kṛṣṇa yajurvēdīya taittirīya saṃhitāyāṃ prathamakāṇḍē dvitīyaḥ praśnaḥ - (agniṣṭōmē krayaḥ)

ōṃ namaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥

1.2 prathamakāṇḍē dvitīyaḥ praśnaḥ - (agniṣṭōmē krayaḥ)

āpa̍ undantu jī̠vasē̍ dīrghāyu̠tvāya̠ varcha̍sa̠ ōṣa̍dhē̠ trāya̍svaina̠gg̠ svadhi̍tē̠ mainagṃ̍ higṃsī-rdēva̠śrūrē̠tāni̠ pra va̍pē sva̠styutta̍rāṇyaśī̠yāpō̍ a̠smān mā̠tara̍ḥ śundhantu ghṛ̠tēna̍ nō ghṛta̠puva̍ḥ punantu̠ viśva̍ma̠smat pra va̍hantu ri̠pramudā̎bhya̠ḥ śuchi̠rā pū̠ta ē̍mi̠ sōma̍sya ta̠nūra̍si ta̠nuva̍ṃ mē pāhi mahī̠nāṃ payō̍'si varchō̠dhā a̍si̠ varchō̠- [varcha̍ḥ, mayi̍ dhēhi vṛ̠trasya̍] ॥ 1 ॥

mayi̍ dhēhi vṛ̠trasya̍ ka̠nīni̍kā'si chakṣu̠ṣpā a̍si̠ chakṣu̍rmē pāhi chi̠tpati̍stvā punātu vā̠kpati̍stvā punātu dē̠vastvā̍ savi̠tā pu̍nā̠tvachChi̍drēṇa pa̠vitrē̍ṇa̠ vasō̠ḥ sūrya̍sya ra̠śmibhi̠stasya̍ tē pavitrapatē pa̠vitrē̍ṇa̠ yasmai̠ kaṃ pu̠nē tachCha̍kēya̠mā vō̍ dēvāsa īmahē̠ satya̍dharmāṇō addhva̠rē yadvō̍ dēvāsa āgu̠rē yajñi̍yāsō̠ havā̍maha̠ indrā̎gnī̠ dyāvā̍pṛthivī̠ āpa̍ ōṣadhī̠ stvaṃ dī̠kṣāṇā̠-madhi̍patirasī̠ha mā̠ santa̍ṃ pāhi ॥ 2 ॥
(varcha̍ - ōṣadhī- ra̠ṣṭau cha̍ ) (a. 1)

ākū̎tyai pra̠yujē̠'gnayē̠ svāhā̍ mē̠dhāyai̠ mana̍sē̠ 'gnayē̠ svāhā̍ dī̠kṣāyai̠ tapa̍sē̠'gnayē̠ svāhā̠ sara̍svatyai pū̠ṣṇē̎'gnayē̠ svāhā''pō̍ dēvī-rbṛhatī-rviśvaśambhuvō̠ dyāvā̍pṛthi̠vī u̠rva̍ntari̍kṣa̠ṃ bṛha̠spati̍rnō ha̠viṣā̍ vṛdhātu̠ svāhā̠ viśvē̍ dē̠vasya̍ nē̠turmartō̍ vṛṇīta sa̠khyaṃ viśvē̍ rā̠ya i̍ṣuddhyasi dyu̠mnaṃ vṛ̍ṇīta pu̠ṣyasē̠ svāha̍rkhsā̠mayō̠ḥ śilpē̎ stha̠stē vā̠mā ra̍bhē̠ tē mā̍- [tē mā̎, pā̠ta̠mā'sya] ॥ 3 ॥

pāta̠mā'sya ya̠jñasyō̠dṛcha̍ i̠māṃ dhiya̠gṃ̠ śikṣa̍māṇasya dēva̠ kratu̠ṃ dakṣa̍ṃ varuṇa̠ sagṃ śi̍śādhi̠ yayā'ti̠ viśvā̍ duri̠tā tarē̍ma su̠tarmā̍ṇa̠madhi̠ nāvagṃ̍ ruhē̠mōrga̍syāṅgira̠syūrṇa̍mradā̠ ūrja̍ṃ mē yachCha pā̠hi mā̠ mā mā̍ higṃsī̠-rviṣṇō̠ḥ śarmā̍si̠ śarma̠ yaja̍mānasya̠ śarma̍ mē yachCha̠ nakṣa̍trāṇāṃ mā'tīkā̠śāt pā̠hīndra̍sya̠ yōni̍rasi̠- [yōni̍rasi, mā mā̍ higṃsīḥ] ॥ 4 ॥

