ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾಂ ಪ್ರಥಮಕಾಂಡೇ ತೃತೀಯಃ ಪ್ರಶ್ನಃ -(ಅಗ್ನಿಷ್ಟೋಮೇ ಪಶುಃ)

ಓಂ ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥

ದೇ॒ವಸ್ಯ॑ ತ್ವಾ ಸವಿ॒ತುಃ ಪ್ರ॑ಸ॒ವೇ᳚ಽಶ್ವಿನೋ᳚-ರ್ಬಾ॒ಹುಭ್ಯಾಂ᳚ ಪೂ॒ಷ್ಣೋ ಹಸ್ತಾ᳚ಭ್ಯಾ॒ಮಾ ದ॒ದೇಽಭ್ರಿ॑ರಸಿ॒ ನಾರಿ॑ರಸಿ॒ ಪರಿ॑ಲಿಖಿತ॒ಗ್ಂ॒ ರಕ್ಷಃ॒ ಪರಿ॑ಲಿಖಿತಾ॒ ಅರಾ॑ತಯ ಇ॒ದಮ॒ಹಗ್ಂ ರಕ್ಷ॑ಸೋ ಗ್ರೀ॒ವಾ ಅಪಿ॑ ಕೃಂತಾಮಿ॒ ಯೋ᳚ಽಸ್ಮಾನ್ ದ್ವೇಷ್ಟಿ॒ ಯಂ ಚ॑ ವ॒ಯಂ ದ್ವಿ॒ಷ್ಮ ಇ॒ದಮ॑ಸ್ಯ ಗ್ರೀ॒ವಾ ಅಪಿ॑ ಕೃಂತಾಮಿ ದಿ॒ವೇ ತ್ವಾ॒ಽಂತರಿ॑ಕ್ಷಾಯ ತ್ವಾ ಪೃಥಿ॒ವ್ಯೈ ತ್ವಾ॒ ಶುಂಧ॑ತಾಂ-ಲೋಁ॒ಕಃ ಪಿ॑ತೃ॒ಷದ॑ನೋ॒ ಯವೋ॑ಽಸಿ ಯ॒ವಯಾ॒ಸ್ಮ-ದ್ದ್ವೇಷೋ॑ [ಯ॒ವಯಾ॒ಸ್ಮ-ದ್ದ್ವೇಷಃ॑, ಯ॒ವಯಾರಾ॑ತೀಃ] ॥ 1 ॥

ಯ॒ವಯಾರಾ॑ತೀಃ ಪಿತೃ॒ಣಾಗ್ಂ ಸದ॑ನಮ॒ಸ್ಯುದ್ದಿವಗ್ಗ್॑ ಸ್ತಭಾ॒ನಾಽಂತರಿ॑ಕ್ಷಂ ಪೃಣ ಪೃಥಿ॒ವೀಂ ದೃಗ್ಂ॑ಹ ದ್ಯುತಾ॒ನಸ್ತ್ವಾ॑ ಮಾರು॒ತೋ ಮಿ॑ನೋತು ಮಿ॒ತ್ರಾವರು॑ಣಯೋ-ರ್ಧ್ರು॒ವೇಣ॒ ಧರ್ಮ॑ಣಾ ಬ್ರಹ್ಮ॒ವನಿಂ॑ ತ್ವಾ ಕ್ಷತ್ರ॒ವನಿಗ್ಂ॑ ಸುಪ್ರಜಾ॒ವನಿಗ್ಂ॑ ರಾಯಸ್ಪೋಷ॒ವನಿಂ॒ ಪರ್ಯೂ॑ಹಾಮಿ॒ ಬ್ರಹ್ಮ॑ ದೃಗ್ಂಹ ಕ್ಷ॒ತ್ರಂ ದೃಗ್ಂ॑ಹ ಪ್ರ॒ಜಾಂ ದೃಗ್ಂ॑ಹ ರಾ॒ಯಸ್ಪೋಷಂ॑ ದೃಗ್ಂಹ ಘೃ॒ತೇನ॑ ದ್ಯಾವಾಪೃಥಿವೀ॒ ಆ ಪೃ॑ಣೇಥಾ॒ಮಿಂದ್ರ॑ಸ್ಯ॒ ಸದೋ॑ಽಸಿ ವಿಶ್ವಜ॒ನಸ್ಯ॑ ಛಾ॒ಯಾ ಪರಿ॑ ತ್ವಾ ಗಿರ್ವಣೋ॒ ಗಿರ॑ ಇ॒ಮಾ ಭ॑ವಂತು ವಿ॒ಶ್ವತೋ॑ ವೃ॒ದ್ಧಾಯು॒ಮನು॒ ವೃದ್ಧ॑ಯೋ॒ ಜುಷ್ಟಾ॑ ಭವಂತು॒ ಜುಷ್ಟ॑ಯ॒ ಇಂದ್ರ॑ಸ್ಯ॒ ಸ್ಯೂರ॒ಸೀಂದ್ರ॑ಸ್ಯ ಧ್ರು॒ವಮ॑ಸ್ಯೈಂ॒ದ್ರಮ॒ಸೀಂದ್ರಾ॑ಯ ತ್ವಾ ॥ 2 ॥
(ದ್ವೇಷ॑ - ಇ॒ಮಾ - ಅ॒ಷ್ಟಾದ॑ಶ ಚ ) (ಅ. 1)

ರ॒ಕ್ಷೋ॒ಹಣೋ॑ ವಲಗ॒ಹನೋ॑ ವೈಷ್ಣ॒ವಾನ್ ಖ॑ನಾಮೀ॒ದಮ॒ಹಂ ತಂ-ವಁ॑ಲ॒ಗಮುದ್ವ॑ಪಾಮಿ॒ ಯಂ ನಃ॑ ಸಮಾ॒ನೋ ಯಮಸ॑ಮಾನೋ ನಿಚ॒ಖಾನೇ॒ದಮೇ॑ನ॒ಮಧ॑ರಂ ಕರೋಮಿ॒ ಯೋ ನಃ॑ ಸಮಾ॒ನೋ ಯೋಽಸ॑ಮಾನೋಽರಾತೀ॒ಯತಿ॑ ಗಾಯ॒ತ್ರೇಣ॒ ಛಂದ॒ಸಾಽವ॑ಬಾಢೋ ವಲ॒ಗಃ ಕಿಮತ್ರ॑ ಭ॒ದ್ರಂ ತನ್ನೌ॑ ಸ॒ಹ ವಿ॒ರಾಡ॑ಸಿ ಸಪತ್ನ॒ಹಾ ಸ॒ಮ್ರಾಡ॑ಸಿ ಭ್ರಾತೃವ್ಯ॒ಹಾ ಸ್ವ॒ರಾಡ॑ಸ್ಯಭಿಮಾತಿ॒ಹಾ ವಿ॑ಶ್ವಾ॒ರಾಡ॑ಸಿ॒ ವಿಶ್ವಾ॑ಸಾಂ ನಾ॒ಷ್ಟ್ರಾಣಾಗ್ಂ॑ ಹಂ॒ತಾ [ಹಂ॒ತಾ, ರ॒ಕ್ಷೋ॒ಹಣೋ॑] ॥ 3 ॥

