ശ്രീസദാശിവ ഉവാച
ശൃണു ദേവി ജഗദ്വംദ്യേ സ്തോത്രമേതദനുത്തമമ് ।
പഠനാച്ഛ്രവണാദ്യസ്യ സർവസിദ്ധീശ്വരോ ഭവേത് ॥ 1 ॥
അസൌഭാഗ്യപ്രശമനം സുഖസംപദ്വിവര്ധനമ് ।
അകാലമൃത്യുഹരണം സർവാപദ്വിനിവാരണമ് ॥ 2 ॥
ശ്രീമദാദ്യാകാളികായാഃ സുഖസാന്നിധ്യകാരണമ് ।
സ്തവസ്യാസ്യ പ്രസീദേന ത്രിപുരാരിരഹം പ്രിയേ ॥ 3 ॥
സ്തോത്രസ്യാസ്യ ഋഷിര്ദേവി സദാശിവ ഉദാഹൃതഃ ।
ഛംദോഽനുഷ്ടുബ്ദേവതാദ്യാ കാളികാ പരികീര്തിതാ ।
ധര്മകാമാര്ഥമോക്ഷേഷു വിനിയോഗഃ പ്രകീര്തിതഃ ॥ 4 ॥
അഥ സ്തോത്രമ്
ഹ്രീം കാളീ ശ്രീം കരാളീ ച ക്രീം കള്യാണീ കളാവതീ ।
കമലാ കലിദര്പഘ്നീ കപര്ദീശകൃപാന്വിതാ ॥ 5 ॥
കാളികാ കാലമാതാ ച കാലാനലസമദ്യുതിഃ ।
കപര്ദിനീ കരാളാസ്യാ കരുണാമൃതസാഗരാ ॥ 6 ॥
കൃപാമയീ കൃപാധാരാ കൃപാപാരാ കൃപാഗമാ ।
കൃശാനുഃ കപിലാ കൃഷ്ണാ കൃഷ്ണാനംദവിവര്ധിനീ ॥ 7 ॥
കാലരാത്രിഃ കാമരൂപാ കാമപാശവിമോചിനീ ।
കാദംബിനീ കളാധാരാ കലികല്മഷനാശിനീ ॥ 8 ॥
കുമാരീപൂജനപ്രീതാ കുമാരീപൂജകാലയാ ।
കുമാരീഭോജനാനംദാ കുമാരീരൂപധാരിണീ ॥ 9 ॥
കദംബവനസംചാരാ കദംബവനവാസിനീ ।
കദംബപുഷ്പസംതോഷാ കദംബപുഷ്പമാലിനീ ॥ 10 ॥
കിശോരീ കലകംഠാ ച കലനാദനിനാദിനീ ।
കാദംബരീപാനരതാ തഥാ കാദംബരീപ്രിയാ ॥ 11 ॥
കപാലപാത്രനിരതാ കംകാലമാല്യധാരിണീ ।
കമലാസനസംതുഷ്ടാ കമലാസനവാസിനീ ॥ 12 ॥
കമലാലയമധ്യസ്ഥാ കമലാമോദമോദിനീ ।
കലഹംസഗതിഃ ക്ലൈബ്യനാശിനീ കാമരൂപിണീ ॥ 13 ॥
കാമരൂപകൃതാവാസാ കാമപീഠവിലാസിനീ ।
കമനീയാ കല്പലതാ കമനീയവിഭൂഷണാ ॥ 14 ॥
കമനീയഗുണാരാധ്യാ കോമലാംഗീ കൃശോദരീ ।
കാരണാമൃതസംതോഷാ കാരണാനംദസിദ്ധിദാ ॥ 15 ॥
കാരണാനംദജാപേഷ്ടാ കാരണാര്ചനഹര്ഷിതാ ।
കാരണാര്ണവസമ്മഗ്നാ കാരണവ്രതപാലിനീ ॥ 16 ॥
കസ്തൂരീസൌരഭാമോദാ കസ്തൂരീതിലകോജ്ജ്വലാ ।
കസ്തൂരീപൂജനരതാ കസ്തൂരീപൂജകപ്രിയാ ॥ 17 ॥
കസ്തൂരീദാഹജനനീ കസ്തൂരീമൃഗതോഷിണീ ।
കസ്തൂരീഭോജനപ്രീതാ കര്പൂരാമോദമോദിതാ ॥ 18 ॥
കര്പൂരമാലാഭരണാ കര്പൂരചംദനോക്ഷിതാ ।
കര്പൂരകാരണാഹ്ലാദാ കര്പൂരാമൃതപായിനീ ॥ 19 ॥
കര്പൂരസാഗരസ്നാതാ കര്പൂരസാഗരാലയാ ।
കൂര്ചബീജജപപ്രീതാ കൂര്ചജാപപരായണാ ॥ 20 ॥
കുലീനാ കൌലികാരാധ്യാ കൌലികപ്രിയകാരിണീ ।
കുലാചാരാ കൌതുകിനീ കുലമാര്ഗപ്രദര്ശിനീ ॥ 21 ॥
കാശീശ്വരീ കഷ്ടഹര്ത്രീ കാശീശവരദായിനീ ।
കാശീശ്വരകൃതാമോദാ കാശീശ്വരമനോരമാ ॥ 22 ॥
കലമംജീരചരണാ ക്വണത്കാംചീവിഭൂഷണാ ।
കാംചനാദ്രികൃതാഗാരാ കാംചനാചലകൌമുദീ ॥ 23 ॥
കാമബീജജപാനംദാ കാമബീജസ്വരൂപിണീ ।
കുമതിഘ്നീ കുലീനാര്തിനാശിനീ കുലകാമിനീ ॥ 24 ॥
