ಓಂ ಶಂ ನೋ॑ ಮಿ॒ತ್ರ-ಶ್ಶಂ ವರು॑ಣಃ । ಶಂ ನೋ॑ ಭವತ್ವರ್ಯ॒ಮಾ । ಶಂ ನ॒ ಇನ್ದ್ರೋ॒ ಬೃಹ॒ಸ್ಪತಿಃ॑ । ಶಂ ನೋ॒ ವಿಷ್ಣು॑-ರುರುಕ್ರ॒ಮಃ । ನಮೋ॒ ಬ್ರಹ್ಮ॑ಣೇ । ನಮ॑ಸ್ತೇ ವಾಯೋ । ತ್ವಮೇ॒ವ ಪ್ರ॒ತ್ಯಕ್ಷಂ॒ ಬ್ರಹ್ಮಾ॑ಸಿ । ತ್ವಮೇ॒ವ ಪ್ರ॒ತ್ಯಕ್ಷಂ॒ ಬ್ರಹ್ಮ॑ ವದಿಷ್ಯಾಮಿ ।
ಋ॒ತಂ ವ॑ದಿಷ್ಯಾಮಿ । ಸ॒ತ್ಯಂ ವ॑ದಿಷ್ಯಾಮಿ। ತನ್ಮಾಮ॑ವತು । ತದ್ವ॒ತ್ತಾರ॑ಮವತು । ಅವ॑ತು॒ ಮಾಮ್ । ಅವ॑ತು ವ॒ಕ್ತಾರಮ್᳚ ।

ಓಂ ಶಾನ್ತಿಃ॒ ಶಾನ್ತಿಃ॒ ಶಾನ್ತಿಃ॑ ॥1॥

ಶೀಕ್ಷಾಂ ವ್ಯಾ᳚ಖ್ಯಾಸ್ಯಾ॒ಮಃ । ವರ್ಣ॒-ಸ್ಸ್ವರಃ । ಮಾತ್ರಾ॒ ಬಲಮ್ ।
ಸಾಮ॑ ಸನ್ತಾ॒ನಃ । ಇತ್ಯುತ್ತ-ಶ್ಶೀ᳚ಕ್ಷಾಧ್ಯಾ॒ಯಃ ॥2॥

ಸ॒ಹ ನೌ॒ ಯಶಃ । ಸ॒ಹ ನೌ ಬ್ರ॑ಹ್ಮವ॒ರ್ಚಸಮ್ । ಅಥಾತಸ್ಸಗ್ಂಹಿತಾಯಾ ಉಪನಿಷದಂ ವ್ಯಾ᳚ಖಾಸ್ಯಾ॒ಮಃ ।
ಪಞ್ಚಸ್ವಧಿಕ॑ರಣೇ॒ಶು। ಅಧಿಲೋಕಮಧಿಜ್ಯೌತಿಷ-ಮಧಿವಿದ್ಯ-ಮಧಿಪ್ರಜ॑ಮಧ್ಯಾ॒ತ್ಮಮ್ । ತಾ ಮಹಾಸಗ್ಂಹಿತಾ ಇ॑ತ್ಯಾಚ॒ಕ್ಷತೇ । ಅಥ॑ಧಿಲೋ॒ಕಮ್ । ಪೃಥಿವೀ ಪೂ᳚ರ್ವರೂ॒ಪಮ್ । ದ್ಯೌ ರುತ್ತ॑ರರೂ॒ಪಮ್ । ಆಕಾ॑ಶ-ಸ್ಸನ್ಧಿಃ ॥3॥

