ধ্যানম্
গলদ্রক্তমুংডাবলীকংঠমালা
মহাঘোররাবা সুদংষ্ট্রা করালা ।
বিবস্ত্রা শ্মশানালযা মুক্তকেশী
মহাকালকামাকুলা কালিকেযম্ ॥ 1 ॥
ভুজে বামযুগ্মে শিরোঽসিং দধানা
বরং দক্ষযুগ্মেঽভযং বৈ তথৈব ।
সুমধ্যাঽপি তুংগস্তনা ভারনম্রা
লসদ্রক্তসৃক্কদ্বযা সুস্মিতাস্যা ॥ 2 ॥
শবদ্বংদ্বকর্ণাবতংসা সুকেশী
লসত্প্রেতপাণিং প্রযুক্তৈককাংচী ।
শবাকারমংচাধিরূঢা শিবাভিঃ
চতুর্দিক্ষুশব্দাযমানাঽভিরেজে ॥ 3 ॥
স্তুতিঃ
বিরংচ্যাদিদেবাস্ত্রযস্তে গুণাস্ত্রীন্
সমারাধ্য কালীং প্রধানা বভূবুঃ ।
অনাদিং সুরাদিং মখাদিং ভবাদিং
স্বরূপং ত্বদীযং ন বিংদংতি দেবাঃ ॥ 1 ॥
জগন্মোহিনীযং তু বাগ্বাদিনীযং
সুহৃত্পোষিণী শত্রুসংহারণীযম্ ।
বচস্তংভনীযং কিমুচ্চাটনীযং
স্বরূপং ত্বদীযং ন বিংদংতি দেবাঃ ॥ 2 ॥
ইযং স্বর্গদাত্রী পুনঃ কল্পবল্লী
মনোজাস্তু কামান্ যথার্থং প্রকুর্যাত্ ।
তথা তে কৃতার্থা ভবংতীতি নিত্যং
স্বরূপং ত্বদীযং ন বিংদংতি দেবাঃ ॥ 3 ॥
সুরাপানমত্তা সুভক্তানুরক্তা
লসত্পূতচিত্তে সদাবির্ভবত্তে ।
জপধ্যানপূজাসুধাধৌতপংকা
স্বরূপং ত্বদীযং ন বিংদংতি দেবাঃ ॥ 4 ॥
চিদানংদকংদং হসন্মংদমংদং
শরচ্চংদ্রকোটিপ্রভাপুংজবিংবম্ ।
মুনীনাং কবীনাং হৃদি দ্যোতযংতং
স্বরূপং ত্বদীযং ন বিংদংতি দেবাঃ ॥ 5 ॥
মহামেঘকালী সুরক্তাপি শুভ্রা
কদাচিদ্বিচিত্রাকৃতির্যোগমাযা ।
ন বালা ন বৃদ্ধা ন কামাতুরাপি
স্বরূপং ত্বদীযং ন বিংদংতি দেবাঃ ॥ 6 ॥
ক্ষমস্বাপরাধং মহাগুপ্তভাবং
মযা লোকমধ্যে প্রকাশীকৃতং যত্ ।
তব ধ্যানপূতেন চাপল্যভাবাত্
স্বরূপং ত্বদীযং ন বিংদংতি দেবাঃ ॥ 7 ॥
যদি ধ্যানযুক্তং পঠেদ্যো মনুষ্যঃ
তদা সর্বলোকে বিশালো ভবেচ্চ ।
গৃহে চাষ্টসিদ্ধির্মৃতে চাপি মুক্তিঃ
স্বরূপং ত্বদীযং ন বিংদংতি দেবাঃ ॥ 8 ॥
ইতি শ্রীমচ্ছংকরাচার্যবিরচিতং শ্রীকালিকাষ্টকম্ ।
