ଶ୍ରୀ ଶିଵ ଉଵାଚ
ତାରିଣୀ ତରଳା ତନ୍ଵୀ ତାରା ତରୁଣଵଲ୍ଲରୀ ।
ତାରରୂପା ତରୀ ଶ୍ୟାମା ତନୁକ୍ଷୀଣପୟୋଧରା ॥ 1 ॥
ତୁରୀୟା ତରୁଣା ତୀଵ୍ରଗମନା ନୀଲଵାହିନୀ ।
ଉଗ୍ରତାରା ଜୟା ଚଂଡୀ ଶ୍ରୀମଦେକଜଟାଶିରା ॥ 2 ॥
ତରୁଣୀ ଶାଂଭଵୀ ଛିନ୍ନଫାଲା ସ୍ୟାଦ୍ଭଦ୍ରଦାୟିନୀ ।
ଉଗ୍ରା ଉଗ୍ରପ୍ରଭା ନୀଲା କୃଷ୍ଣା ନୀଲସରସ୍ଵତୀ ॥ 3 ॥
ଦ୍ଵିତୀୟା ଶୋଭନା ନିତ୍ୟା ନଵୀନା ନିତ୍ୟଭୀଷଣା ।
ଚଂଡିକା ଵିଜୟାରାଧ୍ୟା ଦେଵୀ ଗଗନଵାହିନୀ ॥ 4 ॥
ଅଟ୍ଟହାସା କରାଳାସ୍ୟା ଚରାସ୍ୟାଦୀଶପୂଜିତା ।
ସଗୁଣାଽସଗୁଣାଽରାଧ୍ୟା ହରୀଂଦ୍ରାଦିପ୍ରପୂଜିତା ॥ 5 ॥
ରକ୍ତପ୍ରିୟା ଚ ରକ୍ତାକ୍ଷୀ ରୁଧିରାସ୍ୟଵିଭୂଷିତା ।
ବଲିପ୍ରିୟା ବଲିରତା ଦୁର୍ଗା ବଲଵତୀ ବଲା ॥ 6 ॥
ବଲପ୍ରିୟା ବଲରତା ବଲରାମପ୍ରପୂଜିତା ।
ଅର୍ଧକେଶେଶ୍ଵରୀ କେଶା କେଶଵା ସ୍ରଗ୍ଵିଭୂଷିତା ॥ 7 ॥
ପଦ୍ମମାଲା ଚ ପଦ୍ମାକ୍ଷୀ କାମାଖ୍ୟା ଗିରିନଂଦିନୀ ।
ଦକ୍ଷିଣା ଚୈଵ ଦକ୍ଷା ଚ ଦକ୍ଷଜା ଦକ୍ଷିଣେରତା ॥ 8 ॥
ଵଜ୍ରପୁଷ୍ପପ୍ରିୟା ରକ୍ତପ୍ରିୟା କୁସୁମଭୂଷିତା ।
ମାହେଶ୍ଵରୀ ମହାଦେଵପ୍ରିୟା ପନ୍ନଗଭୂଷିତା ॥ 9 ॥
ଇଡା ଚ ପିଂଗଳା ଚୈଵ ସୁଷୁମ୍ନାପ୍ରାଣରୂପିଣୀ ।
ଗାଂଧାରୀ ପଂଚମୀ ପଂଚାନନାଦିପରିପୂଜିତା ॥ 10 ॥
ତଥ୍ୟଵିଦ୍ୟା ତଥ୍ୟରୂପା ତଥ୍ୟମାର୍ଗାନୁସାରିଣୀ ।
ତତ୍ତ୍ଵରୂପା ତତ୍ତ୍ଵପ୍ରିୟା ତତ୍ତ୍ଵଜ୍ଞାନାତ୍ମିକାଽନଘା ॥ 11 ॥
ତାଂଡଵାଚାରସଂତୁଷ୍ଟା ତାଂଡଵପ୍ରିୟକାରିଣୀ ।
