କୃଷ୍ଣ ୟଜୁର୍ଵେଦୀୟ ତୈତ୍ତିରୀୟ ସଂହିତାୟାଂ ପ୍ରଥମକାଂଡେ ପ୍ରଥମଃ ପ୍ରଶ୍ନଃ - (ଦର୍​ଶପୂର୍ଣମାସୌ)

ଓଂ ନମଃ ପରମାତ୍ମନେ, ଶ୍ରୀ ମହାଗଣପତୟେ ନମଃ,
ଶ୍ରୀ ଗୁରୁଭ୍ୟୋ ନମଃ । ହ॒ରିଃ॒ ଓମ୍ ॥

ଇ॒ଷେ ତ୍ଵୋ॒ର୍ଜେ ତ୍ଵା॑ ଵା॒ୟଵଃ॑ ସ୍ଥୋପା॒ୟଵଃ॑ ସ୍ଥ ଦେ॒ଵୋ ଵଃ॑ ସଵି॒ତା ପ୍ରାର୍ପ॑ୟତୁ॒ ଶ୍ରେଷ୍ଠ॑ତମାୟ॒ କର୍ମ॑ଣ॒ ଆ ପ୍ୟା॑ୟଦ୍ଧ୍ଵମଘ୍ନିୟା ଦେଵଭା॒ଗମୂର୍ଜ॑ସ୍ଵତୀଃ॒ ପୟ॑ସ୍ଵତୀଃ ପ୍ର॒ଜାଵ॑ତୀରନମୀ॒ଵା ଅ॑ୟ॒କ୍ଷ୍ମା ମା ଵଃ॑ ସ୍ତେ॒ନ ଈ॑ଶତ॒ ମାଽଘଶଗ୍-ମ୍॑ସୋ ରୁ॒ଦ୍ରସ୍ୟ॑ ହେ॒ତିଃ ପରି॑ ଵୋ ଵୃଣକ୍ତୁ ଧ୍ରୁ॒ଵା ଅ॒ସ୍ମିନ୍ ଗୋପ॑ତୌ ସ୍ୟାତ ବ॒ହ୍ଵୀ-ର୍ୟଜ॑ମାନସ୍ୟ ପ॒ଶୂନ୍ ପା॑ହି ॥ 1 ॥
(ଇ॒ଷେ - ତ୍ରିଚ॑ତ୍ଵାରିଗ୍-ମ୍ଶତ୍ ) (ଅ. 1)

ୟ॒ଜ୍ଞସ୍ୟ॑ ଘୋ॒ଷଦ॑ସି॒ ପ୍ରତ୍ୟୁ॑ଷ୍ଟ॒ଗ୍-ମ୍॒ ରକ୍ଷଃ॒ ପ୍ରତ୍ୟୁ॑ଷ୍ଟା॒ ଅରା॑ତୟଃ॒ ପ୍ରେୟମ॑ଗାଦ୍ଧି॒ଷଣା॑ ବ॒ର୍॒​ହିରଚ୍ଛ॒ ମନୁ॑ନା କୃ॒ତା ସ୍ଵ॒ଧୟା॒ ଵିତ॑ଷ୍ଟା॒ ତ ଆ ଵ॑ହଂତି କ॒ଵୟଃ॑ ପୁ॒ରସ୍ତା᳚ଦ୍- ଦେ॒ଵେଭ୍ୟୋ॒ ଜୁଷ୍ଟ॑ମି॒ହ ବ॒ର୍॒​ହିରା॒ସଦେ॑ ଦେ॒ଵାନାଂ᳚ ପରିଷୂ॒ତମ॑ସି ଵ॒ର୍॒​ଷଵୃ॑ଦ୍ଧମସି॒ ଦେଵ॑ବର୍​ହି॒ର୍ମା ତ୍ଵାଽ॒ନ୍ଵଂ ମା ତି॒ର୍ୟକ୍ ପର୍ଵ॑ ତେ ରାଦ୍ଧ୍ୟାସମାଚ୍ଛେ॒ତ୍ତା ତେ॒ ମା ରି॑ଷଂ॒ ଦେଵ॑ବର୍​ହିଃ ଶ॒ତଵ॑ଲ୍​ଶଂ॒-ଵିଁ ରୋ॑ହ ସ॒ହସ୍ର॑ଵଲ୍​ଶା॒ [ସ॒ହସ୍ର॑ଵଲ୍​ଶାଃ, ଵି ଵ॒ୟଗ୍-ମ୍ ରୁ॑ହେମ] ॥ 2 ॥

ଵି ଵ॒ୟଗ୍-ମ୍ ରୁ॑ହେମ ପୃଥି॒ଵ୍ୟାଃ ସଂ॒ପୃଚଃ॑ ପାହି ସୁସଂ॒ଭୃତା᳚ ତ୍ଵା॒ ସଂଭ॑ରା॒ମ୍ୟଦି॑ତ୍ୟୈ॒ ରାସ୍ନା॑ଽସୀଂଦ୍ରା॒ଣ୍ୟୈ ସ॒ନ୍ନହ॑ନଂ ପୂ॒ଷା ତେ᳚ ଗ୍ରଂ॒ଥିଂ ଗ୍ର॑ଥ୍ନାତୁ॒ ସ ତେ॒ ମାଽଽ ସ୍ଥା॒ଦିଂଦ୍ର॑ସ୍ୟ ତ୍ଵା ବା॒ହୁଭ୍ୟା॒ମୁଦ୍ୟ॑ଚ୍ଛେ॒ ବୃହ॒ସ୍ପତେ᳚-ର୍ମୂ॒ର୍ଧ୍ନା ହ॑ରାମ୍ୟୁ॒ର୍ଵଂ॑ତରି॑କ୍ଷ॒ମନ୍ଵି॑ହି ଦେଵଂଗ॒ମମ॑ସି ॥ 3 ॥
(ସ॒ହସ୍ର॑ଵଲ୍​ଶା - ଅ॒ଷ୍ଟାତ୍ରିଗ୍-ମ୍॑ଶଚ୍ଚ) (ଅ. 2)

ଶୁଂଧ॑ଦ୍ଧ୍ଵଂ॒ ଦୈଵ୍ୟା॑ୟ॒ କର୍ମ॑ଣେ ଦେଵୟ॒ଜ୍ୟାୟୈ॑ ମାତ॒ରିଶ୍ଵ॑ନୋ ଘ॒ର୍ମୋ॑ଽସି॒ ଦ୍ୟୌର॑ସି ପୃଥି॒ଵ୍ୟ॑ସି ଵି॒ଶ୍ଵଧା॑ୟା ଅସି ପର॒ମେଣ॒ ଧାମ୍ନା॒ ଦୃଗ୍-ମ୍ହ॑ସ୍ଵ॒ ମା ହ୍ଵା॒-ର୍ଵସୂ॑ନାଂ ପ॒ଵିତ୍ର॑ମସି ଶ॒ତଧା॑ରଂ॒-ଵଁସୂ॑ନାଂ ପ॒ଵିତ୍ର॑ମସି ସ॒ହସ୍ର॑ଧାରଗ୍-ମ୍ ହୁ॒ତଃ ସ୍ତୋ॒କୋହୁ॒ତୋ ଦ୍ର॒ଫ୍ସୋ᳚ ଽଗ୍ନୟେ॑ ବୃହ॒ତେ ନାକା॑ୟ॒ ସ୍ଵାହା॒ ଦ୍ୟାଵା॑ପୃଥି॒ଵୀଭ୍ୟା॒ଗ୍-ମ୍॒ ସା ଵି॒ଶ୍ଵାୟୁଃ॒ ସା ଵି॒ଶ୍ଵଵ୍ୟ॑ଚାଃ॒ ସା ଵି॒ଶ୍ଵକ॑ର୍ମା॒ ସଂ ପୃ॑ଚ୍ୟଦ୍ଧ୍ଵ-ମୃତାଵରୀ-ରୂ॒ର୍ମିଣୀ॒ର୍ମଧୁ॑ମତ୍ତମା ମଂ॒ଦ୍ରା ଧନ॑ସ୍ୟ ସା॒ତୟେ॒ ସୋମେ॑ନ॒ ତ୍ଵାଽଽତ॑ନ॒ଚ୍ମୀଂଦ୍ରା॑ୟ॒ ଦଧି॒ ଵିଷ୍ଣୋ॑ ହ॒ଵ୍ୟଗ୍-ମ୍ ର॑କ୍ଷସ୍ଵ ॥ 4 ॥
(ସୋମେ॑ - ନା॒ଷ୍ଟୌ ଚ॑) (ଅ. 3)

