kṛṣṇa yajurvēdīya taittirīya saṃhitāyāṃ prathamakāṇḍē prathamaḥ praśnaḥ - (dar​śapūrṇamāsau)

ōṃ namaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥

i̠ṣē tvō̠rjē tvā̍ vā̠yava̍ḥ sthōpā̠yava̍ḥ stha dē̠vō va̍ḥ savi̠tā prārpa̍yatu̠ śrēṣṭha̍tamāya̠ karma̍ṇa̠ ā pyā̍yaddhvamaghniyā dēvabhā̠gamūrja̍svatī̠ḥ paya̍svatīḥ pra̠jāva̍tīranamī̠vā a̍ya̠kṣmā mā va̍ḥ stē̠na ī̍śata̠ mā'ghaśagṃ̍sō ru̠drasya̍ hē̠tiḥ pari̍ vō vṛṇaktu dhru̠vā a̠smin gōpa̍tau syāta ba̠hvī-ryaja̍mānasya pa̠śūn pā̍hi ॥ 1 ॥
(i̠ṣē - tricha̍tvārigṃśat ) (a. 1)

ya̠jñasya̍ ghō̠ṣada̍si̠ pratyu̍ṣṭa̠gṃ̠ rakṣa̠ḥ pratyu̍ṣṭā̠ arā̍taya̠ḥ prēyama̍gāddhi̠ṣaṇā̍ ba̠r̠​hirachCha̠ manu̍nā kṛ̠tā sva̠dhayā̠ vita̍ṣṭā̠ ta ā va̍hanti ka̠vaya̍ḥ pu̠rastā̎d- dē̠vēbhyō̠ juṣṭa̍mi̠ha ba̠r̠​hirā̠sadē̍ dē̠vānā̎ṃ pariṣū̠tama̍si va̠r̠​ṣavṛ̍ddhamasi̠ dēva̍bar​hi̠rmā tvā'̠nvaṃ mā ti̠ryak parva̍ tē rāddhyāsamāchChē̠ttā tē̠ mā ri̍ṣa̠ṃ dēva̍bar​hiḥ śa̠tava̍l​śa̠ṃ vi rō̍ha sa̠hasra̍val​śā̠ [sa̠hasra̍val​śāḥ, vi va̠yagṃ ru̍hēma] ॥ 2 ॥

vi va̠yagṃ ru̍hēma pṛthi̠vyāḥ sa̠mpṛcha̍ḥ pāhi susa̠mbhṛtā̎ tvā̠ sambha̍rā̠myadi̍tyai̠ rāsnā̍'sīndrā̠ṇyai sa̠nnaha̍naṃ pū̠ṣā tē̎ gra̠nthiṃ gra̍thnātu̠ sa tē̠ mā'' sthā̠dindra̍sya tvā bā̠hubhyā̠mudya̍chChē̠ bṛha̠spatē̎-rmū̠rdhnā ha̍rāmyu̠rva̍ntari̍kṣa̠manvi̍hi dēvaṅga̠mama̍si ॥ 3 ॥
(sa̠hasra̍val​śā - a̠ṣṭātrigṃ̍śachcha) (a. 2)

śundha̍ddhva̠ṃ daivyā̍ya̠ karma̍ṇē dēvaya̠jyāyai̍ māta̠riśva̍nō gha̠rmō̍'si̠ dyaura̍si pṛthi̠vya̍si vi̠śvadhā̍yā asi para̠mēṇa̠ dhāmnā̠ dṛgṃha̍sva̠ mā hvā̠-rvasū̍nāṃ pa̠vitra̍masi śa̠tadhā̍ra̠ṃ vasū̍nāṃ pa̠vitra̍masi sa̠hasra̍dhāragṃ hu̠taḥ stō̠kōhu̠tō dra̠phsō̎ 'gnayē̍ bṛha̠tē nākā̍ya̠ svāhā̠ dyāvā̍pṛthi̠vībhyā̠gṃ̠ sā vi̠śvāyu̠ḥ sā vi̠śvavya̍chā̠ḥ sā vi̠śvaka̍rmā̠ saṃ pṛ̍chyaddhva-mṛtāvarī-rū̠rmiṇī̠rmadhu̍mattamā ma̠ndrā dhana̍sya sā̠tayē̠ sōmē̍na̠ tvā''ta̍na̠chmīndrā̍ya̠ dadhi̠ viṣṇō̍ ha̠vyagṃ ra̍kṣasva ॥ 4 ॥
(sōmē̍ - nā̠ṣṭau cha̍) (a. 3)