ವಾಯುಃ॑-ಸ್ಸನ್ಧಾ॒ನಮ್ । ಇತ್ಯ॑ಧಿಲೋ॒ಕಮ್ । ಅಥಾ॑ಧಿಜ್ಯೌ॒ತಿಷಮ್ । ಆಚಾರ್ಯಃ ಪೂ᳚ರ್ವರೂ॒ಪಮ್ ॥4।ಅನ್ತೇವಾಸ್ಯುತ್ತ॑ರರೂ॒ಪಮ್ । ವಿ॑ದ್ಯಾ ಸ॒ನ್ಧಿಃ । ಪ್ರವಚನಗ್ಂ॑ ಸನ್ಧಾ॒ನಮ್ । ಇತ್ಯ॑ಧಿವಿ॒ದ್ಯಮ್ ॥ ಅಥಾಧಿ॒ಪ್ರಜಮ್ । ಮಾತಾ ಪೂ᳚ರ್ವರೂ॒ಪಮ್ । ಪಿತೋತ್ತ॑ರರೂ॒ಪಮ್ । ಪ್ರ॑ಜಾ ಸ॒ನ್ಧಿಃ । ಪ್ರಜನನಗ್ಂ॑ ಸನ್ಧಾ॒ನಮ್ । ಇತ್ಯಧಿ॒ಪ್ರಜಮ್ ॥5॥

ಅಥಾಧ್ಯಾ॒ತ್ಮಮ್ । ಅಧರಾ ಹನುಃ ಪೂ᳚ರ್ವರೂ॒ಪಮ್ । ಉತ್ತರಾ ಹನುರುತ್ತ॑ರರೂ॒ಪಮ್ । ವಾಕ್ಸ॒ನ್ಧಿಃ । ಜಿಹ್ವಾ॑ ಸನ್ಧಾ॒ನಮ್ । ಇತ್ಯಧ್ಯಾ॒ತ್ಮಮ್ । ಇತೀಮಾಮ॑ಹಾಸ॒ಗ್ಂ॒ಹಿ॑ತಾಃ ॥ ಯ ಏವಮೇತಾ ಮಹಾಸಗ್ಂಹಿತಾ ವ್ಯಾಖ್ಯಾ॑ತಾ ವೇ॒ದ । ಸನ್ಧೀಯತೇ ಪ್ರಜ॑ಯಾ ಪ॒ಶುಭಿಃ । ಬ್ರಹ್ಮವರ್ಚಸೇನಾನ್ನಾದ್ಯೇನ ಸುವರ್ಗ್ಯೇಣ॑ ಲೋಕೇ॒ನ ॥6॥

ಯಶ್ಛನ್ದ॑ಸಾಮೃಷ॒ಭೋ ವಿ॒ಶ್ವರೂ॑ಪಃ । ಛನ್ದೋ॒ಭ್ಯೋಽಧ್ಯ॒ಮೃತಾ᳚ತ್ಸ್ಥಂ ಬ॒ಭೂವ॑ । ಸ ಮೇನ್ದ್ರೋ॑ ಮೇ॒ಧಯಾ᳚ ಸ್ಪೃಣೋತು । ಅ॒ಮೃತ॑ಸ್ಯ ದೇವ॒ಧಾರ॑ಣೋ ಭೂಯಾಸಮ್ । ಶರೀ॑ರಂ ಮೇ॒ ವಿಚ॑ರ್ಷಣಮ್ । ಜಿ॒ಹ್ವಾ ಮೇ॒ ಮಧು॑ಮತ್ತಮಾ । ಕರ್ಣಾ᳚ಭ್ಯಂ॒ ಭೂರಿ॒ವಿಶ್ರು॑ವಮ್ । ಬ್ರಹ್ಮ॑ಣಃ ಕೋ॒ಶೋ॑ಸಿ ಮೇ॒ಧಯಾ ಪಿ॑ಹಿತಃ । ಶ್ರು॒ತಂ ಮೇ॑ ಗೋಪಾಯ । ಆ॒ವಹ॑ನ್ತೀ ವಿತನ್ವಾ॒ನಾ ॥7॥