ക്രീം ഹ്രീം ശ്രീം മംത്രവര്ണേന കാലകംടകഘാതിനീ ।
ഇത്യാദ്യാകാളികാദേവ്യാഃ ശതനാമ പ്രകീര്തിതമ് ॥ 25 ॥
കകാരകൂടഘടിതം കാളീരൂപസ്വരൂപകമ് ।
പൂജാകാലേ പഠേദ്യസ്തു കാളികാകൃതമാനസഃ ॥ 26 ॥
മംത്രസിദ്ധിര്ഭവേദാശു തസ്യ കാളീ പ്രസീദതി ।
ബുദ്ധിം വിദ്യാം ച ലഭതേ ഗുരോരാദേശമാത്രതഃ ॥ 27 ॥
ധനവാന് കീര്തിമാന് ഭൂയാദ്ദാനശീലോ ദയാന്വിതഃ ।
പുത്രപൌത്രസുഖൈശ്വര്യൈര്മോദതേ സാധകോ ഭുവി ॥ 28 ॥
ഭൌമാവാസ്യാനിശാഭാഗേ മപംചകസമന്വിതഃ ।
പൂജയിത്വാ മഹാകാളീമാദ്യാം ത്രിഭുവനേശ്വരീമ് ॥ 29 ॥
പഠിത്വാ ശതനാമാനി സാക്ഷാത്കാളീമയോ ഭവേത് ।
നാസാധ്യം വിദ്യതേ തസ്യ ത്രിഷു ലോകേഷു കിംചന ॥ 30 ॥
വിദ്യായാം വാക്പതിഃ സാക്ഷാത് ധനേ ധനപതിര്ഭവേത് ।
സമുദ്ര ഇവ ഗാംഭീര്യേ ബലേ ച പവനോപമഃ ॥ 31 ॥
തിഗ്മാംശുരിവ ദുഷ്പ്രേക്ഷ്യഃ ശശിവച്ഛുഭദര്ശനഃ ।
രൂപേ മൂര്തിധരഃ കാമോ യോഷിതാം ഹൃദയംഗമഃ ॥ 32 ॥
സർവത്ര ജയമാപ്നോതി സ്തവസ്യാസ്യ പ്രസാദതഃ ।
യം യം കാമം പുരസ്കൃത്യ സ്തോത്രമേതദുദീരയേത് ॥ 33 ॥
തം തം കാമമവാപ്നോതി ശ്രീമദാദ്യാപ്രസാദതഃ ।
രണേ രാജകുലേ ദ്യൂതേ വിവാദേ പ്രാണസംകടേ ॥ 34 ॥
ദസ്യുഗ്രസ്തേ ഗ്രാമദാഹേ സിംഹവ്യാഘ്രാവൃതേ തഥാ ।
അരണ്യേ പ്രാംതരേ ദുര്ഗേ ഗ്രഹരാജഭയേഽപി വാ ॥ 35 ॥
ജ്വരദാഹേ ചിരവ്യാധൌ മഹാരോഗാദിസംകുലേ ।
ബാലഗ്രഹാദി രോഗേ ച തഥാ ദുഃസ്വപ്നദര്ശനേ ॥ 36 ॥
ദുസ്തരേ സലിലേ വാപി പോതേ വാതവിപദ്ഗതേ ।
വിചിംത്യ പരമാം മായാമാദ്യാം കാളീം പരാത്പരാമ് ॥ 37 ॥
യഃ പഠേച്ഛതനാമാനി ദൃഢഭക്തിസമന്വിതഃ ।
സർവാപദ്ഭ്യോ വിമുച്യേത ദേവി സത്യം ന സംശയഃ ॥ 38 ॥
ന പാപേഭ്യോ ഭയം തസ്യ ന രോഗോഭ്യോ ഭയം ക്വചിത് ।
സർവത്ര വിജയസ്തസ്യ ന കുത്രാപി പരാഭവഃ ॥ 39 ॥
തസ്യ ദര്ശനമാത്രേണ പലായംതേ വിപദ്ഗണാഃ ।
സ വക്താ സർവശാസ്ത്രാണാം സ ഭോക്താ സർവസംപദാമ് ॥ 40 ॥
സ കര്താ ജാതിധര്മാണാം ജ്ഞാതീനാം പ്രഭുരേവ സഃ ।
വാണീ തസ്യ വസേദ്വക്ത്രേ കമലാ നിശ്ചലാ ഗൃഹേ ॥ 41 ॥
തന്നാമ്നാ മാനവാഃ സർവേ പ്രണമംതി സസംഭ്രമാഃ ।
ദൃഷ്ട്യാ തസ്യ തൃണായംതേ ഹ്യണിമാദ്യഷ്ടസിദ്ധയഃ ॥ 42 ॥
ആദ്യാകാളീസ്വരൂപാഖ്യം ശതനാമ പ്രകീര്തിതമ് ।
അഷ്ടോത്തരശതാവൃത്യാ പുരശ്ചര്യാഽസ്യ ഗീയതേ ॥ 43 ॥
പുരസ്ക്രിയാന്വിതം സ്തോത്രം സർവാഭീഷ്ടഫലപ്രദമ് ।
ശതനാമസ്തുതിമിമാമാദ്യാകാളീസ്വരൂപിണീമ് ॥ 44 ॥
പഠേദ്വാ പാഠയേദ്വാപി ശൃണുയാച്ഛ്രാവയേദപി ।
സർവപാപവിനിര്മുക്തോ ബ്രഹ്മസായുജ്യമാപ്നുയാത് ॥ 45 ॥
ഇതി മഹാനിർവാണതംത്രേ സപ്തമോല്ലാസാംതര്ഗതം ശ്രീ ആദ്യാ കാളികാ ശതനാമ സ്തോത്രമ് ॥
