(𑌤𑍈.𑌆.𑍯.1.1)

𑌓𑌂 𑌸॒𑌹 𑌨𑌾॑𑌵𑌵𑌤𑍁 । 𑌸॒𑌹 𑌨𑍌॑ 𑌭𑍁𑌨𑌕𑍍𑌤𑍁 । 𑌸॒𑌹 𑌵𑍀॒𑌰𑍍𑌯॑-𑌙𑍍𑌕𑌰𑌵𑌾𑌵𑌹𑍈 । 𑌤𑍇॒𑌜॒𑌸𑍍𑌵𑌿𑌨𑌾॒𑌵𑌧𑍀॑𑌤𑌮𑌸𑍍𑌤𑍁॒ 𑌮𑌾 𑌵𑌿॑𑌦𑍍𑌵𑌿𑌷𑌾॒𑌵𑌹𑍈᳚ । 𑌓𑌂 𑌶𑌾𑌨𑍍𑌤𑌿॒-𑌶𑍍𑌶𑌾𑌨𑍍𑌤𑌿॒-𑌶𑍍𑌶𑌾𑌨𑍍𑌤𑌿𑌃॑ ॥

𑌭𑍃𑌗𑍁॒𑌰𑍍𑌵𑍈 𑌵𑌾॑𑌰𑍁॒𑌣𑌿𑌃 । 𑌵𑌰𑍁॑𑌣॒-𑌮𑍍𑌪𑌿𑌤॑𑌰॒𑌮𑍁𑌪॑𑌸𑌸𑌾𑌰 । 𑌅𑌧𑍀॑𑌹𑌿 𑌭𑌗𑌵𑍋॒ 𑌬𑍍𑌰𑌹𑍍𑌮𑍇𑌤𑌿॑ । 𑌤𑌸𑍍𑌮𑌾॑ 𑌏॒𑌤𑌤𑍍𑌪𑍍𑌰𑍋॑𑌵𑌾𑌚 । 𑌅𑌨𑍍𑌨॑-𑌮𑍍𑌪𑍍𑌰𑌾॒𑌣-𑌞𑍍𑌚𑌕𑍍𑌷𑍁॒𑌶𑍍𑌶𑍍𑌰𑍋𑌤𑍍𑌰॒-𑌮𑍍𑌮𑌨𑍋॒ 𑌵𑌾𑌚॒𑌮𑌿𑌤𑌿॑ । 𑌤𑌗𑍍​𑌮𑍍 𑌹𑍋॑𑌵𑌾𑌚 । 𑌯𑌤𑍋॒ 𑌵𑌾 𑌇॒𑌮𑌾𑌨𑌿॒ 𑌭𑍂𑌤𑌾॑𑌨𑌿॒ 𑌜𑌾𑌯॑𑌨𑍍𑌤𑍇 । 𑌯𑍇𑌨॒ 𑌜𑌾𑌤𑌾॑𑌨𑌿॒ 𑌜𑍀𑌵॑𑌨𑍍𑌤𑌿 । 𑌯𑌤𑍍𑌪𑍍𑌰𑌯॑𑌨𑍍𑌤𑍍𑌯॒𑌭𑌿𑌸𑌂​𑌵𑌿𑌁॑𑌶𑌨𑍍𑌤𑌿 । 𑌤𑌦𑍍𑌵𑌿𑌜𑌿॑𑌜𑍍𑌞𑌾𑌸𑌸𑍍𑌵 । 𑌤𑌦𑍍𑌬𑍍𑌰𑌹𑍍𑌮𑍇𑌤𑌿॑ । 𑌸 𑌤𑌪𑍋॑-𑌽𑌤𑌪𑍍𑌯𑌤 । 𑌸 𑌤𑌪॑𑌸𑍍𑌤॒𑌪𑍍𑌤𑍍𑌵𑌾 ॥ 1 ॥
𑌇𑌤𑌿 𑌪𑍍𑌰𑌥𑌮𑍋-𑌽𑌨𑍁𑌵𑌾𑌕𑌃 ॥

𑌅𑌨𑍍𑌨॒-𑌮𑍍𑌬𑍍𑌰𑌹𑍍𑌮𑍇𑌤𑌿॒ 𑌵𑍍𑌯॑𑌜𑌾𑌨𑌾𑌤𑍍 । 𑌅॒𑌨𑍍𑌨𑌾𑌦𑍍𑌧𑍍𑌯𑍇॑𑌵 𑌖𑌲𑍍𑌵𑌿॒𑌮𑌾𑌨𑌿॒ 𑌭𑍁𑌤𑌾॑𑌨𑌿॒ 𑌜𑌾𑌯॑𑌨𑍍𑌤𑍇 । 𑌅𑌨𑍍𑌨𑍇॑𑌨॒ 𑌜𑌾𑌤𑌾॑𑌨𑌿॒ 𑌜𑍀𑌵॑𑌨𑍍𑌤𑌿 । 𑌅𑌨𑍍𑌨॒-𑌮𑍍𑌪𑍍𑌰𑌯॑𑌨𑍍𑌤𑍍𑌯॒𑌭𑌿𑌸𑌂​𑌵𑌿𑌁॑𑌶॒𑌨𑍍𑌤𑍀𑌤𑌿॑ । 