ಕು॒ರ್ವಾ॒ಣಾ ಚೀರ॑-ಮಾ॒ತ್ಮನಃ॑ । ವಾಸಾಗ್ಂ॑ಸಿ॒ ಮಮ॒ ಗಾವ॑ಶ್ಚ । ಅ॒ನ್ನ॒ಪಾ॒ನೇ ಚ॑ ಸರ್ವ॒ದಾ । ತತೋ॑ ಮೇ॒ ಶ್ರಿಯ॒-ಮಾವ॑ಹ । ಲೋ॒ಮ॒ಶಾಂ ಪ॒ಶುಭಿ॑ಸ್ಸ॒ಹ ಸ್ವಾಹಾ᳚ । ಆಮಾ॑ಯನ್ತು ಬ್ರಹ್ಮಚಾ॒ರಿಣ॒ಸ್ಸ್ವಾಹಾ᳚ । ವಿಮಾ॑ಽಽಯನ್ತು ಬ್ರಹ್ಮಚಾ॒ರಿಣ॒ಸ್ಸ್ವಾಹಾ᳚ । ಪ್ರಮಾ॑ಽಽಯನ್ತು ಬ್ರಹ್ಮಚಾ॒ರಿಣ॒ಸ್ಸ್ವಾಹಾ᳚ । ದಮಾ॑ಯನ್ತು ಬ್ರಹ್ಮಚಾ॒ರಿಣ॒ಸ್ಸ್ವಾಹಾ᳚ । ಶಮಾ॑ಯನ್ತು ಬ್ರಹ್ಮಚಾ॒ರಿಣ॒ಸ್ಸ್ವಾಹಾ᳚ ॥8॥

ಯಶೋ॒ ಜನೇ॑ಽಸಾನಿ॒ ಸ್ವಾಹಾ᳚ । ಶ್ರೇಯಾ॒ನ್॒ ವಸ್ಯ॑ಸೋಽಸಾನಿ॒ ಸ್ವಾಹಾ᳚ । ತಂ ತ್ವಾ॑ ಭಗ॒ ಪ್ರವಿ॑ಶಾನಿ॒ ಸ್ವಾಹಾ᳚ । ಸ ಮಾ॑ ಭಗ॒ ಪ್ರವಿ॑ಶ॒ ಸ್ವಾಹಾ᳚ । ತಸ್ಮಿನ್᳚ ಸ॒ಹಸ್ರ॑ಶಾಖೇ । ಶ್ರೇಯಾ॒ನ್॒ ವಸ್ಯ॑ಸೋಽಸಾನಿ॒ ಸ್ವಾಹಾ᳚ । ತಂ ತ್ವಾ॑ ಭಗ॒ ಪ್ರವಿ॑ಶಾನಿ॒ ಸ್ವಾಹಾ᳚ । ಸ ಮಾ॑ ಭಗ॒ ಪ್ರವಿ॑ಶ॒ ಸ್ವಾಹಾ᳚ । ತಸ್ಮಿ᳚ನ್ಥ್ಸ॒ಹಸ್ರ॑ಶಾಖೇ । ನಿ ಭ॑ಗಾ॒ಽಹಂ ತ್ವಯಿ॑ ಮ್ರುಜೇ॒ ಸ್ವಾಹಾ᳚ । ಯಥಾಽಽಪಃ॒ ಪ್ರವ॑ತಾ॒ಽಽಯನ್ತಿ॑ । ಯಥಾ॒ ಮಾಸಾ॑ ಅಹರ್ಜ॒ರಮ್ । ಏವಂ॒ ಮಾಂ ಬ್ರ॑ಹ್ಮಚಾ॒ರಿಣಃ॑ । ಧಾತ॒ರಾಯ॑ನ್ತು ಸ॒ರ್ವತ॒ಸ್ಸ್ವಾಹಾ᳚ । ಪ್ರ॒ತಿ॒ವೇ॒ಶೋ॑ಽಸಿ॒ ಪ್ರ ಮಾ॒ ಭಾಹಿ॒ ಪ್ರ ಮಾ॑ ಪದ್ಯಸ್ವ ॥9॥

