ದಾಲ್ಭ್ಯಃ
ಕಾರ್ಯಾರಂಭೇಷು ಸರ್ವೇಷು ದುಃಸ್ವಪ್ನೇಷು ಚ ಸತ್ತಮ ।
ಅಮಾಂಗಲ್ಯೇಷು ದೃಷ್ಟೇಷು ಯಜ್ಜಪ್ತವ್ಯಂ ತದುಚ್ಯತಾಮ್ ॥ 1 ॥

ಯೇನಾರಂಭಾಶ್ಚ ಸಿದ್ಧ್ಯಂತಿ ದುಃಸ್ವಪ್ನಶ್ಚೋಪಶಾಮ್ಯತಿ ।
ಅಮಂಗಲಾನಾಂ ದೃಷ್ಟಾನಾಂ ಪರಿಹಾರಶ್ಚ ಜಾಯತೇ ॥ 2 ॥

ಶ್ರೀ ಪುಲಸ್ತ್ಯಃ:
ಜನಾರ್ದನಂ ಭೂತಪತಿಂ ಜಗದ್ಗುರುಂ ಸ್ಮರನ್ ಮನುಷ್ಯಃ ಸತತಂ ಮಹಾಮುನೇ ।
ದುಷ್ಟಾನ್ಯಶೇಷಣ್ಯಪಹಂತಿ ಸಾಧಯತಿ ಅಶೇಷಕಾರ್ಯಾಣಿ ಚ ಯಾನ್ಯಭೀಪ್ಸತಿ ॥ 3 ॥

ಶೃಣುಷ್ವ ಚಾನ್ಯತ್ ಗದತೋ ಮಮಾಖಿಲಂ ವದಾಮಿ ಯತ್ ತೇ ದ್ವಿಜವರ್ಯ! ಮಂಗಲಮ್ ।
ಸರ್ವಾರ್ಥಸಿದ್ಧಿಂ ಪ್ರದದಾತಿ ಯತ್ ಸದಾ ನಿಹಂತ್ಯ್ಶೇಷಾಣಿ ಚ ಪಾತಕಾನಿ ॥ 4 ॥

ಪ್ರತಿಷ್ಟಿತಂ ಯತ್ರ ಜಗಚ್ಚರಾಚರಂ ಜಗತ್ತ್ರಯೇ ಯೋ ಜಗತಶ್ಚ ಹೇತುಃ ।
ಜಗಚ್ಚ ಪಾತ್ಯತ್ತಿ ಚ ಯಃ ಸ ಸರ್ವದಾ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 5 ॥

ವ್ಯೋಮಾಂಬುವಾಯ್ವಗ್ನಿಮಹೀಸ್ವರೂಪೈಃ ವಿಸ್ತಾರವಾನ್ ಯೋಽಣುತರೋಽಣುಭಾವಾತ್ ।
ಅಸ್ಥೂಲಸೂಕ್ಷ್ಮಃ ಸತತಂ ಪರೇಶ್ವರೋ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 6 ॥

ಯಸ್ಮಾತ್ ಪರಸ್ಮಾತ್ ಪುರುಷಾದನಂತಾತ್ ಅನಾದಿಮಧ್ಯಾದಧಿಕಂ ನ ಕಿಂಚಿತ್ ।
ಸ ಹೇತುಹೇತುಃ ಪರಮೇಶ್ವರೇಶ್ವರಃ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 7 ॥

ಹಿರಣ್ಯಗರ್ಭಾಚ್ಯುತರುದ್ರರೂಪೀ ಸೃಜತ್ಯಶೇಷಂ ಪರಿಪಾತಿ ಹಂತಿ ।
ಗುಣಾಗ್ರಣೀರ್ಯೋ ಭಗವಾನ್ ಸ ಸರ್ವದಾ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 8 ॥

ಪರಃ ಸುರಾಣಾಂ ಪರಮೋಽಸುರಾಣಾಂ ಪರೋ ಯತೀನಾಂ ಪರಮೋ ಮುನೀನಾಮ್ ।
ಪರಃ ಸಮಸ್ತಸ್ಯ ಚ ಯಃ ಸ ಸರ್ವದಾ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 9 ॥

ಧ್ಯಾತೋ ಮುನೀನಾಮಪಕಲ್ಮಷೈರ್ಯೋ ದದಾತಿ ಮುಕ್ತಿಂ ಪರಮೇಶ್ವರೇಶ್ವರಃ ।
ಮನೋಭಿರಾಮಃ ಪುರುಷಃ ಸ ಸರ್ವದಾ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 10 ॥

