ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾಂ ಪ್ರಥಮಕಾಂಡೇ ಪ್ರಥಮಃ ಪ್ರಶ್ನಃ - (ದರ್​ಶಪೂರ್ಣಮಾಸೌ)

ಓಂ ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥

ಇ॒ಷೇ ತ್ವೋ॒ರ್ಜೇ ತ್ವಾ॑ ವಾ॒ಯವಃ॑ ಸ್ಥೋಪಾ॒ಯವಃ॑ ಸ್ಥ ದೇ॒ವೋ ವಃ॑ ಸವಿ॒ತಾ ಪ್ರಾರ್ಪ॑ಯತು॒ ಶ್ರೇಷ್ಠ॑ತಮಾಯ॒ ಕರ್ಮ॑ಣ॒ ಆ ಪ್ಯಾ॑ಯದ್ಧ್ವಮಘ್ನಿಯಾ ದೇವಭಾ॒ಗಮೂರ್ಜ॑ಸ್ವತೀಃ॒ ಪಯ॑ಸ್ವತೀಃ ಪ್ರ॒ಜಾವ॑ತೀರನಮೀ॒ವಾ ಅ॑ಯ॒ಕ್ಷ್ಮಾ ಮಾ ವಃ॑ ಸ್ತೇ॒ನ ಈ॑ಶತ॒ ಮಾಽಘಶಗ್ಂ॑ಸೋ ರು॒ದ್ರಸ್ಯ॑ ಹೇ॒ತಿಃ ಪರಿ॑ ವೋ ವೃಣಕ್ತು ಧ್ರು॒ವಾ ಅ॒ಸ್ಮಿನ್ ಗೋಪ॑ತೌ ಸ್ಯಾತ ಬ॒ಹ್ವೀ-ರ್ಯಜ॑ಮಾನಸ್ಯ ಪ॒ಶೂನ್ ಪಾ॑ಹಿ ॥ 1 ॥
(ಇ॒ಷೇ - ತ್ರಿಚ॑ತ್ವಾರಿಗ್ಂಶತ್ ) (ಅ. 1)

ಯ॒ಜ್ಞಸ್ಯ॑ ಘೋ॒ಷದ॑ಸಿ॒ ಪ್ರತ್ಯು॑ಷ್ಟ॒ಗ್ಂ॒ ರಕ್ಷಃ॒ ಪ್ರತ್ಯು॑ಷ್ಟಾ॒ ಅರಾ॑ತಯಃ॒ ಪ್ರೇಯಮ॑ಗಾದ್ಧಿ॒ಷಣಾ॑ ಬ॒ರ್॒​ಹಿರಚ್ಛ॒ ಮನು॑ನಾ ಕೃ॒ತಾ ಸ್ವ॒ಧಯಾ॒ ವಿತ॑ಷ್ಟಾ॒ ತ ಆ ವ॑ಹಂತಿ ಕ॒ವಯಃ॑ ಪು॒ರಸ್ತಾ᳚ದ್- ದೇ॒ವೇಭ್ಯೋ॒ ಜುಷ್ಟ॑ಮಿ॒ಹ ಬ॒ರ್॒​ಹಿರಾ॒ಸದೇ॑ ದೇ॒ವಾನಾಂ᳚ ಪರಿಷೂ॒ತಮ॑ಸಿ ವ॒ರ್॒​ಷವೃ॑ದ್ಧಮಸಿ॒ ದೇವ॑ಬರ್​ಹಿ॒ರ್ಮಾ ತ್ವಾಽ॒ನ್ವಂ ಮಾ ತಿ॒ರ್ಯಕ್ ಪರ್ವ॑ ತೇ ರಾದ್ಧ್ಯಾಸಮಾಚ್ಛೇ॒ತ್ತಾ ತೇ॒ ಮಾ ರಿ॑ಷಂ॒ ದೇವ॑ಬರ್​ಹಿಃ ಶ॒ತವ॑ಲ್​ಶಂ॒-ವಿಁ ರೋ॑ಹ ಸ॒ಹಸ್ರ॑ವಲ್​ಶಾ॒ [ಸ॒ಹಸ್ರ॑ವಲ್​ಶಾಃ, ವಿ ವ॒ಯಗ್ಂ ರು॑ಹೇಮ] ॥ 2 ॥

ವಿ ವ॒ಯಗ್ಂ ರು॑ಹೇಮ ಪೃಥಿ॒ವ್ಯಾಃ ಸಂ॒ಪೃಚಃ॑ ಪಾಹಿ ಸುಸಂ॒ಭೃತಾ᳚ ತ್ವಾ॒ ಸಂಭ॑ರಾ॒ಮ್ಯದಿ॑ತ್ಯೈ॒ ರಾಸ್ನಾ॑ಽಸೀಂದ್ರಾ॒ಣ್ಯೈ ಸ॒ನ್ನಹ॑ನಂ ಪೂ॒ಷಾ ತೇ᳚ ಗ್ರಂ॒ಥಿಂ ಗ್ರ॑ಥ್ನಾತು॒ ಸ ತೇ॒ ಮಾಽಽ ಸ್ಥಾ॒ದಿಂದ್ರ॑ಸ್ಯ ತ್ವಾ ಬಾ॒ಹುಭ್ಯಾ॒ಮುದ್ಯ॑ಚ್ಛೇ॒ ಬೃಹ॒ಸ್ಪತೇ᳚-ರ್ಮೂ॒ರ್ಧ್ನಾ ಹ॑ರಾಮ್ಯು॒ರ್ವಂ॑ತರಿ॑ಕ್ಷ॒ಮನ್ವಿ॑ಹಿ ದೇವಂಗ॒ಮಮ॑ಸಿ ॥ 3 ॥
(ಸ॒ಹಸ್ರ॑ವಲ್​ಶಾ - ಅ॒ಷ್ಟಾತ್ರಿಗ್ಂ॑ಶಚ್ಚ) (ಅ. 2)

ಶುಂಧ॑ದ್ಧ್ವಂ॒ ದೈವ್ಯಾ॑ಯ॒ ಕರ್ಮ॑ಣೇ ದೇವಯ॒ಜ್ಯಾಯೈ॑ ಮಾತ॒ರಿಶ್ವ॑ನೋ ಘ॒ರ್ಮೋ॑ಽಸಿ॒ ದ್ಯೌರ॑ಸಿ ಪೃಥಿ॒ವ್ಯ॑ಸಿ ವಿ॒ಶ್ವಧಾ॑ಯಾ ಅಸಿ ಪರ॒ಮೇಣ॒ ಧಾಮ್ನಾ॒ ದೃಗ್ಂಹ॑ಸ್ವ॒ ಮಾ ಹ್ವಾ॒-ರ್ವಸೂ॑ನಾಂ ಪ॒ವಿತ್ರ॑ಮಸಿ ಶ॒ತಧಾ॑ರಂ॒-ವಁಸೂ॑ನಾಂ ಪ॒ವಿತ್ರ॑ಮಸಿ ಸ॒ಹಸ್ರ॑ಧಾರಗ್ಂ ಹು॒ತಃ ಸ್ತೋ॒ಕೋಹು॒ತೋ ದ್ರ॒ಫ್ಸೋ᳚ ಽಗ್ನಯೇ॑ ಬೃಹ॒ತೇ ನಾಕಾ॑ಯ॒ ಸ್ವಾಹಾ॒ ದ್ಯಾವಾ॑ಪೃಥಿ॒ವೀಭ್ಯಾ॒ಗ್ಂ॒ ಸಾ ವಿ॒ಶ್ವಾಯುಃ॒ ಸಾ ವಿ॒ಶ್ವವ್ಯ॑ಚಾಃ॒ ಸಾ ವಿ॒ಶ್ವಕ॑ರ್ಮಾ॒ ಸಂ ಪೃ॑ಚ್ಯದ್ಧ್ವ-ಮೃತಾವರೀ-ರೂ॒ರ್ಮಿಣೀ॒ರ್ಮಧು॑ಮತ್ತಮಾ ಮಂ॒ದ್ರಾ ಧನ॑ಸ್ಯ ಸಾ॒ತಯೇ॒ ಸೋಮೇ॑ನ॒ ತ್ವಾಽಽತ॑ನ॒ಚ್ಮೀಂದ್ರಾ॑ಯ॒ ದಧಿ॒ ವಿಷ್ಣೋ॑ ಹ॒ವ್ಯಗ್ಂ ರ॑ಕ್ಷಸ್ವ ॥ 4 ॥
(ಸೋಮೇ॑ - ನಾ॒ಷ್ಟೌ ಚ॑) (ಅ. 3)