ಭೂರ್ಭುವ॒ಸ್ಸುವ॒ರಿತಿ॒ ವಾ ಏ॒ತಾಸ್ತಿ॒ಸ್ರೋ ವ್ಯಾಹೃ॑ತಯಃ । ತಾಸಾ॑ಮು ಹ ಸ್ಮೈ॒ ತಾಂ ಚ॑ತು॒ರ್ಥೇಏಮ್ । ಮಾಹಾ॑ಚಮಸ್ಯಃ॒ ಪ್ರವೇ॑ದಯತೇ । ಮಹ॒ ಇತಿ॑ । ತದ್-ಬ್ರಹ್ಮ॑ । ಸ ಆ॒ತ್ಮಾ । ಅಙ್ಗಾ᳚ನ್ಯ॒ನ್ಯಾ ದೇ॒ವತಾಃ᳚ । ಭೂರಿತಿ॒ ವಾ ಅ॒ಯಂ ಲೋ॒ಕಃ । ಭುವ॒ ಇತ್ಯ॒ನ್ತರಿ॑ಕ್ಷಮ್ । ಸುವ॒ರಿತ್ಯ॒ಸೌ ಲೋ॒ಕಃ ॥10॥ ಮಹ॒ ಇತ್ಯಾ॑ದಿ॒ತ್ಯಃ । ಆ॒ದಿ॒ತ್ಯೇನ॒ ವಾವ ಸರ್ವೇ॑ ಲೋ॒ಕಾ ಮಹೀ॑ಯನ್ತೇ । ಭೂರಿತಿ॒ ವಾ ಅ॒ಗ್ನಿಃ । ಭುವ॒ ಇತಿ॑ ವಾ॒ಯುಃ । ಸುವ॒ರಿತ್ಯಾ॑ದಿ॒ತ್ಯಃ । ಮಹ॒ ಇತಿ॑ ಚ॒ನ್ದ್ರಮಾಃ᳚ । ಚ॒ನ್ದ್ರಮ॑ಸಾ॒ ವಾವ ಸರ್ವಾ॑ಣಿ॒ ಜ್ಯೋತೀಗ್ಂ॑ಷಿ॒ ಮಹೀ॑ಯನ್ತೇ । ಭೂರಿತಿ॒ ವಾ ಋಚಃ॑ । ಭುವ॒ ಇತಿ॒ ಸಾಮಾ॑ನಿ । ಸುವ॒ರಿತಿ॒ ಯಜೂಗ್ಂ॑ಷಿ ॥11॥ ಮಹ॒ ಇತಿ॒ ಬ್ರಹ್ಮ॑ । ಬ್ರಹ್ಮ॑ಣಾ॒ ವಾವ ಸರ್ವೇ॑ ವೇ॒ದಾ ಮಹೀ॑ಯನ್ತೇ । ಭೂರಿತಿ॒ ವೈ ಪ್ರಾಣಃ । ಭುವ॒ ಇತ್ಯ॑ಪಾ॒ನಃ । ಸುವ॒ರಿತಿ॑ ವ್ಯಾ॒ನಃ । ಮಹ॒ ಇತ್ಯನ್ನಮ್᳚ । ಅನ್ನೇ॑ನ॒ ವಾವ ಸರ್ವೇ᳚ ಪ್ರಾ॒ಣಾ ಮಹೀ॑ಯನ್ತೇ । ತಾ ವಾ ಏ॒ತಾಶ್ಚತ॑ಸ್ರಶ್ಚತು॒ರ್ಧಾ । ಚತ॑ಸ್ರಶ್ಚತಸ್ರೋ॒ ವ್ಯಾಹೃ॑ತಯಃ । ತಾ ಯೋ ವೇದ॑ । ಸ ವೇ॑ದ॒ ಬ್ರಹ್ಮ॑ । ಸರ್ವೇ᳚ಽಸ್ಮೈ ದೇ॒ವಾ ಬ॒ಲಿಮಾವ॑ಹನ್ತಿ ॥12॥