କର୍ମ॑ଣେ ଵାଂ ଦେ॒ଵେଭ୍ୟଃ॑ ଶକେୟଂ॒-ଵେଁଷା॑ୟ ତ୍ଵା॒ ପ୍ରତ୍ୟୁ॑ଷ୍ଟ॒ଗ୍-ମ୍॒ ରକ୍ଷଃ॒ ପ୍ରତ୍ୟୁ॑ଷ୍ଟା॒ ଅରା॑ତୟୋ॒ ଧୂର॑ସି॒ ଧୂର୍ଵ॒ ଧୂର୍ଵଂ॑ତଂ॒ ଧୂର୍ଵ॒ ତଂ-ୟୋଁ᳚ଽସ୍ମାନ୍ ଧୂର୍ଵ॑ତି॒ ତଂ ଧୂ᳚ର୍ଵ॒ୟଂ-ଵଁ॒ୟଂ ଧୂର୍ଵା॑ମ॒ସ୍ତ୍ଵଂ ଦେ॒ଵାନା॑ମସି॒ ସସ୍ନି॑ତମଂ॒ ପପ୍ରି॑ତମଂ॒ ଜୁଷ୍ଟ॑ତମଂ॒-ଵଁହ୍ନି॑ତମଂ ଦେଵ॒ହୂତ॑ମ॒-ମହ୍ରୁ॑ତମସି ହଵି॒ର୍ଧାନଂ॒ ଦୃଗ୍-ମ୍ହ॑ସ୍ଵ॒ ମା ହ୍ଵା᳚-ର୍ମି॒ତ୍ରସ୍ୟ॑ ତ୍ଵା॒ ଚକ୍ଷୁ॑ଷା॒ ପ୍ରେକ୍ଷେ॒ ମା ଭେର୍ମା ସଂ-ଵିଁ॑କ୍ଥା॒ ମା ତ୍ଵା॑ - [ମା ତ୍ଵା᳚, ହି॒ଗ୍-ମ୍॒ସି॒ଷ॒ମୁ॒ରୁ] ॥ 5 ॥

ହିଗ୍-ମ୍ସିଷମୁ॒ରୁ ଵାତା॑ୟ ଦେ॒ଵସ୍ୟ॑ ତ୍ଵା ସଵି॒ତୁଃ ପ୍ର॑ସ॒ଵେ᳚ଽଶ୍ଵିନୋ᳚-ର୍ବା॒ହୁଭ୍ୟାଂ᳚ ପୂ॒ଷ୍ଣୋ ହସ୍ତା᳚ଭ୍ୟା-ମ॒ଗ୍ନୟେ॒ ଜୁଷ୍ଟଂ॒ ନିର୍ଵ॑ପାମ୍ୟ॒ଗ୍ନୀଷୋମା᳚ଭ୍ୟା-ମି॒ଦଂ ଦେ॒ଵାନା॑ମି॒ଦମୁ॑ ନଃ ସ॒ହ ସ୍ଫା॒ତ୍ୟୈ ତ୍ଵା॒ ନାରା᳚ତ୍ୟୈ॒ ସୁଵ॑ର॒ଭି ଵି ଖ୍ୟେ॑ଷଂ-ଵୈଁଶ୍ଵାନ॒ରଂ ଜ୍ୟୋତି॒-ର୍ଦୃଗ୍-ମ୍ହଂ॑ତାଂ॒ ଦୁର୍ୟା॒ ଦ୍ୟାଵା॑ପୃଥି॒ଵ୍ୟୋ- ରୁ॒ର୍ଵଂ॑ତରି॑କ୍ଷ॒ ମନ୍ଵି॒-ହ୍ୟଦି॑ତ୍ୟା ସ୍ତ୍ଵୋ॒ପସ୍ଥେ॑ ସାଦୟା॒ମ୍ୟଗ୍ନେ॑ ହ॒ଵ୍ୟଗ୍-ମ୍ ର॑କ୍ଷସ୍ଵ ॥ 6 ॥
( ମା ତ୍ଵା॒ - ଷଟ୍ଚ॑ତ୍ଵାରିଗ୍-ମ୍ଶଚ୍ଚ ) (ଅ. 4)

ଦେ॒ଵୋ ଵଃ॑ ସଵି॒ତୋତ୍ ପୁ॑ନା॒ତ୍ଵଚ୍ଛି॑ଦ୍ରେଣ ପ॒ଵିତ୍ରେ॑ଣ॒ ଵସୋଃ॒ ସୂର୍ୟ॑ସ୍ୟ ର॒ଶ୍ମିଭି॒ରାପୋ॑ ଦେଵୀରଗ୍ରେପୁଵୋ ଅଗ୍ରେଗୁ॒ଵୋଽଗ୍ର॑ ଇ॒ମଂ-ୟଁ॒ଜ୍ଞଂ ନ॑ୟ॒ତାଗ୍ରେ॑ ୟ॒ଜ୍ଞପ॑ତିଂ ଧତ୍ତ ୟୁ॒ଷ୍ମାନିଂଦ୍ରୋ॑ ଽଵୃଣୀତ ଵୃତ୍ର॒ତୂର୍ୟେ॑ ୟୂ॒ୟମିଂଦ୍ର॑-ମଵୃଣୀଦ୍ଧ୍ଵଂ-ଵୃଁତ୍ର॒ତୂର୍ୟେ॒ ପ୍ରୋକ୍ଷି॑ତାଃ ସ୍ଥା॒ଗ୍ନୟେ॑ ଵୋ॒ ଜୁଷ୍ଟଂ॒ ପ୍ରୋକ୍ଷା᳚ମ୍ୟ॒ଗ୍ନୀଷୋମା᳚ଭ୍ୟା॒ଗ୍-ମ୍॒ ଶୁଂଧ॑ଦ୍ଧ୍ଵଂ॒ ଦୈଵ୍ୟା॑ୟ॒ କର୍ମ॑ଣେ ଦେଵୟ॒ଜ୍ୟାୟା॒ ଅଵ॑ଧୂତ॒ଗ୍-ମ୍॒ ରକ୍ଷୋଽଵ॑ଧୂତା॒
ଅରା॑ତ॒ୟୋଽଦି॑ତ୍ୟା॒ସ୍ତ୍ଵଗ॑ସି॒ ପ୍ରତି॑ ତ୍ଵା - [ପ୍ରତି॑ ତ୍ଵା, ପୃ॒ଥି॒ଵୀ ଵେ᳚ତ୍ତ୍ଵଧି॒ଷଵ॑ଣମସି] ॥ 7 ॥

