kṛṣṇa yajurvēdīya taittirīya saṃhitāyāṃ prathamakāṇḍē tṛtīyaḥ praśnaḥ -(agniṣṭōmē paśuḥ)

ōṃ namaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥

dē̠vasya̍ tvā savi̠tuḥ pra̍sa̠vē̎'śvinō̎-rbā̠hubhyā̎ṃ pū̠ṣṇō hastā̎bhyā̠mā da̠dē'bhri̍rasi̠ nāri̍rasi̠ pari̍likhita̠gṃ̠ rakṣa̠ḥ pari̍likhitā̠ arā̍taya i̠dama̠hagṃ rakṣa̍sō grī̠vā api̍ kṛntāmi̠ yō̎'smān dvēṣṭi̠ yaṃ cha̍ va̠yaṃ dvi̠ṣma i̠dama̍sya grī̠vā api̍ kṛntāmi di̠vē tvā̠'ntari̍kṣāya tvā pṛthi̠vyai tvā̠ śundha̍tāṃ lō̠kaḥ pi̍tṛ̠ṣada̍nō̠ yavō̍'si ya̠vayā̠sma-ddvēṣō̍ [ya̠vayā̠sma-ddvēṣa̍ḥ, ya̠vayārā̍tīḥ] ॥ 1 ॥

ya̠vayārā̍tīḥ pitṛ̠ṇāgṃ sada̍nama̠syuddivagg̍ stabhā̠nā'ntari̍kṣaṃ pṛṇa pṛthi̠vīṃ dṛgṃ̍ha dyutā̠nastvā̍ māru̠tō mi̍nōtu mi̠trāvaru̍ṇayō-rdhru̠vēṇa̠ dharma̍ṇā brahma̠vani̍ṃ tvā kṣatra̠vanigṃ̍ suprajā̠vanigṃ̍ rāyaspōṣa̠vani̠ṃ paryū̍hāmi̠ brahma̍ dṛgṃha kṣa̠traṃ dṛgṃ̍ha pra̠jāṃ dṛgṃ̍ha rā̠yaspōṣa̍ṃ dṛgṃha ghṛ̠tēna̍ dyāvāpṛthivī̠ ā pṛ̍ṇēthā̠mindra̍sya̠ sadō̍'si viśvaja̠nasya̍ Chā̠yā pari̍ tvā girvaṇō̠ gira̍ i̠mā bha̍vantu vi̠śvatō̍ vṛ̠ddhāyu̠manu̠ vṛddha̍yō̠ juṣṭā̍ bhavantu̠ juṣṭa̍ya̠ indra̍sya̠ syūra̠sīndra̍sya dhru̠vama̍syai̠ndrama̠sīndrā̍ya tvā ॥ 2 ॥
(dvēṣa̍ - i̠mā - a̠ṣṭāda̍śa cha ) (a. 1)

ra̠kṣō̠haṇō̍ valaga̠hanō̍ vaiṣṇa̠vān kha̍nāmī̠dama̠haṃ taṃ va̍la̠gamudva̍pāmi̠ yaṃ na̍ḥ samā̠nō yamasa̍mānō nicha̠khānē̠damē̍na̠madha̍raṃ karōmi̠ yō na̍ḥ samā̠nō yō'sa̍mānō'rātī̠yati̍ gāya̠trēṇa̠ Chanda̠sā'va̍bāḍhō vala̠gaḥ kimatra̍ bha̠draṃ tannau̍ sa̠ha vi̠rāḍa̍si sapatna̠hā sa̠mrāḍa̍si bhrātṛvya̠hā sva̠rāḍa̍syabhimāti̠hā vi̍śvā̠rāḍa̍si̠ viśvā̍sāṃ nā̠ṣṭrāṇāgṃ̍ ha̠ntā [ha̠ntā, ra̠kṣō̠haṇō̍] ॥ 3 ॥