ಸ ಯ ಏ॒ಷೋ᳚ಽನ್ತರ್-ಹೃ॑ದಯ ಆಕಾ॒ಶಃ । ತಸ್ಮಿ॑ನ್ನ॒ಯಂ ಪುರು॑ಷೋ ಮನೋ॒ಮಯಃ॑ । ಅಮೃ॑ತೋ ಹಿರ॒ಣ್ಮಯಃ॑ । ಅನ್ತ॑ರೇಣ॒ ತಾಲು॑ಕೇ । ಯ ಏ॒ಷ ಸ್ತನ॑ ಇವಾವ॒ಲಮ್ಬ॑ತೇ । ಸೇ᳚ನ್ದ್ರಯೋ॒ನಿಃ । ಯತ್ರಾ॒ಸೌ ಕೇ॑ಶಾ॒ನ್ತೋ ವಿವರ್ತ॑ತೇ । ವ್ಯ॒ಪೋಹ್ಯ॑ ಶೀರ್ಷಕಪಾ॒ಲೇ । ಭೂರಿತ್ಯ॒ಗ್ನೌ ಪ್ರತಿ॑ತಿಷ್ಠತಿ । ಭುವ॒ ಇತಿ॑ ವಾ॒ಯೌ ॥13॥ ಸುವ॒ರಿತ್ಯಾ॑ದಿ॒ತ್ಯೇ । ಮಹ॒ ಇತಿ॒ ಬ್ರಹ್ಮ॑ಣಿ । ಆ॒ಪ್ನೋತಿ॒ ಸ್ವಾರಾ᳚ಜ್ಯಮ್ । ಆ॒ಪ್ನೋತಿ॒ ಮನ॑ಸ॒ಸ್ಪತಿಮ್᳚ । ವಾಕ್ಪ॑ತಿ॒ಶ್ರ್ಚಕ್ಷು॑ಶ್ಪತಿಃ ಶ್ರೋತ್ರ॑ಪತಿರ್ವಿ॒ಜ್ಞಾನ॑ಪತಿಃ । ಏ॒ತತ್ತತೋ॑ ಭವತಿ । ಆ॒ಕಾ॒ಶಶ॑ರೀರಂ॒ ಬ್ರಹ್ಮ॑ । ಸ॒ತ್ಯಾತ್ಮ॑ ಪ್ರಾ॒ಣಾರಾ॑ಮಂ॒ ಮನ॑ ಆನನ್ದಮ್ । ಶಾನ್ತಿ॑ಸಮೃದ್ಧ-ಮ॒ಮೃತಮ್᳚ । ಇತಿ॑ ಪ್ರಾಚೀನ ಯೋ॒ಗ್ಯೋಪಾ᳚ಸ್ವ ॥14॥

ಪೃ॒ಥಿ॒ವ್ಯ॑ನ್ತರಿ॑ಕ್ಷಂ॒ ದ್ಯೋ-ರ್ದಿಶೋ॑ಽವಾನ್ತರದಿ॒ಶಾಃ । ಅ॒ಗ್ನಿರ್ವಾ॒ಯುರಾ॑ದಿ॒ತ್ಯಶ್ಚ್॒ನ್ದ್ರಮಾ॒ ನಕ್ಷ॑ತ್ರಾಣಿ । ಆಪ॒ ಓಷ॑ದಯೋ॒ ವನ॒ಸ್ಪತ॑ಯ ಆಕಾ॒ಶ ಆ॒ತ್ಮಾ । ಇತ್ಯ॑ಧಿಭೂ॒ತಮ್ । ಅಥಾಧ್ಯಾ॒ತ್ಮಮ್ । ಪ್ರಾ॒ಣೋ ವ್ಯಾ॒ನೋ॑ಽಪಾ॒ನ ಉ॑ದಾ॒ನಸ್ಸ॑ಮಾನಃ । ಚಕ್ಷು॒ಶ್ರೋತ್ರಂ॒ ಮನೋ॒ ವಾಕ್ ತ್ವಕ್ । ಚರ್ಮ॑ಮಾ॒ಗ್ಂ॒ಸಗ್ಗ್ ಸ್ನಾವಾಽಸ್ಥಿ॑ ಮ॒ಜ್ಜಾ । ಏ॒ತ-ದ॑ಧಿವಿ॒ಧಾಯ॒ ಋಷಿ॒-ರವೋ॒ಚತ್ ಪಾಙ್ಕ್ತಂ॒ ವಾ ಇ॒ದಗ್ಂ॒ ಸರ್ವಮ್᳚ । ಪಾನ್ಗ್ತ್ತೇ॑ನೈ॒ವ ಪಾಙ್ಕ್ತಗ್ಗ್ ಸ್ಪೃಣೋ॒ತೀತಿ॑ ॥15॥