ಸುರೇಂದ್ರವೈವಸ್ವತವಿತ್ತಪಾಂಬುಪಸ್ವರೂಪರೂಪೀ ಪರಿಪಾತಿ ಯೋ ಜಗತ್ ।
ಸ ಶುದ್ಧಶುದ್ಧಃ ಪರಮೇಶ್ವರೇಶ್ವರೋ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 11 ॥

ಯನ್ನಾಮಸಂಕೀರ್ತನತೋ ವಿಮುಚ್ಯತೇ ಹ್ಯನೇಕಜನ್ಮಾರ್ಜಿತಪಾಪಸಂಚಯಾತ್ ।
ಪಾಪೇಂಧನಾಗ್ನಿಃ ಸ ಸದೈವ ನಿರ್ಮಲೋ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 12 ॥

ಯೇನೋದ್ಧೃತೇಯಂ ಧರಣೀ ರಸಾತಲಾತ್ ಅಶೇಷಸೃಷ್ಟಿಸ್ಥಿತಿಕಾರಣಾದಿಕಮ್ ।
ಬಿಭರ್ತಿ ವಿಶ್ವಂ ಜಗತಃ ಸ ಮೂಲಂ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 13 ॥

ಪಾದೇಷು ವೇದಾ ಜಠರೇ ಚರಾಚರಂ ರೋಮಸ್ವಶೇಷಾ ಮುನಯೋ ಮುಖೇ ಮಖಾಃ ।
ಯಸ್ಯೇಶ್ವರೇಶಸ್ಯ ಸ ಸರ್ವದಾ ಪ್ರಭುಃ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 14 ॥

ಸಮಸ್ತ ಯಜ್ಞಾಂಗಮಯಂ ವಪುಃ ಪ್ರಭೋಃ ಯಸ್ಯಾಂಗಮೀಶೇಶ್ವರಸಂಸ್ತುತಸ್ಯ ।
ವರಾಹರೂಪೀ ಭಗವಾನ್ ಸ ಸರ್ವದಾ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 15 ॥

ವಿಕ್ಷೋಭ್ಯ ಸರ್ವೋದಧಿತೋಯಸಂಭವಂ ದಧಾರ ಧಾತ್ರೀಂ ಜಗತಶ್ಚ ಯೋ ಭುವಮ್ ।
ಯಜ್ಞೇಶ್ವರೋ ಯಜ್ಞಪುಮಾನ್ ಸ ಸರ್ವದಾ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 16 ॥

ಪಾತಾಲಮೂಲೇಶ್ವರಭೋಗಿಸಂಹತೋ ವಿನ್ಯಸ್ಯ ಪಾದೌ ಪೃತಿವೀಂ ಚ ಬಿಭ್ರತಃ ।
ಯಸ್ಯೋಪಮಾನಂ ನ ಬಭೂವ ಸೋಽಚ್ಯುತೋ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 17 ॥

ಸಘರ್ಘರಂ ಯಸ್ಯ ಚ ಬೃಂಹಿತಂ ಮುಹುಃ ಸನಂದನಾದ್ಯೈರ್ಜನಲೋಕಸಂಶ್ರಿತೈಃ ।
ಶ್ರುತಂ ಜಯೇತ್ಯುಕ್ತಿಪರೈಃ ಸ ಸರ್ವದಾ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 18 ॥

ಏಕಾರ್ಣವಾದ್ ಯಸ್ಯ ಮಹೀಯಸೌ ಮಹೀಂ ಆದಾಯ ವೇಗೇನ ಖಮುತ್ಪತಿಷ್ಯತಃ ।
ನತಂ ವಪುರ್ಯೋಗಿವರೈಃ ಸ ಸರ್ವದಾ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 19 ॥

ಹತೋ ಹಿರಣ್ಯಾಕ್ಷಮಹಾಸುರಃ ಪುರಾ ಪುರಾಣಪುಂಸಾ ಪರಮೇಣ ಯೇನ ।
ವರಾಹರೂಪಃ ಸ ಪತಿಃ ಪ್ರಜಾಪತಿಃ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 20 ॥

ದಂಷ್ಟ್ರಾಕರಾಲಂ ಸುರಭೀತಿನಾಶಕಂ ಕೃತಂ ವಪುರ್ದಿವ್ಯನೃಸಿಂಹರೂಪಿಣಾ ।
ತ್ರಾತುಂ ಜಗತ್ ಯೇನ ಸ ಸರ್ವದಾ ಪ್ರಭುಃ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 21 ॥