ರ॑ಕ್ಷೋ॒ಹಣೋ॑ ವಲಗ॒ಹನಃ॒ ಪ್ರೋಕ್ಷಾ॑ಮಿ ವೈಷ್ಣ॒ವಾನ್ ರ॑ಕ್ಷೋ॒ಹಣೋ॑ ವಲಗ॒ಹನೋಽವ॑ ನಯಾಮಿ ವೈಷ್ಣ॒ವಾನ್ ಯವೋ॑ಽಸಿ ಯ॒ವಯಾ॒ಸ್ಮ-ದ್ದ್ವೇಷೋ॑ ಯ॒ವಯಾರಾ॑ತೀ ರಕ್ಷೋ॒ಹಣೋ॑ ವಲಗ॒ಹನೋಽವ॑ ಸ್ತೃಣಾಮಿ ವೈಷ್ಣ॒ವಾನ್ ರ॑ಕ್ಷೋ॒ಹಣೋ॑ ವಲಗ॒ಹನೋ॒ಽಭಿ ಜು॑ಹೋಮಿ ವೈಷ್ಣ॒ವಾನ್ ರ॑ಕ್ಷೋ॒ಹಣೌ॑ ವಲಗ॒ಹನಾ॒ವುಪ॑ ದಧಾಮಿ ವೈಷ್ಣ॒ವೀ ರ॑ಕ್ಷೋ॒ಹಣೌ॑ ವಲಗ॒ಹನೌ॒ ಪರ್ಯೂ॑ಹಾಮಿ ವೈಷ್ಣ॒ವೀ ರ॑ಕ್ಷೋ॒ಹಣೌ॑ ವಲಗ॒ಹನೌ॒ ಪರಿ॑ ಸ್ತೃಣಾಮಿ ವೈಷ್ಣ॒ವೀ ರ॑ಕ್ಷೋ॒ಹಣೌ॑ ವಲಗ॒ಹನೌ॑ ವೈಷ್ಣ॒ವೀ ಬೃ॒ಹನ್ನ॑ಸಿ ಬೃ॒ಹದ್ಗ್ರಾ॑ವಾ ಬೃಹ॒ತೀಮಿಂದ್ರಾ॑ಯ॒ ವಾಚಂ॑-ವಁದ ॥ 4 ॥
( ಹಂ॒ತೇ-ಂದ್ರಾ॑ಯ॒ ದ್ವೇ ಚ॑ ) (ಅ. 2)

ವಿ॒ಭೂರ॑ಸಿ ಪ್ರ॒ವಾಹ॑ಣೋ॒ ವಹ್ನಿ॑ರಸಿ ಹವ್ಯ॒ವಾಹ॑ನಃ ಶ್ವಾ॒ತ್ರೋ॑ಽಸಿ॒ ಪ್ರಚೇ॑ತಾಸ್ತು॒ಥೋ॑ಽಸಿ ವಿ॒ಶ್ವವೇ॑ದಾ ಉ॒ಶಿಗ॑ಸಿ ಕ॒ವಿರಂಘಾ॑ರಿರಸಿ॒ ಬಂಭಾ॑ರಿರವ॒ಸ್ಯುರ॑ಸಿ॒ ದುವ॑ಸ್ವಾಂಛುಂ॒ಧ್ಯೂರ॑ಸಿ ಮಾರ್ಜಾ॒ಲೀಯಃ॑ ಸ॒ಮ್ರಾಡ॑ಸಿ ಕೃ॒ಶಾನುಃ॑ ಪರಿ॒ಷದ್ಯೋ॑ಽಸಿ॒ ಪವ॑ಮಾನಃ ಪ್ರ॒ತಕ್ವಾ॑ಽಸಿ॒ ನಭ॑ಸ್ವಾ॒ನಸಂ॑ಮೃಷ್ಟೋಽಸಿ ಹವ್ಯ॒ಸೂದ॑ ಋ॒ತಧಾ॑ಮಾಽಸಿ॒ ಸುವರ್ಜ್ಯೋತಿ॒-ರ್ಬ್ರಹ್ಮ॑ಜ್ಯೋತಿರಸಿ॒ ಸುವ॑ರ್ಧಾಮಾ॒ಽಜೋ᳚ ಽಸ್ಯೇಕ॑ಪಾ॒ದಹಿ॑ರಸಿ ಬು॒ದ್ಧ್ನಿಯೋ॒ ರೌದ್ರೇ॒ಣಾನೀ॑ಕೇನ ಪಾ॒ಹಿ ಮಾ᳚ಽಗ್ನೇ ಪಿಪೃ॒ಹಿ ಮಾ॒ ಮಾ ಮಾ॑ ಹಿಗ್ಂಸೀಃ ॥ 5 ॥
(ಅನೀ॑ಕೇನಾ॒-ಷ್ಟೌ ಚ॑) (ಅ. 3)

ತ್ವಗ್ಂ ಸೋ॑ಮ ತನೂ॒ಕೃದ್ಭ್ಯೋ॒ ದ್ವೇಷೋ᳚ಭ್ಯೋ॒ಽನ್ಯಕೃ॑ತೇಭ್ಯ ಉ॒ರು ಯಂ॒ತಾಽಸಿ॒ ವರೂ॑ಥ॒ಗ್ಗ್॒ ಸ್ವಾಹಾ॑ ಜುಷಾ॒ಣೋ ಅ॒ಪ್ತುರಾಜ್ಯ॑ಸ್ಯ ವೇತು॒ ಸ್ವಾಹಾ॒ಽಯನ್ನೋ॑ ಅ॒ಗ್ನಿರ್ವರಿ॑ವಃ ಕೃಣೋತ್ವ॒ಯಂ ಮೃಧಃ॑ ಪು॒ರ ಏ॑ತು ಪ್ರಭಿಂ॒ದನ್ನ್ । ಅ॒ಯಗ್ಂ ಶತ್ರೂಂ᳚ಜಯತು॒ ಜರ್​ಹೃ॑ಷಾಣೋ॒ಽಯಂ-ವಾಁಜಂ॑ ಜಯತು॒ ವಾಜ॑ಸಾತೌ । ಉ॒ರು ವಿ॑ಷ್ಣೋ॒ ವಿ ಕ್ರ॑ಮಸ್ವೋ॒ರು ಕ್ಷಯಾ॑ಯ ನಃ ಕೃಧಿ । ಘೃ॒ತಂ ಘೃ॑ತಯೋನೇ ಪಿಬ॒ ಪ್ರಪ್ರ॑ ಯ॒ಜ್ಞಪ॑ತಿಂ ತಿರ । ಸೋಮೋ॑ ಜಿಗಾತಿ ಗಾತು॒ವಿ- [ಗಾತು॒ವಿತ್, ದೇ॒ವಾನಾ॑ಮೇತಿ] ॥ 6 ॥

ದ್ದೇ॒ವಾನಾ॑ಮೇತಿ ನಿಷ್ಕೃ॒ತಮೃ॒ತಸ್ಯ॒ ಯೋನಿ॑ಮಾ॒ಸದ॒ಮದಿ॑ತ್ಯಾಃ॒ ಸದೋ॒ಽಸ್ಯದಿ॑ತ್ಯಾಃ॒ ಸದ॒ ಆ ಸೀ॑ದೈ॒ಷ ವೋ॑ ದೇವ ಸವಿತಃ॒ ಸೋಮ॒ಸ್ತಗ್ಂ ರ॑ಕ್ಷದ್ಧ್ವಂ॒ ಮಾ ವೋ॑ ದಭದೇ॒ತತ್ತ್ವಗ್ಂ ಸೋ॑ಮ ದೇ॒ವೋ ದೇ॒ವಾನುಪಾ॑ಗಾ ಇ॒ದಮ॒ಹಂ ಮ॑ನು॒ಷ್ಯೋ॑ ಮನು॒ಷ್ಯಾಂ᳚ಥ್ ಸ॒ಹ ಪ್ರ॒ಜಯಾ॑ ಸ॒ಹ ರಾ॒ಯಸ್ಪೋಷೇ॑ಣ॒ ನಮೋ॑ ದೇ॒ವೇಭ್ಯಃ॑ ಸ್ವ॒ಧಾ ಪಿ॒ತೃಭ್ಯ॑ ಇ॒ದಮ॒ಹಂ ನಿರ್ವರು॑ಣಸ್ಯ॒ ಪಾಶಾ॒ಥ್ ಸುವ॑ರ॒ಭಿ [ ] ॥ 7 ॥

ವಿ ಖ್ಯೇ॑ಷಂ-ವೈಁಶ್ವಾನ॒ರಂ ಜ್ಯೋತಿ॒ರಗ್ನೇ᳚ ವ್ರತಪತೇ॒ ತ್ವಂ-ವ್ರಁ॒ತಾನಾಂ᳚-ವ್ರಁ॒ತಪ॑ತಿರಸಿ॒ ಯಾ ಮಮ॑ ತ॒ನೂಸ್ತ್ವಯ್ಯಭೂ॑ದಿ॒ಯಗ್ಂ ಸಾ ಮಯಿ॒ ಯಾ ತವ॑ ತ॒ನೂ-ರ್ಮಯ್ಯಭೂ॑ದೇ॒ಷಾ ಸಾ ತ್ವಯಿ॑ ಯಥಾಯ॒ಥಂ ನೌ᳚ ವ್ರತಪತೇ ವ್ರ॒ತಿನೋ᳚-ರ್ವ್ರ॒ತಾನಿ॑ ॥ 8 ॥
(ಗಾ॒ತು॒ವಿದ॒-ಭ್ಯೇ-ಕ॑ತ್ರಿಗ್ಂಶಚ್ಚ) (ಅ. 4)