ಓ-ಮಿತಿ॒ ಬ್ರಹ್ಮ॑ । ಓಮಿತೀ॒ದಗ್ಂ ಸರ್ವಮ್᳚ । ಓಮಿತ್ಯೇ॒ತ-ದ॑ನುಕೃತಿ ಹಸ್ಮ॒ ವಾ ಅ॒ಪ್ಯೋಶ್ರಾ॑ವ॒ಯೇತ್ಯಾಶ್ರಾ॑ವಯನ್ತಿ । ಓ-ಮಿತಿ॒ ಸಾಮಾ॑ನಿ ಗಾಯನ್ತಿ । ಓಗ್ಂ ಶೋ-ಮಿತಿ॑ ಶ॒ಸ್ತ್ರಾಣಿ॑ ಶಗ್ಂಸನ್ತಿ । ಓಮಿತ್ಯ॑ಧ್ವ॒ರ್ಯುಃ ಪ್ರ॑ತಿಗ॒ರಂ ಪ್ರತಿ॑ಗೃಣಾತಿ । ಓ-ಮಿತಿ॒ ಬ್ರಹ್ಮಾ॒ ಪ್ರಸೌ॑ತಿ । ಓ-ಮಿತ್ಯ॑ಗ್ನಿಹೋತ್ರ-ಮನು॑ಜಾನಾತಿ । ಓಮಿತಿ॑ ಬ್ರಾಹ್ಮ॒ಣಃ ಪ್ರ॑ವ॒ಕ್ಷ್ಯನ್ನಾ॑ಹ॒ ಬ್ರಹ್ಮೋಪಾ᳚ಪ್ನವಾ॒ನೀತಿ॑ । ಬ್ರಹ್ಮೈ॒ವೋಪಾ᳚ಪ್ನೋತಿ ॥16॥

ಋತಂ ಚ ಸ್ವಾಧ್ಯಾಯಪ್ರವ॑ಚನೇ ಚ । ಸತ್ಯಂ ಚ ಸ್ವಾಧ್ಯಾಯಪ್ರವ॑ಚನೇ ಚ । ತಪಶ್ಚ ಸ್ವಾಧ್ಯಾಯಪ್ರವ॑ಚನೇ ಚ । ದಮಶ್ಚ ಸ್ವಾಧ್ಯಾಯಪ್ರವ॑ಚನೇ ಚ । ಶಮಶ್ಚ ಸ್ವಾಧ್ಯಾಯಪ್ರವ॑ಚನೇ ಚ । ಅಗ್ನಯಶ್ಚ ಸ್ವಾಧ್ಯಾಯಪ್ರವ॑ಚನೇ ಚ । ಅಗ್ನಿಹೋತ್ರಂ ಚ ಸ್ವಾಧ್ಯಾಯಪ್ರವ॑ಚನೇ ಚ । ಅತಿಥಯಶ್ಚ ಸ್ವಾಧ್ಯಾಯಪ್ರವ॑ಚನೇ ಚ । ಮಾನುಷಂ ಚ ಸ್ವಾಧ್ಯಾಯಪ್ರವ॑ಚನೇ ಚ । ಪ್ರಜಾ ಚ ಸ್ವಾಧ್ಯಾಯಪ್ರವ॑ಚನೇ ಚ । ಪ್ರಜನಶ್ಚ ಸ್ವಾಧ್ಯಾಯಪ್ರವ॑ಚನೇ ಚ । ಪ್ರಜಾತಿಶ್ಚ ಸ್ವಾಧ್ಯಾಯಪ್ರವ॑ಚನೇ ಚ । ಸತ್ಯಮಿತಿ ಸತ್ಯವಚಾ॑ ರಾಥೀ॒ ತರಃ । ತಪ ಇತಿ ತಪೋನಿತ್ಯಃ ಪೌ॑ರುಶಿ॒ಷ್ಠಿಃ । ಸ್ವಾಧ್ಯಾಯ ಪ್ರವಚನೇ ಏವೇತಿ ನಾಕೋ॑ ಮೌದ್ಗ॒ಲ್ಯಃ । ತದ್ಧಿ ತಪ॑-ಸ್ತದ್ಧಿ॒ ತಪಃ ॥17॥