ra̍kṣō̠haṇō̍ valaga̠hana̠ḥ prōkṣā̍mi vaiṣṇa̠vān ra̍kṣō̠haṇō̍ valaga̠hanō'va̍ nayāmi vaiṣṇa̠vān yavō̍'si ya̠vayā̠sma-ddvēṣō̍ ya̠vayārā̍tī rakṣō̠haṇō̍ valaga̠hanō'va̍ stṛṇāmi vaiṣṇa̠vān ra̍kṣō̠haṇō̍ valaga̠hanō̠'bhi ju̍hōmi vaiṣṇa̠vān ra̍kṣō̠haṇau̍ valaga̠hanā̠vupa̍ dadhāmi vaiṣṇa̠vī ra̍kṣō̠haṇau̍ valaga̠hanau̠ paryū̍hāmi vaiṣṇa̠vī ra̍kṣō̠haṇau̍ valaga̠hanau̠ pari̍ stṛṇāmi vaiṣṇa̠vī ra̍kṣō̠haṇau̍ valaga̠hanau̍ vaiṣṇa̠vī bṛ̠hanna̍si bṛ̠hadgrā̍vā bṛha̠tīmindrā̍ya̠ vācha̍ṃ vada ॥ 4 ॥
( ha̠ntē-ndrā̍ya̠ dvē cha̍ ) (a. 2)

vi̠bhūra̍si pra̠vāha̍ṇō̠ vahni̍rasi havya̠vāha̍naḥ śvā̠trō̍'si̠ prachē̍tāstu̠thō̍'si vi̠śvavē̍dā u̠śiga̍si ka̠viraṅghā̍rirasi̠ bambhā̍rirava̠syura̍si̠ duva̍svāñChu̠ndhyūra̍si mārjā̠līya̍ḥ sa̠mrāḍa̍si kṛ̠śānu̍ḥ pari̠ṣadyō̍'si̠ pava̍mānaḥ pra̠takvā̍'si̠ nabha̍svā̠nasa̍ṃmṛṣṭō'si havya̠sūda̍ ṛ̠tadhā̍mā'si̠ suvarjyōti̠-rbrahma̍jyōtirasi̠ suva̍rdhāmā̠'jō̎ 'syēka̍pā̠dahi̍rasi bu̠ddhniyō̠ raudrē̠ṇānī̍kēna pā̠hi mā̎'gnē pipṛ̠hi mā̠ mā mā̍ higṃsīḥ ॥ 5 ॥
(anī̍kēnā̠-ṣṭau cha̍) (a. 3)

tvagṃ sō̍ma tanū̠kṛdbhyō̠ dvēṣō̎bhyō̠'nyakṛ̍tēbhya u̠ru ya̠ntā'si̠ varū̍tha̠gg̠ svāhā̍ juṣā̠ṇō a̠pturājya̍sya vētu̠ svāhā̠'yannō̍ a̠gnirvari̍vaḥ kṛṇōtva̠yaṃ mṛdha̍ḥ pu̠ra ē̍tu prabhi̠ndann । a̠yagṃ śatrū̎mjayatu̠ jar​hṛ̍ṣāṇō̠'yaṃ vāja̍ṃ jayatu̠ vāja̍sātau । u̠ru vi̍ṣṇō̠ vi kra̍masvō̠ru kṣayā̍ya naḥ kṛdhi । ghṛ̠taṃ ghṛ̍tayōnē piba̠ prapra̍ ya̠jñapa̍tiṃ tira । sōmō̍ jigāti gātu̠vi- [gātu̠vit, dē̠vānā̍mēti] ॥ 6 ॥

ddē̠vānā̍mēti niṣkṛ̠tamṛ̠tasya̠ yōni̍mā̠sada̠madi̍tyā̠ḥ sadō̠'syadi̍tyā̠ḥ sada̠ ā sī̍dai̠ṣa vō̍ dēva savita̠ḥ sōma̠stagṃ ra̍kṣaddhva̠ṃ mā vō̍ dabhadē̠tattvagṃ sō̍ma dē̠vō dē̠vānupā̍gā i̠dama̠haṃ ma̍nu̠ṣyō̍ manu̠ṣyā̎mth sa̠ha pra̠jayā̍ sa̠ha rā̠yaspōṣē̍ṇa̠ namō̍ dē̠vēbhya̍ḥ sva̠dhā pi̠tṛbhya̍ i̠dama̠haṃ nirvaru̍ṇasya̠ pāśā̠th suva̍ra̠bhi [ ] ॥ 7 ॥

vi khyē̍ṣaṃ vaiśvāna̠raṃ jyōti̠ragnē̎ vratapatē̠ tvaṃ vra̠tānā̎ṃ vra̠tapa̍tirasi̠ yā mama̍ ta̠nūstvayyabhū̍di̠yagṃ sā mayi̠ yā tava̍ ta̠nū-rmayyabhū̍dē̠ṣā sā tvayi̍ yathāya̠thaṃ nau̎ vratapatē vra̠tinō̎-rvra̠tāni̍ ॥ 8 ॥
(gā̠tu̠vida̠-bhyē-ka̍trigṃśachcha) (a. 4)