ಅತ್ಯ॒ನ್ಯಾನಗಾಂ॒ ನಾನ್ಯಾನುಪಾ॑ಗಾಮ॒ರ್ವಾಕ್ತ್ವಾ॒ ಪರೈ॑ರವಿದಂ ಪ॒ರೋಽವ॑ರೈ॒ಸ್ತಂ ತ್ವಾ॑ ಜುಷೇ ವೈಷ್ಣ॒ವಂ ದೇ॑ವಯ॒ಜ್ಯಾಯೈ॑ ದೇ॒ವಸ್ತ್ವಾ॑ ಸವಿ॒ತಾ ಮದ್ಧ್ವಾ॑ಽನ॒ಕ್ತ್ವೋಷ॑ಧೇ॒ ತ್ರಾಯ॑ಸ್ವೈನ॒ಗ್ಗ್॒ ಸ್ವಧಿ॑ತೇ॒ ಮೈನಗ್ಂ॑ ಹಿಗ್ಂಸೀ॒-ರ್ದಿವ॒ಮಗ್ರೇ॑ಣ॒ ಮಾ ಲೇ॑ಖೀರಂ॒ತರಿ॑ಕ್ಷಂ॒ ಮದ್ಧ್ಯೇ॑ನ॒ ಮಾ ಹಿಗ್ಂ॑ಸೀಃ ಪೃಥಿ॒ವ್ಯಾ ಸಂ ಭ॑ವ॒ ವನ॑ಸ್ಪತೇ ಶ॒ತವ॑ಲ್​ಶೋ॒ ವಿ ರೋ॑ಹ ಸ॒ಹಸ್ರ॑ವಲ್​ಶಾ॒ ವಿ ವ॒ಯಗ್ಂ ರು॑ಹೇಮ॒ ಯಂ ತ್ವಾ॒ಽಯಗ್ಗ್​ ಸ್ವಧಿ॑ತಿ॒ಸ್ತೇತಿ॑ಜಾನಃ ಪ್ರಣಿ॒ನಾಯ॑ ಮಹ॒ತೇ ಸೌಭ॑ಗಾ॒ಯಾಚ್ಛಿ॑ನ್ನೋ॒ ರಾಯಃ॑ ಸು॒ವೀರಃ॑ ॥ 9 ॥
(ಯಂ-ದಶ॑ ಚ) (ಅ. 5)

ಪೃ॒ಥಿ॒ವ್ಯೈ ತ್ವಾಂ॒ತರಿ॑ಕ್ಷಾಯ ತ್ವಾ ದಿ॒ವೇ ತ್ವಾ॒ ಶುಂಧ॑ತಾಂ-ಲೋಁ॒ಕಃ ಪಿ॑ತೃ॒ಷದ॑ನೋ॒ ಯವೋ॑ಽಸಿ ಯ॒ವಯಾ॒ಸ್ಮ-ದ್ದ್ವೇಷೋ॑ ಯ॒ವಯಾರಾ॑ತೀಃ ಪಿತೃ॒ಣಾಗ್ಂ ಸದ॑ನಮಸಿ ಸ್ವಾವೇ॒ಶೋ᳚-ಽಸ್ಯಗ್ರೇ॒ಗಾ ನೇ॑ತೃ॒ಣಾಂ-ವಁನ॒ಸ್ಪತಿ॒ರಧಿ॑ ತ್ವಾ ಸ್ಥಾಸ್ಯತಿ॒ ತಸ್ಯ॑ ವಿತ್ತಾ-ದ್ದೇ॒ವಸ್ತ್ವಾ॑ ಸವಿ॒ತಾ ಮದ್ಧ್ವಾ॑ಽನಕ್ತು ಸುಪಿಪ್ಪ॒ಲಾಭ್ಯ॒-ಸ್ತ್ವೌಷ॑ಧೀಭ್ಯ॒ ಉದ್ದಿವಗ್ಗ್॑ ಸ್ತಭಾ॒ನಾಽಂತರಿ॑ಕ್ಷಂ ಪೃಣ ಪೃಥಿ॒ವೀಮುಪ॑ರೇಣ ದೃಗ್ಂಹ॒ ತೇ ತೇ॒ ಧಾಮಾ᳚ನ್ಯುಶ್ಮಸೀ [ಧಾಮಾ᳚ನ್ಯುಶ್ಮಸಿ, ಗ॒ಮದ್ಧ್ಯೇ॒ ಗಾವೋ॒] ॥ 10 ॥

ಗ॒ಮದ್ಧ್ಯೇ॒ ಗಾವೋ॒ ಯತ್ರ॒ ಭೂರಿ॑ಶೃಂಗಾ ಅ॒ಯಾಸಃ॑ । ಅತ್ರಾಹ॒ ತದು॑ರುಗಾ॒ಯಸ್ಯ॒ ವಿಷ್ಣೋಃ᳚ ಪ॒ರಮಂ ಪ॒ದಮವ॑ ಭಾತಿ॒ ಭೂರೇಃ᳚ ॥ ವಿಷ್ಣೋಃ॒ ಕರ್ಮಾ॑ಣಿ ಪಶ್ಯತ॒ ಯತೋ᳚ ವ್ರ॒ತಾನಿ॑ ಪಸ್ಪ॒ಶೇ । ಇಂದ್ರ॑ಸ್ಯ॒ ಯುಜ್ಯಃ॒ ಸಖಾ᳚ ॥ ತದ್-ವಿಷ್ಣೋಃ᳚ ಪರ॒ಮಂ ಪ॒ದಗ್ಂ ಸದಾ॑ ಪಶ್ಯಂತಿ ಸೂ॒ರಯಃ॑ । ದಿ॒ವೀವ॒ ಚಕ್ಷು॒ರಾತ॑ತಮ್ ॥ ಬ್ರ॒ಹ್ಮ॒ವನಿಂ॑ ತ್ವಾ ಕ್ಷತ್ರ॒ವನಿಗ್ಂ॑ ಸುಪ್ರಜಾ॒ವನಿಗ್ಂ॑ ರಾಯಸ್ಪೋಷ॒ವನಿಂ॒ ಪರ್ಯೂ॑ಹಾಮಿ॒ ಬ್ರಹ್ಮ॑ ದೃಗ್ಂಹ ಕ್ಷ॒ತ್ರಂ ದೃಗ್ಂ॑ಹ ಪ್ರ॒ಜಾಂ ದೃಗ್ಂ॑ಹ ರಾ॒ಯಸ್ಪೋಷಂ॑ ದೃಗ್ಂಹ ಪರಿ॒ವೀರ॑ಸಿ॒ ಪರಿ॑ ತ್ವಾ॒ ದೈವೀ॒ರ್ವಿಶೋ᳚ ವ್ಯಯಂತಾಂ॒ ಪರೀ॒ಮಗ್ಂ ರಾ॒ಯಸ್ಪೋಷೋ॒ ಯಜ॑ಮಾನಂ ಮನು॒ಷ್ಯಾ॑ ಅಂ॒ತರಿ॑ಕ್ಷಸ್ಯ ತ್ವಾ॒ ಸಾನಾ॒ವವ॑ ಗೂಹಾಮಿ ॥ 11 ॥
(ಉ॒ಶ್ಮ॒ಸೀ॒-ಪೋಷ॒ಮೇ-ಕಾ॒ನ್ನವಿಗ್ಂ॑ಶ॒ತಿಶ್ಚ॑) (ಅ. 6)