𑌤𑌦𑍍𑌵𑌿॒𑌜𑍍𑌞𑌾𑌯॑ । 𑌪𑍁𑌨॑𑌰𑍇॒𑌵 𑌵𑌰𑍁॑𑌣॒-𑌮𑍍𑌪𑌿𑌤॑𑌰॒𑌮𑍁𑌪॑𑌸𑌸𑌾𑌰 । 𑌅𑌧𑍀॑𑌹𑌿 𑌭𑌗𑌵𑍋॒ 𑌬𑍍𑌰𑌹𑍍𑌮𑍇𑌤𑌿॑ । 𑌤𑌗𑍍​𑌮𑍍 𑌹𑍋॑𑌵𑌾𑌚 । 𑌤𑌪॑𑌸𑌾॒ 𑌬𑍍𑌰𑌹𑍍𑌮॒ 𑌵𑌿𑌜𑌿॑𑌜𑍍𑌞𑌾𑌸𑌸𑍍𑌵 । 𑌤𑌪𑍋॒ 𑌬𑍍𑌰𑌹𑍍𑌮𑍇𑌤𑌿॑ । 𑌸 𑌤𑌪𑍋॑-𑌽𑌤𑌪𑍍𑌯𑌤 । 𑌸 𑌤𑌪॑𑌸𑍍𑌤॒𑌪𑍍𑌤𑍍𑌵𑌾 ॥ 1 ॥
𑌇𑌤𑌿 𑌦𑍍𑌵𑌿𑌤𑍀𑌯𑍋-𑌽𑌨𑍁𑌵𑌾𑌕𑌃 ॥

𑌪𑍍𑌰𑌾॒𑌣𑍋 𑌬𑍍𑌰॒𑌹𑍍𑌮𑍇𑌤𑌿॒ 𑌵𑍍𑌯॑𑌜𑌾𑌨𑌾𑌤𑍍 । 𑌪𑍍𑌰𑌾॒𑌣𑌾𑌦𑍍𑌧𑍍𑌯𑍇॑𑌵 𑌖𑌲𑍍𑌵𑌿॒𑌮𑌾𑌨𑌿॒ 𑌭𑍂𑌤𑌾॑𑌨𑌿॒ 𑌜𑌾𑌯॑𑌨𑍍𑌤𑍇 । 𑌪𑍍𑌰𑌾॒𑌣𑍇𑌨॒ 𑌜𑌾𑌤𑌾॑𑌨𑌿॒ 𑌜𑍀𑌵॑𑌨𑍍𑌤𑌿 । 𑌪𑍍𑌰𑌾॒𑌣-𑌮𑍍𑌪𑍍𑌰𑌯॑𑌨𑍍𑌤𑍍𑌯॒𑌭𑌿𑌸𑌂​𑌵𑌿𑌁॑𑌶॒𑌨𑍍𑌤𑍀𑌤𑌿॑ । 𑌤𑌦𑍍𑌵𑌿॒𑌜𑍍𑌞𑌾𑌯॑ । 𑌪𑍁𑌨॑𑌰𑍇॒𑌵 𑌵𑌰𑍁॑𑌣॒-𑌮𑍍𑌪𑌿𑌤॑𑌰॒𑌮𑍁𑌪॑𑌸𑌸𑌾𑌰 । 𑌅𑌧𑍀॑𑌹𑌿 𑌭𑌗𑌵𑍋॒ 𑌬𑍍𑌰𑌹𑍍𑌮𑍇𑌤𑌿॑ । 𑌤𑌗𑍍​𑌮𑍍 𑌹𑍋॑𑌵𑌾𑌚 । 𑌤𑌪॑𑌸𑌾॒ 𑌬𑍍𑌰𑌹𑍍𑌮॒ 𑌵𑌿𑌜𑌿॑𑌜𑍍𑌞𑌾𑌸𑌸𑍍𑌵 । 𑌤𑌪𑍋॒ 𑌬𑍍𑌰𑌹𑍍𑌮𑍇𑌤𑌿॑ । 𑌸 𑌤𑌪𑍋॑-𑌽𑌤𑌪𑍍𑌯𑌤 । 𑌸 𑌤𑌪॑𑌸𑍍𑌤॒𑌪𑍍𑌤𑍍𑌵𑌾 ॥ 1 ॥
𑌇𑌤𑌿 𑌤𑍃𑌤𑍀𑌯𑍋-𑌽𑌨𑍁𑌵𑌾𑌕𑌃 ॥

