(ಪದ್ಮಪುರಾಣ, ಉತ್ತರಖಂಡ, 245.304-318)
ದೃಷ್ಟ್ವಾ ತಸ್ಮಿನ್ ಜಲೇ ದೇವಂ ವಿಸ್ಮಯಂ ಪರಮಂ ಯಯೌ ।
ತುಷ್ಟಾವಾಥ ಯದುಶ್ರೇಷ್ಠೋ ಹರಿಂ ಸರ್ವಗಮೀಶ್ವರಮ್ ॥ 304 ॥
ಅಕ್ರೂರ ಉವಾಚ ।
ಕಾಲಾತ್ಮನೇ ನಮಸ್ತುಭ್ಯಮನಾದಿನಿಧನಾಯ ಚ ।
ಅವ್ಯಕ್ತಾಯ ನಮಸ್ತುಭ್ಯಮವಿಕಾರಾಯ ತೇ ನಮಃ ॥ 305 ॥
ಭೂತಭರ್ತ್ರೇ ನಮಸ್ತುಭ್ಯಂ ಭೂತವ್ಯಾಘ್ರ ನಮೋ ನಮಃ ।
ನಮಸ್ತೇ ಸರ್ವಭೂತಾನಾಂ ನಿಯಂತ್ರೇ ಪರಮಾತ್ಮನೇ ॥ 306 ॥
ವಿಕಾರಾಯಾವಿಕಾರಾಯ ಪ್ರತ್ಯಕ್ಷಪುರುಷಾಯ ಚ ।
ಗುಣಭರ್ತ್ರೇ ನಮಸ್ತುಭ್ಯಂ ನಿಯಮಾಯ ನಮೋ ನಮಃ ॥ 307 ॥
ದೇಶಕಾಲಾದಿನಿರ್ಭೇದರಹಿತಾಯ ಪರಾತ್ಮನೇ ।
ಅನಂತಾಯ ನಮಸ್ತುಭ್ಯಮಚ್ಯುತಾಯ ನಮೋ ನಮಃ ॥ 308 ॥
ಗೋವಿಂದಾಯ ನಮಸ್ತುಭ್ಯಂ ತ್ರಯೀನಾಥಾಯ ಶಾರಂಗಿಣೇ ।
ನಾರಾಯಣಾಯ ವಿಶ್ವಾಯ ವಾಸುದೇವಾಯ ತೇ ನಮಃ ॥ 309 ॥
ವಿಷ್ಣವೇ ಪುರುರೂಪಾಯ ಶಾಶ್ವತಾಯ ನಮೋ ನಮಃ ।
ಪದ್ಮನೇತ್ರಾಯ ನಿತ್ಯಾಯ ಶಂಖಚಕ್ರಧರಾಯ ಚ ॥ 310 ॥
ಉದ್ಯತ್ಕೋಟಿರವಿಪ್ರಖ್ಯ ಭೂಷಣಾಂಚಿತವರ್ಚಸೇ ।
ಹರಯೇ ಸರ್ವಲೋಕಾನಾಮೀಶ್ವರಾಯ ನಮೋ ನಮಃ ॥ 311 ॥
ಸವಿತ್ರೇ ಸರ್ವಜಗತಾಂ ಬೀಜಾಯ ಪರಮಾತ್ಮನೇ ।
ಸಂಕರ್ಷಣಾಯ ಕೃಷ್ಣಾಯ ಪ್ರದ್ಯುಮ್ನಾಯ ನಮೋ ನಮಃ ॥ 312 ॥
ಅನಿರುದ್ಧಾಯ ಧಾತ್ರೇ ಚ ವಿಧಾತ್ರೇ ವಿಶ್ವಯೋನಯೇ ।
ಸಹಸ್ರಮೂರ್ತ್ತಯೇ ತುಭ್ಯಂ ಬಹುಮೂರ್ದ್ಧಾಂಘ್ರಿಬಾಹವೇ ॥ 313 ॥
ಸಹಸ್ರನಾಮ್ನೇ ನಿತ್ಯಾಯ ಪುರುಷಾಯ ನಮೋ ನಮಃ ।
ನಮಸ್ತೇ ನಾಗಪರ್ಯಂಕಶಾಯಿನೇ ಸೌಮ್ಯರೂಪಿಣೇ ॥ 314 ॥
ಕೇಶವಾಯ ನಮಸ್ತುಭ್ಯಂ ಪೀತವಸ್ತ್ರಧರಾಯ ಚ ।
ಲಕ್ಷ್ಮೀಘನಕುಚಾಶ್ಲೇಷವಿಮರ್ದೋಜ್ಜ್ವಲವರ್ಚಸೇ ।
ಶ್ರೀಧರಾಯ ನಮಸ್ತುಭ್ಯಂ ಶ್ರೀಶಾಯಾನಂತರೂಪಿಣೇ ॥ 315 ॥
ಈಶ್ವರ ಉವಾಚ ।
ಸ್ನಾನಕಾಲೇ ಪಠೇದ್ಯಸ್ತು ದೇವಂ ಧ್ಯಾಯನ್ಸನಾತನಮ್ ।
ಇಮಂ ಸ್ತವಂ ನರೋ ಭಕ್ತ್ಯಾ ಮಹದ್ಭಿರ್ಮುಚ್ಯತೇ ಹ್ಯಘೈಃ ॥ 316 ॥
ಸರ್ವತೀರ್ಥಫಲಂ ಪ್ರಾಪ್ಯ ವಿಷ್ಣುಸಾಯುಜ್ಯಮಾಪ್ನುಯಾತ್ ।
ಏವಮಂತರ್ಜಲೇ ದೇವಂ ಸ್ತುತ್ವಾ ಭಾಗವತೋತ್ತಮಃ ॥ 317 ॥
ಅರ್ಚಯಾಮಾಸ ಸ ಜಲೈಃ ಕುಸುಮೈಶ್ಚ ಸುಗಂಧಿಭಿಃ ।
ಕೃತಕೃತ್ಯಸ್ತದಾಕ್ರೂರೋ ನಿರ್ಗತ್ಯ ಯಮುನಾಜಲಾತ್ ॥ 318 ॥
॥ ಇತಿ ಶ್ರೀಪದ್ಮಪುರಾಣೇ ಉತ್ತರಖಂಡೇ ಪಂಚಚತ್ವಾರಿಂಶಾಧಿಕದ್ವಿಶತತಮಾಧ್ಯಾಯಾಂತರ್ಗತಂ ಅಕ್ರೂರಕೃತಾ ಶ್ರೀಕೃಷ್ಣಸ್ತುತಿಃ ಸಮಾಪ್ತಾ ॥
