dālbhyaḥ
kāryārambhēṣu sarvēṣu duḥsvapnēṣu cha sattama ।
amāṅgalyēṣu dṛṣṭēṣu yajjaptavyaṃ taduchyatām ॥ 1 ॥

yēnārambhāścha siddhyanti duḥsvapnaśchōpaśāmyati ।
amaṅgalānāṃ dṛṣṭānāṃ parihāraścha jāyatē ॥ 2 ॥

śrī pulastyaḥ:
janārdanaṃ bhūtapatiṃ jagadguruṃ smaran manuṣyaḥ satataṃ mahāmunē ।
duṣṭānyaśēṣaṇyapahanti sādhayati aśēṣakāryāṇi cha yānyabhīpsati ॥ 3 ॥

śṛṇuṣva chānyat gadatō mamākhilaṃ vadāmi yat tē dvijavarya! maṅgalam ।
sarvārthasiddhiṃ pradadāti yat sadā nihantyśēṣāṇi cha pātakāni ॥ 4 ॥

pratiṣṭitaṃ yatra jagachcharācharaṃ jagattrayē yō jagataścha hētuḥ ।
jagachcha pātyatti cha yaḥ sa sarvadā mamāstu māṅgalyavivṛddhayē hariḥ ॥ 5 ॥

vyōmāmbuvāyvagnimahīsvarūpaiḥ vistāravān yō'ṇutarō'ṇubhāvāt ।
asthūlasūkṣmaḥ satataṃ parēśvarō mamāstu māṅgalyavivṛddhayē hariḥ ॥ 6 ॥

yasmāt parasmāt puruṣādanantāt anādimadhyādadhikaṃ na kiñchit ।
sa hētuhētuḥ paramēśvarēśvaraḥ mamāstu māṅgalyavivṛddhayē hariḥ ॥ 7 ॥

hiraṇyagarbhāchyutarudrarūpī sṛjatyaśēṣaṃ paripāti hanti ।
guṇāgraṇīryō bhagavān sa sarvadā mamāstu māṅgalyavivṛddhayē hariḥ ॥ 8 ॥

paraḥ surāṇāṃ paramō'surāṇāṃ parō yatīnāṃ paramō munīnām ।
paraḥ samastasya cha yaḥ sa sarvadā mamāstu māṅgalyavivṛddhayē hariḥ ॥ 9 ॥

dhyātō munīnāmapakalmaṣairyō dadāti muktiṃ paramēśvarēśvaraḥ ।
manōbhirāmaḥ puruṣaḥ sa sarvadā mamāstu māṅgalyavivṛddhayē hariḥ ॥ 10 ॥

surēndravaivasvatavittapāmbupasvarūparūpī paripāti yō jagat ।
sa śuddhaśuddhaḥ paramēśvarēśvarō mamāstu māṅgalyavivṛddhayē hariḥ ॥ 11 ॥

yannāmasaṅkīrtanatō vimuchyatē hyanēkajanmārjitapāpasañchayāt ।
pāpēndhanāgniḥ sa sadaiva nirmalō mamāstu māṅgalyavivṛddhayē hariḥ ॥ 12 ॥

yēnōddhṛtēyaṃ dharaṇī rasātalāt aśēṣasṛṣṭisthitikāraṇādikam ।
bibharti viśvaṃ jagataḥ sa mūlaṃ mamāstu māṅgalyavivṛddhayē hariḥ ॥ 13 ॥

pādēṣu vēdā jaṭharē charācharaṃ rōmasvaśēṣā munayō mukhē makhāḥ ।
yasyēśvarēśasya sa sarvadā prabhuḥ mamāstu māṅgalyavivṛddhayē hariḥ ॥ 14 ॥

samasta yajñāṅgamayaṃ vapuḥ prabhōḥ yasyāṅgamīśēśvarasaṃstutasya ।
varāharūpī bhagavān sa sarvadā mamāstu māṅgalyavivṛddhayē hariḥ ॥ 15 ॥

vikṣōbhya sarvōdadhitōyasambhavaṃ dadhāra dhātrīṃ jagataścha yō bhuvam ।
yajñēśvarō yajñapumān sa sarvadā mamāstu māṅgalyavivṛddhayē hariḥ ॥ 16 ॥

pātālamūlēśvarabhōgisaṃhatō vinyasya pādau pṛtivīṃ cha bibhrataḥ ।
yasyōpamānaṃ na babhūva sō'chyutō mamāstu māṅgalyavivṛddhayē hariḥ ॥ 17 ॥

saghargharaṃ yasya cha bṛṃhitaṃ muhuḥ sanandanādyairjanalōkasaṃśritaiḥ ।
śrutaṃ jayētyuktiparaiḥ sa sarvadā mamāstu māṅgalyavivṛddhayē hariḥ ॥ 18 ॥

