যো নিত্যমচ্যুতপদাংবুজযুগ্মরুক্ম
ব্যামোহতস্তদিতরাণি তৃণায মেনে ।
অস্মদ্গুরোর্ভগবতোঽস্য দযৈকসিংধোঃ
রামানুজস্য চরণৌ শরণং প্রপদ্যে ॥
বংদে বেদাংতকর্পূরচামীকর করংডকম্ ।
রামানুজার্যমার্যাণাং চূডামণিমহর্নিশম্ ॥
ওম্ ॥ ভগবন্নারাযণাভিমতানুরূপ স্বরূপরূপ গুণবিভবৈশ্বর্য শীলাদ্যনবধিকাতিশয অসংখ্যেয কল্যাণগুণগণাং পদ্মবনালযাং ভগবতীং শ্রিযং দেবীং নিত্যানপাযিনীং নিরবদ্যাং দেবদেবদিব্যমহিষীং অখিলজগন্মাতরং অস্মন্মাতরং অশরণ্যশরণ্যাং অনন্যশরণঃ শরণমহং প্রপদ্যে ॥
পারমার্থিক ভগবচ্চরণারবিংদ যুগলৈকাংতিকাত্যংতিক পরভক্তি পরজ্ঞান পরমভক্তিকৃত পরিপূর্ণানবরত নিত্যবিশদতমানন্য প্রযোজনানবধিকাতিশয প্রিয ভগবদনুভবজনিতানবধিকাতিশয প্রীতিকারিতাশেষাবস্থোচিত অশেষশেষতৈকরতিরূপ নিত্যকৈংকর্যপ্রাপ্ত্যপেক্ষযা পারমার্থিকী ভগবচ্চরণারবিংদ শরণাগতিঃ যথাবস্থিতা অবিরতাঽস্তু মে ॥
অস্তু তে । তযৈব সর্বং সংপত্স্যতে ॥
অখিলহেযপ্রত্যনীক কল্যাণৈকতান, স্বেতর সমস্তবস্তুবিলক্ষণানংত জ্ঞানানংদৈকস্বরূপ, স্বাভিমতানুরূপৈকরূপাচিংত্য দিব্যাদ্ভুত নিত্যনিরবদ্য নিরতিশযৌজ্জ্বল্য সৌংদর্য সৌগংধ্য সৌকুমার্য লাবণ্য যৌবনাদ্যনংতগুণনিধি দিব্যরূপ, স্বাভাবিকানবধিকাতিশয জ্ঞান বলৈশ্বর্য বীর্য শক্তি তেজস্সৌশীল্য বাত্সল্য মার্দবার্জব সৌহার্দ সাম্য কারুণ্য মাধুর্য গাংভীর্যৌদার্য চাতুর্য স্থৈর্য ধৈর্য শৌর্য পরাক্রম সত্যকাম সত্যসংকল্প কৃতিত্ব কৃতজ্ঞতাদ্যসংখ্যেয কল্যাণগুণগণৌঘ মহার্ণব,
স্বোচিত বিবিধ বিচিত্রানংতাশ্চর্য নিত্য নিরবদ্য নিরতিশয সুগংধ নিরতিশয সুখস্পর্শ নিরতিশযৌজ্জ্বল্য কিরীট মকুট চূডাবতংস মকরকুংডল গ্রৈবেযক হার কেযূর কটক শ্রীবত্স কৌস্তুভ মুক্তাদামোদরবংধন পীতাংবর কাংচীগুণ নূপুরাদ্যপরিমিত দিব্যভূষণ, স্বানুরূপাচিংত্যশক্তি শংখচক্রগদাঽসি শারংগাদ্যসংখ্যেয
নিত্যনিরবদ্য নিরতিশয কল্যাণদিব্যাযুধ,