ପୃଥି॒ଵୀ ଵେ᳚ତ୍ତ୍ଵଧି॒ଷଵ॑ଣମସି ଵାନସ୍ପ॒ତ୍ୟଂ ପ୍ରତି॒ ତ୍ଵାଽଦି॑ତ୍ୟା॒ସ୍ତ୍ଵଗ୍ଵେ᳚ତ୍ତ୍ଵ॒ଗ୍ନେସ୍ତ॒ନୂର॑ସି ଵା॒ଚୋ ଵି॒ସର୍ଜ॑ନଂ ଦେ॒ଵଵୀ॑ତୟେ ତ୍ଵା ଗୃହ୍ଣା॒ମ୍ୟଦ୍ରି॑ରସି ଵାନସ୍ପ॒ତ୍ୟଃ ସ ଇ॒ଦଂ ଦେ॒ଵେଭ୍ୟୋ॑ ହ॒ଵ୍ୟଗ୍-ମ୍ ସୁ॒ଶମି॑ ଶମି॒ଷ୍ଵେଷ॒ମା ଵ॒ଦୋର୍ଜ॒ମା ଵ॑ଦ ଦ୍ୟୁ॒ମଦ୍ଵ॑ଦତ ଵ॒ୟଗ୍-ମ୍ ସଂ॑ଘା॒ତଂ ଜେ᳚ଷ୍ମ ଵ॒ର୍॒​ଷଵୃ॑ଦ୍ଧମସି॒ ପ୍ରତି॑ ତ୍ଵା ଵ॒ର୍॒​ଷଵୃ॑ଦ୍ଧଂ-ଵେଁତ୍ତୁ॒ ପରା॑ପୂତ॒ଗ୍-ମ୍॒ ରକ୍ଷଃ॒ ପରା॑ପୂତା॒ ଅରା॑ତୟୋ॒ ରକ୍ଷ॑ସାଂ ଭା॒ଗୋ॑ ଽସି ଵା॒ୟୁର୍ଵୋ॒ ଵି ଵି॑ନକ୍ତୁ ଦେ॒ଵୋ ଵଃ॑ ସଵି॒ତା ହିର॑ଣ୍ୟପାଣିଃ॒ ପ୍ରତି॑ ଗୃହ୍ଣାତୁ ॥ 8 ॥
( ତ୍ଵା॒ - ଭା॒ଗ - ଏକା॑ଦଶ ଚ ) (ଅ. 5)

ଅଵ॑ଧୂତ॒ଗ୍-ମ୍॒ ରକ୍ଷୋଽଵ॑ଧୂତା॒ ଅରା॑ତ॒ୟୋଽଦି॑ତ୍ୟା॒ସ୍ତ୍ଵଗ॑ସି॒ ପ୍ରତି॑ ତ୍ଵା ପୃଥି॒ଵୀଵେ᳚ତ୍ତୁ ଦି॒ଵଃ ସ୍କଂ॑ଭ॒ନିର॑ସି॒ ପ୍ରତି॒ ତ୍ଵାଽଦି॑ତ୍ୟା॒ସ୍ତ୍ଵଗ୍ଵେ᳚ତ୍ତୁ ଧି॒ଷଣା॑ଽସି ପର୍ଵ॒ତ୍ୟା ପ୍ରତି॑ ତ୍ଵା ଦି॒ଵଃ ସ୍କଂ॑ଭ॒ନିର୍ଵେ᳚ତ୍ତୁ ଧି॒ଷଣା॑ଽସି ପାର୍ଵତେ॒ୟୀ ପ୍ରତି॑ ତ୍ଵା ପର୍ଵ॒ତିର୍ଵେ᳚ତ୍ତୁ ଦେ॒ଵସ୍ୟ॑ ତ୍ଵା ସଵି॒ତୁଃ ପ୍ର॑ସ॒ଵେ᳚-ଽଶ୍ଵିନୋ᳚-ର୍ବା॒ହୁଭ୍ୟାଂ᳚ ପୂ॒ଷ୍ଣୋହସ୍ତା᳚ଭ୍ୟା॒ମଧି॑ ଵପାମିଧା॒ନ୍ୟ॑ମସି ଧିନୁ॒ହି ଦେ॒ଵାନ୍ ପ୍ରା॒ଣାୟ॑ ତ୍ଵା ଽପା॒ନାୟ॑ ତ୍ଵା ଵ୍ୟା॒ନାୟ॑ ତ୍ଵା ଦୀ॒ର୍ଘାମନୁ॒ ପ୍ରସି॑ତି॒ମାୟୁ॑ଷେଧାଂ ଦେ॒ଵୋ ଵଃ॑ ସଵି॒ତା ହିର॑ଣ୍ୟପାଣିଃ॒ ପ୍ରତି॑ ଗୃହ୍ଣାତୁ ॥ 9 ॥
(ପ୍ରା॒ଣାୟ॑ ତ୍ଵା॒ - ପଂଚ॑ଦଶ ଚ) (ଅ. 6)

ଧୃଷ୍ଟି॑ରସି॒ ବ୍ରହ୍ମ॑ ୟ॒ଚ୍ଛାପା᳚ଗ୍ନେ॒ ଽଗ୍ନିମା॒ମାଦଂ॑ ଜହି॒ ନିଷ୍କ୍ର॒ଵ୍ୟାଦଗ୍-ମ୍॑ ସେ॒ଧାଽଽଦେ॑ଵ॒ୟଜଂ॑-ଵଁହ॒ ନିର୍ଦ॑ଗ୍ଧ॒ଗ୍-ମ୍॒ ରକ୍ଷୋ॒ ନିର୍ଦ॑ଗ୍ଧା॒ ଅରା॑ତୟୋ ଧ୍ରୁ॒ଵମ॑ସି ପୃଥି॒ଵୀଂ ଦୃ॒ଗ୍-ମ୍॒ହାଽଽୟୁ॑-ର୍ଦୃଗ୍-ମ୍ହ ପ୍ର॒ଜାଂ ଦୃଗ୍-ମ୍॑ହ ସଜା॒ତାନ॒ସ୍ମୈ ୟଜ॑ମାନାୟ॒ ପର୍ୟୂ॑ହ ଧ॒ର୍ତ୍ରମ॑ସ୍ୟଂ॒ତରି॑କ୍ଷଂ ଦୃଗ୍-ମ୍ହ ପ୍ରା॒ଣଂ ଦୃଗ୍-ମ୍॑ହାପା॒ନଂ ଦୃଗ୍-ମ୍॑ହ ସଜା॒ତାନ॒ସ୍ମୈ ୟଜ॑ମାନାୟ॒ ପର୍ୟୂ॑ହ ଧ॒ରୁଣ॑ମସି॒ ଦିଵଂ॑ ଦୃଗ୍-ମ୍ହ॒ ଚକ୍ଷୁ॑- [ଚକ୍ଷୁଃ॑, ଦୃ॒ଗ୍-ମ୍॒ହ॒ ଶ୍ରୋତ୍ରଂ॑ ଦୃଗ୍-ମ୍ହ] ॥ 10 ॥

ର୍ଦୃଗ୍-ମ୍ହ॒ ଶ୍ରୋତ୍ରଂ॑ ଦୃଗ୍-ମ୍ହ ସଜା॒ତାନ॒ସ୍ମୈ ୟଜ॑ମାନାୟ॒ ପର୍ୟୂ॑ହ॒ ଧର୍ମା॑ସି॒ ଦିଶୋ॑ ଦୃଗ୍-ମ୍ହ॒ ୟୋନିଂ॑ ଦୃଗ୍-ମ୍ହ ପ୍ର॒ଜାଂ ଦୃଗ୍-ମ୍॑ହ ସଜା॒ତାନ॒ସ୍ମୈ ୟଜ॑ମାନାୟ॒ ପର୍ୟୂ॑ହ॒ ଚିତଃ॑ ସ୍ଥ ପ୍ର॒ଜାମ॒ସ୍ମୈ ର॒ୟିମ॒ସ୍ମୈ ସ॑ଜା॒ତାନ॒ସ୍ମୈ ୟଜ॑ମାନାୟ॒ ପର୍ୟୂ॑ହ॒ ଭୃଗୂ॑ଣା॒ମଂଗି॑ରସାଂ॒ ତପ॑ସା ତପ୍ୟଦ୍ଧ୍ଵଂ॒-ୟାଁନି॑ ଘ॒ର୍ମେ କ॒ପାଲା᳚ନ୍ୟୁପଚି॒ନ୍ଵଂତି॑ ଵେ॒ଧସଃ॑ ।
ପୂ॒ଷ୍ଣସ୍ତାନ୍ୟପି॑ ଵ୍ର॒ତ ଇଂ॑ଦ୍ରଵା॒ୟୂ ଵି ମୁଂ॑ଚତାମ୍ ॥ 11 ॥
(ଚକ୍ଷୁ॑ - ର॒ଷ୍ଟାଚ॑ତ୍ଵାରିଗ୍-ମ୍ଶଚ୍ଚ) (ଅ. 7)

