𑌶𑍍𑌰𑍁𑌤𑍍𑌵𑌾 𑌧𑌰𑍍𑌮𑌂 𑌵𑌿𑌜𑌾𑌨𑌾𑌤𑌿 𑌶𑍍𑌰𑍁𑌤𑍍𑌵𑌾 𑌤𑍍𑌯𑌜𑌤𑌿 𑌦𑍁𑌰𑍍𑌮𑌤𑌿𑌮𑍍 ।
𑌶𑍍𑌰𑍁𑌤𑍍𑌵𑌾 𑌜𑍍𑌞𑌾𑌨𑌮𑌵𑌾𑌪𑍍𑌨𑍋𑌤𑌿 𑌶𑍍𑌰𑍁𑌤𑍍𑌵𑌾 𑌮𑍋𑌕𑍍𑌷𑌮𑌵𑌾𑌪𑍍𑌨𑍁𑌯𑌾𑌤𑍍 ॥ 01 ॥
𑌪𑌕𑍍𑌷𑌿𑌣𑌃 𑌕𑌾𑌕𑌶𑍍𑌚𑌂𑌡𑌾𑌲𑌃 𑌪𑌶𑍂𑌨𑌾𑌂 𑌚𑍈𑌵 𑌕𑍁𑌕𑍍𑌕𑍁𑌰𑌃 ।
𑌮𑍁𑌨𑍀𑌨𑌾𑌂 𑌪𑌾𑌪𑌶𑍍𑌚𑌂𑌡𑌾𑌲𑌃 𑌸𑌰𑍍𑌵𑌚𑌾𑌂𑌡𑌾𑌲𑌨𑌿𑌂𑌦𑌕𑌃 ॥ 02 ॥
𑌭𑌸𑍍𑌮𑌨𑌾 𑌶𑍁𑌦𑍍𑌧𑍍𑌯𑌤𑍇 𑌕𑌾𑌸𑍍𑌯𑌂 𑌤𑌾𑌮𑍍𑌰𑌮𑌮𑍍𑌲𑍇𑌨 𑌶𑍁𑌦𑍍𑌧𑍍𑌯𑌤𑌿 ।
𑌰𑌜𑌸𑌾 𑌶𑍁𑌦𑍍𑌧𑍍𑌯𑌤𑍇 𑌨𑌾𑌰𑍀 𑌨𑌦𑍀 𑌵𑍇𑌗𑍇𑌨 𑌶𑍁𑌦𑍍𑌧𑍍𑌯𑌤𑌿 ॥ 03 ॥
𑌭𑍍𑌰𑌮𑌨𑍍𑌸𑌂𑌪𑍂𑌜𑍍𑌯𑌤𑍇 𑌰𑌾𑌜𑌾 𑌭𑍍𑌰𑌮𑌨𑍍𑌸𑌂𑌪𑍂𑌜𑍍𑌯𑌤𑍇 𑌦𑍍𑌵𑌿𑌜𑌃 ।
𑌭𑍍𑌰𑌮𑌨𑍍𑌸𑌂𑌪𑍂𑌜𑍍𑌯𑌤𑍇 𑌯𑍋𑌗𑍀 𑌸𑍍𑌤𑍍𑌰𑍀 𑌭𑍍𑌰𑌮𑌂𑌤𑍀 𑌵𑌿𑌨𑌶𑍍𑌯𑌤𑌿 ॥ 04 ॥
𑌯𑌸𑍍𑌯𑌾𑌰𑍍𑌥𑌾𑌸𑍍𑌤𑌸𑍍𑌯 𑌮𑌿𑌤𑍍𑌰𑌾𑌣𑌿 𑌯𑌸𑍍𑌯𑌾𑌰𑍍𑌥𑌾𑌸𑍍𑌤𑌸𑍍𑌯 𑌬𑌾𑌂𑌧𑌵𑌾𑌃 ।
𑌯𑌸𑍍𑌯𑌾𑌰𑍍𑌥𑌾𑌃 𑌸 𑌪𑍁𑌮𑌾𑌁𑌲𑍍𑌲𑍋𑌕𑍇 𑌯𑌸𑍍𑌯𑌾𑌰𑍍𑌥𑌾𑌃 𑌸 𑌚 𑌪𑌂𑌡𑌿𑌤𑌃 ॥ 05 ॥
𑌤𑌾𑌦𑍃𑌶𑍀 𑌜𑌾𑌯𑌤𑍇 𑌬𑍁𑌦𑍍𑌧𑌿𑌰𑍍𑌵𑍍𑌯𑌵𑌸𑌾𑌯𑍋𑌽𑌪𑌿 𑌤𑌾𑌦𑍃𑌶𑌃 ।
