অনংতসংসার-সমুদ্রতার-
নৌকাযিতাভ্যাং গুরুভক্তিদাভ্যাম্ ।
বৈরাগ্যসাম্রাজ্যদ-পূজনাভ্যাং
নমো নমঃ শ্রীগুরুপাদুকাভ্যাম্ ॥ 1 ॥
কবিত্ববারাশি-নিশাকরাভ্যাং
দৌর্ভাগ্য-দাবাংবুদ-মালিকাভ্যাম্ ।
দূরীকৃতানম্র-বিপত্তিতাভ্যাং
নমো নমঃ শ্রীগুরুপাদুকাভ্যাম্ ॥ 2 ॥
নতা যযোঃ শ্রীপতিতাং সমীযুঃ
কদাচিদপ্যাশু দরিদ্রবর্যাঃ ।
মূকাশ্চ বাচস্পতিতাং হি তাভ্যাং
নমো নমঃ শ্রীগুরুপাদুকাভ্যাম্ ॥ 3 ॥
নালীকনীকাশ-পদাহৃতাভ্যাং
নানাবিমোহাদি-নিবারিকাভ্যাম্ ।
নমজ্জনাভীষ্ট-ততিপ্রদাভ্যাং
নমো নমঃ শ্রীগুরুপাদুকাভ্যাম্ ॥ 4 ॥
নৃপালিমৌলি-ব্রজরত্নকাংতি-
সরিদ্বিরাজজ্ঝষ-কন্যকাভ্যাম্ ।
নৃপত্বদাভ্যাং নতলোকপংক্তেঃ
নমো নমঃ শ্রীগুরুপাদুকাভ্যাম্ ॥ 5 ॥
পাপাংধকারার্ক-পরংপরাভ্যাং
তাপত্রযাহীংদ্র-খগেশ্বরাভ্যাম্ ।
জাড্যাব্ধি-সংশোষণ-বাডবাভ্যাম্
নমো নমঃ শ্রীগুরুপাদুকাভ্যাম্ ॥ 6 ॥
শমাদিষট্কপ্রদ-বৈভবাভ্যাং
সমাধিদান-ব্রতদীক্ষিতাভ্যাম্ ।
রমাধবাংঘ্রি-স্থিরভক্তিদাভ্যাং
নমো নমঃ শ্রীগুরুপাদুকাভ্যাম্ ॥ 7 ॥
স্বার্চাপরাণা-মখিলেষ্টদাভ্যাং
স্বাহাসহাযাক্ষ-ধুরংধরাভ্যাম্ ।
স্বাংতাচ্ছভাব-প্রদপূজনাভ্যাং
নমো নমঃ শ্রীগুরুপাদুকাভ্যাম্ ॥ 8 ॥
কামাদিসর্প-ব্রজগারুডাভ্যাং
বিবেকবৈরাগ্য-নিধিপ্রদাভ্যাম্ ।
বোধপ্রদাভ্যাং দ্রুতমোক্ষদাভ্যাং
নমো নমঃ শ্রীগুরুপাদুকাভ্যাম্ ॥ 9 ॥
