శ్రీపూర్ణబోధగురుతీర్థపయోబ్ధిపారా
కామారిమాక్షవిషమాక్షశిరః స్పృశన్తీ ।
పూర్వోత్తరామితతరఙ్గచరత్సుహంసా
దేవాళిసేవితపరాఙ్ఘ్రిపయోజలగ్నా ॥ 1 ॥
జీవేశభేదగుణపూర్తిజగత్సుసత్త్వ-
-నీచోచ్చభావముఖనక్రగణైః సమేతా ।
దుర్వాద్యజాపతిగిళైర్గురురాఘవేన్ద్ర-
-వాగ్దేవతాసరిదముం విమలీ కరోతు ॥ 2 ॥
శ్రీరాఘవేన్ద్రః సకలప్రదాతా
స్వపాదకఞ్జద్వయభక్తిమద్భ్యః ।
అఘాద్రిసమ్భేదనదృష్టివజ్రః
క్షమాసురేన్ద్రోఽవతు మాం సదాఽయమ్ ॥ 3 ॥
శ్రీరాఘవేన్ద్రో హరిపాదకఞ్జ-
-నిషేవణాల్లబ్ధసమస్తసమ్పత్ ।
దేవస్వభావో దివిజద్రుమోఽయ-
-మిష్టప్రదో మే సతతం స భూయాత్ ॥ 4 ॥
భవ్యస్వరూపో భవదుఃఖతూల-
-సఙ్ఘాగ్నిచర్యః సుఖధైర్యశాలీ ।
సమస్తదుష్టగ్రహనిగ్రహేశో
దురత్యయోపప్లవసిన్ధుసేతుః ॥ 5 ॥
నిరస్తదోషో నిరవద్యవేషః
ప్రత్యర్థిమూకత్త్వనిదానభాషః ।
విద్వత్పరిజ్ఞేయమహావిశేషో
వాగ్వైఖరీనిర్జితభవ్యశేషః ॥ 6 ॥
సన్తానసమ్పత్పరిశుద్ధభక్తి-
-విజ్ఞానవాగ్దేహసుపాటవాదీన్ ।
దత్వా శరీరోత్థసమస్తదోషాన్
హత్త్వా స నోఽవ్యాద్గురురాఘవేన్ద్రః ॥ 7 ॥
యత్పాదోదకసఞ్చయః సురనదీముఖ్యాపగాసాదితా-
-సఙ్ఖ్యానుత్తమపుణ్యసఙ్ఘవిలసత్ప్రఖ్యాతపుణ్యావహః ।
దుస్తాపత్రయనాశనో భువి మహావన్ధ్యాసుపుత్రప్రదో
వ్యఙ్గస్వఙ్గసమృద్ధిదో గ్రహమహాపాపాపహస్తం శ్రయే ॥ 8 ॥
యత్పాదకఞ్జరజసా పరిభూషితాఙ్గా
యత్పాదపద్మమధుపాయితమానసా యే ।
యత్పాదపద్మపరికీర్తనజీర్ణవాచ
-స్తద్దర్శనం దురితకాననదావభూతమ్ ॥ 9 ॥
సర్వతన్త్రస్వతన్త్రోఽసౌ శ్రీమధ్వమతవర్ధనః
విజయీన్ద్రకరాబ్జోత్థసుధీన్ద్రవరపుత్రకః ॥ 10 ॥
శ్రీరాఘవేన్ద్రో యతిరాట్ గురుర్మే స్యాద్భయాపహః
జ్ఞానభక్తిసుపుత్రాయుర్యశః శ్రీపుణ్యవర్ధనః ॥ 11 ॥
ప్రతివాదిజయస్వాన్తభేదచిహ్నాదరో గురుః ।
సర్వవిద్యాప్రవీణోఽన్యో రాఘవేన్ద్రాన్న విద్యతే ॥ 12 ॥
అపరోక్షీకృతశ్రీశః సముపేక్షితభావజః ।
అపేక్షితప్రదాతాఽన్యో రాఘవేన్ద్రాన్న విద్యతే ॥ 13 ॥
దయాదాక్షిణ్యవైరాగ్యవాక్పాటవముఖాఙ్కితః ।
శాపానుగ్రహశక్తోఽన్యో రాఘవేన్ద్రాన్న విద్యతే ॥ 14 ॥
అజ్ఞానవిస్మృతిభ్రాన్తిసంశయాఽపస్మృతిక్షయాః ।
తన్ద్రాకమ్పవచఃకౌణ్ఠ్యముఖా యే చేన్ద్రియోద్భవాః ।
దోషాస్తే నాశమాయాన్తి రాఘవేన్ద్రప్రసాదతః ॥ 15 ॥
ఓం శ్రీరాఘవేన్ద్రాయ నమః ఇత్యఽష్టాక్షరమన్త్రతః ।
జపితాద్భావితాన్నిత్యం ఇష్టార్థాః స్యుర్న సంశయః ॥ 16 ॥
హన్తు నః కాయజాన్ దోషాన్ ఆత్మాత్మీయసముద్భవాన్ ।
సర్వానపి పుమర్థాంశ్చ దదాతు గురురాత్మవిత్ ॥ 17 ॥
ఇతి కాలత్రయే నిత్యం ప్రార్థనాం యః కరోతి సః ।
ఇహాముత్రాప్తసర్వేష్టో మోదతే నాత్ర సంశయః ॥ 18 ॥
