ಧ್ಯಾನಂ
ವ್ಯಾಖ್ಯಾರುದ್ರಾಕ್ಷಮಾಲೇ ಕಲಶಸುರಭಿತೇ ಬಾಹುಭಿರ್ವಾಮಪಾದಂ
ಬಿಭ್ರಾಣೋ ಜಾನುಮೂರ್ಧ್ನಾ ವಟತರುನಿವೃತಾವಸ್ಯಧೋ ವಿದ್ಯಮಾನಃ ।
ಸೌವರ್ಣೇ ಯೋಗಪೀಠೇ ಲಿಪಿಮಯಕಮಲೇ ಸೂಪವಿಷ್ಟಸ್ತ್ರಿಣೇತ್ರಃ
ಕ್ಷೀರಾಭಶ್ಚನ್ದ್ರಮೌಳಿರ್ವಿತರತು ನಿತರಾಂ ಶುದ್ಧಬುದ್ಧಿಂ ಶಿವೋ ನಃ ॥
ಸ್ತೋತ್ರಂ
ವಿದ್ಯಾರೂಪೀ ಮಹಾಯೋಗೀ ಶುದ್ಧಜ್ಞಾನೀ ಪಿನಾಕಧೃತ್ ।
ರತ್ನಾಲಙ್ಕೃತಸರ್ವಾಙ್ಗೋ ರತ್ನಮಾಲೀ ಜಟಾಧರಃ ॥ 1 ॥
ಗಙ್ಗಾಧಾರ್ಯಚಲಾವಾಸೀ ಸರ್ವಜ್ಞಾನೀ ಸಮಾಧಿಧೃತ್ ।
ಅಪ್ರಮೇಯೋ ಯೋಗನಿಧಿಸ್ತಾರಕೋ ಭಕ್ತವತ್ಸಲಃ ॥ 2 ॥
ಬ್ರಹ್ಮರೂಪೀ ಜಗದ್ವ್ಯಾಪೀ ವಿಷ್ಣುಮೂರ್ತಿಃ ಪುರಾನ್ತಕಃ ।
ಉಕ್ಷವಾಹಶ್ಚರ್ಮವಾಸಾಃ ಪೀತಾಮ್ಬರವಿಭೂಷಣಃ ॥ 3 ॥
ಮೋಕ್ಷಸಿದ್ಧಿರ್ಮೋಕ್ಷದಾಯೀ ದಾನವಾರಿರ್ಜಗತ್ಪತಿಃ ।
ವಿದ್ಯಾಧಾರೀ ಶುಕ್ಲತನುಃ ವಿದ್ಯಾದಾಯೀ ಗಣಾಧಿಪಃ ॥ 4 ॥
ಪಾಪಾಪಸ್ಮೃತಿಸಂಹರ್ತಾ ಶಶಿಮೌಳಿರ್ಮಹಾಸ್ವನಃ ।
ಸಾಮಪ್ರಿಯಃ ಸ್ವಯಂ ಸಾಧುಃ ಸರ್ವದೇವೈರ್ನಮಸ್ಕೃತಃ ॥ 5 ॥
ಹಸ್ತವಹ್ನಿಧರಃ ಶ್ರೀಮಾನ್ ಮೃಗಧಾರೀ ಚ ಶಙ್ಕರಃ ।
ಯಜ್ಞನಾಥಃ ಕ್ರತುಧ್ವಂಸೀ ಯಜ್ಞಭೋಕ್ತಾ ಯಮಾನ್ತಕಃ ॥ 6 ॥
ಭಕ್ತಾನುಗ್ರಹಮೂರ್ತಿಶ್ಚ ಭಕ್ತಸೇವ್ಯೋ ವೃಷಧ್ವಜಃ ।
ಭಸ್ಮೋದ್ಧೂಳಿತಸರ್ವಾಙ್ಗೋಽಪ್ಯಕ್ಷಮಾಲಾಧರೋ ಮಹಾನ್ ॥ 7 ॥
ತ್ರಯೀಮೂರ್ತಿಃ ಪರಂ ಬ್ರಹ್ಮ ನಾಗರಾಜೈರಲಙ್ಕೃತಃ ।