স্বাভিমত নিত্যনিরবদ্যানুরূপ স্বরূপরূপগুণ বিভবৈশ্বর্য শীলাদ্যনবধিকাতিশযাসংখ্যেয কল্যাণগুণগণশ্রীবল্লভ, এবংভূত ভূমিনীলানাযক, স্বচ্ছংদানুবর্তি স্বরূপস্থিতি প্রবৃত্তিভেদাশেষ শেষতৈকরতিরূপ
নিত্যনিরবদ্যনিরতিশয জ্ঞান ক্রিযৈশ্বর্যাদ্যনংত কল্যাণগুণগণ শেষ শেষাশন
গরুডপ্রমুখ নানাবিধানংত পরিজন পরিচারিকা পরিচরিত চরণযুগল, পরমযোগি বাঙ্মনসাঽপরিচ্ছেদ্য স্বরূপ স্বভাব স্বাভিমত বিবিধবিচিত্রানংতভোগ্য ভোগোপকরণ ভোগস্থান সমৃদ্ধানংতাশ্চর্যানংত মহাবিভবানংত পরিমাণ নিত্য নিরবদ্য নিরতিশয শ্রীবৈকুংঠনাথ, স্বসংকল্পানুবিধাযি স্বরূপস্থিতি প্রবৃত্তি স্বশেষতৈকস্বভাব প্রকৃতি পুরুষ কালাত্মক বিবিধ বিচিত্রানংত ভোগ্য ভোক্তৃবর্গ ভোগোপকরণ ভোগস্থানরূপ
নিখিলজগদুদয বিভব লযলীল, সত্যকাম, সত্যসংকল্প, পরব্রহ্মভূত, পুরুষোত্তম,মহাবিভূতে,
শ্রীমন্ নারাযণ, বৈকুংঠনাথ, অপার কারুণ্য সৌশীল্য বাত্সল্যৌদার্যৈশ্বর্য সৌংদর্য মহোদধে, অনালোচিতবিশেষাশেষলোক শরণ্য, প্রণতার্তিহর, আশ্রিত বাত্সল্যৈকজলধে, অনবরতবিদিত নিখিলভূতজাতযাথাত্ম্য, অশেষচরাচরভূত নিখিলনিযমন নিরত, অশেষচিদচিদ্বস্তু শেষিভূত, নিখিলজগদাধার, অখিলজগত্স্বামিন্, অস্মত্স্বামিন্, সত্যকাম,
সত্যসংকল্প, সকলেতরবিলক্ষণ, অর্থিকল্পক, আপত্সখ, শ্রীমন্, নারাযণ, অশরণ্যশরণ্য, অনন্যশরণস্ত্বত্পাদারবিংদ যুগলং শরণমহং প্রপদ্যে ॥
অত্র দ্বযম্ ।
পিতরং মাতরং দারান্ পুত্রান্ বংধূন্ সখীন্ গুরূন্ ।
রত্নানি ধনধান্যানি ক্ষেত্রাণি চ গৃহাণি চ ॥ 1
সর্বধর্মাংশ্চ সংত্যজ্য সর্বকামাংশ্চ সাক্ষরান্ ।
লোকবিক্রাংতচরণৌ শরণং তেঽব্রজং বিভো ॥ 2
ত্বমেব মাতা চ পিতা ত্বমেব
ত্বমেব বংধুশ্চ গুরুস্ত্বমেব ।
ত্বমেব বিদ্যা দ্রবিণং ত্বমেব
ত্বমেব সর্বং মম দেবদেব ॥ 3
পিতাঽসি লোকস্য চরাচরস্য
ত্বমস্য পূজ্যশ্চ গুরুর্গরীযান্ ।
ন ত্বত্সমোঽস্ত্যভ্যধিকঃ কুতোঽন্যো
লোকত্রযেঽপ্যপ্রতিমপ্রভাব ॥ 4
তস্মাত্প্রণম্য প্রণিধায কাযং
প্রসাদযে ত্বামহমীশমীড্যম্ ।
পিতেব পুত্রস্য সখেব সখ্যুঃ
প্রিযঃ প্রিযাযার্হসি দেব সোঢুম্ ॥