ಕರ್ಮ॑ಣೇ ವಾಂ ದೇ॒ವೇಭ್ಯಃ॑ ಶಕೇಯಂ॒-ವೇಁಷಾ॑ಯ ತ್ವಾ॒ ಪ್ರತ್ಯು॑ಷ್ಟ॒ಗ್ಂ॒ ರಕ್ಷಃ॒ ಪ್ರತ್ಯು॑ಷ್ಟಾ॒ ಅರಾ॑ತಯೋ॒ ಧೂರ॑ಸಿ॒ ಧೂರ್ವ॒ ಧೂರ್ವಂ॑ತಂ॒ ಧೂರ್ವ॒ ತಂ-ಯೋಁ᳚ಽಸ್ಮಾನ್ ಧೂರ್ವ॑ತಿ॒ ತಂ ಧೂ᳚ರ್ವ॒ಯಂ-ವಁ॒ಯಂ ಧೂರ್ವಾ॑ಮ॒ಸ್ತ್ವಂ ದೇ॒ವಾನಾ॑ಮಸಿ॒ ಸಸ್ನಿ॑ತಮಂ॒ ಪಪ್ರಿ॑ತಮಂ॒ ಜುಷ್ಟ॑ತಮಂ॒-ವಁಹ್ನಿ॑ತಮಂ ದೇವ॒ಹೂತ॑ಮ॒-ಮಹ್ರು॑ತಮಸಿ ಹವಿ॒ರ್ಧಾನಂ॒ ದೃಗ್ಂಹ॑ಸ್ವ॒ ಮಾ ಹ್ವಾ᳚-ರ್ಮಿ॒ತ್ರಸ್ಯ॑ ತ್ವಾ॒ ಚಕ್ಷು॑ಷಾ॒ ಪ್ರೇಕ್ಷೇ॒ ಮಾ ಭೇರ್ಮಾ ಸಂ-ವಿಁ॑ಕ್ಥಾ॒ ಮಾ ತ್ವಾ॑ - [ಮಾ ತ್ವಾ᳚, ಹಿ॒ಗ್ಂ॒ಸಿ॒ಷ॒ಮು॒ರು] ॥ 5 ॥

ಹಿಗ್ಂಸಿಷಮು॒ರು ವಾತಾ॑ಯ ದೇ॒ವಸ್ಯ॑ ತ್ವಾ ಸವಿ॒ತುಃ ಪ್ರ॑ಸ॒ವೇ᳚ಽಶ್ವಿನೋ᳚-ರ್ಬಾ॒ಹುಭ್ಯಾಂ᳚ ಪೂ॒ಷ್ಣೋ ಹಸ್ತಾ᳚ಭ್ಯಾ-ಮ॒ಗ್ನಯೇ॒ ಜುಷ್ಟಂ॒ ನಿರ್ವ॑ಪಾಮ್ಯ॒ಗ್ನೀಷೋಮಾ᳚ಭ್ಯಾ-ಮಿ॒ದಂ ದೇ॒ವಾನಾ॑ಮಿ॒ದಮು॑ ನಃ ಸ॒ಹ ಸ್ಫಾ॒ತ್ಯೈ ತ್ವಾ॒ ನಾರಾ᳚ತ್ಯೈ॒ ಸುವ॑ರ॒ಭಿ ವಿ ಖ್ಯೇ॑ಷಂ-ವೈಁಶ್ವಾನ॒ರಂ ಜ್ಯೋತಿ॒-ರ್ದೃಗ್ಂಹಂ॑ತಾಂ॒ ದುರ್ಯಾ॒ ದ್ಯಾವಾ॑ಪೃಥಿ॒ವ್ಯೋ- ರು॒ರ್ವಂ॑ತರಿ॑ಕ್ಷ॒ ಮನ್ವಿ॒-ಹ್ಯದಿ॑ತ್ಯಾ ಸ್ತ್ವೋ॒ಪಸ್ಥೇ॑ ಸಾದಯಾ॒ಮ್ಯಗ್ನೇ॑ ಹ॒ವ್ಯಗ್ಂ ರ॑ಕ್ಷಸ್ವ ॥ 6 ॥
( ಮಾ ತ್ವಾ॒ - ಷಟ್ಚ॑ತ್ವಾರಿಗ್ಂಶಚ್ಚ ) (ಅ. 4)

ದೇ॒ವೋ ವಃ॑ ಸವಿ॒ತೋತ್ ಪು॑ನಾ॒ತ್ವಚ್ಛಿ॑ದ್ರೇಣ ಪ॒ವಿತ್ರೇ॑ಣ॒ ವಸೋಃ॒ ಸೂರ್ಯ॑ಸ್ಯ ರ॒ಶ್ಮಿಭಿ॒ರಾಪೋ॑ ದೇವೀರಗ್ರೇಪುವೋ ಅಗ್ರೇಗು॒ವೋಽಗ್ರ॑ ಇ॒ಮಂ-ಯಁ॒ಜ್ಞಂ ನ॑ಯ॒ತಾಗ್ರೇ॑ ಯ॒ಜ್ಞಪ॑ತಿಂ ಧತ್ತ ಯು॒ಷ್ಮಾನಿಂದ್ರೋ॑ ಽವೃಣೀತ ವೃತ್ರ॒ತೂರ್ಯೇ॑ ಯೂ॒ಯಮಿಂದ್ರ॑-ಮವೃಣೀದ್ಧ್ವಂ-ವೃಁತ್ರ॒ತೂರ್ಯೇ॒ ಪ್ರೋಕ್ಷಿ॑ತಾಃ ಸ್ಥಾ॒ಗ್ನಯೇ॑ ವೋ॒ ಜುಷ್ಟಂ॒ ಪ್ರೋಕ್ಷಾ᳚ಮ್ಯ॒ಗ್ನೀಷೋಮಾ᳚ಭ್ಯಾ॒ಗ್ಂ॒ ಶುಂಧ॑ದ್ಧ್ವಂ॒ ದೈವ್ಯಾ॑ಯ॒ ಕರ್ಮ॑ಣೇ ದೇವಯ॒ಜ್ಯಾಯಾ॒ ಅವ॑ಧೂತ॒ಗ್ಂ॒ ರಕ್ಷೋಽವ॑ಧೂತಾ॒
ಅರಾ॑ತ॒ಯೋಽದಿ॑ತ್ಯಾ॒ಸ್ತ್ವಗ॑ಸಿ॒ ಪ್ರತಿ॑ ತ್ವಾ - [ಪ್ರತಿ॑ ತ್ವಾ, ಪೃ॒ಥಿ॒ವೀ ವೇ᳚ತ್ತ್ವಧಿ॒ಷವ॑ಣಮಸಿ] ॥ 7 ॥