ତାଲନାଦରତା କ୍ରୂରତାପିନୀ ତରଣିପ୍ରଭା ॥ 12 ॥
ତ୍ରପାୟୁକ୍ତା ତ୍ରପାମୁକ୍ତା ତର୍ପିତା ତୃପ୍ତିକାରିଣୀ ।
ତାରୁଣ୍ୟଭାଵସଂତୁଷ୍ଟା ଶକ୍ତି-ର୍ଭକ୍ତାନୁରାଗିଣୀ ॥ 13 ॥
ଶିଵାସକ୍ତା ଶିଵରତିଃ ଶିଵଭକ୍ତିପରାୟଣା ।
ତାମ୍ରଦ୍ୟୁତି-ସ୍ତାମ୍ରରାଗା ତାମ୍ରପାତ୍ରପ୍ରଭୋଜିନୀ ॥ 14 ॥
ବଲଭଦ୍ରପ୍ରେମରତା ବଲିଭୁ-ଗ୍ବଲିକଲ୍ପନୀ ।
ରାମପ୍ରିୟା ରାମଶକ୍ତୀ ରାମରୂପାନୁକାରିଣୀ ॥ 15 ॥
ଇତ୍ୟେତତ୍କଥିତଂ ଦେଵି ରହସ୍ୟଂ ପରମାଦ୍ଭୁତମ୍ ।
ଶ୍ରୁତ୍ଵାମୋକ୍ଷମଵାପ୍ନୋତି ତାରାଦେଵ୍ୟାଃ ପ୍ରସାଦତଃ ॥ 16 ॥
ୟ ଇଦଂ ପଠତି ସ୍ତୋତ୍ରଂ ତାରାସ୍ତୁତିରହସ୍ୟଜମ୍ ।
ସର୍ଵସିଦ୍ଧିୟୁତୋ ଭୂତ୍ଵା ଵିହରେତ୍ କ୍ଷିତି ମଂଡଲେ ॥ 17 ॥
ତସ୍ୟୈଵ ମଂତ୍ରସିଦ୍ଧିଃ ସ୍ୟାନ୍ମୟି ଭକ୍ତିରନୁତ୍ତମା ।
ଭଵତ୍ୟେଵ ମହାମାୟେ ସତ୍ୟଂ ସତ୍ୟଂ ନ ସଂଶୟଃ ॥ 18 ॥
ମଂଦେ ମଂଗଳଵାରେ ଚ ୟଃ ପଠେନ୍ନିଶି ସଂୟୁତଃ ।
ତସ୍ୟୈଵ ମଂତ୍ରସିଦ୍ଧିସ୍ସ୍ୟାଦ୍ଗାଣାପତ୍ୟଂ ଲଭେତ ସଃ ॥ 19 ॥
ଶ୍ରଦ୍ଧୟାଽଶ୍ରଦ୍ଧୟା ଵାଽପି ପଠେତ୍ତାରା ରହସ୍ୟକମ୍ ।
ସୋଽଚିରେଣୈଵକାଲେନ ଜୀଵନ୍ମୁକ୍ତଶ୍ଶିଵୋ ଭଵେତ୍ ॥ 20 ॥
ସହସ୍ରାଵର୍ତନାଦ୍ଦେଵି ପୁରଶ୍ଚର୍ୟାଫଲଂ ଲଭେତ୍ ।
ଏଵଂ ସତତୟୁକ୍ତା ୟେ ଧ୍ୟାୟଂତସ୍ତ୍ଵାମୁପାସତେ ॥ 21 ॥
ତେ କୃତାର୍ଥା ମହେଶାନି ମୃତ୍ୟୁସଂସାରଵର୍ତ୍ମନଃ ॥ 22 ॥
ଇତି ଶ୍ରୀ ସ୍ଵର୍ଣମାଲାତଂତ୍ରେ ତାରାଂବାଷ୍ଟୋତ୍ତରଶତନାମ ସ୍ତୋତ୍ରମ୍ ।
