ಅನನ್ತಸಂಸಾರ-ಸಮುದ್ರತಾರ-
ನೌಕಾಯಿತಾಭ್ಯಾಂ ಗುರುಭಕ್ತಿದಾಭ್ಯಾಮ್ ।
ವೈರಾಗ್ಯಸಾಮ್ರಾಜ್ಯದ-ಪೂಜನಾಭ್ಯಾಂ
ನಮೋ ನಮಃ ಶ್ರೀಗುರುಪಾದುಕಾಭ್ಯಾಮ್ ॥ 1 ॥
ಕವಿತ್ವವಾರಾಶಿ-ನಿಶಾಕರಾಭ್ಯಾಂ
ದೌರ್ಭಾಗ್ಯ-ದಾವಾಮ್ಬುದ-ಮಾಲಿಕಾಭ್ಯಾಮ್ ।
ದೂರೀಕೃತಾನಮ್ರ-ವಿಪತ್ತಿತಾಭ್ಯಾಂ
ನಮೋ ನಮಃ ಶ್ರೀಗುರುಪಾದುಕಾಭ್ಯಾಮ್ ॥ 2 ॥
ನತಾ ಯಯೋಃ ಶ್ರೀಪತಿತಾಂ ಸಮೀಯುಃ
ಕದಾಚಿದಪ್ಯಾಶು ದರಿದ್ರವರ್ಯಾಃ ।
ಮೂಕಾಶ್ಚ ವಾಚಸ್ಪತಿತಾಂ ಹಿ ತಾಭ್ಯಾಂ
ನಮೋ ನಮಃ ಶ್ರೀಗುರುಪಾದುಕಾಭ್ಯಾಮ್ ॥ 3 ॥
ನಾಲೀಕನೀಕಾಶ-ಪದಾಹೃತಾಭ್ಯಾಂ
ನಾನಾವಿಮೋಹಾದಿ-ನಿವಾರಿಕಾಭ್ಯಾಮ್ ।
ನಮಜ್ಜನಾಭೀಷ್ಟ-ತತಿಪ್ರದಾಭ್ಯಾಂ
ನಮೋ ನಮಃ ಶ್ರೀಗುರುಪಾದುಕಾಭ್ಯಾಮ್ ॥ 4 ॥
ನೃಪಾಲಿಮೌಲಿ-ವ್ರಜರತ್ನಕಾನ್ತಿ-
ಸರಿದ್ವಿರಾಜಜ್ಝಷ-ಕನ್ಯಕಾಭ್ಯಾಮ್ ।
ನೃಪತ್ವದಾಭ್ಯಾಂ ನತಲೋಕಪಙ್ಕ್ತೇಃ
ನಮೋ ನಮಃ ಶ್ರೀಗುರುಪಾದುಕಾಭ್ಯಾಮ್ ॥ 5 ॥
ಪಾಪಾನ್ಧಕಾರಾರ್ಕ-ಪರಮ್ಪರಾಭ್ಯಾಂ
ತಾಪತ್ರಯಾಹೀನ್ದ್ರ-ಖಗೇಶ್ವರಾಭ್ಯಾಮ್ ।
ಜಾಡ್ಯಾಬ್ಧಿ-ಸಂಶೋಷಣ-ವಾಡವಾಭ್ಯಾಮ್
ನಮೋ ನಮಃ ಶ್ರೀಗುರುಪಾದುಕಾಭ್ಯಾಮ್ ॥ 6 ॥
ಶಮಾದಿಷಟ್ಕಪ್ರದ-ವೈಭವಾಭ್ಯಾಂ
ಸಮಾಧಿದಾನ-ವ್ರತದೀಕ್ಷಿತಾಭ್ಯಾಮ್ ।
ರಮಾಧವಾಙ್ಘ್ರಿ-ಸ್ಥಿರಭಕ್ತಿದಾಭ್ಯಾಂ
ನಮೋ ನಮಃ ಶ್ರೀಗುರುಪಾದುಕಾಭ್ಯಾಮ್ ॥ 7 ॥
ಸ್ವಾರ್ಚಾಪರಾಣಾ-ಮಖಿಲೇಷ್ಟದಾಭ್ಯಾಂ
ಸ್ವಾಹಾಸಹಾಯಾಕ್ಷ-ಧುರನ್ಧರಾಭ್ಯಾಮ್ ।
ಸ್ವಾನ್ತಾಚ್ಛಭಾವ-ಪ್ರದಪೂಜನಾಭ್ಯಾಂ
ನಮೋ ನಮಃ ಶ್ರೀಗುರುಪಾದುಕಾಭ್ಯಾಮ್ ॥ 8 ॥
ಕಾಮಾದಿಸರ್ಪ-ವ್ರಜಗಾರುಡಾಭ್ಯಾಂ
ವಿವೇಕವೈರಾಗ್ಯ-ನಿಧಿಪ್ರದಾಭ್ಯಾಮ್ ।
ಬೋಧಪ್ರದಾಭ್ಯಾಂ ದ್ರುತಮೋಕ್ಷದಾಭ್ಯಾಂ
ನಮೋ ನಮಃ ಶ್ರೀಗುರುಪಾದುಕಾಭ್ಯಾಮ್ ॥ 9 ॥