ସଂ-ଵଁ॑ପାମି॒ ସମାପୋ॑ ଅ॒ଦ୍ଭିର॑ଗ୍ମତ॒ ସମୋଷ॑ଧୟୋ॒ ରସେ॑ନ॒ ସଗ୍-ମ୍ ରେ॒ଵତୀ॒-ର୍ଜଗ॑ତୀଭି॒-ର୍ମଧୁ॑ମତୀ॒-ର୍ମଧୁ॑ମତୀଭିଃ ସୃଜ୍ୟଦ୍ଧ୍ଵମ॒ଦ୍ଭ୍ୟଃ ପରି॒ ପ୍ରଜା॑ତାଃ ସ୍ଥ॒ ସମ॒ଦ୍ଭିଃ ପୃ॑ଚ୍ୟଦ୍ଧ୍ଵଂ॒ ଜନ॑ୟତ୍ୟୈ ତ୍ଵା॒ ସଂ-ୟୌଁ᳚ମ୍ୟ॒ଗ୍ନୟେ᳚ ତ୍ଵା॒ଽଗ୍ନୀଷୋମା᳚ଭ୍ୟାଂ ମ॒ଖସ୍ୟ॒ ଶିରୋ॑ଽସି ଘ॒ର୍ମୋ॑ଽସି ଵି॒ଶ୍ଵାୟୁ॑ରୁ॒ରୁ ପ୍ର॑ଥସ୍ଵୋ॒ରୁ ତେ॑ ୟ॒ଜ୍ଞପ॑ତିଃ ପ୍ରଥତାଂ॒ ତ୍ଵଚଂ॑ ଗୃହ୍ଣୀଷ୍ଵାଂ॒ତରି॑ତ॒ଗ୍-ମ୍॒ ରକ୍ଷୋ॒ଽଂତରି॑ତା॒ ଅରା॑ତୟୋଦେ॒ଵସ୍ତ୍ଵା॑ ସଵି॒ତା ଶ୍ର॑ପୟତୁ॒ ଵର୍​ଷି॑ଷ୍ଠେ॒ ଅଧି॒ ନାକେ॒ଽଗ୍ନିସ୍ତେ॑ ତ॒ନୁଵଂ॒ ମାଽତି॑ ଧା॒ଗଗ୍ନେ॑ ହ॒ଵ୍ୟଗ୍-ମ୍ ର॑କ୍ଷସ୍ଵ॒ ସଂ ବ୍ରହ୍ମ॑ଣା ପୃଚ୍ୟସ୍ଵୈକ॒ତାୟ॒ ସ୍ଵାହା᳚ ଦ୍ଵି॒ତାୟ॒ ସ୍ଵାହା᳚ ତ୍ରି॒ତାୟ॒ ସ୍ଵାହା᳚ ॥ 12 ॥
(ସ॒ଵି॒ତା - ଦ୍ଵାଵିଗ୍-ମ୍॑ଶତିଶ୍ଚ) (ଅ. 8)

ଆ ଦ॑ଦ॒ ଇଂଦ୍ର॑ସ୍ୟ ବା॒ହୁର॑ସି॒ ଦକ୍ଷି॑ଣଃ ସ॒ହସ୍ର॑ଭୃଷ୍ଟିଃ ଶ॒ତତେ॑ଜା ଵା॒ୟୁର॑ସି ତି॒ଗ୍ମତେ॑ଜାଃ॒ ପୃଥି॑ଵି ଦେଵୟଜ॒ - ନ୍ୟୋଷ॑ଦ୍ଧ୍ୟାସ୍ତେ॒ ମୂଲଂ॒ ମା ହିଗ୍-ମ୍॑ସିଷ॒-ମପ॑ହତୋ॒ଽରରୁଃ॑ ପୃଥି॒ଵ୍ୟୈ ଵ୍ର॒ଜଂ ଗ॑ଚ୍ଛ ଗୋ॒ସ୍ଥାନଂ॒-ଵଁର୍​ଷ॑ତୁ ତେ॒ ଦ୍ୟୌର୍ବ॑ଧା॒ନ ଦେ॑ଵ ସଵିତଃ ପର॒ମସ୍ୟାଂ᳚ ପରା॒ଵତି॑ ଶ॒ତେନ॒ ପାଶୈ॒ର୍ୟୋ᳚ଽସ୍ମାନ୍ ଦ୍ଵେଷ୍ଟି॒ ୟଂ ଚ॑ ଵ॒ୟଂ ଦ୍ଵି॒ଷ୍ମସ୍ତମତୋ॒ ମା ମୌ॒ଗପ॑ହତୋ॒ଽରରୁଃ॑ ପୃଥି॒ଵ୍ୟୈ ଦେ॑ଵ॒ୟଜ॑ନ୍ୟୈ ଵ୍ର॒ଜଂ- [ଵ୍ର॒ଜମ୍, ଗ॒ଚ୍ଛ॒ ଗୋ॒ସ୍ଥାନଂ॒-ଵଁର୍​ଷ॑ତୁ] ॥ 13 ॥

ଗ॑ଚ୍ଛ ଗୋ॒ସ୍ଥାନଂ॒-ଵଁର୍​ଷ॑ତୁ ତେ॒ ଦ୍ୟୌର୍ବ॑ଧା॒ନ ଦେ॑ଵ ସଵିତଃ ପର॒ମସ୍ୟାଂ᳚ ପରା॒ଵତି॑ ଶ॒ତେନ॒ ପାଶୈ॒ର୍ୟୋ᳚ଽସ୍ମାନ୍ ଦ୍ଵେଷ୍ଟି॒ ୟଂ ଚ॑ ଵ॒ୟଂ ଦ୍ଵି॒ଷ୍ମସ୍ତମତୋ॒ ମା ମୌ॒ଗପ॑ହତୋ॒ଽରରୁଃ॑ ପୃଥି॒ଵ୍ୟା ଅଦେ॑ଵୟଜନୋ ଵ୍ର॒ଜଂ ଗ॑ଚ୍ଛ ଗୋ॒ସ୍ଥାନଂ॒-ଵଁର୍​ଷ॑ତୁ ତେ॒ ଦ୍ୟୌର୍ବ॑ଧା॒ନ ଦେ॑ଵ ସଵିତଃ ପର॒ମସ୍ୟାଂ᳚ ପରା॒ଵତି॑ ଶ॒ତେନ॒ ପାଶୈ॒ର୍ୟୋ᳚ଽସ୍ମାନ୍ ଦ୍ଵେଷ୍ଟି॒ ୟଂ ଚ॑ ଵ॒ୟଂ ଦ୍ଵି॒ଷ୍ମସ୍ତମତୋ॒ ମା- [ମା, ମୌ॒ଗ॒ରରୁ॑ସ୍ତେ॒ ଦିଵଂ॒ ମା] ॥ 14 ॥