atya̠nyānagā̠ṃ nānyānupā̍gāma̠rvāktvā̠ parai̍ravidaṃ pa̠rō'va̍rai̠staṃ tvā̍ juṣē vaiṣṇa̠vaṃ dē̍vaya̠jyāyai̍ dē̠vastvā̍ savi̠tā maddhvā̍'na̠ktvōṣa̍dhē̠ trāya̍svaina̠gg̠ svadhi̍tē̠ mainagṃ̍ higṃsī̠-rdiva̠magrē̍ṇa̠ mā lē̍khīra̠ntari̍kṣa̠ṃ maddhyē̍na̠ mā higṃ̍sīḥ pṛthi̠vyā saṃ bha̍va̠ vana̍spatē śa̠tava̍l​śō̠ vi rō̍ha sa̠hasra̍val​śā̠ vi va̠yagṃ ru̍hēma̠ yaṃ tvā̠'yagg​ svadhi̍ti̠stēti̍jānaḥ praṇi̠nāya̍ maha̠tē saubha̍gā̠yāchChi̍nnō̠ rāya̍ḥ su̠vīra̍ḥ ॥ 9 ॥
(yaṃ-daśa̍ cha) (a. 5)

pṛ̠thi̠vyai tvā̠ntari̍kṣāya tvā di̠vē tvā̠ śundha̍tāṃ lō̠kaḥ pi̍tṛ̠ṣada̍nō̠ yavō̍'si ya̠vayā̠sma-ddvēṣō̍ ya̠vayārā̍tīḥ pitṛ̠ṇāgṃ sada̍namasi svāvē̠śō̎-'syagrē̠gā nē̍tṛ̠ṇāṃ vana̠spati̠radhi̍ tvā sthāsyati̠ tasya̍ vittā-ddē̠vastvā̍ savi̠tā maddhvā̍'naktu supippa̠lābhya̠-stvauṣa̍dhībhya̠ uddivagg̍ stabhā̠nā'ntari̍kṣaṃ pṛṇa pṛthi̠vīmupa̍rēṇa dṛgṃha̠ tē tē̠ dhāmā̎nyuśmasī [dhāmā̎nyuśmasi, ga̠maddhyē̠ gāvō̠] ॥ 10 ॥

ga̠maddhyē̠ gāvō̠ yatra̠ bhūri̍śṛṅgā a̠yāsa̍ḥ । atrāha̠ tadu̍rugā̠yasya̠ viṣṇō̎ḥ pa̠ramaṃ pa̠damava̍ bhāti̠ bhūrē̎ḥ ॥ viṣṇō̠ḥ karmā̍ṇi paśyata̠ yatō̎ vra̠tāni̍ paspa̠śē । indra̍sya̠ yujya̠ḥ sakhā̎ ॥ tad-viṣṇō̎ḥ para̠maṃ pa̠dagṃ sadā̍ paśyanti sū̠raya̍ḥ । di̠vīva̠ chakṣu̠rāta̍tam ॥ bra̠hma̠vani̍ṃ tvā kṣatra̠vanigṃ̍ suprajā̠vanigṃ̍ rāyaspōṣa̠vani̠ṃ paryū̍hāmi̠ brahma̍ dṛgṃha kṣa̠traṃ dṛgṃ̍ha pra̠jāṃ dṛgṃ̍ha rā̠yaspōṣa̍ṃ dṛgṃha pari̠vīra̍si̠ pari̍ tvā̠ daivī̠rviśō̎ vyayantā̠ṃ parī̠magṃ rā̠yaspōṣō̠ yaja̍mānaṃ manu̠ṣyā̍ a̠ntari̍kṣasya tvā̠ sānā̠vava̍ gūhāmi ॥ 11 ॥
(u̠śma̠sī̠-pōṣa̠mē-kā̠nnavigṃ̍śa̠tiścha̍) (a. 6)