karma̍ṇē vāṃ dē̠vēbhya̍ḥ śakēya̠ṃ vēṣā̍ya tvā̠ pratyu̍ṣṭa̠gṃ̠ rakṣa̠ḥ pratyu̍ṣṭā̠ arā̍tayō̠ dhūra̍si̠ dhūrva̠ dhūrva̍nta̠ṃ dhūrva̠ taṃ yō̎'smān dhūrva̍ti̠ taṃ dhū̎rva̠yaṃ va̠yaṃ dhūrvā̍ma̠stvaṃ dē̠vānā̍masi̠ sasni̍tama̠ṃ papri̍tama̠ṃ juṣṭa̍tama̠ṃ vahni̍tamaṃ dēva̠hūta̍ma̠-mahru̍tamasi havi̠rdhāna̠ṃ dṛgṃha̍sva̠ mā hvā̎-rmi̠trasya̍ tvā̠ chakṣu̍ṣā̠ prēkṣē̠ mā bhērmā saṃ vi̍kthā̠ mā tvā̍ - [mā tvā̎, hi̠gṃ̠si̠ṣa̠mu̠ru] ॥ 5 ॥

higṃsiṣamu̠ru vātā̍ya dē̠vasya̍ tvā savi̠tuḥ pra̍sa̠vē̎'śvinō̎-rbā̠hubhyā̎ṃ pū̠ṣṇō hastā̎bhyā-ma̠gnayē̠ juṣṭa̠ṃ nirva̍pāmya̠gnīṣōmā̎bhyā-mi̠daṃ dē̠vānā̍mi̠damu̍ naḥ sa̠ha sphā̠tyai tvā̠ nārā̎tyai̠ suva̍ra̠bhi vi khyē̍ṣaṃ vaiśvāna̠raṃ jyōti̠-rdṛgṃha̍ntā̠ṃ duryā̠ dyāvā̍pṛthi̠vyō- ru̠rva̍ntari̍kṣa̠ manvi̠-hyadi̍tyā stvō̠pasthē̍ sādayā̠myagnē̍ ha̠vyagṃ ra̍kṣasva ॥ 6 ॥
( mā tvā̠ - ṣaṭcha̍tvārigṃśachcha ) (a. 4)

dē̠vō va̍ḥ savi̠tōt pu̍nā̠tvachChi̍drēṇa pa̠vitrē̍ṇa̠ vasō̠ḥ sūrya̍sya ra̠śmibhi̠rāpō̍ dēvīragrēpuvō agrēgu̠vō'gra̍ i̠maṃ ya̠jñaṃ na̍ya̠tāgrē̍ ya̠jñapa̍tiṃ dhatta yu̠ṣmānindrō̍ 'vṛṇīta vṛtra̠tūryē̍ yū̠yamindra̍-mavṛṇīddhvaṃ vṛtra̠tūryē̠ prōkṣi̍tāḥ sthā̠gnayē̍ vō̠ juṣṭa̠ṃ prōkṣā̎mya̠gnīṣōmā̎bhyā̠gṃ̠ śundha̍ddhva̠ṃ daivyā̍ya̠ karma̍ṇē dēvaya̠jyāyā̠ ava̍dhūta̠gṃ̠ rakṣō'va̍dhūtā̠
arā̍ta̠yō'di̍tyā̠stvaga̍si̠ prati̍ tvā - [prati̍ tvā, pṛ̠thi̠vī vē̎ttvadhi̠ṣava̍ṇamasi] ॥ 7 ॥

