ಶ್ರೀ ಶಿವ ಉವಾಚ
ತಾರಿಣೀ ತರಳಾ ತನ್ವೀ ತಾರಾ ತರುಣವಲ್ಲರೀ ।
ತಾರರೂಪಾ ತರೀ ಶ್ಯಾಮಾ ತನುಕ್ಷೀಣಪಯೋಧರಾ ॥ 1 ॥
ತುರೀಯಾ ತರುಣಾ ತೀವ್ರಗಮನಾ ನೀಲವಾಹಿನೀ ।
ಉಗ್ರತಾರಾ ಜಯಾ ಚಂಡೀ ಶ್ರೀಮದೇಕಜಟಾಶಿರಾ ॥ 2 ॥
ತರುಣೀ ಶಾಂಭವೀ ಛಿನ್ನಫಾಲಾ ಸ್ಯಾದ್ಭದ್ರದಾಯಿನೀ ।
ಉಗ್ರಾ ಉಗ್ರಪ್ರಭಾ ನೀಲಾ ಕೃಷ್ಣಾ ನೀಲಸರಸ್ವತೀ ॥ 3 ॥
ದ್ವಿತೀಯಾ ಶೋಭನಾ ನಿತ್ಯಾ ನವೀನಾ ನಿತ್ಯಭೀಷಣಾ ।
ಚಂಡಿಕಾ ವಿಜಯಾರಾಧ್ಯಾ ದೇವೀ ಗಗನವಾಹಿನೀ ॥ 4 ॥
ಅಟ್ಟಹಾಸಾ ಕರಾಳಾಸ್ಯಾ ಚರಾಸ್ಯಾದೀಶಪೂಜಿತಾ ।
ಸಗುಣಾಽಸಗುಣಾಽರಾಧ್ಯಾ ಹರೀಂದ್ರಾದಿಪ್ರಪೂಜಿತಾ ॥ 5 ॥
ರಕ್ತಪ್ರಿಯಾ ಚ ರಕ್ತಾಕ್ಷೀ ರುಧಿರಾಸ್ಯವಿಭೂಷಿತಾ ।
ಬಲಿಪ್ರಿಯಾ ಬಲಿರತಾ ದುರ್ಗಾ ಬಲವತೀ ಬಲಾ ॥ 6 ॥
ಬಲಪ್ರಿಯಾ ಬಲರತಾ ಬಲರಾಮಪ್ರಪೂಜಿತಾ ।
ಅರ್ಧಕೇಶೇಶ್ವರೀ ಕೇಶಾ ಕೇಶವಾ ಸ್ರಗ್ವಿಭೂಷಿತಾ ॥ 7 ॥
ಪದ್ಮಮಾಲಾ ಚ ಪದ್ಮಾಕ್ಷೀ ಕಾಮಾಖ್ಯಾ ಗಿರಿನಂದಿನೀ ।
ದಕ್ಷಿಣಾ ಚೈವ ದಕ್ಷಾ ಚ ದಕ್ಷಜಾ ದಕ್ಷಿಣೇರತಾ ॥ 8 ॥
ವಜ್ರಪುಷ್ಪಪ್ರಿಯಾ ರಕ್ತಪ್ರಿಯಾ ಕುಸುಮಭೂಷಿತಾ ।
ಮಾಹೇಶ್ವರೀ ಮಹಾದೇವಪ್ರಿಯಾ ಪನ್ನಗಭೂಷಿತಾ ॥ 9 ॥
ಇಡಾ ಚ ಪಿಂಗಳಾ ಚೈವ ಸುಷುಮ್ನಾಪ್ರಾಣರೂಪಿಣೀ ।
ಗಾಂಧಾರೀ ಪಂಚಮೀ ಪಂಚಾನನಾದಿಪರಿಪೂಜಿತಾ ॥ 10 ॥
ತಥ್ಯವಿದ್ಯಾ ತಥ್ಯರೂಪಾ ತಥ್ಯಮಾರ್ಗಾನುಸಾರಿಣೀ ।
ತತ್ತ್ವರೂಪಾ ತತ್ತ್ವಪ್ರಿಯಾ ತತ್ತ್ವಜ್ಞಾನಾತ್ಮಿಕಾಽನಘಾ ॥ 11 ॥
ತಾಂಡವಾಚಾರಸಂತುಷ್ಟಾ ತಾಂಡವಪ್ರಿಯಕಾರಿಣೀ ।