ಅ॒ಹಂ ವೃ॒ಕ್ಷಸ್ಯ॒ ರೇರಿ॑ವಾ । ಕೀ॒ರ್ತಿಃ ಪೃ॒ಷ್ಠಂ ಗಿ॒ರೇ-ರಿ॑ವ । ಊ॒ರ್ಧ್ವಪ॑ವಿತ್ರೋ ವಾ॒ಜಿನೀ॑ವ ಸ್ವ॒ಮೃತ॑-ಮಸ್ಮಿ । ದ್ರವಿ॑ಣ॒ಗ್ಂ॒ ಸವ॑ರ್ಚಸಮ್ । ಸುಮೇಧಾ ಅ॑ಮೃತೋ॒ಕ್ಷಿತಃ । ಇತಿ ತ್ರಿಶಙ್ಕೋರ್ವೇದಾ॑ನುವ॒ಚನಮ್ ॥18॥

ವೇದಮನೂಚ್ಯಾಚಾರ್ಯೋಽನ್ತೇವಾಸಿನ-ಮ॑ನುಶಾ॒ಸ್ತಿ । ಸತ್ಯಂ॒ ವದ । ಧರ್ಮಂ॒ ಚರ । ಸ್ವಾಧ್ಯಾಯಾ᳚ನ್ಮಾ ಪ್ರ॒ಮದಃ । ಆಚಾರ್ಯಾಯ ಪ್ರಿಯಂ ಧನಮಾಹೃತ್ಯ ಪ್ರಜಾತನ್ತುಂ ಮಾ ವ್ಯ॑ವಚ್ಛೇ॒ತ್ಸೀಃ । ಸತ್ಯನ್ನ ಪ್ರಮ॑ದಿತ॒ವ್ಯಮ್ । ಧರ್ಮಾನ್ನ ಪ್ರಮ॑ದಿತ॒ವ್ಯಮ್ । ಕುಶಲಾನ್ನ ಪ್ರಮ॑ದಿತ॒ವ್ಯಮ್ । ಭೂತ್ಯೈ ನ ಪ್ರಮ॑ದಿತ॒ವ್ಯಮ್ । ಸ್ವಾಧ್ಯಾಯಪ್ರವಚನಾಭ್ಯಾಂ ನ ಪ್ರಮ॑ದಿತ॒ವ್ಯಮ್ ॥19॥

ದೇವಪಿತೃಕಾರ್ಯಾಭ್ಯಾಂ ನ ಪ್ರಮ॑ದಿತ॒ವ್ಯಮ್ । ಮಾತೃ॑ದೇವೋ॒ ಭವ । ಪಿತೃ॑ದೇವೋ॒ ಭವ । ಆಚಾರ್ಯ॑ದೇವೋ॒ ಭವ । ಅತಿಥಿ॑ದೇವೋ॒ ಭವ । ಯಾನ್ಯನವದ್ಯಾನಿ॑ ಕರ್ಮಾ॒ಣಿ । ತಾನಿ ಸೇವಿ॑ತವ್ಯಾ॒ನಿ । ನೋ ಇ॑ತರಾ॒ಣಿ । ಯಾನ್ಯಸ್ಮಾಕಗ್ಂ ಸುಚ॑ರಿತಾ॒ನಿ । ತಾನಿ ತ್ವಯೋ॑ಪಾಸ್ಯಾ॒ನಿ ॥20॥

ನೋ ಇ॑ತರಾ॒ಣಿ ।ಯೇ ಕೇ ಚಾಸ್ಮಚ್ಛ್ರೇಯಾಗ್ಂ॑ಸೋ ಬ್ರಾ॒ಹ್ಮಣಾಃ । ತೇಷಾಂ ತ್ವಯಾಽಽಸನೇ ನ ಪ್ರಶ್ವ॑ಸಿತ॒ವ್ಯಮ್ । ಶ್ರದ್ಧ॑ಯಾ ದೇ॒ಯಮ್ । ಅಶ್ರದ್ಧ॑ಯಾಽಽದೇ॒ಯಮ್ । ಶ್ರಿ॑ಯಾ ದೇ॒ಯಮ್ । ಹ್ರಿ॑ಯಾ ದೇ॒ಯಮ್ । ಭಿ॑ಯಾ ದೇ॒ಯಮ್ । ಸಂವಿ॑ದಾ ದೇ॒ಯಮ್ । ಅಥಯದಿ ತೇ ಕರ್ಮವಿಚಿಕಿತ್ಸಾ ವಾ ವೃತ್ತವಿಚಿಕಿ॑ತ್ಸಾ ವಾ॒ ಸ್ಯಾತ್ ॥21॥

