ಲೋಕವೀರಂ ಮಹಾಪೂಜ್ಯಂ ಸರ್ವರಕ್ಷಾಕರಂ ವಿಭುಮ್ ।
ಪಾರ್ವತೀ ಹೃದಯಾನನ್ದಂ ಶಾಸ್ತಾರಂ ಪ್ರಣಮಾಮ್ಯಹಮ್ ॥ 1 ॥

ವಿಪ್ರಪೂಜ್ಯಂ ವಿಶ್ವವನ್ದ್ಯಂ ವಿಷ್ಣುಶಮ್ಭೋಃ ಪ್ರಿಯಂ ಸುತಮ್ ।
ಕ್ಷಿಪ್ರಪ್ರಸಾದನಿರತಂ ಶಾಸ್ತಾರಂ ಪ್ರಣಮಾಮ್ಯಹಮ್ ॥ 2 ॥

ಮತ್ತಮಾತಙ್ಗಗಮನಂ ಕಾರುಣ್ಯಾಮೃತಪೂರಿತಮ್ ।
ಸರ್ವವಿಘ್ನಹರಂ ದೇವಂ ಶಾಸ್ತಾರಂ ಪ್ರಣಮಾಮ್ಯಹಮ್ ॥ 3 ॥

ಅಸ್ಮತ್ಕುಲೇಶ್ವರಂ ದೇವಮ್-ಅಸ್ಮಚ್ಛತ್ರು ವಿನಾಶನಮ್ ।
ಅಸ್ಮದಿಷ್ಟಪ್ರದಾತಾರಂ ಶಾಸ್ತಾರಂ ಪ್ರಣಮಾಮ್ಯಹಮ್ ॥ 4 ॥

ಪಾಣ್ಡ್ಯೇಶವಂಶತಿಲಕಂ ಕೇರಲೇ ಕೇಲಿವಿಗ್ರಹಮ್ ।
ಆರ್ತತ್ರಾಣಪರಂ ದೇವಂ ಶಾಸ್ತಾರಂ ಪ್ರಣಮಾಮ್ಯಹಮ್ ॥ 5 ॥

ಪಞ್ಚರತ್ನಾಖ್ಯಮೇತದ್ಯೋ ನಿತ್ಯಂ ಶುದ್ಧಃ ಪಠೇನ್ನರಃ ।
ತಸ್ಯ ಪ್ರಸನ್ನೋ ಭಗವಾನ್ ಶಾಸ್ತಾ ವಸತಿ ಮಾನಸೇ ॥

ಇತಿ ಶ್ರೀ ಶಾಸ್ತಾ ಪಞ್ಚರತ್ನಮ್ ।

——

ಅಥ ಶಾಸ್ತಾ ನಮಸ್ಕಾರ ಶ್ಲೋಕಾಃ ।

ತ್ರಯಮ್ಬಕಪುರಾಧೀಶಂ ಗಣಾಧಿಪಸಮನ್ವಿತಮ್ ।
ಗಜಾರೂಢಮಹಂ ವನ್ದೇ ಶಾಸ್ತಾರಂ ಪ್ರಣಮಾಮ್ಯಹಮ್ ॥ 1 ॥

ಶಿವವೀರ್ಯಸಮುದ್ಭೂತಂ ಶ್ರೀನಿವಾಸತನೂದ್ಭವಮ್ ।
ಶಿಖಿವಾಹಾನುಜಂ ವನ್ದೇ ಶಾಸ್ತಾರಂ ಪ್ರಣಮಾಮ್ಯಹಮ್ ॥ 2 ॥

ಯಸ್ಯ ಧನ್ವನ್ತರಿರ್ಮಾತಾ ಪಿತಾ ದೇವೋ ಮಹೇಶ್ವರಃ ।
ತಂ ಶಾಸ್ತಾರಮಹಂ ವನ್ದೇ ಮಹಾರೋಗನಿವಾರಣಮ್ ॥ 3 ॥

ಭೂತನಾಥ ಸದಾನನ್ದ ಸರ್ವಭೂತದಯಾಪರ ।
ರಕ್ಷ ರಕ್ಷ ಮಹಾಬಾಹೋ ಶಾಸ್ತ್ರೇ ತುಭ್ಯಂ ನಮೋ ನಮಃ ॥ 4 ॥