ಇ॒ಷೇ ತ್ವೋ॑ಪ॒ವೀರ॒ಸ್ಯುಪೋ॑ ದೇ॒ವಾನ್ ದೈವೀ॒-ರ್ವಿಶಃ॒ ಪ್ರಾಗು॒-ರ್ವಹ್ನೀ॑ರು॒ಶಿಜೋ॒ ಬೃಹ॑ಸ್ಪತೇ ಧಾ॒ರಯಾ॒ ವಸೂ॑ನಿ ಹ॒ವ್ಯಾ ತೇ᳚ ಸ್ವದಂತಾಂ॒ ದೇವ॑ ತ್ವಷ್ಟ॒ರ್ವಸು॑ ರಣ್ವ॒ ರೇವ॑ತೀ॒ ರಮ॑ದ್ಧ್ವ-ಮ॒ಗ್ನೇ-ರ್ಜ॒ನಿತ್ರ॑ಮಸಿ॒ ವೃಷ॑ಣೌ ಸ್ಥ ಉ॒ರ್ವಶ್ಯ॑ಸ್ಯಾ॒ಯುರ॑ಸಿ ಪುರೂ॒ರವಾ॑ ಘೃ॒ತೇನಾ॒ಕ್ತೇ ವೃಷ॑ಣಂ ದಧಾಥಾಂ ಗಾಯ॒ತ್ರಂ ಛಂದೋಽನು॒ ಪ್ರ ಜಾ॑ಯಸ್ವ॒ ತ್ರೈಷ್ಟು॑ಭಂ॒ ಜಾಗ॑ತಂ॒ ಛಂದೋಽನು॒ ಪ್ರ ಜಾ॑ಯಸ್ವ॒ ಭವ॑ತ- [ಭವ॑ತಂ, ನಃ॒ ಸಮ॑ನಸೌ॒] ॥ 12 ॥

ನ್ನಃ॒ ಸಮ॑ನಸೌ॒ ಸಮೋ॑ಕಸಾವರೇ॒ಪಸೌ᳚ । ಮಾ ಯ॒ಜ್ಞಗ್ಂ ಹಿಗ್ಂ॑ಸಿಷ್ಟಂ॒ ಮಾ ಯ॒ಜ್ಞಪ॑ತಿಂ ಜಾತವೇದಸೌ ಶಿ॒ವೌ ಭ॑ವತಮ॒ದ್ಯ ನಃ॑ ॥ ಅ॒ಗ್ನಾವ॒ಗ್ನಿಶ್ಚ॑ರತಿ॒ ಪ್ರವಿ॑ಷ್ಟ॒ ಋಷೀ॑ಣಾಂ ಪು॒ತ್ರೋ ಅ॑ಧಿರಾ॒ಜ ಏ॒ಷಃ । ಸ್ವಾ॒ಹಾ॒ಕೃತ್ಯ॒ ಬ್ರಹ್ಮ॑ಣಾ ತೇ ಜುಹೋಮಿ॒ ಮಾ ದೇ॒ವಾನಾಂ᳚ ಮಿಥು॒ಯಾ ಕ॑ರ್ಭಾಗ॒ಧೇಯ᳚ಮ್ ॥ 13 ॥
(ಭವ॑ತ॒-ಮೇಕ॑ತ್ರಿಗ್ಂಶಚ್ಚ) (ಅ. 7)

ಆ ದ॑ದ ಋ॒ತಸ್ಯ॑ ತ್ವಾ ದೇವಹವಿಃ॒ ಪಾಶೇ॒ನಾಽಽರ॑ಭೇ॒ ಧರ್​ಷಾ॒ ಮಾನು॑ಷಾನ॒ದ್ಭ್ಯಸ್ತ್ವೌಷ॑ಧೀಭ್ಯಃ॒ ಪ್ರೋಕ್ಷಾ᳚ಮ್ಯ॒ಪಾಂ ಪೇ॒ರುರ॑ಸಿ ಸ್ವಾ॒ತ್ತಂ ಚಿ॒ಥ್ ಸದೇ॑ವಗ್ಂ ಹ॒ವ್ಯಮಾಪೋ॑ ದೇವೀಃ॒ ಸ್ವದ॑ತೈನ॒ಗ್ಂ॒ ಸಂ ತೇ᳚ ಪ್ರಾ॒ಣೋ ವಾ॒ಯುನಾ॑ ಗಚ್ಛತಾ॒ಗ್ಂ॒ ಸಂ-ಯಁಜ॑ತ್ರೈ॒ರಂಗಾ॑ನಿ॒ ಸಂ-ಯಁ॒ಜ್ಞಪ॑ತಿರಾ॒ಶಿಷಾ॑ ಘೃ॒ತೇನಾ॒ಕ್ತೌ ಪ॒ಶುಂ ತ್ರಾ॑ಯೇಥಾ॒ಗ್ಂ॒ ರೇವ॑ತೀ-ರ್ಯ॒ಜ್ಞಪ॑ತಿಂ ಪ್ರಿಯ॒ಧಾಽಽ ವಿ॑ಶ॒ತೋರೋ॑ ಅಂತರಿಕ್ಷ ಸ॒ಜೂ-ರ್ದೇ॒ವೇನ॒ [ಸ॒ಜೂ-ರ್ದೇ॒ವೇನ॑, ವಾತೇ॑ನಾ॒ಽಸ್ಯ] ॥ 14 ॥

ವಾತೇ॑ನಾ॒ಽಸ್ಯ ಹ॒ವಿಷ॒ಸ್ತ್ಮನಾ॑ ಯಜ॒ ಸಮ॑ಸ್ಯ ತ॒ನುವಾ॑ ಭವ॒ ವರ್​ಷೀ॑ಯೋ॒ ವರ್​ಷೀ॑ಯಸಿ ಯ॒ಜ್ಞೇ ಯ॒ಜ್ಞಪತಿಂ॑ ಧಾಃ ಪೃ॑ಥಿ॒ವ್ಯಾಃ ಸಂ॒ಪೃಚಃ॑ ಪಾಹಿ॒ ನಮ॑ಸ್ತ ಆತಾನಾಽನ॒ರ್ವಾ ಪ್ರೇಹಿ॑ ಘೃ॒ತಸ್ಯ॑ ಕು॒ಲ್ಯಾಮನು॑ ಸ॒ಹ ಪ್ರ॒ಜಯಾ॑ ಸ॒ಹ ರಾ॒ಯಸ್ಪೋಷೇ॒ಣಾ ಽಽಪೋ॑ ದೇವೀಃ ಶುದ್ಧಾಯುವಃ ಶು॒ದ್ಧಾ ಯೂ॒ಯಂ ದೇ॒ವಾಗ್ಂ ಊ᳚ಢ್ವಗ್ಂ ಶು॒ದ್ಧಾ ವ॒ಯಂ ಪರಿ॑ವಿಷ್ಟಾಃ ಪರಿವೇ॒ಷ್ಟಾರೋ॑ ವೋ ಭೂಯಾಸ್ಮ ॥ 15 ॥
(ದೇ॒ವನ॒-ಚತು॑ಶ್ಚತ್ವಾರಿಗ್ಂಶಚ್ಚ) (ಅ. 8)

ವಾಕ್ತ॒ ಆ ಪ್ಯಾ॑ಯತಾಂ ಪ್ರಾ॒ಣಸ್ತ॒ ಆ ಪ್ಯಾ॑ಯತಾಂ॒ ಚಕ್ಷು॑ಸ್ತ॒ ಆ ಪ್ಯಾ॑ಯತಾ॒ಗ್ಗ್॒ ಶ್ರೋತ್ರಂ॑ ತ॒ ಆ ಪ್ಯಾ॑ಯತಾಂ॒-ಯಾಁ ತೇ᳚ ಪ್ರಾ॒ಣಾಂಛುಗ್ಜ॒ಗಾಮ॒ ಯಾ ಚಕ್ಷು॒ರ್ಯಾ ಶ್ರೋತ್ರಂ॒-ಯಁತ್ತೇ᳚ ಕ್ರೂ॒ರಂ-ಯಁದಾಸ್ಥಿ॑ತಂ॒ ತತ್ತ॒ ಆ ಪ್ಯಾ॑ಯತಾಂ॒ ತತ್ತ॑ ಏ॒ತೇನ॑ ಶುಂಧತಾಂ॒ ನಾಭಿ॑ಸ್ತ॒ ಆ ಪ್ಯಾ॑ಯತಾಂ ಪಾ॒ಯುಸ್ತ॒ ಆ ಪ್ಯಾ॑ಯತಾಗ್ಂ ಶು॒ದ್ಧಾಶ್ಚ॒ರಿತ್ರಾಃ॒ ಶಮ॒ದ್ಭ್ಯ- [ಮ॒ಧ್ಭ್ಯಃ, ಶಮೋಷ॑ಧೀಭ್ಯಃ॒ ಶಂ] ॥ 16 ॥

