ಕೈಲಾಸಾಚಲಮಧ್ಯಗಂ ಪುರವಹಂ ಶಾನ್ತಂ ತ್ರಿನೇತ್ರಂ ಶಿವಂ
ವಾಮಸ್ಥಾ ಕವಚಂ ಪ್ರಣಮ್ಯ ಗಿರಿಜಾ ಭೂತಿಪ್ರದಂ ಪೃಚ್ಛತಿ ।
ದೇವೀ ಶ್ರೀಬಗಲಾಮುಖೀ ರಿಪುಕುಲಾರಣ್ಯಾಗ್ನಿರೂಪಾ ಚ ಯಾ
ತಸ್ಯಾಶ್ಚಾಪವಿಮುಕ್ತ ಮನ್ತ್ರಸಹಿತಂ ಪ್ರೀತ್ಯಾಽಧುನಾ ಬ್ರೂಹಿ ಮಾಮ್ ॥ 1 ॥
ಶ್ರೀಶಙ್ಕರ ಉವಾಚ ।
ದೇವೀ ಶ್ರೀಭವವಲ್ಲಭೇ ಶೃಣು ಮಹಾಮನ್ತ್ರಂ ವಿಭೂತಿಪ್ರದಂ
ದೇವ್ಯಾ ವರ್ಮಯುತಂ ಸಮಸ್ತಸುಖದಂ ಸಾಮ್ರಾಜ್ಯದಂ ಮುಕ್ತಿದಮ್ ।
ತಾರಂ ರುದ್ರವಧೂಂ ವಿರಿಞ್ಚಿಮಹಿಲಾ ವಿಷ್ಣುಪ್ರಿಯಾ ಕಾಮಯು-
-ಕ್ಕಾನ್ತೇ ಶ್ರೀಬಗಲಾನನೇ ಮಮ ರಿಪೂನ್ನಾಶಾಯ ಯುಗ್ಮನ್ತ್ವಿತಿ ॥ 2 ॥
ಐಶ್ವರ್ಯಾಣಿ ಪದಂ ಚ ದೇಹಿ ಯುಗಲಂ ಶೀಘ್ರಂ ಮನೋವಾಞ್ಛಿತಂ
ಕಾರ್ಯಂ ಸಾಧಯ ಯುಗ್ಮಯುಕ್ಛಿವವಧೂ ವಹ್ನಿಪ್ರಿಯಾನ್ತೋ ಮನುಃ ।
ಕಂಸಾರೇಸ್ತನಯಂ ಚ ಬೀಜಮಪರಾಶಕ್ತಿಶ್ಚ ವಾಣೀ ತಥಾ
ಕೀಲಂ ಶ್ರೀಮಿತಿ ಭೈರವರ್ಷಿಸಹಿತಂ ಛನ್ದೋ ವಿರಾಟ್ ಸಂಯುತಮ್ ॥ 3 ॥
ಸ್ವೇಷ್ಟಾರ್ಥಸ್ಯ ಪರಸ್ಯ ವೇತ್ತಿ ನಿತರಾಂ ಕಾರ್ಯಸ್ಯ ಸಮ್ಪ್ರಾಪ್ತಯೇ
ನಾನಾಸಾಧ್ಯಮಹಾಗದಸ್ಯ ನಿಯತನ್ನಾಶಾಯ ವೀರ್ಯಾಪ್ತಯೇ ।
ಧ್ಯಾತ್ವಾ ಶ್ರೀಬಗಲಾನನಾಮನುವರಂ ಜಪ್ತ್ವಾ ಸಹಸ್ರಾಖ್ಯಕಂ
ದೀರ್ಘೈಃ ಷಟ್ಕಯುತೈಶ್ಚ ರುದ್ರಮಹಿಲಾಬೀಜೈರ್ವಿನ್ಯಾಸ್ಯಾಙ್ಗಕೇ ॥ 4 ॥
ಧ್ಯಾನಮ್ ।
ಸೌವರ್ಣಾಸನಸಂಸ್ಥಿತಾಂ ತ್ರಿನಯನಾಂ ಪೀತಾಂಶುಕೋಲಾಸಿನೀಂ
ಹೇಮಾಭಾಙ್ಗರುಚಿಂ ಶಶಾಙ್ಕಮುಕುಟಾಂ ಸ್ರಕ್ಚಮ್ಪಕಸ್ರಗ್ಯುತಾಮ್ ।