i̠ṣē tvō̍pa̠vīra̠syupō̍ dē̠vān daivī̠-rviśa̠ḥ prāgu̠-rvahnī̍ru̠śijō̠ bṛha̍spatē dhā̠rayā̠ vasū̍ni ha̠vyā tē̎ svadantā̠ṃ dēva̍ tvaṣṭa̠rvasu̍ raṇva̠ rēva̍tī̠ rama̍ddhva-ma̠gnē-rja̠nitra̍masi̠ vṛṣa̍ṇau stha u̠rvaśya̍syā̠yura̍si purū̠ravā̍ ghṛ̠tēnā̠ktē vṛṣa̍ṇaṃ dadhāthāṃ gāya̠traṃ Chandō'nu̠ pra jā̍yasva̠ traiṣṭu̍bha̠ṃ jāga̍ta̠ṃ Chandō'nu̠ pra jā̍yasva̠ bhava̍ta- [bhava̍tam, na̠ḥ sama̍nasau̠] ॥ 12 ॥

nna̠ḥ sama̍nasau̠ samō̍kasāvarē̠pasau̎ । mā ya̠jñagṃ higṃ̍siṣṭa̠ṃ mā ya̠jñapa̍tiṃ jātavēdasau śi̠vau bha̍vatama̠dya na̍ḥ ॥ a̠gnāva̠gniścha̍rati̠ pravi̍ṣṭa̠ ṛṣī̍ṇāṃ pu̠trō a̍dhirā̠ja ē̠ṣaḥ । svā̠hā̠kṛtya̠ brahma̍ṇā tē juhōmi̠ mā dē̠vānā̎ṃ mithu̠yā ka̍rbhāga̠dhēya̎m ॥ 13 ॥
(bhava̍ta̠-mēka̍trigṃśachcha) (a. 7)

ā da̍da ṛ̠tasya̍ tvā dēvahavi̠ḥ pāśē̠nā''ra̍bhē̠ dhar​ṣā̠ mānu̍ṣāna̠dbhyastvauṣa̍dhībhya̠ḥ prōkṣā̎mya̠pāṃ pē̠rura̍si svā̠ttaṃ chi̠th sadē̍vagṃ ha̠vyamāpō̍ dēvī̠ḥ svada̍taina̠gṃ̠ saṃ tē̎ prā̠ṇō vā̠yunā̍ gachChatā̠gṃ̠ saṃ yaja̍trai̠raṅgā̍ni̠ saṃ ya̠jñapa̍tirā̠śiṣā̍ ghṛ̠tēnā̠ktau pa̠śuṃ trā̍yēthā̠gṃ̠ rēva̍tī-rya̠jñapa̍tiṃ priya̠dhā'' vi̍śa̠tōrō̍ antarikṣa sa̠jū-rdē̠vēna̠ [sa̠jū-rdē̠vēna̍, vātē̍nā̠'sya] ॥ 14 ॥

vātē̍nā̠'sya ha̠viṣa̠stmanā̍ yaja̠ sama̍sya ta̠nuvā̍ bhava̠ var​ṣī̍yō̠ var​ṣī̍yasi ya̠jñē ya̠jñapati̍ṃ dhāḥ pṛ̍thi̠vyāḥ sa̠mpṛcha̍ḥ pāhi̠ nama̍sta ātānā'na̠rvā prēhi̍ ghṛ̠tasya̍ ku̠lyāmanu̍ sa̠ha pra̠jayā̍ sa̠ha rā̠yaspōṣē̠ṇā ''pō̍ dēvīḥ śuddhāyuvaḥ śu̠ddhā yū̠yaṃ dē̠vāgṃ ū̎ḍhvagṃ śu̠ddhā va̠yaṃ pari̍viṣṭāḥ parivē̠ṣṭārō̍ vō bhūyāsma ॥ 15 ॥
(dē̠vana̠-chatu̍śchatvārigṃśachcha) (a. 8)

vākta̠ ā pyā̍yatāṃ prā̠ṇasta̠ ā pyā̍yatā̠ṃ chakṣu̍sta̠ ā pyā̍yatā̠gg̠ śrōtra̍ṃ ta̠ ā pyā̍yatā̠ṃ yā tē̎ prā̠ṇāñChugja̠gāma̠ yā chakṣu̠ryā śrōtra̠ṃ yattē̎ krū̠raṃ yadāsthi̍ta̠ṃ tatta̠ ā pyā̍yatā̠ṃ tatta̍ ē̠tēna̍ śundhatā̠ṃ nābhi̍sta̠ ā pyā̍yatāṃ pā̠yusta̠ ā pyā̍yatāgṃ śu̠ddhāścha̠ritrā̠ḥ śama̠dbhya- [ma̠dhbhyaḥ, śamōṣa̍dhībhya̠ḥ śaṃ] ॥ 16 ॥