ಪೃಥಿ॒ವೀ ವೇ᳚ತ್ತ್ವಧಿ॒ಷವ॑ಣಮಸಿ ವಾನಸ್ಪ॒ತ್ಯಂ ಪ್ರತಿ॒ ತ್ವಾಽದಿ॑ತ್ಯಾ॒ಸ್ತ್ವಗ್ವೇ᳚ತ್ತ್ವ॒ಗ್ನೇಸ್ತ॒ನೂರ॑ಸಿ ವಾ॒ಚೋ ವಿ॒ಸರ್ಜ॑ನಂ ದೇ॒ವವೀ॑ತಯೇ ತ್ವಾ ಗೃಹ್ಣಾ॒ಮ್ಯದ್ರಿ॑ರಸಿ ವಾನಸ್ಪ॒ತ್ಯಃ ಸ ಇ॒ದಂ ದೇ॒ವೇಭ್ಯೋ॑ ಹ॒ವ್ಯಗ್ಂ ಸು॒ಶಮಿ॑ ಶಮಿ॒ಷ್ವೇಷ॒ಮಾ ವ॒ದೋರ್ಜ॒ಮಾ ವ॑ದ ದ್ಯು॒ಮದ್ವ॑ದತ ವ॒ಯಗ್ಂ ಸಂ॑ಘಾ॒ತಂ ಜೇ᳚ಷ್ಮ ವ॒ರ್॒​ಷವೃ॑ದ್ಧಮಸಿ॒ ಪ್ರತಿ॑ ತ್ವಾ ವ॒ರ್॒​ಷವೃ॑ದ್ಧಂ-ವೇಁತ್ತು॒ ಪರಾ॑ಪೂತ॒ಗ್ಂ॒ ರಕ್ಷಃ॒ ಪರಾ॑ಪೂತಾ॒ ಅರಾ॑ತಯೋ॒ ರಕ್ಷ॑ಸಾಂ ಭಾ॒ಗೋ॑ ಽಸಿ ವಾ॒ಯುರ್ವೋ॒ ವಿ ವಿ॑ನಕ್ತು ದೇ॒ವೋ ವಃ॑ ಸವಿ॒ತಾ ಹಿರ॑ಣ್ಯಪಾಣಿಃ॒ ಪ್ರತಿ॑ ಗೃಹ್ಣಾತು ॥ 8 ॥
( ತ್ವಾ॒ - ಭಾ॒ಗ - ಏಕಾ॑ದಶ ಚ ) (ಅ. 5)

ಅವ॑ಧೂತ॒ಗ್ಂ॒ ರಕ್ಷೋಽವ॑ಧೂತಾ॒ ಅರಾ॑ತ॒ಯೋಽದಿ॑ತ್ಯಾ॒ಸ್ತ್ವಗ॑ಸಿ॒ ಪ್ರತಿ॑ ತ್ವಾ ಪೃಥಿ॒ವೀವೇ᳚ತ್ತು ದಿ॒ವಃ ಸ್ಕಂ॑ಭ॒ನಿರ॑ಸಿ॒ ಪ್ರತಿ॒ ತ್ವಾಽದಿ॑ತ್ಯಾ॒ಸ್ತ್ವಗ್ವೇ᳚ತ್ತು ಧಿ॒ಷಣಾ॑ಽಸಿ ಪರ್ವ॒ತ್ಯಾ ಪ್ರತಿ॑ ತ್ವಾ ದಿ॒ವಃ ಸ್ಕಂ॑ಭ॒ನಿರ್ವೇ᳚ತ್ತು ಧಿ॒ಷಣಾ॑ಽಸಿ ಪಾರ್ವತೇ॒ಯೀ ಪ್ರತಿ॑ ತ್ವಾ ಪರ್ವ॒ತಿರ್ವೇ᳚ತ್ತು ದೇ॒ವಸ್ಯ॑ ತ್ವಾ ಸವಿ॒ತುಃ ಪ್ರ॑ಸ॒ವೇ᳚-ಽಶ್ವಿನೋ᳚-ರ್ಬಾ॒ಹುಭ್ಯಾಂ᳚ ಪೂ॒ಷ್ಣೋಹಸ್ತಾ᳚ಭ್ಯಾ॒ಮಧಿ॑ ವಪಾಮಿಧಾ॒ನ್ಯ॑ಮಸಿ ಧಿನು॒ಹಿ ದೇ॒ವಾನ್ ಪ್ರಾ॒ಣಾಯ॑ ತ್ವಾ ಽಪಾ॒ನಾಯ॑ ತ್ವಾ ವ್ಯಾ॒ನಾಯ॑ ತ್ವಾ ದೀ॒ರ್ಘಾಮನು॒ ಪ್ರಸಿ॑ತಿ॒ಮಾಯು॑ಷೇಧಾಂ ದೇ॒ವೋ ವಃ॑ ಸವಿ॒ತಾ ಹಿರ॑ಣ್ಯಪಾಣಿಃ॒ ಪ್ರತಿ॑ ಗೃಹ್ಣಾತು ॥ 9 ॥
(ಪ್ರಾ॒ಣಾಯ॑ ತ್ವಾ॒ - ಪಂಚ॑ದಶ ಚ) (ಅ. 6)

ಧೃಷ್ಟಿ॑ರಸಿ॒ ಬ್ರಹ್ಮ॑ ಯ॒ಚ್ಛಾಪಾ᳚ಗ್ನೇ॒ ಽಗ್ನಿಮಾ॒ಮಾದಂ॑ ಜಹಿ॒ ನಿಷ್ಕ್ರ॒ವ್ಯಾದಗ್ಂ॑ ಸೇ॒ಧಾಽಽದೇ॑ವ॒ಯಜಂ॑-ವಁಹ॒ ನಿರ್ದ॑ಗ್ಧ॒ಗ್ಂ॒ ರಕ್ಷೋ॒ ನಿರ್ದ॑ಗ್ಧಾ॒ ಅರಾ॑ತಯೋ ಧ್ರು॒ವಮ॑ಸಿ ಪೃಥಿ॒ವೀಂ ದೃ॒ಗ್ಂ॒ಹಾಽಽಯು॑-ರ್ದೃಗ್ಂಹ ಪ್ರ॒ಜಾಂ ದೃಗ್ಂ॑ಹ ಸಜಾ॒ತಾನ॒ಸ್ಮೈ ಯಜ॑ಮಾನಾಯ॒ ಪರ್ಯೂ॑ಹ ಧ॒ರ್ತ್ರಮ॑ಸ್ಯಂ॒ತರಿ॑ಕ್ಷಂ ದೃಗ್ಂಹ ಪ್ರಾ॒ಣಂ ದೃಗ್ಂ॑ಹಾಪಾ॒ನಂ ದೃಗ್ಂ॑ಹ ಸಜಾ॒ತಾನ॒ಸ್ಮೈ ಯಜ॑ಮಾನಾಯ॒ ಪರ್ಯೂ॑ಹ ಧ॒ರುಣ॑ಮಸಿ॒ ದಿವಂ॑ ದೃಗ್ಂಹ॒ ಚಕ್ಷು॑- [ಚಕ್ಷುಃ॑, ದೃ॒ಗ್ಂ॒ಹ॒ ಶ್ರೋತ್ರಂ॑ ದೃಗ್ಂಹ] ॥ 10 ॥

ರ್ದೃಗ್ಂಹ॒ ಶ್ರೋತ್ರಂ॑ ದೃಗ್ಂಹ ಸಜಾ॒ತಾನ॒ಸ್ಮೈ ಯಜ॑ಮಾನಾಯ॒ ಪರ್ಯೂ॑ಹ॒ ಧರ್ಮಾ॑ಸಿ॒ ದಿಶೋ॑ ದೃಗ್ಂಹ॒ ಯೋನಿಂ॑ ದೃಗ್ಂಹ ಪ್ರ॒ಜಾಂ ದೃಗ್ಂ॑ಹ ಸಜಾ॒ತಾನ॒ಸ್ಮೈ ಯಜ॑ಮಾನಾಯ॒ ಪರ್ಯೂ॑ಹ॒ ಚಿತಃ॑ ಸ್ಥ ಪ್ರ॒ಜಾಮ॒ಸ್ಮೈ ರ॒ಯಿಮ॒ಸ್ಮೈ ಸ॑ಜಾ॒ತಾನ॒ಸ್ಮೈ ಯಜ॑ಮಾನಾಯ॒ ಪರ್ಯೂ॑ಹ॒ ಭೃಗೂ॑ಣಾ॒ಮಂಗಿ॑ರಸಾಂ॒ ತಪ॑ಸಾ ತಪ್ಯದ್ಧ್ವಂ॒-ಯಾಁನಿ॑ ಘ॒ರ್ಮೇ ಕ॒ಪಾಲಾ᳚ನ್ಯುಪಚಿ॒ನ್ವಂತಿ॑ ವೇ॒ಧಸಃ॑ ।
ಪೂ॒ಷ್ಣಸ್ತಾನ್ಯಪಿ॑ ವ್ರ॒ತ ಇಂ॑ದ್ರವಾ॒ಯೂ ವಿ ಮುಂ॑ಚತಾಮ್ ॥ 11 ॥
(ಚಕ್ಷು॑ - ರ॒ಷ್ಟಾಚ॑ತ್ವಾರಿಗ್ಂಶಚ್ಚ) (ಅ. 7)

ಸಂ-ವಁ॑ಪಾಮಿ॒ ಸಮಾಪೋ॑ ಅ॒ದ್ಭಿರ॑ಗ್ಮತ॒ ಸಮೋಷ॑ಧಯೋ॒ ರಸೇ॑ನ॒ ಸಗ್ಂ ರೇ॒ವತೀ॒-ರ್ಜಗ॑ತೀಭಿ॒-ರ್ಮಧು॑ಮತೀ॒-ರ್ಮಧು॑ಮತೀಭಿಃ ಸೃಜ್ಯದ್ಧ್ವಮ॒ದ್ಭ್ಯಃ ಪರಿ॒ ಪ್ರಜಾ॑ತಾಃ ಸ್ಥ॒ ಸಮ॒ದ್ಭಿಃ ಪೃ॑ಚ್ಯದ್ಧ್ವಂ॒ ಜನ॑ಯತ್ಯೈ ತ್ವಾ॒ ಸಂ-ಯೌಁ᳚ಮ್ಯ॒ಗ್ನಯೇ᳚ ತ್ವಾ॒ಽಗ್ನೀಷೋಮಾ᳚ಭ್ಯಾಂ ಮ॒ಖಸ್ಯ॒ ಶಿರೋ॑ಽಸಿ ಘ॒ರ್ಮೋ॑ಽಸಿ ವಿ॒ಶ್ವಾಯು॑ರು॒ರು ಪ್ರ॑ಥಸ್ವೋ॒ರು ತೇ॑ ಯ॒ಜ್ಞಪ॑ತಿಃ ಪ್ರಥತಾಂ॒ ತ್ವಚಂ॑ ಗೃಹ್ಣೀಷ್ವಾಂ॒ತರಿ॑ತ॒ಗ್ಂ॒ ರಕ್ಷೋ॒ಽಂತರಿ॑ತಾ॒ ಅರಾ॑ತಯೋದೇ॒ವಸ್ತ್ವಾ॑ ಸವಿ॒ತಾ ಶ್ರ॑ಪಯತು॒ ವರ್​ಷಿ॑ಷ್ಠೇ॒ ಅಧಿ॒ ನಾಕೇ॒ಽಗ್ನಿಸ್ತೇ॑ ತ॒ನುವಂ॒ ಮಾಽತಿ॑ ಧಾ॒ಗಗ್ನೇ॑ ಹ॒ವ್ಯಗ್ಂ ರ॑ಕ್ಷಸ್ವ॒ ಸಂ ಬ್ರಹ್ಮ॑ಣಾ ಪೃಚ್ಯಸ್ವೈಕ॒ತಾಯ॒ ಸ್ವಾಹಾ᳚ ದ್ವಿ॒ತಾಯ॒ ಸ್ವಾಹಾ᳚ ತ್ರಿ॒ತಾಯ॒ ಸ್ವಾಹಾ᳚ ॥ 12 ॥
(ಸ॒ವಿ॒ತಾ - ದ್ವಾವಿಗ್ಂ॑ಶತಿಶ್ಚ) (ಅ. 8)

ಆ ದ॑ದ॒ ಇಂದ್ರ॑ಸ್ಯ ಬಾ॒ಹುರ॑ಸಿ॒ ದಕ್ಷಿ॑ಣಃ ಸ॒ಹಸ್ರ॑ಭೃಷ್ಟಿಃ ಶ॒ತತೇ॑ಜಾ ವಾ॒ಯುರ॑ಸಿ ತಿ॒ಗ್ಮತೇ॑ಜಾಃ॒ ಪೃಥಿ॑ವಿ ದೇವಯಜ॒ - ನ್ಯೋಷ॑ದ್ಧ್ಯಾಸ್ತೇ॒ ಮೂಲಂ॒ ಮಾ ಹಿಗ್ಂ॑ಸಿಷ॒-ಮಪ॑ಹತೋ॒ಽರರುಃ॑ ಪೃಥಿ॒ವ್ಯೈ ವ್ರ॒ಜಂ ಗ॑ಚ್ಛ ಗೋ॒ಸ್ಥಾನಂ॒-ವಁರ್​ಷ॑ತು ತೇ॒ ದ್ಯೌರ್ಬ॑ಧಾ॒ನ ದೇ॑ವ ಸವಿತಃ ಪರ॒ಮಸ್ಯಾಂ᳚ ಪರಾ॒ವತಿ॑ ಶ॒ತೇನ॒ ಪಾಶೈ॒ರ್ಯೋ᳚ಽಸ್ಮಾನ್ ದ್ವೇಷ್ಟಿ॒ ಯಂ ಚ॑ ವ॒ಯಂ ದ್ವಿ॒ಷ್ಮಸ್ತಮತೋ॒ ಮಾ ಮೌ॒ಗಪ॑ಹತೋ॒ಽರರುಃ॑ ಪೃಥಿ॒ವ್ಯೈ ದೇ॑ವ॒ಯಜ॑ನ್ಯೈ ವ್ರ॒ಜಂ- [ವ್ರ॒ಜಂ, ಗ॒ಚ್ಛ॒ ಗೋ॒ಸ್ಥಾನಂ॒-ವಁರ್​ಷ॑ತು] ॥ 13 ॥

ಗ॑ಚ್ಛ ಗೋ॒ಸ್ಥಾನಂ॒-ವಁರ್​ಷ॑ತು ತೇ॒ ದ್ಯೌರ್ಬ॑ಧಾ॒ನ ದೇ॑ವ ಸವಿತಃ ಪರ॒ಮಸ್ಯಾಂ᳚ ಪರಾ॒ವತಿ॑ ಶ॒ತೇನ॒ ಪಾಶೈ॒ರ್ಯೋ᳚ಽಸ್ಮಾನ್ ದ್ವೇಷ್ಟಿ॒ ಯಂ ಚ॑ ವ॒ಯಂ ದ್ವಿ॒ಷ್ಮಸ್ತಮತೋ॒ ಮಾ ಮೌ॒ಗಪ॑ಹತೋ॒ಽರರುಃ॑ ಪೃಥಿ॒ವ್ಯಾ ಅದೇ॑ವಯಜನೋ ವ್ರ॒ಜಂ ಗ॑ಚ್ಛ ಗೋ॒ಸ್ಥಾನಂ॒-ವಁರ್​ಷ॑ತು ತೇ॒ ದ್ಯೌರ್ಬ॑ಧಾ॒ನ ದೇ॑ವ ಸವಿತಃ ಪರ॒ಮಸ್ಯಾಂ᳚ ಪರಾ॒ವತಿ॑ ಶ॒ತೇನ॒ ಪಾಶೈ॒ರ್ಯೋ᳚ಽಸ್ಮಾನ್ ದ್ವೇಷ್ಟಿ॒ ಯಂ ಚ॑ ವ॒ಯಂ ದ್ವಿ॒ಷ್ಮಸ್ತಮತೋ॒ ಮಾ- [ಮಾ, ಮೌ॒ಗ॒ರರು॑ಸ್ತೇ॒ ದಿವಂ॒ ಮಾ] ॥ 14 ॥

ಮೌ॑ಗ॒ರರು॑ಸ್ತೇ॒ ದಿವಂ॒ ಮಾ ಸ್ಕಾ॒ನ್॒. ವಸ॑ವಸ್ತ್ವಾ॒ ಪರಿ॑ ಗೃಹ್ಣಂತು ಗಾಯ॒ತ್ರೇಣ॒ ಛಂದ॑ಸಾರು॒ದ್ರಾಸ್ತ್ವಾ॒ ಪರಿ॑ ಗೃಹ್ಣಂತು॒ ತ್ರೈಷ್ಟು॑ಭೇನ॒ ಛಂದ॑ಸಾಽಽದಿ॒ತ್ಯಾಸ್ತ್ವಾ॒ ಪರಿ॑ ಗೃಹ್ಣಂತು॒ ಜಾಗ॑ತೇನ॒ ಛಂದ॑ಸಾ ದೇ॒ವಸ್ಯ॑ ಸವಿ॒ತುಃ ಸ॒ವೇ ಕರ್ಮ॑ ಕೃಣ್ವಂತಿ ವೇ॒ಧಸ॑ ಋ॒ತಮ॑ಸ್ಯೃತ॒ಸದ॑ನ-ಮಸ್ಯೃತ॒ಶ್ರೀರ॑ಸಿ॒ ಧಾ ಅ॑ಸಿ ಸ್ವ॒ಧಾ ಅ॑ಸ್ಯು॒ರ್ವೀ ಚಾಸಿ॒ ವಸ್ವೀ॑ ಚಾಸಿ ಪು॒ರಾ ಕ್ರೂ॒ರಸ್ಯ॑ ವಿ॒ಸೃಪೋ॑ ವಿರಫ್ಶಿನ್ ನುದಾ॒ದಾಯ॑ ಪೃಥಿ॒ವೀಂ ಜೀ॒ರದಾ॑ನು॒ರ್ಯಾಮೈರ॑ಯನ್ ಚಂ॒ದ್ರಮ॑ಸಿ ಸ್ವ॒ಧಾಭಿ॒ಸ್ತಾಂ ಧೀರಾ॑ಸೋ ಅನು॒ದೃಶ್ಯ॑ ಯಜಂತೇ ॥ 15 ॥
(ದೇ॒ವ॒ಯಜ॑ನ್ಯೈ ವ್ರ॒ಜಂ - ತಮತೋ॒ ಮಾ - ವಿ॑ರಫ್ಶಿ॒ನ್ - ನೇಕಾ॑ದಶ ಚ) (ಅ. 9)