ಹಸ್ತೈರ್ಮದ್ಗರಪಾಶಬದ್ಧರಸನಾಂ ಸಮ್ಬಿಭ್ರತೀಂ ಭೂಷಣ-
-ವ್ಯಾಪ್ತಾಙ್ಗೀಂ ಬಗಲಾಮುಖೀಂ ತ್ರಿಜಗತಾಂ ಸಂಸ್ತಮ್ಭಿನೀಂ ಚಿನ್ತಯೇ ॥ 5 ॥
ವಿನಿಯೋಗಃ ।
ಓಂ ಅಸ್ಯ ಶ್ರೀಬಗಲಾಮುಖೀ ಬ್ರಹ್ಮಾಸ್ತ್ರಮನ್ತ್ರ ಕವಚಸ್ಯ ಭೈರವ ಋಷಿಃ ವಿರಾಟ್ ಛನ್ದಃ ಶ್ರೀಬಗಳಾಮುಖೀ ದೇವತಾ ಕ್ಲೀಂ ಬೀಜಂ ಐಂ ಶಕ್ತಿಃ ಶ್ರೀಂ ಕೀಲಕಂ ಮಮ ಪರಸ್ಯ ಚ ಮನೋಭಿಲಷಿತೇಷ್ಟಕಾರ್ಯಸಿದ್ಧಯೇ ವಿನಿಯೋಗಃ ।
ಋಷ್ಯಾದಿನ್ಯಾಸಃ ।
ಭೈರವ ಋಷಯೇ ನಮಃ ಶಿರಸಿ ।
ವಿರಾಟ್ ಛನ್ದಸೇ ನಮಃ ಮುಖೇ ।
ಶ್ರೀ ಬಗಲಾಮುಖೀ ದೇವತಾಯೈ ನಮಃ ಹೃದಿ ।
ಕ್ಲೀಂ ಬೀಜಾಯ ನಮಃ ಗುಹ್ಯೇ ।
ಐಂ ಶಕ್ತಯೇ ನಮಃ ಪಾದಯೋಃ ।
ಶ್ರೀಂ ಕೀಲಕಾಯ ನಮಃ ಸರ್ವಾಙ್ಗೇ ।
ಕರನ್ಯಾಸಃ ।
ಓಂ ಹ್ರಾಂ ಅಙ್ಗುಷ್ಠಾಭ್ಯಾಂ ನಮಃ ।
ಓಂ ಹ್ರೀಂ ತರ್ಜನೀಭ್ಯಾಂ ನಮಃ ।
ಓಂ ಹ್ರೂಂ ಮಧ್ಯಮಾಭ್ಯಾಂ ನಮಃ ।
ಓಂ ಹ್ರೈಂ ಅನಾಮಿಕಾಭ್ಯಾಂ ನಮಃ ।
ಓಂ ಹ್ರೌಂ ಕನಿಷ್ಠಿಕಾಭ್ಯಾಂ ನಮಃ ।
ಓಂ ಹ್ರಃ ಕರತಲಕರಪೃಷ್ಠಾಭ್ಯಾಂ ನಮಃ ।
ಅಙ್ಗನ್ಯಾಸಃ ।
ಓಂ ಹ್ರಾಂ ಹೃದಯಾಯ ನಮಃ ।
ಓಂ ಹ್ರೀಂ ಶಿರಸೇ ಸ್ವಾಹಾ ।
ಓಂ ಹ್ರೂಂ ಶಿಖಾಯೈ ವಷಟ್ ।
ಓಂ ಹ್ರೈಂ ಕವಚಾಯ ಹುಮ್ ।
ಓಂ ಹ್ರೌಂ ನೇತ್ರತ್ರಯಾಯ ವೌಷಟ್ ।
ಓಂ ಹ್ರಃ ಅಸ್ತ್ರಾಯ ಫಟ್ ।
ಭೂರ್ಭುವಸ್ಸುವರೋಮಿತಿ ದಿಗ್ಬನ್ಧಃ ।
ಮನ್ತ್ರೋದ್ಧಾರಃ ।
ಓಂ ಹ್ರೀಂ ಐಂ ಶ್ರೀಂ ಕ್ಲೀಂ ಶ್ರೀಬಗಲಾನನೇ ಮಮ ರಿಪೂನ್ನಾಶಯ ನಾಶಯ ಮಮೈಶ್ವರ್ಯಾಣಿ ದೇಹಿ ದೇಹಿ ಶೀಘ್ರಂ ಮನೋವಾಞ್ಛಿತಕಾರ್ಯಂ ಸಾಧಯಃ ಸಾಧಯಃ ಹ್ರೀಂ ಸ್ವಾಹಾ ।