ମୌ॑ଗ॒ରରୁ॑ସ୍ତେ॒ ଦିଵଂ॒ ମା ସ୍କା॒ନ୍॒. ଵସ॑ଵସ୍ତ୍ଵା॒ ପରି॑ ଗୃହ୍ଣଂତୁ ଗାୟ॒ତ୍ରେଣ॒ ଛଂଦ॑ସାରୁ॒ଦ୍ରାସ୍ତ୍ଵା॒ ପରି॑ ଗୃହ୍ଣଂତୁ॒ ତ୍ରୈଷ୍ଟୁ॑ଭେନ॒ ଛଂଦ॑ସାଽଽଦି॒ତ୍ୟାସ୍ତ୍ଵା॒ ପରି॑ ଗୃହ୍ଣଂତୁ॒ ଜାଗ॑ତେନ॒ ଛଂଦ॑ସା ଦେ॒ଵସ୍ୟ॑ ସଵି॒ତୁଃ ସ॒ଵେ କର୍ମ॑ କୃଣ୍ଵଂତି ଵେ॒ଧସ॑ ଋ॒ତମ॑ସ୍ୟୃତ॒ସଦ॑ନ-ମସ୍ୟୃତ॒ଶ୍ରୀର॑ସି॒ ଧା ଅ॑ସି ସ୍ଵ॒ଧା ଅ॑ସ୍ୟୁ॒ର୍ଵୀ ଚାସି॒ ଵସ୍ଵୀ॑ ଚାସି ପୁ॒ରା କ୍ରୂ॒ରସ୍ୟ॑ ଵି॒ସୃପୋ॑ ଵିରଫ୍ଶିନ୍ ନୁଦା॒ଦାୟ॑ ପୃଥି॒ଵୀଂ ଜୀ॒ରଦା॑ନୁ॒ର୍ୟାମୈର॑ୟନ୍ ଚଂ॒ଦ୍ରମ॑ସି ସ୍ଵ॒ଧାଭି॒ସ୍ତାଂ ଧୀରା॑ସୋ ଅନୁ॒ଦୃଶ୍ୟ॑ ୟଜଂତେ ॥ 15 ॥
(ଦେ॒ଵ॒ୟଜ॑ନ୍ୟୈ ଵ୍ର॒ଜଂ - ତମତୋ॒ ମା - ଵି॑ରଫ୍ଶି॒ନ୍ - ନେକା॑ଦଶ ଚ) (ଅ. 9)

ପ୍ରତ୍ୟୁ॑ଷ୍ଟ॒ଗ୍-ମ୍॒ ରକ୍ଷଃ॒ ପ୍ରତ୍ୟୁ॑ଷ୍ଟା॒ ଅରା॑ତୟୋ॒ ଽଗ୍ନେର୍ଵ॒ସ୍ତେଜି॑ଷ୍ଠେନ॒ ତେଜ॑ସା॒ ନିଷ୍ଟ॑ପାମି ଗୋ॒ଷ୍ଠଂ ମା ନିର୍ମୃ॑କ୍ଷଂ-ଵାଁ॒ଜିନଂ॑ ତ୍ଵା ସପତ୍ନସା॒ହଗ୍-ମ୍ ସଂ ମା᳚ର୍ଜ୍ମି॒ ଵାଚଂ॑ ପ୍ରା॒ଣଂ ଚକ୍ଷୁଃ॒ ଶ୍ରୋତ୍ରଂ॑ ପ୍ର॒ଜାଂ-ୟୋଁନିଂ॒ ମା ନିର୍ମୃ॑କ୍ଷଂ-ଵାଁ॒ଜିନୀଂ᳚ ତ୍ଵା ସପତ୍ନସା॒ହୀଗ୍-ମ୍ ସଂ ମା᳚ର୍ଜ୍ମ୍ୟା॒ଶାସା॑ନା ସୌମନ॒ସଂ ପ୍ର॒ଜାଗ୍-ମ୍ ସୌଭା᳚ଗ୍ୟଂ ତ॒ନୂମ୍ । ଅ॒ଗ୍ନେରନୁ॑ଵ୍ରତା ଭୂ॒ତ୍ଵା ସଂ ନ॑ହ୍ୟେ ସୁକୃ॒ତାୟ॒ କମ୍ ॥ସୁ॒ପ୍ର॒ଜସ॑ସ୍ତ୍ଵା ଵ॒ୟଗ୍-ମ୍ ସୁ॒ପତ୍ନୀ॒ରୁପ॑- [ସୁ॒ପଥ୍ନୀ॒ରୁପ॑, ସେ॒ଦି॒ମି॒ ।] ॥ 16 ॥

ସେଦିମ । ଅଗ୍ନେ॑ ସପତ୍ନ॒ଦଂଭ॑ନ॒ମଦ॑ବ୍ଧାସୋ॒ ଅଦା᳚ଭ୍ୟମ୍ ॥ ଇ॒ମଂ-ଵିଁଷ୍ୟା॑ମି॒ ଵରୁ॑ଣସ୍ୟ॒ ପାଶଂ॒ ​ୟଁମବ॑ଦ୍ଧ୍ନୀତ ସଵି॒ତା ସୁ॒କେତଃ॑ । ଧା॒ତୁଶ୍ଚ॒ ୟୋନୌ॑ ସୁକୃ॒ତସ୍ୟ॑ ଲୋ॒କେ ସ୍ୟୋ॒ନଂ ମେ॑ ସ॒ହ ପତ୍ୟା॑ କରୋମି ॥ ସମାୟୁ॑ଷା॒ ସଂପ୍ର॒ଜୟା॒ ସମ॑ଗ୍ନେ॒ ଵର୍ଚ॑ସା॒ ପୁନଃ॑ । ସଂ ପତ୍ନୀ॒ ପତ୍ୟା॒ଽହଂ ଗ॑ଚ୍ଛେ॒ ସମା॒ତ୍ମା ତ॒ନୁଵା॒ ମମ॑ ॥ ମ॒ହୀ॒ନାଂ ପୟୋ॒ଽସ୍ୟୋଷ॑ଧୀନା॒ଗ୍-ମ୍॒ ରସ॒ସ୍ତସ୍ୟ॒ ତେଽକ୍ଷୀ॑ୟମାଣସ୍ୟ॒ ନି- [ନିଃ, ଵ॒ପା॒ମି॒ ମ॒ହୀ॒ନାଂ] ॥ 17 ॥

ର୍ଵ॑ପାମି ମହୀ॒ନାଂ ପୟୋ॒ଽସ୍ୟୋଷ॑ଧୀନା॒ଗ୍-ମ୍॒ ରସୋଽଦ॑ବ୍ଧେନ ତ୍ଵା॒ ଚକ୍ଷୁ॒ଷାଽଵେ᳚କ୍ଷେ ସୁପ୍ରଜା॒ସ୍ତ୍ଵାୟ॒ ତେଜୋ॑ଽସି॒ ତେଜୋଽନୁ॒ ପ୍ରେହ୍ୟ॒ଗ୍ନିସ୍ତେ॒ ତେଜୋ॒ ମା ଵି ନୈ॑ଦ॒ଗ୍ନେ-ର୍ଜି॒ହ୍ଵାଽସି॑ ସୁ॒ଭୂର୍ଦେ॒ଵାନାଂ॒ ଧାମ୍ନେ॑ଧାମ୍ନେ ଦେ॒ଵେଭ୍ୟୋ॒ ୟଜୁ॑ଷେୟଜୁଷେ ଭଵ ଶୁ॒କ୍ରମ॑ସି॒ ଜ୍ୟୋତି॑ରସି॒ ତେଜୋ॑ଽସି ଦେ॒ଵୋ ଵଃ॑ ସଵି॒ତୋତ୍ ପୁ॑ନା॒ତ୍ଵଚ୍ଛି॑ଦ୍ରେଣ ପ॒ଵିତ୍ରେ॑ଣ॒ ଵସୋଃ॒ ସୂର୍ୟ॑ସ୍ୟ ର॒ଶ୍ମିଭିଃ॑ ଶୁ॒କ୍ରଂ ତ୍ଵା॑ ଶୁ॒କ୍ରାୟାଂ॒ ଧାମ୍ନେ॑ଧାମ୍ନେ ଦେ॒ଵେଭ୍ୟୋ॒ ୟଜୁ॑ଷେୟଜୁଷେ ଗୃହ୍ଣାମି॒ ଜ୍ୟୋତି॑ସ୍ତ୍ଵା॒ ଜ୍ୟୋତି॑ଷ୍ୟ॒ର୍ଚିସ୍ତ୍ଵା॒ଽର୍ଚିଷି॒ ଧାମ୍ନେ॑ଧାମ୍ନେ ଦେ॒ଵେଭ୍ୟୋ॒ ୟଜୁ॑ଷେୟଜୁଷେ ଗୃହ୍ଣାମି ॥ 18 ॥
(ଉପ॒ - ନୀ - ର॒ଶ୍ମିଭିଃ॑ ଶୁ॒କ୍ରଗ୍-ମ୍ - ଷୋଡ॑ଶ ଚ) (ଅ. 10)

