દાલ્ભ્યઃ
કાર્યારંભેષુ સર્વેષુ દુઃસ્વપ્નેષુ ચ સત્તમ ।
અમાંગલ્યેષુ દૃષ્ટેષુ યજ્જપ્તવ્યં તદુચ્યતામ્ ॥ 1 ॥

યેનારંભાશ્ચ સિદ્ધ્યંતિ દુઃસ્વપ્નશ્ચોપશામ્યતિ ।
અમંગલાનાં દૃષ્ટાનાં પરિહારશ્ચ જાયતે ॥ 2 ॥

શ્રી પુલસ્ત્યઃ:
જનાર્દનં ભૂતપતિં જગદ્ગુરું સ્મરન્ મનુષ્યઃ સતતં મહામુને ।
દુષ્ટાન્યશેષણ્યપહંતિ સાધયતિ અશેષકાર્યાણિ ચ યાન્યભીપ્સતિ ॥ 3 ॥

શૃણુષ્વ ચાન્યત્ ગદતો મમાખિલં વદામિ યત્ તે દ્વિજવર્ય! મંગલમ્ ।
સર્વાર્થસિદ્ધિં પ્રદદાતિ યત્ સદા નિહંત્ય્શેષાણિ ચ પાતકાનિ ॥ 4 ॥

પ્રતિષ્ટિતં યત્ર જગચ્ચરાચરં જગત્ત્રયે યો જગતશ્ચ હેતુઃ ।
જગચ્ચ પાત્યત્તિ ચ યઃ સ સર્વદા મમાસ્તુ માંગલ્યવિવૃદ્ધયે હરિઃ ॥ 5 ॥

વ્યોમાંબુવાય્વગ્નિમહીસ્વરૂપૈઃ વિસ્તારવાન્ યોઽણુતરોઽણુભાવાત્ ।
અસ્થૂલસૂક્ષ્મઃ સતતં પરેશ્વરો મમાસ્તુ માંગલ્યવિવૃદ્ધયે હરિઃ ॥ 6 ॥

યસ્માત્ પરસ્માત્ પુરુષાદનંતાત્ અનાદિમધ્યાદધિકં ન કિંચિત્ ।
સ હેતુહેતુઃ પરમેશ્વરેશ્વરઃ મમાસ્તુ માંગલ્યવિવૃદ્ધયે હરિઃ ॥ 7 ॥

હિરણ્યગર્ભાચ્યુતરુદ્રરૂપી સૃજત્યશેષં પરિપાતિ હંતિ ।
ગુણાગ્રણીર્યો ભગવાન્ સ સર્વદા મમાસ્તુ માંગલ્યવિવૃદ્ધયે હરિઃ ॥ 8 ॥

પરઃ સુરાણાં પરમોઽસુરાણાં પરો યતીનાં પરમો મુનીનામ્ ।
પરઃ સમસ્તસ્ય ચ યઃ સ સર્વદા મમાસ્તુ માંગલ્યવિવૃદ્ધયે હરિઃ ॥ 9 ॥

ધ્યાતો મુનીનામપકલ્મષૈર્યો દદાતિ મુક્તિં પરમેશ્વરેશ્વરઃ ।
મનોભિરામઃ પુરુષઃ સ સર્વદા મમાસ્તુ માંગલ્યવિવૃદ્ધયે હરિઃ ॥ 10 ॥

સુરેંદ્રવૈવસ્વતવિત્તપાંબુપસ્વરૂપરૂપી પરિપાતિ યો જગત્ ।
સ શુદ્ધશુદ્ધઃ પરમેશ્વરેશ્વરો મમાસ્તુ માંગલ્યવિવૃદ્ધયે હરિઃ ॥ 11 ॥

યન્નામસંકીર્તનતો વિમુચ્યતે હ્યનેકજન્માર્જિતપાપસંચયાત્ ।
પાપેંધનાગ્નિઃ સ સદૈવ નિર્મલો મમાસ્તુ માંગલ્યવિવૃદ્ધયે હરિઃ ॥ 12 ॥

યેનોદ્ધૃતેયં ધરણી રસાતલાત્ અશેષસૃષ્ટિસ્થિતિકારણાદિકમ્ ।
બિભર્તિ વિશ્વં જગતઃ સ મૂલં મમાસ્તુ માંગલ્યવિવૃદ્ધયે હરિઃ ॥ 13 ॥