ಶ್ಶಮೋಷ॑ಧೀಭ್ಯಃ॒ ಶಂ ಪೃ॑ಥಿ॒ವ್ಯೈ ಶಮಹೋ᳚ಭ್ಯಾ॒-ಮೋಷ॑ಧೇ॒ ತ್ರಾಯ॑ಸ್ವೈನ॒ಗ್ಗ್॒ ಸ್ವಧಿ॑ತೇ॒ ಮೈನಗ್ಂ॑ ಹಿಗ್ಂಸೀ॒ ರಕ್ಷ॑ಸಾಂ ಭಾ॒ಗೋ॑ಽಸೀ॒ದಮ॒ಹಗ್ಂ ರಕ್ಷೋ॑ಽಧ॒ಮಂ ತಮೋ॑ ನಯಾಮಿ॒ ಯೋ᳚ಽಸ್ಮಾನ್ ದ್ವೇಷ್ಟಿ॒ ಯಂ ಚ॑ ವ॒ಯಂ ದ್ವಿ॒ಷ್ಮ ಇ॒ದಮೇ॑ನಮಧ॒ಮಂ ತಮೋ॑ ನಯಾಮೀ॒ಷೇ ತ್ವಾ॑ ಘೃ॒ತೇನ॑ ದ್ಯಾವಾಪೃಥಿವೀ॒ ಪ್ರೋರ್ಣ್ವಾ॑ಥಾ॒-ಮಚ್ಛಿ॑ನ್ನೋ॒ ರಾಯಃ॑ ಸು॒ವೀರ॑ ಉ॒ರ್ವಂ॑ತರಿ॑ಕ್ಷ॒ಮನ್ವಿ॑ಹಿ॒ ವಾಯೋ॒ ವೀಹಿ॑ ಸ್ತೋ॒ಕಾನಾ॒ಗ್ಗ್॒ ಸ್ವಾಹೋ॒ರ್ಧ್ವನ॑ಭಸಂ ಮಾರು॒ತಂ ಗ॑ಚ್ಛತಮ್ ॥ 17 ॥
(ಅ॒ದ್ಭ್ಯೋ-ವೀಹಿ॒-ಪಂಚ॑ ಚ) (ಅ. 9)

ಸಂ ತೇ॒ ಮನ॑ಸಾ॒ ಮನಃ॒ ಸಂ ಪ್ರಾ॒ಣೇನ॑ ಪ್ರಾ॒ಣೋ ಜುಷ್ಟಂ॑ ದೇ॒ವೇಭ್ಯೋ॑ ಹ॒ವ್ಯಂ ಘೃ॒ತವ॒ಥ್ ಸ್ವಾಹೈಂ॒ದ್ರಃ ಪ್ರಾ॒ಣೋ ಅಂಗೇ॑ಅಂಗೇ॒ ನಿ ದೇ᳚ದ್ಧ್ಯದೈಂ॒ದ್ರೋ॑ ಽಪಾ॒ನೋ ಅಂಗೇ॑ಅಂಗೇ॒ ವಿ ಬೋ॑ಭುವ॒ದ್ದೇವ॑ ತ್ವಷ್ಟ॒ರ್ಭೂರಿ॑ ತೇ॒ ಸಗ್ಂಸ॑ಮೇತು॒ ವಿಷು॑ರೂಪಾ॒ ಯಥ್ ಸಲ॑ಕ್ಷ್ಮಾಣೋ॒ ಭವ॑ಥ ದೇವ॒ತ್ರಾ ಯಂತ॒ಮವ॑ಸೇ॒ ಸಖಾ॒ಯೋಽನು॑ ತ್ವಾ ಮಾ॒ತಾ ಪಿ॒ತರೋ॑ ಮದಂತು॒ ಶ್ರೀರ॑ಸ್ಯ॒ಗ್ನಿಸ್ತ್ವಾ᳚ ಶ್ರೀಣಾ॒ತ್ವಾಪಃ॒ ಸಮ॑ರಿಣ॒ನ್ ವಾತ॑ಸ್ಯ [ ] ॥ 18 ॥

ತ್ವಾ॒ ಧ್ರಜ್ಯೈ॑ ಪೂ॒ಷ್ಣೋ ರಗ್ಗ್​ಹ್ಯಾ॑ ಅ॒ಪಾಮೋಷ॑ಧೀನಾ॒ಗ್ಂ॒ ರೋಹಿ॑ಷ್ಯೈ ಘೃ॒ತಂ ಘೃ॑ತಪಾವಾನಃ ಪಿಬತ॒ ವಸಾಂ᳚-ವಁಸಾಪಾವಾನಃ ಪಿಬತಾ॒ಽಂತರಿ॑ಕ್ಷಸ್ಯ ಹ॒ವಿರ॑ಸಿ॒ ಸ್ವಾಹಾ᳚ ತ್ವಾ॒ಽಂತರಿ॑ಕ್ಷಾಯ॒ ದಿಶಃ॑ ಪ್ರ॒ದಿಶ॑ ಆ॒ದಿಶೋ॑ ವಿ॒ದಿಶ॑ ಉ॒ದ್ದಿಶಃ॒ ಸ್ವಾಹಾ॑ ದಿ॒ಗ್ಭ್ಯೋ ನಮೋ॑ ದಿ॒ಗ್ಭ್ಯಃ ॥ 19 ॥
(ವಾ॑ತಸ್ಯಾ॒-ಷ್ಟಾವಿಗ್ಂ॑ಶತಿಶ್ಚ) (ಅ. 10)

ಸ॒ಮು॒ದ್ರಂ ಗ॑ಚ್ಛ॒ ಸ್ವಾಹಾ॒ಽಂತರಿ॑ಕ್ಷಂ ಗಚ್ಛ॒ ಸ್ವಾಹಾ॑ ದೇ॒ವಗ್ಂ ಸ॑ವಿ॒ತಾರಂ॑ ಗಚ್ಛ॒ ಸ್ವಾಹಾ॑ಽಹೋರಾ॒ತ್ರೇ ಗ॑ಚ್ಛ॒ ಸ್ವಾಹಾ॑ ಮಿ॒ತ್ರಾವರು॑ಣೌ ಗಚ್ಛ॒ ಸ್ವಾಹಾ॒ ಸೋಮಂ॑ ಗಚ್ಛ॒ ಸ್ವಾಹಾ॑ ಯ॒ಜ್ಞಂ ಗ॑ಚ್ಛ॒ ಸ್ವಾಹಾ॒ ಛಂದಾಗ್ಂ॑ಸಿ ಗಚ್ಛ॒ ಸ್ವಾಹಾ॒ ದ್ಯಾವಾ॑ಪೃಥಿ॒ವೀ ಗ॑ಚ್ಛ॒ ಸ್ವಾಹಾ॒ ನಭೋ॑ ದಿ॒ವ್ಯಂ ಗ॑ಚ್ಛ॒ ಸ್ವಾಹಾ॒ಽಗ್ನಿಂ-ವೈಁ᳚ಶ್ವಾನ॒ರಂ ಗ॑ಚ್ಛ॒ ಸ್ವಾಹಾ॒ಽದ್ಭ್ಯಸ್ತ್ವೌಷ॑ಧೀಭ್ಯೋ॒ ಮನೋ॑ ಮೇ॒ ಹಾರ್ದಿ॑ ಯಚ್ಛ ತ॒ನೂಂ ತ್ವಚಂ॑ ಪು॒ತ್ರಂ ನಪ್ತಾ॑ರಮಶೀಯ॒ ಶುಗ॑ಸಿ॒ ತಮ॒ಭಿ ಶೋ॑ಚ॒ ಯೋ᳚ಽಸ್ಮಾನ್ ದ್ವೇಷ್ಟಿ॒ ಯಂ ಚ॑ ವ॒ಯಂ ದ್ವಿ॒ಷ್ಮೋ ಧಾಮ್ನೋ॑ಧಾಮ್ನೋ ರಾಜನ್ನಿ॒ತೋ ವ॑ರುಣ ನೋ ಮುಂಚ॒ ಯದಾಪೋ॒ ಅಘ್ನಿ॑ಯಾ॒ ವರು॒ಣೇತಿ॒ ಶಪಾ॑ಮಹೇ॒ ತತೋ॑ ವರುಣ ನೋ ಮುಂಚ ॥ 20
(ಅ॒ಸಿ॒-ಷಡ್ವಿಗ್ಂ॑ಶತಿಶ್ಚ ) (ಅ. 11)