মনোবাক্কাযৈরনাদিকাল প্রবৃত্তানংতাকৃত্যকরণ কৃত্যাকরণ ভগবদপচার ভাগবতাপচারাসহ্যাপচাররূপ নানাবিধানংতাপচারান্ আরব্ধকার্যান্ অনারব্ধকার্যান্ কৃতান্ ক্রিযমাণান্ করিষ্যমাণাংশ্চ সর্বানশেষতঃ ক্ষমস্ব ।
অনাদিকালপ্রবৃত্তবিপরীত জ্ঞানমাত্মবিষযং কৃত্স্ন জগদ্বিষযং চ বিপরীতবৃত্তং চাশেষবিষযমদ্যাপি বর্তমানং বর্তিষ্যমাণং চ সর্বং ক্ষমস্ব ।
মদীযানাদিকর্ম প্রবাহপ্রবৃত্তাং ভগবত্স্বরূপ তিরোধানকরীং বিপরীতজ্ঞানজননীং স্ববিষযাযাশ্চ ভোগ্যবুদ্ধের্জননীং দেহেংদ্রিযত্বেন ভোগ্যত্বেন সূক্ষ্মরূপেণ চাবস্থিতাং দৈবীং গুণমযীং মাযাং দাসভূতং শরণাগতোঽস্মি তবাস্মি দাসঃ ইতি বক্তারং মাং তারয ।
তেষাং জ্ঞানী নিত্যযুক্তঃ একভক্তির্বিশিষ্যতে ।
প্রিযো হি জ্ঞানিনোঽত্যর্থমহং স চ মম প্রিযঃ ॥
উদারাঃ সর্ব এবৈতে জ্ঞানী ত্বাত্মৈব মে মতম্ ।
আস্থিতঃ স হি যুক্তাত্মা মামেবানুত্তমাং গতিম্ ॥
বহূনাং জন্মনামংতে জ্ঞানবান্মাং প্রপদ্যতে ।
বাসুদেবঃ সর্বমিতি স মহাত্মা সুদুর্লভঃ ॥
ইতি শ্লোকত্রযোদিতজ্ঞানিনং মাং কুরুষ্ব ।
পুরুষঃ স পরঃ পার্থ ভক্ত্যা লভ্যস্ত্বনন্যযা ।
ভক্ত্যা ত্বনন্যযা শক্যঃ মদ্ভক্তিং লভতে পরাম্ ।
ইতি স্থানত্রযোদিত পরভক্তিযুক্তং মাং কুরুষ্ব ।
পরভক্তি পরজ্ঞান পরমভক্ত্যেকস্বভাবং মাং কুরুষ্ব ।
পরভক্তি পরজ্ঞান পরমভক্তিকৃত পরিপূর্ণানবরত নিত্যবিশদতমানন্য প্রযোজনানবধিকাতিশয প্রিয ভগবদনুভবোঽহং তথাবিধ ভগবদনুভব জনিতানবধিকাতিশয প্রীতিকারিতাশেষাবস্থোচিতাশেষ শেষতৈকরতিরূপ নিত্যকিংকরো ভবানি ।
এবংভূত মত্কৈংকর্যপ্রাপ্ত্যুপাযতযাঽবক্লুপ্তসমস্ত বস্তুবিহীনোঽপি, অনংত তদ্বিরোধিপাপাক্রাংতোঽপি, অনংত মদপচারযুক্তোঽপি, অনংত মদীযাপচারযুক্তোঽপি, অনংতাসহ্যাপচার যুক্তোঽপি, এতত্কার্যকারণ ভূতানাদি বিপরীতাহংকার বিমূঢাত্ম স্বভাবোঽপি, এতদুভযকার্যকারণভূতানাদি বিপরীতবাসনা সংবদ্ধোঽপি, এতদনুগুণ প্রকৃতি বিশেষসংবদ্ধোঽপি, এতন্মূলাধ্যাত্মিকাধিভৌতিকাধিদৈবিক সুখদুঃখ তদ্ধেতু