mā mā̍ higṃsīḥ kṛ̠ṣyai tvā̍ susa̠syāyai̍ supippa̠lābhya̠-stvauṣa̍dhībhyaḥ sūpa̠sthā dē̠vō vana̠spati̍rū̠rdhvō mā̍ pā̠hyōdṛcha̠ḥ svāhā̍ ya̠jñaṃ mana̍sā̠ svāhā̠ dyāvā̍pṛthi̠vībhyā̠gg̠ svāhō̠rō-ra̠ntari̍kṣā̠th svāhā̍ ya̠jñaṃ vātā̠dā ra̍bhē ॥ 5 ॥
( mā̠ - yōni̍rasi - tri̠gṃ̠śachcha̍ ) (a. 2)

daivī̠ṃ dhiya̍ṃ manāmahē sumṛḍī̠kā-ma̠bhiṣṭa̍yē varchō̠dhāṃ ya̠jñavā̍hasagṃ supā̠rā nō̍ asa̠-dvaśē̎ । yē dē̠vā manō̍jātā manō̠yuja̍ḥ su̠dakṣā̠ dakṣa̍pitāra̠stē na̍ḥ pāntu̠ tē nō̍'vantu̠ tēbhyō̠ nama̠stēbhya̠ḥ svāhā'gnē̠ tvagṃ su jā̍gṛhi va̠yagṃ su ma̍ndiṣīmahi gōpā̠ya na̍ḥ sva̠stayē̎ pra̠budhē̍ na̠ḥ puna̍rdadaḥ । tvama̍gnē vrata̠pā a̍si dē̠va ā martyē̠ṣvā ।
tvaṃ- [tvam, ya̠jñēṣvīḍya̍ḥ ।] ॥ 6 ॥

ya̠jñēṣvīḍya̍ḥ ॥ viśvē̍ dē̠vā a̠bhi māmā'va̍vṛtran pū̠ṣā sa̠nyā sōmō̠ rādha̍sā dē̠vaḥ sa̍vi̠tā vasō̎rvasu̠dāvā̠ rāsvēya̍th sō̠mā ''bhūyō̍ bhara̠ mā pṛ̠ṇan pū̠rtyā vi rā̍dhi̠ mā'hamāyu̍ṣā cha̠ndrama̍si̠ mama̠ bhōgā̍ya bhava̠ vastra̍masi̠ mama̠ bhōgā̍ya bhavō̠srā'si̠ mama̠ bhōgā̍ya bhava̠ hayō̍'si̠ mama̠ bhōgā̍ya bhava̠- [bhōgā̍ya bhava, Chāgō̍'si̠ mama̠] ॥ 7 ॥

Chāgō̍'si̠ mama̠ bhōgā̍ya bhava mē̠ṣō̍'si̠ mama̠ bhōgā̍ya bhava vā̠yavē̎ tvā̠ varu̍ṇāya tvā̠ nir​ṛ̍tyai tvā ru̠drāya̍ tvā̠ dēvī̍rāpō apāṃ napā̠dya ū̠rmi-r​ha̍vi̠ṣya̍ indri̠yāvā̎n ma̠dinta̍ma̠staṃ vō̠ mā'va̍ kramiṣa̠machChi̍nna̠ṃ tantu̍ṃ pṛthi̠vyā anu̍ gēṣaṃ bha̠drāda̠bhi śrēya̠ḥ prēhi̠ bṛha̠spati̍ḥ puraē̠tā tē̍ a̠stvathē̠mava̍ sya̠ vara̠ ā pṛ̍thi̠vyā ā̠rē śatrū̎n kṛṇuhi̠ sarva̍vīra̠ ēdama̍ganma dēva̠yaja̍naṃ pṛthi̠vyā viśvē̍ dē̠vā yadaju̍ṣanta̠ pūrva̍ ṛkhsā̠mābhyā̠ṃ yaju̍ṣā sa̠ntara̍ntō rā̠yaspōṣē̍ṇa̠ sami̠ṣā ma̍dēma ॥ 8 ॥
( ā tvagṃ-hayō̍'si̠ mama̠ bhōgā̍ya bhava-sya̠-pañcha̍vigṃśatiścha ) (a. 3)

i̠yaṃ tē̍ śukra ta̠nūri̠daṃ varcha̠stayā̠ saṃ bha̍va̠ bhrāja̍ṃ gachCha̠ jūra̍si dhṛ̠tā mana̍sā̠ juṣṭā̠ viṣṇa̍vē̠ tasyā̎stē sa̠tyasa̍vasaḥ prasa̠vē vā̠chō ya̠ntrama̍śīya̠ svāhā̍ śu̠krama̍sya̠mṛta̍masi vaiśvadē̠vagṃ ha̠viḥ sūrya̍sya̠ chakṣu̠rā -'ru̍hama̠gnē ra̠kṣṇaḥ ka̠nīni̍kā̠ṃ yadēta̍śēbhi̠rīya̍sē̠ bhrāja̍mānō vipa̠śchitā̠ chida̍si ma̠nā'si̠ dhīra̍si̠ dakṣi̍ṇā- [dakṣi̍ṇā, a̠si̠ ya̠jñiyā̠'si] ॥ 9 ॥