ಹ॒ವಿಷ್ಮ॑ತೀರಿ॒ಮಾ ಆಪೋ॑ ಹ॒ವಿಷ್ಮಾ᳚ನ್ ದೇ॒ವೋ ಅ॑ದ್ಧ್ವ॒ರೋ ಹ॒ವಿಷ್ಮಾ॒ಗ್ಂ॒ ಆ ವಿ॑ವಾಸತಿ ಹ॒ವಿಷ್ಮಾಗ್ಂ॑ ಅಸ್ತು॒ ಸೂರ್ಯಃ॑ ॥ ಅ॒ಗ್ನೇರ್ವೋ ಽಪ॑ನ್ನಗೃಹಸ್ಯ॒ ಸದ॑ಸಿ ಸಾದಯಾಮಿ ಸು॒ಮ್ನಾಯ॑ ಸುಮ್ನಿನೀಃ ಸು॒ಮ್ನೇ ಮಾ॑ ಧತ್ತೇಂದ್ರಾಗ್ನಿ॒ಯೋ-ರ್ಭಾ॑ಗ॒ಧೇಯೀಃ᳚ ಸ್ಥ ಮಿ॒ತ್ರಾವರು॑ಣಯೋ-ರ್ಭಾಗ॒ಧೇಯೀಃ᳚ ಸ್ಥ॒ ವಿಶ್ವೇ॑ಷಾಂ ದೇ॒ವಾನಾಂ᳚ ಭಾಗ॒ಧೇಯೀಃ᳚ ಸ್ಥ ಯ॒ಜ್ಞೇ ಜಾ॑ಗೃತ ॥ 21 ॥
(ಹ॒ವಿಷ್ಮ॑ತೀ॒-ಶ್ಚತು॑ಸ್ತ್ರಿಗ್ಂಶತ್) (ಅ. 12)

ಹೃ॒ದೇ ತ್ವಾ॒ ಮನ॑ಸೇ ತ್ವಾ ದಿ॒ವೇ ತ್ವಾ॒ ಸೂರ್ಯಾ॑ಯ ತ್ವೋ॒ರ್ಧ್ವಮಿ॒ಮಮ॑ದ್ಧ್ವ॒ರಂ ಕೃ॑ಧಿ ದಿ॒ವಿ ದೇ॒ವೇಷು॒ ಹೋತ್ರಾ॑ ಯಚ್ಛ॒ ಸೋಮ॑ ರಾಜ॒ನ್ನೇಹ್ಯವ॑ ರೋಹ॒ ಮಾ ಭೇರ್ಮಾ ಸಂ-ವಿಁ॑ಕ್ಥಾ॒ ಮಾ ತ್ವಾ॑ ಹಿಗ್ಂಸಿಷಂ ಪ್ರ॒ಜಾಸ್ತ್ವಮು॒ಪಾವ॑ರೋಹ ಪ್ರ॒ಜಾಸ್ತ್ವಾಮು॒ಪಾವ॑ರೋಹಂತು ಶೃ॒ಣೋತ್ವ॒ಗ್ನಿಃ ಸ॒ಮಿಧಾ॒ ಹವಂ॑ ಮೇ ಶೃ॒ಣ್ವಂತ್ವಾಪೋ॑ ಧಿ॒ಷಣಾ᳚ಶ್ಚ ದೇ॒ವೀಃ । ಶೃ॒ಣೋತ॑ ಗ್ರಾವಾಣೋ ವಿ॒ದುಷೋ॒ ನು [ ] ॥ 22 ॥

ಯ॒ಜ್ಞಗ್ಂ ಶೃ॒ಣೋತು॑ ದೇ॒ವಃ ಸ॑ವಿ॒ತಾ ಹವಂ॑ ಮೇ । ದೇವೀ॑ರಾಪೋ ಅಪಾಂ ನಪಾ॒ದ್ಯ ಊ॒ರ್ಮಿರ್​ಹ॑ವಿ॒ಷ್ಯ॑ ಇಂದ್ರಿ॒ಯಾವಾ᳚ನ್ ಮ॒ದಿಂತ॑ಮ॒ಸ್ತಂ ದೇ॒ವೇಭ್ಯೋ॑ ದೇವ॒ತ್ರಾ ಧ॑ತ್ತ ಶು॒ಕ್ರಗ್ಂ ಶು॑ಕ್ರ॒ಪೇಭ್ಯೋ॒ ಯೇಷಾಂ᳚ ಭಾ॒ಗಃ ಸ್ಥ ಸ್ವಾಹಾ॒ ಕಾರ್​ಷಿ॑ರ॒ಸ್ಯಪಾ॒ಽಪಾಂ ಮೃ॒ದ್ಧ್ರಗ್ಂ ಸ॑ಮು॒ದ್ರಸ್ಯ॒ ವೋಽಕ್ಷಿ॑ತ್ಯಾ॒ ಉನ್ನ॑ಯೇ । ಯಮ॑ಗ್ನೇ ಪೃ॒ಥ್ಸು ಮರ್ತ್ಯ॒ಮಾವೋ॒ ವಾಜೇ॑ಷು॒ ಯಂ ಜು॒ನಾಃ । ಸ ಯಂತಾ॒ ಶಶ್ವ॑ತೀ॒ರಿಷಃ॑ ॥ 23 ॥
( ನು-ಸ॒ಪ್ತಚ॑ತ್ವಾರಿಗ್ಂಶಚ್ಚ) (ಅ. 13)

ತ್ವಮ॑ಗ್ನೇ ರು॒ದ್ರೋ ಅಸು॑ರೋ ಮ॒ಹೋ ದಿ॒ವಸ್ತ್ವಗ್ಂ ಶರ್ಧೋ॒ ಮಾರು॑ತಂ ಪೃ॒ಕ್ಷ ಈ॑ಶಿಷೇ । ತ್ವಂ-ವಾಁತೈ॑ರರು॒ಣೈರ್ಯಾ॑ಸಿ ಶಂಗ॒ಯಸ್ತ್ವಂ ಪೂ॒ಷಾ ವಿ॑ಧ॒ತಃ ಪಾ॑ಸಿ॒ ನುತ್ಮನಾ᳚ ॥ ಆ ವೋ॒ ರಾಜಾ॑ನಮದ್ಧ್ವ॒ರಸ್ಯ॑ ರು॒ದ್ರಗ್ಂ ಹೋತಾ॑ರಗ್ಂ ಸತ್ಯ॒ಯಜ॒ಗ್ಂ॒ ರೋದ॑ಸ್ಯೋಃ । ಅ॒ಗ್ನಿಂ ಪು॒ರಾ ತ॑ನಯಿ॒ತ್ನೋ ರ॒ಚಿತ್ತಾ॒ದ್ಧಿರ॑ಣ್ಯರೂಪ॒ಮವ॑ಸೇ ಕೃಣುದ್ಧ್ವಮ್ ॥ ಅ॒ಗ್ನಿರ್​ಹೋತಾ॒ ನಿ ಷ॑ಸಾದಾ॒ ಯಜೀ॑ಯಾನು॒ಪಸ್ಥೇ॑ ಮಾ॒ತುಃ ಸು॑ರ॒ಭಾವು॑ ಲೋ॒ಕೇ । ಯುವಾ॑ ಕ॒ವಿಃ ಪು॑ರುನಿ॒ಷ್ಠ [ಪು॑ರುನಿ॒ಷ್ಠಃ, ಋ॒ತಾವಾ॑ ಧ॒ರ್ತಾ] ॥ 24 ॥