তদিতরোপেক্ষণীয বিষযানুভব জ্ঞানসংকোচরূপ মচ্চরণারবিংদযুগলৈকাংতিকাত্যংতিক পরভক্তি পরজ্ঞান পরমভক্তি বিঘ্নপ্রতিহতোঽপি, যেন কেনাপি প্রকারেণ দ্বযবক্তা ত্বং কেবলং মদীযযৈব দযযা নিশ্শেষবিনষ্ট সহেতুক মচ্চরণারবিংদযুগলৈকাংতিকাত্যংতিক পরভক্তি পরজ্ঞান পরমভক্তিবিঘ্নঃ মত্প্রসাদলব্ধ মচ্চরণারবিংদযুগলৈকাংতিকাত্যংতিক পরভক্তি পরজ্ঞান পরমভক্তিঃ মত্প্রসাদাদেব সাক্ষাত্কৃত যথাবস্থিত মত্স্বরূপরূপগুণবিভূতি লীলোপকরণবিস্তারঃ অপরোক্ষসিদ্ধ মন্নিযাম্যতা মদ্দাস্যৈক স্বভাবাত্ম স্বরূপঃ মদেকানুভবঃ মদ্দাস্যৈকপ্রিযঃ পরিপূর্ণানবরত নিত্যবিশদতমানন্য প্রযোজনানবধিকাতিশযপ্রিয মদনুভবস্ত্বং তথাবিধ মদনুভব জনিতানবধিকাতিশয প্রীতিকারিতাশেষাবস্থোচিতাশেষ শেষতৈকরতিরূপ নিত্যকিংকরো ভব ।
এবংভূতোঽসি । আধ্যাত্মিকাধিভৌতিকাধিদৈবিক দুঃখবিঘ্নগংধরহিতস্ত্বং দ্বযমর্থানুসংধানেন সহ সদৈবং বক্তা যাবচ্ছরীরপাতমত্রৈব শ্রীরংগে সুখমাস্ব ॥
শরীরপাতসমযে তু কেবলং মদীযযৈব দযযাঽতিপ্রবুদ্ধঃ মামেবাবলোকযন্ অপ্রচ্যুত পূর্বসংস্কারমনোরথঃ জীর্ণমিব বস্ত্রং সুখেনেমাং প্রকৃতিং স্থূলসূক্ষ্মরূপাং বিসৃজ্য তদানীমেব মত্প্রসাদলব্ধ মচ্চরণারবিংদ যুগলৈকাংতিকাত্যংতিক পরভক্তি পরজ্ঞান পরমভক্তিকৃত পরিপূর্ণানবরত নিত্যবিশদতমানন্য প্রযোজনানবধিকাতিশয প্রিয মদনুভবস্ত্বং তথাবিধ মদনুভবজনিতানবধিকাতিশয প্রীতিকারিতাশেষাবস্থোচিতাশেষশেষতৈক রতিরূপ নিত্যকিংকরো ভবিষ্যসি । মাতেঽভূদত্র সংশযঃ ।
অনৃতং নোক্তপূর্বং মে ন চ বক্ষ্যে কদাচন ।
রামো দ্বির্নাভিভাষতে ।
সকৃদেব প্রপন্নায তবাস্মীতি চ যাচতে ।
অভযং সর্বভূতেভ্যো দদাম্যেতদ্ব্রতং মম ॥
সর্বধর্মান্ পরিত্যজ্য মামেকং শরণং ব্রজ ।
অহং ত্বা সর্বপাপেভ্যো মোক্ষযিষ্যামি মা শুচঃ ॥
ইতি মযৈব হ্যুক্তম্ ।
অতস্ত্বং তব তত্ত্বতো মত্ জ্ঞানদর্শন প্রাপ্তিষু নিস্সংশযঃ সুখমাস্ব ॥
অংত্যকালে স্মৃতির্যাতু তব কৈংকর্যকারিতা ।
তামেনাং ভগবন্নদ্য ক্রিযমাণাং কুরুষ্ব মে ॥
ইতি শ্রীভগবদ্রামানুজ বিরচিতং শরণাগতি গদ্যম্ ।