𑌸𑌹𑌾𑌯𑌾𑌸𑍍𑌤𑌾𑌦𑍃𑌶𑌾 𑌏𑌵 𑌯𑌾𑌦𑍃𑌶𑍀 𑌭𑌵𑌿𑌤𑌵𑍍𑌯𑌤𑌾 ॥ 06 ॥
𑌕𑌾𑌲𑌃 𑌪𑌚𑌤𑌿 𑌭𑍂𑌤𑌾𑌨𑌿 𑌕𑌾𑌲𑌃 𑌸𑌂𑌹𑌰𑌤𑍇 𑌪𑍍𑌰𑌜𑌾𑌃 ।
𑌕𑌾𑌲𑌃 𑌸𑍁𑌪𑍍𑌤𑍇𑌷𑍁 𑌜𑌾𑌗𑌰𑍍𑌤𑌿 𑌕𑌾𑌲𑍋 𑌹𑌿 𑌦𑍁𑌰𑌤𑌿𑌕𑍍𑌰𑌮𑌃 ॥ 0 ॥
𑌨 𑌪𑌶𑍍𑌯𑌤𑌿 𑌚 𑌜𑌨𑍍𑌮𑌾𑌂𑌧𑌃 𑌕𑌾𑌮𑌾𑌂𑌧𑍋 𑌨𑍈𑌵 𑌪𑌶𑍍𑌯𑌤𑌿 ।
𑌮𑌦𑍋𑌨𑍍𑌮𑌤𑍍𑌤𑌾 𑌨 𑌪𑌶𑍍𑌯𑌂𑌤𑌿 𑌅𑌰𑍍𑌥𑍀 𑌦𑍋𑌷𑌂 𑌨 𑌪𑌶𑍍𑌯𑌤𑌿 ॥ 0 ॥
𑌸𑍍𑌵𑌯𑌂 𑌕𑌰𑍍𑌮 𑌕𑌰𑍋𑌤𑍍𑌯𑌾𑌤𑍍𑌮𑌾 𑌸𑍍𑌵𑌯𑌂 𑌤𑌤𑍍𑌫𑌲𑌮𑌶𑍍𑌨𑍁𑌤𑍇 ।
𑌸𑍍𑌵𑌯𑌂 𑌭𑍍𑌰𑌮𑌤𑌿 𑌸𑌂𑌸𑌾𑌰𑍇 𑌸𑍍𑌵𑌯𑌂 𑌤𑌸𑍍𑌮𑌾𑌦𑍍𑌵𑌿𑌮𑍁𑌚𑍍𑌯𑌤𑍇 ॥ 0 ॥
𑌰𑌾𑌜𑌾 𑌰𑌾𑌷𑍍𑌟𑍍𑌰𑌕𑍃𑌤𑌂 𑌪𑌾𑌪𑌂 𑌰𑌾𑌜𑍍𑌞𑌃 𑌪𑌾𑌪𑌂 𑌪𑍁𑌰𑍋𑌹𑌿𑌤𑌃 ।
𑌭𑌰𑍍𑌤𑌾 𑌚 𑌸𑍍𑌤𑍍𑌰𑍀𑌕𑍃𑌤𑌂 𑌪𑌾𑌪𑌂 𑌶𑌿𑌷𑍍𑌯𑌪𑌾𑌪𑌂 𑌗𑍁𑌰𑍁𑌸𑍍𑌤𑌥𑌾 ॥ 10 ॥
𑌋𑌣𑌕𑌰𑍍𑌤𑌾 𑌪𑌿𑌤𑌾 𑌶𑌤𑍍𑌰𑍁𑌰𑍍𑌮𑌾𑌤𑌾 𑌚 𑌵𑍍𑌯𑌭𑌿𑌚𑌾𑌰𑌿𑌣𑍀 ।
𑌭𑌾𑌰𑍍𑌯𑌾 𑌰𑍂𑌪𑌵𑌤𑍀 𑌶𑌤𑍍𑌰𑍁𑌃 𑌪𑍁𑌤𑍍𑌰𑌃 𑌶𑌤𑍍𑌰𑍁𑌰𑌪𑌂𑌡𑌿𑌤𑌃 ॥ 11 ॥
𑌲𑍁𑌬𑍍𑌧𑌮𑌰𑍍𑌥𑍇𑌨 𑌗𑍃𑌹𑍍𑌣𑍀𑌯𑌾𑌤𑍍 𑌸𑍍𑌤𑌬𑍍𑌧𑌮𑌂𑌜𑌲𑌿𑌕𑌰𑍍𑌮𑌣𑌾 ।