śśamōṣa̍dhībhya̠ḥ śaṃ pṛ̍thi̠vyai śamahō̎bhyā̠-mōṣa̍dhē̠ trāya̍svaina̠gg̠ svadhi̍tē̠ mainagṃ̍ higṃsī̠ rakṣa̍sāṃ bhā̠gō̍'sī̠dama̠hagṃ rakṣō̍'dha̠maṃ tamō̍ nayāmi̠ yō̎'smān dvēṣṭi̠ yaṃ cha̍ va̠yaṃ dvi̠ṣma i̠damē̍namadha̠maṃ tamō̍ nayāmī̠ṣē tvā̍ ghṛ̠tēna̍ dyāvāpṛthivī̠ prōrṇvā̍thā̠-machChi̍nnō̠ rāya̍ḥ su̠vīra̍ u̠rva̍ntari̍kṣa̠manvi̍hi̠ vāyō̠ vīhi̍ stō̠kānā̠gg̠ svāhō̠rdhvana̍bhasaṃ māru̠taṃ ga̍chChatam ॥ 17 ॥
(a̠dbhyō-vīhi̠-pañcha̍ cha) (a. 9)

saṃ tē̠ mana̍sā̠ manaḥ̠ saṃ prā̠ṇēna̍ prā̠ṇō juṣṭa̍ṃ dē̠vēbhyō̍ ha̠vyaṃ ghṛ̠tava̠th svāhai̠ndraḥ prā̠ṇō aṅgē̍aṅgē̠ ni dē̎ddhyadai̠ndrō̍ 'pā̠nō aṅgē̍aṅgē̠ vi bō̍bhuva̠ddēva̍ tvaṣṭa̠rbhūri̍ tē̠ sagṃsa̍mētu̠ viṣu̍rūpā̠ yath sala̍kṣmāṇō̠ bhava̍tha dēva̠trā yanta̠mava̍sē̠ sakhā̠yō'nu̍ tvā mā̠tā pi̠tarō̍ madantu̠ śrīra̍sya̠gnistvā̎ śrīṇā̠tvāpa̠ḥ sama̍riṇa̠n vāta̍sya [ ] ॥ 18 ॥

tvā̠ dhrajyai̍ pū̠ṣṇō ragg​hyā̍ a̠pāmōṣa̍dhīnā̠gṃ̠ rōhi̍ṣyai ghṛ̠taṃ ghṛ̍tapāvānaḥ pibata̠ vasā̎ṃ vasāpāvānaḥ pibatā̠'ntari̍kṣasya ha̠vira̍si̠ svāhā̎ tvā̠'ntari̍kṣāya̠ diśa̍ḥ pra̠diśa̍ ā̠diśō̍ vi̠diśa̍ u̠ddiśa̠ḥ svāhā̍ di̠gbhyō namō̍ di̠gbhyaḥ ॥ 19 ॥
(vā̍tasyā̠-ṣṭāvigṃ̍śatiścha) (a. 10)

sa̠mu̠draṃ ga̍chCha̠ svāhā̠'ntari̍kṣaṃ gachCha̠ svāhā̍ dē̠vagṃ sa̍vi̠tāra̍ṃ gachCha̠ svāhā̍'hōrā̠trē ga̍chCha̠ svāhā̍ mi̠trāvaru̍ṇau gachCha̠ svāhā̠ sōma̍ṃ gachCha̠ svāhā̍ ya̠jñaṃ ga̍chCha̠ svāhā̠ Chandāgṃ̍si gachCha̠ svāhā̠ dyāvā̍pṛthi̠vī ga̍chCha̠ svāhā̠ nabhō̍ di̠vyaṃ ga̍chCha̠ svāhā̠'gniṃ vai̎śvāna̠raṃ ga̍chCha̠ svāhā̠'dbhyastvauṣa̍dhībhyō̠ manō̍ mē̠ hārdi̍ yachCha ta̠nūṃ tvacha̍ṃ pu̠traṃ naptā̍ramaśīya̠ śuga̍si̠ tama̠bhi śō̍cha̠ yō̎'smān dvēṣṭi̠ yaṃ cha̍ va̠yaṃ dvi̠ṣmō dhāmnō̍dhāmnō rājanni̠tō va̍ruṇa nō muñcha̠ yadāpō̠ aghni̍yā̠ varu̠ṇēti̠ śapā̍mahē̠ tatō̍ varuṇa nō muñcha ॥ 20
(a̠si̠-ṣaḍvigṃ̍śatiścha ) (a. 11)