ತಾಲನಾದರತಾ ಕ್ರೂರತಾಪಿನೀ ತರಣಿಪ್ರಭಾ ॥ 12 ॥
ತ್ರಪಾಯುಕ್ತಾ ತ್ರಪಾಮುಕ್ತಾ ತರ್ಪಿತಾ ತೃಪ್ತಿಕಾರಿಣೀ ।
ತಾರುಣ್ಯಭಾವಸಂತುಷ್ಟಾ ಶಕ್ತಿ-ರ್ಭಕ್ತಾನುರಾಗಿಣೀ ॥ 13 ॥
ಶಿವಾಸಕ್ತಾ ಶಿವರತಿಃ ಶಿವಭಕ್ತಿಪರಾಯಣಾ ।
ತಾಮ್ರದ್ಯುತಿ-ಸ್ತಾಮ್ರರಾಗಾ ತಾಮ್ರಪಾತ್ರಪ್ರಭೋಜಿನೀ ॥ 14 ॥
ಬಲಭದ್ರಪ್ರೇಮರತಾ ಬಲಿಭು-ಗ್ಬಲಿಕಲ್ಪನೀ ।
ರಾಮಪ್ರಿಯಾ ರಾಮಶಕ್ತೀ ರಾಮರೂಪಾನುಕಾರಿಣೀ ॥ 15 ॥
ಇತ್ಯೇತತ್ಕಥಿತಂ ದೇವಿ ರಹಸ್ಯಂ ಪರಮಾದ್ಭುತಮ್ ।
ಶ್ರುತ್ವಾಮೋಕ್ಷಮವಾಪ್ನೋತಿ ತಾರಾದೇವ್ಯಾಃ ಪ್ರಸಾದತಃ ॥ 16 ॥
ಯ ಇದಂ ಪಠತಿ ಸ್ತೋತ್ರಂ ತಾರಾಸ್ತುತಿರಹಸ್ಯಜಮ್ ।
ಸರ್ವಸಿದ್ಧಿಯುತೋ ಭೂತ್ವಾ ವಿಹರೇತ್ ಕ್ಷಿತಿ ಮಂಡಲೇ ॥ 17 ॥
ತಸ್ಯೈವ ಮಂತ್ರಸಿದ್ಧಿಃ ಸ್ಯಾನ್ಮಯಿ ಭಕ್ತಿರನುತ್ತಮಾ ।
ಭವತ್ಯೇವ ಮಹಾಮಾಯೇ ಸತ್ಯಂ ಸತ್ಯಂ ನ ಸಂಶಯಃ ॥ 18 ॥
ಮಂದೇ ಮಂಗಳವಾರೇ ಚ ಯಃ ಪಠೇನ್ನಿಶಿ ಸಂಯುತಃ ।
ತಸ್ಯೈವ ಮಂತ್ರಸಿದ್ಧಿಸ್ಸ್ಯಾದ್ಗಾಣಾಪತ್ಯಂ ಲಭೇತ ಸಃ ॥ 19 ॥
ಶ್ರದ್ಧಯಾಽಶ್ರದ್ಧಯಾ ವಾಽಪಿ ಪಠೇತ್ತಾರಾ ರಹಸ್ಯಕಮ್ ।
ಸೋಽಚಿರೇಣೈವಕಾಲೇನ ಜೀವನ್ಮುಕ್ತಶ್ಶಿವೋ ಭವೇತ್ ॥ 20 ॥
ಸಹಸ್ರಾವರ್ತನಾದ್ದೇವಿ ಪುರಶ್ಚರ್ಯಾಫಲಂ ಲಭೇತ್ ।
ಏವಂ ಸತತಯುಕ್ತಾ ಯೇ ಧ್ಯಾಯಂತಸ್ತ್ವಾಮುಪಾಸತೇ ॥ 21 ॥
ತೇ ಕೃತಾರ್ಥಾ ಮಹೇಶಾನಿ ಮೃತ್ಯುಸಂಸಾರವರ್ತ್ಮನಃ ॥ 22 ॥
ಇತಿ ಶ್ರೀ ಸ್ವರ್ಣಮಾಲಾತಂತ್ರೇ ತಾರಾಂಬಾಷ್ಟೋತ್ತರಶತನಾಮ ಸ್ತೋತ್ರಮ್ ।