କୃଷ୍ଣୋ᳚ଽସ୍ୟାଖରେ॒ଷ୍ଠୋ᳚ଽଗ୍ନୟେ᳚ ତ୍ଵା॒ ସ୍ଵାହା॒ ଵେଦି॑ରସି ବ॒ର୍॒​ହିଷେ᳚ ତ୍ଵା॒ ସ୍ଵାହା ॑ବ॒ର୍॒​ହିର॑ସି ସ୍ରୁ॒ଗ୍ଭ୍ୟସ୍ତ୍ଵା॒ ସ୍ଵାହା॑ ଦି॒ଵେ ତ୍ଵା॒ଽଂତରି॑କ୍ଷାୟ ତ୍ଵା ପୃଥି॒ଵ୍ୟୈ ତ୍ଵା᳚ ସ୍ଵ॒ଧା ପି॒ତୃଭ୍ୟ॒ ଊର୍ଗ୍ଭ॑ଵ ବର୍​ହି॒ଷଦ୍ଭ୍ୟ॑ ଊ॒ର୍ଜା ପୃ॑ଥି॒ଵୀଂ ଗ॑ଚ୍ଛତ॒ ଵିଷ୍ଣୋଃ॒ ସ୍ତୂପୋ॒ଽସ୍ୟୂର୍ଣା᳚ମ୍ରଦସଂ ତ୍ଵା ସ୍ତୃଣାମି ସ୍ଵାସ॒ସ୍ଥଂ ଦେ॒ଵେଭ୍ୟୋ॑ ଗଂଧ॒ର୍ଵୋ॑ଽସି ଵି॒ଶ୍ଵାଵ॑ସୁ॒-ର୍ଵିଶ୍ଵ॑ସ୍ମା॒ଦୀଷ॑ତୋ॒ ୟଜ॑ମାନସ୍ୟ ପରି॒ଧିରି॒ଡ ଈ॑ଡି॒ତ ଇଂଦ୍ର॑ସ୍ୟ ବା॒ହୁର॑ସି॒- [ବା॒ହୁର॑ସି, ଦକ୍ଷି॑ଣୋ॒] ॥ 19 ॥

ଦକ୍ଷି॑ଣୋ॒ ୟଜ॑ମାନସ୍ୟ ପରି॒ଧିରି॒ଡ ଈ॑ଡି॒ତୋ ମି॒ତ୍ରାଵରୁ॑ଣୌ ତ୍ଵୋତ୍ତର॒ତଃ ପରି॑ ଧତ୍ତାଂ ଧ୍ରୁ॒ଵେଣ॒ ଧର୍ମ॑ଣା॒ ୟଜ॑ମାନସ୍ୟ ପରି॒ଧିରି॒ଡ ଈ॑ଡି॒ତଃ ସୂର୍ୟ॑ସ୍ତ୍ଵା ପୁ॒ରସ୍ତା᳚ତ୍ ପାତୁ॒ କସ୍ୟା᳚ଶ୍ଚିଦ॒ଭିଶ॑ସ୍ତ୍ୟା ଵୀ॒ତିହୋ᳚ତ୍ରଂ ତ୍ଵା କଵେ ଦ୍ୟୁ॒ମଂତ॒ଗ୍-ମ୍॒ ସମି॑ଧୀମ॒ହ୍ୟଗ୍ନେ॑ ବୃ॒ହଂତ॑ମଦ୍ଧ୍ଵ॒ରେ ଵି॒ଶୋ ୟଂ॒ତ୍ରେ ସ୍ଥୋ॒ ଵସୂ॑ନାଗ୍-ମ୍ ରୁ॒ଦ୍ରାଣା॑-ମାଦି॒ତ୍ୟାନା॒ଗ୍-ମ୍॒ ସଦ॑ସି ସୀଦ ଜୁ॒ହୂରୁ॑ପ॒ଭୃ-ଦ୍ଧ୍ରୁ॒ଵାଽସି॑ ଘୃ॒ତାଚୀ॒ ନାମ୍ନା᳚ ପ୍ରି॒ୟେଣ॒ ନାମ୍ନା᳚ ପ୍ରି॒ୟେ ସଦ॑ସି ସୀଦୈ॒ତା ଅ॑ସଦଂଥ୍ ସୁକୃ॒ତସ୍ୟ॑ ଲୋ॒କେ ତା ଵି॑ଷ୍ଣୋ ପାହି ପା॒ହି ୟ॒ଜ୍ଞଂ ପା॒ହି ୟ॒ଜ୍ଞପ॑ତିଂ ପା॒ହି ମାଂ-ୟଁ॑ଜ୍ଞ॒ନିୟ᳚ମ୍ ॥ 20 ॥
(ବା॒ହୁର॑ସି - ପ୍ରି॒ୟେ ସଦ॑ସି॒ - ପଂଚ॑ଦଶ ଚ) (ଅ. 11)

ଭୁଵ॑ନମସି॒ ଵି ପ୍ର॑ଥ॒ସ୍ଵାଗ୍ନେ॒ ୟଷ୍ଟ॑ରି॒ଦଂ ନମଃ॑ ।
ଜୁହ୍ଵେହ୍ୟ॒ଗ୍ନିସ୍ତ୍ଵା᳚ ହ୍ଵୟତି ଦେଵୟ॒ଜ୍ୟାୟା॒ ଉପ॑ଭୃ॒ଦେହି॑ ଦେ॒ଵସ୍ତ୍ଵା॑ ସଵି॒ତା ହ୍ଵ॑ୟତି ଦେଵୟ॒ଜ୍ୟାୟା॒ ଅଗ୍ନା॑ଵିଷ୍ଣୂ॒ ମା ଵା॒ମଵ॑ କ୍ରମିଷଂ॒-ଵିଁ ଜି॑ହାଥାଂ॒ ମା ମା॒ ସଂ ତା᳚ପ୍ତଂ-ଲୋଁ॒କଂ ମେ॑ ଲୋକକୃତୌ କୃଣୁତଂ॒-ଵିଁଷ୍ଣୋଃ॒ ସ୍ଥାନ॑ମସୀ॒ତ ଇଂଦ୍ରୋ॑ ଅକୃଣୋ-ଦ୍ଵୀ॒ର୍ୟା॑ଣି ସମା॒ରଭ୍ୟୋ॒ର୍ଧ୍ଵୋ ଅ॑ଦ୍ଧ୍ଵ॒ରୋ ଦି॑ଵି॒ସ୍ପୃଶ॒ମହ୍ରୁ॑ତୋ ୟ॒ଜ୍ଞୋ ୟ॒ଜ୍ଞପ॑ତେ॒-ରିଂଦ୍ରା॑ଵାଂ॒ଥ୍ ସ୍ଵାହା॑ ବୃ॒ହଦ୍ଭାଃ ପା॒ହି ମା᳚ଽଗ୍ନେ॒ ଦୁଶ୍ଚ॑ରିତା॒ଦା ମା॒ ସୁଚ॑ରିତେ ଭଜ ମ॒ଖସ୍ୟ॒ ଶିରୋ॑ଽସି॒ ସଂଜ୍ୟୋତି॑ଷା॒ ଜ୍ୟୋତି॑ରଂକ୍ତାମ୍ ॥ 21 ॥
(ଅହ୍ରୁ॑ତ॒ - ଏକ॑ଵିଗ୍-ମ୍ଶତିଶ୍ଚ) (ଅ. 12)