'si ya̠jñiyā̍'si kṣa̠triyā̠ 'syadi̍ti-rasyubha̠yata̍̍śśīr​ṣṇī̠ sā na̠ḥ suprā̍chī̠ supra̍tīchī̠ saṃ bha̍va mi̠trastvā̍ pa̠di ba̍ddhnātu pū̠ṣā'ddhva̍naḥ pā̠tvindrā̠yā-ddhya̍kṣā̠yānu̍ tvā mā̠tā ma̍nyatā̠manu̍ pi̠tā'nu̠ bhrātā̠ saga̠rbhyō'nu̠ sakhā̠ sayū̎thya̠ḥ sā dē̍vi dē̠vamachChē̠hīndrā̍ya̠ sōmagṃ̍ ru̠drastvā ''va̍rtayatu mi̠trasya̍ pa̠thā sva̠sti sōma̍sakhā̠ puna̠rēhi̍ sa̠ha ra̠yyā ॥ 10 ॥
( dakṣi̍ṇā̠-sōma̍sakhā̠, pañcha̍ cha ) (a. 4)

vasvya̍si ru̠drā'syadi̍ti-rasyādi̠tyā'si̍ śu̠krā'si̍ cha̠ndrā'si̠ bṛha̠spati̍stvā su̠mnē ra̍ṇvatu ru̠drō vasu̍bhi̠rā chi̍kētu pṛthi̠vyāstvā̍ mū̠rdhannā ji̍gharmi dēva̠yaja̍na̠ iḍā̍yāḥ pa̠dē ghṛ̠tava̍ti̠ svāhā̠ pari̍likhita̠gṃ̠ rakṣa̠ḥ pari̍likhitā̠ arā̍taya i̠dama̠hagṃ rakṣa̍sō grī̠vā api̍ kṛntāmi̠ yō̎'smān dvēṣṭi̠ yaṃ cha̍ va̠yaṃ dvi̠ṣma i̠dama̍sya grī̠vā [grī̠vāḥ, api̍ kṛntāmya̠smē] ॥ 11 ॥

api̍ kṛntāmya̠smē rāya̠stvē rāya̠stōtē̠ rāya̠ḥ saṃ dē̍vi dē̠vyōrvaśyā̍ paśyasva̠ tvaṣṭī̍matī tē sapēya su̠rētā̠ rētō̠ dadhā̍nā vī̠raṃ vi̍dēya̠ tava̍ sa̠ndṛśi̠ mā'hagṃrā̠yaspōṣē̍ṇa̠ vi yō̍ṣam ॥ 12 ॥
( a̠sya̠ grī̠vā-ēkā̠nna tri̠gṃ̠śachcha̍ ) (a. 5)

a̠gṃ̠śunā̍ tē a̠gṃ̠śuḥ pṛ̍chyatā̠ṃ paru̍ṣā̠ paru̍-rga̠ndhastē̠ kāma̍mavatu̠ madā̍ya̠ rasō̠ achyu̍tō̠ 'mātyō̍'si śu̠krastē̠ grahō̠'bhi tyaṃ dē̠vagṃ sa̍vi̠tāra̍mū̠ṇyō̎ḥ ka̠vikra̍tu̠marchā̍mi sa̠tyasa̍vasagṃ ratna̠dhāma̠bhi pri̠yama ma̠timū̠rdhvā yasyā̠mati̠rbhā adi̍dyuta̠th savī̍mani̠ hira̍ṇyapāṇiramimīta su̠kratu̍ḥ kṛ̠pā suva̍ḥ । pra̠jābhya̍stvā prā̠ṇāya̍ tvā vyā̠nāya̍ tvā pra̠jāstvamanu̠ prāṇi̍hi pra̠jāstvāmanu̠ prāṇa̍ntu ॥ 13 ॥
(anu̍-sa̠pta cha̍) (a. 6)