ದೈತ್ಯೇಂದ್ರವಕ್ಷಃಸ್ಥಲದಾರದಾರುಣೈಃ
ಕರೇರುಹೈರ್ಯಃ ಕ್ರಕಚಾನುಕಾರಿಭಿಃ ।
ವಿಚ್ಛೇದ ಲೋಕಸ್ಯ ಭಯಾನಿ ಸೋಽಚ್ಯುತೋ
ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 22 ॥

ದಂತಾಂತದೀಪ್ತದ್ಯುತಿನಿರ್ಮಲಾನಿ ಯಃ ಚಕಾರ ಸರ್ವಾಣಿ ದಿಶಾಂ ಮುಖಾನಿ ।
ನಿನಾದವಿತ್ರಾಸಿತದಾನವೋ ಹ್ಯಸೌ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 23 ॥

ಯನ್ನಾಮಸಂಕೀರ್ತನತೋ ಮಹಾಭಯಾತ್ ವಿಮೋಕ್ಷಮಾಪ್ನೋತಿ ನ ಸಂಶಯಂ ನರಃ ।
ಸ ಸರ್ವಲೋಕಾರ್ತಿಹರೋ ನೃಕೇಸರೀ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 24 ॥

ಸಟಾಕರಾಲಭ್ರಮಣಾನಿಲಾಹತಾಃ ಸ್ಫುಟಂತಿ ಯಸ್ಯಾಂಬುಧರಾಃ ಸಮಂತತಃ ।
ಸ ದಿವ್ಯಸಿಂಹಃ ಸ್ಫುರಿತಾನಲೇಕ್ಷಣೋ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 25 ॥

ಯದೀಕ್ಷಣಜ್ಯೋತಿಷಿ ರಶ್ಮಿಮಂಡಲಂ ಪ್ರಲೀನಮೀಷನ್ನ ರರಾಜ ಭಾಸ್ವತಃ ।
ಕುತಃ ಶಶಾಂಕಸ್ಯ ಸ ದಿವ್ಯರೂಪಧೃಕ್ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 26 ॥

ಅಶೇಷದೇವೇಶನರೇಶ್ವರೇಶ್ವರೈಃ ಸದಾ ಸ್ತುತಂ ಯಚ್ಚರಿತಂ ಮಹಾದ್ಭುತಮ್ ।
ಸ ಸರ್ವಲೋಕಾರ್ತಿಹರೋ ಮಹಾಹರಿಃ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 27 ॥

ದ್ರವಂತಿ ದೈತ್ಯಾಃ ಪ್ರಣಮಂತಿ ದೇವತಾಃ ನಶ್ಯಂತಿ ರಕ್ಷಾಂಸಿ ಅಪಯಾಂತಿ ಚಾರಯಃ ।
ಯತ್ಕೀರ್ತನಾತ್ ಸೋಽದ್ಭುತರೂಪಕೇಸರೀ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 28 ॥

ಋಕ್ಪಾವಿತಂ ಯೋ ಯಜುಷಾ ಹಿ ಶ್ರೀಮತ್ ಸಾಮಧ್ವನಿಧ್ವಸ್ತಸಮಸ್ತಪಾತಕಮ್ ।
ಚಕ್ರೇ ಜಗತ್ ವಾಮನಕಃ ಸ ಸರ್ವದಾ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 29 ॥

ಯತ್ಪಾದವಿನ್ಯಾಸಪವಿತ್ರತಾಂ ಮಹೀ ಯಯೌ ವಿಯಚ್ಚರ್ಗ್ಯಜುಷಾಮುದೀರಣಾತ್ ।
ಸ ವಾಮನೋ ದಿವ್ಯಶರೀರರೂಪದೃಂ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 30 ॥

ಯಸ್ಮಿನ್ ಪ್ರಯಾತೇಽಸುರಭೂಭೃತೋಽಧ್ವರಾತ್ ನನಾಮ ಖೇದಾದವನಿಃ ಸಸಾಗರಾ ।
ಸ ವಾಮನಃ ಸರ್ವಜಗನ್ಮಯಃ ಸದಾ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 31 ॥

ಮಹಾದ್ಭುತೇ ದೈತ್ಯಪತೇರ್ಮಹಾಧ್ವರೇ ಯಸ್ಮಿನ್ ಪ್ರವಿಷ್ಟೇ ಕ್ಷುಭಿತಂ ಮಹಾಸುರೈಃ ।
ಸ ವಾಮನೋಽಂತಸ್ಥಿತಸಪ್ತಲೋಕಧೃಂ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 32 ॥

