യോ നിത്യമച്യുതപദാംബുജയുഗ്മരുക്മ
വ്യാമോഹതസ്തദിതരാണി തൃണായ മേനേ ।
അസ്മദ്ഗുരോര്ഭഗവതോഽസ്യ ദയൈകസിംധോഃ
രാമാനുജസ്യ ചരണൌ ശരണം പ്രപദ്യേ ॥
വംദേ വേദാംതകര്പൂരചാമീകര കരംഡകമ് ।
രാമാനുജാര്യമാര്യാണാം ചൂഡാമണിമഹര്നിശമ് ॥
ഓമ് ॥ ഭഗവന്നാരായണാഭിമതാനുരൂപ സ്വരൂപരൂപ ഗുണവിഭവൈശ്വര്യ ശീലാദ്യനവധികാതിശയ അസംഖ്യേയ കല്യാണഗുണഗണാം പദ്മവനാലയാം ഭഗവതീം ശ്രിയം ദേവീം നിത്യാനപായിനീം നിരവദ്യാം ദേവദേവദിവ്യമഹിഷീം അഖിലജഗന്മാതരം അസ്മന്മാതരം അശരണ്യശരണ്യാം അനന്യശരണഃ ശരണമഹം പ്രപദ്യേ ॥
പാരമാര്ഥിക ഭഗവച്ചരണാരവിംദ യുഗളൈകാംതികാത്യംതിക പരഭക്തി പരജ്ഞാന പരമഭക്തികൃത പരിപൂര്ണാനവരത നിത്യവിശദതമാനന്യ പ്രയോജനാനവധികാതിശയ പ്രിയ ഭഗവദനുഭവജനിതാനവധികാതിശയ പ്രീതികാരിതാശേഷാവസ്ഥോചിത അശേഷശേഷതൈകരതിരൂപ നിത്യകൈംകര്യപ്രാപ്ത്യപേക്ഷയാ പാരമാര്ഥികീ ഭഗവച്ചരണാരവിംദ ശരണാഗതിഃ യഥാവസ്ഥിതാ അവിരതാഽസ്തു മേ ॥
അസ്തു തേ । തയൈവ സർവം സംപത്സ്യതേ ॥
അഖിലഹേയപ്രത്യനീക കല്യാണൈകതാന, സ്വേതര സമസ്തവസ്തുവിലക്ഷണാനംത ജ്ഞാനാനംദൈകസ്വരൂപ, സ്വാഭിമതാനുരൂപൈകരൂപാചിംത്യ ദിവ്യാദ്ഭുത നിത്യനിരവദ്യ നിരതിശയൌജ്ജ്വല്യ സൌംദര്യ സൌഗംധ്യ സൌകുമാര്യ ലാവണ്യ യൌവനാദ്യനംതഗുണനിധി ദിവ്യരൂപ, സ്വാഭാവികാനവധികാതിശയ ജ്ഞാന ബലൈശ്വര്യ വീര്യ ശക്തി തേജസ്സൌശീല്യ വാത്സല്യ മാര്ദവാര്ജവ സൌഹാര്ദ സാമ്യ കാരുണ്യ മാധുര്യ ഗാംഭീര്യൌദാര്യ ചാതുര്യ സ്ഥൈര്യ ധൈര്യ ശൌര്യ പരാക്രമ സത്യകാമ സത്യസംകല്പ കൃതിത്വ കൃതജ്ഞതാദ്യസംഖ്യേയ കല്യാണഗുണഗണൌഘ മഹാര്ണവ,
സ്വോചിത വിവിധ വിചിത്രാനംതാശ്ചര്യ നിത്യ നിരവദ്യ നിരതിശയ സുഗംധ നിരതിശയ സുഖസ്പര്ശ നിരതിശയൌജ്ജ്വല്യ കിരീട മകുട ചൂഡാവതംസ മകരകുംഡല ഗ്രൈവേയക ഹാര കേയൂര കടക ശ്രീവത്സ കൌസ്തുഭ മുക്താദാമോദരബംധന പീതാംബര കാംചീഗുണ നൂപുരാദ്യപരിമിത ദിവ്യഭൂഷണ, സ്വാനുരൂപാചിംത്യശക്തി ശംഖചക്രഗദാഽസി ശാരംഗാദ്യസംഖ്യേയ
നിത്യനിരവദ്യ നിരതിശയ കല്യാണദിവ്യായുധ,