ha̠viṣma̍tīri̠mā āpō̍ ha̠viṣmā̎n dē̠vō a̍ddhva̠rō ha̠viṣmā̠gṃ̠ ā vi̍vāsati ha̠viṣmāgṃ̍ astu̠ sūrya̍ḥ ॥ a̠gnērvō 'pa̍nnagṛhasya̠ sada̍si sādayāmi su̠mnāya̍ sumninīḥ su̠mnē mā̍ dhattēndrāgni̠yō-rbhā̍ga̠dhēyī̎ḥ stha mi̠trāvaru̍ṇayō-rbhāga̠dhēyī̎ḥ stha̠ viśvē̍ṣāṃ dē̠vānā̎ṃ bhāga̠dhēyī̎ḥ stha ya̠jñē jā̍gṛta ॥ 21 ॥
(ha̠viṣma̍tī̠-śchatu̍strigṃśat) (a. 12)

hṛ̠dē tvā̠ mana̍sē tvā di̠vē tvā̠ sūryā̍ya tvō̠rdhvami̠mama̍ddhva̠raṃ kṛ̍dhi di̠vi dē̠vēṣu̠ hōtrā̍ yachCha̠ sōma̍ rāja̠nnēhyava̍ rōha̠ mā bhērmā saṃ vi̍kthā̠ mā tvā̍ higṃsiṣaṃ pra̠jāstvamu̠pāva̍rōha pra̠jāstvāmu̠pāva̍rōhantu śṛ̠ṇōtva̠gniḥ sa̠midhā̠ hava̍ṃ mē śṛ̠ṇvantvāpō̍ dhi̠ṣaṇā̎ścha dē̠vīḥ । śṛ̠ṇōta̍ grāvāṇō vi̠duṣō̠ nu [ ] ॥ 22 ॥

ya̠jñagṃ śṛ̠ṇōtu̍ dē̠vaḥ sa̍vi̠tā hava̍ṃ mē । dēvī̍rāpō apāṃ napā̠dya ū̠rmir​ha̍vi̠ṣya̍ indri̠yāvā̎n ma̠dinta̍ma̠staṃ dē̠vēbhyō̍ dēva̠trā dha̍tta śu̠kragṃ śu̍kra̠pēbhyō̠ yēṣā̎ṃ bhā̠gaḥ stha svāhā̠ kār​ṣi̍ra̠syapā̠'pāṃ mṛ̠ddhragṃ sa̍mu̠drasya̠ vō'kṣi̍tyā̠ unna̍yē । yama̍gnē pṛ̠thsu martya̠māvō̠ vājē̍ṣu̠ yaṃ ju̠nāḥ । sa yantā̠ śaśva̍tī̠riṣa̍ḥ ॥ 23 ॥
( nu-sa̠ptacha̍tvārigṃśachcha) (a. 13)

tvama̍gnē ru̠drō asu̍rō ma̠hō di̠vastvagṃ śardhō̠ māru̍taṃ pṛ̠kṣa ī̍śiṣē । tvaṃ vātai̍raru̠ṇairyā̍si śaṅga̠yastvaṃ pū̠ṣā vi̍dha̠taḥ pā̍si̠ nutmanā̎ ॥ ā vō̠ rājā̍namaddhva̠rasya̍ ru̠dragṃ hōtā̍ragṃ satya̠yaja̠gṃ̠ rōda̍syōḥ । a̠gniṃ pu̠rā ta̍nayi̠tnō ra̠chittā̠ddhira̍ṇyarūpa̠mava̍sē kṛṇuddhvam ॥ a̠gnir​hōtā̠ ni ṣa̍sādā̠ yajī̍yānu̠pasthē̍ mā̠tuḥ su̍ra̠bhāvu̍ lō̠kē । yuvā̍ ka̠viḥ pu̍runi̠ṣṭha [pu̍runi̠ṣṭhaḥ, ṛ̠tāvā̍ dha̠rtā] ॥ 24 ॥