sōma̍ṃ tē krīṇā̠myūrja̍svanta̠ṃ paya̍svantaṃ vī̠ryā̍vantamabhi-māti̠ṣāhagṃ̍ śu̠kraṃ tē̍ śu̠krēṇa̍ krīṇāmi cha̠ndraṃ cha̠ndrēṇā̠mṛta̍ma̠mṛtē̍na sa̠myattē̠ gōra̠smē cha̠ndrāṇi̠ tapa̍sasta̠nūra̍si pra̠jāpa̍tē̠-rvarṇa̠stasyā̎stē sahasrapō̠ṣaṃ puṣya̍ntyāśchara̠mēṇa̍ pa̠śunā̎ krīṇāmya̠smē tē̠ bandhu̠rmayi̍ tē̠ rāya̍ḥ śrayantāma̠smē jyōti̍ḥ sōmavikra̠yiṇi̠ tamō̍ mi̠trō na̠ ēhi̠ sumi̍tradhā̠ indra̍syō̠ru mā vi̍śa̠ dakṣi̍ṇa-mu̠śannu̠śantagg̍ syō̠naḥ syō̠nagg​ svāna̠ bhrājāṅghā̍rē̠ bambhā̍rē̠ hasta̠ suha̍sta̠ kṛśā̍navē̠tē va̍ḥ sōma̠ kraya̍ṇā̠stān ra̍kṣaddhva̠ṃ mā vō̍ dabhann ॥ 14 ॥
(u̠ruṃ-dvāvigṃ̍śatiścha) (a. 7)

udāyu̍ṣā svā̠yuṣōdōṣa̍dhīnā̠gṃ̠ rasē̠nōt pa̠rjanya̍sya̠ śuṣmē̠ṇōda̍sthāma̠mṛtā̠gṃ̠ anu̍ । u̠rva̍ntari̍kṣa̠manvi̠hyadi̍tyā̠ḥ sadō̠'syadi̍tyā̠ḥ sada̠ ā sī̠dāsta̍bhnā̠d-dyāmṛ̍ṣa̠bhō a̠ntari̍kṣa̠mami̍mīta vari̠māṇa̍ṃ pṛthi̠vyā ā'sī̍da̠-dviśvā̠ bhuva̍nāni sa̠mrāḍ viśvēttāni̠ varu̍ṇasya vra̠tāni̠ vanē̍ṣu̠ vya̍ntari̍kṣaṃ tatāna̠ vāja̠marva̍thsu̠ payō̍ aghni̠yāsu̍ hṛ̠thsu- [ ] ॥ 15 ॥

kratu̠ṃ varu̍ṇō vi̠kṣva̍gniṃ di̠vi sūrya̍madadhā̠th sōma̠madrā̠vudu̠tyaṃ jā̠tavē̍dasaṃ dē̠vaṃ va̍hanti kē̠tava̍ḥ । dṛ̠śē viśvā̍ya̠ sūrya̎m ॥ usrā̠vēta̍ṃ dhūr​ṣāhāvana̠śrū avī̍rahaṇau brahma̠chōda̍nau̠ varu̍ṇasya̠ skambha̍namasi̠ varu̍ṇasya skambha̠sarja̍namasi̠ pratya̍stō̠ varu̍ṇasya̠ pāśa̍ḥ ॥ 16 ॥
( hṛ̠thsu-pañcha̍trigṃśachcha ) (a. 8)

pra chya̍vasva bhuvaspatē̠ viśvā̎nya̠bhi dhāmā̍ni̠ mā tvā̍ paripa̠rī vi̍da̠nmā tvā̍ paripa̠nthinō̍ vida̠nmā tvā̠ vṛkā̍ aghā̠yavō̠ mā ga̍ndha̠rvō vi̠śvāva̍su̠rā da̍ghachChyē̠nō bhū̠tvā parā̍ pata̠ yaja̍mānasya nō gṛ̠hē dē̠vaiḥ sagg̍skṛ̠taṃ yaja̍mānasya sva̠styaya̍nya̠syapi̠ panthā̍magasmahi svasti̠gā-ma̍nē̠hasa̠ṃ yēna̠ viśvā̠ḥ pari̠ dviṣō̍ vṛ̠ṇakti̍ vi̠ndatē̠ vasu̠ namō̍ mi̠trasya̠ varu̍ṇasya̠ chakṣa̍sē ma̠hō dē̠vāya̠ tadṛ̠tagṃ sa̍paryata dūrē̠dṛśē̍ dē̠vajā̍tāya kē̠tavē̍ di̠vaspu̠trāya̠ sūryā̍ya śagṃsata̠ varu̍ṇasya̠ skambha̍namasi̠ varu̍ṇasya skambha̠sarja̍na-ma̠syunmu̍ktō̠ varu̍ṇasya̠ pāśa̍ḥ ॥ 17 ॥
( mi̠trasya̠-trayō̍vigṃśatiścha ) (a. 9)