ଵାଜ॑ସ୍ୟ ମା ପ୍ରସ॒ଵେନୋ᳚ଦ୍ଗ୍ରା॒ଭେଣୋଦ॑ଗ୍ରଭୀତ୍ । ଅଥା॑ ସ॒ପତ୍ନା॒ଗ୍-ମ୍॒ ଇଂଦ୍ରୋ॑ ମେ ନିଗ୍ରା॒ଭେଣାଧ॑ରାଗ୍-ମ୍ ଅକଃ ॥ ଉ॒ଦ୍ଗ୍ରା॒ଭଂ ଚ॑ ନିଗ୍ରା॒ଭଂ ଚ॒ ବ୍ରହ୍ମ॑ ଦେ॒ଵା ଅ॑ଵୀଵୃଧନ୍ନ୍ । ଅଥା॑ ସ॒ପତ୍ନା॑ନିଂଦ୍ରା॒ଗ୍ନୀ ମେ॑ ଵିଷୂ॒ଚୀନା॒ନ୍ ଵ୍ୟ॑ସ୍ୟତାମ୍ ॥ ଵସୁ॑ଭ୍ୟସ୍ତ୍ଵା ରୁ॒ଦ୍ରେଭ୍ୟ॑ସ୍ତ୍ଵାଽଽଦି॒ତ୍ୟେଭ୍ୟ॑ସ୍ତ୍ଵା॒ଽକ୍ତଗ୍-ମ୍ ରିହା॑ଣା ଵି॒ୟଂତୁ॒ ଵୟଃ॑ ॥ ପ୍ର॒ଜାଂ-ୟୋଁନିଂ॒ ମା ନିର୍ମୃ॑କ୍ଷ॒ମା ପ୍ୟା॑ୟଂତା॒ମାପ॒ ଓଷ॑ଧୟୋ ମ॒ରୁତାଂ॒ ପୃଷ॑ତୟଃ ସ୍ଥ॒ ଦିଵଂ॑- [ଦିଵ᳚ମ୍, ଗ॒ଚ୍ଛ॒ ତତୋ॑ ନୋ॒] ॥ 22 ॥

ଗଚ୍ଛ॒ ତତୋ॑ ନୋ॒ ଵୃଷ୍ଟି॒ମେର॑ୟ । ଆ॒ୟୁ॒ଷ୍ପା ଅ॑ଗ୍ନେ॒ଽସ୍ୟାୟୁ॑ର୍ମେ ପାହି ଚକ୍ଷୁ॒ଷ୍ପା ଅ॑ଗ୍ନେଽସି॒ ଚକ୍ଷୁ॑ର୍ମେ ପାହି ଧ୍ରୁ॒ଵାଽସି॒ ୟଂ ପ॑ରି॒ଧିଂ ପ॒ର୍ୟଧ॑ତ୍ଥା॒ ଅଗ୍ନେ॑ ଦେଵ ପ॒ଣିଭି॑-ର୍ଵୀ॒ୟମା॑ଣଃ । ତଂ ତ॑ ଏ॒ତମନୁ॒ ଜୋଷଂ॑ ଭରାମି॒ ନେଦେ॒ଷ ତ୍ଵଦ॑ପଚେ॒ତୟା॑ତୈ ୟ॒ଜ୍ଞସ୍ୟ॒ ପାଥ॒ ଉପ॒ ସମି॑ତଗ୍-ମ୍ ସଗ୍ଗ୍​ସ୍ରା॒ଵଭା॑ଗାଃ ସ୍ଥେ॒ଷା ବୃ॒ହଂତଃ॑ ପ୍ରସ୍ତରେ॒ଷ୍ଠା ବ॑ର୍​ହି॒ଷଦ॑ଶ୍ଚ [ ] ॥ 23 ॥

ଦେ॒ଵା ଇ॒ମାଂ-ଵାଁଚ॑ମ॒ଭି ଵିଶ୍ଵେ॑ ଗୃ॒ଣଂତ॑ ଆ॒ସଦ୍ୟା॒ସ୍ମିନ୍ ବ॒ର୍॒​ହିଷି॑ ମାଦୟଦ୍ଧ୍ଵମ॒ଗ୍ନେ-ର୍ଵା॒ମପ॑ନ୍ନଗୃହସ୍ୟ॒ ସଦ॑ସି ସାଦୟାମି ସୁଂ॒ନାୟ॑ ସୁଂନିନୀ ସୁଂ॒ନେ ମା॑ ଧତ୍ତଂ ଧୁ॒ରି ଧ॒ର୍ୟୌ॑ ପାତ॒ମଗ୍ନେ॑ ଽଦବ୍ଧାୟୋ ଽଶୀତତନୋ ପା॒ହି ମା॒ଽଦ୍ୟ ଦି॒ଵଃ ପା॒ହି ପ୍ରସି॑ତ୍ୟୈ ପା॒ହି ଦୁରି॑ଷ୍ଟ୍ୟୈ ପା॒ହି ଦୁ॑ରଦ୍ମ॒ନ୍ୟୈ ପା॒ହି ଦୁଶ୍ଚ॑ରିତା॒ଦଵି॑ଷଂ ନଃ ପି॒ତୁଂ କୃ॑ଣୁ ସୁ॒ଷଦା॒ ୟୋନି॒ଗ୍ଗ୍॒ ସ୍ଵାହା॒ ଦେଵା॑ ଗାତୁଵିଦୋ ଗା॒ତୁଂ​ଵିଁ॒ତ୍ତ୍ଵା ଗା॒ତୁ ମି॑ତ॒ ମନ॑ସସ୍ପତ ଇ॒ମଂ ନୋ॑ ଦେଵ ଦେ॒ଵେଷୁ॑ ୟ॒ଜ୍ଞଗ୍ଗ୍​ ସ୍ଵାହା॑ ଵା॒ଚି ସ୍ଵାହା॒ ଵାତେ॑ ଧାଃ ॥ 24 ॥
(ଦିଵଂ॑ - ଚ - ଵି॒ତ୍ତ୍ଵା ଗା॒ତୁଂ - ତ୍ରୟୋ॑ଦଶ ଚ) (ଅ. 13)

ଉ॒ଭା ଵା॑ମିଂଦ୍ରାଗ୍ନୀ ଆହୁ॒ଵଦ୍ଧ୍ୟା॑ ଉ॒ଭା ରାଧ॑ସଃ ସ॒ହ ମା॑ଦ॒ୟଦ୍ଧ୍ୟୈ᳚ । ଉ॒ଭା ଦା॒ତାରା॑ଵି॒ଷାଗ୍-ମ୍ ର॑ୟୀ॒ଣାମୁ॒ଭା ଵାଜ॑ସ୍ୟ ସା॒ତୟେ॑ ହୁଵେ ଵାମ୍ ॥ ଅଶ୍ର॑ଵ॒ଗ୍-ମ୍॒ ହି ଭୂ॑ରି॒ଦାଵ॑ତ୍ତରା ଵାଂ॒-ଵିଁଜା॑ମାତୁରୁ॒ତ ଵା॑ ଘା ସ୍ୟା॒ଲାତ୍ । ଅଥା॒ ସୋମ॑ସ୍ୟ॒ ପ୍ରୟ॑ତୀ ୟୁ॒ଵଭ୍ୟା॒ମିଂଦ୍ରା᳚ଗ୍ନୀ॒ ସ୍ତୋମଂ॑ ଜନୟାମି॒ ନଵ୍ୟ᳚ମ୍ ॥ ଇଂଦ୍ରା᳚ଗ୍ନୀ ନଵ॒ତିଂ ପୁରୋ॑ ଦା॒ସପ॑ତ୍ନୀରଧୂନୁତମ୍ । ସା॒କମେକେ॑ନ॒ କର୍ମ॑ଣା ॥ ଶୁଚିଂ॒ ନୁ ସ୍ତୋମଂ॒ ନଵ॑ଜାତ-ମ॒ଦ୍ୟେଂଦ୍ରା᳚ଗ୍ନୀ ଵୃତ୍ରହଣା ଜୁ॒ଷେଥା᳚ମ୍ ॥ 25 ॥

