ୟୋ ନିତ୍ୟମଚ୍ୟୁତପଦାଂବୁଜୟୁଗ୍ମରୁକ୍ମ
ଵ୍ୟାମୋହତସ୍ତଦିତରାଣି ତୃଣାୟ ମେନେ ।
ଅସ୍ମଦ୍ଗୁରୋର୍ଭଗଵତୋଽସ୍ୟ ଦୟୈକସିଂଧୋଃ
ରାମାନୁଜସ୍ୟ ଚରଣୌ ଶରଣଂ ପ୍ରପଦ୍ୟେ ॥
ଵଂଦେ ଵେଦାଂତକର୍ପୂରଚାମୀକର କରଂଡକମ୍ ।
ରାମାନୁଜାର୍ୟମାର୍ୟାଣାଂ ଚୂଡାମଣିମହର୍ନିଶମ୍ ॥
ଓମ୍ ॥ ଭଗଵନ୍ନାରାୟଣାଭିମତାନୁରୂପ ସ୍ଵରୂପରୂପ ଗୁଣଵିଭଵୈଶ୍ଵର୍ୟ ଶୀଲାଦ୍ୟନଵଧିକାତିଶୟ ଅସଂଖ୍ୟେୟ କଲ୍ୟାଣଗୁଣଗଣାଂ ପଦ୍ମଵନାଲୟାଂ ଭଗଵତୀଂ ଶ୍ରିୟଂ ଦେଵୀଂ ନିତ୍ୟାନପାୟିନୀଂ ନିରଵଦ୍ୟାଂ ଦେଵଦେଵଦିଵ୍ୟମହିଷୀଂ ଅଖିଲଜଗନ୍ମାତରଂ ଅସ୍ମନ୍ମାତରଂ ଅଶରଣ୍ୟଶରଣ୍ୟାଂ ଅନନ୍ୟଶରଣଃ ଶରଣମହଂ ପ୍ରପଦ୍ୟେ ॥
ପାରମାର୍ଥିକ ଭଗଵଚ୍ଚରଣାରଵିଂଦ ୟୁଗଳୈକାଂତିକାତ୍ୟଂତିକ ପରଭକ୍ତି ପରଜ୍ଞାନ ପରମଭକ୍ତିକୃତ ପରିପୂର୍ଣାନଵରତ ନିତ୍ୟଵିଶଦତମାନନ୍ୟ ପ୍ରୟୋଜନାନଵଧିକାତିଶୟ ପ୍ରିୟ ଭଗଵଦନୁଭଵଜନିତାନଵଧିକାତିଶୟ ପ୍ରୀତିକାରିତାଶେଷାଵସ୍ଥୋଚିତ ଅଶେଷଶେଷତୈକରତିରୂପ ନିତ୍ୟକୈଂକର୍ୟପ୍ରାପ୍ତ୍ୟପେକ୍ଷୟା ପାରମାର୍ଥିକୀ ଭଗଵଚ୍ଚରଣାରଵିଂଦ ଶରଣାଗତିଃ ୟଥାଵସ୍ଥିତା ଅଵିରତାଽସ୍ତୁ ମେ ॥
ଅସ୍ତୁ ତେ । ତୟୈଵ ସର୍ଵଂ ସଂପତ୍ସ୍ୟତେ ॥
ଅଖିଲହେୟପ୍ରତ୍ୟନୀକ କଲ୍ୟାଣୈକତାନ, ସ୍ଵେତର ସମସ୍ତଵସ୍ତୁଵିଲକ୍ଷଣାନଂତ ଜ୍ଞାନାନଂଦୈକସ୍ଵରୂପ, ସ୍ଵାଭିମତାନୁରୂପୈକରୂପାଚିଂତ୍ୟ ଦିଵ୍ୟାଦ୍ଭୁତ ନିତ୍ୟନିରଵଦ୍ୟ ନିରତିଶୟୌଜ୍ଜ୍ଵଲ୍ୟ ସୌଂଦର୍ୟ ସୌଗଂଧ୍ୟ ସୌକୁମାର୍ୟ ଲାଵଣ୍ୟ ୟୌଵନାଦ୍ୟନଂତଗୁଣନିଧି ଦିଵ୍ୟରୂପ, ସ୍ଵାଭାଵିକାନଵଧିକାତିଶୟ ଜ୍ଞାନ ବଲୈଶ୍ଵର୍ୟ ଵୀର୍ୟ ଶକ୍ତି ତେଜସ୍ସୌଶୀଲ୍ୟ ଵାତ୍ସଲ୍ୟ ମାର୍ଦଵାର୍ଜଵ ସୌହାର୍ଦ ସାମ୍ୟ କାରୁଣ୍ୟ ମାଧୁର୍ୟ ଗାଂଭୀର୍ୟୌଦାର୍ୟ ଚାତୁର୍ୟ ସ୍ଥୈର୍ୟ ଧୈର୍ୟ ଶୌର୍ୟ ପରାକ୍ରମ ସତ୍ୟକାମ ସତ୍ୟସଂକଲ୍ପ କୃତିତ୍ଵ କୃତଜ୍ଞତାଦ୍ୟସଂଖ୍ୟେୟ କଲ୍ୟାଣଗୁଣଗଣୌଘ ମହାର୍ଣଵ,
ସ୍ଵୋଚିତ ଵିଵିଧ ଵିଚିତ୍ରାନଂତାଶ୍ଚର୍ୟ ନିତ୍ୟ ନିରଵଦ୍ୟ ନିରତିଶୟ ସୁଗଂଧ ନିରତିଶୟ ସୁଖସ୍ପର୍ଶ ନିରତିଶୟୌଜ୍ଜ୍ଵଲ୍ୟ କିରୀଟ ମକୁଟ ଚୂଡାଵତଂସ ମକରକୁଂଡଲ ଗ୍ରୈଵେୟକ ହାର କେୟୂର କଟକ ଶ୍ରୀଵତ୍ସ କୌସ୍ତୁଭ ମୁକ୍ତାଦାମୋଦରବଂଧନ ପୀତାଂବର କାଂଚୀଗୁଣ ନୂପୁରାଦ୍ୟପରିମିତ ଦିଵ୍ୟଭୂଷଣ, ସ୍ଵାନୁରୂପାଚିଂତ୍ୟଶକ୍ତି ଶଂଖଚକ୍ରଗଦାଽସି ଶାରଂଗାଦ୍ୟସଂଖ୍ୟେୟ
ନିତ୍ୟନିରଵଦ୍ୟ ନିରତିଶୟ କଲ୍ୟାଣଦିଵ୍ୟାୟୁଧ,
ସ୍ଵାଭିମତ ନିତ୍ୟନିରଵଦ୍ୟାନୁରୂପ ସ୍ଵରୂପରୂପଗୁଣ ଵିଭଵୈଶ୍ଵର୍ୟ ଶୀଲାଦ୍ୟନଵଧିକାତିଶୟାସଂଖ୍ୟେୟ କଲ୍ୟାଣଗୁଣଗଣଶ୍ରୀଵଲ୍ଲଭ, ଏଵଂଭୂତ ଭୂମିନୀଳାନାୟକ, ସ୍ଵଚ୍ଛଂଦାନୁଵର୍ତି ସ୍ଵରୂପସ୍ଥିତି ପ୍ରଵୃତ୍ତିଭେଦାଶେଷ ଶେଷତୈକରତିରୂପ
ନିତ୍ୟନିରଵଦ୍ୟନିରତିଶୟ ଜ୍ଞାନ କ୍ରିୟୈଶ୍ଵର୍ୟାଦ୍ୟନଂତ କଲ୍ୟାଣଗୁଣଗଣ ଶେଷ ଶେଷାଶନ