𑌮𑌨𑍋॒ 𑌬𑍍𑌰𑌹𑍍𑌮𑍇𑌤𑌿॒ 𑌵𑍍𑌯॑𑌜𑌾𑌨𑌾𑌤𑍍 । 𑌮𑌨॑𑌸𑍋॒ 𑌹𑍍𑌯𑍇॑𑌵 𑌖𑌲𑍍𑌵𑌿॒𑌮𑌾𑌨𑌿॒ 𑌭𑍂𑌤𑌾॑𑌨𑌿॒ 𑌜𑌾𑌯॑𑌨𑍍𑌤𑍇 । 𑌮𑌨॑𑌸𑌾॒ 𑌜𑌾𑌤𑌾॑𑌨𑌿॒ 𑌜𑍀𑌵॑𑌨𑍍𑌤𑌿 । 𑌮𑌨𑌃॒ 𑌪𑍍𑌰𑌯॑𑌨𑍍𑌤𑍍𑌯॒𑌭𑌿𑌸𑌂​𑌵𑌿𑌁॑𑌶॒𑌨𑍍𑌤𑍀𑌤𑌿॑ । 𑌤𑌦𑍍𑌵𑌿॒𑌜𑍍𑌞𑌾𑌯॑ । 𑌪𑍁𑌨॑𑌰𑍇॒𑌵 𑌵𑌰𑍁॑𑌣॒-𑌮𑍍𑌪𑌿𑌤॑𑌰॒𑌮𑍁𑌪॑𑌸𑌸𑌾𑌰 । 𑌅𑌧𑍀॑𑌹𑌿 𑌭𑌗𑌵𑍋॒ 𑌬𑍍𑌰𑌹𑍍𑌮𑍇𑌤𑌿॑ । 𑌤𑌗𑍍​𑌮𑍍 𑌹𑍋॑𑌵𑌾𑌚 । 𑌤𑌪॑𑌸𑌾॒ 𑌬𑍍𑌰𑌹𑍍𑌮॒ 𑌵𑌿𑌜𑌿॑𑌜𑍍𑌞𑌾𑌸𑌸𑍍𑌵 । 𑌤𑌪𑍋॒ 𑌬𑍍𑌰𑌹𑍍𑌮𑍇𑌤𑌿॑ । 𑌸 𑌤𑌪𑍋॑-𑌽𑌤𑌪𑍍𑌯𑌤 । 𑌸 𑌤𑌪॑𑌸𑍍𑌤॒𑌪𑍍𑌤𑍍𑌵𑌾 ॥ 1 ॥
𑌇𑌤𑌿 𑌚𑌤𑍁𑌰𑍍𑌥𑍋-𑌽𑌨𑍁𑌵𑌾𑌕𑌃 ॥

𑌵𑌿॒𑌜𑍍𑌞𑌾𑌨॒-𑌮𑍍𑌬𑍍𑌰𑌹𑍍𑌮𑍇𑌤𑌿॒ 𑌵𑍍𑌯॑𑌜𑌾𑌨𑌾𑌤𑍍 । 𑌵𑌿॒𑌜𑍍𑌞𑌾𑌨𑌾॒𑌦𑍍𑌧𑍍𑌯𑍇॑𑌵 𑌖𑌲𑍍𑌵𑌿॒𑌮𑌾𑌨𑌿॒ 𑌭𑍂𑌤𑌾॑𑌨𑌿॒ 𑌜𑌾𑌯॑𑌨𑍍𑌤𑍇 । 𑌵𑌿॒𑌜𑍍𑌞𑌾𑌨𑍇॑𑌨॒ 𑌜𑌾𑌤𑌾॑𑌨𑌿॒ 𑌜𑍀𑌵॑𑌨𑍍𑌤𑌿 । 𑌵𑌿॒𑌜𑍍𑌞𑌾𑌨॒-𑌮𑍍𑌪𑍍𑌰𑌯॑𑌨𑍍𑌤𑍍𑌯॒𑌭𑌿𑌸𑌂​𑌵𑌿𑌁॑𑌶॒𑌨𑍍𑌤𑍀𑌤𑌿॑ । 𑌤𑌦𑍍𑌵𑌿॒𑌜𑍍𑌞𑌾𑌯॑ । 𑌪𑍁𑌨॑𑌰𑍇॒𑌵 𑌵𑌰𑍁॑𑌣॒-𑌮𑍍𑌪𑌿𑌤॑𑌰॒𑌮𑍁𑌪॑𑌸𑌸𑌾𑌰 । 𑌅𑌧𑍀॑𑌹𑌿 𑌭𑌗𑌵𑍋॒ 𑌬𑍍𑌰𑌹𑍍𑌮𑍇𑌤𑌿॑ । 𑌤𑌗𑍍​𑌮𑍍 𑌹𑍋॑𑌵𑌾𑌚 । 𑌤𑌪॑𑌸𑌾॒ 𑌬𑍍𑌰𑌹𑍍𑌮॒ 𑌵𑌿𑌜𑌿॑𑌜𑍍𑌞𑌾𑌸𑌸𑍍𑌵 । 𑌤𑌪𑍋॒ 𑌬𑍍𑌰𑌹𑍍𑌮𑍇𑌤𑌿॑ । 𑌸 𑌤𑌪𑍋॑-𑌽𑌤𑌪𑍍𑌯𑌤 । 𑌸 𑌤𑌪॑𑌸𑍍𑌤॒𑌪𑍍𑌤𑍍𑌵𑌾 ॥ 1 ॥
𑌇𑌤𑌿 𑌪𑌞𑍍𑌚𑌮𑍋-𑌽𑌨𑍁𑌵𑌾𑌕𑌃 ॥