అగమ్యమహిమా లోకే రాఘవేన్ద్రో మహాయశాః ।
శ్రీమధ్వమతదుగ్ధాబ్ధిచన్ద్రోఽవతు సదాఽనఘః ॥ 19 ॥
సర్వయాత్రాఫలావాప్త్యై యథాశక్తిప్రదక్షిణమ్ ।
కరోమి తవ సిద్ధస్య బృన్దావనగతం జలమ్ ॥ 20 ॥
శిరసా ధారయామ్యద్య సర్వతీర్థఫలాప్తయే ।
సర్వాభీష్టార్థసిద్ధ్యర్థం నమస్కారం కరోమ్యహమ్ ।
తవ సఙ్కీర్తనం వేదశాస్త్రార్థజ్ఞానసిద్ధయే ॥ 21 ॥
సంసారేఽక్షయసాగరే ప్రకృతితోఽగాధే సదా దుస్తరే
సర్వావద్యజలగ్రహైరనుపమైః కామాదిభఙ్గాకులే ।
నానావిభ్రమదుర్భ్రమేఽమితభయస్తోమాదిఫేనోత్కటే
దుఃఖోత్కృష్టవిషే సముద్ధర గురో మా మగ్నరూపం సదా ॥ 22 ॥
రాఘవేన్ద్రగురుస్తోత్రం యః పఠేద్భక్తిపూర్వకమ్ ।
తస్య కుష్ఠాదిరోగాణాం నివృత్తిస్త్వరయా భవేత్ ॥ 23 ॥
అన్ధోఽపి దివ్యదృష్టిః స్యాదేడమూకోఽపి వాక్పతిః ।
పూర్ణాయుః పూర్ణసమ్పత్తిః స్తోత్రస్యాఽస్య జపాద్భవేత్ ॥ 24 ॥
యః పిబేజ్జలమేతేన స్తోత్రేణైవాభిమన్త్రితమ్ ।
తస్య కుక్షిగతా దోషాః సర్వే నశ్యన్తి తత్ క్షణాత్ ॥ 25 ॥
యద్వృన్దావనమాసాద్య పఙ్గుః ఖఞ్జోఽపి వా జనః ।
స్తోత్రేణానేన యః కుర్యాత్ ప్రదక్షిణనమస్కృతీ ॥ 26 ॥
స జఙ్ఘాలో భవేదేవ గురురాజప్రసాదతః ।
సోమసూర్యోపరాగే చ పుష్యార్కాదిసమాగమే ॥ 27 ॥
యోఽనుత్తమమిదం స్తోత్రమష్టోత్తరశతం జపేత్ ।
భూతప్రేతపిశాచాది పీడా తస్య న జాయతే ॥ 28 ॥
ఏతత్ స్తోత్రం సముచ్చార్య గురోర్వృన్దావనాన్తికే ।
దీపసంయోజనాజ్జ్ఞానం పుత్రలాభో భవేద్ధ్రువమ్ ॥ 29 ॥
పరవాదిజయో దివ్యజ్ఞానభక్త్యాదివర్ధనమ్ ।
సర్వాభీష్టప్రవృద్ధిః స్యాన్నాత్ర కార్యా విచారణా ॥ 30 ॥
రాజచోరమహావ్యాఘ్రసర్పనక్రాదిపీడనమ్ ।
న జాయతేఽస్య స్తోత్రస్య ప్రభావాన్నాత్ర సంశయః ॥ 31 ॥
యో భక్త్యా గురురాఘవేన్ద్రచరణద్వన్ద్వం స్మరన్ యః పఠేత్
స్తోత్రం దివ్యమిదం సదా న హి భవేత్తస్యాసుఖం కిఞ్చన ।
కిం త్విష్టార్థసమృద్ధిరేవ కమలానాథప్రసాదోదయాత్
కీర్తిర్దిగ్విదితా విభూతిరతులా సాక్షీ హయాస్యోఽత్ర హి ॥ 32 ॥
ఫలశృతిః
ఇతి శ్రీ రాఘవేన్ద్రార్య గురురాజప్రసాదతః ।
కృతం స్తోత్రమిదం పుణ్యం శ్రీమద్భిర్హ్యప్పణాభిదైః ॥
పూజ్యాయ రాఘవేన్ద్రాయ సత్యధర్మరతాయ చ ।
భజతాం కల్పవృక్షాయ నమతాం కామధేనవే ॥
ఆపాదమౌళిపర్యన్తం గురూణామాకృతిం స్మరేత్ ।
తేన విఘ్నః ప్రణశ్యన్తి సిద్ధ్యన్తి చ మనోరథాః ॥
దుర్వాదిధ్వాన్తరవయే వైష్ణవేన్దీవరేన్దవే ।
శ్రీరాఘవేన్ద్ర గురవే నమోఽత్యన్తదయాళవే ॥
మూకోఽపి యత్ప్రసాదేన ముకున్దశయనాయ తే ।
రాజరాజాయతే రిక్తో రాఘవేన్ద్రం తమాశ్రయే ।
ఇతి శ్రీ అప్పణ్ణాచార్యవిరచితం శ్రీరాఘవేన్ద్ర స్తోత్రం సమ్పూర్ణమ్ ॥