ಋ॒ತಾವಾ॑ ಧ॒ರ್ತಾ ಕೃ॑ಷ್ಟೀ॒ನಾಮು॒ತ ಮದ್ಧ್ಯ॑ ಇ॒ದ್ಧಃ ॥ಸಾ॒ದ್ಧ್ವೀಮ॑ಕ-ರ್ದೇ॒ವವೀ॑ತಿಂ ನೋ ಅ॒ದ್ಯ ಯ॒ಜ್ಞಸ್ಯ॑ ಜಿ॒ಹ್ವಾಮ॑ವಿದಾಮ॒ ಗುಹ್ಯಾ᳚ಮ್ । ಸ ಆಯು॒ರಾಽಗಾ᳚ಥ್ ಸುರ॒ಭಿರ್ವಸಾ॑ನೋ ಭ॒ದ್ರಾಮ॑ಕ-ರ್ದೇ॒ವಹೂ॑ತಿಂ ನೋ ಅ॒ದ್ಯ ॥ ಅಕ್ರಂ॑ದದ॒ಗ್ನಿಃ ಸ್ತ॒ನಯ॑ನ್ನಿವ॒ ದ್ಯೌಃ ಕ್ಷಾಮಾ॒ ರೇರಿ॑ಹದ್ವೀ॒ರುಧಃ॑ ಸಮಂ॒ಜನ್ನ್ । ಸ॒ದ್ಯೋ ಜ॑ಜ್ಞಾ॒ನೋ ವಿ ಹೀಮಿ॒ದ್ಧೋ ಅಖ್ಯ॒ದಾ ರೋದ॑ಸೀ ಭಾ॒ನುನಾ॑ ಭಾತ್ಯಂ॒ತಃ ॥ ತ್ವೇ ವಸೂ॑ನಿ ಪುರ್ವಣೀಕ [ಪುರ್ವಣೀಕ, ಹೋ॒ತ॒ರ್ದೋ॒ಷಾ] ॥ 25 ॥

ಹೋತರ್ದೋ॒ಷಾ ವಸ್ತೋ॒ರೇರಿ॑ರೇ ಯ॒ಜ್ಞಿಯಾ॑ಸಃ । ಕ್ಷಾಮೇ॑ವ॒ ವಿಶ್ವಾ॒ ಭುವ॑ನಾನಿ॒ ಯಸ್ಮಿಂ॒ಥ್ ಸಗ್ಂ ಸೌಭ॑ಗಾನಿ ದಧಿ॒ರೇ ಪಾ॑ವ॒ಕೇ ॥ ತುಭ್ಯಂ॒ ತಾ ಅಂ॑ಗಿರಸ್ತಮ॒ ವಿಶ್ವಾಃ᳚ ಸುಕ್ಷಿ॒ತಯಃ॒ ಪೃಥ॑ಕ್ । ಅಗ್ನೇ॒ ಕಾಮಾ॑ಯ ಯೇಮಿರೇ ॥ ಅ॒ಶ್ಯಾಮ॒ ತಂ ಕಾಮ॑ಮಗ್ನೇ॒ ತವೋ॒ತ್ಯ॑ಶ್ಯಾಮ॑ ರ॒ಯಿಗ್ಂ ರ॑ಯಿವಃ ಸು॒ವೀರ᳚ಮ್ । ಅ॒ಶ್ಯಾಮ॒ ವಾಜ॑ಮ॒ಭಿ ವಾ॒ಜಯಂ॑ತೋ॒ ಽಶ್ಯಾಮ॑ ದ್ಯು॒ಮ್ನಮ॑ಜರಾ॒ಜರಂ॑ ತೇ ॥ಶ್ರೇಷ್ಠಂ॑-ಯಁವಿಷ್ಠ ಭಾರ॒ತಾಗ್ನೇ᳚ ದ್ಯು॒ಮಂತ॒ಮಾ ಭ॑ರ ॥ 26 ॥

ವಸೋ॑ ಪುರು॒ಸ್ಪೃಹಗ್ಂ॑ ರ॒ಯಿಮ್ ॥ ಸ ಶ್ವಿ॑ತಾ॒ನಸ್ತ॑ನ್ಯ॒ತೂ ರೋ॑ಚನ॒ಸ್ಥಾ ಅ॒ಜರೇ॑ಭಿ॒-ರ್ನಾನ॑ದದ್ಭಿ॒ರ್ಯವಿ॑ಷ್ಠಃ । ಯಃ ಪಾ॑ವ॒ಕಃ ಪು॑ರು॒ತಮಃ॑ ಪು॒ರೂಣಿ॑ ಪೃ॒ಥೂನ್ಯ॒ಗ್ನಿರ॑ನು॒ಯಾತಿ॒ ಭರ್ವನ್ನ್॑ ॥ ಆಯು॑ಷ್ಟೇ ವಿ॒ಶ್ವತೋ॑ ದಧದ॒ಯಮ॒ಗ್ನಿ-ರ್ವರೇ᳚ಣ್ಯಃ । ಪುನ॑ಸ್ತೇ ಪ್ರಾ॒ಣ ಆಽಯ॑ತಿ॒ ಪರಾ॒ ಯಕ್ಷ್ಮಗ್ಂ॑ ಸುವಾಮಿ ತೇ ॥ ಆ॒ಯು॒ರ್ದಾ ಅ॑ಗ್ನೇ ಹ॒ವಿಷೋ॑ ಜುಷಾ॒ಣೋ ಘೃ॒ತಪ್ರ॑ತೀಕೋ ಘೃ॒ತಯೋ॑ನಿರೇಧಿ । ಘೃ॒ತಂ ಪೀ॒ತ್ವಾ ಮಧು॒ ಚಾರು॒ ಗವ್ಯಂ॑ ಪಿ॒ತೇವ॑ ಪು॒ತ್ರಮ॒ಭಿ [ಪು॒ತ್ರಮ॒ಭಿ, ರ॒ಕ್ಷ॒ತಾ॒ದಿ॒ಮಂ] ॥ 27 ॥

ರ॑ಕ್ಷತಾದಿ॒ಮಮ್ । ತಸ್ಮೈ॑ ತೇ ಪ್ರತಿ॒ಹರ್ಯ॑ತೇ॒ ಜಾತ॑ವೇದೋ॒ ವಿಚ॑ರ್​ಷಣೇ । ಅಗ್ನೇ॒ ಜನಾ॑ಮಿ ಸುಷ್ಟು॒ತಿಮ್ ॥ ದಿ॒ವಸ್ಪರಿ॑ ಪ್ರಥ॒ಮಂ ಜ॑ಜ್ಞೇ ಅ॒ಗ್ನಿರ॒ಸ್ಮ-ದ್ದ್ವಿ॒ತೀಯಂ॒ ಪರಿ॑ ಜಾ॒ತವೇ॑ದಾಃ । ತೃ॒ತೀಯ॑ಮ॒ಫ್ಸು ನೃ॒ಮಣಾ॒ ಅಜ॑ಸ್ರ॒ಮಿಂಧಾ॑ನ ಏನಂ ಜರತೇ ಸ್ವಾ॒ಧೀಃ ॥ ಶುಚಿಃ॑ ಪಾವಕ॒ ವಂದ್ಯೋಽಗ್ನೇ॑ ಬೃ॒ಹದ್ವಿ ರೋ॑ಚಸೇ । ತ್ವಂ ಘೃ॒ತೇಭಿ॒ರಾಹು॑ತಃ ॥ ದೃ॒ಶಾ॒ನೋ ರು॒ಕ್ಮ ಉ॒ರ್ವ್ಯಾ ವ್ಯ॑ದ್ಯೌದ್-ದು॒ರ್ಮರ್​ಷ॒ಮಾಯುಃ॑ ಶ್ರಿ॒ಯೇ ರು॑ಚಾ॒ನಃ । ಅ॒ಗ್ನಿರ॒ಮೃತೋ॑ ಅಭವ॒ದ್ವಯೋ॑ಭಿ॒- [ಅಭವ॒ದ್ವಯೋ॑ಭಿಃ, ಯದೇ॑ನಂ॒] ॥ 28 ॥

