વિશ્વેશં માધવં ઢુંઢિં દંડપાણિં ચ ભૈરવમ્ ।
વંદે કાશીં ગુહાં ગંગાં ભવાનીં મણિકર્ણિકામ્ ॥ 1 ॥

ઉત્તિષ્ઠ કાશિ ભગવાન્ પ્રભુવિશ્વનાથો
ગંગોર્મિ-સંગતિ-શુભૈઃ પરિભૂષિતોઽબ્જૈઃ ।
શ્રીઢુંઢિ-ભૈરવ-મુખૈઃ સહિતાઽઽન્નપૂર્ણા
માતા ચ વાંછતિ મુદા તવ સુપ્રભાતમ્ ॥ 2 ॥

બ્રહ્મા મુરારિસ્ત્રિપુરાંતકારિઃ
ભાનુઃ શશી ભૂમિસુતો બુધશ્ચ ।
ગુરુશ્ચ શુક્રઃ શનિ-રાહુ-કેતવઃ
કુર્વંતુ સર્વે ભુવિ સુપ્રભાતમ્ ॥ 3 ॥

વારાણસી-સ્થિત-ગજાનન-ઢુંઢિરાજ
તાપત્રયાપહરણે પ્રથિત-પ્રભાવ ।
આનંદ-કંદલકુલ-પ્રસવૈકભૂમે
નિત્યં સમસ્ત-જગતઃ કુરુ સુપ્રભાતમ્ ॥ 4 ॥

બ્રહ્મદ્રવોપમિત-ગાંગ-પયઃ-પ્રવાહૈઃ
પુણ્યૈઃ સદૈવ પરિચુંબિત-પાદપદ્મે ।
મધ્યે-ઽખિલામરગણૈઃ પરિસેવ્યમાને
શ્રીકાશિકે કુરુ સદા ભુવિ સુપ્રભાતમ્ ॥ 5 ॥

પ્રત્નૈરસંખ્ય-મઠ-મંદિર-તીર્થ-કુંડ-
પ્રાસાદ-ઘટ્ટ-નિવહૈઃ વિદુષાં વરૈશ્ચ
આવર્જયસ્યખિલ-વિશ્વ-મનાંસિ નિત્યં
શ્રીકાશિકે કુરુ સદા ભુવિ સુપ્રભાતમ્ ॥ 6 ॥

કે વા નરા નુ સુધિયઃ કુધિયોઽધિયો વા
વાંછંતિ નાંતસમયે શરણં ભવત્યાઃ ।
હે કોટિ-કોટિ-જન-મુક્તિ-વિધાન-દક્ષે
શ્રીકાશિકે કુરુ સદા ભુવિ સુપ્રભાતમ્ ॥ 7 ॥

યા દેવૈરસુરૈર્મુનીંદ્રતનયૈર્ગંધર્વ-યક્ષોરગૈઃ
નાગૈર્ભૂતલવાસિભિર્દ્વિજવરૈસ્સંસેવિતા સિદ્ધયે ।
યા ગંગોત્તરવાહિની-પરિસરે તીર્થૈરસંખ્યૈર્વૃતા
સા કાશી ત્રિપુરારિરાજ-નગરી દેયાત્ સદા મંગલમ્ ॥ 8 ॥

તીર્થાનાં પ્રવરા મનોરથકરી સંસાર-પારાપરા
નંદા-નંદિ-ગણેશ્વરૈરુપહિતા દેવૈરશેષૈઃ-સ્તુતા ।
યા શંભોર્મણિ-કુંડલૈક-કણિકા વિષ્ણોસ્તપો-દીર્ઘિકા
સેયં શ્રીમણિકર્ણિકા ભગવતી દેયાત્ સદા મંગલમ્ ॥ 9 ॥

અભિનવ-બિસ-વલ્લી પાદ-પદ્મસ્ય વિષ્ણોઃ
મદન-મથન-મૌલેર્માલતી પુષ્પમાલા ।
જયતિ જય-પતાકા કાપ્યસૌ મોક્ષલક્ષ્મ્યાઃ
ક્ષપિત-કલિ-કલંકા જાહ્નવી નઃ પુનાતુ ॥ 10 ॥

ગાંગં વારિ મનોહારિ મુરારિ-ચરણચ્યુતમ્ ।
ત્રિપુરારિ-શિરશ્ચારિ પાપહારિ પુનાતુ મામ્ ॥ 11 ॥

વિઘ્નાવાસ-નિવાસકારણ-મહાગંડસ્થલાલંબિતઃ
સિંદૂરારુણ-પુંજ-ચંદ્રકિરણ-પ્રચ્છાદિ-નાગચ્છવિઃ ।
શ્રીવિઘ્નેશ્વર-વલ્લભો ગિરિજયા સાનંદમાનંદિતઃ (પાઠભેદ વિશ્વેશ્વર)
સ્મેરાસ્યસ્તવ ઢુંઢિરાજ-મુદિતો દેયાત્ સદા મંગલમ્ ॥ 12 ॥