ଗରୁଡପ୍ରମୁଖ ନାନାଵିଧାନଂତ ପରିଜନ ପରିଚାରିକା ପରିଚରିତ ଚରଣୟୁଗଳ, ପରମୟୋଗି ଵାଙ୍ମନସାଽପରିଚ୍ଛେଦ୍ୟ ସ୍ଵରୂପ ସ୍ଵଭାଵ ସ୍ଵାଭିମତ ଵିଵିଧଵିଚିତ୍ରାନଂତଭୋଗ୍ୟ ଭୋଗୋପକରଣ ଭୋଗସ୍ଥାନ ସମୃଦ୍ଧାନଂତାଶ୍ଚର୍ୟାନଂତ ମହାଵିଭଵାନଂତ ପରିମାଣ ନିତ୍ୟ ନିରଵଦ୍ୟ ନିରତିଶୟ ଶ୍ରୀଵୈକୁଂଠନାଥ, ସ୍ଵସଂକଲ୍ପାନୁଵିଧାୟି ସ୍ଵରୂପସ୍ଥିତି ପ୍ରଵୃତ୍ତି ସ୍ଵଶେଷତୈକସ୍ଵଭାଵ ପ୍ରକୃତି ପୁରୁଷ କାଲାତ୍ମକ ଵିଵିଧ ଵିଚିତ୍ରାନଂତ ଭୋଗ୍ୟ ଭୋକ୍ତୃଵର୍ଗ ଭୋଗୋପକରଣ ଭୋଗସ୍ଥାନରୂପ
ନିଖିଲଜଗଦୁଦୟ ଵିଭଵ ଲୟଲୀଲ, ସତ୍ୟକାମ, ସତ୍ୟସଂକଲ୍ପ, ପରବ୍ରହ୍ମଭୂତ, ପୁରୁଷୋତ୍ତମ,ମହାଵିଭୂତେ,
ଶ୍ରୀମନ୍ ନାରାୟଣ, ଵୈକୁଂଠନାଥ, ଅପାର କାରୁଣ୍ୟ ସୌଶୀଲ୍ୟ ଵାତ୍ସଲ୍ୟୌଦାର୍ୟୈଶ୍ଵର୍ୟ ସୌଂଦର୍ୟ ମହୋଦଧେ, ଅନାଲୋଚିତଵିଶେଷାଶେଷଲୋକ ଶରଣ୍ୟ, ପ୍ରଣତାର୍ତିହର, ଆଶ୍ରିତ ଵାତ୍ସଲ୍ୟୈକଜଲଧେ, ଅନଵରତଵିଦିତ ନିଖିଲଭୂତଜାତୟାଥାତ୍ମ୍ୟ, ଅଶେଷଚରାଚରଭୂତ ନିଖିଲନିୟମନ ନିରତ, ଅଶେଷଚିଦଚିଦ୍ଵସ୍ତୁ ଶେଷିଭୂତ, ନିଖିଲଜଗଦାଧାର, ଅଖିଲଜଗତ୍ସ୍ଵାମିନ୍, ଅସ୍ମତ୍ସ୍ଵାମିନ୍, ସତ୍ୟକାମ,
ସତ୍ୟସଂକଲ୍ପ, ସକଲେତରଵିଲକ୍ଷଣ, ଅର୍ଥିକଲ୍ପକ, ଆପତ୍ସଖ, ଶ୍ରୀମନ୍, ନାରାୟଣ, ଅଶରଣ୍ୟଶରଣ୍ୟ, ଅନନ୍ୟଶରଣସ୍ତ୍ଵତ୍ପାଦାରଵିଂଦ ୟୁଗଳଂ ଶରଣମହଂ ପ୍ରପଦ୍ୟେ ॥
ଅତ୍ର ଦ୍ଵୟମ୍ ।
ପିତରଂ ମାତରଂ ଦାରାନ୍ ପୁତ୍ରାନ୍ ବଂଧୂନ୍ ସଖୀନ୍ ଗୁରୂନ୍ ।
ରତ୍ନାନି ଧନଧାନ୍ୟାନି କ୍ଷେତ୍ରାଣି ଚ ଗୃହାଣି ଚ ॥ 1