ಪ್ರತ್ಯು॑ಷ್ಟ॒ಗ್ಂ॒ ರಕ್ಷಃ॒ ಪ್ರತ್ಯು॑ಷ್ಟಾ॒ ಅರಾ॑ತಯೋ॒ ಽಗ್ನೇರ್ವ॒ಸ್ತೇಜಿ॑ಷ್ಠೇನ॒ ತೇಜ॑ಸಾ॒ ನಿಷ್ಟ॑ಪಾಮಿ ಗೋ॒ಷ್ಠಂ ಮಾ ನಿರ್ಮೃ॑ಕ್ಷಂ-ವಾಁ॒ಜಿನಂ॑ ತ್ವಾ ಸಪತ್ನಸಾ॒ಹಗ್ಂ ಸಂ ಮಾ᳚ರ್ಜ್ಮಿ॒ ವಾಚಂ॑ ಪ್ರಾ॒ಣಂ ಚಕ್ಷುಃ॒ ಶ್ರೋತ್ರಂ॑ ಪ್ರ॒ಜಾಂ-ಯೋಁನಿಂ॒ ಮಾ ನಿರ್ಮೃ॑ಕ್ಷಂ-ವಾಁ॒ಜಿನೀಂ᳚ ತ್ವಾ ಸಪತ್ನಸಾ॒ಹೀಗ್ಂ ಸಂ ಮಾ᳚ರ್ಜ್ಮ್ಯಾ॒ಶಾಸಾ॑ನಾ ಸೌಮನ॒ಸಂ ಪ್ರ॒ಜಾಗ್ಂ ಸೌಭಾ᳚ಗ್ಯಂ ತ॒ನೂಮ್ । ಅ॒ಗ್ನೇರನು॑ವ್ರತಾ ಭೂ॒ತ್ವಾ ಸಂ ನ॑ಹ್ಯೇ ಸುಕೃ॒ತಾಯ॒ ಕಮ್ ॥ಸು॒ಪ್ರ॒ಜಸ॑ಸ್ತ್ವಾ ವ॒ಯಗ್ಂ ಸು॒ಪತ್ನೀ॒ರುಪ॑- [ಸು॒ಪಥ್ನೀ॒ರುಪ॑, ಸೇ॒ದಿ॒ಮಿ॒ ।] ॥ 16 ॥

ಸೇದಿಮ । ಅಗ್ನೇ॑ ಸಪತ್ನ॒ದಂಭ॑ನ॒ಮದ॑ಬ್ಧಾಸೋ॒ ಅದಾ᳚ಭ್ಯಮ್ ॥ ಇ॒ಮಂ-ವಿಁಷ್ಯಾ॑ಮಿ॒ ವರು॑ಣಸ್ಯ॒ ಪಾಶಂ॒ ಂ​ಯಁಮಬ॑ದ್ಧ್ನೀತ ಸವಿ॒ತಾ ಸು॒ಕೇತಃ॑ । ಧಾ॒ತುಶ್ಚ॒ ಯೋನೌ॑ ಸುಕೃ॒ತಸ್ಯ॑ ಲೋ॒ಕೇ ಸ್ಯೋ॒ನಂ ಮೇ॑ ಸ॒ಹ ಪತ್ಯಾ॑ ಕರೋಮಿ ॥ ಸಮಾಯು॑ಷಾ॒ ಸಂಪ್ರ॒ಜಯಾ॒ ಸಮ॑ಗ್ನೇ॒ ವರ್ಚ॑ಸಾ॒ ಪುನಃ॑ । ಸಂ ಪತ್ನೀ॒ ಪತ್ಯಾ॒ಽಹಂ ಗ॑ಚ್ಛೇ॒ ಸಮಾ॒ತ್ಮಾ ತ॒ನುವಾ॒ ಮಮ॑ ॥ ಮ॒ಹೀ॒ನಾಂ ಪಯೋ॒ಽಸ್ಯೋಷ॑ಧೀನಾ॒ಗ್ಂ॒ ರಸ॒ಸ್ತಸ್ಯ॒ ತೇಽಕ್ಷೀ॑ಯಮಾಣಸ್ಯ॒ ನಿ- [ನಿಃ, ವ॒ಪಾ॒ಮಿ॒ ಮ॒ಹೀ॒ನಾಂ] ॥ 17 ॥

ರ್ವ॑ಪಾಮಿ ಮಹೀ॒ನಾಂ ಪಯೋ॒ಽಸ್ಯೋಷ॑ಧೀನಾ॒ಗ್ಂ॒ ರಸೋಽದ॑ಬ್ಧೇನ ತ್ವಾ॒ ಚಕ್ಷು॒ಷಾಽವೇ᳚ಕ್ಷೇ ಸುಪ್ರಜಾ॒ಸ್ತ್ವಾಯ॒ ತೇಜೋ॑ಽಸಿ॒ ತೇಜೋಽನು॒ ಪ್ರೇಹ್ಯ॒ಗ್ನಿಸ್ತೇ॒ ತೇಜೋ॒ ಮಾ ವಿ ನೈ॑ದ॒ಗ್ನೇ-ರ್ಜಿ॒ಹ್ವಾಽಸಿ॑ ಸು॒ಭೂರ್ದೇ॒ವಾನಾಂ॒ ಧಾಮ್ನೇ॑ಧಾಮ್ನೇ ದೇ॒ವೇಭ್ಯೋ॒ ಯಜು॑ಷೇಯಜುಷೇ ಭವ ಶು॒ಕ್ರಮ॑ಸಿ॒ ಜ್ಯೋತಿ॑ರಸಿ॒ ತೇಜೋ॑ಽಸಿ ದೇ॒ವೋ ವಃ॑ ಸವಿ॒ತೋತ್ ಪು॑ನಾ॒ತ್ವಚ್ಛಿ॑ದ್ರೇಣ ಪ॒ವಿತ್ರೇ॑ಣ॒ ವಸೋಃ॒ ಸೂರ್ಯ॑ಸ್ಯ ರ॒ಶ್ಮಿಭಿಃ॑ ಶು॒ಕ್ರಂ ತ್ವಾ॑ ಶು॒ಕ್ರಾಯಾಂ॒ ಧಾಮ್ನೇ॑ಧಾಮ್ನೇ ದೇ॒ವೇಭ್ಯೋ॒ ಯಜು॑ಷೇಯಜುಷೇ ಗೃಹ್ಣಾಮಿ॒ ಜ್ಯೋತಿ॑ಸ್ತ್ವಾ॒ ಜ್ಯೋತಿ॑ಷ್ಯ॒ರ್ಚಿಸ್ತ್ವಾ॒ಽರ್ಚಿಷಿ॒ ಧಾಮ್ನೇ॑ಧಾಮ್ನೇ ದೇ॒ವೇಭ್ಯೋ॒ ಯಜು॑ಷೇಯಜುಷೇ ಗೃಹ್ಣಾಮಿ ॥ 18 ॥
(ಉಪ॒ - ನೀ - ರ॒ಶ್ಮಿಭಿಃ॑ ಶು॒ಕ್ರಗ್ಂ - ಷೋಡ॑ಶ ಚ) (ಅ. 10)