pṛthi̠vī vē̎ttvadhi̠ṣava̍ṇamasi vānaspa̠tyaṃ prati̠ tvā'di̍tyā̠stvagvē̎ttva̠gnēsta̠nūra̍si vā̠chō vi̠sarja̍naṃ dē̠vavī̍tayē tvā gṛhṇā̠myadri̍rasi vānaspa̠tyaḥ sa i̠daṃ dē̠vēbhyō̍ ha̠vyagṃ su̠śami̍ śami̠ṣvēṣa̠mā va̠dōrja̠mā va̍da dyu̠madva̍data va̠yagṃ sa̍ṅghā̠taṃ jē̎ṣma va̠r̠​ṣavṛ̍ddhamasi̠ prati̍ tvā va̠r̠​ṣavṛ̍ddhaṃ vēttu̠ parā̍pūta̠gṃ̠ rakṣa̠ḥ parā̍pūtā̠ arā̍tayō̠ rakṣa̍sāṃ bhā̠gō̍ 'si vā̠yurvō̠ vi vi̍naktu dē̠vō va̍ḥ savi̠tā hira̍ṇyapāṇi̠ḥ prati̍ gṛhṇātu ॥ 8 ॥
( tvā̠ - bhā̠ga - ēkā̍daśa cha ) (a. 5)

ava̍dhūta̠gṃ̠ rakṣō'va̍dhūtā̠ arā̍ta̠yō'di̍tyā̠stvaga̍si̠ prati̍ tvā pṛthi̠vīvē̎ttu di̠vaḥ ska̍mbha̠nira̍si̠ prati̠ tvā'di̍tyā̠stvagvē̎ttu dhi̠ṣaṇā̍'si parva̠tyā prati̍ tvā di̠vaḥ ska̍mbha̠nirvē̎ttu dhi̠ṣaṇā̍'si pārvatē̠yī prati̍ tvā parva̠tirvē̎ttu dē̠vasya̍ tvā savi̠tuḥ pra̍sa̠vē̎-'śvinō̎-rbā̠hubhyā̎ṃ pū̠ṣṇōhastā̎bhyā̠madhi̍ vapāmidhā̠nya̍masi dhinu̠hi dē̠vān prā̠ṇāya̍ tvā 'pā̠nāya̍ tvā vyā̠nāya̍ tvā dī̠rghāmanu̠ prasi̍ti̠māyu̍ṣēdhāṃ dē̠vō va̍ḥ savi̠tā hira̍ṇyapāṇi̠ḥ prati̍ gṛhṇātu ॥ 9 ॥
(prā̠ṇāya̍ tvā̠ - pañcha̍daśa cha) (a. 6)

dhṛṣṭi̍rasi̠ brahma̍ ya̠chChāpā̎gnē̠ 'gnimā̠māda̍ṃ jahi̠ niṣkra̠vyādagṃ̍ sē̠dhā''dē̍va̠yaja̍ṃ vaha̠ nirda̍gdha̠gṃ̠ rakṣō̠ nirda̍gdhā̠ arā̍tayō dhru̠vama̍si pṛthi̠vīṃ dṛ̠gṃ̠hā''yu̍-rdṛgṃha pra̠jāṃ dṛgṃ̍ha sajā̠tāna̠smai yaja̍mānāya̠ paryū̍ha dha̠rtrama̍sya̠ntari̍kṣaṃ dṛgṃha prā̠ṇaṃ dṛgṃ̍hāpā̠naṃ dṛgṃ̍ha sajā̠tāna̠smai yaja̍mānāya̠ paryū̍ha dha̠ruṇa̍masi̠ diva̍ṃ dṛgṃha̠ chakṣu̍- [chakṣu̍ḥ, dṛ̠gṃ̠ha̠ śrōtra̍ṃ dṛgṃha] ॥ 10 ॥

rdṛgṃha̠ śrōtra̍ṃ dṛgṃha sajā̠tāna̠smai yaja̍mānāya̠ paryū̍ha̠ dharmā̍si̠ diśō̍ dṛgṃha̠ yōni̍ṃ dṛgṃha pra̠jāṃ dṛgṃ̍ha sajā̠tāna̠smai yaja̍mānāya̠ paryū̍ha̠ chita̍ḥ stha pra̠jāma̠smai ra̠yima̠smai sa̍jā̠tāna̠smai yaja̍mānāya̠ paryū̍ha̠ bhṛgū̍ṇā̠maṅgi̍rasā̠ṃ tapa̍sā tapyaddhva̠ṃ yāni̍ gha̠rmē ka̠pālā̎nyupachi̠nvanti̍ vē̠dhasa̍ḥ ।
pū̠ṣṇastānyapi̍ vra̠ta i̍ndravā̠yū vi mu̍ñchatām ॥ 11 ॥
(chakṣu̍ - ra̠ṣṭācha̍tvārigṃśachcha) (a. 7)