ṛ̠tāvā̍ dha̠rtā kṛ̍ṣṭī̠nāmu̠ta maddhya̍ i̠ddhaḥ ॥sā̠ddhvīma̍ka-rdē̠vavī̍tiṃ nō a̠dya ya̠jñasya̍ ji̠hvāma̍vidāma̠ guhyā̎m । sa āyu̠rā'gā̎th sura̠bhirvasā̍nō bha̠drāma̍ka-rdē̠vahū̍tiṃ nō a̠dya ॥ akra̍ndada̠gniḥ sta̠naya̍nniva̠ dyauḥ kṣāmā̠ rēri̍hadvī̠rudha̍ḥ sama̠ñjann । sa̠dyō ja̍jñā̠nō vi hīmi̠ddhō akhya̠dā rōda̍sī bhā̠nunā̍ bhātya̠ntaḥ ॥ tvē vasū̍ni purvaṇīka [purvaṇīka, hō̠ta̠rdō̠ṣā] ॥ 25 ॥

hōtardō̠ṣā vastō̠rēri̍rē ya̠jñiyā̍saḥ । kṣāmē̍va̠ viśvā̠ bhuva̍nāni̠ yasmi̠nth sagṃ saubha̍gāni dadhi̠rē pā̍va̠kē ॥ tubhya̠ṃ tā a̍ṅgirastama̠ viśvā̎ḥ sukṣi̠taya̠ḥ pṛtha̍k । agnē̠ kāmā̍ya yēmirē ॥ a̠śyāma̠ taṃ kāma̍magnē̠ tavō̠tya̍śyāma̍ ra̠yigṃ ra̍yivaḥ su̠vīra̎m । a̠śyāma̠ vāja̍ma̠bhi vā̠jaya̍ntō̠ 'śyāma̍ dyu̠mnama̍jarā̠jara̍ṃ tē ॥śrēṣṭha̍ṃ yaviṣṭha bhāra̠tāgnē̎ dyu̠manta̠mā bha̍ra ॥ 26 ॥

vasō̍ puru̠spṛhagṃ̍ ra̠yim ॥ sa śvi̍tā̠nasta̍nya̠tū rō̍chana̠sthā a̠jarē̍bhi̠-rnāna̍dadbhi̠ryavi̍ṣṭhaḥ । yaḥ pā̍va̠kaḥ pu̍ru̠tama̍ḥ pu̠rūṇi̍ pṛ̠thūnya̠gnira̍nu̠yāti̠ bharvann̍ ॥ āyu̍ṣṭē vi̠śvatō̍ dadhada̠yama̠gni-rvarē̎ṇyaḥ । puna̍stē prā̠ṇa ā'ya̍ti̠ parā̠ yakṣmagṃ̍ suvāmi tē ॥ ā̠yu̠rdā a̍gnē ha̠viṣō̍ juṣā̠ṇō ghṛ̠tapra̍tīkō ghṛ̠tayō̍nirēdhi । ghṛ̠taṃ pī̠tvā madhu̠ chāru̠ gavya̍ṃ pi̠tēva̍ pu̠trama̠bhi [pu̠trama̠bhi, ra̠kṣa̠tā̠di̠mam] ॥ 27 ॥

ra̍kṣatādi̠mam । tasmai̍ tē prati̠harya̍tē̠ jāta̍vēdō̠ vicha̍r​ṣaṇē । agnē̠ janā̍mi suṣṭu̠tim ॥ di̠vaspari̍ pratha̠maṃ ja̍jñē a̠gnira̠sma-ddvi̠tīya̠ṃ pari̍ jā̠tavē̍dāḥ । tṛ̠tīya̍ma̠phsu nṛ̠maṇā̠ aja̍sra̠mindhā̍na ēnaṃ jaratē svā̠dhīḥ ॥ śuchi̍ḥ pāvaka̠ vandyō'gnē̍ bṛ̠hadvi rō̍chasē । tvaṃ ghṛ̠tēbhi̠rāhu̍taḥ ॥ dṛ̠śā̠nō ru̠kma u̠rvyā vya̍dyaud-du̠rmar​ṣa̠māyu̍ḥ śri̠yē ru̍chā̠naḥ । a̠gnira̠mṛtō̍ abhava̠dvayō̍bhi̠- [abhava̠dvayō̍bhiḥ, yadē̍na̠ṃ] ॥ 28 ॥