ସର୍ଵଧର୍ମାଂଶ୍ଚ ସଂତ୍ୟଜ୍ୟ ସର୍ଵକାମାଂଶ୍ଚ ସାକ୍ଷରାନ୍ ।
ଲୋକଵିକ୍ରାଂତଚରଣୌ ଶରଣଂ ତେଽଵ୍ରଜଂ ଵିଭୋ ॥ 2
ତ୍ଵମେଵ ମାତା ଚ ପିତା ତ୍ଵମେଵ
ତ୍ଵମେଵ ବଂଧୁଶ୍ଚ ଗୁରୁସ୍ତ୍ଵମେଵ ।
ତ୍ଵମେଵ ଵିଦ୍ୟା ଦ୍ରଵିଣଂ ତ୍ଵମେଵ
ତ୍ଵମେଵ ସର୍ଵଂ ମମ ଦେଵଦେଵ ॥ 3
ପିତାଽସି ଲୋକସ୍ୟ ଚରାଚରସ୍ୟ
ତ୍ଵମସ୍ୟ ପୂଜ୍ୟଶ୍ଚ ଗୁରୁର୍ଗରୀୟାନ୍ ।
ନ ତ୍ଵତ୍ସମୋଽସ୍ତ୍ୟଭ୍ୟଧିକଃ କୁତୋଽନ୍ୟୋ
ଲୋକତ୍ରୟେଽପ୍ୟପ୍ରତିମପ୍ରଭାଵ ॥ 4
ତସ୍ମାତ୍ପ୍ରଣମ୍ୟ ପ୍ରଣିଧାୟ କାୟଂ
ପ୍ରସାଦୟେ ତ୍ଵାମହମୀଶମୀଡ୍ୟମ୍ ।
ପିତେଵ ପୁତ୍ରସ୍ୟ ସଖେଵ ସଖ୍ୟୁଃ
ପ୍ରିୟଃ ପ୍ରିୟାୟାର୍ହସି ଦେଵ ସୋଢୁମ୍ ॥
ମନୋଵାକ୍କାୟୈରନାଦିକାଲ ପ୍ରଵୃତ୍ତାନଂତାକୃତ୍ୟକରଣ କୃତ୍ୟାକରଣ ଭଗଵଦପଚାର ଭାଗଵତାପଚାରାସହ୍ୟାପଚାରରୂପ ନାନାଵିଧାନଂତାପଚାରାନ୍ ଆରବ୍ଧକାର୍ୟାନ୍ ଅନାରବ୍ଧକାର୍ୟାନ୍ କୃତାନ୍ କ୍ରିୟମାଣାନ୍ କରିଷ୍ୟମାଣାଂଶ୍ଚ ସର୍ଵାନଶେଷତଃ କ୍ଷମସ୍ଵ ।
ଅନାଦିକାଲପ୍ରଵୃତ୍ତଵିପରୀତ ଜ୍ଞାନମାତ୍ମଵିଷୟଂ କୃତ୍ସ୍ନ ଜଗଦ୍ଵିଷୟଂ ଚ ଵିପରୀତଵୃତ୍ତଂ ଚାଶେଷଵିଷୟମଦ୍ୟାପି ଵର୍ତମାନଂ ଵର୍ତିଷ୍ୟମାଣଂ ଚ ସର୍ଵଂ କ୍ଷମସ୍ଵ ।
ମଦୀୟାନାଦିକର୍ମ ପ୍ରଵାହପ୍ରଵୃତ୍ତାଂ ଭଗଵତ୍ସ୍ଵରୂପ ତିରୋଧାନକରୀଂ ଵିପରୀତଜ୍ଞାନଜନନୀଂ ସ୍ଵଵିଷୟାୟାଶ୍ଚ ଭୋଗ୍ୟବୁଦ୍ଧେର୍ଜନନୀଂ ଦେହେଂଦ୍ରିୟତ୍ଵେନ ଭୋଗ୍ୟତ୍ଵେନ ସୂକ୍ଷ୍ମରୂପେଣ ଚାଵସ୍ଥିତାଂ ଦୈଵୀଂ ଗୁଣମୟୀଂ ମାୟାଂ ଦାସଭୂତଂ ଶରଣାଗତୋଽସ୍ମି ତଵାସ୍ମି ଦାସଃ ଇତି ଵକ୍ତାରଂ ମାଂ ତାରୟ ।
