ಶ್ರೀ ಪಾರ್ವತ್ಯುವಾಚ
ನಾಮ್ನಾಂ ಸಹಸ್ರಂ ಪರಮಂ ಛಿನ್ನಮಸ್ತಾಪ್ರಿಯಂ ಶುಭಮ್ ।
ಕಥಿತಂ ಭವತಾ ಶಮ್ಭೋಸ್ಸದ್ಯಶ್ಶತ್ರುನಿಕೃನ್ತನಮ್ ॥ 1 ॥
ಪುನಃ ಪೃಚ್ಛಾಮ್ಯಹಂ ದೇವ ಕೃಪಾಂ ಕುರು ಮಮೋಪರಿ ।
ಸಹಸ್ರನಾಮಪಾಠೇ ಚ ಅಶಕ್ತೋ ಯಃ ಪುಮಾನ್ ಭವೇತ್ ॥ 2 ॥
ತೇನ ಕಿಂ ಪಠ್ಯತೇ ನಾಥ ತನ್ಮೇ ಬ್ರೂಹಿ ಕೃಪಾಮಯ ।
ಶ್ರೀ ಸದಾಶಿವ ಉವಾಚ
ಅಷ್ಟೋತ್ತರಶತಂ ನಾಮ್ನಾಂ ಪಠ್ಯತೇ ತೇನ ಸರ್ವದಾ ॥ 3 ॥
ಸಹಸ್ರನಾಮಪಾಠಸ್ಯ ಫಲಂ ಪ್ರಾಪ್ನೋತಿ ನಿಶ್ಚಿತಮ್ ।
ಓಂ ಅಸ್ಯ ಶ್ರೀಛಿನ್ನಮಸ್ತಾದೇವ್ಯಷ್ಟೋತ್ತರ ಶತನಾಮ ಸ್ತೋತ್ರಮಹಾಮನ್ತ್ರಸ್ಯ ಸದಾಶಿವ
ಋಷಿಃ ಅನುಷ್ಟುಪ್ ಛನ್ದಃ ಶ್ರೀಛಿನ್ನಮಸ್ತಾ ದೇವತಾ ಮಮ ಸಕಲಸಿದ್ಧಿ ಪ್ರಾಪ್ತಯೇ ಜಪೇ ವಿನಿಯೋಗಃ ॥
ಓಂ ಛಿನ್ನಮಸ್ತಾ ಮಹಾವಿದ್ಯಾ ಮಹಾಭೀಮಾ ಮಹೋದರೀ ।
ಚಣ್ಡೇಶ್ವರೀ ಚಣ್ಡಮಾತಾ ಚಣ್ಡಮುಣ್ಡಪ್ರಭಞ್ಜಿನೀ ॥ 4 ॥
ಮಹಾಚಣ್ಡಾ ಚಣ್ಡರೂಪಾ ಚಣ್ಡಿಕಾ ಚಣ್ಡಖಣ್ಡಿನೀ ।
ಕ್ರೋಧಿನೀ ಕ್ರೋಧಜನನೀ ಕ್ರೋಧರೂಪಾ ಕುಹೂಃ ಕಳಾ ॥ 5 ॥
ಕೋಪಾತುರಾ ಕೋಪಯುತಾ ಕೋಪಸಂಹಾರಕಾರಿಣೀ ।
ವಜ್ರವೈರೋಚನೀ ವಜ್ರಾ ವಜ್ರಕಲ್ಪಾ ಚ ಡಾಕಿನೀ ॥ 6 ॥
ಡಾಕಿನೀಕರ್ಮನಿರತಾ ಡಾಕಿನೀಕರ್ಮಪೂಜಿತಾ ।
ಡಾಕಿನೀಸಙ್ಗನಿರತಾ ಡಾಕಿನೀಪ್ರೇಮಪೂರಿತಾ ॥ 7 ॥
ಖಟ್ವಾಙ್ಗಧಾರಿಣೀ ಖರ್ವಾ ಖಡ್ಗಖರ್ಪರಧಾರಿಣೀ ।
ಪ್ರೇತಾಸನಾ ಪ್ರೇತಯುತಾ ಪ್ರೇತಸಙ್ಗವಿಹಾರಿಣೀ ॥ 8 ॥
ಛಿನ್ನಮುಣ್ಡಧರಾ ಛಿನ್ನಚಣ್ಡವಿದ್ಯಾ ಚ ಚಿತ್ರಿಣೀ ।
ಘೋರರೂಪಾ ಘೋರದೃಷ್ಟಿಃ ಘೋರರಾವಾ ಘನೋದರೀ ॥ 9 ॥
ಯೋಗಿನೀ ಯೋಗನಿರತಾ ಜಪಯಜ್ಞಪರಾಯಣಾ ।
ಯೋನಿಚಕ್ರಮಯೀ ಯೋನಿರ್ಯೋನಿಚಕ್ರಪ್ರವರ್ತಿನೀ ॥ 10 ॥
ಯೋನಿಮುದ್ರಾ ಯೋನಿಗಮ್ಯಾ ಯೋನಿಯನ್ತ್ರನಿವಾಸಿನೀ ।