saṃ va̍pāmi̠ samāpō̍ a̠dbhira̍gmata̠ samōṣa̍dhayō̠ rasē̍na̠ sagṃ rē̠vatī̠-rjaga̍tībhi̠-rmadhu̍matī̠-rmadhu̍matībhiḥ sṛjyaddhvama̠dbhyaḥ pari̠ prajā̍tāḥ stha̠ sama̠dbhiḥ pṛ̍chyaddhva̠ṃ jana̍yatyai tvā̠ saṃ yau̎mya̠gnayē̎ tvā̠'gnīṣōmā̎bhyāṃ ma̠khasya̠ śirō̍'si gha̠rmō̍'si vi̠śvāyu̍ru̠ru pra̍thasvō̠ru tē̍ ya̠jñapa̍tiḥ prathatā̠ṃ tvacha̍ṃ gṛhṇīṣvā̠ntari̍ta̠gṃ̠ rakṣō̠'ntari̍tā̠ arā̍tayōdē̠vastvā̍ savi̠tā śra̍payatu̠ var​ṣi̍ṣṭhē̠ adhi̠ nākē̠'gnistē̍ ta̠nuva̠ṃ mā'ti̍ dhā̠gagnē̍ ha̠vyagṃ ra̍kṣasva̠ saṃ brahma̍ṇā pṛchyasvaika̠tāya̠ svāhā̎ dvi̠tāya̠ svāhā̎ tri̠tāya̠ svāhā̎ ॥ 12 ॥
(sa̠vi̠tā - dvāvigṃ̍śatiścha) (a. 8)

ā da̍da̠ indra̍sya bā̠hura̍si̠ dakṣi̍ṇaḥ sa̠hasra̍bhṛṣṭiḥ śa̠tatē̍jā vā̠yura̍si ti̠gmatē̍jā̠ḥ pṛthi̍vi dēvayaja̠ - nyōṣa̍ddhyāstē̠ mūla̠ṃ mā higṃ̍siṣa̠-mapa̍hatō̠'raru̍ḥ pṛthi̠vyai vra̠jaṃ ga̍chCha gō̠sthāna̠ṃ var​ṣa̍tu tē̠ dyaurba̍dhā̠na dē̍va savitaḥ para̠masyā̎ṃ parā̠vati̍ śa̠tēna̠ pāśai̠ryō̎'smān dvēṣṭi̠ yaṃ cha̍ va̠yaṃ dvi̠ṣmastamatō̠ mā mau̠gapa̍hatō̠'raru̍ḥ pṛthi̠vyai dē̍va̠yaja̍nyai vra̠jaṃ- [vra̠jam, ga̠chCha̠ gō̠sthāna̠ṃ var​ṣa̍tu] ॥ 13 ॥

ga̍chCha gō̠sthāna̠ṃ var​ṣa̍tu tē̠ dyaurba̍dhā̠na dē̍va savitaḥ para̠masyā̎ṃ parā̠vati̍ śa̠tēna̠ pāśai̠ryō̎'smān dvēṣṭi̠ yaṃ cha̍ va̠yaṃ dvi̠ṣmastamatō̠ mā mau̠gapa̍hatō̠'raru̍ḥ pṛthi̠vyā adē̍vayajanō vra̠jaṃ ga̍chCha gō̠sthāna̠ṃ var​ṣa̍tu tē̠ dyaurba̍dhā̠na dē̍va savitaḥ para̠masyā̎ṃ parā̠vati̍ śa̠tēna̠ pāśai̠ryō̎'smān dvēṣṭi̠ yaṃ cha̍ va̠yaṃ dvi̠ṣmastamatō̠ mā- [mā, mau̠ga̠raru̍stē̠ diva̠ṃ mā] ॥ 14 ॥

mau̍ga̠raru̍stē̠ diva̠ṃ mā skā̠n̠. vasa̍vastvā̠ pari̍ gṛhṇantu gāya̠trēṇa̠ Chanda̍sāru̠drāstvā̠ pari̍ gṛhṇantu̠ traiṣṭu̍bhēna̠ Chanda̍sā''di̠tyāstvā̠ pari̍ gṛhṇantu̠ jāga̍tēna̠ Chanda̍sā dē̠vasya̍ savi̠tuḥ sa̠vē karma̍ kṛṇvanti vē̠dhasa̍ ṛ̠tama̍syṛta̠sada̍na-masyṛta̠śrīra̍si̠ dhā a̍si sva̠dhā a̍syu̠rvī chāsi̠ vasvī̍ chāsi pu̠rā krū̠rasya̍ vi̠sṛpō̍ viraphśin nudā̠dāya̍ pṛthi̠vīṃ jī̠radā̍nu̠ryāmaira̍yan cha̠ndrama̍si sva̠dhābhi̠stāṃ dhīrā̍sō anu̠dṛśya̍ yajantē ॥ 15 ॥
(dē̠va̠yaja̍nyai vra̠jaṃ - tamatō̠ mā - vi̍raphśi̠n - nēkā̍daśa cha) (a. 9)