ಕವಚಮ್ ।
ಶಿರೋ ಮೇ ಪಾತು ಓಂ ಹ್ರೀಂ ಐಂ ಶ್ರೀಂ ಕ್ಲೀಂ ಪಾತು ಲಲಾಟಕಮ್ ।
ಸಮ್ಬೋಧನಪದಂ ಪಾತು ನೇತ್ರೇ ಶ್ರೀಬಗಲಾನನೇ ॥ 1 ॥
ಶ್ರುತೌ ಮಮ ರಿಪುಂ ಪಾತು ನಾಸಿಕಾನ್ನಾಶಯ ದ್ವಯಮ್ ।
ಪಾತು ಗಣ್ಡೌ ಸದಾ ಮಾಮೈಶ್ವರ್ಯಾಣ್ಯಂ ತಂ ತು ಮಸ್ತಕಮ್ ॥ 2 ॥
ದೇಹಿ ದ್ವನ್ದ್ವಂ ಸದಾ ಜಿಹ್ವಾಂ ಪಾತು ಶೀಘ್ರಂ ವಚೋ ಮಮ ।
ಕಣ್ಠದೇಶಂ ಮನಃ ಪಾತು ವಾಞ್ಛಿತಂ ಬಾಹುಮೂಲಕಮ್ ॥ 3 ॥
ಕಾರ್ಯಂ ಸಾಧಯ ದ್ವನ್ದ್ವನ್ತು ಕರೌ ಪಾತು ಸದಾ ಮಮ ।
ಮಾಯಾಯುಕ್ತಾ ತಥಾ ಸ್ವಾಹಾ ಹೃದಯಂ ಪಾತು ಸರ್ವದಾ ॥ 4 ॥
ಅಷ್ಟಾಧಿಕಚತ್ವಾರಿಂಶದ್ದಣ್ಡಾಢ್ಯಾ ಬಗಲಾಮುಖೀ ।
ರಕ್ಷಾಂ ಕರೋತು ಸರ್ವತ್ರ ಗೃಹೇಽರಣ್ಯೇ ಸದಾ ಮಮ ॥ 5 ॥
ಬ್ರಹ್ಮಾಸ್ತ್ರಾಖ್ಯೋ ಮನುಃ ಪಾತು ಸರ್ವಾಙ್ಗೇ ಸರ್ವಸನ್ಧಿಷು ।
ಮನ್ತ್ರರಾಜಃ ಸದಾ ರಕ್ಷಾಂ ಕರೋತು ಮಮ ಸರ್ವದಾ ॥ 6 ॥
ಓಂ ಹ್ರೀಂ ಪಾತು ನಾಭಿದೇಶಂ ಕಟಿಂ ಮೇ ಬಗಲಾಽವತು ।
ಮುಖೀ ವರ್ಣದ್ವಯಂ ಪಾತು ಲಿಙ್ಗಂ ಮೇ ಮುಷ್ಕಯುಗ್ಮಕಮ್ ॥ 7 ॥
ಜಾನುನೀ ಸರ್ವದುಷ್ಟಾನಾಂ ಪಾತು ಮೇ ವರ್ಣಪಞ್ಚಕಮ್ ।
ವಾಚಂ ಮುಖಂ ತಥಾ ಪದಂ ಷಡ್ವರ್ಣಾ ಪರಮೇಶ್ವರೀ ॥ 8 ॥
ಜಙ್ಘಾಯುಗ್ಮೇ ಸದಾ ಪಾತು ಬಗಲಾ ರಿಪುಮೋಹಿನೀ ।
ಸ್ತಮ್ಭಯೇತಿ ಪದಂ ಪೃಷ್ಠಂ ಪಾತು ವರ್ಣತ್ರಯಂ ಮಮ ॥ 9 ॥
ಜಿಹ್ವಾಂ ವರ್ಣದ್ವಯಂ ಪಾತು ಗುಲ್ಫೌ ಮೇ ಕೀಲಯೇತಿ ಚ ।