a̠gnē-rā̍ti̠thyama̍si̠ viṣṇa̍vē tvā̠ sōma̍syā''ti̠thyama̍si̠ viṣṇa̍vē̠ tvā-'ti̍thērāti̠thyama̍si̠ viṣṇa̍vē tvā̠'gnayē̎ tvā rāyaspōṣa̠dāv.nnē̠ viṣṇa̍vē tvā śyē̠nāya̍ tvā sōma̠bhṛtē̠ viṣṇa̍vē tvā̠ yā tē̠ dhāmā̍ni ha̠viṣā̠ yaja̍nti̠ tā tē̠ viśvā̍ pari̠bhūra̍stu ya̠jñaṃ ga̍ya̠sphāna̍ḥ pra̠tara̍ṇaḥ su̠vīrō'vī̍rahā̠ pracha̍rā sōma̠ duryā̠nadi̍tyā̠ḥ sadō̠'syadi̍tyā̠ḥ sada̠ ā- [sada̠ ā, sī̠da̠ varu̍ṇō'si] ॥ 18 ॥

sī̍da̠ varu̍ṇō'si dhṛ̠tavra̍tō vāru̠ṇama̍si śa̠ṃyō-rdē̠vānāgṃ̍ sa̠khyānmā dē̠vānā̍-ma̠pasa̍-śChithsma̠hyāpa̍tayē tvā gṛhṇāmi̠ pari̍patayē tvā gṛhṇāmi̠ tanū̠naptrē̎ tvā gṛhṇāmi śākva̠rāya̍ tvā gṛhṇāmi̠ śakma̠nnōji̍ṣṭhāya tvā gṛhṇā̠mya-nā̍dhṛṣṭamasya-nādhṛ̠ṣyaṃ dē̠vānā̠mōjō̍- 'bhiṣasti̠pā a̍nabhiśastē̠'nyamanu̍ mē dī̠kṣāṃ dī̠kṣāpa̍ti-rmanyatā̠manu̠ tapa̠stapa̍spati̠rañja̍sā sa̠tyamupa̍ gēṣagṃ suvi̠tē mā̍ dhāḥ ॥ 19 ॥
( ā-mai-ka̍ṃ cha ) (a. 10)

a̠gṃ̠śuragṃ̍śustē dēva sō̠mā''pyā̍yatā̠-mindrā̍yaikadhana̠vida̠ ā tubhya̠mindra̍ḥ pyāyatā̠mā tvamindrā̍ya pyāya̠svā''pyā̍yaya̠ sakhī̎mth sa̠nyā mē̠dhayā̎ sva̠sti tē̍ dēva sōma su̠tyāma̍śī̠yēṣṭā̠ rāya̠ḥ prēṣē bhagā̍ya̠rtamṛ̍tavā̠dibhyō̠ namō̍ di̠vē nama̍ḥ pṛthi̠vyā agnē̎ vratapatē̠ tvaṃ vra̠tānā̎ṃ vra̠tapa̍tirasi̠ yā mama̍ ta̠nūrē̠ṣā sā tvayi̠ [tvayi̍, yā tava̍] ॥ 20 ॥

yā tava̍ ta̠nūri̠yagṃ sā mayi̍ sa̠ha nau̎ vratapatē vra̠tinō̎-rvra̠tāni̠ yā tē̍ agnē̠ rudri̍yā ta̠nūstayā̍ naḥ pāhi̠ tasyā̎stē̠ svāhā̠ yā tē̍ agnē'yāśa̠yā ra̍jāśa̠yā ha̍rāśa̠yā ta̠nūrvar​ṣi̍ṣṭhā gahvarē̠ṣṭhō'graṃ vachō̠ apā̍vadhīṃ tvē̠ṣaṃ vachō̠ apā̍vadhī̠gg̠ svāhā̎ ॥ 21 ॥
( tvayi̍-chatvāri̠gṃ̠śachcha̍ ) (a. 11)