ಕೃಷ್ಣೋ᳚ಽಸ್ಯಾಖರೇ॒ಷ್ಠೋ᳚ಽಗ್ನಯೇ᳚ ತ್ವಾ॒ ಸ್ವಾಹಾ॒ ವೇದಿ॑ರಸಿ ಬ॒ರ್॒​ಹಿಷೇ᳚ ತ್ವಾ॒ ಸ್ವಾಹಾ ॑ಬ॒ರ್॒​ಹಿರ॑ಸಿ ಸ್ರು॒ಗ್ಭ್ಯಸ್ತ್ವಾ॒ ಸ್ವಾಹಾ॑ ದಿ॒ವೇ ತ್ವಾ॒ಽಂತರಿ॑ಕ್ಷಾಯ ತ್ವಾ ಪೃಥಿ॒ವ್ಯೈ ತ್ವಾ᳚ ಸ್ವ॒ಧಾ ಪಿ॒ತೃಭ್ಯ॒ ಊರ್ಗ್ಭ॑ವ ಬರ್​ಹಿ॒ಷದ್ಭ್ಯ॑ ಊ॒ರ್ಜಾ ಪೃ॑ಥಿ॒ವೀಂ ಗ॑ಚ್ಛತ॒ ವಿಷ್ಣೋಃ॒ ಸ್ತೂಪೋ॒ಽಸ್ಯೂರ್ಣಾ᳚ಮ್ರದಸಂ ತ್ವಾ ಸ್ತೃಣಾಮಿ ಸ್ವಾಸ॒ಸ್ಥಂ ದೇ॒ವೇಭ್ಯೋ॑ ಗಂಧ॒ರ್ವೋ॑ಽಸಿ ವಿ॒ಶ್ವಾವ॑ಸು॒-ರ್ವಿಶ್ವ॑ಸ್ಮಾ॒ದೀಷ॑ತೋ॒ ಯಜ॑ಮಾನಸ್ಯ ಪರಿ॒ಧಿರಿ॒ಡ ಈ॑ಡಿ॒ತ ಇಂದ್ರ॑ಸ್ಯ ಬಾ॒ಹುರ॑ಸಿ॒- [ಬಾ॒ಹುರ॑ಸಿ, ದಕ್ಷಿ॑ಣೋ॒] ॥ 19 ॥

ದಕ್ಷಿ॑ಣೋ॒ ಯಜ॑ಮಾನಸ್ಯ ಪರಿ॒ಧಿರಿ॒ಡ ಈ॑ಡಿ॒ತೋ ಮಿ॒ತ್ರಾವರು॑ಣೌ ತ್ವೋತ್ತರ॒ತಃ ಪರಿ॑ ಧತ್ತಾಂ ಧ್ರು॒ವೇಣ॒ ಧರ್ಮ॑ಣಾ॒ ಯಜ॑ಮಾನಸ್ಯ ಪರಿ॒ಧಿರಿ॒ಡ ಈ॑ಡಿ॒ತಃ ಸೂರ್ಯ॑ಸ್ತ್ವಾ ಪು॒ರಸ್ತಾ᳚ತ್ ಪಾತು॒ ಕಸ್ಯಾ᳚ಶ್ಚಿದ॒ಭಿಶ॑ಸ್ತ್ಯಾ ವೀ॒ತಿಹೋ᳚ತ್ರಂ ತ್ವಾ ಕವೇ ದ್ಯು॒ಮಂತ॒ಗ್ಂ॒ ಸಮಿ॑ಧೀಮ॒ಹ್ಯಗ್ನೇ॑ ಬೃ॒ಹಂತ॑ಮದ್ಧ್ವ॒ರೇ ವಿ॒ಶೋ ಯಂ॒ತ್ರೇ ಸ್ಥೋ॒ ವಸೂ॑ನಾಗ್ಂ ರು॒ದ್ರಾಣಾ॑-ಮಾದಿ॒ತ್ಯಾನಾ॒ಗ್ಂ॒ ಸದ॑ಸಿ ಸೀದ ಜು॒ಹೂರು॑ಪ॒ಭೃ-ದ್ಧ್ರು॒ವಾಽಸಿ॑ ಘೃ॒ತಾಚೀ॒ ನಾಮ್ನಾ᳚ ಪ್ರಿ॒ಯೇಣ॒ ನಾಮ್ನಾ᳚ ಪ್ರಿ॒ಯೇ ಸದ॑ಸಿ ಸೀದೈ॒ತಾ ಅ॑ಸದಂಥ್ ಸುಕೃ॒ತಸ್ಯ॑ ಲೋ॒ಕೇ ತಾ ವಿ॑ಷ್ಣೋ ಪಾಹಿ ಪಾ॒ಹಿ ಯ॒ಜ್ಞಂ ಪಾ॒ಹಿ ಯ॒ಜ್ಞಪ॑ತಿಂ ಪಾ॒ಹಿ ಮಾಂ-ಯಁ॑ಜ್ಞ॒ನಿಯ᳚ಮ್ ॥ 20 ॥
(ಬಾ॒ಹುರ॑ಸಿ - ಪ್ರಿ॒ಯೇ ಸದ॑ಸಿ॒ - ಪಂಚ॑ದಶ ಚ) (ಅ. 11)

ಭುವ॑ನಮಸಿ॒ ವಿ ಪ್ರ॑ಥ॒ಸ್ವಾಗ್ನೇ॒ ಯಷ್ಟ॑ರಿ॒ದಂ ನಮಃ॑ ।
ಜುಹ್ವೇಹ್ಯ॒ಗ್ನಿಸ್ತ್ವಾ᳚ ಹ್ವಯತಿ ದೇವಯ॒ಜ್ಯಾಯಾ॒ ಉಪ॑ಭೃ॒ದೇಹಿ॑ ದೇ॒ವಸ್ತ್ವಾ॑ ಸವಿ॒ತಾ ಹ್ವ॑ಯತಿ ದೇವಯ॒ಜ್ಯಾಯಾ॒ ಅಗ್ನಾ॑ವಿಷ್ಣೂ॒ ಮಾ ವಾ॒ಮವ॑ ಕ್ರಮಿಷಂ॒-ವಿಁ ಜಿ॑ಹಾಥಾಂ॒ ಮಾ ಮಾ॒ ಸಂ ತಾ᳚ಪ್ತಂ-ಲೋಁ॒ಕಂ ಮೇ॑ ಲೋಕಕೃತೌ ಕೃಣುತಂ॒-ವಿಁಷ್ಣೋಃ॒ ಸ್ಥಾನ॑ಮಸೀ॒ತ ಇಂದ್ರೋ॑ ಅಕೃಣೋ-ದ್ವೀ॒ರ್ಯಾ॑ಣಿ ಸಮಾ॒ರಭ್ಯೋ॒ರ್ಧ್ವೋ ಅ॑ದ್ಧ್ವ॒ರೋ ದಿ॑ವಿ॒ಸ್ಪೃಶ॒ಮಹ್ರು॑ತೋ ಯ॒ಜ್ಞೋ ಯ॒ಜ್ಞಪ॑ತೇ॒-ರಿಂದ್ರಾ॑ವಾಂ॒ಥ್ ಸ್ವಾಹಾ॑ ಬೃ॒ಹದ್ಭಾಃ ಪಾ॒ಹಿ ಮಾ᳚ಽಗ್ನೇ॒ ದುಶ್ಚ॑ರಿತಾ॒ದಾ ಮಾ॒ ಸುಚ॑ರಿತೇ ಭಜ ಮ॒ಖಸ್ಯ॒ ಶಿರೋ॑ಽಸಿ॒ ಸಂಜ್ಯೋತಿ॑ಷಾ॒ ಜ್ಯೋತಿ॑ರಂಕ್ತಾಮ್ ॥ 21 ॥
(ಅಹ್ರು॑ತ॒ - ಏಕ॑ವಿಗ್ಂಶತಿಶ್ಚ) (ಅ. 12)

