𑌨𑌾𑌽𑌹𑌂 𑌦𑍇𑌹𑍋 𑌨𑍇𑌂𑌦𑍍𑌰𑌿𑌯𑌾𑌣𑍍𑌯𑌂𑌤𑌰𑌂𑌗𑌂
𑌨𑌾𑌽𑌹𑌂𑌕𑌾𑌰𑌃 𑌪𑍍𑌰𑌾𑌣𑌵𑌰𑍍𑌗𑍋 𑌨 𑌚𑌾𑌽𑌹𑌮𑍍 ।
𑌦𑌾𑌰𑌾𑌪𑌤𑍍𑌯𑌕𑍍𑌷𑍇𑌤𑍍𑌰𑌵𑌿𑌤𑍍𑌤𑌾𑌦𑌿𑌦𑍂𑌰-
𑌸𑍍𑌸𑌾𑌕𑍍𑌷𑍀 𑌨𑌿𑌤𑍍𑌯𑌃 𑌪𑍍𑌰𑌤𑍍𑌯𑌗𑌾𑌤𑍍𑌮𑌾 𑌶𑌿𑌵𑍋𑌽𑌹𑌮𑍍 ॥ 1 ॥
𑌰𑌜𑍍𑌜𑍍𑌵𑌜𑍍𑌞𑌾𑌨𑌾𑌦𑍍𑌭𑌾𑌤𑌿 𑌰𑌜𑍍𑌜𑍁𑌰𑍍𑌯𑌥𑌾 𑌹𑌿-
𑌸𑍍𑌸𑍍𑌵𑌾𑌤𑍍𑌮𑌾𑌜𑍍𑌞𑌾𑌨𑌾𑌦𑌾𑌤𑍍𑌮𑌨𑍋 𑌜𑍀𑌵𑌭𑌾𑌵𑌃 ।
𑌆𑌪𑍍𑌤𑍋𑌕𑍍𑌤𑍍𑌯𑌾 𑌹𑌿 𑌭𑍍𑌰𑌾𑌂𑌤𑌿𑌨𑌾𑌶𑍇 𑌸 𑌰𑌜𑍍𑌜𑍁-
𑌰𑍍𑌜𑍀𑌵𑍋 𑌨𑌾𑌽𑌹𑌂 𑌦𑍇𑌶𑌿𑌕𑍋𑌕𑍍𑌤𑍍𑌯𑌾 𑌶𑌿𑌵𑍋𑌽𑌹𑌮𑍍 ॥ 2 ॥
𑌅𑌭𑌾𑌤𑍀𑌦𑌂 𑌵𑌿𑌶𑍍𑌵𑌮𑌾𑌤𑍍𑌮𑌨𑍍𑌯𑌸𑌤𑍍𑌯𑌂
𑌸𑌤𑍍𑌯𑌜𑍍𑌞𑌾𑌨𑌾𑌨𑌂𑌦𑌰𑍂𑌪𑍇 𑌵𑌿𑌮𑍋𑌹𑌾𑌤𑍍 ।
𑌨𑌿𑌦𑍍𑌰𑌾𑌮𑍋𑌹𑌾-𑌤𑍍𑌸𑍍𑌵𑌪𑍍𑌨𑌵𑌤𑍍𑌤𑌨𑍍𑌨 𑌸𑌤𑍍𑌤𑍍𑌯𑌂
𑌶𑍁𑌦𑍍𑌧𑌃 𑌪𑍂𑌰𑍍𑌣𑍋 𑌨𑌿𑌤𑍍𑌯 𑌏𑌕𑌶𑍍𑌶𑌿𑌵𑍋𑌽𑌹𑌮𑍍 ॥ 3 ॥
𑌮𑌤𑍍𑌤𑍋 𑌨𑌾𑌨𑍍𑌯𑌤𑍍𑌕𑌿𑌂𑌚𑌿𑌦𑌤𑍍𑌰𑌾𑌪𑍍𑌤𑌿 𑌵𑌿𑌶𑍍𑌵𑌂