vi̠ttāya̍nī mē'si ti̠ktāya̍nī mē̠'syava̍tānmā nāthi̠tamava̍tānmā vyathi̠taṃ vi̠dēra̠gnirnabhō̠ nāmāgnē̍ aṅgirō̠ yō̎'syāṃ pṛ̍thi̠vyāmasyāyu̍ṣā̠ nāmnēhi̠ yattē'nā̍dhṛṣṭa̠ṃ nāma̍ ya̠jñiya̠ṃ tēna̠ tvā''da̠dhē'gnē̍ aṅgirō̠ yō dvi̠tīya̍syāṃ tṛ̠tīya̍syāṃ pṛthi̠vyā-masyāyu̍ṣā̠ nāmnēhi̠ yattē'nā̍dhṛṣṭa̠ṃ nāma̍-[ ] ॥ 22 ॥

ya̠jñiya̠ṃ tēna̠ tvā''da̍dhē si̠gṃ̠hīra̍si mahi̠ṣīra̍syu̠ru pra̍thasvō̠ru tē̍ ya̠jñapa̍tiḥ prathatāṃ dhru̠vā'si̍ dē̠vēbhya̍ḥ śundhasva dē̠vēbhya̍ḥ śumbhasvēndraghō̠ṣastvā̠ vasu̍bhiḥ pu̠rastā̎t pātu̠ manō̍javāstvā pi̠tṛbhi̍-rdakṣiṇa̠taḥ pā̍tu̠ prachē̍tāstvā ru̠draiḥ pa̠śchāt pā̍tu vi̠śvaka̍rmā tvā''di̠tyairu̍ttara̠taḥ pā̍tu̠ si̠gṃ̠hīra̍si sapatnasā̠hī svāhā̍ si̠gṃ̠hīra̍si suprajā̠vani̠ḥ svāhā̍ si̠gṃ̠hī- [si̠gṃ̠hīḥ, a̠si̠ rā̠ya̠spō̠ṣa̠vani̠ḥ svāhā̍] ॥ 23 ॥

ra̍si rāyaspōṣa̠vani̠ḥ svāhā̍ si̠gṃ̠hīra̍syāditya̠vani̠ḥ svāhā̍ si̠gṃ̠hīra̠syā va̍ha dē̠vāndē̍vaya̠tē yaja̍mānāya̠ svāhā̍ bhū̠tēbhya̍stvā vi̠śvāyu̍rasi pṛthi̠vīṃ dṛgṃ̍ha dhruva̠kṣida̍sya̠ntari̍kṣaṃ dṛgṃhāchyuta̠kṣida̍si̠ diva̍ṃ dṛgṃhā̠gnē-rbhasmā̎sya̠gnēḥ purī̍ṣamasi ॥ 24 ॥
(nāma̍-suprajā̠vani̠ḥ svāhā̍ si̠gṃ̠ha̍007ā;ḥ-pañcha̍trigṃśachcha ) (a. 12)

yu̠ñjatē̠ mana̍ u̠ta yu̍ñjatē̠ dhiyō̠ viprā̠ vipra̍sya bṛha̠tō vi̍pa̠śchita̍ḥ । vi hōtrā̍ dadhē vayunā̠vidēka̠ inma̠hī dē̠vasya̍ savi̠tuḥ pari̍ṣṭutiḥ ॥ su̠vāgdē̍va̠ duryā̠gṃ̠ ā va̍da dēva̠śrutau̍ dē̠vēṣvā ghō̍ṣēthā̠mā nō̍ vī̠rō jā̍yatāṃ karma̠ṇyō̍ yagṃ sarvē̍'nu̠ jīvā̍ma̠ yō ba̍hū̠nāmasa̍dva̠śī ॥ i̠daṃ viṣṇu̠-rvicha̍kramē trē̠dhā ni da̍dhē pa̠dam ॥ samū̍ḍhamasya [samū̍ḍhamasya, pā̠gṃ̠su̠ra] ॥ 25 ॥

pāgṃsu̠ra irā̍vatī dhēnu̠matī̠ hi bhū̠tagṃ sū̍yava̠sinī̠ mana̍vē yaśa̠syē̎ । vya̍skabhnā̠d-rōda̍sī̠ viṣṇu̍rē̠tē dā̠dhāra̍ pṛthi̠vīma̠bhitō̍ ma̠yūkhai̎ḥ ॥ prāchī̠ prēta̍maddhva̠raṃ ka̠lpaya̍ntī ū̠rdhvaṃ ya̠jñaṃ na̍yata̠ṃ mā jī̎hvarata̠matra̍ ramēthā̠ṃ var​ṣma̍n pṛthi̠vyā di̠vō vā̍ viṣṇavu̠ta vā̍ pṛthi̠vyā ma̠hō vā̍ viṣṇavu̠ta vā̠'ntari̍kṣā̠ddhastau̍ pṛṇasva ba̠hubhi̍-rvasa̠vyai̍rā pra ya̍chCha̠ [pra ya̍chCha, dakṣi̍ṇā̠dōta] ॥ 26 ॥