ಸಂಘೈಃ ಸುರಾಣಾಂ ದಿವಿ ಭೂತಲಸ್ಥಿತೈಃ ತಥಾ ಮನುಷ್ಯೈರ್ಗಗನೇ ಚ ಖೇಚರೈಃ ।
ಸ್ತುತಃ ಕ್ರಮಾದ್ ಯಃ ಪ್ರಚ್ಚಾರ ಸರ್ವದಾ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 33 ॥

ಕ್ರಾಂತ್ವಾ ಧರಿತ್ರೀಂ ಗಗನಂ ತಥಾ ದಿವಂ ಮರುತ್ಪತೇರ್ಯಃ ಪ್ರದದೌ ತ್ರಿವಿಷ್ಟಪಮ್ ।
ಸ ದೇವದೇವೋ ಭುವನೇಶ್ವರೇಶ್ವರೋ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 34 ॥

ಅನುಗ್ರಹಂ ಚಾಪಿ ಬಲೇರನುತ್ತ್ಮಂ ಚಕಾರ ಯಶ್ಚೇಂದ್ರಪದೋಪಮಂ ಕ್ಷಣಾತ್ ।
ಸುರಾಂಶ್ಚ ಯಜ್ಞಾಂಶಭುಜಃ ಸ ಸರ್ವದಾ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 35 ॥

ರಸಾತಲಾದ್ ಯೇನ ಪುರಾ ಸಮಾಹೃತಾಃ ಸಮಸ್ತವೇದಾ ಜಲಚಾರರಿರೂಪಿಣಾ ।
ಸ ಕೈಟಭಾರಿಮಧುಹಾಽಂಬುಶಾಯೀ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 36 ॥

ನಿಃಕ್ಷತ್ರಿಯಂ ಯಶ್ಚ ಚಕಾರ ಮೇದಿನೀಂ ಅನೇಕಶೋ ಬಾಹುವನಂ ತಥಾಽಚ್ಛಿನತ್ ।
ಯಃ ಕಾರ್ತವೀರ್ಯಸ್ಯ ಸ ಭಾರ್ಗವೋತ್ತಮೋ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 37 ॥

ನಿಹತ್ಯ ಯೋ ವಾಲಿನಮುಗ್ರವಿಕ್ರಮಂ
ನಿಬದ್ಧ್ಯ ಸೇತುಂ ಜಲಧೌ ದಶಾನನಮ್ ।
ಜಘಾನ ಚಾನ್ಯಾನ್ ರಜನೀಚರಾನ್ ಅಸೌ
ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 38 ॥

ಚಿಕ್ಷೇಪ ಬಾಲಃ ಶಕಟಂ, ಬಭಂಜ ಯೋ ಯಮಾರ್ಜುನಂ, ಕಂಸಮರಿಂ ಜಘಾನ ಚ ।
ಮಮರ್ದ ಚಾಣೂರಮುಖಾನ್ ಸ ಸರ್ವದಾ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 39 ॥

ಪ್ರಾತಃ ಸಹಸ್ರಾಂಶುಮರೀಚಿನಿರ್ಮಲಂ ಕರೇಣ ಬಿಭ್ರತ್ ಭಗವಾನ್ ಸುದರ್ಶನಮ್ ।
ಕೌಮೋದಕೀ ಚಾಪಿ ಗದಾಮನಂತೋ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 40 ॥

ಹಿಮೇಂದುಕುಂದಸ್ಫಟಿಕಾಭನಿರ್ಮಲಂ ಮುಖಾನಿಲಾಪೂರಿತಮೀಶ್ವರೇಶ್ವರಃ ।
ಮಧ್ಯಾಹ್ನಕಾಲೇಽಪಿ ಸ ಶನ್ಖಮುದ್ವಹನ್ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 41 ॥

ತಥಾಪರಾಹ್ಣೇ ಪ್ರವಿಕಾಸಿ ಪಂಕಜಂ ವಕ್ಷಸ್ಥಲೇನ ಶ್ರಿಯಮುದ್ವಹನ್ ಹರಿಃ ।
ವಿಸ್ತಾರಿಪದ್ಮಾಯತಪತ್ರಲೋಚನೋ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 42 ॥