pratyu̍ṣṭa̠gṃ̠ rakṣa̠ḥ pratyu̍ṣṭā̠ arā̍tayō̠ 'gnērva̠stēji̍ṣṭhēna̠ tēja̍sā̠ niṣṭa̍pāmi gō̠ṣṭhaṃ mā nirmṛ̍kṣaṃ vā̠jina̍ṃ tvā sapatnasā̠hagṃ saṃ mā̎rjmi̠ vācha̍ṃ prā̠ṇaṃ chakṣu̠ḥ śrōtra̍ṃ pra̠jāṃ yōni̠ṃ mā nirmṛ̍kṣaṃ vā̠jinī̎ṃ tvā sapatnasā̠hīgṃ saṃ mā̎rjmyā̠śāsā̍nā saumana̠saṃ pra̠jāgṃ saubhā̎gyaṃ ta̠nūm । a̠gnēranu̍vratā bhū̠tvā saṃ na̍hyē sukṛ̠tāya̠ kam ॥su̠pra̠jasa̍stvā va̠yagṃ su̠patnī̠rupa̍- [su̠pathnī̠rupa̍, sē̠di̠mi̠ ।] ॥ 16 ॥

sēdima । agnē̍ sapatna̠dambha̍na̠mada̍bdhāsō̠ adā̎bhyam ॥ i̠maṃ viṣyā̍mi̠ varu̍ṇasya̠ pāśaṃ̠ ṃyamaba̍ddhnīta savi̠tā su̠kēta̍ḥ । dhā̠tuścha̠ yōnau̍ sukṛ̠tasya̍ lō̠kē syō̠naṃ mē̍ sa̠ha patyā̍ karōmi ॥ samāyu̍ṣā̠ sampra̠jayā̠ sama̍gnē̠ varcha̍sā̠ puna̍ḥ । saṃ patnī̠ patyā̠'haṃ ga̍chChē̠ samā̠tmā ta̠nuvā̠ mama̍ ॥ ma̠hī̠nāṃ payō̠'syōṣa̍dhīnā̠gṃ̠ rasa̠stasya̠ tē'kṣī̍yamāṇasya̠ ni- [niḥ, va̠pā̠mi̠ ma̠hī̠nāṃ] ॥ 17 ॥

rva̍pāmi mahī̠nāṃ payō̠'syōṣa̍dhīnā̠gṃ̠ rasō'da̍bdhēna tvā̠ chakṣu̠ṣā'vē̎kṣē suprajā̠stvāya̠ tējō̍'si̠ tējō'nu̠ prēhya̠gnistē̠ tējō̠ mā vi nai̍da̠gnē-rji̠hvā'si̍ su̠bhūrdē̠vānā̠ṃ dhāmnē̍dhāmnē dē̠vēbhyō̠ yaju̍ṣēyajuṣē bhava śu̠krama̍si̠ jyōti̍rasi̠ tējō̍'si dē̠vō va̍ḥ savi̠tōt pu̍nā̠tvachChi̍drēṇa pa̠vitrē̍ṇa̠ vasō̠ḥ sūrya̍sya ra̠śmibhi̍ḥ śu̠kraṃ tvā̍ śu̠krāyā̠ṃ dhāmnē̍dhāmnē dē̠vēbhyō̠ yaju̍ṣēyajuṣē gṛhṇāmi̠ jyōti̍stvā̠ jyōti̍ṣya̠rchistvā̠'rchiṣi̠ dhāmnē̍dhāmnē dē̠vēbhyō̠ yaju̍ṣēyajuṣē gṛhṇāmi ॥ 18 ॥
(upa̠ - nī - ra̠śmibhi̍ḥ śu̠kragṃ - ṣōḍa̍śa cha) (a. 10)