𑌆॒𑌨॒𑌨𑍍𑌦𑍋 𑌬𑍍𑌰॒𑌹𑍍𑌮𑍇𑌤𑌿॒ 𑌵𑍍𑌯॑𑌜𑌾𑌨𑌾𑌤𑍍 । 𑌆॒𑌨𑌨𑍍𑌦𑌾॒𑌦𑍍𑌧𑍍𑌯𑍇॑𑌵 𑌖𑌲𑍍𑌵𑌿॒𑌮𑌾𑌨𑌿॒ 𑌭𑍂𑌤𑌾॑𑌨𑌿॒ 𑌜𑌾𑌯॑𑌨𑍍𑌤𑍇 । 𑌆॒𑌨॒𑌨𑍍𑌦𑍇𑌨॒ 𑌜𑌾𑌤𑌾॑𑌨𑌿॒ 𑌜𑍀𑌵॑𑌨𑍍𑌤𑌿 । 𑌆॒𑌨॒𑌨𑍍𑌦-𑌮𑍍𑌪𑍍𑌰𑌯॑𑌨𑍍𑌤𑍍𑌯॒𑌭𑌿𑌸𑌂​𑌵𑌿𑌁॑𑌶॒𑌨𑍍𑌤𑍀𑌤𑌿॑ । 𑌸𑍈𑌷𑌾 𑌭𑌾᳚𑌰𑍍𑌗॒𑌵𑍀 𑌵𑌾॑𑌰𑍁॒𑌣𑍀 𑌵𑌿॒𑌦𑍍𑌯𑌾 । 𑌪॒𑌰॒𑌮𑍇 𑌵𑍍𑌯𑍋॑𑌮॒𑌨𑍍𑌪𑍍𑌰𑌤𑌿॑𑌷𑍍𑌠𑌿𑌤𑌾 । 𑌸 𑌯 𑌏॒𑌵𑌂-𑌵𑍇𑌁𑌦॒ 𑌪𑍍𑌰𑌤𑌿॑𑌤𑌿𑌷𑍍𑌠𑌤𑌿 । 𑌅𑌨𑍍𑌨॑𑌵𑌾𑌨𑌨𑍍𑌨𑌾॒𑌦𑍋 𑌭॑𑌵𑌤𑌿 । 𑌮॒𑌹𑌾𑌨𑍍𑌭॑𑌵𑌤𑌿 𑌪𑍍𑌰॒𑌜𑌯𑌾॑ 𑌪॒𑌶𑍁𑌭𑌿॑𑌰𑍍𑌬𑍍𑌰𑌹𑍍𑌮𑌵𑌰𑍍𑌚॒𑌸𑍇𑌨॑ । 𑌮॒𑌹𑌾𑌨𑍍𑌕𑍀॒𑌰𑍍𑌤𑍍𑌯𑌾 ॥ 1 ॥
𑌇𑌤𑌿 𑌷𑌷𑍍𑌠𑍋-𑌽𑌨𑍁𑌵𑌾𑌕𑌃 ॥

𑌅𑌨𑍍𑌨॒-𑌨𑍍𑌨 𑌨𑌿॑𑌨𑍍𑌦𑍍𑌯𑌾𑌤𑍍 । 𑌤𑌦𑍍𑌵𑍍𑌰॒𑌤𑌮𑍍 । 𑌪𑍍𑌰𑌾॒𑌣𑍋 𑌵𑌾 𑌅𑌨𑍍𑌨𑌮𑍍᳚ । 𑌶𑌰𑍀॑𑌰𑌮𑌨𑍍𑌨𑌾॒𑌦𑌮𑍍 । 𑌪𑍍𑌰𑌾॒𑌣𑍇 𑌶𑌰𑍀॑𑌰॒-𑌮𑍍𑌪𑍍𑌰𑌤𑌿॑𑌷𑍍𑌠𑌿𑌤𑌮𑍍 । 𑌶𑌰𑍀॑𑌰𑍇 𑌪𑍍𑌰𑌾॒𑌣𑌃 𑌪𑍍𑌰𑌤𑌿॑𑌷𑍍𑌠𑌿𑌤𑌃 । 𑌤𑌦𑍇॒𑌤𑌦𑌨𑍍𑌨॒𑌮𑌨𑍍𑌨𑍇॒ 𑌪𑍍𑌰𑌤𑌿॑𑌷𑍍𑌠𑌿𑌤𑌮𑍍 । 𑌸 𑌯 𑌏॒𑌤𑌦𑌨𑍍𑌨॒𑌮𑌨𑍍𑌨𑍇॒ 𑌪𑍍𑌰𑌤𑌿॑𑌷𑍍𑌠𑌿𑌤𑌂॒-𑌵𑍇𑌁𑌦॒ 𑌪𑍍𑌰𑌤𑌿॑𑌤𑌿𑌷𑍍𑌠𑌤𑌿 । 𑌅𑌨𑍍𑌨॑𑌵𑌾𑌨𑌨𑍍𑌨𑌾॒𑌦𑍋 𑌭॑𑌵𑌤𑌿 । 𑌮॒𑌹𑌾𑌨𑍍𑌭॑𑌵𑌤𑌿 𑌪𑍍𑌰॒𑌜𑌯𑌾॑ 𑌪॒𑌶𑍁𑌭𑌿॑𑌰𑍍𑌬𑍍𑌰𑌹𑍍𑌮𑌵𑌰𑍍𑌚॒𑌸𑍇𑌨॑ । 𑌮॒𑌹𑌾𑌨𑍍𑌕𑍀॒𑌰𑍍𑌤𑍍𑌯𑌾 ॥ 1 ॥