ವಾಜ॑ಸ್ಯ ಮಾ ಪ್ರಸ॒ವೇನೋ᳚ದ್ಗ್ರಾ॒ಭೇಣೋದ॑ಗ್ರಭೀತ್ । ಅಥಾ॑ ಸ॒ಪತ್ನಾ॒ಗ್ಂ॒ ಇಂದ್ರೋ॑ ಮೇ ನಿಗ್ರಾ॒ಭೇಣಾಧ॑ರಾಗ್ಂ ಅಕಃ ॥ ಉ॒ದ್ಗ್ರಾ॒ಭಂ ಚ॑ ನಿಗ್ರಾ॒ಭಂ ಚ॒ ಬ್ರಹ್ಮ॑ ದೇ॒ವಾ ಅ॑ವೀವೃಧನ್ನ್ । ಅಥಾ॑ ಸ॒ಪತ್ನಾ॑ನಿಂದ್ರಾ॒ಗ್ನೀ ಮೇ॑ ವಿಷೂ॒ಚೀನಾ॒ನ್ ವ್ಯ॑ಸ್ಯತಾಮ್ ॥ ವಸು॑ಭ್ಯಸ್ತ್ವಾ ರು॒ದ್ರೇಭ್ಯ॑ಸ್ತ್ವಾಽಽದಿ॒ತ್ಯೇಭ್ಯ॑ಸ್ತ್ವಾ॒ಽಕ್ತಗ್ಂ ರಿಹಾ॑ಣಾ ವಿ॒ಯಂತು॒ ವಯಃ॑ ॥ ಪ್ರ॒ಜಾಂ-ಯೋಁನಿಂ॒ ಮಾ ನಿರ್ಮೃ॑ಕ್ಷ॒ಮಾ ಪ್ಯಾ॑ಯಂತಾ॒ಮಾಪ॒ ಓಷ॑ಧಯೋ ಮ॒ರುತಾಂ॒ ಪೃಷ॑ತಯಃ ಸ್ಥ॒ ದಿವಂ॑- [ದಿವಂ᳚, ಗ॒ಚ್ಛ॒ ತತೋ॑ ನೋ॒] ॥ 22 ॥

ಗಚ್ಛ॒ ತತೋ॑ ನೋ॒ ವೃಷ್ಟಿ॒ಮೇರ॑ಯ । ಆ॒ಯು॒ಷ್ಪಾ ಅ॑ಗ್ನೇ॒ಽಸ್ಯಾಯು॑ರ್ಮೇ ಪಾಹಿ ಚಕ್ಷು॒ಷ್ಪಾ ಅ॑ಗ್ನೇಽಸಿ॒ ಚಕ್ಷು॑ರ್ಮೇ ಪಾಹಿ ಧ್ರು॒ವಾಽಸಿ॒ ಯಂ ಪ॑ರಿ॒ಧಿಂ ಪ॒ರ್ಯಧ॑ತ್ಥಾ॒ ಅಗ್ನೇ॑ ದೇವ ಪ॒ಣಿಭಿ॑-ರ್ವೀ॒ಯಮಾ॑ಣಃ । ತಂ ತ॑ ಏ॒ತಮನು॒ ಜೋಷಂ॑ ಭರಾಮಿ॒ ನೇದೇ॒ಷ ತ್ವದ॑ಪಚೇ॒ತಯಾ॑ತೈ ಯ॒ಜ್ಞಸ್ಯ॒ ಪಾಥ॒ ಉಪ॒ ಸಮಿ॑ತಗ್ಂ ಸಗ್ಗ್​ಸ್ರಾ॒ವಭಾ॑ಗಾಃ ಸ್ಥೇ॒ಷಾ ಬೃ॒ಹಂತಃ॑ ಪ್ರಸ್ತರೇ॒ಷ್ಠಾ ಬ॑ರ್​ಹಿ॒ಷದ॑ಶ್ಚ [ ] ॥ 23 ॥

ದೇ॒ವಾ ಇ॒ಮಾಂ-ವಾಁಚ॑ಮ॒ಭಿ ವಿಶ್ವೇ॑ ಗೃ॒ಣಂತ॑ ಆ॒ಸದ್ಯಾ॒ಸ್ಮಿನ್ ಬ॒ರ್॒​ಹಿಷಿ॑ ಮಾದಯದ್ಧ್ವಮ॒ಗ್ನೇ-ರ್ವಾ॒ಮಪ॑ನ್ನಗೃಹಸ್ಯ॒ ಸದ॑ಸಿ ಸಾದಯಾಮಿ ಸುಂ॒ನಾಯ॑ ಸುಂನಿನೀ ಸುಂ॒ನೇ ಮಾ॑ ಧತ್ತಂ ಧು॒ರಿ ಧ॒ರ್ಯೌ॑ ಪಾತ॒ಮಗ್ನೇ॑ ಽದಬ್ಧಾಯೋ ಽಶೀತತನೋ ಪಾ॒ಹಿ ಮಾ॒ಽದ್ಯ ದಿ॒ವಃ ಪಾ॒ಹಿ ಪ್ರಸಿ॑ತ್ಯೈ ಪಾ॒ಹಿ ದುರಿ॑ಷ್ಟ್ಯೈ ಪಾ॒ಹಿ ದು॑ರದ್ಮ॒ನ್ಯೈ ಪಾ॒ಹಿ ದುಶ್ಚ॑ರಿತಾ॒ದವಿ॑ಷಂ ನಃ ಪಿ॒ತುಂ ಕೃ॑ಣು ಸು॒ಷದಾ॒ ಯೋನಿ॒ಗ್ಗ್॒ ಸ್ವಾಹಾ॒ ದೇವಾ॑ ಗಾತುವಿದೋ ಗಾ॒ತುಂ​ವಿಁ॒ತ್ತ್ವಾ ಗಾ॒ತು ಮಿ॑ತ॒ ಮನ॑ಸಸ್ಪತ ಇ॒ಮಂ ನೋ॑ ದೇವ ದೇ॒ವೇಷು॑ ಯ॒ಜ್ಞಗ್ಗ್​ ಸ್ವಾಹಾ॑ ವಾ॒ಚಿ ಸ್ವಾಹಾ॒ ವಾತೇ॑ ಧಾಃ ॥ 24 ॥
(ದಿವಂ॑ - ಚ - ವಿ॒ತ್ತ್ವಾ ಗಾ॒ತುಂ - ತ್ರಯೋ॑ದಶ ಚ) (ಅ. 13)

ಉ॒ಭಾ ವಾ॑ಮಿಂದ್ರಾಗ್ನೀ ಆಹು॒ವದ್ಧ್ಯಾ॑ ಉ॒ಭಾ ರಾಧ॑ಸಃ ಸ॒ಹ ಮಾ॑ದ॒ಯದ್ಧ್ಯೈ᳚ । ಉ॒ಭಾ ದಾ॒ತಾರಾ॑ವಿ॒ಷಾಗ್ಂ ರ॑ಯೀ॒ಣಾಮು॒ಭಾ ವಾಜ॑ಸ್ಯ ಸಾ॒ತಯೇ॑ ಹುವೇ ವಾಮ್ ॥ ಅಶ್ರ॑ವ॒ಗ್ಂ॒ ಹಿ ಭೂ॑ರಿ॒ದಾವ॑ತ್ತರಾ ವಾಂ॒-ವಿಁಜಾ॑ಮಾತುರು॒ತ ವಾ॑ ಘಾ ಸ್ಯಾ॒ಲಾತ್ । ಅಥಾ॒ ಸೋಮ॑ಸ್ಯ॒ ಪ್ರಯ॑ತೀ ಯು॒ವಭ್ಯಾ॒ಮಿಂದ್ರಾ᳚ಗ್ನೀ॒ ಸ್ತೋಮಂ॑ ಜನಯಾಮಿ॒ ನವ್ಯ᳚ಮ್ ॥ ಇಂದ್ರಾ᳚ಗ್ನೀ ನವ॒ತಿಂ ಪುರೋ॑ ದಾ॒ಸಪ॑ತ್ನೀರಧೂನುತಮ್ । ಸಾ॒ಕಮೇಕೇ॑ನ॒ ಕರ್ಮ॑ಣಾ ॥ ಶುಚಿಂ॒ ನು ಸ್ತೋಮಂ॒ ನವ॑ಜಾತ-ಮ॒ದ್ಯೇಂದ್ರಾ᳚ಗ್ನೀ ವೃತ್ರಹಣಾ ಜು॒ಷೇಥಾ᳚ಮ್ ॥ 25 ॥

