કલ્યાણવૃષ્ટિભિરિવામૃતપૂરિતાભિ-
-ર્લક્ષ્મીસ્વયંવરણમંગલદીપિકાભિઃ ।
સેવાભિરંબ તવ પાદસરોજમૂલે
નાકારિ કિં મનસિ ભાગ્યવતાં જનાનામ્ ॥ 1 ॥
એતાવદેવ જનનિ સ્પૃહણીયમાસ્તે
ત્વદ્વંદનેષુ સલિલસ્થગિતે ચ નેત્રે ।
સાંનિધ્યમુદ્યદરુણાયુતસોદરસ્ય
ત્વદ્વિગ્રહસ્ય પરયા સુધયાપ્લુતસ્ય ॥ 2 ॥
ઈશત્વનામકલુષાઃ કતિ વા ન સંતિ
બ્રહ્માદયઃ પ્રતિભવં પ્રલયાભિભૂતાઃ ।
એકઃ સ એવ જનનિ સ્થિરસિદ્ધિરાસ્તે
યઃ પાદયોસ્તવ સકૃત્પ્રણતિં કરોતિ ॥ 3 ॥
લબ્ધ્વા સકૃત્ત્રિપુરસુંદરિ તાવકીનં
કારુણ્યકંદલિતકાંતિભરં કટાક્ષમ્ ।
કંદર્પકોટિસુભગાસ્ત્વયિ ભક્તિભાજઃ
સંમોહયંતિ તરુણીર્ભુવનત્રયેઽપિ ॥ 4 ॥
હ્રીંકારમેવ તવ નામ ગૃણંતિ વેદા
માતસ્ત્રિકોણનિલયે ત્રિપુરે ત્રિનેત્રે ।
ત્વત્સંસ્મૃતૌ યમભટાભિભવં વિહાય
દીવ્યંતિ નંદનવને સહ લોકપાલૈઃ ॥ 5 ॥
હંતુઃ પુરામધિગલં પરિપીયમાનઃ
ક્રૂરઃ કથં ન ભવિતા ગરલસ્ય વેગઃ ।
નાશ્વાસનાય યદિ માતરિદં તવાર્થં
દેહસ્ય શશ્વદમૃતાપ્લુતશીતલસ્ય ॥ 6 ॥
સર્વજ્ઞતાં સદસિ વાક્પટુતાં પ્રસૂતે
દેવિ ત્વદંઘ્રિસરસીરુહયોઃ પ્રણામઃ ।
કિં ચ સ્ફુરન્મકુટમુજ્જ્વલમાતપત્રં
દ્વે ચામરે ચ મહતીં વસુધાં દદાતિ ॥ 7 ॥
કલ્પદ્રુમૈરભિમતપ્રતિપાદનેષુ
કારુણ્યવારિધિભિરંબ ભવાત્કટાક્ષૈઃ ।
આલોકય ત્રિપુરસુંદરિ મામનાથં
ત્વય્યેવ ભક્તિભરિતં ત્વયિ બદ્ધતૃષ્ણમ્ ॥ 8 ॥
હંતેતરેષ્વપિ મનાંસિ નિધાય ચાન્યે
ભક્તિં વહંતિ કિલ પામરદૈવતેષુ ।
ત્વામેવ દેવિ મનસા સમનુસ્મરામિ
ત્વામેવ નૌમિ શરણં જનનિ ત્વમેવ ॥ 9 ॥
લક્ષ્યેષુ સત્સ્વપિ કટાક્ષનિરીક્ષણાના-
-માલોકય ત્રિપુરસુંદરિ માં કદાચિત્ ।
નૂનં મયા તુ સદૃશઃ કરુણૈકપાત્રં
જાતો જનિષ્યતિ જનો ન ચ જાયતે વા ॥ 10 ॥
હ્રીં હ્રીમિતિ પ્રતિદિનં જપતાં તવાખ્યાં
કિં નામ દુર્લભમિહ ત્રિપુરાધિવાસે ।
માલાકિરીટમદવારણમાનનીયા
તાન્સેવતે વસુમતી સ્વયમેવ લક્ષ્મીઃ ॥ 11 ॥
સંપત્કરાણિ સકલેંદ્રિયનંદનાનિ
સામ્રાજ્યદાનનિરતાનિ સરોરુહાક્ષિ ।
ત્વદ્વંદનાનિ દુરિતાહરણોદ્યતાનિ
મામેવ માતરનિશં કલયંતુ નાન્યમ્ ॥ 12 ॥
કલ્પોપસંહૃતિષુ કલ્પિતતાંડવસ્ય
દેવસ્ય ખંડપરશોઃ પરભૈરવસ્ય ।
પાશાંકુશૈક્ષવશરાસનપુષ્પબાણા
સા સાક્ષિણી વિજયતે તવ મૂર્તિરેકા ॥ 13 ॥
લગ્નં સદા ભવતુ માતરિદં તવાર્ધં
તેજઃ પરં બહુલકુંકુમપંકશોણમ્ ।
ભાસ્વત્કિરીટમમૃતાંશુકલાવતંસં
મધ્યે ત્રિકોણનિલયં પરમામૃતાર્દ્રમ્ ॥ 14 ॥
હ્રીંકારમેવ તવ નામ તદેવ રૂપં
ત્વન્નામ દુર્લભમિહ ત્રિપુરે ગૃણંતિ ।
ત્વત્તેજસા પરિણતં વિયદાદિભૂતં
સૌખ્યં તનોતિ સરસીરુહસંભવાદેઃ ॥ 15 ॥
હ્રીંકારત્રયસંપુટેન મહતા મંત્રેણ સંદીપિતં
સ્તોત્રં યઃ પ્રતિવાસરં તવ પુરો માતર્જપેન્મંત્રવિત્ ।
તસ્ય ક્ષોણિભુજો ભવંતિ વશગા લક્ષ્મીશ્ચિરસ્થાયિની
વાણી નિર્મલસૂક્તિભારભારિતા જાગર્તિ દીર્ઘં વયઃ ॥ 16 ॥
ઇતિ શ્રીમત્પરમહંસપરિવ્રાજકાચાર્યસ્ય શ્રીગોવિંદભગવત્પૂજ્યપાદશિષ્યસ્ય શ્રીમચ્છંકરભગવતઃ કૃતૌ કલ્યાણવૃષ્ટિ સ્તવઃ ।