𑌮𑍂𑌰𑍍𑌖𑌂 𑌛𑌂𑌦𑍋𑌽𑌨𑍁𑌵𑍃𑌤𑍍𑌤𑍍𑌯𑌾 𑌚 𑌯𑌥𑌾𑌰𑍍𑌥𑌤𑍍𑌵𑍇𑌨 𑌪𑌂𑌡𑌿𑌤𑌮𑍍 ॥ 12 ॥
𑌵𑌰𑌂 𑌨 𑌰𑌾𑌜𑍍𑌯𑌂 𑌨 𑌕𑍁𑌰𑌾𑌜𑌰𑌾𑌜𑍍𑌯𑌂
𑌵𑌰𑌂 𑌨 𑌮𑌿𑌤𑍍𑌰𑌂 𑌨 𑌕𑍁𑌮𑌿𑌤𑍍𑌰𑌮𑌿𑌤𑍍𑌰𑌮𑍍 ।
𑌵𑌰𑌂 𑌨 𑌶𑌿𑌷𑍍𑌯𑍋 𑌨 𑌕𑍁𑌶𑌿𑌷𑍍𑌯𑌶𑌿𑌷𑍍𑌯𑍋
𑌵𑌰𑌂 𑌨 𑌦𑌾𑌰 𑌨 𑌕𑍁𑌦𑌰𑌦𑌾𑌰𑌃 ॥ 13 ॥
𑌕𑍁𑌰𑌾𑌜𑌰𑌾𑌜𑍍𑌯𑍇𑌨 𑌕𑍁𑌤𑌃 𑌪𑍍𑌰𑌜𑌾𑌸𑍁𑌖𑌂
𑌕𑍁𑌮𑌿𑌤𑍍𑌰𑌮𑌿𑌤𑍍𑌰𑍇𑌣 𑌕𑍁𑌤𑍋𑌽𑌭𑌿𑌨𑌿𑌰𑍍𑌵𑍃𑌤𑌿𑌃 ।
𑌕𑍁𑌦𑌾𑌰𑌦𑌾𑌰𑍈𑌶𑍍𑌚 𑌕𑍁𑌤𑍋 𑌗𑍃𑌹𑍇 𑌰𑌤𑌿𑌃
𑌕𑍁𑌶𑌿𑌷𑍍𑌯𑌶𑌿𑌷𑍍𑌯𑌮𑌧𑍍𑌯𑌾𑌪𑌯𑌤𑌃 𑌕𑍁𑌤𑍋 𑌯𑌶𑌃 ॥ 14 ॥
𑌸𑌿𑌂𑌹𑌾𑌦𑍇𑌕𑌂 𑌬𑌕𑌾𑌦𑍇𑌕𑌂 𑌶𑌿𑌕𑍍𑌷𑍇𑌚𑍍𑌚𑌤𑍍𑌵𑌾𑌰𑌿 𑌕𑍁𑌕𑍍𑌕𑍁𑌟𑌾𑌤𑍍 ।
𑌵𑌾𑌯𑌸𑌾𑌤𑍍𑌪𑌂𑌚 𑌶𑌿𑌕𑍍𑌷𑍇𑌚𑍍𑌚 𑌷𑌟𑍍𑌶𑍁𑌨𑌸𑍍𑌤𑍍𑌰𑍀𑌣𑌿 𑌗𑌰𑍍𑌦𑌭𑌾𑌤𑍍 ॥ 15 ॥
𑌪𑍍𑌰𑌭𑍂𑌤𑌂 𑌕𑌾𑌰𑍍𑌯𑌮𑌲𑍍𑌪𑌂 𑌵𑌾 𑌯𑌨𑍍𑌨𑌰𑌃 𑌕𑌰𑍍𑌤𑍁𑌮𑌿𑌚𑍍𑌛𑌤𑌿 ।
𑌸𑌰𑍍𑌵𑌾𑌰𑌂𑌭𑍇𑌣 𑌤𑌤𑍍𑌕𑌾𑌰𑍍𑌯𑌂 𑌸𑌿𑌂𑌹𑌾𑌦𑍇𑌕𑌂 𑌪𑍍𑌰𑌚𑌕𑍍𑌷𑌤𑍇 ॥ 16 ॥