ତେଷାଂ ଜ୍ଞାନୀ ନିତ୍ୟୟୁକ୍ତଃ ଏକଭକ୍ତିର୍ଵିଶିଷ୍ୟତେ ।
ପ୍ରିୟୋ ହି ଜ୍ଞାନିନୋଽତ୍ୟର୍ଥମହଂ ସ ଚ ମମ ପ୍ରିୟଃ ॥
ଉଦାରାଃ ସର୍ଵ ଏଵୈତେ ଜ୍ଞାନୀ ତ୍ଵାତ୍ମୈଵ ମେ ମତମ୍ ।
ଆସ୍ଥିତଃ ସ ହି ୟୁକ୍ତାତ୍ମା ମାମେଵାନୁତ୍ତମାଂ ଗତିମ୍ ॥
ବହୂନାଂ ଜନ୍ମନାମଂତେ ଜ୍ଞାନଵାନ୍ମାଂ ପ୍ରପଦ୍ୟତେ ।
ଵାସୁଦେଵଃ ସର୍ଵମିତି ସ ମହାତ୍ମା ସୁଦୁର୍ଲଭଃ ॥
ଇତି ଶ୍ଲୋକତ୍ରୟୋଦିତଜ୍ଞାନିନଂ ମାଂ କୁରୁଷ୍ଵ ।
ପୁରୁଷଃ ସ ପରଃ ପାର୍ଥ ଭକ୍ତ୍ୟା ଲଭ୍ୟସ୍ତ୍ଵନନ୍ୟୟା ।
ଭକ୍ତ୍ୟା ତ୍ଵନନ୍ୟୟା ଶକ୍ୟଃ ମଦ୍ଭକ୍ତିଂ ଲଭତେ ପରାମ୍ ।
ଇତି ସ୍ଥାନତ୍ରୟୋଦିତ ପରଭକ୍ତିୟୁକ୍ତଂ ମାଂ କୁରୁଷ୍ଵ ।
ପରଭକ୍ତି ପରଜ୍ଞାନ ପରମଭକ୍ତ୍ୟେକସ୍ଵଭାଵଂ ମାଂ କୁରୁଷ୍ଵ ।
ପରଭକ୍ତି ପରଜ୍ଞାନ ପରମଭକ୍ତିକୃତ ପରିପୂର୍ଣାନଵରତ ନିତ୍ୟଵିଶଦତମାନନ୍ୟ ପ୍ରୟୋଜନାନଵଧିକାତିଶୟ ପ୍ରିୟ ଭଗଵଦନୁଭଵୋଽହଂ ତଥାଵିଧ ଭଗଵଦନୁଭଵ ଜନିତାନଵଧିକାତିଶୟ ପ୍ରୀତିକାରିତାଶେଷାଵସ୍ଥୋଚିତାଶେଷ ଶେଷତୈକରତିରୂପ ନିତ୍ୟକିଂକରୋ ଭଵାନି ।
ଏଵଂଭୂତ ମତ୍କୈଂକର୍ୟପ୍ରାପ୍ତ୍ୟୁପାୟତୟାଽଵକ୍ଲୁପ୍ତସମସ୍ତ ଵସ୍ତୁଵିହୀନୋଽପି, ଅନଂତ ତଦ୍ଵିରୋଧିପାପାକ୍ରାଂତୋଽପି, ଅନଂତ ମଦପଚାରୟୁକ୍ତୋଽପି, ଅନଂତ ମଦୀୟାପଚାରୟୁକ୍ତୋଽପି, ଅନଂତାସହ୍ୟାପଚାର