𑌇𑌤𑌿 𑌸𑌪𑍍𑌤𑌮𑍋-𑌽𑌨𑍁𑌵𑌾𑌕𑌃 ॥

𑌅𑌨𑍍𑌨॒-𑌨𑍍𑌨 𑌪𑌰𑌿॑𑌚𑌕𑍍𑌷𑍀𑌤 । 𑌤𑌦𑍍𑌵𑍍𑌰॒𑌤𑌮𑍍 । 𑌆𑌪𑍋॒ 𑌵𑌾 𑌅𑌨𑍍𑌨𑌮𑍍᳚ । 𑌜𑍍𑌯𑍋𑌤𑌿॑𑌰𑌨𑍍𑌨𑌾॒𑌦𑌮𑍍 । 𑌅॒𑌪𑍍𑌸𑍁 𑌜𑍍𑌯𑍋𑌤𑌿𑌃॒ 𑌪𑍍𑌰𑌤𑌿॑𑌷𑍍𑌠𑌿𑌤𑌮𑍍 । 𑌜𑍍𑌯𑍋𑌤𑌿॒𑌷𑍍𑌯𑌾𑌪𑌃॒ 𑌪𑍍𑌰𑌤𑌿॑𑌷𑍍𑌠𑌿𑌤𑌾𑌃 । 𑌤𑌦𑍇॒𑌤𑌦𑌨𑍍𑌨॒𑌮𑌨𑍍𑌨𑍇॒ 𑌪𑍍𑌰𑌤𑌿॑𑌷𑍍𑌠𑌿𑌤𑌮𑍍 । 𑌸 𑌯 𑌏॒𑌤𑌦𑌨𑍍𑌨॒𑌮𑌨𑍍𑌨𑍇॒ 𑌪𑍍𑌰𑌤𑌿॑𑌷𑍍𑌠𑌿𑌤𑌂॒-𑌵𑍇𑌁𑌦॒ 𑌪𑍍𑌰𑌤𑌿॑𑌤𑌿𑌷𑍍𑌠𑌤𑌿 । 𑌅𑌨𑍍𑌨॑𑌵𑌾𑌨𑌨𑍍𑌨𑌾॒𑌦𑍋 𑌭॑𑌵𑌤𑌿 । 𑌮𑌹𑌾॒𑌨𑍍𑌭॑𑌵𑌤𑌿 𑌪𑍍𑌰॒𑌜𑌯𑌾॑ 𑌪॒𑌶𑍁𑌭𑌿॑𑌰𑍍𑌬𑍍𑌰𑌹𑍍𑌮𑌵𑌰𑍍𑌚॒𑌸𑍇𑌨॑ । 𑌮॒𑌹𑌾𑌨𑍍𑌕𑍀॒𑌰𑍍𑌤𑍍𑌯𑌾 ॥ 1 ॥
𑌇𑌤𑍍𑌯𑌷𑍍𑌟𑌮𑍋-𑌽𑌨𑍁𑌵𑌾𑌕𑌃 ॥

𑌅𑌨𑍍𑌨॑-𑌮𑍍𑌬॒𑌹𑍁 𑌕𑍁॑𑌰𑍍𑌵𑍀𑌤 । 𑌤𑌦𑍍𑌵𑍍𑌰॒𑌤𑌮𑍍 । 𑌪𑍃॒𑌥𑌿॒𑌵𑍀 𑌵𑌾 𑌅𑌨𑍍𑌨𑌮𑍍᳚ । 𑌆॒𑌕𑌾॒𑌶𑍋᳚-𑌽𑌨𑍍𑌨𑌾॒𑌦𑌃 । 𑌪𑍃॒𑌥𑌿॒𑌵𑍍𑌯𑌾𑌮𑌾॑𑌕𑌾॒𑌶𑌃 𑌪𑍍𑌰𑌤𑌿॑𑌷𑍍𑌠𑌿𑌤𑌃 । 𑌆॒𑌕𑌾॒𑌶𑍇 𑌪𑍃॑𑌥𑌿॒𑌵𑍀 𑌪𑍍𑌰𑌤𑌿॑𑌷𑍍𑌠𑌿𑌤𑌾 । 𑌤𑌦𑍇॒𑌤𑌦𑌨𑍍𑌨॒𑌮𑌨𑍍𑌨𑍇॒ 𑌪𑍍𑌰𑌤𑌿॑𑌷𑍍𑌠𑌿𑌤𑌮𑍍 । 𑌸 𑌯 𑌏॒𑌤𑌦𑌨𑍍𑌨॒𑌮𑌨𑍍𑌨𑍇॒ 𑌪𑍍𑌰𑌤𑌿॑𑌷𑍍𑌠𑌿𑌤𑌂॒-𑌵𑍇𑌁𑌦॒ 𑌪𑍍𑌰𑌤𑌿॑𑌤𑌿𑌷𑍍𑌠𑌤𑌿 । 𑌅𑌨𑍍𑌨॑𑌵𑌾𑌨𑌨𑍍𑌨𑌾॒𑌦𑍋 𑌭॑𑌵𑌤𑌿 । 𑌮॒𑌹𑌾𑌨𑍍𑌭॑𑌵𑌤𑌿 𑌪𑍍𑌰॒𑌜𑌯𑌾॑ 𑌪॒𑌶𑍁𑌭𑌿॑𑌰𑍍𑌬𑍍𑌰𑌹𑍍𑌮𑌵𑌰𑍍𑌚॒𑌸𑍇𑌨॑ । 𑌮॒𑌹𑌾𑌨𑍍𑌕𑍀॒𑌰𑍍𑌤𑍍𑌯𑌾 ॥ 1 ॥
