𑍇 ।
𑌯𑌤𑍍𑌤𑍁 𑌬𑌾𑌹𑍁𑌬𑌲𑌂 𑌨𑌾𑌮 𑌕𑌨𑌿𑌷𑍍𑌠𑌂 𑌬𑌲𑌮𑍁𑌚𑍍𑌯𑌤𑍇 ॥ 4𑍮॥

𑌅𑌮𑌾𑌤𑍍𑌯𑌲𑌾𑌭𑍋 𑌭𑌦𑍍𑌰𑌂 𑌤𑍇 𑌦𑍍𑌵𑌿𑌤𑍀𑌯𑌂 𑌬𑌲𑌮𑍁𑌚𑍍𑌯𑌤𑍇 ।
𑌧𑌨𑌲𑌾𑌭𑌸𑍍𑌤𑍃𑌤𑍀𑌯𑌂 𑌤𑍁 𑌬𑌲𑌮𑌾𑌹𑍁𑌰𑍍𑌜𑌿𑌗𑍀𑌷𑌵𑌃 ॥ 4𑍯॥

𑌯𑌤𑍍𑌤𑍍𑌵𑌸𑍍𑌯 𑌸𑌹𑌜𑌂 𑌰𑌾𑌜𑌨𑍍𑌪𑌿𑌤𑍃𑌪𑍈𑌤𑌾𑌮𑌹𑌂 𑌬𑌲𑌮𑍍 ।
𑌅𑌭𑌿𑌜𑌾𑌤 𑌬𑌲𑌂 𑌨𑌾𑌮 𑌤𑌚𑍍𑌚𑌤𑍁𑌰𑍍𑌥𑌂 𑌬𑌲𑌂 𑌸𑍍𑌮𑍃𑌤𑌮𑍍 ॥ 50॥

𑌯𑍇𑌨 𑌤𑍍𑌵𑍇𑌤𑌾𑌨𑌿 𑌸𑌰𑍍𑌵𑌾𑌣𑌿 𑌸𑌂𑌗𑍃𑌹𑍀𑌤𑌾𑌨𑌿 𑌭𑌾𑌰𑌤 ।
𑌯𑌦𑍍𑌬𑌲𑌾𑌨𑌾𑌂 𑌬𑌲𑌂 𑌶𑍍𑌰𑍇𑌷𑍍𑌠𑌂 𑌤𑌤𑍍𑌪𑍍𑌰𑌜𑍍𑌞𑌾 𑌬𑌲𑌮𑍁𑌚𑍍𑌯𑌤𑍇 ॥ 51॥

𑌮𑌹𑌤𑍇 𑌯𑍋𑌽𑌪𑌕𑌾𑌰𑌾𑌯 𑌨𑌰𑌸𑍍𑌯 𑌪𑍍𑌰𑌭𑌵𑍇𑌨𑍍𑌨𑌰𑌃 ।
𑌤𑍇𑌨 𑌵𑍈𑌰𑌂 𑌸𑌮𑌾𑌸𑌜𑍍𑌯 𑌦𑍂𑌰𑌸𑍍𑌥𑍋𑌽𑌸𑍍𑌮𑍀𑌤𑌿 𑌨𑌾𑌶𑍍𑌵𑌸𑍇𑌤𑍍 ॥ 52॥

𑌸𑍍𑌤𑍍𑌰𑍀𑌷𑍁 𑌰𑌾𑌜𑌸𑍁 𑌸𑌰𑍍𑌪𑍇𑌷𑍁 𑌸𑍍𑌵𑌾𑌧𑍍𑌯𑌾𑌯𑍇 𑌶𑌤𑍍𑌰𑍁𑌸𑍇𑌵𑌿𑌷𑍁 ।
𑌭𑍋𑌗𑍇 𑌚𑌾𑌯𑍁𑌷𑌿 𑌵𑌿𑌶𑍍𑌵𑌾𑌸𑌂 𑌕𑌃 𑌪𑍍𑌰𑌾𑌜𑍍𑌞𑌃 𑌕𑌰𑍍𑌤𑍁𑌮𑌰𑍍𑌹𑌤𑌿 ॥ 53॥

𑌪𑍍𑌰𑌜𑍍𑌞𑌾 𑌶𑌰𑍇𑌣𑌾𑌭𑌿𑌹𑌤𑌸𑍍𑌯 𑌜𑌂𑌤𑍋𑌶𑍍
𑌚𑌿𑌕𑌿𑌤𑍍𑌸𑌕𑌾𑌃 𑌸𑌂𑌤𑌿 𑌨 𑌚𑍌𑌷𑌧𑌾𑌨𑌿 ।
𑌨 𑌹𑍋𑌮𑌮𑌂𑌤𑍍𑌰𑌾 𑌨 𑌚 𑌮𑌂𑌗𑌲𑌾𑌨𑌿
𑌨𑌾𑌥𑌰𑍍𑌵𑌣𑌾 𑌨𑌾𑌪𑍍𑌯𑌗𑌦𑌾𑌃 𑌸𑍁𑌸𑌿𑌦𑍍𑌧𑌾𑌃 ॥ 54॥