પાદેષુ વેદા જઠરે ચરાચરં રોમસ્વશેષા મુનયો મુખે મખાઃ ।
યસ્યેશ્વરેશસ્ય સ સર્વદા પ્રભુઃ મમાસ્તુ માંગલ્યવિવૃદ્ધયે હરિઃ ॥ 14 ॥

સમસ્ત યજ્ઞાંગમયં વપુઃ પ્રભોઃ યસ્યાંગમીશેશ્વરસંસ્તુતસ્ય ।
વરાહરૂપી ભગવાન્ સ સર્વદા મમાસ્તુ માંગલ્યવિવૃદ્ધયે હરિઃ ॥ 15 ॥

વિક્ષોભ્ય સર્વોદધિતોયસંભવં દધાર ધાત્રીં જગતશ્ચ યો ભુવમ્ ।
યજ્ઞેશ્વરો યજ્ઞપુમાન્ સ સર્વદા મમાસ્તુ માંગલ્યવિવૃદ્ધયે હરિઃ ॥ 16 ॥

પાતાલમૂલેશ્વરભોગિસંહતો વિન્યસ્ય પાદૌ પૃતિવીં ચ બિભ્રતઃ ।
યસ્યોપમાનં ન બભૂવ સોઽચ્યુતો મમાસ્તુ માંગલ્યવિવૃદ્ધયે હરિઃ ॥ 17 ॥

સઘર્ઘરં યસ્ય ચ બૃંહિતં મુહુઃ સનંદનાદ્યૈર્જનલોકસંશ્રિતૈઃ ।
શ્રુતં જયેત્યુક્તિપરૈઃ સ સર્વદા મમાસ્તુ માંગલ્યવિવૃદ્ધયે હરિઃ ॥ 18 ॥

એકાર્ણવાદ્ યસ્ય મહીયસૌ મહીં આદાય વેગેન ખમુત્પતિષ્યતઃ ।
નતં વપુર્યોગિવરૈઃ સ સર્વદા મમાસ્તુ માંગલ્યવિવૃદ્ધયે હરિઃ ॥ 19 ॥

હતો હિરણ્યાક્ષમહાસુરઃ પુરા પુરાણપુંસા પરમેણ યેન ।
વરાહરૂપઃ સ પતિઃ પ્રજાપતિઃ મમાસ્તુ માંગલ્યવિવૃદ્ધયે હરિઃ ॥ 20 ॥

દંષ્ટ્રાકરાલં સુરભીતિનાશકં કૃતં વપુર્દિવ્યનૃસિંહરૂપિણા ।
ત્રાતું જગત્ યેન સ સર્વદા પ્રભુઃ મમાસ્તુ માંગલ્યવિવૃદ્ધયે હરિઃ ॥ 21 ॥

દૈત્યેંદ્રવક્ષઃસ્થલદારદારુણૈઃ
કરેરુહૈર્યઃ ક્રકચાનુકારિભિઃ ।
વિચ્છેદ લોકસ્ય ભયાનિ સોઽચ્યુતો
મમાસ્તુ માંગલ્યવિવૃદ્ધયે હરિઃ ॥ 22 ॥

દંતાંતદીપ્તદ્યુતિનિર્મલાનિ યઃ ચકાર સર્વાણિ દિશાં મુખાનિ ।
નિનાદવિત્રાસિતદાનવો હ્યસૌ મમાસ્તુ માંગલ્યવિવૃદ્ધયે હરિઃ ॥ 23 ॥

યન્નામસંકીર્તનતો મહાભયાત્ વિમોક્ષમાપ્નોતિ ન સંશયં નરઃ ।
સ સર્વલોકાર્તિહરો નૃકેસરી મમાસ્તુ માંગલ્યવિવૃદ્ધયે હરિઃ ॥ 24 ॥

સટાકરાલભ્રમણાનિલાહતાઃ સ્ફુટંતિ યસ્યાંબુધરાઃ સમંતતઃ ।
સ દિવ્યસિંહઃ સ્ફુરિતાનલેક્ષણો મમાસ્તુ માંગલ્યવિવૃદ્ધયે હરિઃ ॥ 25 ॥

યદીક્ષણજ્યોતિષિ રશ્મિમંડલં પ્રલીનમીષન્ન રરાજ ભાસ્વતઃ ।
કુતઃ શશાંકસ્ય સ દિવ્યરૂપધૃક્ મમાસ્તુ માંગલ્યવિવૃદ્ધયે હરિઃ ॥ 26 ॥