kṛṣṇō̎'syākharē̠ṣṭhō̎'gnayē̎ tvā̠ svāhā̠ vēdi̍rasi ba̠r̠​hiṣē̎ tvā̠ svāhā ̍ba̠r̠​hira̍si sru̠gbhyastvā̠ svāhā̍ di̠vē tvā̠'ntari̍kṣāya tvā pṛthi̠vyai tvā̎ sva̠dhā pi̠tṛbhya̠ ūrgbha̍va bar​hi̠ṣadbhya̍ ū̠rjā pṛ̍thi̠vīṃ ga̍chChata̠ viṣṇō̠ḥ stūpō̠'syūrṇā̎mradasaṃ tvā stṛṇāmi svāsa̠sthaṃ dē̠vēbhyō̍ gandha̠rvō̍'si vi̠śvāva̍su̠-rviśva̍smā̠dīṣa̍tō̠ yaja̍mānasya pari̠dhiri̠ḍa ī̍ḍi̠ta indra̍sya bā̠hura̍si̠- [bā̠hura̍si, dakṣi̍ṇō̠] ॥ 19 ॥

dakṣi̍ṇō̠ yaja̍mānasya pari̠dhiri̠ḍa ī̍ḍi̠tō mi̠trāvaru̍ṇau tvōttara̠taḥ pari̍ dhattāṃ dhru̠vēṇa̠ dharma̍ṇā̠ yaja̍mānasya pari̠dhiri̠ḍa ī̍ḍi̠taḥ sūrya̍stvā pu̠rastā̎t pātu̠ kasyā̎śchida̠bhiśa̍styā vī̠tihō̎traṃ tvā kavē dyu̠manta̠gṃ̠ sami̍dhīma̠hyagnē̍ bṛ̠hanta̍maddhva̠rē vi̠śō ya̠ntrē sthō̠ vasū̍nāgṃ ru̠drāṇā̍-mādi̠tyānā̠gṃ̠ sada̍si sīda ju̠hūru̍pa̠bhṛ-ddhru̠vā'si̍ ghṛ̠tāchī̠ nāmnā̎ pri̠yēṇa̠ nāmnā̎ pri̠yē sada̍si sīdai̠tā a̍sadanth sukṛ̠tasya̍ lō̠kē tā vi̍ṣṇō pāhi pā̠hi ya̠jñaṃ pā̠hi ya̠jñapa̍tiṃ pā̠hi māṃ ya̍jña̠niya̎m ॥ 20 ॥
(bā̠hura̍si - pri̠yē sada̍si̠ - pañcha̍daśa cha) (a. 11)

bhuva̍namasi̠ vi pra̍tha̠svāgnē̠ yaṣṭa̍ri̠daṃ nama̍ḥ ।
juhvēhya̠gnistvā̎ hvayati dēvaya̠jyāyā̠ upa̍bhṛ̠dēhi̍ dē̠vastvā̍ savi̠tā hva̍yati dēvaya̠jyāyā̠ agnā̍viṣṇū̠ mā vā̠mava̍ kramiṣa̠ṃ vi ji̍hāthā̠ṃ mā mā̠ saṃ tā̎ptaṃ lō̠kaṃ mē̍ lōkakṛtau kṛṇuta̠ṃ viṣṇō̠ḥ sthāna̍masī̠ta indrō̍ akṛṇō-dvī̠ryā̍ṇi samā̠rabhyō̠rdhvō a̍ddhva̠rō di̍vi̠spṛśa̠mahru̍tō ya̠jñō ya̠jñapa̍tē̠-rindrā̍vā̠nth svāhā̍ bṛ̠hadbhāḥ pā̠hi mā̎'gnē̠ duścha̍ritā̠dā mā̠ sucha̍ritē bhaja ma̠khasya̠ śirō̍'si̠ sañjyōti̍ṣā̠ jyōti̍raṅktām ॥ 21 ॥
(ahru̍ta̠ - ēka̍vigṃśatiścha) (a. 12)

