ಧ್ಯಾನಮ್ ।
ಶತಮಖಮಣಿ ನೀಲಾ ಚಾರುಕಲ್ಹಾರಹಸ್ತಾ
ಸ್ತನಭರನಮಿತಾಙ್ಗೀ ಸಾನ್ದ್ರವಾತ್ಸಲ್ಯಸಿನ್ಧುಃ ।
ಅಲಕವಿನಿಹಿತಾಭಿಃ ಸ್ರಗ್ಭಿರಾಕೃಷ್ಟನಾಥಾ
ವಿಲಸತು ಹೃದಿ ಗೋದಾ ವಿಷ್ಣುಚಿತ್ತಾತ್ಮಜಾ ನಃ ॥
ಅಥ ಸ್ತೋತ್ರಮ್ ।
ಶ್ರೀರಙ್ಗನಾಯಕೀ ಗೋದಾ ವಿಷ್ಣುಚಿತ್ತಾತ್ಮಜಾ ಸತೀ ।
ಗೋಪೀವೇಷಧರಾ ದೇವೀ ಭೂಸುತಾ ಭೋಗಶಾಲಿನೀ ॥ 1 ॥
ತುಲಸೀಕಾನನೋದ್ಭೂತಾ ಶ್ರೀಧನ್ವಿಪುರವಾಸಿನೀ ।
ಭಟ್ಟನಾಥಪ್ರಿಯಕರೀ ಶ್ರೀಕೃಷ್ಣಹಿತಭೋಗಿನೀ ॥ 2 ॥
ಆಮುಕ್ತಮಾಲ್ಯದಾ ಬಾಲಾ ರಙ್ಗನಾಥಪ್ರಿಯಾ ಪರಾ ।
ವಿಶ್ವಮ್ಭರಾ ಕಲಾಲಾಪಾ ಯತಿರಾಜಸಹೋದರೀ ॥ 3 ॥
ಕೃಷ್ಣಾನುರಕ್ತಾ ಸುಭಗಾ ಸುಲಭಶ್ರೀಃ ಸುಲಕ್ಷಣಾ ।
ಲಕ್ಷ್ಮೀಪ್ರಿಯಸಖೀ ಶ್ಯಾಮಾ ದಯಾಞ್ಚಿತದೃಗಞ್ಚಲಾ ॥ 4 ॥
ಫಲ್ಗುನ್ಯಾವಿರ್ಭವಾ ರಮ್ಯಾ ಧನುರ್ಮಾಸಕೃತವ್ರತಾ ।
ಚಮ್ಪಕಾಶೋಕಪುನ್ನಾಗಮಾಲತೀವಿಲಸತ್ಕಚಾ ॥ 5 ॥
ಆಕಾರತ್ರಯಸಮ್ಪನ್ನಾ ನಾರಾಯಣಪದಾಶ್ರಿತಾ ।
ಶ್ರೀಮದಷ್ಟಾಕ್ಷರೀಮನ್ತ್ರರಾಜಸ್ಥಿತಮನೋರಥಾ ॥ 6 ॥
ಮೋಕ್ಷಪ್ರದಾನನಿಪುಣಾ ಮನುರತ್ನಾಧಿದೇವತಾ ।
ಬ್ರಹ್ಮಣ್ಯಾ ಲೋಕಜನನೀ ಲೀಲಾಮಾನುಷರೂಪಿಣೀ ॥ 7 ॥
ಬ್ರಹ್ಮಜ್ಞಾನಪ್ರದಾ ಮಾಯಾ ಸಚ್ಚಿದಾನನ್ದವಿಗ್ರಹಾ ।
ಮಹಾಪತಿವ್ರತಾ ವಿಷ್ಣುಗುಣಕೀರ್ತನಲೋಲುಪಾ ॥ 8 ॥
ಪ್ರಪನ್ನಾರ್ತಿಹರಾ ನಿತ್ಯಾ ವೇದಸೌಧವಿಹಾರಿಣೀ ।
ಶ್ರೀರಙ್ಗನಾಥಮಾಣಿಕ್ಯಮಞ್ಜರೀ ಮಞ್ಜುಭಾಷಿಣೀ ॥ 9 ॥
ಪದ್ಮಪ್ರಿಯಾ ಪದ್ಮಹಸ್ತಾ ವೇದಾನ್ತದ್ವಯಬೋಧಿನೀ ।
ಸುಪ್ರಸನ್ನಾ ಭಗವತೀ ಶ್ರೀಜನಾರ್ದನದೀಪಿಕಾ ॥ 10 ॥
ಸುಗನ್ಧಾವಯವಾ ಚಾರುರಙ್ಗಮಙ್ಗಲದೀಪಿಕಾ ।
ಧ್ವಜವಜ್ರಾಙ್ಕುಶಾಬ್ಜಾಙ್ಕಮೃದುಪಾದಲತಾಞ್ಚಿತಾ ॥ 11 ॥
ತಾರಕಾಕಾರನಖರಾ ಪ್ರವಾಲಮೃದುಲಾಙ್ಗುಳೀ ।
ಕೂರ್ಮೋಪಮೇಯಪಾದೋರ್ಧ್ವಭಾಗಾ ಶೋಭನಪಾರ್ಷ್ಣಿಕಾ ॥ 12 ॥
ವೇದಾರ್ಥಭಾವತತ್ತ್ವಜ್ಞಾ ಲೋಕಾರಾಧ್ಯಾಙ್ಘ್ರಿಪಙ್ಕಜಾ ।
ಆನನ್ದಬುದ್ಬುದಾಕಾರಸುಗುಲ್ಫಾ ಪರಮಾಣುಕಾ ॥ 13 ॥