અશેષદેવેશનરેશ્વરેશ્વરૈઃ સદા સ્તુતં યચ્ચરિતં મહાદ્ભુતમ્ ।
સ સર્વલોકાર્તિહરો મહાહરિઃ મમાસ્તુ માંગલ્યવિવૃદ્ધયે હરિઃ ॥ 27 ॥

દ્રવંતિ દૈત્યાઃ પ્રણમંતિ દેવતાઃ નશ્યંતિ રક્ષાંસિ અપયાંતિ ચારયઃ ।
યત્કીર્તનાત્ સોઽદ્ભુતરૂપકેસરી મમાસ્તુ માંગલ્યવિવૃદ્ધયે હરિઃ ॥ 28 ॥

ઋક્પાવિતં યો યજુષા હિ શ્રીમત્ સામધ્વનિધ્વસ્તસમસ્તપાતકમ્ ।
ચક્રે જગત્ વામનકઃ સ સર્વદા મમાસ્તુ માંગલ્યવિવૃદ્ધયે હરિઃ ॥ 29 ॥

યત્પાદવિન્યાસપવિત્રતાં મહી યયૌ વિયચ્ચર્ગ્યજુષામુદીરણાત્ ।
સ વામનો દિવ્યશરીરરૂપદૃં મમાસ્તુ માંગલ્યવિવૃદ્ધયે હરિઃ ॥ 30 ॥

યસ્મિન્ પ્રયાતેઽસુરભૂભૃતોઽધ્વરાત્ નનામ ખેદાદવનિઃ સસાગરા ।
સ વામનઃ સર્વજગન્મયઃ સદા મમાસ્તુ માંગલ્યવિવૃદ્ધયે હરિઃ ॥ 31 ॥

મહાદ્ભુતે દૈત્યપતેર્મહાધ્વરે યસ્મિન્ પ્રવિષ્ટે ક્ષુભિતં મહાસુરૈઃ ।
સ વામનોઽંતસ્થિતસપ્તલોકધૃં મમાસ્તુ માંગલ્યવિવૃદ્ધયે હરિઃ ॥ 32 ॥

સંઘૈઃ સુરાણાં દિવિ ભૂતલસ્થિતૈઃ તથા મનુષ્યૈર્ગગને ચ ખેચરૈઃ ।
સ્તુતઃ ક્રમાદ્ યઃ પ્રચ્ચાર સર્વદા મમાસ્તુ માંગલ્યવિવૃદ્ધયે હરિઃ ॥ 33 ॥

ક્રાંત્વા ધરિત્રીં ગગનં તથા દિવં મરુત્પતેર્યઃ પ્રદદૌ ત્રિવિષ્ટપમ્ ।
સ દેવદેવો ભુવનેશ્વરેશ્વરો મમાસ્તુ માંગલ્યવિવૃદ્ધયે હરિઃ ॥ 34 ॥

અનુગ્રહં ચાપિ બલેરનુત્ત્મં ચકાર યશ્ચેંદ્રપદોપમં ક્ષણાત્ ।
સુરાંશ્ચ યજ્ઞાંશભુજઃ સ સર્વદા મમાસ્તુ માંગલ્યવિવૃદ્ધયે હરિઃ ॥ 35 ॥

રસાતલાદ્ યેન પુરા સમાહૃતાઃ સમસ્તવેદા જલચારરિરૂપિણા ।
સ કૈટભારિમધુહાઽંબુશાયી મમાસ્તુ માંગલ્યવિવૃદ્ધયે હરિઃ ॥ 36 ॥

નિઃક્ષત્રિયં યશ્ચ ચકાર મેદિનીં અનેકશો બાહુવનં તથાઽચ્છિનત્ ।
યઃ કાર્તવીર્યસ્ય સ ભાર્ગવોત્તમો મમાસ્તુ માંગલ્યવિવૃદ્ધયે હરિઃ ॥ 37 ॥

નિહત્ય યો વાલિનમુગ્રવિક્રમં
નિબદ્ધ્ય સેતું જલધૌ દશાનનમ્ ।
જઘાન ચાન્યાન્ રજનીચરાન્ અસૌ
મમાસ્તુ માંગલ્યવિવૃદ્ધયે હરિઃ ॥ 38 ॥