ryadē̍na̠ṃ dyauraja̍nayath su̠rētā̎ḥ ॥ ā yadi̠ṣē nṛ̠pati̠ṃ tēja̠ āna̠ṭChuchi̠ rētō̠ niṣi̍kta̠ṃ dyaura̠bhīkē̎ । a̠gniḥ śardha̍manava̠dyaṃ yuvā̍nagg​ svā̠dhiya̍ṃ janayath sū̠daya̍chcha ॥ sa tējī̍yasā̠ mana̍sā̠ tvōta̍ u̠ta śi̍kṣa svapa̠tyasya̍ śi̠kṣōḥ । agnē̍ rā̠yō nṛta̍masya̠ prabhū̍tau bhū̠yāma̍ tē suṣṭu̠taya̍ścha̠ vasva̍ḥ ॥ agnē̠ saha̍nta̠mā bha̍ra dyu̠mnasya̍ prā̠sahā̍ ra̠yim । viśvā̠ ya- [viśvā̠ yaḥ, cha̠r̠​ṣa̠ṇīra̠bhyā̍sā vājē̍ṣu] ॥ 29 ॥

ścha̍r̠​ṣa̠ṇīra̠bhyā̍sā vājē̍ṣu sā̠saha̍t ॥ tama̍gnē pṛtanā̠sahagṃ̍ ra̠yigṃ sa̍hasva̠ ā bha̍ra । tvagṃ hi sa̠tyō adbhu̍tō dā̠tā vāja̍sya̠ gōma̍taḥ ॥ u̠kṣānnā̍ya va̠śānnā̍ya̠ sōma̍pṛṣṭhāya vē̠dhasē̎ । stōmai̎-rvidhēmā̠'gnayē̎ ॥ va̠dmā hi sū̍nō̠ asya̍dma̠sadvā̍ cha̠krē a̠gni-rja̠nuṣā 'jmā'nna̎m । sa tvaṃ na̍ ūrjasana̠ ūrja̍ṃ dhā̠ rājē̍va jēravṛ̠kē kṣē̎ṣya̠ntaḥ ॥ agna̠ āyūgṃ̍ṣi [agna̠ āyūgṃ̍ṣi, pa̠va̠sa̠ ā] ॥ 30 ॥

pavasa̠ ā su̠vōrja̠miṣa̍ṃ cha naḥ । ā̠rē bā̍dhasva du̠chChunā̎m ॥ agnē̠ pava̍sva̠ svapā̍ a̠smē varcha̍ḥ su̠vīrya̎m । dadha̠tpōṣagṃ̍ ra̠yiṃ mayi̍ ॥ agnē̍ pāvaka rō̠chiṣā̍ ma̠ndrayā̍ dēva ji̠hvayā̎ । ā dē̠vān. va̍kṣi̠ yakṣi̍ cha ॥ sa na̍ḥ pāvaka dīdi̠vō'gnē̍ dē̠vāgṃ i̠hā va̍ha । upa̍ ya̠jñagṃ ha̠viścha̍ naḥ ॥ a̠gniḥ śuchi̍vratatama̠ḥ śuchi̠-rvipra̠ḥ śuchi̍ḥ ka̠viḥ । śuchī̍ rōchata̠ āhu̍taḥ ॥ uda̍gnē̠ śucha̍ya̠stava̍ śu̠krā bhrāja̍nta īratē । tava̠ jyōtīgg̍ṣya̠rchaya̍ḥ ॥ 31 ॥
(pu̠ru̠ni̠ṣṭhaḥ-pu̍rvaṇīka-bharā̠-'bhi-vayō̍bhi̠-rya-āyūgṃ̍ṣi̠ -vipra̠ḥ śuchi̠-śchatu̍rdaśa cha) (a. 14)

(dē̠vasya̍ - rakṣō̠haṇō̍ - vi̠bhū-stvagṃ sō̠mā - 'tya̠nyānagā̎m - pṛthi̠vyā - i̠ṣē tvā - ''da̍dē̠ - vākta̠-santē̍ - samu̠dragṃ - ha̠viṣma̍tī-r​hṛ̠dē - tvama̍gnē ru̠dra - śchatu̍rdaśa)

(dē̠vasya̍ - ga̠madhyē̍ - ha̠viṣma̍tīḥ - pavasa̠ - ēka̍trigṃśat)

(dē̠vasyā̠, rchaya̍ḥ)

॥ hari̍ḥ ōm ॥

॥ kṛṣṇa yajurvēdīya taittirīya saṃhitāyāṃ prathamakāṇḍē tṛtīyaḥ praśnaḥ samāptaḥ ॥