ರ್ಯದೇ॑ನಂ॒ ದ್ಯೌರಜ॑ನಯಥ್ ಸು॒ರೇತಾಃ᳚ ॥ ಆ ಯದಿ॒ಷೇ ನೃ॒ಪತಿಂ॒ ತೇಜ॒ ಆನ॒ಟ್ಛುಚಿ॒ ರೇತೋ॒ ನಿಷಿ॑ಕ್ತಂ॒ ದ್ಯೌರ॒ಭೀಕೇ᳚ । ಅ॒ಗ್ನಿಃ ಶರ್ಧ॑ಮನವ॒ದ್ಯಂ-ಯುಁವಾ॑ನಗ್ಗ್​ ಸ್ವಾ॒ಧಿಯಂ॑ ಜನಯಥ್ ಸೂ॒ದಯ॑ಚ್ಚ ॥ ಸ ತೇಜೀ॑ಯಸಾ॒ ಮನ॑ಸಾ॒ ತ್ವೋತ॑ ಉ॒ತ ಶಿ॑ಕ್ಷ ಸ್ವಪ॒ತ್ಯಸ್ಯ॑ ಶಿ॒ಕ್ಷೋಃ । ಅಗ್ನೇ॑ ರಾ॒ಯೋ ನೃತ॑ಮಸ್ಯ॒ ಪ್ರಭೂ॑ತೌ ಭೂ॒ಯಾಮ॑ ತೇ ಸುಷ್ಟು॒ತಯ॑ಶ್ಚ॒ ವಸ್ವಃ॑ ॥ ಅಗ್ನೇ॒ ಸಹಂ॑ತ॒ಮಾ ಭ॑ರ ದ್ಯು॒ಮ್ನಸ್ಯ॑ ಪ್ರಾ॒ಸಹಾ॑ ರ॒ಯಿಮ್ । ವಿಶ್ವಾ॒ ಯ- [ವಿಶ್ವಾ॒ ಯಃ, ಚ॒ರ್॒​ಷ॒ಣೀರ॒ಭ್ಯಾ॑ಸಾ ವಾಜೇ॑ಷು] ॥ 29 ॥

ಶ್ಚ॑ರ್॒​ಷ॒ಣೀರ॒ಭ್ಯಾ॑ಸಾ ವಾಜೇ॑ಷು ಸಾ॒ಸಹ॑ತ್ ॥ ತಮ॑ಗ್ನೇ ಪೃತನಾ॒ಸಹಗ್ಂ॑ ರ॒ಯಿಗ್ಂ ಸ॑ಹಸ್ವ॒ ಆ ಭ॑ರ । ತ್ವಗ್ಂ ಹಿ ಸ॒ತ್ಯೋ ಅದ್ಭು॑ತೋ ದಾ॒ತಾ ವಾಜ॑ಸ್ಯ॒ ಗೋಮ॑ತಃ ॥ ಉ॒ಕ್ಷಾನ್ನಾ॑ಯ ವ॒ಶಾನ್ನಾ॑ಯ॒ ಸೋಮ॑ಪೃಷ್ಠಾಯ ವೇ॒ಧಸೇ᳚ । ಸ್ತೋಮೈ᳚-ರ್ವಿಧೇಮಾ॒ಽಗ್ನಯೇ᳚ ॥ ವ॒ದ್ಮಾ ಹಿ ಸೂ॑ನೋ॒ ಅಸ್ಯ॑ದ್ಮ॒ಸದ್ವಾ॑ ಚ॒ಕ್ರೇ ಅ॒ಗ್ನಿ-ರ್ಜ॒ನುಷಾ ಽಜ್ಮಾಽನ್ನ᳚ಮ್ । ಸ ತ್ವಂ ನ॑ ಊರ್ಜಸನ॒ ಊರ್ಜಂ॑ ಧಾ॒ ರಾಜೇ॑ವ ಜೇರವೃ॒ಕೇ ಕ್ಷೇ᳚ಷ್ಯಂ॒ತಃ ॥ ಅಗ್ನ॒ ಆಯೂಗ್ಂ॑ಷಿ [ಅಗ್ನ॒ ಆಯೂಗ್ಂ॑ಷಿ, ಪ॒ವ॒ಸ॒ ಆ] ॥ 30 ॥

ಪವಸ॒ ಆ ಸು॒ವೋರ್ಜ॒ಮಿಷಂ॑ ಚ ನಃ । ಆ॒ರೇ ಬಾ॑ಧಸ್ವ ದು॒ಚ್ಛುನಾ᳚ಮ್ ॥ ಅಗ್ನೇ॒ ಪವ॑ಸ್ವ॒ ಸ್ವಪಾ॑ ಅ॒ಸ್ಮೇ ವರ್ಚಃ॑ ಸು॒ವೀರ್ಯ᳚ಮ್ । ದಧ॒ತ್ಪೋಷಗ್ಂ॑ ರ॒ಯಿಂ ಮಯಿ॑ ॥ ಅಗ್ನೇ॑ ಪಾವಕ ರೋ॒ಚಿಷಾ॑ ಮಂ॒ದ್ರಯಾ॑ ದೇವ ಜಿ॒ಹ್ವಯಾ᳚ । ಆ ದೇ॒ವಾನ್. ವ॑ಕ್ಷಿ॒ ಯಕ್ಷಿ॑ ಚ ॥ ಸ ನಃ॑ ಪಾವಕ ದೀದಿ॒ವೋಽಗ್ನೇ॑ ದೇ॒ವಾಗ್ಂ ಇ॒ಹಾ ವ॑ಹ । ಉಪ॑ ಯ॒ಜ್ಞಗ್ಂ ಹ॒ವಿಶ್ಚ॑ ನಃ ॥ ಅ॒ಗ್ನಿಃ ಶುಚಿ॑ವ್ರತತಮಃ॒ ಶುಚಿ॒-ರ್ವಿಪ್ರಃ॒ ಶುಚಿಃ॑ ಕ॒ವಿಃ । ಶುಚೀ॑ ರೋಚತ॒ ಆಹು॑ತಃ ॥ ಉದ॑ಗ್ನೇ॒ ಶುಚ॑ಯ॒ಸ್ತವ॑ ಶು॒ಕ್ರಾ ಭ್ರಾಜಂ॑ತ ಈರತೇ । ತವ॒ ಜ್ಯೋತೀಗ್ಗ್॑ಷ್ಯ॒ರ್ಚಯಃ॑ ॥ 31 ॥
(ಪು॒ರು॒ನಿ॒ಷ್ಠಃ-ಪು॑ರ್ವಣೀಕ-ಭರಾ॒-ಽಭಿ-ವಯೋ॑ಭಿ॒-ರ್ಯ-ಆಯೂಗ್ಂ॑ಷಿ॒ -ವಿಪ್ರಃ॒ ಶುಚಿ॒-ಶ್ಚತು॑ರ್ದಶ ಚ) (ಅ. 14)

(ದೇ॒ವಸ್ಯ॑ - ರಕ್ಷೋ॒ಹಣೋ॑ - ವಿ॒ಭೂ-ಸ್ತ್ವಗ್ಂ ಸೋ॒ಮಾ - ಽತ್ಯ॒ನ್ಯಾನಗಾಂ᳚ - ಪೃಥಿ॒ವ್ಯಾ - ಇ॒ಷೇ ತ್ವಾ - ಽಽದ॑ದೇ॒ - ವಾಕ್ತ॒-ಸಂತೇ॑ - ಸಮು॒ದ್ರಗ್ಂ - ಹ॒ವಿಷ್ಮ॑ತೀ-ರ್​ಹೃ॒ದೇ - ತ್ವಮ॑ಗ್ನೇ ರು॒ದ್ರ - ಶ್ಚತು॑ರ್ದಶ)

(ದೇ॒ವಸ್ಯ॑ - ಗ॒ಮಧ್ಯೇ॑ - ಹ॒ವಿಷ್ಮ॑ತೀಃ - ಪವಸ॒ - ಏಕ॑ತ್ರಿಗ್ಂಶತ್)

(ದೇ॒ವಸ್ಯಾ॒, ರ್ಚಯಃ॑)

॥ ಹರಿಃ॑ ಓಮ್ ॥

॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾಂ ಪ್ರಥಮಕಾಂಡೇ ತೃತೀಯಃ ಪ್ರಶ್ನಃ ಸಮಾಪ್ತಃ ॥