𑌸𑌤𑍍𑌯𑌂 𑌬𑌾𑌹𑍍𑌯𑌂 𑌵𑌸𑍍𑌤𑍁𑌮𑌾𑌯𑍋𑌪𑌕𑍍𑌲𑍁𑌪𑍍𑌤𑌮𑍍 ।
𑌆𑌦𑌰𑍍𑌶𑌾𑌂𑌤𑌰𑍍𑌭𑌾𑌸𑌮𑌾𑌨𑌸𑍍𑌯 𑌤𑍁𑌲𑍍𑌯𑌂
𑌮𑌯𑍍𑌯𑌦𑍍𑌵𑍈𑌤𑍇 𑌭𑌾𑌤𑌿 𑌤𑌸𑍍𑌮𑌾𑌚𑍍𑌛𑌿𑌵𑍋𑌽𑌹𑌮𑍍 ॥ 4 ॥
𑌨𑌾𑌽𑌹𑌂 𑌜𑌾𑌤𑍋 𑌨 𑌪𑍍𑌰𑌵𑍃𑌦𑍍𑌧𑍋 𑌨 𑌨𑌷𑍍𑌟𑍋
𑌦𑍇𑌹𑌸𑍍𑌯𑍋𑌕𑍍𑌤𑌾𑌃 𑌪𑍍𑌰𑌾𑌕𑍃𑌤𑌾𑌸𑍍𑌸𑌰𑍍𑌵𑌧𑌰𑍍𑌮𑌾𑌃 ।
𑌕𑌰𑍍𑌤𑍃𑌤𑍍𑌵𑌾𑌦𑌿-𑌶𑍍𑌚𑌿𑌨𑍍𑌮𑌯𑌸𑍍𑌯𑌾𑌸𑍍𑌤𑌿 𑌨𑌾𑌽𑌹𑌂
𑌕𑌾𑌰𑌸𑍍𑌯𑍈𑌵 𑌹𑍍𑌯𑌾𑌤𑍍𑌮𑌨𑍋 𑌮𑍇 𑌶𑌿𑌵𑍋𑌽𑌹𑌮𑍍 ॥ 5 ॥
𑌨𑌾𑌽𑌹𑌂 𑌜𑌾𑌤𑍋 𑌜𑌨𑍍𑌮𑌮𑍃𑌤𑍍𑌯𑍁𑌃 𑌕𑍁𑌤𑍋 𑌮𑍇
𑌨𑌾𑌽𑌹𑌂 𑌪𑍍𑌰𑌾𑌣𑌃 𑌕𑍍𑌷𑍁𑌤𑍍𑌪𑌿𑌪𑌾𑌸𑍇 𑌕𑍁𑌤𑍋 𑌮𑍇 ।
𑌨𑌾𑌽𑌹𑌂 𑌚𑌿𑌤𑍍𑌤𑌂 𑌶𑍋𑌕𑌮𑍋𑌹𑍌 𑌕𑍁𑌤𑍋 𑌮𑍇
𑌨𑌾𑌽𑌹𑌂 𑌕𑌰𑍍𑌤𑌾 𑌬𑌂𑌧𑌮𑍋𑌕𑍍𑌷𑍌 𑌕𑍁𑌤𑍋 𑌮𑍇 ॥ 6 ॥
𑌇𑌤𑌿 𑌶𑍍𑌰𑍀𑌮𑌚𑍍𑌛𑌂𑌕𑌰𑌭𑌵𑌤𑍍𑌪𑌾𑌦𑌾𑌚𑌾𑌰𑍍𑌯 𑌸𑍍𑌵𑌾𑌮𑌿 𑌵𑌿𑌰𑌚𑌿𑌤𑌾𑌤𑍍𑌮𑌪𑌂𑌚𑌕𑌮𑍍 ॥