ୟୁକ୍ତୋଽପି, ଏତତ୍କାର୍ୟକାରଣ ଭୂତାନାଦି ଵିପରୀତାହଂକାର ଵିମୂଢାତ୍ମ ସ୍ଵଭାଵୋଽପି, ଏତଦୁଭୟକାର୍ୟକାରଣଭୂତାନାଦି ଵିପରୀତଵାସନା ସଂବଦ୍ଧୋଽପି, ଏତଦନୁଗୁଣ ପ୍ରକୃତି ଵିଶେଷସଂବଦ୍ଧୋଽପି, ଏତନ୍ମୂଲାଧ୍ୟାତ୍ମିକାଧିଭୌତିକାଧିଦୈଵିକ ସୁଖଦୁଃଖ ତଦ୍ଧେତୁ
ତଦିତରୋପେକ୍ଷଣୀୟ ଵିଷୟାନୁଭଵ ଜ୍ଞାନସଂକୋଚରୂପ ମଚ୍ଚରଣାରଵିଂଦୟୁଗଳୈକାଂତିକାତ୍ୟଂତିକ ପରଭକ୍ତି ପରଜ୍ଞାନ ପରମଭକ୍ତି ଵିଘ୍ନପ୍ରତିହତୋଽପି, ୟେନ କେନାପି ପ୍ରକାରେଣ ଦ୍ଵୟଵକ୍ତା ତ୍ଵଂ କେଵଲଂ ମଦୀୟୟୈଵ ଦୟୟା ନିଶ୍ଶେଷଵିନଷ୍ଟ ସହେତୁକ ମଚ୍ଚରଣାରଵିଂଦୟୁଗଳୈକାଂତିକାତ୍ୟଂତିକ ପରଭକ୍ତି ପରଜ୍ଞାନ ପରମଭକ୍ତିଵିଘ୍ନଃ ମତ୍ପ୍ରସାଦଲବ୍ଧ ମଚ୍ଚରଣାରଵିଂଦୟୁଗଳୈକାଂତିକାତ୍ୟଂତିକ ପରଭକ୍ତି ପରଜ୍ଞାନ ପରମଭକ୍ତିଃ ମତ୍ପ୍ରସାଦାଦେଵ ସାକ୍ଷାତ୍କୃତ ୟଥାଵସ୍ଥିତ ମତ୍ସ୍ଵରୂପରୂପଗୁଣଵିଭୂତି ଲୀଲୋପକରଣଵିସ୍ତାରଃ ଅପରୋକ୍ଷସିଦ୍ଧ ମନ୍ନିୟାମ୍ୟତା ମଦ୍ଦାସ୍ୟୈକ ସ୍ଵଭାଵାତ୍ମ ସ୍ଵରୂପଃ ମଦେକାନୁଭଵଃ ମଦ୍ଦାସ୍ୟୈକପ୍ରିୟଃ ପରିପୂର୍ଣାନଵରତ ନିତ୍ୟଵିଶଦତମାନନ୍ୟ ପ୍ରୟୋଜନାନଵଧିକାତିଶୟପ୍ରିୟ ମଦନୁଭଵସ୍ତ୍ଵଂ ତଥାଵିଧ ମଦନୁଭଵ ଜନିତାନଵଧିକାତିଶୟ ପ୍ରୀତିକାରିତାଶେଷାଵସ୍ଥୋଚିତାଶେଷ ଶେଷତୈକରତିରୂପ ନିତ୍ୟକିଂକରୋ ଭଵ ।
ଏଵଂଭୂତୋଽସି । ଆଧ୍ୟାତ୍ମିକାଧିଭୌତିକାଧିଦୈଵିକ ଦୁଃଖଵିଘ୍ନଗଂଧରହିତସ୍ତ୍ଵଂ ଦ୍ଵୟମର୍ଥାନୁସଂଧାନେନ ସହ ସଦୈଵଂ ଵକ୍ତା ୟାଵଚ୍ଛରୀରପାତମତ୍ରୈଵ ଶ୍ରୀରଂଗେ ସୁଖମାସ୍ଵ ॥