ಪಾದೋರ್ಧ್ವಂ ಸರ್ವದಾ ಪಾತು ಬುದ್ಧಿಂ ಪಾದತಲೇ ಮಮ ॥ 10 ॥
ವಿನಾಶಯ ಪದಂ ಪಾತು ಪಾದಾಙ್ಗುಲ್ಯೋರ್ನಖಾನಿ ಮೇ ।
ಹ್ರೀಂ ಬೀಜಂ ಸರ್ವದಾ ಪಾತು ಬುದ್ಧೀನ್ದ್ರಿಯವಚಾಂಸಿ ಮೇ ॥ 11 ॥
ಸರ್ವಾಙ್ಗಂ ಪ್ರಣವಃ ಪಾತು ಸ್ವಾಹಾ ರೋಮಾಣಿ ಮೇಽವತು ।
ಬ್ರಾಹ್ಮೀ ಪೂರ್ವದಲೇ ಪಾತು ಚಾಗ್ನೇಯಾಂ ವಿಷ್ಣುವಲ್ಲಭಾ ॥ 12 ॥
ಮಾಹೇಶೀ ದಕ್ಷಿಣೇ ಪಾತು ಚಾಮುಣ್ಡಾ ರಾಕ್ಷಸೇಽವತು ।
ಕೌಮಾರೀ ಪಶ್ಚಿಮೇ ಪಾತು ವಾಯವ್ಯೇ ಚಾಪರಾಜಿತಾ ॥ 13 ॥
ವಾರಾಹೀ ಚೋತ್ತರೇ ಪಾತು ನಾರಸಿಂಹೀ ಶಿವೇಽವತು ।
ಊರ್ಧ್ವಂ ಪಾತು ಮಹಾಲಕ್ಷ್ಮೀಃ ಪಾತಾಲೇ ಶಾರದಾಽವತು ॥ 14 ॥
ಇತ್ಯಷ್ಟೌ ಶಕ್ತಯಃ ಪಾನ್ತು ಸಾಯುಧಾಶ್ಚ ಸವಾಹನಾಃ ।
ರಾಜದ್ವಾರೇ ಮಹಾದುರ್ಗೇ ಪಾತು ಮಾಂ ಗಣನಾಯಕಃ ॥ 15 ॥
ಶ್ಮಶಾನೇ ಜಲಮಧ್ಯೇ ಚ ಭೈರವಶ್ಚ ಸದಾಽವತು ।
ದ್ವಿಭುಜಾ ರಕ್ತವಸನಾಃ ಸರ್ವಾಭರಣಭೂಷಿತಾಃ ॥ 16 ॥
ಯೋಗಿನ್ಯಃ ಸರ್ವದಾ ಪಾತು ಮಹಾರಣ್ಯೇ ಸದಾ ಮಮ ।
ಇತಿ ತೇ ಕಥಿತಂ ದೇವಿ ಕವಚಂ ಪರಮಾದ್ಭುತಮ್ ॥ 17 ॥
ಶ್ರೀವಿಶ್ವವಿಜಯನ್ನಾಮ ಕೀರ್ತಿಶ್ರೀವಿಜಯಪ್ರದಮ್ ।
ಅಪುತ್ರೋ ಲಭತೇ ಪುತ್ರಂ ಧೀರಂ ಶೂರಂ ಶತಾಯುಷಮ್ ॥ 18 ॥
ನಿರ್ಧನೋ ಧನಮಾಪ್ನೋತಿ ಕವಚಸ್ಯಾಸ್ಯ ಪಾಠತಃ ।
ಜಪಿತ್ವಾ ಮನ್ತ್ರರಾಜಂ ತು ಧ್ಯಾತ್ವಾ ಶ್ರೀಬಗಲಾಮುಖೀಮ್ ॥ 19 ॥
ಪಠೇದಿದಂ ಹಿ ಕವಚಂ ನಿಶಾಯಾಂ ನಿಯಮಾತ್ತು ಯಃ ।
ಯದ್ಯತ್ಕಾಮಯತೇ ಕಾಮಂ ಸಾಧ್ಯಾಸಾಧ್ಯೇ ಮಹೀತಲೇ ॥ 20 ॥