vāja̍sya mā prasa̠vēnō̎dgrā̠bhēṇōda̍grabhīt । athā̍ sa̠patnā̠gṃ̠ indrō̍ mē nigrā̠bhēṇādha̍rāgṃ akaḥ ॥ u̠dgrā̠bhaṃ cha̍ nigrā̠bhaṃ cha̠ brahma̍ dē̠vā a̍vīvṛdhann । athā̍ sa̠patnā̍nindrā̠gnī mē̍ viṣū̠chīnā̠n vya̍syatām ॥ vasu̍bhyastvā ru̠drēbhya̍stvā''di̠tyēbhya̍stvā̠'ktagṃ rihā̍ṇā vi̠yantu̠ vaya̍ḥ ॥ pra̠jāṃ yōni̠ṃ mā nirmṛ̍kṣa̠mā pyā̍yantā̠māpa̠ ōṣa̍dhayō ma̠rutā̠ṃ pṛṣa̍tayaḥ stha̠ diva̍ṃ- [diva̎m, ga̠chCha̠ tatō̍ nō̠] ॥ 22 ॥

gachCha̠ tatō̍ nō̠ vṛṣṭi̠mēra̍ya । ā̠yu̠ṣpā a̍gnē̠'syāyu̍rmē pāhi chakṣu̠ṣpā a̍gnē'si̠ chakṣu̍rmē pāhi dhru̠vā'si̠ yaṃ pa̍ri̠dhiṃ pa̠ryadha̍tthā̠ agnē̍ dēva pa̠ṇibhi̍-rvī̠yamā̍ṇaḥ । taṃ ta̍ ē̠tamanu̠ jōṣa̍ṃ bharāmi̠ nēdē̠ṣa tvada̍pachē̠tayā̍tai ya̠jñasya̠ pātha̠ upa̠ sami̍tagṃ sagg​srā̠vabhā̍gāḥ sthē̠ṣā bṛ̠hanta̍ḥ prastarē̠ṣṭhā ba̍r​hi̠ṣada̍ścha [ ] ॥ 23 ॥

dē̠vā i̠māṃ vācha̍ma̠bhi viśvē̍ gṛ̠ṇanta̍ ā̠sadyā̠smin ba̠r̠​hiṣi̍ mādayaddhvama̠gnē-rvā̠mapa̍nnagṛhasya̠ sada̍si sādayāmi su̠ṃnāya̍ suṃninī su̠ṃnē mā̍ dhattaṃ dhu̠ri dha̠ryau̍ pāta̠magnē̍ 'dabdhāyō 'śītatanō pā̠hi mā̠'dya di̠vaḥ pā̠hi prasi̍tyai pā̠hi duri̍ṣṭyai pā̠hi du̍radma̠nyai pā̠hi duścha̍ritā̠davi̍ṣaṃ naḥ pi̠tuṃ kṛ̍ṇu su̠ṣadā̠ yōni̠gg̠ svāhā̠ dēvā̍ gātuvidō gā̠tuṃvi̠ttvā gā̠tu mi̍ta̠ mana̍saspata i̠maṃ nō̍ dēva dē̠vēṣu̍ ya̠jñagg​ svāhā̍ vā̠chi svāhā̠ vātē̍ dhāḥ ॥ 24 ॥
(diva̍ṃ - cha - vi̠ttvā gā̠tuṃ - trayō̍daśa cha) (a. 13)

u̠bhā vā̍mindrāgnī āhu̠vaddhyā̍ u̠bhā rādha̍saḥ sa̠ha mā̍da̠yaddhyai̎ । u̠bhā dā̠tārā̍vi̠ṣāgṃ ra̍yī̠ṇāmu̠bhā vāja̍sya sā̠tayē̍ huvē vām ॥ aśra̍va̠gṃ̠ hi bhū̍ri̠dāva̍ttarā vā̠ṃ vijā̍māturu̠ta vā̍ ghā syā̠lāt । athā̠ sōma̍sya̠ praya̍tī yu̠vabhyā̠mindrā̎gnī̠ stōma̍ṃ janayāmi̠ navya̎m ॥ indrā̎gnī nava̠tiṃ purō̍ dā̠sapa̍tnīradhūnutam । sā̠kamēkē̍na̠ karma̍ṇā ॥ śuchi̠ṃ nu stōma̠ṃ nava̍jāta-ma̠dyēndrā̎gnī vṛtrahaṇā ju̠ṣēthā̎m ॥ 25 ॥