ચિક્ષેપ બાલઃ શકટં, બભંજ યો યમાર્જુનં, કંસમરિં જઘાન ચ ।
મમર્દ ચાણૂરમુખાન્ સ સર્વદા મમાસ્તુ માંગલ્યવિવૃદ્ધયે હરિઃ ॥ 39 ॥

પ્રાતઃ સહસ્રાંશુમરીચિનિર્મલં કરેણ બિભ્રત્ ભગવાન્ સુદર્શનમ્ ।
કૌમોદકી ચાપિ ગદામનંતો મમાસ્તુ માંગલ્યવિવૃદ્ધયે હરિઃ ॥ 40 ॥

હિમેંદુકુંદસ્ફટિકાભનિર્મલં મુખાનિલાપૂરિતમીશ્વરેશ્વરઃ ।
મધ્યાહ્નકાલેઽપિ સ શન્ખમુદ્વહન્ મમાસ્તુ માંગલ્યવિવૃદ્ધયે હરિઃ ॥ 41 ॥

તથાપરાહ્ણે પ્રવિકાસિ પંકજં વક્ષસ્થલેન શ્રિયમુદ્વહન્ હરિઃ ।
વિસ્તારિપદ્માયતપત્રલોચનો મમાસ્તુ માંગલ્યવિવૃદ્ધયે હરિઃ ॥ 42 ॥

સર્વેષુ કાલેષુ સમસ્તદેશેષુ અશેષકાર્યેષુ તથેશ્વરેશ્વરઃ ।
સર્વૈઃ સ્વરૂપૈર્ભગવાન્ અનાદિમાન્ મમાસ્તુ માંગલ્યવિવૃદ્ધયે હરિઃ ॥ 43 ॥

એતત્ પઠન્ દાલ્ભ્ય સમસ્તપાપૈઃ
વિમુચ્યતે વિષ્ણુપરો મનુષ્યઃ ।
સિદ્ધ્યંતિ કાર્યાણિ તથાઽસ્ય સર્વાન્
અર્થાનવાપ્નોતિ યથેચ્છતે તાન્ ॥ 44 ॥

દુઃસ્વપ્નઃ પ્રશમમુપૈતિ પઠ્યમાને
સ્તોત્રેઽસ્મિન્ શ્રવણવિધૌ સદોદ્યતસ્ય ।
પ્રારંભો દ્રુતમુપયાતિ સિદ્ધિમીશઃ
પાપાનિ ક્ષપયતિ ચાસ્ય દેવદેવઃ ॥ 45 ॥

માંગલ્યં પરમપદં સદાઽર્થસિદ્ધિં
નિર્વિઘ્નામધિકફલાં શ્રિયં દદાતિ ।
કિં લોકે તદિહ પરત્ર ચાપિ પુંસાં
યદ્વિષ્ણુપ્રવણધિયાં ન દાલ્ભ્ય! સાધ્યમ્ ॥ 46 ॥

દેવેંદ્રસ્ત્રિભુવનમર્થમેકપિંગઃ
સંસિદ્ધિં ત્રિભુવનગાં ચ કાર્તવીર્યઃ ।
વૈદેહઃ પરમપદં પ્રસાદ્ય વિષ્ણું
સંપ્રાપ્તાઃ સકલફલપ્રદો હિ વિષ્ણુઃ ॥ 47 ॥

સર્વારંભેષુ દાલ્ભ્યૈતદ્ દુઃસ્વપ્નેષુ ચ પંડિતઃ ।
જપેદેકમના વિષ્ણૌ તથાઽમંગલ્યદર્શને ॥ 48 ॥

શમં પ્રયાંતિ દુષ્ટાનિ ગ્રહપીડાશ્ચ દારુણાઃ ।
કર્મારંભાશ્ચ સિદ્ધ્યંતિ પુણ્યમાપ્નોતિ ચોત્તમમ્ ॥ 49 ॥

હરિર્દદાતિ ભદ્રાણિ મંગલ્યસ્તુતિસંસ્તુતઃ ।
કરોત્યખિલરૂપૈસ્તુ રક્ષામક્ષતશક્તિભૃત્ ॥ 50 ॥

॥ શ્રીવિષ્ણુધર્મોત્તરાંતર્ગતઃ માંગલ્યસ્તવઃ સંપૂર્ણઃ ॥