dakṣi̍ṇā̠dōta sa̠vyāt । viṣṇō̠rnuka̍ṃ vī̠ryā̍ṇi̠ pra vō̍cha̠ṃ yaḥ pārthi̍vāni vima̠mē rajāgṃ̍si̠ yō aska̍bhāya̠dutta̍ragṃ sa̠dhastha̍ṃ vichakramā̠ṇa strē̠dhōru̍gā̠yō viṣṇō̍ ra̠rāṭa̍masi̠ viṣṇō̎ḥ pṛ̠ṣṭhama̍si̠ viṣṇō̠ḥ śṃaptrē̎ sthō̠ viṣṇō̠ḥ syūra̍si̠ viṣṇō̎-rdhru̠vama̍si vaiṣṇa̠vama̍si̠ viṣṇa̍vē tvā ॥ 27 ॥
( a̠sya̠-ya̠chChaikā̠nna cha̍tvāri̠gṃ̠śachcha̍ ) (a. 13)

kṛ̠ṇu̠ṣva pāja̠ḥ prasi̍ti̠nna pṛ̠thvīṃ yā̠hi rājē̠vāma̍vā̠gṃ̠ ibhē̍na । tṛ̠ṣvīmanu̠ prasi̍tiṃ-drūṇā̠nō-'stā̍'si̠ viddhya̍ ra̠kṣasa̠ stapi̍ṣṭhaiḥ ॥ tava̍ bhra̠māsa̍ āśu̠yā pa̍nta̠tyanu̍ spṛśa-dhṛṣa̠tā śōśu̍chānaḥ । tapūgg̍ṣyagnē ju̠hvā̍ pata̠ṅgānasa̍nditō̠ visṛ̍ja̠ viṣva̍gu̠lkāḥ ॥ prati̠spaśō̠ visṛ̍ja̠-tūrṇi̍tamō̠ bhavā̍ pā̠yurvi̠śō a̠syā ada̍bdhaḥ । yō nō̍ dū̠rē a̠ghaśagṃ̍sō̠ [a̠ghaśagṃ̍saḥ, yō antyagnē̠] ॥ 28 ॥

yō antyagnē̠ māki̍ṣṭē̠ vyathi̠rā da̍dhar​ṣīt ॥ uda̍gnē tiṣṭha̠ pratyā ''ta̍nuṣva̠ nya̍mitrāgṃ̍ ōṣatāt tigmahētē । yō nō̠ arā̍tigṃ samidhāna cha̠krē nī̠chā taṃ dha̍kṣyata̠saṃ na śuṣka̎m ॥ ū̠rdhvō bha̍va̠ prati̍vi̠ddhyā-'ddhya̠smadā̠viṣkṛ̍ṇuṣva̠ daivyā̎nyagnē । ava̍sthi̠rā ta̍nuhi yātu̠jūnā̎ṃ jā̠mimajā̍miṃ̠ pramṛ̍ṇīhi̠ śatrūn̍ ॥
sa tē̍ [sa tē̎, jā̠nā̠ti̠ su̠ma̠tiṃ] ॥ 29 ॥

jānāti suma̠tiṃ ya̍viṣṭha̠ya īva̍tē̠ brahma̍ṇē gā̠tumaira̍t । viśvā̎nyasmai su̠dinā̍ni rā̠yō dyu̠mnānya̠ryō vidurō̍ a̠bhi dyau̎t ॥ sēda̍gnē astu su̠bhaga̍ḥ su̠dānu̠-ryastvā̠ nityē̍na ha̠viṣā̠ya u̠kthaiḥ । piprī̍ṣati̠ sva āyu̍ṣi durō̠ṇē viśvēda̍smai su̠dinā̠ sā'sa̍di̠ṣṭiḥ ॥ archā̍mi tē suma̠tiṃ ghōṣya̠rvākh-santē̍ vā̠ vā tā̍ jaratā- [vā̠ vā tā̍ jaratm, i̠yaṅgīḥ] ॥ 30 ॥

mi̠yaṅgīḥ । svaśvā̎stvā su̠rathā̍ marjayēmā̠smē kṣa̠trāṇi̍ dhārayē̠ranu̠ dyūn ॥ i̠ha tvā̠ bhūryā cha̍rē̠ dupa̠tman dōṣā̍vasta-rdīdi̠vāgṃsa̠manu̠ dyūn । krīḍa̍ntastvā su̠mana̍saḥ sapēmā̠bhi dyu̠mnā ta̍sthi̠vāgṃsō̠ janā̍nām ॥ yastvā̠-svaśva̍ḥ suhira̠ṇyō a̍gna upa̠yāti̠ vasu̍matā̠ rathē̍na । tasya̍ trā̠tā-bha̍vasi̠ tasya̠ sakhā̠ yasta̍ āti̠thyamā̍nu̠ṣag jujō̍ṣat ॥ ma̠hō ru̍jāmi - [ ] ॥ 31 ॥