ತೇಜಃಶ್ರಿಯೋಜ್ಜ್ವಲಧೃತಪಾದಾಙ್ಗುಳಿಸುಭೂಷಿತಾ ।
ಮೀನಕೇತನತೂಣೀರಚಾರುಜಙ್ಘಾವಿರಾಜಿತಾ ॥ 14 ॥
ಕಕುದ್ವಜ್ಜಾನುಯುಗ್ಮಾಢ್ಯಾ ಸ್ವರ್ಣರಮ್ಭಾಭಸಕ್ಥಿಕಾ ।
ವಿಶಾಲಜಘನಾ ಪೀನಸುಶ್ರೋಣೀ ಮಣಿಮೇಖಲಾ ॥ 15 ॥
ಆನನ್ದಸಾಗರಾವರ್ತಗಮ್ಭೀರಾಮ್ಭೋಜನಾಭಿಕಾ ।
ಭಾಸ್ವದ್ವಲಿತ್ರಿಕಾ ಚಾರುಜಗತ್ಪೂರ್ಣಮಹೋದರೀ ॥ 16 ॥
ನವವಲ್ಲೀರೋಮರಾಜೀ ಸುಧಾಕುಮ್ಭಾಯಿತಸ್ತನೀ ।
ಕಲ್ಪಮಾಲಾನಿಭಭುಜಾ ಚನ್ದ್ರಖಣ್ಡನಖಾಞ್ಚಿತಾ ॥ 17 ॥
ಸುಪ್ರವಾಶಾಙ್ಗುಳೀನ್ಯಸ್ತಮಹಾರತ್ನಾಙ್ಗುಲೀಯಕಾ ।
ನವಾರುಣಪ್ರವಾಲಾಭಪಾಣಿದೇಶಸಮಞ್ಚಿತಾ ॥ 18 ॥
ಕಮ್ಬುಕಣ್ಠೀ ಸುಚುಬುಕಾ ಬಿಮ್ಬೋಷ್ಠೀ ಕುನ್ದದನ್ತಯುಕ್ ।
ಕಾರುಣ್ಯರಸನಿಷ್ಯನ್ದನೇತ್ರದ್ವಯಸುಶೋಭಿತಾ ॥ 19 ॥
ಮುಕ್ತಾಶುಚಿಸ್ಮಿತಾ ಚಾರುಚಾಮ್ಪೇಯನಿಭನಾಸಿಕಾ ।
ದರ್ಪಣಾಕಾರವಿಪುಲಕಪೋಲದ್ವಿತಯಾಞ್ಚಿತಾ ॥ 20 ॥
ಅನನ್ತಾರ್ಕಪ್ರಕಾಶೋದ್ಯನ್ಮಣಿತಾಟಙ್ಕಶೋಭಿತಾ ।
ಕೋಟಿಸೂರ್ಯಾಗ್ನಿಸಙ್ಕಾಶನಾನಾಭೂಷಣಭೂಷಿತಾ ॥ 21 ॥
ಸುಗನ್ಧವದನಾ ಸುಭ್ರೂ ಅರ್ಧಚನ್ದ್ರಲಲಾಟಿಕಾ ।
ಪೂರ್ಣಚನ್ದ್ರಾನನಾ ನೀಲಕುಟಿಲಾಲಕಶೋಭಿತಾ ॥ 22 ॥
ಸೌನ್ದರ್ಯಸೀಮಾ ವಿಲಸತ್ಕಸ್ತೂರೀತಿಲಕೋಜ್ಜ್ವಲಾ ।
ಧಗದ್ಧಗಾಯಮಾನೋದ್ಯನ್ಮಣಿಸೀಮನ್ತಭೂಷಣಾ ॥ 23 ॥
ಜಾಜ್ವಲ್ಯಮಾನಸದ್ರತ್ನದಿವ್ಯಚೂಡಾವತಂಸಕಾ ।
ಸೂರ್ಯಾರ್ಧಚನ್ದ್ರವಿಲಸತ್ ಭೂಷಣಾಞ್ಚಿತವೇಣಿಕಾ ॥ 24 ॥
ಅತ್ಯರ್ಕಾನಲತೇಜೋಧಿಮಣಿಕಞ್ಚುಕಧಾರಿಣೀ ।
ಸದ್ರತ್ನಾಞ್ಚಿತವಿದ್ಯೋತವಿದ್ಯುತ್ಕುಞ್ಜಾಭಶಾಟಿಕಾ ॥ 25 ॥
ನಾನಾಮಣಿಗಣಾಕೀರ್ಣಹೇಮಾಙ್ಗದಸುಭೂಷಿತಾ ।
ಕುಙ್ಕುಮಾಗರುಕಸ್ತೂರೀದಿವ್ಯಚನ್ದನಚರ್ಚಿತಾ ॥ 26 ॥
ಸ್ವೋಚಿತೌಜ್ಜ್ವಲ್ಯವಿವಿಧವಿಚಿತ್ರಮಣಿಹಾರಿಣೀ ।
ಅಸಙ್ಖ್ಯೇಯಸುಖಸ್ಪರ್ಶಸರ್ವಾತಿಶಯಭೂಷಣಾ ॥ 27 ॥
ಮಲ್ಲಿಕಾಪಾರಿಜಾತಾದಿದಿವ್ಯಪುಷ್ಪಸ್ರಗಞ್ಚಿತಾ ।
ಶ್ರೀರಙ್ಗನಿಲಯಾ ಪೂಜ್ಯಾ ದಿವ್ಯದೇಶಸುಶೋಭಿತಾ ॥ 28 ॥
ಇತಿ ಶ್ರೀಗೋದಾಷ್ಟೋತ್ತರಶತನಾಮಸ್ತೋತ್ರಮ್ ।