ತತ್ತತ್ಕಾಮಮವಾಪ್ನೋತಿ ಸಪ್ತರಾತ್ರೇಣ ಶಙ್ಕರೀ ।
ಗುರುಂ ಧ್ಯಾತ್ವಾ ಸುರಾಂ ಪೀತ್ವಾ ರಾತ್ರೌ ಶಕ್ತಿಸಮನ್ವಿತಃ ॥ 21 ॥
ಕವಚಂ ಯಃ ಪಠೇದ್ದೇವಿ ತಸ್ಯಾಽಸಾಧ್ಯಂ ನ ಕಿಞ್ಚನ ।
ಯಂ ಧ್ಯಾತ್ವಾ ಪ್ರಜಪೇನ್ಮನ್ತ್ರಂ ಸಹಸ್ರಂ ಕವಚಂ ಪಠೇತ್ ॥ 22 ॥
ತ್ರಿರಾತ್ರೇಣ ವಶಂ ಯಾತಿ ಮೃತ್ಯುಂ ತಂ ನಾತ್ರ ಸಂಶಯಃ ।
ಲಿಖಿತ್ವಾ ಪ್ರತಿಮಾಂ ಶತ್ರೋಃ ಸತಾಲೇನ ಹರಿದ್ರಯಾ ॥ 23 ॥
ಲಿಖಿತ್ವಾ ಹ್ಯದಿ ತಂ ನಾಮ ತಂ ಧ್ಯಾತ್ವಾ ಪ್ರಜಪೇನ್ಮನುಮ್ ।
ಏಕವಿಂಶದ್ದಿನಂ ಯಾವತ್ಪ್ರತ್ಯಹಂ ಚ ಸಹಸ್ರಕಮ್ ॥ 24 ॥
ಜಪ್ತ್ವಾ ಪಠೇತ್ತು ಕವಚಂ ಚತುರ್ವಿಂಶತಿವಾರಕಮ್ ।
ಸಂಸ್ತಮ್ಭಂ ಜಾಯತೇ ಶತ್ರೋರ್ನಾತ್ರ ಕಾರ್ಯಾ ವಿಚಾರಣಾ ॥ 25 ॥
ವಿವಾದೇ ವಿಜಯಂ ತಸ್ಯ ಸಙ್ಗ್ರಾಮೇ ಜಯಮಾಪ್ನುಯಾತ್ ।
ಶ್ಮಶಾನೇ ಚ ಭಯಂ ನಾಸ್ತಿ ಕವಚಸ್ಯ ಪ್ರಭಾವತಃ ॥ 26 ॥
ನವನೀತಂ ಚಾಭಿಮನ್ತ್ರ್ಯ ಸ್ತ್ರೀಣಾಂ ದದ್ಯಾನ್ಮಹೇಶ್ವರಿ ।
ವನ್ಧ್ಯಾಯಾಂ ಜಾಯತೇ ಪುತ್ರೋ ವಿದ್ಯಾಬಲಸಮನ್ವಿತಃ ॥ 27 ॥
ಶ್ಮಶಾನಾಙ್ಗಾರಮಾದಾಯ ಭೌಮೇ ರಾತ್ರೌ ಶನಾವಥ ।
ಪಾದೋದಕೇನ ಸ್ಪೃಷ್ಟ್ವಾ ಚ ಲಿಖೇಲ್ಲೋಹಶಲಾಕಯಾ ॥ 28 ॥
ಭೂಮೌ ಶತ್ರೋಃ ಸ್ವರೂಪಂ ಚ ಹೃದಿ ನಾಮ ಸಮಾಲಿಖೇತ್ ।
ಹಸ್ತಂ ತದ್ಧೃದಯೇ ದತ್ವಾ ಕವಚಂ ತಿಥಿವಾರಕಮ್ ॥ 29 ॥
ಧ್ಯಾತ್ವಾ ಜಪೇನ್ಮನ್ತ್ರರಾಜಂ ನವರಾತ್ರಂ ಪ್ರಯತ್ನತಃ ।
ಮ್ರಿಯತೇ ಜ್ವರದಾಹೇನ ದಶಮೇಽಹ್ನಿ ನ ಸಂಶಯಃ ॥ 30 ॥
