અનંતસંસારસમુદ્રતાર-
નૌકાયિતાભ્યાં ગુરુભક્તિદાભ્યામ્ ।
વૈરાગ્યસામ્રાજ્યદપૂજનાભ્યાં
નમો નમઃ શ્રીગુરુપાદુકાભ્યામ્ ॥ 1 ॥
કવિત્વવારાશિનિશાકરાભ્યાં
દૌર્ભાગ્યદાવાંબુદમાલિકાભ્યામ્ ।
દૂરીકૃતાનમ્રવિપત્તિતાભ્યાં
નમો નમઃ શ્રીગુરુપાદુકાભ્યામ્ ॥ 2 ॥
નતા યયોઃ શ્રીપતિતાં સમીયુઃ
કદાચિદપ્યાશુ દરિદ્રવર્યાઃ ।
મૂકાશ્ચ વાચસ્પતિતાં હિ તાભ્યાં
નમો નમઃ શ્રીગુરુપાદુકાભ્યામ્ ॥ 3 ॥
નાલીકનીકાશપદાહૃતાભ્યાં
નાનાવિમોહાદિનિવારિકાભ્યામ્ ।
નમજ્જનાભીષ્ટતતિપ્રદાભ્યાં
નમો નમઃ શ્રીગુરુપાદુકાભ્યામ્ ॥ 4 ॥
નૃપાલિમૌલિવ્રજરત્નકાંતિ-
સરિદ્વિરાજજ્ઝષકન્યકાભ્યામ્ ।
નૃપત્વદાભ્યાં નતલોકપંક્તેઃ
નમો નમઃ શ્રીગુરુપાદુકાભ્યામ્ ॥ 5 ॥
પાપાંધકારાર્કપરંપરાભ્યાં
તાપત્રયાહીંદ્રખગેશ્વરાભ્યામ્ ।
જાડ્યાબ્ધિસંશોષણવાડવાભ્યામ્
નમો નમઃ શ્રીગુરુપાદુકાભ્યામ્ ॥ 6 ॥
શમાદિષટ્કપ્રદવૈભવાભ્યાં
સમાધિદાનવ્રતદીક્ષિતાભ્યામ્ ।
રમાધવાંઘ્રિસ્થિરભક્તિદાભ્યાં
નમો નમઃ શ્રીગુરુપાદુકાભ્યામ્ ॥ 7 ॥
સ્વાર્ચાપરાણામખિલેષ્ટદાભ્યાં
સ્વાહાસહાયાક્ષધુરંધરાભ્યામ્ ।
સ્વાંતાચ્છભાવપ્રદપૂજનાભ્યાં
નમો નમઃ શ્રીગુરુપાદુકાભ્યામ્ ॥ 8 ॥
કામાદિસર્પવ્રજગારુડાભ્યાં
વિવેકવૈરાગ્યનિધિપ્રદાભ્યામ્ ।
બોધપ્રદાભ્યાં દ્રુતમોક્ષદાભ્યાં
નમો નમઃ શ્રીગુરુપાદુકાભ્યામ્ ॥ 9 ॥