ēkārṇavād yasya mahīyasau mahīṃ ādāya vēgēna khamutpatiṣyataḥ ।
nataṃ vapuryōgivaraiḥ sa sarvadā mamāstu māṅgalyavivṛddhayē hariḥ ॥ 19 ॥

hatō hiraṇyākṣamahāsuraḥ purā purāṇapuṃsā paramēṇa yēna ।
varāharūpaḥ sa patiḥ prajāpatiḥ mamāstu māṅgalyavivṛddhayē hariḥ ॥ 20 ॥

daṃṣṭrākarālaṃ surabhītināśakaṃ kṛtaṃ vapurdivyanṛsiṃharūpiṇā ।
trātuṃ jagat yēna sa sarvadā prabhuḥ mamāstu māṅgalyavivṛddhayē hariḥ ॥ 21 ॥

daityēndravakṣaḥsthaladāradāruṇaiḥ
karēruhairyaḥ krakachānukāribhiḥ ।
vichChēda lōkasya bhayāni sō'chyutō
mamāstu māṅgalyavivṛddhayē hariḥ ॥ 22 ॥

dantāntadīptadyutinirmalāni yaḥ chakāra sarvāṇi diśāṃ mukhāni ।
ninādavitrāsitadānavō hyasau mamāstu māṅgalyavivṛddhayē hariḥ ॥ 23 ॥

yannāmasaṅkīrtanatō mahābhayāt vimōkṣamāpnōti na saṃśayaṃ naraḥ ।
sa sarvalōkārtiharō nṛkēsarī mamāstu māṅgalyavivṛddhayē hariḥ ॥ 24 ॥

saṭākarālabhramaṇānilāhatāḥ sphuṭanti yasyāmbudharāḥ samantataḥ ।
sa divyasiṃhaḥ sphuritānalēkṣaṇō mamāstu māṅgalyavivṛddhayē hariḥ ॥ 25 ॥

yadīkṣaṇajyōtiṣi raśmimaṇḍalaṃ pralīnamīṣanna rarāja bhāsvataḥ ।
kutaḥ śaśāṅkasya sa divyarūpadhṛk mamāstu māṅgalyavivṛddhayē hariḥ ॥ 26 ॥

aśēṣadēvēśanarēśvarēśvaraiḥ sadā stutaṃ yachcharitaṃ mahādbhutam ।
sa sarvalōkārtiharō mahāhariḥ mamāstu māṅgalyavivṛddhayē hariḥ ॥ 27 ॥

dravanti daityāḥ praṇamanti dēvatāḥ naśyanti rakṣāṃsi apayānti chārayaḥ ।
yatkīrtanāt sō'dbhutarūpakēsarī mamāstu māṅgalyavivṛddhayē hariḥ ॥ 28 ॥

ṛkpāvitaṃ yō yajuṣā hi śrīmat sāmadhvanidhvastasamastapātakam ।
chakrē jagat vāmanakaḥ sa sarvadā mamāstu māṅgalyavivṛddhayē hariḥ ॥ 29 ॥

yatpādavinyāsapavitratāṃ mahī yayau viyachchargyajuṣāmudīraṇāt ।
sa vāmanō divyaśarīrarūpadṛṃ mamāstu māṅgalyavivṛddhayē hariḥ ॥ 30 ॥

yasmin prayātē'surabhūbhṛtō'dhvarāt nanāma khēdādavaniḥ sasāgarā ।
sa vāmanaḥ sarvajaganmayaḥ sadā mamāstu māṅgalyavivṛddhayē hariḥ ॥ 31 ॥

mahādbhutē daityapatērmahādhvarē yasmin praviṣṭē kṣubhitaṃ mahāsuraiḥ ।
sa vāmanō'ntasthitasaptalōkadhṛṃ mamāstu māṅgalyavivṛddhayē hariḥ ॥ 32 ॥

saṅghaiḥ surāṇāṃ divi bhūtalasthitaiḥ tathā manuṣyairgaganē cha khēcharaiḥ ।
stutaḥ kramād yaḥ prachchāra sarvadā mamāstu māṅgalyavivṛddhayē hariḥ ॥ 33 ॥