സ്വാഭിമത നിത്യനിരവദ്യാനുരൂപ സ്വരൂപരൂപഗുണ വിഭവൈശ്വര്യ ശീലാദ്യനവധികാതിശയാസംഖ്യേയ കല്യാണഗുണഗണശ്രീവല്ലഭ, ഏവംഭൂത ഭൂമിനീളാനായക, സ്വച്ഛംദാനുവര്തി സ്വരൂപസ്ഥിതി പ്രവൃത്തിഭേദാശേഷ ശേഷതൈകരതിരൂപ
നിത്യനിരവദ്യനിരതിശയ ജ്ഞാന ക്രിയൈശ്വര്യാദ്യനംത കല്യാണഗുണഗണ ശേഷ ശേഷാശന
ഗരുഡപ്രമുഖ നാനാവിധാനംത പരിജന പരിചാരികാ പരിചരിത ചരണയുഗള, പരമയോഗി വാങ്മനസാഽപരിച്ഛേദ്യ സ്വരൂപ സ്വഭാവ സ്വാഭിമത വിവിധവിചിത്രാനംതഭോഗ്യ ഭോഗോപകരണ ഭോഗസ്ഥാന സമൃദ്ധാനംതാശ്ചര്യാനംത മഹാവിഭവാനംത പരിമാണ നിത്യ നിരവദ്യ നിരതിശയ ശ്രീവൈകുംഠനാഥ, സ്വസംകല്പാനുവിധായി സ്വരൂപസ്ഥിതി പ്രവൃത്തി സ്വശേഷതൈകസ്വഭാവ പ്രകൃതി പുരുഷ കാലാത്മക വിവിധ വിചിത്രാനംത ഭോഗ്യ ഭോക്തൃവര്ഗ ഭോഗോപകരണ ഭോഗസ്ഥാനരൂപ
നിഖിലജഗദുദയ വിഭവ ലയലീല, സത്യകാമ, സത്യസംകല്പ, പരബ്രഹ്മഭൂത, പുരുഷോത്തമ,മഹാവിഭൂതേ,
ശ്രീമന് നാരായണ, വൈകുംഠനാഥ, അപാര കാരുണ്യ സൌശീല്യ വാത്സല്യൌദാര്യൈശ്വര്യ സൌംദര്യ മഹോദധേ, അനാലോചിതവിശേഷാശേഷലോക ശരണ്യ, പ്രണതാര്തിഹര, ആശ്രിത വാത്സല്യൈകജലധേ, അനവരതവിദിത നിഖിലഭൂതജാതയാഥാത്മ്യ, അശേഷചരാചരഭൂത നിഖിലനിയമന നിരത, അശേഷചിദചിദ്വസ്തു ശേഷിഭൂത, നിഖിലജഗദാധാര, അഖിലജഗത്സ്വാമിന്, അസ്മത്സ്വാമിന്, സത്യകാമ,
സത്യസംകല്പ, സകലേതരവിലക്ഷണ, അര്ഥികല്പക, ആപത്സഖ, ശ്രീമന്, നാരായണ, അശരണ്യശരണ്യ, അനന്യശരണസ്ത്വത്പാദാരവിംദ യുഗളം ശരണമഹം പ്രപദ്യേ ॥
അത്ര ദ്വയമ് ।
പിതരം മാതരം ദാരാന് പുത്രാന് ബംധൂന് സഖീന് ഗുരൂന് ।
രത്നാനി ധനധാന്യാനി ക്ഷേത്രാണി ച ഗൃഹാണി ച ॥ 1
സർവധര്മാംശ്ച സംത്യജ്യ സർവകാമാംശ്ച സാക്ഷരാന് ।
ലോകവിക്രാംതചരണൌ ശരണം തേഽവ്രജം വിഭോ ॥ 2
ത്വമേവ മാതാ ച പിതാ ത്വമേവ
ത്വമേവ ബംധുശ്ച ഗുരുസ്ത്വമേവ ।
ത്വമേവ വിദ്യാ ദ്രവിണം ത്വമേവ
ത്വമേവ സർവം മമ ദേവദേവ ॥ 3
പിതാഽസി ലോകസ്യ ചരാചരസ്യ
ത്വമസ്യ പൂജ്യശ്ച ഗുരുര്ഗരീയാന് ।
ന ത്വത്സമോഽസ്ത്യഭ്യധികഃ കുതോഽന്യോ
ലോകത്രയേഽപ്യപ്രതിമപ്രഭാവ ॥ 4
തസ്മാത്പ്രണമ്യ പ്രണിധായ കായം
പ്രസാദയേ ത്വാമഹമീശമീഡ്യമ് ।
പിതേവ പുത്രസ്യ സഖേവ സഖ്യുഃ
പ്രിയഃ പ്രിയായാര്ഹസി ദേവ സോഢുമ് ॥