𑌇𑌤𑌿 𑌨𑌵𑌮𑍋-𑌽𑌨𑍁𑌵𑌾𑌕𑌃 ॥

𑌨 𑌕𑌞𑍍𑌚𑌨 𑌵𑌸𑌤𑍌 𑌪𑍍𑌰𑌤𑍍𑌯𑌾॑𑌚𑌕𑍍𑌷𑍀॒𑌤 । 𑌤𑌦𑍍𑌵𑍍𑌰॒𑌤𑌮𑍍 । 𑌤𑌸𑍍𑌮𑌾𑌦𑍍𑌯𑌯𑌾 𑌕𑌯𑌾 𑌚 𑌵𑌿𑌧𑌯𑌾 𑌬𑌹𑍍𑌵॑𑌨𑍍𑌨-𑌮𑍍𑌪𑍍𑌰𑌾॒𑌪𑍍𑌨𑍁𑌯𑌾𑌤𑍍 । 𑌅𑌰𑌾𑌧𑍍𑌯𑌸𑍍𑌮𑌾 𑌅𑌨𑍍𑌨𑌮𑌿॑𑌤𑍍𑌯𑌾𑌚॒𑌕𑍍𑌷𑌤𑍇 । 𑌏𑌤𑌦𑍍𑌵𑍈 𑌮𑍁𑌖𑌤𑍋᳚-𑌽𑌨𑍍𑌨𑌗𑍍​𑌮𑍍 𑌰𑌾॒𑌦𑍍𑌧𑌮𑍍 । 𑌮𑍁𑌖𑌤𑍋-𑌽𑌸𑍍𑌮𑌾 𑌅॑𑌨𑍍𑌨𑌗𑍍​𑌮𑍍 𑌰𑌾॒𑌧𑍍𑌯𑌤𑍇 । 𑌏𑌤𑌦𑍍𑌵𑍈 𑌮𑌧𑍍𑌯𑌤𑍋᳚-𑌽𑌨𑍍𑌨𑌗𑍍​𑌮𑍍 𑌰𑌾॒𑌦𑍍𑌧𑌮𑍍 । 𑌮𑌧𑍍𑌯𑌤𑍋-𑌽𑌸𑍍𑌮𑌾 𑌅॑𑌨𑍍𑌨𑌗𑍍​𑌮𑍍 𑌰𑌾॒𑌧𑍍𑌯𑌤𑍇 । 𑌏𑌤𑌦𑍍𑌵𑌾 𑌅𑌨𑍍𑌤𑌤𑍋᳚-𑌽𑌨𑍍𑌨𑌗𑍍​𑌮𑍍 𑌰𑌾॒𑌦𑍍𑌧𑌮𑍍 । 𑌅𑌨𑍍𑌤𑌤𑍋-𑌽𑌸𑍍𑌮𑌾 𑌅॑𑌨𑍍𑌨𑌗𑍍​𑌮𑍍 𑌰𑌾॒𑌧𑍍𑌯𑌤𑍇 ॥ 1 ॥
𑌯 𑌏॑𑌵𑌂-𑌵𑍇𑌁॒𑌦 । 𑌕𑍍𑌷𑍇𑌮 𑌇॑𑌤𑌿 𑌵𑌾॒𑌚𑌿 । 𑌯𑍋𑌗𑌕𑍍𑌷𑍇𑌮 𑌇𑌤𑌿 𑌪𑍍𑌰𑌾॑𑌣𑌾𑌪𑌾॒𑌨𑌯𑍋𑌃 । 𑌕𑌰𑍍𑌮𑍇॑𑌤𑌿 𑌹॒𑌸𑍍𑌤𑌯𑍋𑌃 । 𑌗𑌤𑌿𑌰𑌿॑𑌤𑌿 𑌪𑌾॒𑌦𑌯𑍋𑌃 । 𑌵𑌿𑌮𑍁𑌕𑍍𑌤𑌿𑌰𑌿॑𑌤𑌿 𑌪𑌾॒𑌯𑍌 । 𑌇𑌤𑌿 𑌮𑌾𑌨𑍁𑌷𑍀᳚𑌸𑍍𑌸𑌮𑌾॒𑌜𑍍𑌞𑌾𑌃 । 𑌅𑌥 𑌦𑍈॒𑌵𑍀𑌃 । 𑌤𑍃𑌪𑍍𑌤𑌿𑌰𑌿॑𑌤𑌿 𑌵𑍃॒𑌷𑍍𑌟𑍌 । 𑌬𑌲𑌮𑌿॑𑌤𑌿 𑌵𑌿॒𑌦𑍍𑌯𑍁𑌤𑌿 ॥ 2 ॥