ಸರ್ವೇಷು ಕಾಲೇಷು ಸಮಸ್ತದೇಶೇಷು ಅಶೇಷಕಾರ್ಯೇಷು ತಥೇಶ್ವರೇಶ್ವರಃ ।
ಸರ್ವೈಃ ಸ್ವರೂಪೈರ್ಭಗವಾನ್ ಅನಾದಿಮಾನ್ ಮಮಾಸ್ತು ಮಾಂಗಲ್ಯವಿವೃದ್ಧಯೇ ಹರಿಃ ॥ 43 ॥

ಏತತ್ ಪಠನ್ ದಾಲ್ಭ್ಯ ಸಮಸ್ತಪಾಪೈಃ
ವಿಮುಚ್ಯತೇ ವಿಷ್ಣುಪರೋ ಮನುಷ್ಯಃ ।
ಸಿದ್ಧ್ಯಂತಿ ಕಾರ್ಯಾಣಿ ತಥಾಽಸ್ಯ ಸರ್ವಾನ್
ಅರ್ಥಾನವಾಪ್ನೋತಿ ಯಥೇಚ್ಛತೇ ತಾನ್ ॥ 44 ॥

ದುಃಸ್ವಪ್ನಃ ಪ್ರಶಮಮುಪೈತಿ ಪಠ್ಯಮಾನೇ
ಸ್ತೋತ್ರೇಽಸ್ಮಿನ್ ಶ್ರವಣವಿಧೌ ಸದೋದ್ಯತಸ್ಯ ।
ಪ್ರಾರಂಭೋ ದ್ರುತಮುಪಯಾತಿ ಸಿದ್ಧಿಮೀಶಃ
ಪಾಪಾನಿ ಕ್ಷಪಯತಿ ಚಾಸ್ಯ ದೇವದೇವಃ ॥ 45 ॥

ಮಾಂಗಲ್ಯಂ ಪರಮಪದಂ ಸದಾಽರ್ಥಸಿದ್ಧಿಂ
ನಿರ್ವಿಘ್ನಾಮಧಿಕಫಲಾಂ ಶ್ರಿಯಂ ದದಾತಿ ।
ಕಿಂ ಲೋಕೇ ತದಿಹ ಪರತ್ರ ಚಾಪಿ ಪುಂಸಾಂ
ಯದ್ವಿಷ್ಣುಪ್ರವಣಧಿಯಾಂ ನ ದಾಲ್ಭ್ಯ! ಸಾಧ್ಯಮ್ ॥ 46 ॥

ದೇವೇಂದ್ರಸ್ತ್ರಿಭುವನಮರ್ಥಮೇಕಪಿಂಗಃ
ಸಂಸಿದ್ಧಿಂ ತ್ರಿಭುವನಗಾಂ ಚ ಕಾರ್ತವೀರ್ಯಃ ।
ವೈದೇಹಃ ಪರಮಪದಂ ಪ್ರಸಾದ್ಯ ವಿಷ್ಣುಂ
ಸಂಪ್ರಾಪ್ತಾಃ ಸಕಲಫಲಪ್ರದೋ ಹಿ ವಿಷ್ಣುಃ ॥ 47 ॥

ಸರ್ವಾರಂಭೇಷು ದಾಲ್ಭ್ಯೈತದ್ ದುಃಸ್ವಪ್ನೇಷು ಚ ಪಂಡಿತಃ ।
ಜಪೇದೇಕಮನಾ ವಿಷ್ಣೌ ತಥಾಽಮಂಗಲ್ಯದರ್ಶನೇ ॥ 48 ॥

ಶಮಂ ಪ್ರಯಾಂತಿ ದುಷ್ಟಾನಿ ಗ್ರಹಪೀಡಾಶ್ಚ ದಾರುಣಾಃ ।
ಕರ್ಮಾರಂಭಾಶ್ಚ ಸಿದ್ಧ್ಯಂತಿ ಪುಣ್ಯಮಾಪ್ನೋತಿ ಚೋತ್ತಮಮ್ ॥ 49 ॥

ಹರಿರ್ದದಾತಿ ಭದ್ರಾಣಿ ಮಂಗಲ್ಯಸ್ತುತಿಸಂಸ್ತುತಃ ।
ಕರೋತ್ಯಖಿಲರೂಪೈಸ್ತು ರಕ್ಷಾಮಕ್ಷತಶಕ್ತಿಭೃತ್ ॥ 50 ॥

॥ ಶ್ರೀವಿಷ್ಣುಧರ್ಮೋತ್ತರಾಂತರ್ಗತಃ ಮಾಂಗಲ್ಯಸ್ತವಃ ಸಂಪೂರ್ಣಃ ॥