മനോവാക്കായൈരനാദികാല പ്രവൃത്താനംതാകൃത്യകരണ കൃത്യാകരണ ഭഗവദപചാര ഭാഗവതാപചാരാസഹ്യാപചാരരൂപ നാനാവിധാനംതാപചാരാന് ആരബ്ധകാര്യാന് അനാരബ്ധകാര്യാന് കൃതാന് ക്രിയമാണാന് കരിഷ്യമാണാംശ്ച സർവാനശേഷതഃ ക്ഷമസ്വ ।
അനാദികാലപ്രവൃത്തവിപരീത ജ്ഞാനമാത്മവിഷയം കൃത്സ്ന ജഗദ്വിഷയം ച വിപരീതവൃത്തം ചാശേഷവിഷയമദ്യാപി വര്തമാനം വര്തിഷ്യമാണം ച സർവം ക്ഷമസ്വ ।
മദീയാനാദികര്മ പ്രവാഹപ്രവൃത്താം ഭഗവത്സ്വരൂപ തിരോധാനകരീം വിപരീതജ്ഞാനജനനീം സ്വവിഷയായാശ്ച ഭോഗ്യബുദ്ധേര്ജനനീം ദേഹേംദ്രിയത്വേന ഭോഗ്യത്വേന സൂക്ഷ്മരൂപേണ ചാവസ്ഥിതാം ദൈവീം ഗുണമയീം മായാം ദാസഭൂതം ശരണാഗതോഽസ്മി തവാസ്മി ദാസഃ ഇതി വക്താരം മാം താരയ ।
തേഷാം ജ്ഞാനീ നിത്യയുക്തഃ ഏകഭക്തിർവിശിഷ്യതേ ।
പ്രിയോ ഹി ജ്ഞാനിനോഽത്യര്ഥമഹം സ ച മമ പ്രിയഃ ॥
ഉദാരാഃ സർവ ഏവൈതേ ജ്ഞാനീ ത്വാത്മൈവ മേ മതമ് ।
ആസ്ഥിതഃ സ ഹി യുക്താത്മാ മാമേവാനുത്തമാം ഗതിമ് ॥
ബഹൂനാം ജന്മനാമംതേ ജ്ഞാനവാന്മാം പ്രപദ്യതേ ।
വാസുദേവഃ സർവമിതി സ മഹാത്മാ സുദുര്ലഭഃ ॥
ഇതി ശ്ലോകത്രയോദിതജ്ഞാനിനം മാം കുരുഷ്വ ।
പുരുഷഃ സ പരഃ പാര്ഥ ഭക്ത്യാ ലഭ്യസ്ത്വനന്യയാ ।
ഭക്ത്യാ ത്വനന്യയാ ശക്യഃ മദ്ഭക്തിം ലഭതേ പരാമ് ।
ഇതി സ്ഥാനത്രയോദിത പരഭക്തിയുക്തം മാം കുരുഷ്വ ।
പരഭക്തി പരജ്ഞാന പരമഭക്ത്യേകസ്വഭാവം മാം കുരുഷ്വ ।
പരഭക്തി പരജ്ഞാന പരമഭക്തികൃത പരിപൂര്ണാനവരത നിത്യവിശദതമാനന്യ പ്രയോജനാനവധികാതിശയ പ്രിയ ഭഗവദനുഭവോഽഹം തഥാവിധ ഭഗവദനുഭവ ജനിതാനവധികാതിശയ പ്രീതികാരിതാശേഷാവസ്ഥോചിതാശേഷ ശേഷതൈകരതിരൂപ നിത്യകിംകരോ ഭവാനി ।
ഏവംഭൂത മത്കൈംകര്യപ്രാപ്ത്യുപായതയാഽവക്ലുപ്തസമസ്ത വസ്തുവിഹീനോഽപി, അനംത തദ്വിരോധിപാപാക്രാംതോഽപി, അനംത മദപചാരയുക്തോഽപി, അനംത മദീയാപചാരയുക്തോഽപി, അനംതാസഹ്യാപചാര യുക്തോഽപി, ഏതത്കാര്യകാരണ ഭൂതാനാദി വിപരീതാഹംകാര വിമൂഢാത്മ സ്വഭാവോഽപി, ഏതദുഭയകാര്യകാരണഭൂതാനാദി വിപരീതവാസനാ സംബദ്ധോഽപി, ഏതദനുഗുണ പ്രകൃതി വിശേഷസംബദ്ധോഽപി, ഏതന്മൂലാധ്യാത്മികാധിഭൌതികാധിദൈവിക സുഖദുഃഖ തദ്ധേതു