ଶରୀରପାତସମୟେ ତୁ କେଵଲଂ ମଦୀୟୟୈଵ ଦୟୟାଽତିପ୍ରବୁଦ୍ଧଃ ମାମେଵାଵଲୋକୟନ୍ ଅପ୍ରଚ୍ୟୁତ ପୂର୍ଵସଂସ୍କାରମନୋରଥଃ ଜୀର୍ଣମିଵ ଵସ୍ତ୍ରଂ ସୁଖେନେମାଂ ପ୍ରକୃତିଂ ସ୍ଥୂଲସୂକ୍ଷ୍ମରୂପାଂ ଵିସୃଜ୍ୟ ତଦାନୀମେଵ ମତ୍ପ୍ରସାଦଲବ୍ଧ ମଚ୍ଚରଣାରଵିଂଦ ୟୁଗଳୈକାଂତିକାତ୍ୟଂତିକ ପରଭକ୍ତି ପରଜ୍ଞାନ ପରମଭକ୍ତିକୃତ ପରିପୂର୍ଣାନଵରତ ନିତ୍ୟଵିଶଦତମାନନ୍ୟ ପ୍ରୟୋଜନାନଵଧିକାତିଶୟ ପ୍ରିୟ ମଦନୁଭଵସ୍ତ୍ଵଂ ତଥାଵିଧ ମଦନୁଭଵଜନିତାନଵଧିକାତିଶୟ ପ୍ରୀତିକାରିତାଶେଷାଵସ୍ଥୋଚିତାଶେଷଶେଷତୈକ ରତିରୂପ ନିତ୍ୟକିଂକରୋ ଭଵିଷ୍ୟସି । ମାତେଽଭୂଦତ୍ର ସଂଶୟଃ ।
ଅନୃତଂ ନୋକ୍ତପୂର୍ଵଂ ମେ ନ ଚ ଵକ୍ଷ୍ୟେ କଦାଚନ ।
ରାମୋ ଦ୍ଵିର୍ନାଭିଭାଷତେ ।
ସକୃଦେଵ ପ୍ରପନ୍ନାୟ ତଵାସ୍ମୀତି ଚ ୟାଚତେ ।
ଅଭୟଂ ସର୍ଵଭୂତେଭ୍ୟୋ ଦଦାମ୍ୟେତଦ୍ଵ୍ରତଂ ମମ ॥
ସର୍ଵଧର୍ମାନ୍ ପରିତ୍ୟଜ୍ୟ ମାମେକଂ ଶରଣଂ ଵ୍ରଜ ।
ଅହଂ ତ୍ଵା ସର୍ଵପାପେଭ୍ୟୋ ମୋକ୍ଷୟିଷ୍ୟାମି ମା ଶୁଚଃ ॥
ଇତି ମୟୈଵ ହ୍ୟୁକ୍ତମ୍ ।
ଅତସ୍ତ୍ଵଂ ତଵ ତତ୍ତ୍ଵତୋ ମତ୍ ଜ୍ଞାନଦର୍ଶନ ପ୍ରାପ୍ତିଷୁ ନିସ୍ସଂଶୟଃ ସୁଖମାସ୍ଵ ॥
ଅଂତ୍ୟକାଲେ ସ୍ମୃତିର୍ୟାତୁ ତଵ କୈଂକର୍ୟକାରିତା ।
ତାମେନାଂ ଭଗଵନ୍ନଦ୍ୟ କ୍ରିୟମାଣାଂ କୁରୁଷ୍ଵ ମେ ॥
ଇତି ଶ୍ରୀଭଗଵଦ୍ରାମାନୁଜ ଵିରଚିତଂ ଶରଣାଗତି ଗଦ୍ୟମ୍ ।