ಯೇ ತತ್ರ ಬ್ರಾಹ್ಮಣಾ᳚-ಸ್ಸಮ್ಮ॒ರ್॒ಶಿನಃ । ಯುಕ್ತಾ॑ ಆಯು॒ಕ್ತಾಃ । ಅಲೂಕ್ಷಾ॑ ಧರ್ಮ॑-ಕಾಮಾ॒ಸ್ಸ್ಯುಃ । ಯಥಾ ತೇ॑ ತತ್ರ॑ ವರ್ತೇ॒ರನ್ । ತಥಾ ತತ್ರ॑ ವರ್ತೇ॒ಥಾಃ । ಅಥಾಭ್ಯಾ᳚ಖ್ಯಾತೇ॒ಷು । ಯೇ ತತ್ರ ಬ್ರಾಹ್ಮಣಾ᳚-ಸ್ಸಮ್ಮ್॒ರ್॒ಶಿನಃ । ಯುಕ್ತಾ॑ ಆಯು॒ಕ್ತಾಃ । ಅಲೂಕ್ಷಾ॑ ಧರ್ಮ॑-ಕಾಮಾ॒ಸ್ಸ್ಯುಃ । ಯಥಾ ತೇ॑ ತೇಷು॑ ವರ್ತೇ॒ರನ್ । ತಥಾ ತೇಷು॑ ವರ್ತೇ॒ಥಾಃ । ಏಷ॑ ಆದೇ॒ಶಃ । ಏಷ ಊ॑ಪದೇ॒ಶಃ । ಏಷಾ ವೇ॑ದೋಪ॒ನಿಷತ್ । ಏತದ॑ನುಶಾ॒ಸನಮ್ । ಏವಮುಪಾ॑ಸಿತ॒ವ್ಯಮ್ ।ಏವಮುಚೈತ॑ದಿಪಾ॒ಸ್ಯಮ್ ॥22॥

ಶಂ ನೋ॑ ಮಿ॒ತ್ರ-ಶ್ಶಮ್ ವರು॑ಣಃ । ಶಂ ನೋ॑ ಭವತ್ವರ್ಯ॒ಮಾ । ಶಂ ನ॒ ಇನ್ದ್ರೋ॒ ಬೃಹ॒ಸ್ಪತಿಃ॑ । ಶಂ ನೋ॒ ವಿಶ್ಣು॑-ರುರುಕ್ರ॒ಮಃ । ನಮೋ॒ ಬ್ರಹ್ಮ॑ಣೇ । ನಮ॑ಸ್ತೇ ವಾಯೋ । ತ್ವಮೇ॒ವ ಪ್ರ॒ತ್ಯಕ್ಷಂ॒ ಬ್ರಹ್ಮಾ॑ಸಿ । ತ್ವಮೇ॒ವ ಪ್ರ॒ತ್ಯಕ್ಷಂ॒ ಬ್ರಹ್ಮಾವಾ॑ದಿಷಮ್ । ಋ॒ತಮ॑ವಾದಿಷಮ್ । ಸ॒ತ್ಯಮ॑ವಾದಿಷಮ್ । ತನ್ಮಾಮಾ॑ವೀತ್ । ತದ್ವ॒ಕ್ತಾರ॑ಮಾವೀತ್ । ಆವೀ॒ನ್ಮಾಮ್ । ಆವೀ᳚ದ್ವ॒ಕ್ತಾರಮ್᳚ ।

ಓಮ್ ಶಾನ್ತಿಃ॒ ಶಾನ್ತಿಃ॒ ಶಾನ್ತಿಃ॑