𑌯𑌶 𑌇॑𑌤𑌿 𑌪॒𑌶𑍁𑌷𑍁 । 𑌜𑍍𑌯𑍋𑌤𑌿𑌰𑌿𑌤𑌿 𑌨॑𑌕𑍍𑌷𑌤𑍍𑌰𑍇॒𑌷𑍁 । 𑌪𑍍𑌰𑌜𑌾𑌤𑌿𑌰𑌮𑍃𑌤𑌮𑌾𑌨𑌨𑍍𑌦 𑌇॑𑌤𑍍𑌯𑍁𑌪॒𑌸𑍍𑌥𑍇 । 𑌸𑌰𑍍𑌵𑌮𑌿॑𑌤𑍍𑌯𑌾𑌕𑌾॒𑌶𑍇 । 𑌤𑌤𑍍𑌪𑍍𑌰𑌤𑌿𑌷𑍍𑌠𑍇𑌤𑍍𑌯𑍁॑𑌪𑌾𑌸𑍀॒𑌤 । 𑌪𑍍𑌰𑌤𑌿𑌷𑍍𑌠𑌾॑𑌵𑌾𑌨𑍍𑌭॒𑌵𑌤𑌿 । 𑌤𑌨𑍍𑌮𑌹 𑌇𑌤𑍍𑌯𑍁॑𑌪𑌾𑌸𑍀॒𑌤 । 𑌮॑𑌹𑌾𑌨𑍍𑌭॒𑌵𑌤𑌿 । 𑌤𑌨𑍍𑌮𑌨 𑌇𑌤𑍍𑌯𑍁॑𑌪𑌾𑌸𑍀॒𑌤 । 𑌮𑌾𑌨॑𑌵𑌾𑌨𑍍𑌭॒𑌵𑌤𑌿 ॥ 3 ॥
𑌤𑌨𑍍𑌨𑌮 𑌇𑌤𑍍𑌯𑍁॑𑌪𑌾𑌸𑍀॒𑌤 । 𑌨𑌮𑍍𑌯𑌨𑍍𑌤𑍇᳚-𑌽𑌸𑍍𑌮𑍈 𑌕𑌾॒𑌮𑌾𑌃 । 𑌤𑌦𑍍𑌬𑍍𑌰𑌹𑍍𑌮𑍇𑌤𑍍𑌯𑍁॑𑌪𑌾𑌸𑍀॒𑌤 । 𑌬𑍍𑌰𑌹𑍍𑌮॑𑌵𑌾𑌨𑍍𑌭॒𑌵𑌤𑌿 । 𑌤𑌦𑍍𑌬𑍍𑌰𑌹𑍍𑌮𑌣𑌃 𑌪𑌰𑌿𑌮𑌰 𑌇𑌤𑍍𑌯𑍁॑𑌪𑌾𑌸𑍀॒𑌤 । 𑌪𑌰𑍍𑌯𑍇𑌣-𑌮𑍍𑌮𑍍𑌰𑌿𑌯𑌨𑍍𑌤𑍇 𑌦𑍍𑌵𑌿𑌷𑌨𑍍𑌤॑𑌸𑍍𑌸𑌪॒𑌤𑍍𑌨𑌾𑌃 । 𑌪𑌰𑌿 𑌯𑍇᳚-𑌽𑌪𑍍𑌰𑌿𑌯𑌾᳚ 𑌭𑍍𑌰𑌾𑌤𑍃॒𑌵𑍍𑌯𑌾𑌃 । 𑌸 𑌯𑌶𑍍𑌚𑌾॑𑌯-𑌮𑍍𑌪𑍁॒𑌰𑍁𑌷𑍇 । 𑌯𑌶𑍍𑌚𑌾𑌸𑌾॑𑌵𑌾𑌦𑌿॒𑌤𑍍𑌯𑍇 । 𑌸 𑌏𑌕𑌃॑ ॥ 4 ॥
𑌸 𑌯॑ 𑌏𑌵𑌂॒-𑌵𑌿𑌁𑌤𑍍 । 𑌅𑌸𑍍𑌮𑌾𑌂​𑌲𑍍𑌲𑍋𑌁॑𑌕𑌾𑌤𑍍𑌪𑍍𑌰𑍇॒𑌤𑍍𑌯 । 𑌏𑌤𑌮𑌨𑍍𑌨𑌮𑌯-𑌮𑌾𑌤𑍍𑌮𑌾𑌨𑌮𑍁𑌪॑𑌸𑌙𑍍𑌕𑍍𑌰॒𑌮𑍍𑌯 । 𑌏𑌤-𑌮𑍍𑌪𑍍𑌰𑌾𑌣𑌮𑌯-𑌮𑌾𑌤𑍍𑌮𑌾𑌨𑌮𑍁𑌪॑𑌸𑌙𑍍𑌕𑍍𑌰॒𑌮𑍍𑌯 । 𑌏𑌤-𑌮𑍍𑌮𑌨𑍋𑌮𑌯-𑌮𑌾𑌤𑍍𑌮𑌾𑌨𑌮𑍁𑌪॑𑌸𑌙𑍍𑌕𑍍𑌰॒𑌮𑍍𑌯 । 𑌏𑌤𑌂-𑌵𑌿𑌁𑌜𑍍𑌞𑌾𑌨𑌮𑌯-𑌮𑌾𑌤𑍍𑌮𑌾𑌨𑌮𑍁𑌪॑𑌸𑌙𑍍𑌕𑍍𑌰॒𑌮𑍍𑌯 । 𑌏𑌤𑌮𑌾𑌨𑌨𑍍𑌦𑌮𑌯-𑌮𑌾𑌤𑍍𑌮𑌾𑌨𑌮𑍁𑌪॑𑌸𑌙𑍍𑌕𑍍𑌰॒𑌮𑍍𑌯 । 