𑌇𑌂𑌦𑍍𑌰𑌿𑌯𑌾𑌣𑌿 𑌚 𑌸𑌂𑌯𑌮𑍍𑌯 𑌰𑌾𑌗𑌦𑍍𑌵𑍇𑌷𑌵𑌿𑌵𑌰𑍍𑌜𑌿𑌤𑌃 ।
𑌸𑌮𑌦𑍁𑌃𑌖𑌸𑍁𑌖𑌃 𑌶𑌾𑌂𑌤𑌃 𑌤𑌤𑍍𑌤𑍍𑌵𑌜𑍍𑌞𑌃 𑌸𑌾𑌧𑍁𑌰𑍁𑌚𑍍𑌯𑌤𑍇 ॥ 1 ॥
𑌪𑍍𑌰𑌤𑍍𑌯𑍁𑌤𑍍𑌥𑌾𑌨𑌂 𑌚 𑌯𑍁𑌦𑍍𑌧𑌂 𑌚 𑌸𑌂𑌵𑌿𑌭𑌾𑌗𑌂 𑌚 𑌬𑌂𑌧𑍁𑌷𑍁 ।
𑌸𑍍𑌵𑌯𑌮𑌾𑌕𑍍𑌰𑌮𑍍𑌯 𑌭𑍁𑌕𑍍𑌤𑌂 𑌚 𑌶𑌿𑌕𑍍𑌷𑍇𑌚𑍍𑌚𑌤𑍍𑌵𑌾𑌰𑌿 𑌕𑍁𑌕𑍍𑌕𑍁𑌟𑌾𑌤𑍍 ॥ 1 ॥
𑌗𑍂𑌢𑌮𑍈𑌥𑍁𑌨𑌚𑌾𑌰𑌿𑌤𑍍𑌵𑌂 𑌕𑌾𑌲𑍇 𑌕𑌾𑌲𑍇 𑌚 𑌸𑌂𑌗𑍍𑌰𑌹𑌮𑍍 ।
𑌅𑌪𑍍𑌰𑌮𑌤𑍍𑌤𑌮𑌵𑌿𑌶𑍍𑌵𑌾𑌸𑌂 𑌪𑌂𑌚 𑌶𑌿𑌕𑍍𑌷𑍇𑌚𑍍𑌚 𑌵𑌾𑌯𑌸𑌾𑌤𑍍 ॥ 1 ॥
𑌬𑌹𑍍𑌵𑌾𑌶𑍀 𑌸𑍍𑌵𑌲𑍍𑌪𑌸𑌂𑌤𑍁𑌷𑍍𑌟𑌃 𑌸𑌨𑌿𑌦𑍍𑌰𑍋 𑌲𑌘𑍁𑌚𑍇𑌤𑌨𑌃 ।
𑌸𑍍𑌵𑌾𑌮𑌿𑌭𑌕𑍍𑌤𑌶𑍍𑌚 𑌶𑍂𑌰𑌶𑍍𑌚 𑌷𑌡𑍇𑌤𑍇 𑌶𑍍𑌵𑌾𑌨𑌤𑍋 𑌗𑍁𑌣𑌾𑌃 ॥ 20 ॥
𑌸𑍁𑌶𑍍𑌰𑌾𑌂𑌤𑍋𑌽𑌪𑌿 𑌵𑌹𑍇𑌦𑍍𑌭𑌾𑌰𑌂 𑌶𑍀𑌤𑍋𑌷𑍍𑌣𑌂 𑌨 𑌚 𑌪𑌶𑍍𑌯𑌤𑌿 ।
𑌸𑌂𑌤𑍁𑌷𑍍𑌟𑌶𑍍𑌚𑌰𑌤𑍇 𑌨𑌿𑌤𑍍𑌯𑌂 𑌤𑍍𑌰𑍀𑌣𑌿 𑌶𑌿𑌕𑍍𑌷𑍇𑌚𑍍𑌚 𑌗𑌰𑍍𑌦𑌭𑌾𑌤𑍍 ॥ 21 ॥
𑌯 𑌏𑌤𑌾𑌨𑍍𑌵𑌿𑌂𑌶𑌤𑌿𑌗𑍁𑌣𑌾𑌨𑌾𑌚𑌰𑌿𑌷𑍍𑌯𑌤𑌿 𑌮𑌾𑌨𑌵𑌃 ।
𑌕𑌾𑌰𑍍𑌯𑌾𑌵𑌸𑍍𑌥𑌾𑌸𑍁 𑌸𑌰𑍍𑌵𑌾𑌸𑍁 𑌅𑌜𑍇𑌯𑌃 𑌸 𑌭𑌵𑌿𑌷𑍍𑌯𑌤𑌿 ॥ 22 ॥