ଉ॒ଭା ହି ଵାଗ୍-ମ୍॑ ସୁ॒ହଵା॒ ଜୋହ॑ଵୀମି॒ ତା ଵାଜଗ୍-ମ୍॑ ସ॒ଦ୍ୟ ଉ॑ଶ॒ତେ ଧେଷ୍ଠା᳚ ॥ ଵ॒ୟମୁ॑ ତ୍ଵା ପଥସ୍ପତେ॒ ରଥଂ॒ ନ ଵାଜ॑ସାତୟେ । ଧି॒ୟେ ପୂ॑ଷନ୍ନୟୁଜ୍ମହି ॥ ପ॒ଥସ୍ପ॑ଥଃ॒ ପରି॑ପତିଂ-ଵଁଚ॒ସ୍ୟା କାମେ॑ନ କୃ॒ତୋ ଅ॒ଭ୍ୟା॑ନଡ॒ର୍କମ୍ । ସନୋ॑ ରାସଚ୍ଛୁ॒ରୁଧ॑ଶ୍ଚଂ॒ଦ୍ରାଗ୍ରା॒ ଧିୟଂ॑ଧିୟଗ୍-ମ୍ ସୀଷଧାତି॒ ପ୍ର ପୂ॒ଷା ॥ କ୍ଷେତ୍ର॑ସ୍ୟ॒ ପତି॑ନା ଵ॒ୟଗ୍-ମ୍ ହି॒ତେନେ॑ଵ ଜୟାମସି । ଗାମଶ୍ଵଂ॑ ପୋଷୟି॒ତ୍ନ୍ଵା ସ ନୋ॑ [ସ ନଃ॑, ମୃ॒ଡା॒ତୀ॒ଦୃଶେ᳚ ।] ॥ 26 ॥

ମୃଡାତୀ॒ଦୃଶେ᳚ ॥ କ୍ଷେତ୍ର॑ସ୍ୟ ପତେ॒ ମଧୁ॑ମଂତମୂ॒ର୍ମିଂ ଧେ॒ନୁରି॑ଵ॒ ପୟୋ॑ ଅ॒ସ୍ମାସୁ॑ ଧୁକ୍ଷ୍ଵ । ମ॒ଧୁ॒ଶ୍ଚୁତଂ॑ ଘୃ॒ତମି॑ଵ॒ ସୁପୂ॑ତମୃ॒ତସ୍ୟ॑ ନଃ॒ ପତ॑ୟୋ ମୃଡୟଂତୁ ॥ ଅଗ୍ନେ॒ ନୟ॑ ସୁ॒ପଥା॑ ରା॒ୟେ ଅ॒ସ୍ମାନ୍. ଵିଶ୍ଵା॑ନି ଦେଵ ଵ॒ୟୁନା॑ନି ଵି॒ଦ୍ଵାନ୍ । ୟୁ॒ୟୋ॒ଦ୍ଧ୍ୟ॑ସ୍ମଜ୍ଜୁ॑ହୁରା॒ଣମେନୋ॒ ଭୂୟି॑ଷ୍ଠାଂ ତେ॒ ନମ॑ଉକ୍ତିଂ-ଵିଁଧେମ ॥ ଆ ଦେ॒ଵାନା॒ମପି॒ ପଂଥା॑ମଗନ୍ମ॒ ୟଚ୍ଛ॒କ୍ନଵା॑ମ॒ ତଦନୁ॒ ପ୍ରଵୋ॑ଢୁମ୍ । ଅ॒ଗ୍ନି-ର୍ଵି॒ଦ୍ଵାଂଥ୍ ସ ୟ॑ଜା॒- [ସ ୟ॑ଜାତ୍, ସେଦୁ॒ ହୋତା॒ ସୋ] ॥ 27 ॥

ଥ୍ସେଦୁ॒ ହୋତା॒ ସୋ ଅ॑ଦ୍ଧ୍ଵ॒ରାଂଥ୍ ସ ଋ॒ତୂନ୍ କ॑ଲ୍ପୟାତି ॥ୟଦ୍ଵାହି॑ଷ୍ଠଂ॒ ତଦ॒ଗ୍ନୟେ॑ ବୃ॒ହଦ॑ର୍ଚ ଵିଭାଵସୋ । ମହି॑ଷୀଵ॒ ତ୍ଵଦ୍ର॒ୟିସ୍ତ୍ଵଦ୍ଵାଜା॒ ଉଦୀ॑ରତେ ॥ ଅଗ୍ନେ॒ ତ୍ଵଂ ପା॑ରୟା॒ ନଵ୍ୟୋ॑ ଅ॒ସ୍ମାଂଥ୍ ସ୍ଵ॒ସ୍ତିଭି॒ରତି॑ ଦୁ॒ର୍ଗାଣି॒ ଵିଶ୍ଵା᳚ । ପୂଶ୍ଚ॑ ପୃ॒ଥ୍ଵୀ ବ॑ହୁ॒ଲା ନ॑ ଉ॒ର୍ଵୀ ଭଵା॑ ତୋ॒କାୟ॒ ତନ॑ୟାୟ॒ ଶଂ-ୟୋଃ ଁ॥ ତ୍ଵମ॑ଗ୍ନେ ଵ୍ରତ॒ପା ଅ॑ସି ଦେ॒ଵ ଆ ମର୍ତ୍ୟେ॒ଷ୍ଵା । ତ୍ଵଂ-ୟଁ॒ଜ୍ଞେଷ୍ଵୀଡ୍ୟଃ॑ ॥ ୟଦ୍ଵୋ॑ ଵ॒ୟଂ ପ୍ର॑ମି॒ନାମ॑ ଵ୍ର॒ତାନି॑ ଵି॒ଦୁଷାଂ᳚ ଦେଵା॒ ଅଵି॑ଦୁଷ୍ଟରାସଃ । ଅ॒ଗ୍ନିଷ୍ଟ-ଦ୍ଵିଶ୍ଵ॒ମା ପୃ॑ଣାତି ଵି॒ଦ୍ଵାନ୍. ୟେଭି॑-ର୍ଦେ॒ଵାଗ୍-ମ୍ ଋ॒ତୁଭିଃ॑ କ॒ଲ୍ପୟା॑ତି ॥ 28 ॥
(ଜୁ॒ଷେଥା॒ମା - ସ ନୋ॑ - ୟଜା॒ - ଦା - ତ୍ରୟୋ॑ଵିଗ୍-ମ୍ଶତିଶ୍ଚ) (ଅ. 14)

(ଇ॒ଷେ ତ୍ଵା॑ - ୟ॒ଜ୍ଞସ୍ୟ॒ - ଶୁଂଧ॑ଧ୍ଵଂ॒ - କର୍ମ॑ଣେ ଵାଂ - ଦେ॒ଵୋ-ଽଵ॑ଧୂତଂ॒ - ଧୁଷ୍ଟିଃ॒ - ସଂ-ଵଁ॑ପା॒- ମ୍ୟା ଦ॑ଦେ॒ - ପ୍ରତ୍ୟୁ॑ଷ୍ଟଂ॒ - କୃଷ୍ଣୋ॑ଽସି॒ - ଭୁଵ॑ନମସି॒ - ଵାଜ॑ସ୍ୟୋ॒ଭା ଵାଂ॒ - ଚତୁ॑ର୍ଦଶ )

(ଇ॒ଷେ - ଦୃଗ୍-ମ୍॑ହ॒ - ଭୁଵ॑ନ - ମ॒ଷ୍ଟାଵିଗ୍-ମ୍॑ଶତିଃ )

(ଇ॒ଷେ ତ୍ଵା॑, କ॒ଲ୍ପୟା॑ତି)

॥ ହରିଃ॑ ଓମ୍ ॥

॥ କୃଷ୍ଣ ୟଜୁର୍ଵେଦୀୟ ତୈତ୍ତିରୀୟ ସଂହିତାୟାଂ ପ୍ରଥମକାଂଡେ ପ୍ରଥମଃ ପ୍ରଶ୍ନଃ ସମାପ୍ତଃ ॥