krāntvā dharitrīṃ gaganaṃ tathā divaṃ marutpatēryaḥ pradadau triviṣṭapam ।
sa dēvadēvō bhuvanēśvarēśvarō mamāstu māṅgalyavivṛddhayē hariḥ ॥ 34 ॥

anugrahaṃ chāpi balēranuttmaṃ chakāra yaśchēndrapadōpamaṃ kṣaṇāt ।
surāṃścha yajñāṃśabhujaḥ sa sarvadā mamāstu māṅgalyavivṛddhayē hariḥ ॥ 35 ॥

rasātalād yēna purā samāhṛtāḥ samastavēdā jalachārarirūpiṇā ।
sa kaiṭabhārimadhuhā'mbuśāyī mamāstu māṅgalyavivṛddhayē hariḥ ॥ 36 ॥

niḥkṣatriyaṃ yaścha chakāra mēdinīṃ anēkaśō bāhuvanaṃ tathā'chChinat ।
yaḥ kārtavīryasya sa bhārgavōttamō mamāstu māṅgalyavivṛddhayē hariḥ ॥ 37 ॥

nihatya yō vālinamugravikramaṃ
nibaddhya sētuṃ jaladhau daśānanam ।
jaghāna chānyān rajanīcharān asau
mamāstu māṅgalyavivṛddhayē hariḥ ॥ 38 ॥

chikṣēpa bālaḥ śakaṭaṃ, babhañja yō yamārjunaṃ, kaṃsamariṃ jaghāna cha ।
mamarda chāṇūramukhān sa sarvadā mamāstu māṅgalyavivṛddhayē hariḥ ॥ 39 ॥

prātaḥ sahasrāṃśumarīchinirmalaṃ karēṇa bibhrat bhagavān sudarśanam ।
kaumōdakī chāpi gadāmanantō mamāstu māṅgalyavivṛddhayē hariḥ ॥ 40 ॥

himēndukundasphaṭikābhanirmalaṃ mukhānilāpūritamīśvarēśvaraḥ ।
madhyāhnakālē'pi sa śankhamudvahan mamāstu māṅgalyavivṛddhayē hariḥ ॥ 41 ॥

tathāparāhṇē pravikāsi paṅkajaṃ vakṣasthalēna śriyamudvahan hariḥ ।
vistāripadmāyatapatralōchanō mamāstu māṅgalyavivṛddhayē hariḥ ॥ 42 ॥

sarvēṣu kālēṣu samastadēśēṣu aśēṣakāryēṣu tathēśvarēśvaraḥ ।
sarvaiḥ svarūpairbhagavān anādimān mamāstu māṅgalyavivṛddhayē hariḥ ॥ 43 ॥

ētat paṭhan dālbhya samastapāpaiḥ
vimuchyatē viṣṇuparō manuṣyaḥ ।
siddhyanti kāryāṇi tathā'sya sarvān
arthānavāpnōti yathēchChatē tān ॥ 44 ॥

duḥsvapnaḥ praśamamupaiti paṭhyamānē
stōtrē'smin śravaṇavidhau sadōdyatasya ।
prārambhō drutamupayāti siddhimīśaḥ
pāpāni kṣapayati chāsya dēvadēvaḥ ॥ 45 ॥

māṅgalyaṃ paramapadaṃ sadā'rthasiddhiṃ
nirvighnāmadhikaphalāṃ śriyaṃ dadāti ।
kiṃ lōkē tadiha paratra chāpi puṃsāṃ
yadviṣṇupravaṇadhiyāṃ na dālbhya! sādhyam ॥ 46 ॥

dēvēndrastribhuvanamarthamēkapiṅgaḥ
saṃsiddhiṃ tribhuvanagāṃ cha kārtavīryaḥ ।
vaidēhaḥ paramapadaṃ prasādya viṣṇuṃ
samprāptāḥ sakalaphalapradō hi viṣṇuḥ ॥ 47 ॥

sarvārambhēṣu dālbhyaitad duḥsvapnēṣu cha paṇḍitaḥ ।
japēdēkamanā viṣṇau tathā'maṅgalyadarśanē ॥ 48 ॥

śamaṃ prayānti duṣṭāni grahapīḍāścha dāruṇāḥ ।
karmārambhāścha siddhyanti puṇyamāpnōti chōttamam ॥ 49 ॥

harirdadāti bhadrāṇi maṅgalyastutisaṃstutaḥ ।
karōtyakhilarūpaistu rakṣāmakṣataśaktibhṛt ॥ 50 ॥

॥ śrīviṣṇudharmōttarāntargataḥ māṅgalyastavaḥ sampūrṇaḥ ॥