ಶಾನ್ತರೂಪೋ ಮಹಾಜ್ಞಾನೀ ಸರ್ವಲೋಕವಿಭೂಷಣಃ ॥ 8 ॥
ಅರ್ಧನಾರೀಶ್ವರೋ ದೇವೋ ಮುನಿಸೇವ್ಯಃ ಸುರೋತ್ತಮಃ ।
ವ್ಯಾಖ್ಯಾನದೇವೋ ಭಗವಾನ್ ಅಗ್ನಿಚನ್ದ್ರಾರ್ಕಲೋಚನಃ ॥ 9 ॥
ಜಗತ್ಸ್ರಷ್ಟಾ ಜಗದ್ಗೋಪ್ತಾ ಜಗದ್ಧ್ವಂಸೀ ತ್ರಿಲೋಚನಃ ।
ಜಗದ್ಗುರುರ್ಮಹಾದೇವೋ ಮಹಾನನ್ದಪರಾಯಣಃ ॥ 10 ॥
ಜಟಾಧಾರೀ ಮಹಾವೀರೋ ಜ್ಞಾನದೇವೈರಲಙ್ಕೃತಃ ।
ವ್ಯೋಮಗಙ್ಗಾಜಲಸ್ನಾತಾ ಸಿದ್ಧಸಙ್ಘಸಮರ್ಚಿತಃ ॥ 11 ॥
ತತ್ತ್ವಮೂರ್ತಿರ್ಮಹಾಯೋಗೀ ಮಹಾಸಾರಸ್ವತಪ್ರದಃ ।
ವ್ಯೋಮಮೂರ್ತಿಶ್ಚ ಭಕ್ತಾನಾಮಿಷ್ಟಕಾಮಫಲಪ್ರದಃ ॥ 12 ॥
ವೀರಮೂರ್ತಿರ್ವಿರೂಪೀ ಚ ತೇಜೋಮೂರ್ತಿರನಾಮಯಃ ।
ವೇದವೇದಾಙ್ಗತತ್ತ್ವಜ್ಞಶ್ಚತುಷ್ಷಷ್ಟಿಕಳಾನಿಧಿಃ ॥ 13 ॥
ಭವರೋಗಭಯಧ್ವಂಸೀ ಭಕ್ತಾನಾಮಭಯಪ್ರದಃ ।
ನೀಲಗ್ರೀವೋ ಲಲಾಟಾಕ್ಷೋ ಗಜಚರ್ಮಾ ಚ ಜ್ಞಾನದಃ ॥ 14 ॥
ಅರೋಗೀ ಕಾಮದಹನಸ್ತಪಸ್ವೀ ವಿಷ್ಣುವಲ್ಲಭಃ ।
ಬ್ರಹ್ಮಚಾರೀ ಚ ಸನ್ನ್ಯಾಸೀ ಗೃಹಸ್ಥಾಶ್ರಮಕಾರಣಃ ॥ 15 ॥
ದಾನ್ತಶಮವತಾಂ ಶ್ರೇಷ್ಠಃ ಸತ್ತ್ವರೂಪದಯಾನಿಧಿಃ ।
ಯೋಗಪಟ್ಟಾಭಿರಾಮಶ್ಚ ವೀಣಾಧಾರೀ ವಿಚೇತನಃ ॥ 16 ॥
ಮನ್ತ್ರಪ್ರಜ್ಞಾನುಗಾಚಾರೋ ಮುದ್ರಾಪುಸ್ತಕಧಾರಕಃ ।
ರಾಗಹಿಕ್ಕಾದಿರೋಗಾಣಾಂ ವಿನಿಹನ್ತಾ ಸುರೇಶ್ವರಃ ॥ 17 ॥
ಇತಿ ಶ್ರೀ ದಕ್ಷಿಣಾಮೂರ್ತ್ಯಷ್ಟೋತ್ತರಶತನಾಮ ಸ್ತೋತ್ರಮ್ ॥