ಯನ್ತ್ರರೂಪಾ ಯನ್ತ್ರಮಯೀ ಯನ್ತ್ರೇಶೀ ಯನ್ತ್ರಪೂಜಿತಾ ॥ 11 ॥
ಕೀರ್ತ್ಯಾ ಕಪರ್ದಿನೀ ಕಾಳೀ ಕಙ್ಕಾಳೀ ಕಲಕಾರಿಣೀ ।
ಆರಕ್ತಾ ರಕ್ತನಯನಾ ರಕ್ತಪಾನಪರಾಯಣಾ ॥ 12 ॥
ಭವಾನೀ ಭೂತಿದಾ ಭೂತಿರ್ಭೂತಿಧಾತ್ರೀ ಚ ಭೈರವೀ ।
ಭೈರವಾಚಾರನಿರತಾ ಭೂತಭೈರವಸೇವಿತಾ ॥ 13 ॥
ಭೀಮಾ ಭೀಮೇಶ್ವರೀ ದೇವೀ ಭೀಮನಾದಪರಾಯಣಾ ।
ಭವಾರಾಧ್ಯಾ ಭವನುತಾ ಭವಸಾಗರತಾರಿಣೀ ॥ 14 ॥
ಭದ್ರಕಾಳೀ ಭದ್ರತನುರ್ಭದ್ರರೂಪಾ ಚ ಭದ್ರಿಕಾ ।
ಭದ್ರರೂಪಾ ಮಹಾಭದ್ರಾ ಸುಭದ್ರಾ ಭದ್ರಪಾಲಿನೀ ॥ 15 ॥
ಸುಭವ್ಯಾ ಭವ್ಯವದನಾ ಸುಮುಖೀ ಸಿದ್ಧಸೇವಿತಾ ।
ಸಿದ್ಧಿದಾ ಸಿದ್ಧಿನಿವಹಾ ಸಿದ್ಧಾ ಸಿದ್ಧನಿಷೇವಿತಾ ॥ 16 ॥
ಶುಭದಾ ಶುಭಗಾ ಶುದ್ಧಾ ಶುದ್ಧಸತ್ತ್ವಾ ಶುಭಾವಹಾ ।
ಶ್ರೇಷ್ಠಾ ದೃಷ್ಟಿಮಯೀ ದೇವೀ ದೃಷ್ಟಿಸಂಹಾರಕಾರಿಣೀ ॥ 17 ॥
ಶರ್ವಾಣೀ ಸರ್ವಗಾ ಸರ್ವಾ ಸರ್ವಮಙ್ಗಳಕಾರಿಣೀ ।
ಶಿವಾ ಶಾನ್ತಾ ಶಾನ್ತಿರೂಪಾ ಮೃಡಾನೀ ಮದಾನತುರಾ ॥ 18 ॥
ಇತಿ ತೇ ಕಥಿತಂ ದೇವೀ ಸ್ತೋತ್ರಂ ಪರಮದುರ್ಲಭಮ್ ।
ಗುಹ್ಯಾದ್ಗುಹ್ಯತರಂ ಗೋಪ್ಯಂ ಗೋಪನಿಯಂ ಪ್ರಯತ್ನತಃ ॥ 19 ॥
ಕಿಮತ್ರ ಬಹುನೋಕ್ತೇನ ತ್ವದಗ್ರೇ ಪ್ರಾಣವಲ್ಲಭೇ ।
ಮಾರಣಂ ಮೋಹನಂ ದೇವಿ ಹ್ಯುಚ್ಚಾಟನಮತಃ ಪರಮ್ ॥ 20 ॥
ಸ್ತಮ್ಭನಾದಿಕಕರ್ಮಾಣಿ ಋದ್ಧಯಸ್ಸಿದ್ಧಯೋಽಪಿ ಚ ।
ತ್ರಿಕಾಲಪಠನಾದಸ್ಯ ಸರ್ವೇ ಸಿದ್ಧ್ಯನ್ತ್ಯಸಂಶಯಃ ॥ 21 ॥
ಮಹೋತ್ತಮಂ ಸ್ತೋತ್ರಮಿದಂ ವರಾನನೇ
ಮಯೇರಿತಂ ನಿತ್ಯಮನನ್ಯಬುದ್ಧಯಃ ।
ಪಠನ್ತಿ ಯೇ ಭಕ್ತಿಯುತಾ ನರೋತ್ತಮಾ
ಭವೇನ್ನ ತೇಷಾಂ ರಿಪುಭಿಃ ಪರಾಜಯಃ ॥ 22 ॥
ಇತಿ ಶ್ರೀಛಿನ್ನಮಸ್ತಾದೇವ್ಯಷ್ಟೋತ್ತರಶತನಾಮ ಸ್ತೋತ್ರಮ್ ॥