𑌸𑌰𑍍𑌪𑌶𑍍𑌚𑌾𑌗𑍍𑌨𑌿𑌶𑍍𑌚 𑌸𑌿𑌂𑌹𑌶𑍍𑌚 𑌕𑍁𑌲𑌪𑍁𑌤𑍍𑌰𑌶𑍍𑌚 𑌭𑌾𑌰𑌤 ।
𑌨𑌾𑌵𑌜𑍍𑌞𑍇𑌯𑌾 𑌮𑌨𑍁𑌷𑍍𑌯𑍇𑌣 𑌸𑌰𑍍𑌵𑍇 𑌤𑍇 𑌹𑍍𑌯𑌤𑌿𑌤𑍇𑌜𑌸𑌃 ॥ 55॥

𑌅𑌗𑍍𑌨𑌿𑌸𑍍𑌤𑍇𑌜𑍋 𑌮𑌹𑌲𑍍𑌲𑍋𑌕𑍇 𑌗𑍂𑌢𑌸𑍍𑌤𑌿𑌷𑍍𑌠𑌤𑌿 𑌦𑌾𑌰𑍁𑌷𑍁 ।
𑌨 𑌚𑍋𑌪𑌯𑍁𑌂𑌕𑍍𑌤𑍇 𑌤𑌦𑍍𑌦𑌾𑌰𑍁 𑌯𑌾𑌵𑌨𑍍𑌨𑍋 𑌦𑍀𑌪𑍍𑌯𑌤𑍇 𑌪𑌰𑍈𑌃 ॥ 56॥

𑌸 𑌏𑌵 𑌖𑌲𑍁 𑌦𑌾𑌰𑍁𑌭𑍍𑌯𑍋 𑌯𑌦𑌾 𑌨𑌿𑌰𑍍𑌮𑌥𑍍𑌯 𑌦𑍀𑌪𑍍𑌯𑌤𑍇 ।
𑌤𑌦𑌾 𑌤𑌚𑍍𑌚 𑌵𑌨𑌂 𑌚𑌾𑌨𑍍𑌯𑌨𑍍𑌨𑌿𑌰𑍍𑌦𑌹𑌤𑍍𑌯𑌾𑌶𑍁 𑌤𑍇𑌜𑌸𑌾 ॥ 5𑍭॥

𑌏𑌵𑌮𑍇𑌵 𑌕𑍁𑌲𑍇 𑌜𑌾𑌤𑌾𑌃 𑌪𑌾𑌵𑌕𑍋𑌪𑌮 𑌤𑍇𑌜𑌸𑌃 ।
𑌕𑍍𑌷𑌮𑌾𑌵𑌂𑌤𑍋 𑌨𑌿𑌰𑌾𑌕𑌾𑌰𑌾𑌃 𑌕𑌾𑌷𑍍𑌠𑍇𑌽𑌗𑍍𑌨𑌿𑌰𑌿𑌵 𑌶𑍇𑌰𑌤𑍇 ॥ 5𑍮॥

𑌲𑌤𑌾 𑌧𑌰𑍍𑌮𑌾 𑌤𑍍𑌵𑌂 𑌸𑌪𑍁𑌤𑍍𑌰𑌃 𑌶𑌾𑌲𑌾𑌃 𑌪𑌾𑌂𑌡𑍁𑌸𑍁𑌤𑌾 𑌮𑌤𑌾𑌃 ।
𑌨 𑌲𑌤𑌾 𑌵𑌰𑍍𑌧𑌤𑍇 𑌜𑌾𑌤𑍁 𑌮𑌹𑌾𑌦𑍍𑌰𑍁𑌮𑌮𑌨𑌾𑌶𑍍𑌰𑌿𑌤𑌾 ॥ 5𑍯॥

𑌵𑌨𑌂 𑌰𑌾𑌜𑌂𑌸𑍍𑌤𑍍𑌵𑌂 𑌸𑌪𑍁𑌤𑍍𑌰𑍋𑌽𑌂𑌬𑌿𑌕𑍇𑌯
𑌸𑌿𑌂𑌹𑌾𑌨𑍍𑌵𑌨𑍇 𑌪𑌾𑌂𑌡𑌵𑌾𑌂𑌸𑍍𑌤𑌾𑌤 𑌵𑌿𑌦𑍍𑌧𑌿 ।
𑌸𑌿𑌂𑌹𑍈𑌰𑍍𑌵𑌿𑌹𑍀𑌨𑌂 𑌹𑌿 𑌵𑌨𑌂 𑌵𑌿𑌨𑌶𑍍𑌯𑍇𑌤𑍍
𑌸𑌿𑌂𑌹𑌾 𑌵𑌿𑌨𑌶𑍍𑌯𑍇𑌯𑍁𑌰𑍃𑌤𑍇 𑌵𑌨𑍇𑌨 ॥ 60॥

॥ 𑌇𑌤𑌿 𑌶𑍍𑌰𑍀𑌮𑌹𑌾𑌭𑌾𑌰𑌤𑍇 𑌉𑌦𑍍𑌯𑍋𑌗𑌪𑌰𑍍𑌵𑌣𑌿 𑌪𑍍𑌰𑌜𑌾𑌗𑌰𑌪𑌰𑍍𑌵𑌣𑌿
𑌵𑌿𑌦𑍁𑌰𑌵𑌾𑌕𑍍𑌯𑍇 𑌸𑌪𑍍𑌤𑌤𑍍𑌰𑌿𑌂𑌶𑍋𑌽𑌧𑍍𑌯𑌾𑌯𑌃 ॥ 3𑍭॥