ba̠ndhutā̠ vachō̍bhi̠stanmā̍ pi̠turgōta̍mā̠da-nvi̍yāya । tvannō̍ a̠sya vacha̍sa-śchikiddhi̠ hōta̍ryaviṣṭha sukratō̠ damū̍nāḥ ॥ asva̍pnaja sta̠raṇa̍yaḥ su̠śēvā̠ ata̍ndrāsō'vṛ̠kā aśra̍miṣṭhāḥ । tē pā̠yava̍ḥ sa̠ddhriya̍ñchō ni̠ṣadyā'gnē̠ tava̍naḥ pāntvamūra ॥ yē pā̠yavō̍ māmatē̠yaṃ tē̍ agnē̠ paśya̍ntō a̠ndhaṃ du̍ri̠tādara̍kṣann । ra̠rakṣa̠tānth su̠kṛtō̍ vi̠śvavē̍dā̠ diphsa̍nta̠ idri̠pavō̠ nā ha̍ [nā ha̍, dē̠bhu̠ḥ] ॥ 32 ॥

dēbhuḥ ॥ tvayā̍ va̠yagṃ sa̍dha̠nya̍-stvōtā̠-stava̠ praṇī̎tyaśyāma̠ vājān̍ । u̠bhā śagṃsā̍ sūdaya satyatātē-'nuṣṭhu̠yā kṛ̍ṇuhyahrayāṇa ॥ a̠yā tē̍ agnē sa̠midhā̍ vidhēma̠ prati̠stōmagṃ̍ śa̠syamā̍naṃ gṛbhāya । dahā̠śasō̍ ra̠kṣasa̍ḥ pā̠hya̍smān dru̠hō ni̠dō mi̍tramahō ava̠dyāt ॥ ra̠kṣō̠haṇaṃ̍ ṃvā̠jina̠māji̍gharmi mi̠traṃ prathi̍ṣṭha̠-mupa̍yāmi̠ śarma̍ । śiśā̍nō a̠gniḥ kratu̍bhi̠ḥ sami̍ddha̠ḥsanō̠ divā̠ [divā̎, sari̠ṣaḥ pā̍tu̠ nakta̎m] ॥ 33 ॥

sari̠ṣaḥ pā̍tu̠ nakta̎m ॥ vijyōti̍ṣā bṛha̠tā bhā̎tya̠gni-rā̠vi-rviśvā̍ni kṛṇutē mahi̠tvā । prādē̍vī-rmā̠yāḥ sa̍hatē-du̠rēvā̠ḥ śiśī̍tē̠ śṛṅgē̠ rakṣa̍sē vi̠nikṣē̎ ॥ u̠ta svā̠nāsō̍ di̠viṣa̍ntva̠gnē sti̠gmāyu̍dhā̠ rakṣa̍sē̠ hanta̠vā u̍ । madē̍ chidasya̠ praru̍janti̠ bhāmā̠ na va̍rantē pari̠bādhō̠ adē̍vīḥ ॥ 34 ॥
(a̠ghaśagṃ̍sa̠ḥ-sa tē̍-jaratāgṃ-rujāmi-ha̠ -divai - ka̍chatvārigṃśachcha) (a. 14)

(āpa̍ unda̠, ntvākū̎tyai̠, daivī̍, mi̠yantē̠, vasvya̍sya̠gṃ̠ śunā̍ tē̠, sōma̍nta̠, udāyu̍ṣā̠, pra chya̍vasvā̠, 'gnē rā̍ti̠thya, -ma̠gṃ̠śuragṃ̍ śu, rvi̠ttāya̍nī mē'si, yu̠ñchatē̍, kṛṇu̠ṣva pāja̠, śchatu̍rdaśa ।)

(āpō̠-vasvya̍si̠ yā tavē̠-yaṅgī-śchatu̍strigṃśat ।)

(āpa̍ unda̠n, tvadē̍vīḥ)

॥ hari̍ḥ ōm ॥

॥ kṛṣṇa yajurvēdīya taittirīya saṃhitāyāṃ prathamakāṇḍē dvitīyaḥ praśnaḥ samāptaḥ ॥