ಉ॒ಭಾ ಹಿ ವಾಗ್ಂ॑ ಸು॒ಹವಾ॒ ಜೋಹ॑ವೀಮಿ॒ ತಾ ವಾಜಗ್ಂ॑ ಸ॒ದ್ಯ ಉ॑ಶ॒ತೇ ಧೇಷ್ಠಾ᳚ ॥ ವ॒ಯಮು॑ ತ್ವಾ ಪಥಸ್ಪತೇ॒ ರಥಂ॒ ನ ವಾಜ॑ಸಾತಯೇ । ಧಿ॒ಯೇ ಪೂ॑ಷನ್ನಯುಜ್ಮಹಿ ॥ ಪ॒ಥಸ್ಪ॑ಥಃ॒ ಪರಿ॑ಪತಿಂ-ವಁಚ॒ಸ್ಯಾ ಕಾಮೇ॑ನ ಕೃ॒ತೋ ಅ॒ಭ್ಯಾ॑ನಡ॒ರ್ಕಮ್ । ಸನೋ॑ ರಾಸಚ್ಛು॒ರುಧ॑ಶ್ಚಂ॒ದ್ರಾಗ್ರಾ॒ ಧಿಯಂ॑ಧಿಯಗ್ಂ ಸೀಷಧಾತಿ॒ ಪ್ರ ಪೂ॒ಷಾ ॥ ಕ್ಷೇತ್ರ॑ಸ್ಯ॒ ಪತಿ॑ನಾ ವ॒ಯಗ್ಂ ಹಿ॒ತೇನೇ॑ವ ಜಯಾಮಸಿ । ಗಾಮಶ್ವಂ॑ ಪೋಷಯಿ॒ತ್ನ್ವಾ ಸ ನೋ॑ [ಸ ನಃ॑, ಮೃ॒ಡಾ॒ತೀ॒ದೃಶೇ᳚ ।] ॥ 26 ॥

ಮೃಡಾತೀ॒ದೃಶೇ᳚ ॥ ಕ್ಷೇತ್ರ॑ಸ್ಯ ಪತೇ॒ ಮಧು॑ಮಂತಮೂ॒ರ್ಮಿಂ ಧೇ॒ನುರಿ॑ವ॒ ಪಯೋ॑ ಅ॒ಸ್ಮಾಸು॑ ಧುಕ್ಷ್ವ । ಮ॒ಧು॒ಶ್ಚುತಂ॑ ಘೃ॒ತಮಿ॑ವ॒ ಸುಪೂ॑ತಮೃ॒ತಸ್ಯ॑ ನಃ॒ ಪತ॑ಯೋ ಮೃಡಯಂತು ॥ ಅಗ್ನೇ॒ ನಯ॑ ಸು॒ಪಥಾ॑ ರಾ॒ಯೇ ಅ॒ಸ್ಮಾನ್. ವಿಶ್ವಾ॑ನಿ ದೇವ ವ॒ಯುನಾ॑ನಿ ವಿ॒ದ್ವಾನ್ । ಯು॒ಯೋ॒ದ್ಧ್ಯ॑ಸ್ಮಜ್ಜು॑ಹುರಾ॒ಣಮೇನೋ॒ ಭೂಯಿ॑ಷ್ಠಾಂ ತೇ॒ ನಮ॑ಉಕ್ತಿಂ-ವಿಁಧೇಮ ॥ ಆ ದೇ॒ವಾನಾ॒ಮಪಿ॒ ಪಂಥಾ॑ಮಗನ್ಮ॒ ಯಚ್ಛ॒ಕ್ನವಾ॑ಮ॒ ತದನು॒ ಪ್ರವೋ॑ಢುಮ್ । ಅ॒ಗ್ನಿ-ರ್ವಿ॒ದ್ವಾಂಥ್ ಸ ಯ॑ಜಾ॒- [ಸ ಯ॑ಜಾತ್, ಸೇದು॒ ಹೋತಾ॒ ಸೋ] ॥ 27 ॥

ಥ್ಸೇದು॒ ಹೋತಾ॒ ಸೋ ಅ॑ದ್ಧ್ವ॒ರಾಂಥ್ ಸ ಋ॒ತೂನ್ ಕ॑ಲ್ಪಯಾತಿ ॥ಯದ್ವಾಹಿ॑ಷ್ಠಂ॒ ತದ॒ಗ್ನಯೇ॑ ಬೃ॒ಹದ॑ರ್ಚ ವಿಭಾವಸೋ । ಮಹಿ॑ಷೀವ॒ ತ್ವದ್ರ॒ಯಿಸ್ತ್ವದ್ವಾಜಾ॒ ಉದೀ॑ರತೇ ॥ ಅಗ್ನೇ॒ ತ್ವಂ ಪಾ॑ರಯಾ॒ ನವ್ಯೋ॑ ಅ॒ಸ್ಮಾಂಥ್ ಸ್ವ॒ಸ್ತಿಭಿ॒ರತಿ॑ ದು॒ರ್ಗಾಣಿ॒ ವಿಶ್ವಾ᳚ । ಪೂಶ್ಚ॑ ಪೃ॒ಥ್ವೀ ಬ॑ಹು॒ಲಾ ನ॑ ಉ॒ರ್ವೀ ಭವಾ॑ ತೋ॒ಕಾಯ॒ ತನ॑ಯಾಯ॒ ಶಂ-ಯೋಃ ಁ॥ ತ್ವಮ॑ಗ್ನೇ ವ್ರತ॒ಪಾ ಅ॑ಸಿ ದೇ॒ವ ಆ ಮರ್ತ್ಯೇ॒ಷ್ವಾ । ತ್ವಂ-ಯಁ॒ಜ್ಞೇಷ್ವೀಡ್ಯಃ॑ ॥ ಯದ್ವೋ॑ ವ॒ಯಂ ಪ್ರ॑ಮಿ॒ನಾಮ॑ ವ್ರ॒ತಾನಿ॑ ವಿ॒ದುಷಾಂ᳚ ದೇವಾ॒ ಅವಿ॑ದುಷ್ಟರಾಸಃ । ಅ॒ಗ್ನಿಷ್ಟ-ದ್ವಿಶ್ವ॒ಮಾ ಪೃ॑ಣಾತಿ ವಿ॒ದ್ವಾನ್. ಯೇಭಿ॑-ರ್ದೇ॒ವಾಗ್ಂ ಋ॒ತುಭಿಃ॑ ಕ॒ಲ್ಪಯಾ॑ತಿ ॥ 28 ॥
(ಜು॒ಷೇಥಾ॒ಮಾ - ಸ ನೋ॑ - ಯಜಾ॒ - ದಾ - ತ್ರಯೋ॑ವಿಗ್ಂಶತಿಶ್ಚ) (ಅ. 14)

(ಇ॒ಷೇ ತ್ವಾ॑ - ಯ॒ಜ್ಞಸ್ಯ॒ - ಶುಂಧ॑ಧ್ವಂ॒ - ಕರ್ಮ॑ಣೇ ವಾಂ - ದೇ॒ವೋ-ಽವ॑ಧೂತಂ॒ - ಧುಷ್ಟಿಃ॒ - ಸಂ-ವಁ॑ಪಾ॒- ಮ್ಯಾ ದ॑ದೇ॒ - ಪ್ರತ್ಯು॑ಷ್ಟಂ॒ - ಕೃಷ್ಣೋ॑ಽಸಿ॒ - ಭುವ॑ನಮಸಿ॒ - ವಾಜ॑ಸ್ಯೋ॒ಭಾ ವಾಂ॒ - ಚತು॑ರ್ದಶ )

(ಇ॒ಷೇ - ದೃಗ್ಂ॑ಹ॒ - ಭುವ॑ನ - ಮ॒ಷ್ಟಾವಿಗ್ಂ॑ಶತಿಃ )

(ಇ॒ಷೇ ತ್ವಾ॑, ಕ॒ಲ್ಪಯಾ॑ತಿ)

॥ ಹರಿಃ॑ ಓಮ್ ॥

॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾಂ ಪ್ರಥಮಕಾಂಡೇ ಪ್ರಥಮಃ ಪ್ರಶ್ನಃ ಸಮಾಪ್ತಃ ॥