ಭೂರ್ಜಪತ್ರೇಷ್ವಿದಂ ಸ್ತೋತ್ರಮಷ್ಟಗನ್ಧೇನ ಸಂಲಿಖೇತ್ ।
ಧಾರಯೇದ್ದಕ್ಷಿಣೇ ಬಾಹೌ ನಾರೀ ವಾಮಭುಜೇ ತಥಾ ॥ 31 ॥
ಸಙ್ಗ್ರಾಮೇ ಜಯಮಾಪ್ನೋತಿ ನಾರೀ ಪುತ್ರವತೀ ಭವೇತ್ ।
ಬ್ರಹ್ಮಾಸ್ತ್ರಾದೀನಿ ಶಸ್ತ್ರಾಣಿ ನೈವ ಕೃನ್ತನ್ತಿ ತಂ ಜನಮ್ ॥ 32 ॥
ಸಮ್ಪೂಜ್ಯ ಕವಚಂ ನಿತ್ಯಂ ಪೂಜಾಯಾಃ ಫಲಮಾಲಭೇತ್ ।
ಬೃಹಸ್ಪತಿಸಮೋ ವಾಪಿ ವಿಭವೇ ಧನದೋಪಮಃ ॥ 33 ॥
ಕಾಮತುಲ್ಯಶ್ಚ ನಾರೀಣಾಂ ಶತ್ರೂಣಾಂ ಚ ಯಮೋಪಮಃ ।
ಕವಿತಾಲಹರೀ ತಸ್ಯ ಭವೇದ್ಗಙ್ಗಾಪ್ರವಾಹವತ್ ॥ 34 ॥
ಗದ್ಯಪದ್ಯಮಯೀ ವಾಣೀ ಭವೇದ್ದೇವೀಪ್ರಸಾದತಃ ।
ಏಕಾದಶಶತಂ ಯಾವತ್ಪುರಶ್ಚರಣಮುಚ್ಯತೇ ॥ 35 ॥
ಪುರಶ್ಚರ್ಯಾವಿಹೀನಂ ತು ನ ಚೇದಂ ಫಲದಾಯಕಮ್ ।
ನ ದೇಯಂ ಪರಶಿಷ್ಯೇಭ್ಯೋ ದುಷ್ಟೇಭ್ಯಶ್ಚ ವಿಶೇಷತಃ ॥ 36 ॥
ದೇಯಂ ಶಿಷ್ಯಾಯ ಭಕ್ತಾಯ ಪಞ್ಚತ್ವಂ ಚಾಽನ್ಯಥಾಪ್ನುಯಾತ್ ।
ಇದಂ ಕವಚಮಜ್ಞಾತ್ವಾ ಭಜೇದ್ಯೋ ಬಗಲಾಮುಖೀಮ್ ।
ಶತಕೋಟಿ ಜಪಿತ್ವಾ ತು ತಸ್ಯ ಸಿದ್ಧಿರ್ನ ಜಾಯತೇ ॥ 37 ॥
ದಾರಾಢ್ಯೋ ಮನುಜೋಸ್ಯ ಲಕ್ಷಜಪತಃ ಪ್ರಾಪ್ನೋತಿ ಸಿದ್ಧಿಂ ಪರಾಂ
ವಿದ್ಯಾಂ ಶ್ರೀವಿಜಯಂ ತಥಾ ಸುನಿಯತಂ ಧೀರಂ ಚ ವೀರಂ ವರಮ್ ।
ಬ್ರಹ್ಮಾಸ್ತ್ರಾಖ್ಯಮನುಂ ವಿಲಿಖ್ಯ ನಿತರಾಂ ಭೂರ್ಜೇಷ್ಟಗನ್ಧೇನ ವೈ
ಧೃತ್ವಾ ರಾಜಪುರಂ ವ್ರಜನ್ತಿ ಖಲು ಯೇ ದಾಸೋಽಸ್ತಿ ತೇಷಾಂ ನೃಪಃ ॥ 38 ॥
ಇತಿ ವಿಶ್ವಸಾರೋದ್ಧಾರತನ್ತ್ರೇ ಪಾರ್ವತೀಶ್ವರಸಂವಾದೇ ಬಗಳಾಮುಖೀಕವಚಂ ಸಮ್ಪೂರ್ಣಮ್ ।