തദിതരോപേക്ഷണീയ വിഷയാനുഭവ ജ്ഞാനസംകോചരൂപ മച്ചരണാരവിംദയുഗളൈകാംതികാത്യംതിക പരഭക്തി പരജ്ഞാന പരമഭക്തി വിഘ്നപ്രതിഹതോഽപി, യേന കേനാപി പ്രകാരേണ ദ്വയവക്താ ത്വം കേവലം മദീയയൈവ ദയയാ നിശ്ശേഷവിനഷ്ട സഹേതുക മച്ചരണാരവിംദയുഗളൈകാംതികാത്യംതിക പരഭക്തി പരജ്ഞാന പരമഭക്തിവിഘ്നഃ മത്പ്രസാദലബ്ധ മച്ചരണാരവിംദയുഗളൈകാംതികാത്യംതിക പരഭക്തി പരജ്ഞാന പരമഭക്തിഃ മത്പ്രസാദാദേവ സാക്ഷാത്കൃത യഥാവസ്ഥിത മത്സ്വരൂപരൂപഗുണവിഭൂതി ലീലോപകരണവിസ്താരഃ അപരോക്ഷസിദ്ധ മന്നിയാമ്യതാ മദ്ദാസ്യൈക സ്വഭാവാത്മ സ്വരൂപഃ മദേകാനുഭവഃ മദ്ദാസ്യൈകപ്രിയഃ പരിപൂര്ണാനവരത നിത്യവിശദതമാനന്യ പ്രയോജനാനവധികാതിശയപ്രിയ മദനുഭവസ്ത്വം തഥാവിധ മദനുഭവ ജനിതാനവധികാതിശയ പ്രീതികാരിതാശേഷാവസ്ഥോചിതാശേഷ ശേഷതൈകരതിരൂപ നിത്യകിംകരോ ഭവ ।
ഏവംഭൂതോഽസി । ആധ്യാത്മികാധിഭൌതികാധിദൈവിക ദുഃഖവിഘ്നഗംധരഹിതസ്ത്വം ദ്വയമര്ഥാനുസംധാനേന സഹ സദൈവം വക്താ യാവച്ഛരീരപാതമത്രൈവ ശ്രീരംഗേ സുഖമാസ്വ ॥
ശരീരപാതസമയേ തു കേവലം മദീയയൈവ ദയയാഽതിപ്രബുദ്ധഃ മാമേവാവലോകയന് അപ്രച്യുത പൂർവസംസ്കാരമനോരഥഃ ജീര്ണമിവ വസ്ത്രം സുഖേനേമാം പ്രകൃതിം സ്ഥൂലസൂക്ഷ്മരൂപാം വിസൃജ്യ തദാനീമേവ മത്പ്രസാദലബ്ധ മച്ചരണാരവിംദ യുഗളൈകാംതികാത്യംതിക പരഭക്തി പരജ്ഞാന പരമഭക്തികൃത പരിപൂര്ണാനവരത നിത്യവിശദതമാനന്യ പ്രയോജനാനവധികാതിശയ പ്രിയ മദനുഭവസ്ത്വം തഥാവിധ മദനുഭവജനിതാനവധികാതിശയ പ്രീതികാരിതാശേഷാവസ്ഥോചിതാശേഷശേഷതൈക രതിരൂപ നിത്യകിംകരോ ഭവിഷ്യസി । മാതേഽഭൂദത്ര സംശയഃ ।
അനൃതം നോക്തപൂർവം മേ ന ച വക്ഷ്യേ കദാചന ।
രാമോ ദ്വിര്നാഭിഭാഷതേ ।
സകൃദേവ പ്രപന്നായ തവാസ്മീതി ച യാചതേ ।
അഭയം സർവഭൂതേഭ്യോ ദദാമ്യേതദ്വ്രതം മമ ॥
സർവധര്മാന് പരിത്യജ്യ മാമേകം ശരണം വ്രജ ।
അഹം ത്വാ സർവപാപേഭ്യോ മോക്ഷയിഷ്യാമി മാ ശുചഃ ॥
ഇതി മയൈവ ഹ്യുക്തമ് ।
അതസ്ത്വം തവ തത്ത്വതോ മത് ജ്ഞാനദര്ശന പ്രാപ്തിഷു നിസ്സംശയഃ സുഖമാസ്വ ॥
അംത്യകാലേ സ്മൃതിര്യാതു തവ കൈംകര്യകാരിതാ ।
താമേനാം ഭഗവന്നദ്യ ക്രിയമാണാം കുരുഷ്വ മേ ॥
ഇതി ശ്രീഭഗവദ്രാമാനുജ വിരചിതം ശരണാഗതി ഗദ്യമ് ।