કંઠે યસ્ય લસત્કરાલ-ગરલં ગંગાજલં મસ્તકે
વામાંગે ગિરિરાજરાજ-તનયા જાયા ભવાની સતી ।
નંદિ-સ્કંદ-ગણાધિરાજ-સહિતઃ શ્રીવિશ્વનાથપ્રભુઃ
કાશી-મંદિર-સંસ્થિતોઽખિલગુરુઃ દેયાત્ સદા મંગલમ્ ॥ 13 ॥

શ્રીવિશ્વનાથ કરુણામૃત-પૂર્ણ-સિંધો
શીતાંશુ-ખંડ-સમલંકૃત-ભવ્યચૂડ ।
ઉત્તિષ્ઠ વિશ્વજન-મંગલ-સાધનાય
નિત્યં સર્વજગતઃ કુરુ સુપ્રભાતમ્ ॥ 14 ॥

શ્રીવિશ્વનાથ વૃષભ-ધ્વજ વિશ્વવંદ્ય
સૃષ્ટિ-સ્થિતિ-પ્રલય-કારક દેવદેવ ।
વાચામગોચર મહર્ષિ-નુતાંઘ્રિ-પદ્મ
વારાણસીપુરપતે કુરુ સુપ્રભાતમ્ ॥ 15 ॥

શ્રીવિશ્વનાથ ભવભંજન દિવ્યભાવ
ગંગાધર પ્રમથ-વંદિત સુંદરાંગ ।
નાગેંદ્ર-હાર નત-ભક્ત-ભયાપહાર
વારાણસીપુરપતે કુરુ સુપ્રભાતમ્ ॥ 16 ॥

શ્રીવિશ્વનાથ તવ પાદયુગં નમામિ
નિત્યં તવૈવ શિવ નામ હૃદા સ્મરામિ ।
વાચં તવૈવ યશસાઽનઘ ભૂષયામિ
વારાણસીપુરપતે કુરુ સુપ્રભાતમ્ ॥ 17 ॥

કાશી-નિવાસ-મુનિ-સેવિત-પાદ-પદ્મ
ગંગા-જલૌઘ-પરિષિક્ત-જટાકલાપ ।
અસ્યાખિલસ્ય જગતઃ સચરાચરસ્ય
વારાણસીપુરપતે કુરુ સુપ્રભાતમ્ ॥ 18 ॥

ગંગાધરાદ્રિતનયા-પ્રિય શાંતમૂર્તે
વેદાંત-વેદ્ય સકલેશ્વર વિશ્વમૂર્તે ।
કૂટસ્થ નિત્ય નિખિલાગમ-ગીત-કીર્તે
વારાણસીપુરપતે કુરુ સુપ્રભાતમ્ ॥ 19 ॥

વિશ્વં સમસ્તમિદમદ્ય ઘનાંધકારે
મોહાત્મકે નિપતિતં જડતામુપેતમ્ ।
ભાસા વિભાસ્ય પરયા તદમોઘ-શક્તે
વારાણસીપુરપતે કુરુ સુપ્રભાતમ્ ॥ 20 ॥

સૂનુઃ સમસ્ત-જન-વિઘ્ન-વિનાશ-દક્ષો
ભાર્યાઽન્નદાન-નિરતા-ઽવિરતં જનેભ્યઃ ।
ખ્યાતઃ સ્વયં ચ શિવકૃત્ સકલાર્થિ-ભાજાં
વારાણસીપુરપતે કુરુ સુપ્રભાતમ્ ॥ 21 ॥

યે નો નમંતિ ન જપંતિ ન ચામનંતિ
નો વા લપંતિ વિલપંતિ નિવેદયંતિ ।
તેષામબોધ-શિશુ-તુલ્ય-ધિયાં નરાણાં
વારાણસીપુરપતે કુરુ સુપ્રભાતમ્ ॥ 22 ॥

શ્રીકંઠ કંઠ-ધૃત-પન્નગ નીલકંઠ
સોત્કંઠ-ભક્ત-નિવહોપહિતોપ-કંઠ ।
ભસ્માંગરાગ-પરિશોભિત-સર્વદેહ
વારાણસીપુરપતે કુરુ સુપ્રભાતમ્ ॥ 23 ॥

શ્રીપાર્વતી-હૃદય-વલ્લભ પંચ-વક્ત્ર
શ્રીનીલ-કંઠ નૃ-કપાલ-કલાપ-માલ ।
શ્રીવિશ્વનાથ મૃદુ-પંકજ-મંજુ-પાદ
વારાણસીપુરપતે કુરુ સુપ્રભાતમ્ ॥ 24 ॥

દુગ્ધ-પ્રવાહ-કમનીય-તરંગ-ભંગે
પુણ્ય-પ્રવાહ-પરિપાવિત-ભક્ત-સંગે ।
નિત્યં તપસ્વિ-જન-સેવિત-પાદ-પદ્મે
ગંગે શરણ્ય-શિવદે કુરુ સુપ્રભાતમ્ ॥ 25 ॥

સાનંદમાનંદ-વને વસંતં આનંદ-કંદં હત-પાપ-વૃંદમ્ ।
વારાણસી-નાથમનાથ-નાથં શ્રીવિશ્વનાથં શરણં પ્રપદ્યે ॥ 26 ॥

ઇતિ શ્રીકાશીવિશ્વનાથસુપ્રભાતં સંપૂર્ણમ્ ।