লীলালব্ধস্থাপিতলুপ্তাখিললোকাং
লোকাতীতৈর্যোগিভিরংতশ্চিরমৃগ্যাম্ ।
বালাদিত্যশ্রেণিসমানদ্যুতিপুংজাং
গৌরীমংবামংবুরুহাক্ষীমহমীডে ॥ 1 ॥
প্রত্যাহারধ্যানসমাধিস্থিতিভাজাং
নিত্যং চিত্তে নির্বৃতিকাষ্ঠাং কলযংতীম্ ।
সত্যজ্ঞানানংদমযীং তাং তনুরূপাং
গৌরীমংবামংবুরুহাক্ষীমহমীডে ॥ 2 ॥
চংদ্রাপীডানংদিতমংদস্মিতবক্ত্রাং
চংদ্রাপীডালংকৃতনীলালকভারাম্ ।
ইংদ্রোপেংদ্রাদ্যর্চিতপাদাংবুজযুগ্মাং
গৌরীমংবামংবুরুহাক্ষীমহমীডে ॥ 3 ॥
আদিক্ষাংতামক্ষরমূর্ত্যা বিলসংতীং
ভূতে ভূতে ভূতকদংবপ্রসবিত্রীম্ ।
শব্দব্রহ্মানংদমযীং তাং তটিদাভাং
গৌরীমংবামংবুরুহাক্ষীমহমীডে ॥ 4 ॥
মূলাধারাদুত্থিতবীথ্যা বিধিরংধ্রং
সৌরং চাংদ্রং ব্যাপ্য বিহারজ্বলিতাংগীম্ ।
যেযং সূক্ষ্মাত্সূক্ষ্মতনুস্তাং সুখরূপাং
গৌরীমংবামংবুরুহাক্ষীমহমীডে ॥ 5 ॥
নিত্যঃ শুদ্ধো নিষ্কল একো জগদীশঃ
সাক্ষী যস্যাঃ সর্গবিধৌ সংহরণে চ ।
বিশ্বত্রাণক্রীডনলোলাং শিবপত্নীং
গৌরীমংবামংবুরুহাক্ষীমহমীডে ॥ 6 ॥
যস্যাঃ কুক্ষৌ লীনমখংডং জগদংডং
ভূযো ভূযঃ প্রাদুরভূদুত্থিতমেব ।
পত্যা সার্ধং তাং রজতাদ্রৌ বিহরংতীং
গৌরীমংবামংবুরুহাক্ষীমহমীডে ॥ 7 ॥
যস্যামোতং প্রোতমশেষং মণিমালা-
-সূত্রে যদ্বত্কাপি চরং চাপ্যচরং চ ।
তামধ্যাত্মজ্ঞানপদব্যা গমনীযাং
গৌরীমংবামংবুরুহাক্ষীমহমীডে ॥ 8 ॥
নানাকারৈঃ শক্তিকদংবৈর্ভুবনানি
ব্যাপ্য স্বৈরং ক্রীডতি যেযং স্বযমেকা ।
কল্যাণীং তাং কল্পলতামানতিভাজাং
গৌরীমংবামংবুরুহাক্ষীমহমীডে ॥ 9 ॥
আশাপাশক্লেশবিনাশং বিদধানাং
পাদাংভোজধ্যানপরাণাং পুরুষাণাম্ ।
ঈশামীশার্ধাংগহরাং তামভিরামাং
গৌরীমংবামংবুরুহাক্ষীমহমীডে ॥ 10 ॥
প্রাতঃকালে ভাববিশুদ্ধঃ প্রণিধানা-
-দ্ভক্ত্যা নিত্যং জল্পতি গৌরীদশকং যঃ ।
বাচাং সিদ্ধিং সংপদমগ্র্যাং শিবভক্তিং
তস্যাবশ্যং পর্বতপুত্রী বিদধাতি ॥ 11 ॥
ইতি শ্রীমত্পরমহংসপরিব্রাজকাচার্যস্য শ্রীগোবিংদভগবত্পূজ্যপাদশিষ্যস্য শ্রীমচ্ছংকরভগবতঃ কৃতৌ গৌরী দশকম্ ।