𑌇𑌮𑌾𑌂​𑌲𑍍𑌲𑍋𑌁𑌕𑌾𑌨𑍍𑌕𑌾𑌮𑌾𑌨𑍍𑌨𑍀 -𑌕𑌾𑌮𑌰𑍂𑌪𑍍𑌯॑𑌨𑍁-𑌸॒𑌞𑍍𑌚𑌰𑌨𑍍𑌨𑍍 । 𑌏𑌤𑌥𑍍𑌸𑌾𑌮 𑌗𑌾॑𑌯𑌨𑍍𑌨𑌾॒𑌸𑍍𑌤𑍇 । 𑌹𑌾(3) 𑌵𑍁॒ 𑌹𑌾(3) 𑌵𑍁॒ 𑌹𑌾(3) 𑌵𑍁॑ ॥ 5 ॥
𑌅॒𑌹𑌮𑌨𑍍𑌨-𑌮॒𑌹𑌮𑌨𑍍𑌨-𑌮॒𑌹𑌮𑌨𑍍𑌨𑌮𑍍 । 𑌅॒𑌹𑌮𑌨𑍍𑌨𑌾॒𑌦𑍋(3)-𑌽॒𑌹𑌮𑌨𑍍𑌨𑌾॒𑌦𑍋(3)-𑌽॒𑌹𑌮𑌨𑍍𑌨𑌾॒𑌦𑌃 । 𑌅॒𑌹𑌗𑍍𑌗𑍍 𑌶𑍍𑌲𑍋𑌕॒𑌕𑍃𑌦॒𑌹𑌗𑍍𑌗𑍍 𑌶𑍍𑌲𑍋𑌕॒𑌕𑍃𑌦॒𑌹𑌗𑍍𑌗𑍍 𑌶𑍍𑌲𑍋𑌕॒𑌕𑍃𑌤𑍍 । 𑌅॒𑌹𑌮𑌸𑍍𑌮𑌿 𑌪𑍍𑌰𑌥𑌮𑌜𑌾 𑌋𑌤𑌾(3) 𑌸𑍍𑌯॒ । 𑌪𑍂𑌰𑍍𑌵-𑌨𑍍𑌦𑍇𑌵𑍇𑌭𑍍𑌯𑍋 𑌅𑌮𑍃𑌤𑌸𑍍𑌯 𑌨𑌾(3) 𑌭𑌾॒𑌯𑌿॒ । 𑌯𑍋 𑌮𑌾 𑌦𑌦𑌾𑌤𑌿 𑌸 𑌇𑌦𑍇𑌵 𑌮𑌾(3) 𑌵𑌾𑌃॒ । 𑌅॒𑌹𑌮𑌨𑍍𑌨॒-𑌮𑌨𑍍𑌨॑-𑌮॒𑌦𑌨𑍍𑌤॒𑌮𑌾(3) 𑌦𑍍𑌮𑌿॒ । 𑌅𑌹𑌂॒-𑌵𑌿𑌁𑌶𑍍𑌵॒-𑌮𑍍𑌭𑍁𑌵॑𑌨॒-𑌮𑌭𑍍𑌯॑𑌭॒𑌵𑌾𑌮𑍍 । 𑌸𑍁𑌵॒𑌰𑍍𑌨 𑌜𑍍𑌯𑍋𑌤𑍀𑌃᳚ । 𑌯 𑌏॒𑌵𑌂-𑌵𑍇𑌁𑌦॑ । 𑌇𑌤𑍍𑌯𑍁॑𑌪॒𑌨𑌿𑌷॑𑌤𑍍 ॥ 6 ॥
𑌇𑌤𑌿 𑌦𑌶𑌮𑍋-𑌽𑌨𑍁𑌵𑌾𑌕𑌃 ॥

𑌓𑌂 𑌸॒𑌹 𑌨𑌾॑𑌵𑌵𑌤𑍁 । 𑌸॒𑌹 𑌨𑍌॑ 𑌭𑍁𑌨𑌕𑍍𑌤𑍁 । 𑌸॒𑌹 𑌵𑍀॒𑌰𑍍𑌯॑-𑌙𑍍𑌕𑌰𑌵𑌾𑌵𑌹𑍈 । 𑌤𑍇॒𑌜॒𑌸𑍍𑌵𑌿𑌨𑌾॒𑌵𑌧𑍀॑𑌤𑌮𑌸𑍍𑌤𑍁॒ 𑌮𑌾 𑌵𑌿॑𑌦𑍍𑌵𑌿𑌷𑌾॒𑌵𑌹𑍈᳚ । 𑌓𑌂 𑌶𑌾𑌨𑍍𑌤𑌿॒-𑌶𑍍𑌶𑌾𑌨𑍍𑌤𑌿॒-𑌶𑍍𑌶𑌾𑌨𑍍𑌤𑌿𑌃॑ ॥

॥ 𑌹𑌰𑌿𑌃॑ 𑌓𑌮𑍍 ॥
॥ 𑌶𑍍𑌰𑍀 𑌕𑍃𑌷𑍍𑌣𑌾𑌰𑍍𑌪𑌣𑌮𑌸𑍍𑌤𑍁 ॥