u̠bhā hi vāgṃ̍ su̠havā̠ jōha̍vīmi̠ tā vājagṃ̍ sa̠dya u̍śa̠tē dhēṣṭhā̎ ॥ va̠yamu̍ tvā pathaspatē̠ ratha̠ṃ na vāja̍sātayē । dhi̠yē pū̍ṣannayujmahi ॥ pa̠thaspa̍tha̠ḥ pari̍patiṃ vacha̠syā kāmē̍na kṛ̠tō a̠bhyā̍naḍa̠rkam । sanō̍ rāsachChu̠rudha̍ścha̠ndrāgrā̠ dhiya̍ndhiyagṃ sīṣadhāti̠ pra pū̠ṣā ॥ kṣētra̍sya̠ pati̍nā va̠yagṃ hi̠tēnē̍va jayāmasi । gāmaśva̍ṃ pōṣayi̠tnvā sa nō̍ [sa na̍ḥ, mṛ̠ḍā̠tī̠dṛśē̎ ।] ॥ 26 ॥

mṛḍātī̠dṛśē̎ ॥ kṣētra̍sya patē̠ madhu̍mantamū̠rmiṃ dhē̠nuri̍va̠ payō̍ a̠smāsu̍ dhukṣva । ma̠dhu̠śchuta̍ṃ ghṛ̠tami̍va̠ supū̍tamṛ̠tasya̍ na̠ḥ pata̍yō mṛḍayantu ॥ agnē̠ naya̍ su̠pathā̍ rā̠yē a̠smān. viśvā̍ni dēva va̠yunā̍ni vi̠dvān । yu̠yō̠ddhya̍smajju̍hurā̠ṇamēnō̠ bhūyi̍ṣṭhāṃ tē̠ nama̍uktiṃ vidhēma ॥ ā dē̠vānā̠mapi̠ panthā̍maganma̠ yachCha̠knavā̍ma̠ tadanu̠ pravō̍ḍhum । a̠gni-rvi̠dvānth sa ya̍jā̠- [sa ya̍jāt, sēdu̠ hōtā̠ sō] ॥ 27 ॥

thsēdu̠ hōtā̠ sō a̍ddhva̠rānth sa ṛ̠tūn ka̍lpayāti ॥yadvāhi̍ṣṭha̠ṃ tada̠gnayē̍ bṛ̠hada̍rcha vibhāvasō । mahi̍ṣīva̠ tvadra̠yistvadvājā̠ udī̍ratē ॥ agnē̠ tvaṃ pā̍rayā̠ navyō̍ a̠smānth sva̠stibhi̠rati̍ du̠rgāṇi̠ viśvā̎ । pūścha̍ pṛ̠thvī ba̍hu̠lā na̍ u̠rvī bhavā̍ tō̠kāya̠ tana̍yāya̠ śaṃ yōḥ ॥ tvama̍gnē vrata̠pā a̍si dē̠va ā martyē̠ṣvā । tvaṃ ya̠jñēṣvīḍya̍ḥ ॥ yadvō̍ va̠yaṃ pra̍mi̠nāma̍ vra̠tāni̍ vi̠duṣā̎ṃ dēvā̠ avi̍duṣṭarāsaḥ । a̠gniṣṭa-dviśva̠mā pṛ̍ṇāti vi̠dvān. yēbhi̍-rdē̠vāgṃ ṛ̠tubhi̍ḥ ka̠lpayā̍ti ॥ 28 ॥
(ju̠ṣēthā̠mā - sa nō̍ - yajā̠ - dā - trayō̍vigṃśatiścha) (a. 14)

(i̠ṣē tvā̍ - ya̠jñasya̠ - śundha̍dhva̠ṃ - karma̍ṇē vāṃ - dē̠vō-'va̍dhūta̠ṃ - dhuṣṭi̠ḥ - saṃ va̍pā̠- myā da̍dē̠ - pratyu̍ṣṭa̠ṃ - kṛṣṇō̍'si̠ - bhuva̍namasi̠ - vāja̍syō̠bhā vā̠ṃ - chatu̍rdaśa )

(i̠ṣē - dṛgṃ̍ha̠ - bhuva̍na - ma̠ṣṭāvigṃ̍śatiḥ )

(i̠ṣē tvā̍, ka̠lpayā̍ti)

॥ hariḥ̍ ōm ॥

॥ kṛṣṇa yajurvēdīya taittirīya saṃhitāyāṃ prathamakāṇḍē prathamaḥ praśnaḥ samāptaḥ ॥